ব্ৰহ্মপুত্ৰ অসম আৰু অসমীয়াৰ এক এৰাব নোৱাৰা সম্পৰ্কৰে সংপৃক্ত হৈ আছে। ব্ৰহ্মপুত্ৰ হৈছে অসমীয়াৰ এক জীৱন ৰেখা। অসমৰ সংস্কৃতি আৰু সভ্যতাৰ গঢ় লৈ উঠিছে ব্ৰহ্মপুত্ৰক লৈয়ে। ব্ৰহ্মপুত্ৰক আশ্ৰয় কৰি নানা জাতি-উপজাতি অসমলৈ আহি অসমৰ বুকুত স্থায়ী ভাবে বসবাস কৰিবলৈ লৈ একতা আৰু সমন্বয়ৰে অসমীয়া জাতিক গতি প্ৰদান কৰিলে।

জনবিস্ফোৰণ আৰু আধুনিক যাতায়ত ব্যৱস্থাৰ ক্ৰম বিৱৰ্তনৰ ফলত ব্ৰহ্মপুত্ৰৰ নদী ওপৰত ইখন পিছত সিখন দলং নিৰ্মাণ হবলৈ ধৰিছে। বৰ্তমানলৈকে ব্ৰহ্মপুত্ৰৰ নদী ওপৰত নিৰ্মাণ হৈছে সাত খনকৈ বৃহৎ দলং। ইয়াৰ জৰিয়তে ব্ৰহ্মপুত্ৰৰ উত্তৰ আৰু দক্ষিণ পাৰৰ মাজত যাতায়তৰ যোগাযোগ ব্যৱস্থাটোক একেবাৰে সংকুচিত কৰি তুলিছে।ক্ৰমাগত যাতায়ত যোগাযোগ উন্নয়নৰ মাজতে পুনৰ ব্ৰহ্মপুত্ৰৰ নদী ওপৰত ৮ নং দলং নিৰ্মাণৰ দিশে অগ্ৰসৰ হৈছে বৰ্তমানৰ শাসকীয় চৰকাৰখনে।

বিশেষকৈ মুখ্যমন্ত্ৰী ড০ হিমন্ত বিশ্ব শৰ্মাৰ তৎপৰতাত মৰিগাঁও জিলাৰ প্ৰস্তাৱিত ভূৰাগাঁও আৰু খাৰুপেটিয়াৰ মাজৰ ব্ৰহ্মপুত্ৰৰ ওপৰত অসমৰ দ্বিতীয়খন সৰ্ববৃহৎ দৈৰ্ঘ্যৰ দলং নিৰ্মাণৰ প্ৰাৰম্ভিক কাম আৰম্ভ হৈছে। এই সৰ্ববৃহৎ দীঘল দলং খনৰ নিৰ্মাণৰ পূৰ্বে প্ৰাস্তাৱিত ৰাষ্ট্ৰীয় ঘাই পথ আৰু দলংৰ জৰীপৰ কাম আৰম্ভ কৰিছে ৰাষ্ট্ৰীয় ঘাই পথ প্ৰাধিকৰণ বিভাগে।

এই খবৰ প্ৰচাৰিত হোৱা পিছতেই উৎফুল্লিত হৈ পৰিছে মৰিগাঁৱৰ জনসাধাৰণ। উল্লেখ্য যে ভূৰাগাঁও আৰু খাৰুপেটিয়াৰ মাজত নিৰ্মাণ হ’বলগীয়া প্ৰস্তাৱিত দলং খনৰ দৈৰ্ঘ্য হ’ব ৭.৬৩ কিলোমিটাৰ। উল্লেখ্য যে ব্ৰহ্মপুত্ৰৰ ওপৰত নিৰ্মাণ হোৱা সৰ্ববৃহৎ দৈৰ্ঘ্যৰ ধলা-শদিয়া দলংৰ দৈৰ্ঘ্য হৈছে ৯.১৫ কিলোমিটাৰ। ইয়াৰ জৰিয়তে উত্তৰ পাৰৰ দৰং জিলাৰ খাৰুপেটিয়াক দক্ষিণ পাৰৰ মৰিগাঁও জিলাৰ ভূৰাগাঁৱৰ সৈতে সংযোগ স্থাপন হ’ব।

