মানকাচৰ আৰক্ষীৰ জালত বাংলাদেশী যুৱক। ২০০৮ চনত যুৱকজনে মানকাচৰত কৰিছিল প্ৰৱেশ ।
মিজানুৰ ৰহমান নামৰ যুৱকজনৰ ঘৰ বাংলাদেশৰ কুম্ভিৰগ্ৰাম জিলাত। মানকাচৰৰ ভুৰাকটাত বিবাহ পাতি স্থায়ীভাৱে কৰিছিল বসবাস।
ভাৰতীয় ভোটাৰ পৰিচয় পত্ৰ, আধাৰ কাৰ্ডো বনাইছিল মিজানুৰে। আৰক্ষীৰ তদন্তৰ ভিত্তিত আটক মিজানুৰ ৰহমান।
পুনৰ অৰক্ষীয়ে আটক কৰিলে বিতৰ্কিত ACS বৰেণ্য বৰঠাকুৰক। APWৰ আভিজিৎ শৰ্মাক হত্যাৰ ভাবুকি দি আটক হ’ল বৰেণ্য বৰঠাকুৰ। লগতে আটক হ’ল বৰেণ্যৰ একাউটেণ্ট দীপ কলিতা।
২৬ ছেপ্টেম্বৰত ফোন কৰি হত্যাৰ ভাবুকি দিছিল দীপ কলিতাই।। দুটা ইণ্টাৰনেশ্যনেল নম্বৰ আৰু এটা স্থানীয় ফোন নম্বৰেৰে ভাবুকি দিছিল দীপে।
প্ৰথমে আৰক্ষীয়ে আটক কৰে দীপ কলিতাক। আৰক্ষীৰ জেৰাত দীপ কলিতাই স্বীকাৰ কৰে বৰেণ্য বৰঠাকুৰৰ কথা। বৰেণ্য বৰঠাকুৰে ভাবুকি দিবলৈ নিৰ্দেশ দিয়া বুলি স্বীকাৰ দীপ কলিতাৰ।
যুদ্ধভূমি ইজৰাইলত এতিয়া সাংবাদিকৰ জীৱনো বিপন্ন হৈ পৰিছে। ইজৰাইল আৰু হামাছৰ মাজত চলি থকা যুঁজ খনে শনিবাৰে অষ্টম দিনত ভৰি দিছে। বিগত দিন কেইটাত যুদ্ধত নিহত হৈছে ৩,০০০ৰৰো অধিক লোক। ইজৰাইলৰ প্ৰতিশোধমূলক বিমান আক্ৰমণত গাজাত প্ৰতি দিনে শ শ লোক নিহত হৈছে। শেহতীয়া তথ্য অনুসৰি ইজৰাইলৰ বিমান আক্ৰমণত গাজাত ১,৫৩০ ৰো অধিক লোক নিহত হৈছে। ইজৰাইলে দাবী কৰিছে যে ইজৰাইলৰ ভিতৰত প্ৰায় ১,৫০০ হামাছ সন্ত্ৰাসবাদী নিহত হৈছে।
যুদ্ধৰ সংবাদ সংগ্ৰহ কৰা সাংবাদিকসকলৰ ওপৰত আক্ৰমণো বৃদ্ধি পাইছে। ইজৰাইলত থকা বিবিচিৰ সাংবাদিকৰ দলটোক আক্ৰমণ কৰাৰ লগতে বন্দুক দেখুৱাই আটক কৰা বুলি জানিব পৰা গৈছে। এনে পৰিস্থিতিত বিবিচিৰ এজন ক্ৰীড়া প্ৰতিবেদকে পুনৰ কেতিয়াও বিবিচিৰ বাবে কাম নকৰাৰ প্ৰতিশ্ৰুতি দিছে বুলি জানিব পৰা গৈছে। তেওঁ কৈছে যে বিবিচিয়ে স্পষ্টভাৱে হামাছক সন্ত্ৰাসবাদী বুলি ক’বলৈ অস্বীকাৰ কৰিছিল। কিন্তু ইজৰাইলত দেখা শেহতীয়া পৰিস্থিতিৰ পিছত তেওঁ বিবিচিৰ সিদ্ধান্তটো অন্যায় বুলি নিশ্চিত হৈছে।
