ৰাজ্যৰ যুৱক-যুৱতীসকলক ক্ৰীড়াক্ষেত্ৰত প্ৰতিভা বিকাশৰ এখন মঞ্চ প্ৰদানৰ উদ্দেশ্যে আয়োজন কৰা খেল
মহাৰণত অংশগ্ৰহণ কৰিবলৈ গুগল প্লে’ ষ্ট’ৰৰ পৰা ‘Khel Maharan’ এপটো ডাউনল’ড কৰি নিজৰ নাম পঞ্জীয়ন কৰিব পাৰে।
এপ্ ডাউনল’ড কৰিবলৈ ক্লিক কৰক : https://play.google.com/store/apps/details?id=com.dsywassam.app…
আহিনৰ কঁহুৱাই দিছে শৰতৰ বতৰা। শাৰদীয় বতৰত ৰাজ্য চৰকাৰো সাজু হৈছে অসমবাসীৰ বাবে মেটমৰা উপহাৰৰ সামগ্ৰী লৈ। ১১ অক্টোবৰৰ ১৬ অক্টোবৰত চৰকাৰ প্ৰদান কৰিব উপহাৰৰ মেটমৰা সম্ভাৰ। ১১ আৰু ১২ অক্টোবৰত ৰাজ্যৰ ৬ লাখ মহিলাক অন্তৰ্ভুক্ত কৰা হব অৰুণোদয় আঁচনিৰ অধীনত। এই সকল হিতাধিকাৰীৰ বেংক একাউন্টত ১০ নবেম্বৰৰ পৰা সুমাব প্ৰতি মাহে ১,২৫০ টকাকৈ। ১৩ অক্টোবৰত অসমৰ নৱম শ্ৰেনীৰ ৩ লাখ ৬৯ হাজাৰ ছাত্ৰ ছাত্ৰীক চৰকাৰে প্ৰদান কৰিব চাইকেল। মন্ত্ৰী বিধায়ক সকলে জিলাই জিলাই গৈ চাইকেল সমূহ প্ৰদান কৰিব ছাত্ৰ ছাত্ৰীক। ১৬ অক্টোবৰত চৰকাৰে মাইক্ৰ’ফাইনেন্সৰ ঋণী সকলক প্ৰদান কৰিব বেংকত ধন আদায় দিবলৈ নথকাৰ প্ৰমান পত্ৰ।
উল্লেখযোগ্য যে মাইক্ৰ’ফাইনেন্স কোম্পানীৰ পৰা ঋণ লৈ ওভোটাই দিবলৈ সক্ষম হোৱা নাছিল লাখ লাখ পৰিয়াল। ৰাজ্য চৰকাৰে ঋণী সকলৰ ধন ওভোটাই দিবলৈ প্ৰতিশ্ৰুতি প্ৰদান কৰিছিল। সেইমৰ্মে প্ৰথম পৰ্যায়ত ৮ লাখ ঋণীৰ মাজত চৰকাৰে বিতৰণ কৰিছিল ১,৬০০ কোটি টকা। একেদৰে দ্বিতীয় পৰ্যায়ত ১ লাখ ঋণীৰ মাজত বিতৰণ কৰিছিল ১৯০ কোটি টকা আৰু তৃতীয় পৰ্যায়ত ২ লাখ ২২ হাজাৰ ঋণীৰ মাজত বিতৰণ কৰে ২৯১ কোটি টকা। চৰকাৰে মাইক্ৰ’ফাইনেন্স কোম্পানীৰ পৰা ঋণ গ্ৰহণ কৰা ১১ লাখ ২২ হাজাৰ ঋণীক বিতৰণ কৰা ধনৰ পৰিমান ২,০৮১ কোটি টকা। মুঠতে চৰকাৰে দুৰ্গা পুজাৰ প্ৰাকমুহূৰ্তত ৰাজ্যবাসীক উপহাৰ দিবলৈ সাজু হৈ উঠিছে।
কৰম পূজা অসমৰ চাহ জনগোষ্ঠীসকলৰ মাজত এক সৰ্বজনীন, জনপ্ৰিয় আৰু তাৎপৰ্য্যপূৰ্ণ অনুষ্ঠান। মুখ্যতঃ ই এক কৃষিভিত্তিক পূজা। কৃষিকাৰ্য্যত যাতে প্ৰকৃতিৰ পৰা একো বাধা পোৱা নাযায় আৰু শস্যৰ উৎপাদন ভাল হয় তাৰ উদ্দেশ্যে এই পূজা পালন কৰা হয়। স্থানভেদে এই পূজা সামান্য অমিল হ’লেও মূলতঃ ইয়াৰ সম্বন্ধ প্ৰকৃতিৰ সৈতে।
পূজাৰ সময়
অসমত কৰম পৰব বা কৰম পূজা বছৰৰ তিনিটা সময়ত আয়োজন কৰা হয়। ভাদ, আহিন আৰু আঘোণ মাহত কৰম পূজা পালন কৰা হয়। ক’ৰবাত তিনি দিন, ক’ৰবাত পাঁচ দিন আৰু ক’ৰবাত সাত দিন ধৰি এই পূজা পালন কৰা হয়। ভাদ মাহৰ শুক্লা-একাদশী তিথিত উদযাপন কৰা কৰম পূজাক ‘ৰাজ কৰম’ বা ‘ৰাজি কৰম’বা ‘ডাল কৰম’ বোলে। আহিন মাহৰ বিজয়া দশমীৰ দিনা উদযাপন কৰা কৰমক ‘বুড়ী কৰম’ বোলে। আকৌ আঘোণ মাহৰ পূৰ্ণিমা তিথিত উদযাপন কৰা কৰমক ‘জিতিয়া কৰম’ বোলে।
কৰম জাৱা
