তিনিচুকীয়া জিলা আয়ুক্ত কাৰ্যালয়ৰ কৰ্মচাৰী ৱাজিদ হুছেইনক নিলম্বন। নিলম্বিত ৱাজেদ নজৰত শাখাৰ কৰ্মচাৰী।
এগৰাকী কিশোৰীক যৌন নিৰ্যাতনৰ অভিযোগ ৱাজেদৰ বিৰুদ্ধে। তিনিচুকীয়া সদৰ থানাত POCSO আইনৰ অধীনত ৰুজু হৈ আছে গোচৰ।
বৰ্তমানো পলাতক হৈ আছে ৱাজিদ হুছেইন। আয়ুক্তৰ শ্ব’কজৰ উত্তৰ নিদিয়াৰ বাবে নিলম্বন ৱাজেদ হুছেইনক।
মাণিকপুৰৰ ৩১নং ৰাষ্ট্ৰীয় ঘাইপথত দুৰ্ঘটনা। এখন কণ্টেইনাৰ আৰু দুখন ট্ৰাকৰ মুখামুখি সংঘৰ্ষ।
দুৰ্ঘটনাত নিহত কন্টেইনাৰৰ চালক। গুৰুতৰভাৱে আহত ট্ৰাক চালক, হেণ্ডিমেনসহ তিনিজন।
আহতসকলক বঙাইগাঁও অসামৰিক চিকিৎসালয়ত ভৰ্তি।
সমষ্টিৰ পুনৰ নিৰ্দ্ধাৰণে কঁকাল ভাঙিছে বঙালীৰ। দুগৰাকী অনাবঙালীৰ ভূমিকাৰ অভিযোগ। বিতৰ্কত নেতা প্ৰদীপ দত্ত ৰয়ে বৰাক উপত্যকাক অসমৰ পৰা পৃথক কৰাৰ সপোনত বিভোৰ হৈ থকাৰ বাতৰিয়ে তীব্ৰ প্ৰতিক্ৰিয়াৰ সৃষ্টি কৰা পৰিলক্ষিত হৈছে। সংবাদমাধ্যমত প্ৰকাশিত বাতৰিমতে বৰাক ডেম’ক্ৰেটিক ফ্ৰন্টৰ নেতা প্ৰদীপ দত্ত ৰায়ে সমষ্টিৰ পুনৰ নিৰ্দ্ধাৰণে বৰাকৰ বঙালীৰ ককাল ভাঙি দিয়াৰ অভিযোগ তুলি ইয়াৰ পিছত অসমৰ লগত বৰাক থকাৰ কোনো যুক্তি নাই বুলি মন্তব্য কৰে। উচ্চতম ন্যায়ালয়ত সমষ্টিৰ পুনৰ নিৰ্দ্ধাৰণৰ গোচৰ চলি থকা বুলি উল্লেখ কৰি দত্ত ৰয়ে ইয়াৰ পাছতো ৰাষ্ট্ৰপতিয়ে স্বাক্ষৰ কৰা কাৰ্যক ৰহস্যজনক বুলি উল্লেখ কৰি তেওঁ কয় যে ২০২৬ চনত পুনৰ সমষ্টিৰ নিৰ্দ্ধাৰণ হব যদিওঁ ২০০১ ৰ পিয়লৰ আধাৰত তালিকা প্ৰকাশ কৰা কাৰ্যক সন্দেহ প্ৰকাশ কৰে। বৰাক ডেম’ক্ৰেটিক ফ্ৰন্টৰ নেতা গৰাকীয়ে সমষ্টিৰ পুনৰ নিৰ্দ্ধাৰণৰ দায়িত্বত এগৰাকী অবঙালী আৰু বৰাকৰ এগৰাকী অবঙালী বিধায়কে ডিআৰডিএ বিভাগৰ অবসৰপ্ৰাপ্ত বিষয়াৰ পৰামৰ্শত গুৰুত্বপূৰ্ণ ভূমিকা পালন কৰা বুলি অভিযোগ উত্থাপন কৰি কয় যে এওঁলোকৰ বৰাকৰ ভৌগলিক জ্ঞান নাই।