সেয়ে তেওঁ চাকৰিটো এৰি দিবলৈ সিদ্ধান্ত লৈছে। সাংবাদিক অব্ৰাহামছে এটা সাক্ষাৎকাৰত কয় , ‘মোৰ বিশেষ আদৰ্শ আছে আৰু মই সেইবোৰৰ সৈতে আপোচ নকৰোঁ। মই ভাবো বিবিচিয়ে হামাছৰ বাবে সঠিক শব্দ ব্যৱহাৰ কৰিবলৈ অস্বীকাৰ কৰাটো উচিত নহয়। শব্দই দেখুৱায় যে আমি কি ভাবোঁ, আমি কেনে প্ৰতিক্ৰিয়া দেখুৱাওঁ আৰু ইয়াৰ বাবে আমি কেনেদৰে পদক্ষেপ লওঁ। হামাছ স্বাধীনতা সংগ্ৰামীৰ গোট নহয়, তেওঁলোক সন্ত্ৰাসবাদী’’।ইপিনে ইয়াৰ পূৰ্বে শুকুৰবাৰে দক্ষিণ লেবাননত ইজৰাইলী মিছাইলৰ আক্ৰমণত ৰয়টাৰৰ এজন ভিডিঅ’ সাংবাদিক নিহত হয় আৰু আন ছয়জন সাংবাদিক আহত হয়। আল জাজিৰা আৰু এজেঞ্চ ফ্ৰান্স-প্ৰেছকে ধৰি কেইবাটাও প্ৰতিষ্ঠানৰ সাংবাদিকৰ দলটোৱে ইজৰাইল সীমান্তৰ ওচৰৰ আলমা আল-চাবৰ ওচৰত বাতৰি সংগ্ৰহ কৰি আছিল।
অসম সাহিত্য সভাৰ তৃতীয় গৰাকী সভাপতি তথা ভাষা তত্ত্ববিদ পণ্ডিত কালিৰাম মেধিৰ কৰ্মৰাজিৰ স্মৃতিচাৰণৰ উদ্দেশ্যে খাৰঘূলি শাখা সাহিত্য সভাৰ উদ্যোগত স্হানীয় লাল সিং একাডেমী স্কুলত বাণীকান্ত চক্ৰৱৰ্তীৰ সভাপতিত্বত এখনি গুৰুত্বপূৰ্ণ সভা আজি অনুষ্ঠিত হয়। ললিত চন্দ্র ভড়ালী মহাবিদ্যালয়ৰ অৱসৰপ্ৰাপ্ত অধ্যক্ষ ডঃ গংগাপদ চৌধুৰী আৰু ভাৰতীয় প্ৰশাসনীয় সেৱাৰ অৱসৰপ্ৰাপ্ত বিষয়া ডঃ শ্যামভদ্ৰ মেধিয়ে বন্তি প্ৰজ্বলনেৰে আৰম্ভ কৰা সভা খনত মুখ্য অতিথি হিচাপে ভাষণ প্ৰদান কৰি ডঃ গংগাপদ চৌধুৰীয়ে অসমৰ তৃতীয় গৰাকী স্নাতকোত্তৰ ডিগ্রী ধাৰী কালিৰাম মেধিয়ে ব্ৰিটিছ ভাৰতৰ উপায়ুক্তৰ দৰে দায়িত্বত থাকিও কিদৰে ভাষাতত্ত্বৰ গৱেষণা কাৰ্য্য কৰিছিল সেই বিষয়ে ফহিয়াই আলোচনা কৰাৰ লগতে তেখেতৰ বিদ্যায়তনিক দিশটোৰ ওপৰতো আলোকপাত কৰে।
তেখেতে পণ্ডিত মেধিৰ অংকাৱলী গ্ৰন্থৰ বিভিন্ন দিশো পৰ্যালোচনা কৰে। সভাত কালিৰাম মেধিৰ নাতি তথা বিশিষ্ট পণ্ডিত ডঃ শ্যামভদ্ৰ মেধিয়ে কালিৰাম মেধিৰ সাহিত্যিক অৱদান সন্দৰ্ভত বিভিন্ন লেখকে বিভিন্ন সময়ত লিখা প্ৰবন্ধ সন্দৰ্ভত এক আলোচনা আগবঢ়াই এই সন্দৰ্ভত নৱ প্ৰজন্মক জাগৃত কৰাৰ ওপৰত তেও গুৰুত্ব আৰোপ কৰে।
