নৱভাৰত সাক্ষৰতা কাৰ্যক্ৰমৰ অধীনত সাক্ষৰতা সম্প্ৰসাৰণৰ অভিলাষী লক্ষ্যৰে ৰাজ্য চৰকাৰৰ শিক্ষা বিভাগ পূৰ্ণগতিত আগবাঢ়িছে। এই উদ্দেশ্যৰে অগ্ৰসৰ হৈ অসমক পূর্ণ সাক্ষৰ ৰাজ্যলৈ ৰূপান্তৰ কৰাৰ বাবে শুকুৰবাৰে কামৰূপ মহানগৰ জিলা বিদ্যালয়সমূহৰ পৰিদৰ্শকৰ কাৰ্যালয়ৰ উদ্যোগত আৰু ৰাজ্যিক সাক্ষৰতা মিছন প্ৰাধিকৰণ, অসমৰ সৌজনত দিছপুৰ মহাবিদ্যালয় প্ৰেক্ষাগৃহত জৰীপ‌কাৰীসকলৰ এক বিশেষ প্ৰশিক্ষণ কাৰ্যসূচী অনুষ্ঠিত কৰা হয়।

উক্ত প্ৰশিক্ষণ কাৰ্যসূচী শুভ উদ্বোধন কৰে অসম চৰকাৰৰ শিক্ষা বিভাগৰ মন্ত্ৰী ডা: ৰণোজ পেগুৱে। মন্ত্ৰীগৰাকীয়ে ভাষণ প্ৰসংগত উল্লেখ কৰে যে মানুহ হিচাপে আমি আমাৰ মা, দেউতা আৰু সমাজৰ পৰা জ্ঞান আৰু বুদ্ধিমত্তাৰ লাভ কৰোঁ, কিন্তু আনুষ্ঠানিক শিক্ষাৰ বাদেও নাগৰিক হিচাপে জীয়াই থাকি জীৱনৰ বাটত আগবাঢ়ি যোৱাৰ বাবে আমাক কিছু কাৰিকৰী আৰু অন্য জ্ঞানৰ প্ৰয়োজন।

তেওঁ লগতে উল্লেখ কৰে যে আমাৰ বহু মানুহে লিখিব বা পঢ়িব জানে কিন্তু কিছুমান বিষয় বুজি পোৱাত অসুবিধাৰ সন্মুখীন হয়। প্ৰতিগৰাকী নাগৰিকৰ বৰ্তমান সময়ত বিত্তীয়, আইন আৰু ডিজিটেল শিক্ষাৰ প্ৰয়োজন। গতিকে শিক্ষা বিভাগে ৰাজ্যখনৰ ১৫ পৰা ৩৫ বছৰ বয়সৰ আনুষ্ঠানিক শিক্ষাৰ পৰা বাদ পৰি যোৱা ব্যক্তিসকলক চিনাক্ত কৰি এই পদক্ষেপৰ দ্বাৰা উদ্বুদ্ধ কৰি তুলিবলৈ প্ৰয়াস কৰিব, সেয়েহে তাৰ বাবে আজি শিক্ষা বিভাগৰ বিভিন্ন পৰ্যায়ৰ বিষয়া-কৰ্মচাৰীক জৰীপৰ বাবে প্ৰশিক্ষণৰ ব্যবস্থা কৰা হৈছে।

এই অনুষ্ঠানত শিক্ষা বিভাগৰ সচিব নাৰায়ণ কোঁৱৰ, কামৰূপ মহানগৰ জিলাৰ অতিৰিক্ত আয়ুক্ত ঝর্ণা পাটগিৰি, কামৰূপ মহানগৰ বিদ্যালয়সমূহৰ পৰিদৰ্শক শ্ৰীমতী দীপিকা চৌধুৰী, দিছপুৰ মহাবিদ্যালয়ৰ অধ্যক্ষ ড০ নৱজ্যোতি বৰাৰ লগতে বহু কেইগৰাকী সমল ব্যক্তি আন বিশিষ্ট ব্যক্তিসকলৰ সৈতে উপস্থিত থাকে।