দত্ত ৰয়ে গুৱাহাটীত নিৰ্বাচন আয়োগৰ শুনানীত বৰাকৰ দুই শতাধিক অভিযোগ পত্ৰ দিয়াৰ পিছতো গুৰত্ব প্ৰদান নকৰাৰ অভিযোগ উত্থাপন কৰে আয়োগৰ বিৰুদ্ধে। তেওঁ বৰাকক অসমৰ পৰা পৃথক কৰি পূৰ্বাঞ্চল নামেৰে নতুন ৰাজ্য গঠনৰ পোষকতা কৰি বিধান সভাৰ ৬০ খন আসনত নিৰ্বাচন অনুষ্ঠিত কৰাৰ পোষকতা কৰে। এই নিৰ্বাচন পূৰ্বাঞ্চল বিধান সভাৰ নিৰ্বাচন বুলি জনা যাব বুলি মন্তব্য কৰে এই গৰাকী বিতৰ্কত নেতা প্ৰদীপ দত্ত ৰয়ে। ইতিপূৰ্বেও এই গৰাকী নেতাই বিতৰ্কত মন্তব্য কৰি বঙালী আৰু অসমীয়া জাতিৰ মাজত মত বিৰোধ সৃষ্টি কৰাৰ অভিযোগত অভিযুক্ত। অসমীয়া বিদ্বেষী মনোভাবৰে পৰিপুষ্ট এই গৰাকী নেতাৰ গোপন অভিসন্ধিৰ বিৰুদ্ধে চৰকাৰে কি ব্যৱস্হা গ্ৰহন কৰে সেয়া লক্ষ্যনীয় হব আগন্তুক সময়ত।
চীনে শেহতীয়াকৈ ভাৰতৰ অৰুণাচল আৰু আকচাই চিনক সামৰি প্ৰকাশ কৰা নতুন মানচিত্ৰই ভাৰতক উত্তেজিত কৰি তোলাৰ সময়তে আন এক ভয়াৱহ কথা পোহৰলৈ আহিছে। অৰুণাচল প্ৰদেশক নিজৰ বুলি দাবী কৰা বেইজিঙে দাবী লগতে কৈছে যে আকচাই চিনো তেওঁলোকৰেই । ইয়াৰ মাজতে আন এক চাঞ্চল্যকৰ কথা পোহৰলৈ আহিছে। এক সৰ্বভাৰতীয় সংবাদ মাধ্যমত প্ৰকাশিত প্ৰতিবেদন অনুসৰি, চীনা সেনাই উত্তৰ লাডাখৰ পৰা ৬০ কিলোমিটাৰ পূবত থকা ডেপচাং অঞ্চলৰ ভূগৰ্ভত সুৰংগ খনন কৰি আছে । সেই ’এলেকাৰ সংকীৰ্ণ নদী উপত্যকাত চীনে সেনা শিবিৰ নিৰ্মাণ কৰাৰ কথাও পোহৰলৈ আহিছে। উল্লেখ্য সেই অঞ্চলটো আকচাই চিনৰ অন্তৰ্গত।আন্তৰ্জাতিক বিশেষজ্ঞসকলৰ মতে, অঞ্চলটোত নদীৰ দুয়োফালে কমেও ১১ টা সুৰংগ পোৱা গৈছে। চীনে যোৱা কেইমাহমানধৰি ইয়াত ঘাটি নিৰ্মাণ কৰিছে। এই কথাও ধাৰণা কৰা হৈছে যে চীনে অঞ্চলটোত ভাৰতীয় সেনাৰ কাৰ্যকলাপ প্ৰতিহত কৰাৰ বাবেই চীনে এই পদক্ষেপ গ্ৰহণ কৰিছে।
ইফালে, চীনৰ শেহতীয়াকৈ হোৱা মানচিত্ৰ বিতৰ্ক সন্দৰ্ভত ভাৰতৰ বৈদেশিক পৰিক্ৰমা মন্ত্ৰী এছ জয়শংকৰে কৈছে যে চীনৰ এনে বিভ্ৰান্তিকৰ মানচিত্ৰ প্ৰকাশ কৰাৰ অভ্যাস পুৰণি । তেওঁ কয় “মানচিত্ৰখন এনেদৰে সলনি কৰিলেই বাস্তৱত একো নহ’ব,। সেই ভূমি ভাৰতৰ, ই ভাৰতৰ হৈয়ে ৰ’ব।” তেওঁ লগতে কয় “চীনে ইয়াৰ মানচিত্ৰত এনে অঞ্চল অন্তৰ্ভুক্ত কৰিছে যিবোৰ তেওঁলোকৰ নহয়। এয়া তেওঁলোকৰ পুৰণি অভ্যাস। ভাৰতীয় ভূখণ্ডক চীনৰ মানচিত্ৰত ৰাখিলেই একো সলনি নহয়। আমাৰ চৰকাৰ দেশৰ সীমাৰ বিষয়ে সম্পূৰ্ণৰূপে অৱগত। ” উল্লেখ্য চীনে ২৮ আগষ্টত দেশখনৰ এখন নতুন চৰকাৰী মানচিত্ৰ মুকলি কৰিছে।