শনিবাৰে ৰহাৰ কমাৰগাঁও পঞ্চায়ত মুখৰ হৈ পৰে খোল-তাল, হৰিনামৰ ধ্বনি তথা আয়তিৰ উৰুলিৰে। মোৰ মাটি, মোৰ দেশৰ অমৃত কলহ যাত্ৰাহে আছিল এই শোভাযাত্ৰাত।

ৰহাত পঞ্চায়তে পঞ্চায়তে চলিছে এই অমৃত কলহ যাত্ৰা। শনিবাৰে ৰহাৰ কমাৰগাঁও পঞ্চায়ততো অনুষ্ঠিত হয় বিশাল অমৃত কলহ যাত্ৰা। স্থানীয় বিধায়ক শশীকান্ত দাসে এই অমৃত কলহ যাত্ৰাত অংশগ্ৰহণ কৰি পঞ্চায়তটোৰ ৰাইজৰ পদুলিয়ে পদুলিয়ে সংগ্ৰহ কৰে অমৃত কলহৰ মাটি।

বিধায়কগৰাকীৰ লগত স্থানীয় তিনি শতাধিক পুৰুষ মহিলাই অংশগ্ৰহণ কৰি শোভাযাত্ৰাৰে ভাৰত মাতাৰ জয়ধ্বনিৰে মুখৰিত কৰাৰ লগতে মহিলাসকলৰ হৰিনাম, খোল-তালৰ ধ্বনি তথা উৰুলিৰে অঞ্চলটোত এক উৎসৱমুখৰ পৰিৱেশৰ সৃষ্টি কৰে।

ৰাজ্যত পুনৰ বৃদ্ধি পালে বিদ্যুতৰ মাচুল।

প্ৰতি ইউনিটত ১.২৯ টকা পৰ্যন্ত বৃদ্ধি।

কাইলৈৰ পৰা বলৱৎ হ’ব নতুন নিৰিখ।

৩০০ ইউনিটলৈ বৃদ্ধি হ’ব ৩০ পইচাকৈ। ৩০০-৫০০ ইউনিটত বাঢ়িব ৫০ পইচাকৈ।

৫০০ৰ অধিক ইউনিটত বাঢ়িব ১.২৯ টকাকৈ।

বাণিজ্যিক আৰু ঔদ্যোগিক ক্ষেত্ৰত বাঢ়িব ১.২৯ টকাকৈ ।

নৱ নিৰ্মিত দৰং জিলাৰ শিলবৰী গাঁও পঞ্চায়তৰ প্ৰেক্ষাগৃহত শিলবৰীৰ যুৱ সমাজ কৰ্মী হেবজুৰ ৰহমানৰ সভাপতিত্বত শিলবৰী আৰক্ষী চকীৰ গাঁওৰক্ষী সংগঠন আৰু শিলবৰী আৰক্ষী চকীৰ সহযোগত নাৰী শিক্ষা‌,শিশু শ্ৰমিক, বাল্য বিবাহ, ড্ৰাগছ, মদ ভাং আদি নিৰ্মূল কৰাৰ উদ্দেশ্যে আবেলি তিনি বজাত এক বিশাল সজাগতা সভা অনুষ্ঠিত হয়।

সভাত বৃহত্তৰ শিলবৰী অঞ্চলৰ বিভিন্ন গাঁৱৰ,মাতৃ গোটৰ সভানেত্ৰী, সম্পাদিকা, সদস্য, অংগনাবাড়ী কৰ্মী,আশাকৰ্মী আদি কৰি প্ৰায় চাৰি শতাধিক মহিলাৰ উপস্থিত এক গুৰুত্বপূৰ্ণ সভা অনুষ্ঠিত হয়। স্থানীয় যুৱক আব্দুল মালেকৰ উদ্দেশ্য ব্যাখ্যাৰ লগে লগেই আৰম্ভ সভাত স্থানীয় যুৱক তথা ওদালগুৰি,শোণিতপুৰ জিলাৰ এ.এস.ডি.এম. জিলা প্ৰকল্প বিষয়া ফাৰুখ আহমেদয়ে এক উদাক্ত ভাষণ প্ৰদান কৰি কয় যে সমাজত ঘটি যোৱা প্ৰতিটো অসামাজিক কাম-কাজ নিৰ্মূলৰ মূল চাবি-কাঠি নাৰী শিক্ষা।