কৰম পূজাৰ জাৱা জগোৱা নামৰ অনুষ্ঠানটোৱেই আটাইতকৈ আৱশ্যকীয় আৰু শ্ৰেষ্ঠ অনুষ্ঠান বুলি গণ্য কৰা হয়। ইয়াত মুখ্যতঃ গাভৰুসকলে আগভাগ লয়। এওঁলোকক ‘কৰমতী’ আখ্যা দিয়া হয়। এই পূজাৰ পাঁচ বা সাত দিন মানৰ পৰা ব্ৰতত থাকি ঢোল, তাল, বাঁহী আদি বজাই নৈবেদ্য সহকাৰে নৈৰ ঘাটলৈ গৈ, গা ধুই, আৰতি কৰি, লগত নিয়া নতুন পাচি এটাত সকলোৱে একো আজলিকৈ বালি ভৰাই তাতে কৰমতীসকলে নিয়া মাটিমাহ, বুতমাহ, মগুমাহ, ধান, বজৰা, সৰিয়হ আদি ব্যক্তিগতভাৱে চিন ৰাখি সকলোৱে সিঁচি দিয়ে। নিৰ্দিষ্ট পূজাৰ দিনলৈ মাহ-সৰিয়হ আদিয়ে গঁজালি মেলা অৱস্থাটোক জাৱা বোলা হয়। শুক্লা একাদশী তিথিত পৰম আৰাধ্য দেৱতাক স্মৰণ কৰি পূজা আৰম্ভ কৰা হয়। এই পূজাত মূলতঃ ধৰ্ম আৰু কৰ্মৰ জৰিয়তে মানৱ জীৱনৰ উৎকৰ্ষ সাধন কৰিবলৈ বিচৰা হয়।
শেৱালি ফুলৰ বৈজ্ঞানিক নাম “Adansoniya Digitata” । ইয়াক হিন্দি ভাষাত পাৰিজাত বুলি জনা যায় । সেই পাৰিজাত যাক ভগবান শ্ৰীকৃষ্ণই দেৱী ৰুক্মিণীৰ বাবে স্বৰ্গৰ পৰা হৰণ কৰি পৃথিবীলৈ লৈ আনিছিল । আন এক প্ৰবাদ অনুসৰি মহাভাৰতীয় যুগত অৰ্জুনে মাতৃ কুন্তীৰ বাবে এই বৃক্ষবিধ উপহাৰ স্বৰুপে মহাদেবৰ পৰা লাভ কৰিছিল বুলিও জনা যায় । অৰ্জুনে পৃথিৱীলৈ অনা সেই বৃক্ষবিধ ভাৰতবৰ্ষৰ উত্তৰ প্ৰদেশৰ বাৰাবাংকী জিলাৰ “কিন্তুৰ” নামৰ গাঁৱত আজিও জীৱিত হৈ আছে বুলি এক লোকবিশ্বাস প্ৰচলিত হৈ আছে।
আয়ুৰ্ৱেদিক শাস্ত্ৰসমূহতো শেৱালি ফুলৰ গছক মহামূল্যবান বৃক্ষ বুলি কোৱা হৈছে । অৰ্থাৎ ই কেৱল এবিধ সুন্দৰ তথা সুগন্ধিত ফুলৰ প্ৰজাতি নহয়,ঔষধ হিচাপেও ইয়াৰ বিশেষ মহত্ব আছে । জানো আহক শেৱালি ফুলৰ কেইটামান বিশেষ ঔষধীয় গুণাগুণৰ বিষয়ে…
* শেৱালি ফুল ভাদ মাহৰ পৰা আঘোণ মাহলৈকে ফুলে । ইয়াৰ কুমলীয়া পাতৰ ৰস উলিয়াই মৌজোলৰ লগত সেৱন কৰিলে জ্বৰ-কাহ ভাল হয় ।
* চুলি সৰা,অকালতে চুলি পকা আদি সমস্যাই দেখা দিলে শেৱালি ফুলৰ গুটি ভালকৈ বটি মূৰত লগালে সুফল পোৱা যায় ।
* শেৱালি ফুল কেঁচাকৈ বা শুকুৱাই আঞ্জা কৰি খাব পাৰি । শুকান শেৱালি ফুল দৰিকণা মাছ বা পুঠি মাছৰ লগত থপথপীয়াকৈ ৰন্ধা আঞ্জা খাবলৈ বৰ তৃপ্তিদায়ক । ইয়াৰ দ্বাৰা পাচনশক্তি বৃদ্ধি হয় ।
* শৰৎ কালত শেৱালি ফুলৰ পাতৰ ৰস নিয়মীয়াকৈ সেৱন কৰিলে তেজ পৰিষ্কাৰ হয় ।
* শেৱালি গছৰ ফুল আৰু পাতে বায়ু পৰিষ্কাৰ কৰে । মানুহৰ ঘৰ-বাৰীত শেৱালি ফুল,মহানিমৰ গছ আৰু কলা তুলসীৰ গছ থাকিলে কেতিয়াও বায়ু প্রদূষণ নহয় । লগতে বসন্ত আদি ৰোগ নহয় বুলিও কোৱা হয় ।
* হাড়ৰ বিষত ভুগিলে শেৱালি ফুলৰ পাতবিলাক অত্যাধিক তাপত তেতিয়ালৈকে গৰম কৰিব লাগে, যেতিয়ালৈকে পানীৰ মাত্ৰা আধা হৈ নাযায় । এতিয়া পাত্রত ৰৈ যোৱা পাতবোৰ উলিয়াই বাকী থকা পানীখিনি ঔষধ হিচাপে প্ৰয়োগ কৰিব পাৰি । এই ঔষধ ৰাতিপুৱা এটা সৰু গিলাচত লৈ সেৱন কৰা উচিত। অৱশ্যে এই ক্ষেত্ৰত টেঙা খোৱাৰ পৰা বিৰত থাকিব লাগে । নহলে ঔষধৰ প্ৰভাৱ শূণ্যৰ সমান হৈ পৰে।