এই মানচিত্ৰত চীনে অৰুণাচল প্ৰদেশক তেওঁলোকৰ নিজৰ বুলি দাবী কৰিছে। কেৱল সেয়াই নহয়, সমগ্ৰ দক্ষিণ চীন সাগৰ আৰু টাইৱানক চীনৰ মূল ভূখণ্ড হিচাবে দেখুওৱা হৈছে। নতুন মানচিত্ৰত চীনে অৰুণাচলক ‘দক্ষিণ তিব্বত’ বুলি দাবী কৰিছে ৷ চীনে লগতে দাবী কৰিছে যে অৰুণাচল চীনৰ এক অবিচ্ছেদ্য অংশ। বিশ্লেষকসকলৰ মতে চীনে ২০৩৫ ৰ পৰা ২০৪০ চনৰ ভিতৰত অঞ্চলটো দখল কৰাৰ যি পৰিকল্পনা সেয়া সম্পূৰ্ণ কৰিব বিচাৰি আছে। নতুন মানচিত্ৰ তাৰেই আখৰা বুলিও বহুতে মন্তব্য কৰিছে৷চীনৰ এনে আগ্ৰাসী মনোভাৱৰ বাবেই ভাৰতৰ বেছিভাগ সামৰিক তৎপৰতা এতিয়া চীন-কেন্দ্ৰিক হৈ পৰিছে। সীমান্তত চীনা সেনাৰ উপস্থিতিয়ে উদ্বেগ বৃদ্ধি কৰিছে। লক্ষণীয় যে চীনৰ মানচিত্ৰত দক্ষিণ চীন সাগৰৰ পৰা অৰুণাচললৈকে চীনে নিজৰ বুলি দাবী কৰিছে।
বিশ্বকাপৰ গুৱাহাটীৰ ৱাৰ্মআপ মেচৰ টিকট মুকলি। BOOKMYSHOWত উপলব্ধ ৱাৰ্মআপৰ টিকট।
২০০, ৩০০, ৫০০, ৭০০ টকাত উপলব্ধ হ’ব টিকট। চাৰিখন ৱাৰ্মআপ মেচৰ বাবে টিকট ক্ৰয় কৰিব লাগিব।
৩০ ছেপ্টেম্বৰত ইংলেণ্ডৰ বিৰুদ্ধে ভাৰত অৱতীৰ্ণ হ’ব অনুশীলন মেচত। বাংলাদেশ, শ্ৰীলংকা, আফগানিস্তান অৱতীৰ্ণ হ’ব ৱাৰ্মআপ মেচত।
ক্ষমতাৰ ৰাগীত বলিয়ান হৈ বনকৰা মহিলাক অমানুষিক অত্যাচাৰ কৰি নিলম্বিত হয় শুভলক্ষ্মী দত্ত। নিজৰ আবাসত বনকৰা মহিলা অনিমা প্ৰজাক গৰম পানী ঢালি, গোপন অংগত জলকীয়া সানি আসুৰিক আনন্দত মতলীয়া চৰাইদেউ জিলাৰ অতিৰিক্ত আৰক্ষী অধীক্ষক শুভলক্ষ্মী দত্তক আজি গৃহ বিভাগে নিলম্বন কৰে। গৃহ বিভাগৰ সচিব বিশ্বজিত পেগুৱে স্বাক্ষৰ কৰে নিলম্বনৰ নিৰ্দেশত। উল্লেখযোগ্য যে নিৰ্যাতিতা মহিলা গৰাকীৰ এজাহাৰ দাখিলৰ পিছতো আৰক্ষীয়ে গোচৰ ৰুজু কৰিবলৈ সাহস গোটাব পৰা নাছিল।
আৰক্ষীৰ সঞ্চালকপ্ৰধান জিশপি সিঙৰ টুইটৰ পিছত নাজিৰা আদৰ্শ থানাই ৩৬/২০২৩ নম্বৰত গোচৰ ৰুজু কৰিবলৈ বাধ্য হয় যদিও দত্তক বিচাৰি নোপোৱাৰ অজুহাতত গ্ৰেপ্তাৰ কৰা নাছিল। আৰক্ষী বিষয়া গৰাকীৰ বিৰুদ্ধে উঠা একাধিক অভিযোগৰ লগতে বিৰোধী দলৰ দলপতি দেবব্ৰত শইকীয়াই নিলম্বন নকৰাকৈ আৰক্ষী সঞ্চালকপ্ৰধানে ঘোষনা কৰা তদন্তক এক হাস্যকৰ আখ্যা দিছিল। অবশেষত শুভলক্ষ্মী দত্তক আজি চৰকাৰৰ গৃহ বিভাগে নিলম্বন কৰে।