সভাত লিখিত বক্তব্য পাঠ কৰি হেমচন্দ্র পাঠকে শ্ৰীমন্ত শংকৰদেৱ চৰ্চা, পূৰণি পুথি সম্পাদনা আৰু লক্ষ্মীনাথ বেজবৰুৱাক জন মানসত প্ৰতিষ্ঠা কৰাৰ দিশত পণ্ডিত কালিৰাম মেধিৰ অৱদানৰ সন্দৰ্ভত আলোকপাত কৰে।
সভাত ছিলঙৰ শংকৰদেৱ কলেজৰ অৱসৰপ্ৰাপ্ত অধ্যাপক অমিয় বৰ্মনে সম্প্ৰতি অসমীয়া ভাষাৰ ব্যৱহাৰৰ ক্ষেত্রত দেখা দিয়া খেলি মেলি সন্দৰ্ভত উদ্বিগ্নতা প্ৰকাশ কৰি এই ক্ষেত্রত সজাগ হবলৈ সকলকে আহ্বান জনায়। খাৰঘূলি শাখা সাহিত্য সভাৰ সম্পাদক নিতুল হাতীকাকতীয়ে আত ধৰা সভা খনত ৰজত চন্দ্র বড়োৱে এটি সংস্কৃত শ্লোক পৰিৱেশন কৰে৷ উল্লেখযোগ্য যে অহা ১৮ অক্টোবৰত পণ্ডিত কালিৰাম মেধিৰ জন্ম দিৱসৰ সৈতে ৰজিতা খুৱাই সভাখন অনুষ্ঠিত কৰা হৈছিল।
এইবাৰ পঞ্জাৱত বিজেপিত ভাঙোনে দেখা দিছে। লোকসভা নিৰ্বাচনৰ পূৰ্বে পঞ্জাৱ বিজেপিত হোৱা বৃহৎ বিভাজনে দলটোক সংকটতত পেলাইছে।পঞ্জাৱ বিজেপিৰ উপ-সভাপতিকে ধৰি কেইবাজনো প্ৰাক্তন মন্ত্ৰীয়ে দল ত্যাগ কৰি কংগ্ৰেছত যোগদান কৰিছে। বিজেপি নেতাসকলৰ লগতে শিৰোমণি আকালি দলৰ কেইবাজনো নেতাই কংগ্ৰেছত যোগদান কৰিছে।
বিজেপিৰ উপ-সভাপতি ৰাজকুমাৰ ভেৰ্কাই শনিবাৰে কংগ্ৰেছত যোগদান কৰে। দুজন প্ৰাক্তন মন্ত্ৰী বলবীৰ সিং সিদ্ধু আৰু গুৰপ্ৰীত কাংগাৰ। বিজেপিৰ উপৰি শিৰোমণি আকালি দলৰ (এছএডি) পৰাও কেইবাজনো গুৰুত্বপূৰ্ণ নেতাই কংগ্ৰেছত যোগদান কৰিছে। এই তালিকাখনত প্ৰাক্তন মন্ত্ৰী হংসৰাজ যোশী, প্ৰাক্তন বিধায়ক জিত মহিন্দৰ সিং আৰু মহিন্দৰ সিং ৰিনৱাও আছে। মোহালিৰ প্ৰাক্তন মেয়ৰ অমৰজিৎ সিঙেও কংগ্ৰেছত যোগদান কৰিছে।