উত্তৰ গুৱাহাটীৰ আগশাৰীৰ সমাজিক সাংস্কৃতিক অনুষ্ঠান “জিলিঙনি”ৰ পঞ্চদশ বৰ্ষপূৰ্তি উপলক্ষে দুদিনীয়াকৈ আয়োজোন কৰা বৰ্ণাঢ্য কাৰ্যসূচীৰ শুকুৰবাৰে সামৰণি পৰে । সামৰণি অনুষ্ঠানৰ আৰম্ভণিতে সদ্য প্ৰয়াত উত্তৰ গুৱাহাটীৰ বিশিষ্ট সমাজকৰ্মী তথা জিলিঙণিৰ উপ সভাপতি পদ অলংকৃত কৰা যোগেশ শ‌ইকীয়াৰ প্ৰতিচ্ছবিত বন্তি প্ৰজ্বলন তথা মাল্যৰ্পন কৰে আউনীআটী উচ্চতৰ মাধ্যমিক বিদ্যালয়ৰ অৱসৰ প্ৰাপ্ত অধ্যক্ষ তথা জিলিঙণিৰ উপ-সভাপতি বাণীকান্ত চক্ৰৱৰ্তীয়ে।

ঐতিহ্যমণ্ডিত প্ৰাগজ্যোতিষপুৰ কলা পৰিষদ ভৱনত আয়োজিত সামৰণি অনুষ্ঠান সদ্য প্ৰয়াত জিলিঙণিৰ উপ-সভাপতি যোগেশ শ‌ইকীয়াৰ সোঁৱৰণত সমৰ্পণ কৰি হৈছিল। এই সামৰণি অনুষ্ঠানত বৃহত্তৰ উত্তৰ গুৱাহাটীৰ ৩৫ গৰাকী নবীন প্ৰবীণ শিল্পীক সম্বৰ্ধনা জনোৱা হয়। শিল্পী সম্বৰ্ধনা সভাত পৌৰোহিত্য কৰে জিলিঙনিৰ সভাপতি ধৈৰ্য বৰুৱাই।

আৰম্ভণিতে উদ্দেশ্যে ব্যাখ্যা কৰে জিলিঙনিৰ সম্পাদক ৰূপক ডেকাই। অনুষ্ঠানত উপস্থিত থকা উত্তৰ গুৱাহাটী মহাবিদ্যালয়ৰ অৱসৰপ্ৰাপ্ত অধ্যাপক কুকিল বৰুৱা, চন্দন কান্ত বৰুৱাকে আদি কৰি বহু বিশিষ্ট ব্যক্তি আৰু নাট্য শিল্পী হিৰণ্য বৰা, চন্দন বৰুৱা, ৰঞ্জন দাস প্ৰমুখ্যে বিশিষ্ট শিল্পী প্ৰবাস বুৰাগোহাই, কুমুদ নাথ, শ্যামল চমুৱা,গৌতম ডেকা, গিৰিন্দ্ৰ শংকৰ বৰুৱা,ৰূপাঞ্জলি বৰুৱাকে আদিকৰি বহু বিশিষ্ট ন পুৰণি শিল্পীক জিলিঙণিৰ তৰফৰ পৰা অনুষ্ঠানত সম্বৰ্দ্ধনা জনোৱা হয়।

শিল্পী ঈশান বৰুৱাই পৰিচালনা কৰা সামৰণি অনুষ্ঠানত কেইবাগৰাকী শিল্পীয়ে সুধাকন্ঠৰ গীত পৰিৱেশন কৰে । অনুষ্ঠানত জিলিঙনি শীৰ্ষক এখন স্মৰণিকাও উন্মোচন কৰা হয় ।ইফালে,”জিলিঙনি”ৰ পঞ্চদশ বৰ্ষপূৰ্তি উপলক্ষে ১৪ ডিচেম্বৰত প্ৰথম দিনা সদৌ অসম ভিত্তিত আয়োজিন কৰা ভূপেন্দ্ৰ সংগীত প্ৰতিযোগিতাত প্ৰথম স্থান অধিকাৰ কৰা বৰপেটাৰ প্ৰতীক্ষা পাঠকে।