চিকিৎসক ভুৱা, পৰীক্ষাৰ্থী ভুৱা, ভুৱা আৰক্ষী আদি সকলো ওলায় যদিও এইবাৰ বিজ্ঞানীও ওলাল ভুৱা। তাকো খোদ ইছৰ’ৰ বিজ্ঞানী। ইছৰ’ৰ সৈতে জড়িত থাকি চন্দ্ৰযানৰ লেণ্ডাৰ বিক্ৰম সাজি উলিওৱা বুলি দাবী কৰা এজন ভুৱা বিজ্ঞানী আৰক্ষীৰ জালত পৰিছে। উল্লেখ্য লেণ্ডাৰ বিক্ৰমে চন্দ্ৰৰ দক্ষিণ মেৰুৰ ওচৰত অৱতৰণ কৰিছিল। অৱতৰণৰ পিছদিনা পুৱতি নিশা লেণ্ডাৰ বিক্ৰমৰ পৰা ৰভাৰ প্ৰজ্ঞানে চন্দ্ৰপৃষ্ঠত বিচৰণ কৰিবলৈ লৈছিল। প্ৰজ্ঞান ৰভাৰে এতিয়া চন্দ্ৰপৃষ্ঠৰ পৰা নমুনা সংগ্ৰহ কৰাৰ কাম কৰি আছে। ভাৰতীয় মহাকাশ গৱেষণা সংস্থা (ইছৰো)ৰ সফলতাৰ বাবে দেশবাসী গৌৰৱান্বিত হৈছে। কিন্তু গুজৰাটৰ বাসিন্দা মিটুল ত্ৰিবেদী নামৰ লোকজনে পৰিস্থিতিৰ সুযোগ লৈ নিজকে ইছৰ’ বিজ্ঞানী বুলি মানুহক আঁভুৱাভাঁৰি আহিছে। চন্দ্ৰত বিক্ৰম লেণ্ডাৰৰ অৱতৰণৰ পিছত মিটুলে ত্ৰিবেদীয়ে স্থানীয় সংবাদ মাধ্যমত দাবী কৰিছিল যে তেঁৱেই বিক্ৰম সৃষ্টিৰ আঁৰৰ মানুহজন।
মিটুলে দাবী কৰিছিল যে তেঁৱেই প্ৰথমে বিক্ৰম লেণ্ডাৰ ডিজাইন কৰিছিল। মিতুলে প্ৰমাণ হিচাপে ইছৰ’ৰ নিযুক্তি পত্ৰও দেখুৱাইছিল। বিভিন্ন সাক্ষাৎকাৰত তেওঁ এজন ইছৰ’ বিজ্ঞানী বুলিয়েই পৰিচয় দি আহিছিল। কিন্তু বিষয়টো গুজৰাট আৰক্ষীৰ দৃষ্টিগোচৰ হৈছিল। অনুসন্ধানৰ সময়ত আৰক্ষীয়ে জানিব পাৰিলে যে মিটুল ত্ৰিবেদীয়ে ইছৰ’ৰ ভুৱা নিযুক্তি পত্ৰ প্ৰস্তুত কৰি লৈছিল। ভাৰতীয় আইন অনুসৰি, মিতুলৰ বিৰুদ্ধে চুৰাটৰ অপৰাধ শাখাই জালিয়াতিৰ অভিযোগত গোচৰ ৰুজু কৰে আৰু মিটুলক গ্ৰেপ্তাৰ কৰে।আৰক্ষী সূত্ৰই জনোৱা অনুসৰি বিক্ৰম লেণ্ডাৰ অৱতৰণ কৰাৰ পিছত মিতুলে কেইবাটাও স্থানীয় সংবাদ মাধ্যমৰ আগত নিজকে এজন ইছৰ’ৰ বিজ্ঞানী হিচাপে পৰিচয় দিছিল। সাক্ষাৎকাৰৰ সময়ত মিতুলে কৈছিল যে তেওঁ চন্দ্ৰযান- ৩ৰ বাবে বিক্ৰম লেণ্ডাৰৰ ডিজাইন প্ৰস্তুত কৰিছিল। মিতুলক ২৬ ফেব্ৰুৱাৰী, ২০২২ তাৰিখে ইছৰ’ৰ প্ৰাচীন বিজ্ঞান এপ্লিকেচন বিভাগৰ সহকাৰী অধ্যক্ষ হিচাপে নিযুক্ত কৰা হৈছিল বুলি তেওঁ দাবী কৰিছিল।