যদি আপোনাৰ প্ৰাকৃতিকভাৱে গোলাপী ৰঙৰ ওঁঠ দুটা ৰং সলনি হোৱাৰ বাবে বেয়া দেখিছে তেন্তে চিন্তাৰ কোনো প্ৰয়োজন নাই। প্ৰাকৃতিকভাৱে গোলাপী ৰঙৰ ওঁঠ দুটাও কিছুমান ঘৰুৱা উপায়ৰ সহায়ত পুনৰ লাভ কৰিব পাৰি।আপুনি নিশ্চয় প্ৰায়ে ওঁঠৰ ক’লাক লিপষ্টিকেৰে ঢাকিবলৈ চেষ্টা কৰে। যদি আপুনিও বলীউডৰ অভিনেত্ৰী আলিয়া ভাটৰ দৰে প্ৰাকৃতিকভাৱে গোলাপী ৰঙৰ ওঁঠ পাব বিচাৰে, তেন্তে চিন্তা কৰাৰ পৰিৱৰ্তে আপুনি কিছুমান সহজ ঘৰুৱা পদ্ধতি ব্যৱহাৰ কৰিব পাৰে…
প্ৰথমে ওঁঠ দুটা কিয় ক’লা হৈ পৰে জানো আহক-
১) আঘাতৰ ফলত তেজ জমা হোৱা
২) ভিটামিনৰ অভাৱ
৩) তেজত চুগাৰৰ মাত্ৰা কম
৪/ চাইট’টক্সিক ঔষধ
৫/ এডিচন ৰোগ
৬/ গৰ্ভাৱস্থা
শৰীৰত জলসিঞ্চিত কৰি ৰাখিবলৈ যিমান পাৰি পানী খাব লাগে। ইয়াৰ ফলত ওঁঠ শুকান নহয় আৰু ফাটি নাযায়। ইয়াৰ উপৰিও ওঁঠৰ ৰং সলনি হোৱাটোও নাইকিয়া হৈ যাব।
ঘৰত থকা এলোভেৰাৰ পাত ছিঙি তাৰ পৰা জেল উলিয়াই লওক, এতিয়া এটা বাটিত মৌৰ লগত মিহলাই ওঁঠত লগাওক। এতিয়া ১৫ মিনিট ৰাখি শেষত পৰিষ্কাৰ পানীৰে ওঁঠ ধুব। ইয়াৰ ফলত ওঁঠ দুটা কোমল আৰু গোলাপী হৈ পৰে।
প্ৰথমে বুটমাহৰ বাকলি আঁতৰাই তাৰ ৰস উলিয়াই লওক। আঙুলিৰ সহায়ত ওঁঠত লগালে ১৫ মিনিট ৰাখিব। পিছত ধুব। সপ্তাহত দুবাৰ এই কাম কৰিলে ফলাফল পাব পাৰে। বুটমাহত উপস্থিত থকা প্ৰাকৃতিক বুৰ্গাণ্ডী ৰঙে আপোনাৰ ওঁঠ দুটা কোমল আৰু গোলাপী কৰি তোলাত সহায় কৰে।
নেপকিন বা টুথব্ৰাছ তিয়াই ওঁঠ দুটা লাহে লাহে ধুব। ই মৰা ছাল আৰু ওঁঠৰ বাহিৰৰ শুকান তৰপটো আঁতৰাই পেলায়, লগতে তেজৰ সঞ্চালনও উন্নত কৰে। কোমল গোলাপী ওঁঠৰ বাবে সদায় ৰাতি নাৰিকল তেল লগাব লাগে।
মৰিগাঁও জিলাৰ বৰচিলাৰ কনপাই বৰদলৈ মহাবিদ্যালয় আৰু বৰচিলা কনপাই বৰদলৈ চিনিয়ৰ চেকেণ্ডেৰী স্কুলৰ নৱাগত আদৰণি সভাখন দেওবাৰে দিন জোৰা কাৰ্য্যসূচীৰে অনুষ্ঠিত হৈ যায়। অঞ্চলটোৰ বিশিষ্ট সমাজ সেৱিকা জানকী হীৰাৰ পৌৰোহিত্যত অনুষ্ঠিত হোৱা মুকলি সভাত শিলপুখুৰী মৌজাৰ বিশিষ্ট সমাজ কৰ্মী তথা কনপাই বৰদলৈ মহাবিদ্যালয়ৰ প্ৰতিষ্ঠাপক সম্পাদক ৰমেশ চন্দ্ৰ বৰদলৈ উপস্থিত থাকি সকলো ছাত্ৰ ছাত্ৰীক ভালদৰে লিখা পঢ়া কৰি সু-খ্যাতিৰে উত্তীৰ্ণ হৈ অঞ্চলটোলৈ গৌৰৱ কঢ়িয়াই আনিবলৈ আহ্বান জনোৱাৰ লগতে প্ৰতিযোগিতাৰ যুগত ফেৰ মাৰিবলৈ অধিক অধ্যয়নৰ প্ৰয়োজন আছে বুলি তেওঁৰ ভাষণত কয়।
দেওবাৰে এই নৱাগত আদৰণি সভা খনত তিৱা স্বায়ত্ব পৰিষদৰ সদস্য তথা সমাজকৰ্মী চম্পেশ্বৰ বৰদলৈ আৰু সমাজকৰ্মী মতিৰাম বৰদলৈয়ে ছাত্ৰ-ছাত্ৰীক উদ্দেশ্যি গুৰুত্বপূৰ্ণ ভাষণ প্ৰদান কৰে। মুকলি সভাখনত পৰিচালনা সমিতিৰ সভাপতি কৃষ্ণকান্ত বৰদলৈ,অসম ৰাজ্যিক সাংবাদিক সন্থাৰ নগাঁও জিলা সমিতিৰ কাৰ্যাকৰি সভাপতি জালাল উদ্দিন আহমেদ, উপ-সভাপতি আবুল হুছেইন, প্ৰবক্তা হেমন্ত খাঠনিয়াৰ, আছফিয়াচুলতানা,ৰহমত উল্লাহ আৰু মজিবুৰ ৰহমান উপস্থিত আছিল। মুকলি সভাৰ পিছতেই সাংস্কৃতিক অনুষ্ঠান আৰম্ভ হয়।