কংগ্ৰেছত যোগদান কৰাসকলৰ ভিতৰত ৰাজকুমাৰ ভেৰ্কা ৰাজ্যিক বিজেপিৰ উপ-সভাপতি আছিল। ৰাজকুমাৰ প্ৰাক্তন মুখ্যমন্ত্ৰী অমৰিন্দৰ সিঙৰ এজন ঘনিষ্ঠ ব্যক্তি বুলি পৰিচিত। তেওঁ বিজেপিৰ বৰ্তমানৰ ৰাজ্যিক সভাপতি সুনীল জাখৰৰো অনুগামী। তেওঁ পূৰ্বে কংগ্ৰেছ ত্যাগ কৰি সুনীল জাখৰৰ সৈতে বিজেপিত যোগদান কৰিছিল। পিছলৈ সুনীল বিজেপিৰ সভাপতি হৈছিল আৰু ৰাজকুমাৰ বৰ্কা উপ-সভাপতি হৈছিল। অৱশ্যে, গেৰুৱা দলৰ প্ৰতি মোহভঙ্গ হোৱাৰ বাবে ৰাজকুমাৰ ভেৰ্কাই শুক্ৰবাৰে বিজেপি ত্যাগ কৰে আৰু শনিবাৰে কংগ্ৰেছত যোগদান কৰে।
গাজাত চলিছে ভয়াৱহ যুদ্ধ। ইজৰাইলী বোমাৰ দ্বাৰা হামাছৰ বায়ুসেনাৰ প্ৰধান নিহত হৈছে। ইহুদী ৰাষ্ট্ৰ খনৰ সামৰিক বাহিনীয়ে এক বিবৃতিত এই কথা প্ৰকাশ কৰিছে। ইজৰাইলী প্ৰতিৰক্ষা বাহিনীয়ে শুকুৰবাৰৰ পৰা গাজা ষ্ট্ৰিপত আক্ৰমণ চলাই আছে। ইজৰাইলৰ প্ৰতিৰক্ষা মন্ত্ৰালয়ে এক্স-হেণ্ডেলত প্ৰকাশ কৰা এক বিবৃতিত কয়, “শনিবাৰে ইজৰাইলী বায়ু সেনাই হামাছৰ মুখ্য কাৰ্যালয়ত আক্ৰমণ কৰে। ইয়াৰ পৰাই সন্ত্ৰাসবাদীসকলে সকলো সন্ত্ৰাসবাদী কাৰ্যকলাপ পৰিচালনা কৰি আহিছে। এই আক্ৰমণত হামাছৰ বায়ু সেনাৰ মুৰব্বী মুৰাদ আবু মুৰাদ নিহত হৈছে।’’ উল্লেখ্য ইজৰাইলৰ প্ৰধানমন্ত্ৰী নেতান্যাহুৱে সকলো শত্ৰুক হত্যা কৰাৰ ভাবুকি দিছিল। তেওঁ ভাবুকি দি কৈছিল, “এয়া মাত্ৰ আৰম্ভণি।”
নেতান্যাহুৱে এক বিবৃতিত হামাছক “অসৎ” আখ্যা দি কৈছিল , “আমাৰ শত্ৰুসকলে কেৱল তেওঁলোকৰ কাৰ্য্যৰ মূল্য পৰিশোধ কৰিছে।” উল্লেখ্য ইজৰাইলী সেনাই শুক্ৰবাৰে গাজা ষ্ট্ৰিপত আক্ৰমণ আৰম্ভ কৰিছিল। ইজৰাইলৰ সামৰিক মুখপাত্ৰ ৰিয়াৰ এডমিৰেল ডেনিয়েল হাগাৰীয়ে কৈছে যে ইজৰাইলী সামৰিক বাহিনীয়ে পেলেষ্টাইনী ৰকেট আক্ৰমণৰ প্ৰতিশোধ ল’বলৈ প্ৰতি আক্ৰমণ কৰিছে। ইজৰাইলৰ আক্ৰমণৰ প্ৰতি সঁহাৰি জনাই গাজাত হামাছৰ অভ্যন্তৰীণ মন্ত্ৰালয়ৰ এজন মুখপাত্ৰ য়াদ আল-বোজোমে কয় : “আমি সকলো লোকক ঘৰৰ ভিতৰত থাকিবলৈ কৈছো, তেওঁলোকে গাজা ভূখণ্ড এৰি যোৱাৰ কোনো প্ৰয়োজন নাই।”
ইহুদী ৰাষ্ট্ৰখনৰ আক্ৰমণৰ ফলত গাজাৰ বৃহৎ অংশ প্ৰায় ধ্বংসস্তূপত পৰিণত হৈছে। গাজাৰ বাসিন্দাসকলে চাৰিওফালে গুলীবৰ্ষণৰ মাজত থাকিবলগীয়া হৈছে। গাজাত এতিয়ালৈকে ১,৫০০ ৰো অধিক লোক নিহত হৈছে।