মিটুলে দাবী কৰিছিল যে তেওঁ মঙ্গল গ্ৰহৰ বিষয়ে ইছৰ’ই গ্ৰহণ কৰা পৰৱৰ্তী গৱেষণাৰ সৈতেও জড়িত। আৰক্ষীয়ে জনোৱা অনুসৰি মিটুলে নিজকে এজন ইছৰ’ৰ বিজ্ঞানী বুলি দাবী কৰি প্ৰতিষ্ঠানটোৰ সন্মান কলুষিত কৰিবলৈ চেষ্টা কৰিছিল। আৰক্ষীয়ে প্ৰমাণ পাইছে যে তেওঁ কোনো ধৰণে ইছৰ’ৰ সৈতে জড়িত নহয়। মিতুলে এখন ভুৱা নিযুক্তি পত্ৰ তৈয়াৰ কৰি নিজকে এজন ইছৰ’ বিজ্ঞানী হিচাপে প্ৰমাণ কৰিবলৈ চেষ্টা কৰি আছিল।
মাজুলী জিলা সাহিত্য সভাৰ উদ্যোগত গড়মূৰ শাখা সাহিত্য সভা আৰু গড়মূৰ শ্ৰী শ্ৰী পীতাম্বৰদেৱ উচ্চতৰ মাধ্যমিক বিদ্যালয়ৰ সহযোগত গড়মূৰ শ্ৰী শ্ৰীপীতাম্বৰদেৱ উচ্চতৰ মাধ্যমিক বিদ্যালয় প্ৰাংগণত ব্যাপক কাৰ্যসূচীৰে বুধবাৰে অসম সাহিত্য সভাৰ প্ৰাক্তন উপ সভাপতি , মাজুলীৰ পঞ্চ ৰত্নৰ অন্যতম তৰুণ চন্দ্ৰ পামেগামৰ স্মৃতি দিৱস অনুষ্ঠিত হয়। পুৱা ৮:৩০ বজাত পতাকা উত্তোলন কৰে মাজুলী জিলা সাহিত্য সভাৰ সভাপতি ৰামসাগৰ নাথে । প্ৰয়াত তৰুণ চন্দ্ৰ পামেগামৰ আৱক্ষ মূৰ্তিৰ সন্মুখত বন্তি প্ৰজ্বলন কৰে অসম সাহিত্য সভাৰ বিশেষ আমন্ত্ৰিত কাৰ্যনির্বাহক সদস্য ভূপেন দত্তই । স্মৃতি তৰ্পণ কৰে মাজুলী জিলা সাহিত্য সভাৰ উপ সভাপতি ৰুবি শইকীয়াই। স্মৃতি চাৰণ সভাৰ পৌৰোহিত্য কৰে মাজুলী জিলা সাহিত্য সভাৰ সভাপতি ৰামসাগৰ নাথে । মাজুলী মহাবিদ্যালয়ৰ অসমীয়া বিভাগৰ অধ্যাপক বিশিষ্ট লেখক কাৰ্তিক নাথ মুখ্য বক্তা হিচাপে ভাষণ দিয়া সভাত বিশিষ্ট লোকসংস্কৃতিৰ সাধক অমিয় চিৰাঙ, যুগল হাজৰিকা আৰু তৰুণ চন্দ্ৰ পামেগামৰ জীৱন কীৰ্তি সম্পৰ্কত অসম সাহিত্য সভাৰ প্ৰজাতীয় মৈত্ৰীবন্ধন উপ সমিতিৰ আহ্বায়ক মনোজ্যোতি ৰেগনে বক্তব্য ৰাখে।