ফুটবলৰ নীতি নিয়মক লৈ গুৱাহাটী ক্ৰীড়া সন্থাৰ ৰেফাৰী ছেমিনাৰ
গুৱাহাটী ক্ৰীড়া সন্থাই ইয়াৰ ২০২৩-২৪ৰ বি আৰু চি ডিভিজন ফুটবল লীগ আৰম্ভ কৰাৰ পূৰ্বে ইয়াৰ অধীনৰ ৰেফাৰীসকলৰ লগতে ক্লাবসমূহক ফুটবলৰ শেহতীয়া নীতি নিয়ম সম্পৰ্কে অৱগত কৰিবলৈ আজি এখন আলোচনাচক্ৰৰ আয়োজন কৰে ৷ সন্থাৰ আৰ জি বৰুৱা ক্ৰীড়া প্ৰকল্পত থকা কাৰ্যালয়ত আয়োজিত এই আলোচনাচক্ৰত ফুটবলৰ শেহতীয়া নীতি নিয়ম, ৰেফাৰীৰ ভূমিকা আৰু ক্লাবৰ খেলুৱৈ, প্ৰশিক্ষক, মেনেজাৰৰ দায়িত্ব সম্পৰ্কে বিশদভাৱে আলোচনা কৰা হয় ৷
ৰেফাৰী সমিতিৰ অধ্যক্ষ যজ্ঞেশ্বৰ দৈমাৰীৰ সভাপতিত্বত অনুষ্ঠিত এই আলোচনাচক্ৰত সন্থাৰ আজীৱন সদস্য মুনীন নবীশে সকলোকে আদৰণি জনায় আৰু কয় যে ফুটবল খেল পৰিচালনাৰ নীতি-নিয়মলৈ অহা পৰিৱৰ্তনৰ বিষয়ে জানি লোৱাটো অত্যন্ত প্ৰয়োজনীয় ৷ সেয়ে ৰেফাৰীৰ লগতে ক্লাবসমূহৰ বিষয়ববীয়াক লৈ এই আলোচনাৰ আয়োজন কৰা হৈছে ৷ ইয়াৰ পাছতে ৰেফাৰী সমিতিৰ উপাধ্যক্ষ তথা ৰেফাৰীৰ মুৰব্বী দীপক কুমাৰ দেই ফুটবল পৰিচালনাৰ ক্ষেত্ৰত ফিফাই অনা নতুন সংস্কাৰৰ বিষয়ে বিশদভাৱে আলোচনা কৰিবলৈ আৰম্ভ কৰে ৷
তেওঁ ফুটবলৰ নিয়মৰ ক্ষেত্ৰত হোৱা বিভিন্ন নতুন সংযোজনৰ বিষয়ে সভাক অৱগত কৰে ৷ তেওঁ ৰেফাৰী, খেলুৱৈ আৰু ক্লাব কৰ্তৃপক্ষৰ লগতে আয়োজকৰপৰাও এই নীতিনিয়মবোৰ প্ৰযোজ্য কৰাৰ ক্ষেত্ৰত সহযোগিতা আশা কৰে ৷ এই আলোচনাচক্ৰত সন্থাৰ যুটীয়া সম্পাদক কাজল পাল চৌধুৰী, সহকাৰী সাধাৰণ সম্পাদক সিদ্ধাৰ্থ শংকৰ ডেকা, ক্ৰীড়া সম্পাদক (ফুটবল) এল প্ৰণৱ সিং, কাৰ্যবাহী সদস্য কৌস্তৱ চক্ৰৱৰ্তী, ৰেফাৰী সমিতিৰ সদস্য সুশান্ত কুমাৰ সেন, যদু গগৈ, অৰ্ঘৰাম বড়োৰ লগতে ৰেফাৰীসকল আৰু বিভিন্ন ক্লাবৰ বিষয়ববীয়া উপস্থিত থাকে ৷
সিদ্ধাৰ্থ শংকৰ ডেকা
সহকাৰী সাধাৰণ সম্পাদক (ফুটবলৰ ভাৰপ্ৰাপ্ত)
গুৱাহাটী ক্ৰীড়া সন্থা
গুৰু শংকৰৰ অৱদান সূৰ্যৰ দৰে জ্যোতিষ্মানঃ অসমীয়া মহাজাতিক জগত সভালৈ আগুৱাই নিছিল গুৰু শংকৰে—- বটদ্ৰৱা থানৰ কাৰ্যালয় গৃহ সভাগৃহ সত্ৰাধিকাৰৰ বহা আৰু দামোদৰআতা যাত্ৰী নিবাসৰ নৱনিৰ্মিত ভৱনৰ শুভ উদ্বোধনঃ বটদ্ৰৱা প্ৰকল্পৰ নিৰ্মাণ সম্পূৰ্ণ হৈ উঠা অংশ শুভ উদ্বোধন কৰিব ফেব্ৰুৱাৰীত ঃ গৃহমন্ত্ৰী অমিত শ্বাহ আহিব উদ্বোধনী অনুষ্ঠানলৈঃ বটদ্ৰৱাক ৱল্ড হেৰিটেজ চাইট হিচাপে ঘোষণাৰ বাবে ৮ কি :মি: এলেকাত থলুৱাৰ বাবে সুৰক্ষিত হ’ব ভূমিৰ অধিকাৰঃ জগন্নাথ কলিতা বটদ্ৰৱা ২৪ ছেপ্তেম্বৰ ঃ গুৰুশংকৰৰ অৱদান সূৰ্যৰ দৰে জ্যোতিষ্মান। অসমীয়া মহাজাতিক জগত সভালৈ আগুৱাই নিছিল গুৰু শংকৰে। অসমীয়া জাতিক বিজ্ঞান সন্মত সাংস্কৃতিক মাৰ্গ দৰ্শনৰ পথ প্ৰদৰ্শন কৰাইছিল গুৰু শংকৰদেৱে। নাট ভাওনা নাম প্ৰসঙ্গকে প্ৰমুখ্য কৰি বনাঢ্য কলাৰ মাজেৰে গুৰুজনে অসমীয়া জাতিক সমৃদ্ধিশালী কৰিছে। অসমৰ বৈষ্ণৱ ক্ষেত্ৰখনত গুৰুজনাৰ পদৰেণুৰে ৰঞ্জিত পূণ্যভূমি বটদ্ৰৱাৰ সুকীয়া স্থান আছে। বটদ্ৰৱা হ’ল বৈষ্ণৱ সংস্কৃতিৰ বৰ ঘৰ। গুৰু শংকৰৰ শ্ৰীচৰণত সেৱা ল’লে আমি বিমল প্ৰশান্তি অনুভৱ কৰো। মই গুৰুজনাৰ আদৰ্শৰ অনুৰাগী এজন সাধাৰণ বৈষ্ণৱ। এই মন্তব্য অসমৰ সন্মানীয় মুখ্যমন্ত্ৰী ড° হিমন্ত বিশ্ব শৰ্মাৰ ।