আজি মহালয়া। মাজত মাত্ৰ কেইটামান দিন বাকী শাৰদীয় দুৰ্গোৎসৱলৈ। ইতিমধ্যে মৃৎশিল্পী সকলে শেষ পৰশ দিছে দেৱীৰ মূৰ্তিত। অসমৰ দৰে এখন সমস্যাবহুল ৰাজ্যই দেৱীৰ উৎসৱৰ নামত মুক্তহস্তে উৰুৱাব কোটি কোটি টকা। একাধিক মৃন্ময় মূৰ্তি নিৰ্মানৰ বাবে চুবুৰীয়া ৰাজ্য পশ্চিমবংগৰ পৰা আমদানি কৰা হৈছে খনিকৰ। আলোকসজ্জাৰে চমক দিবলৈকো আলোক শিল্পী আমদানি কৰা হৈছে পশ্চিমবংগৰ পৰা। একেদৰে দেৱীৰ বস্ত্ৰ সম্ভাৰ, অস্ত্ৰ-শস্ত্ৰ সকলো আমদানি কৰা হয় পশ্চিমবংগৰ পৰাই। আনহাতে জনবিশ্বাস অনুসৰি দেৱীৰ মৃন্ময় মূৰ্তি নিৰ্মানৰ বাবে প্ৰয়োজন পতিতালয়ৰ মাটি। সেয়াও অনা হয় পশ্চিমবংগৰ পতিতালয়ৰ পৰা। গুৱাহাটী মহানগৰীত সাতসতাধিক পুজা অনুষ্ঠিত হব।
প্ৰতিখন পুজাৰ বাবে উদ্যোক্তা সকলে ব্যয় কৰিব সৰ্বনিম্ন ১০ লাখ টকাৰ পৰা ২৫ লাখ পৰ্যন্ত। জনসাধাৰণৰ লগতে দৰ্শকক চমক দিবলৈ পুজা মণ্ডপ সমূহ আটক ধুনীয়াকৈ সজাই তোলাৰ লগতে মণ্ডপৰ আৰ্হি সমূহো বিভিন্ন মঠ মন্দিৰৰ আৰ্হিত নিৰ্মাণ কৰা হৈছে। আনহাতে একাধিক পুজাই উদযাপন কৰিব সোনালী, হীৰক জয়ন্তী। বহু পুজা উদ্যোক্তাই সজাগতাৰ নামত দেৱীক অত্যাধুনিক ৰূপত উপস্থাপন কৰিব। ইতিমধ্যে পেঁপা,বেলুনকে ধৰি খেলনা সামগ্ৰীৰে ভৰিছে বজাৰ।
সমান্তৰাল ভাবে পকেটমাৰ, চিলনীচোৰৰো ভিৰ বাঢ়িছে বহিঃৰাজ্যৰ পৰা। তৎপৰতা বৃদ্ধি পাইছে আৰক্ষীৰ। অসমৰ দৰে সমস্যাবহুল ৰাজ্য এখনে উৎসৱ পাৰ্বনৰ নামত মুক্তহস্তে উৰুৱাই আহিছে কোটি কোটি টকা। অত্যাধুনিকতাৰ মাজত ক্ৰমে হেৰাই যোৱাৰ উপক্ৰম হৈছে আধ্যাত্মিকতা। তথাপি ভক্তগণে পৰিয়াল আৰু সমাজৰ উন্নতিৰ বাবে দেৱীৰ চৰণত এগছি বন্তি প্ৰজ্বলন কৰি আশীৰ্বাদ বিচাৰিবলৈ সাজু হৈছে । সকলো শুভচিন্তকৰ আশা দেৱীয়ে নাশ কৰক সমাজৰ অসূয়া শক্তিক। আশীৰ্বাদ কৰক এখন সুস্হ ভাতৃত্ববোধৰ সমাজ।