সভাত মাজুলী জিলা সাহিত্য সভাৰ পত্ৰিকা সম্পাদক তুলসী ৰাজখোৱা, ধনভঁৰালী প্ৰণৱজিত মিশ্ৰ, কুঁহিৰ আহ্বায়ক গোলাপ চন্দ্ৰ নাথ, বিষ্ণু জ্যোতি সাহিত্য গোষ্ঠীৰ সভাপতি লক্ষ্যজিত বৰা , গড়মূৰ জিলা সাহিত্য সভাৰ সভাপতি অনিল চৰকাৰ, সন্মিলিত শাখা সাহিত্য সভাৰ সভাপতি দিলীপ দত্ত, নামনি মাজুলী শাখা সাহিত্য সভাৰ সভাপতি খগেন হাজৰিকা, গড়মূৰ শ্ৰী শ্ৰী পীতাম্বৰদেৱ উচ্চতৰ মাধ্যমিক বিদ্যালয়ৰ অধ্যক্ষ কুমুদ গোস্বামী , জয়ন্ত হাজৰিকা , জিতেন ডেকা, কাজল দত্ত প্ৰমুখ্যে গণ্য-মান্য ব্যক্তিসকল উপস্থিত থাকি বক্তব্য আগবঢ়ায় । সেই সভাতেই ২০২৪ বৰ্ষত তৰুণ চন্দ্ৰ পামেগাম দেৱৰ জন্ম শতবর্ষ ব্যাপক কাৰ্যসূচীৰে অনুষ্ঠিত কৰাৰ প্ৰস্তাৱ গ্ৰহণ কৰা হয় I মাজুলী জিলা সাহিত্য সভাৰ সম্পাদক কেশৱ কাকতিয়ে আঁত ধৰা অনুষ্ঠানটিৰ জাতীয় সংগীতেৰে ভঙ্গ হয়।
পেটৰ ভিতৰত কেন্সাৰ কোষ বৃদ্ধি হ’বলৈ আৰম্ভ কৰিলে পেটৰ কৰ্কট ৰোগ হয়। ইয়াক গেষ্ট্ৰিক কেন্সাৰ বুলিও কোৱা হয়। সময়মতে ইয়াক চিনাক্ত কৰাটো প্ৰত্যাহ্বানজনক হ’ব পাৰে, কিয়নো বেছিভাগ মানুহেই প্ৰাৰম্ভিক পৰ্যায়ত লক্ষণে দেখা নিদিয়ে। বেছিভাগ ক্ষেত্ৰতে পেটৰ কৰ্কট ৰোগৰ লক্ষণ গুৰুতৰ বা শেষ পৰ্যায়ত দেখা যায়। সাধাৰণতে পেটৰ কৰ্কট ৰোগ বৃদ্ধি হ’বলৈ বছৰ বছৰ লাগে। প্ৰাৰম্ভিক পৰ্যায়ত পেটৰ কৰ্কট ৰোগৰ লক্ষণ কেনেধৰণৰ এই বিষয়ে জানো আহক-
পেটৰ কৰ্কট ৰোগত আক্ৰান্ত ৰোগীয়ে প্ৰাৰম্ভিক অৱস্থাত বমিৰ অনুভৱ কৰিব পাৰে। যদি আপুনি অহৰহ এই ধৰণৰ সমস্যাৰ সন্মুখীন হয়, তেন্তে তৎক্ষণাত চিকিৎসকৰ সৈতে যোগাযোগ কৰক।
দীৰ্ঘদিন ধৰি পেট ফুলাৰ সমস্যাইও পেটৰ কৰ্কট ৰোগৰ ইংগিত দিয়ে।
পেটৰ কৰ্কট ৰোগৰ বাবে বুকুৰ বিষ আৰু জ্বলা-পোৰাৰ সমস্যাৰ সন্মুখীন হ’বলগীয়া হ’ব পাৰে।
কম খোৱাৰ পিছতো পেট ভৰি থকা অনুভৱ কৰাও এই ৰোগৰ লক্ষণ হ’ব পাৰে।
যদি পেটত সংক্ৰমণ বা কেন্সাৰৰ সমস্যা হয়, তেতিয়া ব্যক্তিজনৰ জ্বৰৰ দৰে অনুভৱ হ’বলৈ আৰম্ভ কৰে।
পেটৰ কৰ্কট ৰোগত আক্ৰান্ত ৰোগীয়েও পেটৰ বিষৰ সমস্যাৰ সন্মুখীন হ’বলগীয়া হ’ব পাৰে।
মলৰ পৰা তেজ ওলোৱাটোও পেটৰ কৰ্কট ৰোগৰ কাৰণ হ’ব পাৰে। এনে ক্ষেত্ৰত তৎক্ষণাত চিকিৎসকৰ সৈতে যোগাযোগ কৰক।
ডায়েৰিয়া আৰু কোষ্ঠকাঠিন্যৰ দীৰ্ঘদিনীয়া সমস্যাই পেটৰ কৰ্কট ৰোগৰ কাৰণ হ’ব পাৰে।