আজি গুৰুজনাৰ জন্মস্থান বটদ্ৰৱাত বটদ্ৰৱা থানৰ কাৰ্যালয় সত্ৰাধিকাৰৰ বহা সভাগৃহ দামোদৰআতা যাত্ৰী নিবাস ইত্যাদি নৱনিৰ্মিত গৃহবোৰৰ শুভাৰম্ভ আৰু শ্ৰী শ্ৰী বটদ্ৰৱা থান পৰিচালনা সমিতিয়ে বছৰজোৰা কাৰ্যসূচীৰে শুভাৰম্ভ কৰা ৫৭৫ তম গুৰু জন্ম জয়ন্তী উৎসৱৰ শুভ উদ্বোধন কৰি এই মন্তব্য কৰে মুখ্যমন্ত্ৰী ড° হিমন্ত বিশ্ব শৰ্মাই। মুখ্যমন্ত্ৰী ড° শৰ্মাই নিজহাতে ফিটা কাটি উল্লিখিত ভৱন সমূহ
উদ্বোধন কৰি বটদ্ৰৱাবাসী ৰাইজলৈ মুকলি কৰে।
। প্ৰণিধানযোগ্য যে মুখ্যমন্ত্ৰী ড° শৰ্মাৰ বিশেষ উদ্যোগ আৰু তৎপৰতাত অসম চৰকাৰৰ পূঁজিৰে বটদ্ৰৱা থানৰ কাৰ্যালয় গৃহ সভাগৃহ সত্ৰাধিকাৰৰ বহা আৰু দামোদৰআতা যাত্ৰী নিবাস নতুন ৰূপত নিৰ্মান হৈ উঠিল। পুৱাৰ ভাগতে এখন হেলিকপ্তাৰেৰে বটদ্ৰৱাত উপস্থিত হয় মুখ্যমন্ত্ৰী গৰাকী। আয়তীৰ উৰুলি মংগল ধ্বনি গায়ন বায়নৰ জোৰা হাজাৰ হাজাৰ মানুহৰ দিহানামৰ ধ্বনিৰে ১ কি:মি:অধিক পথ খোজকাঢ়ি আহি মুখ্যমন্ত্ৰী ড° শৰ্মা বটদ্ৰৱা থানত উপস্থিত হৈ কীতন ঘৰ মণিকূটত সেৱা গ্ৰহণ কৰে । বটদ্ৰৱা থানত পুৱাৰ প্ৰসঙ্গত ভকত বৈষ্ণৱে ওৱা হৰি ওৱা ৰাম জয়ধ্বনিৰে দীৰ্ঘজীৱি হৈ অসম মাতৃৰ সেৱা কৰিবলৈ আশীৰ্বাদ প্ৰদান কৰে মুখ্যমন্ত্ৰী ড° শৰ্মাক।
মুখ্যমন্ত্ৰী ড° শৰ্মাই বটদ্ৰৱা থানত এটি অমৃত বৃক্ষৰ পুলি ৰোপন কৰে।বটদ্ৰৱা থানত গুৰুজয়ন্তীৰ বৰ্ষজোৰা কাৰ্যসূচীৰ শুভাৰম্ভ কৰি ভাষণ প্ৰসঙ্গত মুখ্যমন্ত্ৰী ড° শৰ্মাই কয় ৰে গুৰুজনাৰ জন্মস্থানৰ সৌন্দৰ্য বৰ্ধনৰ বাবে লেন্স কেম্পাছ তৈয়াৰ কৰিব। বটদ্ৰৱা থানৰ থানৰ বাহিৰত ২০১৬ চনত বেদখল মুকলি হোৱা স্থানত ১৫০ কোটিৰ টকা ব্যয়ৰে নিৰ্মাণ হৈ থকা বটদ্ৰৱা প্ৰকল্পৰ শুভ উদ্ধোধন কৰিব ভাৰতৰ গৃহমন্ত্ৰী মাননীয় অমিত শ্বাহে। বটদ্ৰৱা থানৰ আকাশীগংগা হাটিপুখুৰী আৰু টেম্বুৱানিজান ইত্যািদি থানৰ পুখুৰী পাৰত লেন্সকেপিং ৰ ব্যৱস্থা কৰিব বুলিও কয় মুখ্যমন্ত্ৰী গৰাকীয়ে।
বটদ্ৰৱা থানৰ ৮ কিলোমিটাৰ ব্যাৰ্সাদ্ধৰ ভিতৰত ভূমি কিনা বেছাৰ ক্ষেত্ৰত কিছু নিষেধাজ্ঞা ঘোষণা কৰি বটদ্ৰৱাক world heritage place হিচাপে ঘোষণা কৰাৰ কথা প্ৰকাশ কৰে মুখ্যমন্ত্ৰীয়ে। ৮ কি:মি: এলেকাত থলুৱা লোকৰ বাহিৰে অন্যলোকক ভূমি বিক্ৰীৰ ক্ষেত্ৰত নিষেধাজ্ঞা বলবৎৰ বাবে বিধানসভাত আইন ৰূপায়ন কৰা হ’ব বুলিও কয়। ভূমি কিনা বেচাৰ ক্ষেত্ৰত জিলা উপায়ুক্তক কাৰ্যকৰী পদক্ষেপ গ্ৰহণৰ অহ্বান জনায়।