দ্বিতীয় স্থান আৰু তৃতীয় স্থান দখল কৰে গুৱাহাটীৰ ভাৰ্গৱী গোস্বামী আৰু গুৱাহাটীৰ দেবস্মিতা কাশ্যপে । বিচাৰকৰ বিশেষ বটা লাভ কৰে নিৰ্মালি দাস আৰু ৰিজা মিৰ্ধাক আজিৰ এই সামৰণি অনুষ্ঠানত বঁটাৰ লগতে মানপত্ৰ প্ৰদান কৰা হয়। প্ৰায় অৰ্ধ শতাধিক প্ৰতিযোগীয়ে অংশগ্ৰহণ কৰা প্ৰতিযোগিতা খনত বিচাৰক হিচাপে উপস্থিত আছিল সূৰ্য গোস্বামী আৰু ৰাণু দাস বৈশ্য । প্ৰথম দিনা জিলিঙনিৰ পতাকা উত্তোলন কৰি কাৰ্যসূচীৰ শুভাৰম্ভ কৰে জিলিঙনিৰ সভাপতি ধৈৰ্য বৰুৱাই ।

কামৰূপ জিলাৰ শুৱালকুছিৰ নিকটৱৰ্তী বংশৰৰ পৰা হাজোলৈ নিৰ্মাণ কৰি থকা হৈছে ফ’ৰলেন পথৰ কাম ৷ পথটি যি ঠাইৰে নিৰ্মাণ চলি আছে সেই সমগ্ৰ অঞ্চলটি এখন বিলৰে আৱৰা ৷ বছৰি নবেম্বৰ মাহৰ পৰা ফ্ৰেব্ৰুৱাৰীলৈ সেই সমগ্ৰ বিলৰ পাৰত অসংখ্য পৰিভ্ৰমী চৰাইৰ লগতে বগলী আৰু পানী কাউৰীৰে ভৰি থাকে ৷

বিলৰ কাষত পৰা পক্ষী সকলে খাদ্যৰ অনুসন্ধান কৰাৰ লগতে দেহত ৰদৰ তাপ লয় ৷ পাখি জোকাৰী জোকাৰী ৰদৰ তাপ লোৱাটো এক সুন্দৰ দৃশ্য সেই ঠাইৰে যোৱা সকলোৱে প্ৰত্যক্ষ কৰি এক অনাবিল আনন্দ উপভোগ কৰে ৷ বিভিন্ন ৰঙীন পাখিৰ চৰাইৰে ভৰি থকা সেই বিলটোৰ ওপৰৰে চলিছে ফ’ৰলেনৰ কাম ৷ নিৰ্মাণ কাৰ্যত ব্যৱহূত ডাম্পাৰ, জেচিভি আদিৰ শব্দত শান্তি ভংগ্ন হৈছে বিলৰ পাৰত থকা চৰাইবোৰৰ ৷

ঘনে ঘনে উৰি উৰি ফুৰিব লগা হৈছে ৷ এইবোৰৰ শব্দত জিৰণি লবলৈ ভয় কৰি বহুত পক্ষী আন ঠাইলৈকে উৰি গৈছে ৷ পথটিৰ নিৰ্মাণৰ কাম শেষ হলেই সেই বিলতে হয়টো কিছুদিন পিছত নিৰ্মাণ হব পেট্ৰলপাম্ ,ৱেইব্ৰীজ,বিল্ডাৰ্চৰ দ্বাৰা নিৰ্মিত ডাঙৰ ডাঙৰ ফ্লেট আদি ৷