নাৰী শিক্ষিত হ’লে হে সমাজ এখন শিক্ষাৰ দিশত আগুৱাই যাব,শিশু এজনৰ প্ৰথম শিক্ষক হ’ল মাতৃ।

২ নং দুৰাং বাহাঝাৰ প্ৰাথমিক বিদ্যালয়ৰ প্ৰধান শিক্ষক জীৱন চন্দ্ৰ চৰকাৰে পৰিয়ালৰ মাজত স্ত্ৰী ভূমিকা, সন্তানৰ প্ৰতি মাতৃ এগৰাকীৰ কৰনীয় কাম,স্বামীৰ প্ৰতি কৰ্তব্য আদিৰ বিষয়ে ভাষন প্ৰদান কৰে। শিলবৰী আৰক্ষী চকীৰ ভাৰপ্ৰাপ্ত আৰক্ষী বিষয়া সঞ্জয় সৈন্যলেও ভাষণ প্ৰসঙ্গত কয় যে আমি প্ৰথমে প্ৰতি জনেই নিজৰ পৰিয়ালৰ প্ৰতি গুৰুত্ব দিব লাগিব।

নিজৰ সন্তান টো কি কৰিছে? ক’ত গৈছে প্ৰতিজন পিতৃ-মাতৃয়ে জনাৰ দৰকাৰ। সমাজ টোক শুধৰাই ৰখা প্ৰতি জন সুনাগৰিকৰ মৌলিক কৰ্তব্য বুলি ধৰি লব লাগিব।অনৈতিক কাম সংঘটিত কৰা লোক জনৰ বিৰুদ্ধে আৰক্ষীক সহায় সহযোগিতা কৰিব লাগিব। সভাত উপস্থিত থকা প্ৰতি জনেই সমাজত সংঘটিত অনৈতিক কাম-কাজ নিৰ্মূলৰ উদ্দেশ্যে গুৰুত্বপূৰ্ণ ভাষণ প্ৰদান কৰে।

এই গুৰুত্বপূৰ্ণ সভাত উপস্থিত থাকে দৰং জিলাৰ উপ আৰক্ষী অধীক্ষক ৰিতুল কুমাৰ ৰাংহাং, দলগাঁও গাঁও ৰক্ষী বাহিনীৰ চক্ৰ বিষয়া প্ৰকাশ মেধি,বেছিমাৰী গাঁওৰক্ষী বাহিনীৰ সম্পাদক মোজামিল হক, শিলবৰী গাঁও ৰক্ষী বাহিনীৰ সম্পাদক হবিবুৰ ৰহমান, বৰঝাৰ গাওঁ ৰক্ষী বাহিনীৰ তোষাৰ মল্লিক লগতে বহু কেইখন গাঁওৰক্ষী বাহিনীৰ সম্পাদক, গাঁও প্ৰধান আৰু স্থানীয় গন্যমান্য ব্যক্তিসকল উপস্থিত থাকে।

অসম চৰকাৰৰ মহিলা আৰু শিশু বিকাশ বিভাগৰ দ্বাৰা ডিমৰীয়া সংহত শিশু উন্নয়ন প্ৰকল্প লগতে সোণাপুৰ প্ৰাথমিক স্বাস্থ কেন্দ্ৰ ডিগাৰু শাখাৰ সহযোগত বামুনখাটস্থিত আমচং চাহ বাগিছা আদৰ্শ উচ্চ বিদ্যালয়ত পোষণ মাহ ২০২৩ উপলক্ষে এক বিশেষ সজাগতা সভা, পৰীক্ষা আৰু চিকিৎসা সেৱাৰ আয়োজন কৰা হয় ।

অনুষ্ঠানত ডিগাৰু চিকিৎসা কেন্দ্ৰৰ চিকিৎসা কৰ্মী জ্ঞাননাথ শৰ্মা আৰু বিজয় শৰ্মাই বিদ্যালয়খনৰ ১৪ বছৰৰ ওপৰৰ প্ৰায় এশগৰাকী ছাত্ৰীৰ এনিমিয়া পৰীক্ষা কৰে । লগতে উপস্থিত প্ৰত্যেক গৰাকী ছাত্ৰীকে আইৰণ টেবলেটৰ লগতে চেনেটেৰী পেড প্ৰদান কৰা হয় । সজাগতা সভাত উপস্থিত থাকি ডিমৰীয়া শিশু সংহত উন্নয়ন প্ৰকল্পৰ চুপাৰভাইজাৰ ক্ৰমান্বয়ে কস্তুৰী গগৈ , পূৰ্নিমা পেগু, বিনীতা চেতিয়া হাজৰিকা আৰু খণ্ড সমন্বয়ক বৰ্ণালী কলিতাই কিশোৰীসকৰ স্বাস্থ সজাগতা , সুষম আহাৰ লগতে ঋতুকালীন সময়ত লবলগীয়া সাৱধনতা আদি বিষয়ত উপস্থিত মাতৃ আৰু কিশোৰীসকলক বিভিন্ন পৰামৰ্শ প্ৰদান কৰে ।