তেজপুৰৰ কলিয়াভোমোৰা দলংৰ বিকল্প হিচাপে কাম কৰিব লগা প্ৰস্তাৱিত দলং খনে গুৱাহাটী আৰু তেজপুৰৰ মাজৰ ১৮০ কিলোমিটাৰ দূৰত্বক ই প্ৰায় আধালৈ কমাই আনিব। আনহাতে ইয়াৰ জৰিয়তে টাৱাং আৰু পূৱ -পশ্চিম অৰুণাচল প্ৰদেশৰ ঔদ্যোগিক কৰিডৰৰ পূৱ প্ৰান্তক সংযোগ কৰাৰ লগতে উজনি অসমৰ ঘাইপথ সমূহকো সংযোগ স্থাপন কৰিব।

ইফালে বুৰঞ্জীৰ মতে ওদালগুৰিৰ উত্তৰে ভৈৰৱকুণ্ড আৰু ভূটান পাহাৰৰ মাজেৰে তাহানিৰ পৰা তিব্বত,চীন আৰু আফগানিস্তানলৈ চমু বাট আছিল বুলি উল্লেখ আছে। এনে প্ৰেক্ষাপটত ভূটানৰ লগতে অৰুণাচল প্ৰদেশত পৰ্যটন আৰু বানিজ্যত উত্থান ঘটাৰ সম্ভাৱনা আছে। প্ৰস্তাৱিত এই ৰাষ্ট্ৰীয় ঘাই পথটোৰ জৰিয়তে দেশৰ বাবে চীনৰ পৰা সীমান্ত সুৰক্ষিত কৰিবলৈ এক গুৰুত্বপূৰ্ণ পথো হৈ উঠা সম্ভাৱনা আছে।

তাৎপৰ্যপূৰ্ণ বিষয় এইয়ে যে ৩৭ নং ৰাষ্ট্ৰীয় ঘাই পথ জাগীৰোডৰ পৰা ভূৰাগাঁও হৈ ওৰাংলৈ নতুন ৰাষ্ট্ৰীয় ঘাই পথৰ প্ৰস্তাৱ ভাৰত চৰকাৰে ২০১৪ চনত গেজেটেড অধিসূচনাৰ জৰিয়তে আগবাঢ়িছিল যদিও ই স্থবিৰ হৈ আছিল। বৰ্তমানৰ শাসকীয় চৰকাৰে দেশৰ প্ৰতিৰক্ষাৰ ক্ষেত্ৰত অধিক গুৰুত্ব আৰোপ কৰি কাৰ্যকৰী দিশে অগ্ৰসৰ হৈ পথটোৰ জৰীপৰ কাম আৰম্ভ কৰিছে। ৰাষ্ট্ৰীয় ঘাইপথ প্ৰাধিকৰণৰ বিষয়াই মৰিগাঁও আৰু দৰং জিলাৰ প্ৰশাসনৰ লগত কেইবালানি আলোচনাত মিলিত হৈছে। ৰাষ্ট্ৰীয় ঘাই পথ প্ৰাধিকৰণ বিষয়াই জিলা দুখনৰ ৰাজহ, কৃষি বিভাগ, সামাজিক বনানীকৰণ বিভাগৰ সহায় বিচাৰি পৃথকে পৃথকে কেইবাখনো পত্ৰ প্ৰেৰণ কৰাৰ লগতে দুয়োখন জিলাৰ প্ৰশাসনে এই ক্ষেত্ৰত সকলো ধৰণৰ সহযোগিতা আগবঢ়োৱাৰ আশ্বাস প্ৰদান কৰিছে।

এই সকলোবোৰ প্ৰস্তুতি সম্পূর্ণ কৰি ইতিমধ্যে ৰাষ্ট্ৰীয় ঘাই পথ প্ৰাধিকৰণ বিভাগে পথ আৰু দলংৰ জৰীপৰ কাম প্ৰাৰম্ভিক পৰ্যায়ত আৰম্ভ কৰা বিষয়ে জনা গৈছে। সকলোবিলাক ঠিকেই থাকিলে ২০২৬ ৰ পূৰ্বে ভূৰাগাঁও আৰু খাৰুপেটিয়াৰ সংযোগী দলং নিৰ্মাণৰ আধাৰশিলা স্থাপন কৰাৰ সম্ভাৱনা আছে শাসকীয় চৰকাৰে।