ভাষণ প্ৰসঙ্গত মুখ্যমন্ত্ৰীয়ে নগাঁও চহৰৰ যান যঁতৰ সমস্যা লাঘৱ কৰিবলৈ নগাঁও চহৰৰ চিভিলৰ সন্মুখত এখন উৰণীয়া সেঁতু নিৰ্মাণ ৰ চিন্তা কৰি থকা হৈছে বুলিও উল্লেখ কৰে। মহাপুৰুষ শ্ৰীমন্ত শংকৰদেৱৰ স্মৃতি বিজড়িত মধুপুৰ সত্ৰ, পাটবাউসীকে ধৰি ২১ টা স্থানত হ’ব ২১ টা আধ্যাত্মিক দৰ্শন প্ৰতিফলিত হোৱাকৈ নামঘৰ সদৃশ অভিলাষী প্ৰকল্প নিৰ্মাণ কৰাৰ চিন্তা চৰ্চা কৰি থকা বুলিও মুখ্যমন্ত্ৰীয়ে ভাষণত উল্লেখ কৰে। অসমত শংকৰদেৱৰ স্মৃতি বিজড়িত সকলো স্থান যাতে ভাৰতবাসীয়ে দৰ্শন কৰিব পাৰে তাৰবাবে এই অনন্য পদক্ষেপ বুলিও কয় মুখ্যমন্ত্ৰী ড° শৰ্মাই ।
বটদ্ৰৱা প্ৰকল্পৰ ইতিমধ্যে নিৰ্মাণ কাৰ্যৰ আশী শতাংশ কামকাজ সম্পূৰ্ণ হৈ উঠিছে। বটদ্ৰৱা সত্ৰীয়া সম্পদ ৰাজি সংৰক্ষণ আৰু উত্তৰপুৰুষৰ গৱেষণাৰ সুবিধা হোৱাকৈ এটি মিউজিয়াম বা যাদুঘৰ প্ৰতিষ্ঠা কৰা বটদ্ৰৱা থানৰ চৌপাশে পকী দেৱাল আৰু আকাশী গংগাৰ মথাউৰি নিৰ্মান কৰা টেম্বুৱানীজানৰ সোন্দৰ্য বৰ্দ্ধন কৰা হ’ব বুলিও মুখ্যমন্ত্ৰী মহোদয়ে জনায় ।গুৰুজনাৰ পূণ্যভূমি বটদ্ৰৱা থানত মুখ্যমন্ত্ৰীৰ আগমনক লৈ উখল মাখল পৰিৱেশ বিৰাজ কৰে। মুখ্যমন্ত্ৰীয়ে বটদ্ৰৱা থানত সেৱা গ্ৰহন কৰি সত্ৰাধিকাৰ প্ৰমুখ্যে পৰিচালনা সমিতিৰ লগতো বাৰ্তালাপত মিলিত হয়। উন্নয়নৰ বাবে ২২ কোটি টকাৰ পেকেজ ঘোষণা কৰে মুখ্যমন্ত্ৰীয়ে । বটদ্ৰৱা থানৰ আইখেৰসুঁতি সাংস্কৃতিক মঞ্চত মুখ্যমন্ত্ৰী ড° হিমন্ত বিশ্ব শৰ্মাক থান পৰিচালনা সমিতিৰ তৰফৰ পৰা বিপুল ভাৱে আদৰণি জনায়। সাধাৰণ সম্পাদক অৰূপ কুমাৰ শইকীয়াই আদৰণি ভাষণ আগবঢ়োৱা সভাখনিৰ আঁতধৰে কাৰ্যনিৰ্বাহক সদস্য মানিক বৰাই। এই অনুষ্ঠানত থান পৰিচালনা সমিতিৰ সভাপতি যোগেন্দ্ৰ নাৰায়ণ দেৱ মহন্ত উপসভাপতি দেৱানন্দ দেৱ গোস্বামী প্ৰাক্তন সম্পাদক ব্ৰজেন কাকতি ইন্দ্ৰমোহন বৰুৱা কোষাধ্যক্ষ তপন দাস কাৰ্যকৰী সভাপতি প্ৰভাত কলিতা সুশীল খাউণ্ড হিৰণ্য কলিতা হিৰণ নাথ কল্যাণ কলিতা ভূপেন নাথ নিপুল বৰুৱা হৰিনাৰায়ণ কোঁৱৰ দীপুল শইকীয়া নগাঁও বটদ্ৰৱাৰ বিধায়ক ৰূপক শৰ্মা ৰহাৰ বিধায়ক শশীকান্ত দাস বিধায়ক জিতু গোস্বামী যুৱনেতা ৰুহিনী বৰা যুৱ মৰ্চাৰ দেৱশ্ৰী বৰা ডা° মুকুট দেৱনাথ প্ৰমুখ্যে বিষয়ববীয়া সকল উপস্থিত থাকে।
বটদ্ৰৱাৰ উন্নয়ন সন্দৰ্ভত পৰিচালনা সমিতিয়ে মুখ্যমন্ত্ৰীৰ হাতত এখনি স্মাৰক পত্ৰ প্ৰদান কৰে । ইয়াৰ পিছতে নিৰ্মান হৈ থকা বটদ্ৰৱা প্ৰকল্পস্থলী পৰিদৰ্শন কৰি নিৰ্মান কাৰ্যৰ বুজ লয় মুখ্যমন্ত্ৰী গৰাকীয়ে । বটদ্ৰৱা থানত আইসকল যুৱক যুৱতী সকলে মামা বুলি সম্বোধন কৰে মুখ্যমন্ত্ৰী ড° শৰ্মাক। মুখ্যমন্ত্ৰীৰ লগত চেল্ফি উঠি উৎফুল্লিত হয় যুৱক যুৱতী আৰু মহিলা সকল। জনপ্ৰিয় মুখ্যমন্ত্ৰী গৰাকীক কাষত পাই বহুতে নিজৰ বিভিন্ন সমস্যাৰ বিষয়ে আবেদন পত্ৰও দাখিল কৰে। আনহাতে আজি মুখ্যমন্ত্ৰীৰ ভ্ৰমনক কেন্দ্ৰ কৰি একাংশ নিৰাপত্তাৰ দায়িত্বত থকা লোকে সাধাৰণ ৰাইজ আৰু পৰিচালনা সমিতিৰ লোকক দু ব্যৱহাৰ কৰে। তদুপৰি নিৰ্মাণৰ দায়িত্বত থকা ঠিকাদাৰ জনৈক মহেশ্বৰীৰ নিজৰ মানুহ বুলি দম্ভালি মৰা জনৈক সঞ্জয়ে বটদ্ৰৱা থানৰ লগত জড়িত স্থানীয় ৰাইজ আৰু বটদ্ৰৱা প্ৰেছক্লাৱৰ সদস্য সকলক অশ্লীল বাক্যৰে দু ব্যৱহাৰ কৰাৰ অভিযোগ উঠিছে ।