উক্ত অনুষ্ঠানতে ডিগাৰু অঞ্চলৰ কেইবাটাও অঙ্গনবাদী কেন্দ্ৰৰ কৰ্মী আৰু সহায়িকাসকলে সজাগতা বৃদ্ধিৰ উদ্দেশ্যে সুষম আহাৰ থলুৱা শাক-পাছলিৰ প্ৰদৰ্শনী অনুষ্ঠিত কৰে ।

বিদ্যালয়ৰ প্ৰধান তথা ৰাজ্যিক বঁটাপ্ৰাপ্ত কৃতী শিক্ষক উপেন গোস্বামীয়ে ডিমৰীয়া সংহত শিশু প্ৰকল্পৰ বিষয়া তথা ডিগাৰু চিকিৎসালয়ৰ চিকিৎসাকৰ্মী আৰু অঙ্গনবাদী কৰ্মী আৰু সহায়িকাসকলক ধন্যবাদ আৰু কৃতজ্ঞতা প্ৰকাশ কৰাৰ লগতে আগন্তুক দিনবোৰত এনেধৰণৰ চিকিৎসা আৰু সজাগতা সভা আয়োজন কৰিবলৈ অনুৰোধ জনায় ।

হাজো-গুৱাহাটী পথৰ কুলহাটী-দমদমা চʼকৰ ৰাজপথত সৃষ্টি হোৱা প্ৰকাণ্ড প্ৰকাণ্ড গাঁতৰ বাবে দীৰ্ঘদিন ধৰি যমৰ যাতনা ভূগি অহা ৰাইজে শনিবাৰে দিনৰ ডেৰ বজাৰ পৰা প্ৰায় আঢ়ৈ বজালৈ এঘন্টাজোৰা পথ অৱৰোধ কৰি প্ৰতিবাদ সাব্যস্ত কৰে।

পথচোৱাৰ এই দুৰৱস্থাত নিতৌ সংঘটিত হৈ আহিছে সৰু বৰ দুৰ্ঘটনা। পথচোৱাৰ দুৰৱস্থাৰ ফলত যমৰ- যাতনা ভোগ কৰিব লগীয়াত পৰিছে স্কুলীয়া ছাত্ৰ- ছাত্ৰীৰ লগতে দুৰণিবটীয়া যাত্ৰীয়ে।

হাজো গুৱাহাটী ৰাজপথৰ এই স্থানত পুখুৰী সদৃশ প্ৰকাণ্ড প্ৰকাণ্ড গাঁত সৃষ্টি হৈছে যদিও লোক নিৰ্মাণ বিভাগৰ অভিযন্তা, ঠিকাদাৰে চকু মুদা কুলিৰ ভাও ধৰাৰ স্থানীয় ৰাইজে অভিযোগ কৰি আহিছে। স্থানীয় ৰাইজে জানিবলৈ দিয়া অনুসৰি পথচোৱা পুনৰ নিৰ্মাণৰ ছমাহ নৌহওঁতেই পথটোৰ বিভিন্ন স্থানত প্ৰকাণ্ড প্ৰকাণ্ড গাত সৃষ্টি হৈছে। পথচোৱা মেৰামতি কৰাৰ বাবে বিভাগীয় কৰ্তৃপক্ষই কোনো গুৰুত্ব নিদিয়াত আজি ধৈৰ্যৰ বান্ধ চিগাত ৰাজপথ অৱৰোধ কৰি প্ৰতিবাদ সাব্যস্ত কৰে স্থানীয় ৰাইজে।