-মিলন কাকতি,মৰিগাঁও

বালিপাৰা ফাউণ্ডেচনৰ উদ্যোগত মহানগৰীৰ গ্ৰীণ উড ৰিজৰ্তত সোমবাৰৰ পৰা দুদিনীয়া কাৰ্যসূচীৰে আৰম্ভ হোৱা ইষ্টাৰ্ণ হিমালয়ান নেচাৰনোমিক্স ফ’ৰামৰ ১১ তম সংস্কৰণৰ এই বছৰৰ মূল বিষয়টো হল ‘গ্ৰেট পিপলছ ফৰেষ্ট ২০৩০’ ৰ আহ্বান, য’ত সোমবাৰে দিনটোত ১৫ খনতকৈও অধিক দেশৰ প্ৰায় ৬০ গৰাকী লোকে অংশগ্ৰহণ কৰি বহু কেইটা গুৰুত্বপূৰ্ণ বিষয়ত গুৰুত্বপূৰ্ণ আলোচনা আগবঢ়ায়।

উল্লেখ্য যে ‘গ্ৰেট পিপলছ ফৰেষ্ট ২০৩০’ বিষয়টো বালিপাৰা ফাউণ্ডেচন আৰু কনজাৰ্ভেচন ইণ্টাৰনেচনেলৰ মাজৰ অংশীদাৰীত্বত ২০৩০ চনৰ ভিতৰত ১ নিযুত হেক্টৰ বন আৰু কৃষিভূমি পুনৰুদ্ধাৰৰ বাবে জি-২০ সন্মিলনত আৰম্ভ কৰা উচ্চাভিলাষী গ্ৰেট পিপলছ ফৰেষ্ট শীৰ্ষক উদ্যোগৰ পৰাই উদ্ভৱ হৈছে। আট্ৰি আৰু টেৰি অন্তৰ্ভুক্ত থকা অংশীদাৰসকলৰ এক মিত্ৰজোঁটৰ সৈতে এই উদ্যোগটোৱে ২০২৪ বৰ্ষত চি অ পি, ২৮ ত ইয়াৰ প্ৰথম দ্ৰুত স্কেলিং পৰ্টফলিঅ’ৰ জৰিয়তে কাম আৰম্ভ কৰাৰ লগতে এই উচ্চাভিলাষী লক্ষ্য কেনেদৰে প্ৰাপ্ত কৰিব পাৰি তাৰ বাবে মিত্ৰজোঁটক একত্ৰিত কৰাৰ ক্ষেত্ৰত এক মঞ্চ হিচাপে কাম কৰিব।

এই সন্মিলনত জলবায়ু আৰু জৈৱ বৈচিত্ৰ্যৰ ওপৰত বিশ্বব্যাপী গ্ৰহণ কৰা প্ৰতিশ্ৰুতিক কাৰ্যকৰী কৰাৰ ক্ষেত্ৰত উদ্যোগ প্ৰতিষ্ঠানসমূহে পালন কৰিব লগা গুৰুত্বপূৰ্ণ ভূমিকাৰ ওপৰত টাটা ষ্টীল ফাউণ্ডেচনৰ সঞ্চালক আৰু টাটা ষ্টীল ফাউণ্ডেচনৰ উপাধ্যক্ষ চাণক্য চৌধুৰীৰ মূল বক্তব্যৰে আৰম্ভণি হয়। ইয়াৰ পিছত এমি বঁটা বিজয়ী তথা প্ৰযোজক- পৰিচালক আৰু ৱাও মিডিয়া কমিউনিকেশ্বন গ্ৰুপৰ সহ-প্ৰতিষ্ঠাপক নিকোলাছ ক্লেক্সটনৰ দ্বাৰা পৰিচালিত এক আলোচনা চক্ৰ অনুস্থিত হয়, য’ত পূব হিমালয় অঞ্চলৰ বাবে চিঅ’পি ২৮ ৰ শেহতীয়া কাৰ্যক্ৰম আৰু ফলাফলৰ প্ৰভাৱ মূল্যায়ন কৰা হয় ।