নামখলাত পথ নিৰ্মাণক কেন্দ্ৰকৰি বৃহৎ ৰাজহুৱা সভাঃ
সাংসদ আৰু বিধায়কৰ বিৰূদ্ধে ক্ষোভ ৰাইজৰ
দৰঙৰ পশ্চিম দিশত অৱস্থিত নামখলা এখন অতি ব্যৱসায়ীকভাৱে অতি ব্যস্ততাপূৰ্ণ ঠাই ৷ জিলাখনৰ উত্তৰ আৰু পশ্চিম দিশৰ কেইবাখনো গাওৰ লোক ব্যৱসায়ীক ভাৱে নামখলাৰ সৈতে সম্পূৰ্ণ জড়িত ৷ এই অঞ্চলবাসীয়ে এটাই দুখ প্ৰকাশ কৰে যে ইয়াৰ ওচৰ পাজৰে থকা গাওঁৰ ৰাষ্টা সমুহ সমপূৰ্ণৰূপে অনুন্নত ৷ নামখলা বাসী ৰাইজৰ বহুত কাকূতিমিনতিৰ পিচত মুখ্যমন্ত্ৰীৰ পকি পথ নিৰ্মান আচনিত অন্তৰ্ভুক্ত হ’ল নামখলাৰ পৰা আঠিয়াবাৰী বৰলাখাটলৈ যোৱা পথটি ৷ উল্লেখযোগ্য যে মঙলদৈ মাজিকুচি পথৰ ঐতিহাসিক নামখলা শিৱমন্দিৰ চকৰ পৰা বৰলাখাট, আঠিয়াবাৰী হৈ কেইবাখনো গাওঁৰ মাজেৰে বি টি এডিৰ খৈৰাবাৰীত সংযোগ হৈছে ৷
আনহাতে নামখলা শিৱমন্দিৰ চ’কৰ পৰা পথটি নিৰ্মাণৰ বাবে মুখ্যমন্ত্ৰী পকীপথ নিৰ্মাণ আচনীৰ অধীনত অসম চৰকাৰে ১কোটি ৪১ লাখ ৪৫ হাজাৰ৯০০ টকাৰে ২ কিলোমিটাৰ পথ নিৰ্মাণৰ বাবে ধনৰ আৱণ্টন দিছিল আৰু লগে লগে নামখলা অঞ্চলত এক উৎসৱমুখৰ পৰিবেশে বিৰাজ কৰিছিল কিয়নো নামখলা শিৱমন্দিৰৰ পৰা আঠিয়াবাৰী গাওঁলৈ যোৱা পথটি নিৰ্মাণৰ বাবে টকা অনুমোদন কৰিলে অসম চৰকাৰে ৷ পিচে বৃহত্তৰ নামখলা অঞ্চলৰ ৰাইজৰ মূৰত চেচা পানী ধালিলে সাংসদ আৰু বিধায়কে ৷ সেয়ে ৰাইজ ক্ষোভত জাঙুৰ খাই উঠিল ৷ কিয়নো এই পথটি কলাইগাওঁৰ বিধায়ক দুৰ্গাদাস বড়ো আৰু সাংসদ দিলীপ শইকীয়াই নিৰ্মাণৰ শুভাৰম্ভ কৰিছিল বিটি এডিৰ চাবমহিলা পাৰাত ।
অসম চৰকাৰৰ লোক নিৰ্মাণ বিভাগে উল্লেখ কৰা ফলক অনুযায়ী পথটি নিৰ্মাণ হব লাগিছিল মাজিকুচি পথত সংযোগ কৰি নামখলা শিৱমন্দিৰৰ পৰা আঠিয়াবাৰীলৈ ২ কি মি পথ কিন্তু এতিয়া যি ঠাইৰ পৰা পথটি নিৰ্মাণনৰ শুভাৰম্ভ কৰিলে তাৰ পৰা ২ কি মি হলে মাজিকুচি পথত সংযোগ হোৱাটো বাদ দিয়ক আঠিয়াবাৰী গাৱেই আহি নাপাব ৷ সেয়ে নামখলা বাসী ৰাইজে চৰকাৰক দাবী উথাপন কৰিছে যে সাংসদ দিলিপ শইকীয়া আৰু বিধায়ক দুৰ্গাদাস বড়োৱে য’ত যিমান লাগে ৰাষ্টা বনাওক কবলগীয়া নাই কিন্ত এই ৰাষ্টাটিৰ ফলক অনুযায়ী তৎকালীনভাৱে বিভাগীয় নিয়মেৰে পথ নিৰ্মাণৰ ব্যৱস্থা হব লাগে ৷
অন্যথা মঙলদৈ মাজিকুছি গড়কাপ্তানি পথত সংযোগ কৰি নামখলা শিৱমন্দিৰ চকৰ পৰা পথচোৱা নিৰ্মাণ নোহোৱালৈকে কলাইগাও সমষ্টিৰ বিধায়ক আৰু সাংসদ দিলীপ শইকীয়াই যিকোনো ৰাজহুৱা সভাত উপস্থিত নথকাই ভাল বুলি হুংকাৰ দিয়ে ৷ মুখ্যমন্ত্ৰী পকিপথ আচনিৰ আৱণ্টিত ধন কেনেকৈ বি টি আৰত যাৱলৈ পালে তাকলৈ ৰাইজৰ মাজত চৰ্চা ৷ এতিয়া লোক নিৰ্মাণ বিভাগলৈ ৰাইজৰ প্ৰশ্ন বিটিআৰৰ পৰা পথটি কিয় আৰম্ভণি কৰা হ’ল ?