যদি আপোনাৰ শৰীৰত এনে লক্ষণ দেখা যায়, তেন্তে লগে লগে চিকিৎসকৰ সৈতে যোগাযোগ কৰক। যাতে আপোনাৰ চিকিৎসা সময়মতে আৰম্ভ কৰিব পৰা যায়।
মৰিগাঁও জিলাৰ চৰ অঞ্চলসমূহকে ধৰি বান তথা খহনীয়াপ্ৰৱণ এলেকাসমূহত ৰাজ্য চৰকাৰৰ দ্বাৰা মথাউৰি, বান্ধ আৰু কেতবোৰ ঠাইত প্ৰয়োজন অনুসৰি শ্লুইছ গেট নিৰ্মাণকে ধৰি ভালেমান প্ৰতিৰোধমূলক ব্যৱস্থা গ্ৰহণ কৰাৰ পৰিপ্ৰেক্ষিতত চলিত বৰ্ষত জিলাখন বানৰ দ্বাৰা বিশেষ ক্ষতিগ্ৰস্ত হোৱা নাই যদিও নেৰানেপেৰা বৰষুণৰ ফলত ব্ৰহ্মপুত্ৰ আৰু ইয়াৰ উপনৈসমূহৰ পানী বৃদ্ধি পোৱাৰ প্ৰতি লক্ষ্য ৰাখি সম্ভাব্য বান পৰিস্থিতিৰ জোৰা মৰাৰ বাবে জিলা প্ৰশাসনে সকলো ধৰণে প্ৰয়াস অব্যাহত ৰাখিছে।
কেতবোৰ নৈপৰীয়া অঞ্চলত ধাৰাষাৰ বৰষুণৰ ফলত পানী বঢ়ালৈ চাই জনসাধাৰণ যাতে অসুবিধাৰ সন্মুখীন নহয় সেয়া সুনিশ্চিত কৰাৰ বাবে জিলা প্ৰশাসনে প্ৰয়োজনীয় ব্যৱস্থা গ্ৰহণ কৰিছে। এইবাৰ জিলাখনত বান পৰিস্থিতিৰ সৃষ্টি হোৱা নাই যদিও জিলা প্ৰশাসনে নৈপৰীয়া ৰাইজৰ জীৱন আৰু সম্পত্তিৰ সুৰক্ষা সুনিশ্চিত কৰাৰ বাবে ওখ ঠাইসমূহত স্থায়ী আশ্ৰয় গৃহ নিৰ্মাণৰ প্ৰচেষ্টা হাতত লৈছে।
জিলা আয়ুক্ত দেৱাশীষ শৰ্মাৰ একান্ত প্ৰচেষ্টা আৰু উদ্যোগত মৰিগাঁও জিলাৰ কেইবাটাও চৰ অঞ্চলত বান আৰু খহনীয়া ক্ষতিগ্ৰস্ত জনসাধাৰণৰ সহায় হোৱাকৈ স্থায়ী আশ্ৰয় গৃহ নিৰ্মাণৰ ব্যৱস্থা কৰা হৈছে। শেহতীয়াকৈ জিলা আয়ুক্তৰ উদ্যোগত আৰু শৰৎচন্দ্ৰ কাকতি চেৰিটেবল ট্ৰাষ্টৰ আৰ্থিক অনুদানেৰে জিলাখনৰ বৰালীমাৰি চৰত এটা স্থায়ী আশ্ৰয় গৃহ নিৰ্মাণৰ কাম সম্পূৰ্ণ হয়।
কেইবাদিন ধৰি দি থকা ধাৰাষাৰ বৰষুণৰ ফলত যোৱা ২৭ আগষ্টত বৰালীমাৰি চৰৰ চাৰিওফালে ব্ৰহ্মপুত্ৰৰ পানী বাঢ়িবলৈ ধৰে। বাঢ়নী পানীৰ ফলত বৰালীমাৰি চৰ অঞ্চলত বাস কৰা ১২৫ জন লোকে ৭৫ টাকৈ গৰু-ছাগলীসহ চৰ অঞ্চলটোত স্থাপন কৰা স্থায়ী আশ্ৰয় গৃহত আশ্ৰয় লয়। এই আশ্ৰয়গৃহত এটা পাকঘৰ আৰু এটা মজুতকৰণ গৃহও আছে। অনুৰূপ স্থায়ী আশ্ৰয় গৃহৰ নিৰ্মাণৰ কাম জিলাখনৰ লাহৰিঘাট অঞ্চলত অহা নৱেম্বৰ মাহত আৰম্ভ কৰা হ’ব। এই আশ্ৰয় গৃহটোত বান ক্ষতিগ্ৰস্ত লোকসকলে থকা-খোৱা সকলো সুবিধা লাভ কৰাৰ লগতে এটা সুৰক্ষিত ঘৰুৱা পৰিৱেশত আশ্ৰয় ল’ব পাৰিব।