অশ্লীল নৃত্য সন্দৰ্ভত বোম্বাই উচ্চ ন্যায়ালয়ে এক বিশেষ ৰায় দিছে। মিনি স্কাৰ্ট পিন্ধি শৰীৰৰ উত্তেজক ভঙ্গীত নৃত্য কৰা কাৰ্যক অশ্লীল নহয়। বোম্বাই উচ্চ ন্যায়ালয়ে এই ৰায় প্ৰদান কৰিছে। উত্তেজক নৃত্য উপভোগ কৰাৰ অভিযোগত পাঁচজন ব্যক্তিৰ আৰক্ষীয়ে বিৰুদ্ধে এজাহাৰ পঞ্জীয়ন কৰাৰ পিছতে উচ্চ ন্যায়ালয়ে আৰক্ষীক তীব্ৰ সমালোচনা কৰে আৰু কয় যে মিনি স্কাৰ্ট পিন্ধি উত্তেজক নৃত্য কৰাটো অশ্লীল নহয় ।বোম্বাই আদালতৰ নাগপুৰ বিচাৰপীঠে অৱশেষত অভিযুক্তসকলৰ বিৰুদ্ধে দাখিল কৰা এজাহাৰ বাতিল কৰে। ন্যায়াধীশ বিনয় যোশী আৰু বাল্মীকি এছ এ মিনিছৰ বিচাৰপীঠে কয়, “আৰক্ষীৰ মতে, চুটি স্কাৰ্ট পিন্ধি শৰীৰৰ ভঙ্গীৰ জৰিয়তে মানুহক উত্তেজিত কৰাটো অশ্লীল। কিন্তু এনেদৰে আৰক্ষীয়ে কোনটো অশ্লীল আৰু কোনটো অশ্লীল নহয়, সেই বিষয়ত সিদ্ধান্ত ল’ব নোৱাৰে। এনেদৰে মানুহৰ ওপৰত মতামত জাপি দিয়াটো বিৰক্তিৰ কাৰণ হ’ব।”
উল্লেখ্য মে’ মাহত অভিযুক্তসকলৰ বিৰুদ্ধে আৰক্ষীয়ে দাখিল কৰা এজাহাৰ অনুসৰি, পাঁচজন অভিযুক্তই ছয়গৰাকী কম সময়ৰ মহিলাৰ নৃত্য উপভোগ কৰি আছিল। তেওঁলোকে দৰ্শকক উত্তেজিত কৰিবলৈ বিভিন্ন ধৰণে শাৰীৰিক ভংগীমা প্ৰদৰ্শন কৰিছিল। পাঁচজন অভিযুক্তই ছোৱালী কেইজনীক লক্ষ্য কৰি টকা দলিয়াই আছিল। আৰক্ষীয়ে ঘটনাস্থলীৰ পৰা তিনি বটল সুৰাও উদ্ধাৰ কৰিছিল। আৰক্ষীয়ে গোটেই ঘটনাটোক অশ্লীল বুলি অভিহিত কৰিছিল আৰু অভিযুক্তকেইজনক গ্ৰেপ্তাৰ কৰিছিল। অভিযুক্তকেইজনে তেতিয়া বোম্বাই উচ্চ ন্যায়ালয়ৰ কাষ চাপিছিল।
শুনানিৰ সময়ত বিচাৰকসকলে লক্ষ্য কৰিছিল যে বৰ্তমানৰ ভাৰতীয় সমাজে চুটি কাপোৰ, সাঁতোৰৰ পোছাক বা এনে ধৰণৰ যিকোনো পোছাক পিন্ধা মহিলাসকলক গ্ৰহণ কৰিছে। গতিকে মহিলাসকলক এনে কাপোৰ পিন্ধি নাচি থকাটো অশ্লীল হ’ব নোৱাৰে। তেওঁলোকৰ মত হৈছে যে এনে পৰিস্থিতিত ধাৰা ২৯৪ (অশ্লীলতা) প্ৰয়োগ কৰিব নোৱাৰি।
শিশুৰ মৃত্যুক কেন্দ্ৰ কৰি গোলাঘাটৰ শ্বহীদ কুশল কোঁৱৰ অসামৰিক চিকিৎসালয়ত উত্তেজনা।
চিকিৎসক-নাৰ্ছৰ গাফিলতিৰ বাবে দুমহীয়া শিশুটিৰ মৃত্যুৰ অভিযোগ।
চিকিৎসালয়খনৰ অধীক্ষকক ঘেৰাও কৰি জবাবদিহি মৃত শিশুটিৰ পৰিয়ালৰ।