এঘণ্টাতকৈয়ো অধিক সময় পথটো অৱৰোধ কৰি ৰখাত গুৱাহাটী-নলবাৰী অভিমুখী শ শ যান- বাহন আৱদ্ধ হৈ পৰে।পৰৱৰ্তী সময়ত অৱৰোধস্থলীত হাজো আৰক্ষী আৰু হাজো ৰাজহ চক্ৰ বিষয়া গৰাকী উপস্থিত হৈ প্ৰতিবাদী ৰাইজক বুজনি দিব চেষ্টা কৰে যদিও প্ৰতিবাদী জনতা সৈমান নোহাৱাত ৰাষ্ট্ৰীয় ঘাইপথ প্ৰাধিকৰণৰ বিষয়া উপস্থিত হৈ পথচোৱা শনিবাৰে নিশাৰে পৰা মেৰামতিৰ আশ্বাস দিয়াত পথচোৱা মুকলি কৰি দিয়ে।

ইফালে হাজো বিষ্ণুৰাম মেধি সামূহিক স্বাস্থ্যকেন্দ্ৰৰ সন্মুখতো পথচাৰীয়ে পথৰ দুৰাৱস্থাৰ বাবে যমৰ যান্ত্ৰণা ভূগি আহিছে। দীৰ্ঘদিন ধৰি পথচোৱা মেৰামতি কৰিবলৈ আহ্বান জনোৱা হৈছে যদিও ৫০মিটাৰ নিলগত থকা হাজো লোক নিৰ্মাণ বিভাগৰ কাৰ্য্যালয়ে দেখিও নেদেখাৰ ভাও ধৰাৰ অভিযোগ উঠিছে। অনতি বিলম্বে এই পথচোৱাও মেৰামতি কৰিবলৈ দাবী জনাইছে হাজোৰ স্থানীয় ৰাইজে।

এক অক্টোবৰত স্বচ্ছতাৰ বাবে শীর্ষক এটা দিন ৰাইজৰ স্ব-ইচ্ছাই সহযোগিতা কামনা কৰি শনিবাৰে ডিমৌ পৌৰসভা কাৰ্যালয়ত এখন সংবাদ মেল অনুষ্ঠিত হয়।

ডিমৌ পৌৰসভাৰ কাৰ্যবাহী বিষয়া কংকনা শইকীয়া আৰু ডিমৌ পৌৰসভাৰ পৌৰপতি পল্লবিতা গগৈয়ে সংবাদ মেল সম্বোধন কৰি কয় যে এক অক্টোবৰ দিনটো এক দিন, এক ঘণ্টা, একেলগে স্বচ্ছতাৰ বাবে কাম কৰো শীর্ষক কাৰ্যসূচীত ৰাইজৰ স্ব-ইচ্ছাই সহযোগিতা কামনা কৰে।

পুৱা ১০ বজাৰ পৰা ১১ বজালৈকে অনুষ্ঠিত হবলগীয়া কাৰ্যসূচীত ডিমৌ পৌৰ সভাৰ দহটা ৱাৰ্ডতে লোৱা হয়। ইতিমধ্যে ডিমৌ পৌৰসভাই যোৱা কেইটা দিন ৱাৰ্ডে ৱাৰ্ডে নিজাববীয়াকৈ শ্ৰমদান কাৰ্যসূচী হাতত লৈ আহিছে।

আনহাতে ডিমৌ পৌৰসভা এলেকাত অমৃত কলহ যাত্রা ইতিমধ্যে শেষ হোৱা বুলিও কয়। আনহাতে ডিমৌ পৌৰসভাৰ বহুকেইটা সমস্যাৰ সন্দৰ্ভত ডিমৌ সংবাদকৰ্মী সকলে কাৰ্যবাহী বিষয়া কংকনা শইকীয়া আৰু পৌৰপতি পল্লবিতা গগৈক অৱগত কৰি ইয়াৰ স্থায়ী সমাধানৰ পদক্ষেপ লবলৈ আহ্বান জনায়।

বিশেষকৈ ডিমৌ চাৰিআলিৰ নিতাই বৰবৰুৱা পথৰ সন্মুখভাগত প্ৰায়ে হোৱা ব্যাপক যান-যতৰ সমস্যা। পথছোৱা সন্মুখভাগ চৰকাৰী নীতি নিয়ম অনুযায়ী বহল কৰা আদি বিষয়বোৰ স্থায়ী সমাধান কৰাৰ বাবে কৰা আহ্বানৰ প্ৰতি বিষয়াগৰাকী আৰু পৌৰপতি সহাৰি জনায়।