সেয়ে বৃহত্তৰ নামখলা অঞ্চলৰ ৰাইজ ক্ষোভিত হৈ নামখলাৰ লগতে ওচৰ চুবুৰীয়া গাওঁৰ পুৰুষ,মহিলাৰ উপস্থিতিত নামখলা কলাকৃষ্টি পৰিষদৰ প্ৰেক্ষাগৃহত প্ৰানেশ্বৰ কলিতাৰ সভাপতিত্বত এখনি ৰাজহুৱা সভা অনুষ্ঠিত হয়। ৰাজহুৱা সভাত আগন্তুক দিনত এইপথচোৱা নিৰ্মাণৰ ক্ষেত্ৰত বিধায়ক আৰু সাংসদ গৰাকীয়ে মাহীআইৰ দৃষ্টি দূৰীকৰণ কৰি নামখলা শিৱমন্দিৰ চ’কৰ পৰা পথটি পুনৰ নিৰ্মাণ কৰিবলৈ লোকনিৰ্মান বিভাগৰ দায়িত্বশীল ব্যক্তি আৰু আৰু অসমৰ মুখ্যমন্ত্ৰী গৰাকীক অনুৰোধ জনাই ৷
শোকাকুল পৰিৱেশত গুৱাহাটী সাধনী ভৱনত প্ৰাক্তন ছাত্ৰ নেতা বিপুল চুতীয়াৰ শ্ৰদ্ধাঞ্জলি অনুষ্ঠান
পহিলা অক্টোবৰত মাজুলীত আদ্ৰশ্ৰাদ্ধঃ মন্ত্ৰী অতুল বৰা, বিমল বৰা, ডাঃ ৰণোজ পেগু আদিৰ শোক প্ৰকাশ ঃ তিনিদিনিয়াকৈ শোক পালন চুতীয়া ছাত্র সন্থাৰ
এক শোকাকুল পৰিৱেশৰ মাজত আজি মহানগৰীৰ বৰবাৰীস্থিত বীৰাংগনা সাধনী ভৱনত চুতীয়া ছাত্ৰ সন্থাৰ প্ৰাক্তন সাধাৰণ সম্পাদক, চুতীয়া উন্নয়ন পৰিষদৰ সদস্য প্ৰয়াত বিপুল চুতীয়া(৪০)ৰ শ্ৰদ্ধাঞ্জলি অনুষ্ঠান সম্পন্ন হয়। চুতীয়া জাতি সন্মিলন, চুতীয়া যুৱ সন্মিলন, চুতীয়া উন্নয়ন পৰিষদ, চুতীয়া ছাত্ৰ সন্থাৰ সদস্যসকলৰ উপৰি মেগাজিনৰ স্থানীয় ৰাইজৰ উপস্থিতিত প্ৰিয় নেতা জনক শেষ শ্ৰদ্ধা জ্ঞাপন কৰে। চুতীয়া উন্নয়ন পৰিষদৰ সদস্যদ্বয় ক্ৰমে নৃপেন খনিকৰ আৰু ৰজনী চুতীয়াই বন্তি প্ৰজ্বলন কৰি আৰম্ভ কৰা অনুষ্ঠানত এক মিনিট মৌন প্ৰাৰ্থনা কৰি প্ৰয়াত চুতীয়াৰ আত্মাৰ সদগতি কামনা কৰা হয়।
সমান্তৰালভাৱে চুতীয়া ছাত্ৰ সন্থাৰ কেন্দ্ৰীয় কাৰ্যালয় সম্পাদক কুণ্ডিল চুতীয়া, সাংগঠনিক সম্পাদক মানস চুতীয়া, মহেন্দ্ৰ ৰাজখোৱা, সহকাৰী সম্পাদক ডিম্পল চুতীয়া, ব্যৱসায়ী শিৱ বড়া, ভূপেন দাস আদিৰ উপস্থিতিত এখন শোকসভা অনুষ্ঠিত হয়। উল্লেখ্য যে মাজুলীৰ নতুন বজাৰ আৰক্ষী চকীৰ অন্তৰ্গত বৰবিল গাঁৱৰ বাসিন্দা তথা চুতীয়া ছাত্র সন্থাৰ প্ৰাক্তন নেতা চুতীয়াই যোৱা ২১ ছেপ্টেম্বৰ নিশা ১২.৫ বজাত ডিব্ৰুগড় চিকিৎসা মহাবিদ্যালয় হাস্পতালত শেষ নিঃশ্বাস ত্যাগ কৰে। প্ৰিয়ভাজন নেতাজনৰ অকাল মৃত্যুৱে সমগ্ৰ চুতীয়া জনগোষ্ঠীৰ লগতে মাজুলীবাসীক শোকস্তব্ধ কৰি তুলিছে।
চুতীয়া ছাত্ৰ সন্থাই পতাকা অৰ্ধনমিত কৰি তিনি দিন শোক দিৱস পালন কৰাৰ উপৰি ৰাজ্যৰ প্ৰান্তে প্ৰান্তে নেতাজনক শেষ শ্ৰদ্ধাঞ্জলি জ্ঞাপন কৰা হৈছে। মন্ত্ৰী ক্ৰমে অতুল বৰা, ডাঃ ৰণোজ পেগু, বিমল বৰা আদিয়েও নেতাজনৰ মৃত্যুত শোক প্ৰকাশ কৰিছে। মন্ত্ৰী বৰাই সামাজিক মাধ্যমত শোক প্ৰকাশ কৰি উল্লেখ কৰিছে যে ‘চুতীয়া ছাত্ৰ সন্থাৰ প্ৰাক্তন সাধাৰণ সম্পাদক, মাজুলী নিৱাসী বিপুল চুতীয়াৰ অকাল বিয়োগৰ বাতৰিটো পাই অত্যন্ত মৰ্মাহত হৈছোঁ। বিভিন্ন সামাজিক অনুষ্ঠান-প্ৰতিষ্ঠানৰ সৈতে জড়িত বিপুলৰ দৰে সম্ভাৱনাময় যুৱকৰ বিয়োগ সমাজ জীৱনৰ বাবে এক অপূৰণীয় ক্ষতি।’ একেদৰে মন্ত্ৰী ডাঃ পেগুৱে শোক প্ৰকাশ কৰি বিপুল বিয়োগ চুতীয়া জাতিৰ লগতে অসমৰ সমাজ জীৱনৰ বাবে এক অপূৰণীয় ক্ষতি বুলি মন্তব্য কৰিছে। উল্লেখ্য যে অহা পহিলা অক্টোবৰত মাজুলীৰ নিজা বাসগৃহত প্ৰয়াত চুতীয়াৰ আদ্ৰশ্ৰাদ্ধ আয়োজন কৰা হৈছি।