জৈৱ বৈচিত্ৰ্যৰ প্ৰচাৰৰ বাবে বিশেষ প্ৰদক্ষেপ গ্ৰহণ কৰা দেশৰ বিশিষ্ট পৰিৱেশবিদ আৰু নৱদান্যৰ প্ৰতিষ্ঠাপক ড০ বন্দনা শিৱাই আলোচনাত ভাগ লৈ কয় যে “বনাঞ্চলৰ ক্ষেত্ৰত কোনো নিম্ন বা উৎকৃষ্ট মানদণ্ডৰ কথা নাহে। ই গণতান্ত্ৰিক স্থান। এনে ধৰণৰ পদক্ষেপৰ দ্বাৰা আমি মানুহ আৰু অৰণ্যৰ পৃথকীকৰণ বিলুপ্ত কৰাৰ প্ৰৱণতা দেখুৱাইছো। মানুহ আৰু গছ লতাৰ মাজত বিভিন্নতা অনাতকৈ সম্প্ৰীতি সৃষ্টি কৰাটো অধিক উত্তম”।

বালিপাৰা ফাউণ্ডেশ্যনৰ প্ৰতিষ্ঠাপক ৰঞ্জিত বৰঠাকুৰে আলোচনা চক্ৰত ভূটানৰ ভিজন ২০৩০ সম্পৰ্কত ভাষণ প্ৰদান কৰি কয়, “মূল্যাঙ্কন হৈছে নেচাৰনোমিক্সৰ মূল চাবিকাঠি। মূল্যৰ ওপৰত আধাৰিত নেতৃত্ব যিকোনো সফলতাৰ কাৰক হিচাপে বিবেচিত হয়।” তেওঁ লগতে কয় যে প্ৰকৃতিৰ পৰা লাভ কৰা আনন্দক যদি আমি অৰ্থনীতিলৈ পৰিবৰ্তন কৰিব পাৰো, তেনেহলে ইয়াৰ পৰাই মূল্যাংকন সৃষ্টি হয়।

আলোচনা চক্ৰত বক্তব্য ৰাখি চেণ্টাৰ পলিচী ৰিচাৰ্চৰ জ্যেষ্ঠ ভিজিতিং ফেলো গৌতম মুখোপাধ্যায়ে উল্লেখ কৰে যে “আমি জৈৱ বৈচিত্ৰ্য সন্মিলনত চি অ পি ২৭ আৰু চিঅপি ২৮ ত অনুষ্ঠিত জৈৱ বৈচিত্ৰ সন্মিলনত অৰণ্যৰ ওপৰত আমাৰ মহান প্ৰতিশ্ৰুতি প্ৰদান কৰিছো যদিও বন সংৰক্ষণ সংশোধনী আইনৰ দৰে বিষয় সমূহত আমাৰ প্ৰকৃত নীতিয়ে ইয়াৰ ওপৰত ওলোটা অগ্ৰগতিহে প্ৰদৰ্শন কৰে।”

ইষ্টাৰ্ণ হিমালয় নেচাৰনোমিক্স সন্মিলনত মঙলবাৰৰ কাৰ্যসূচীত ভূমি, শক্তি, আৱৰ্জনা, পানী, বায়ু, কাৰ্বন আৰু পূৱ হিমালয়ৰ বাবে এক গঠনমূলক ভৱিষ্যত গঢ়ি তোলাৰ ক্ষেত্ৰত তেওঁলোকৰ ভূমিকাৰ বিষয়ে অধিক আলোচনা কৰা হ’ব।

মধ্যাহ্ন ভোজনৰ ৰান্ধনী সহায়িকাৰ বাবে ভাল খবৰ।

প্ৰতিগৰাকী মধ্যাহ্ন ভোজনৰ ৰান্ধনী সহায়িকাই লাভ কৰিব অৰুণোদয় আঁচনিৰ ধন।

মধ্যাহ্ন ভোজনৰ প্ৰতিগৰাকী ৰান্ধনী সহায়িকাই নতুন বছৰৰ পৰাই লাভ কৰিব ধন।

১,৫০০ টকা মাননিৰ উপৰিও লাভ কৰিব ১,২৫০ টকা অৰুণোদয়ৰ ধন।

সকলো ৰান্ধনীয়ে লাভ কৰিব অৰুণোদয়ৰ আঁচনিৰ ধন।

১লাখ ১৮হাজাৰ ৯৯৮ গৰাকী মহিলাই লাভ কৰিব অৰুণোদয়ৰ ধন।

নিয়মীয়াকৰণ হ’ব ৰান্ধনীসকলৰ মাননী।

শিক্ষামন্ত্ৰীৰ বৈঠকৰ অন্তত সদৌ অসম ৰান্ধনী সহায়িকা সন্থাৰ এই ঘোষণা।