মানুহৰ বাবে ঠাই থিকেই থাকিব ৷ কিন্ত নাথাকিব পক্ষীৰ বিচৰণ স্হলী ৷ বিলখনৰ সৌন্দৰ্য বহন কৰা প্ৰকৃতিৰ শোভাবঢ়োৱা ঈশ্বৰৰ সৃষ্টি বগলী আৰু পানীকাউৰীৰ লগতে পৰিভ্ৰমী চৰাই জাকৰ বাবে ঠাই অকৰ অভাৱ হলে সিহত কলৈকে বাৰু উৰি যাব সেই প্ৰশ্ন প্ৰকৃতিপ্ৰেমী সকলৰ ৷ চিৰদিনৰ বাবে হেৰাই যাব সেই সুন্দৰ বিলটো আৰু চৰাইৰ জাক বোৰ ৷

বিল খালবোৰ একাকাৰ কৰি পথ নিৰ্মাণৰে মানুহে নিজৰ নিজৰ অভাৱবোৰ পূৰণ কৰিছে যদিও চৰাই চিৰকটিৰ বাবেও এবাৰ ভাবি চোৱাৰ চিন্তা নাইকীয়া হৈছে ৷ বিজ্ঞান সন্মত ভাবে অত্যাধুনিক প্ৰযুক্তিৰে পথবোৰ নিৰ্মাণ কৰিলে নিশ্চয়কৈ বিল খালবোৰ ৰক্ষা পৰিল হেতেন আৰু পক্ষী বোৰৰো বিচৰণস্হলী সুৰক্ষিত হৈ থাকিল হেতেন ! সকলোৱে বিষয়টো গভীৰ ভাৱে উপলব্ধি কৰাৰ প্ৰয়োজন আছে ৷ নহলে নতুন প্ৰজন্মই কিতাপৰ ছবিতহে চৰাইৰ অৱস্হিতি সম্পৰ্কে জানিব পাৰিব ৷

নিমাতীৰ এজন যুৱ ব্যৱসায়ীৰ প্ৰশংসনীয় পদক্ষেপে সমাজৰ আদৰ্শৰ প্ৰতিক হিচাপে চিহ্নিত হৈছে । জানিব পৰা মতে নিমাতী কমলাবাৰী ফেৰী ঘাটৰ সমীপতে নিত্য প্ৰয়োজনীয় সাগ্ৰীৰ ব্যৱসায় কৰি থকা নিমাতীৰে বাসীন্দা মিণ্টু মাধৱ দত্তই ৰাইজৰ সুবিধাৰ্থে এটি উন্নতমানৰ পকী শৌচাগাৰ আৰু প্ৰস্ৰাৱগাৰ নিজা খৰছত পকীকৈ নিৰ্মাণ কৰি দিছে ।

উল্লেখযোগ্য যে নিমাতী মাজুলী সংযোগী ব্ৰহ্মপুত্ৰৰ ফেৰী সেৱাত দৈনিক হাজাৰ হাজাৰ যাত্ৰী সেই স্থানেৰেই যোৰহাট মাজুলীলৈ অহা যোৱা কৰে । আজি বহুদিন ধৰি এটি শৌচাগাৰ আৰু প্ৰস্ৰাৱগাৰৰ অভাৱত যাত্ৰীসকলে যথেষ্ট অসুবিধাৰ সম্মুখীন হৈ আহিছিল ।

বৰ্তমানে যুৱ ব্যৱসায়ীজনে তেওঁৰ কণীষ্ঠ ভাতৃ বিজিত দত্তৰ ( ভাই ) সোঁৱৰণত ঐতিহাসিক নিমাতী কমলাবাৰী ফেৰী ঘাটৰ কাষত পানীৰ সুব্যৱস্থা সহ এটি শৌচাগাৰ আৰু প্ৰস্ৰাৱগাৰ নিৰ্মাণ কৰি দিয়ে । যাত্ৰীসকলৰ সুবিধাৰ্থে নিৰ্মাণ কৰি দিয়া প্ৰস্ৰাৱগাৰটোৱে যাত্ৰী সকলৰ দীৰ্ঘদিনীয়া সমস্যা দুৰ কৰিলে বুলি সকলোৱে মিণ্টুমাধৱ দত্তক প্ৰশংসা কৰিছে ।