জিলা আয়ুক্তগৰাকীয়ে কয়, ‘অতি সৌভাগ্যৰ কথা যে মৰিগাঁও জিলাখনত এইবাৰ বান পৰিস্থিতিৰ বিশেষ অৱনতি ঘটা নাই। এইবাৰ জিলাখনত বহু বছৰৰ মূৰত ৰাইজে শালি খেতিও কৰিছে। এইয়া জিলাখনৰ কৃষি অৰ্থনীতি বিশেষকৈ কৃষকসকলৰ বাবে এটা ইতিবাচক খবৰ’। বান আৰু খহনীয়া সমস্যাৰ সমাধানৰ বাবে জিলাখনত ৰাজ্য চৰকাৰৰ জলসম্পদ বিভাগ আৰু জিলা প্ৰশাসনৰ উদ্যোগত গ্ৰহণ কৰা প্ৰতিৰোধমূলক ব্যৱস্থাসমূহ ইয়াৰ অন্যতম কাৰণ বুলি তেওঁ কয়।
জিলা আয়ুক্তগৰাকীয়ে কয় যে, ‘বান পৰিস্থিতিৰ সৃষ্টি নহ’লেও নৈপৰীয়া অঞ্চলসমূহত বাঢ়নী পানীৰ আশঙ্কাৰ প্ৰতি লক্ষ্য ৰাখি জনসাধাৰণৰ সুৰক্ষা সুনিশ্চিত কৰাৰ বাবে জিলা প্ৰশাসনে সদায় প্ৰয়াস চলাই আহিছে’। এইক্ষেত্ৰত ইতিমধ্যে জিলা প্ৰশাসনে কেইবাটাও বেচৰকাৰী সংস্থাৰ সৈতে আলোচনাত মিলিত হৈছে বুলি উল্লেখ কৰি তেওঁ কোনো ইচ্ছুক বেচৰকাৰী সংস্থাই এই দিশত কাম কৰিব বিচাৰিলে প্ৰশাসনৰ তৰফৰ পৰা সকলোধৰণে সহায় আগবঢ়োৱা হ’ব বুলি মন্তব্য কৰে। তেওঁ মানৱীয় দৃষ্টিভংগীৰে বেচৰকাৰী সংস্থাসমূহক এনে কাৰ্যৰ বাবে আগবাঢ়ি আহিবলৈও আহ্বান জনায়।
উল্লেখযোগ্য যে জিলা আয়ুক্তগৰাকীৰ প্ৰচেষ্টাত মৰিগাঁও জিলাৰ বিভিন্ন চৰ অঞ্চলত কেইবাটাও বেচৰকাৰী সংস্থাৰ সহযোগত বহুকেইটা স্থায়ী আশ্ৰয় গৃহ নিৰ্মাণৰ পৰিকল্পনা কৰা হৈছে। এনে স্থায়ী আশ্ৰয় গৃহসমূহত বান ক্ষতিগ্ৰস্ত লোকসকলে অস্থায়ীভাৱে আশ্ৰয় ল’ব পাৰিব।
মৰিগাঁও জিলাৰ বান ক্ষতিগ্ৰস্ত অঞ্চলৰ লোকসকলে জিলা আয়ুক্তগৰাকীৰ এই প্ৰয়াসৰ শলাগ লৈছে। বিশেষভাৱে আশ্ৰয় শিবিৰত সাময়িকভাৱে আশ্ৰয় লোৱা মহিলাসকলে জিলা আয়ুক্তগৰাকীৰ এই প্ৰয়াসৰ উচ্চ প্ৰশংসা কৰি ভৱিষ্যৎ সময়ত তেওঁৰ নেতৃত্বত এনেধৰণৰ কল্যাণমূলক কাৰ্যকলাপ অব্যাহত ৰাখিব বুলি আশা প্ৰকাশ কৰিছে। স্মৰ্তব্য যে নদীৰ পানী বাঢ়িলে নৈপৰীয়া অঞ্চলত বাস কৰা ৰোগাক্ৰান্ত, বয়োজ্যেষ্ঠ, দিব্যাংগ, শিশু আৰু মহিলাসকলে অনেক সমস্যাৰ সন্মুখীন হ’ব লগা হয়।
