দেশৰ অন্যতম জনপ্ৰিয় তথা বয়োজেষ্ঠ ৰাজনৈতিক নেতা লালু প্ৰসাদ যাদৱ সম্প্ৰতি চিকিৎসাজনিত কাৰণত ছিংগাপুৰত আছে। বৃক্কৰ ৰোগত আক্ৰান্ত বিহাৰৰ প্ৰাক্তন মুখ্যমন্ত্ৰী লালুৰ জীৱন ৰক্ষাৰ্থে তেওঁৰ কন্যা ৰোহিনী আচাৰ্যই বৃক্ক দান কৰিবলৈ সাজু হৈছে।

ইতিমধ্যে চলিত মাহৰ আৰম্ভণিতে আৰ জে ডি- মুৰব্বী জেষ্ঠ ৰাজনৈতিক নেতাগৰাকীৰ শৰীৰত ছিংগাপুৰৰ চিকিৎসালয়ত বৃক্ক সংৰোপণ কৰা হ’ব বুলি জানিব পৰা গৈছে। পিতৃ লালুৰ যাদৱৰ চিকিৎসা সম্বন্ধে তেওঁৰ অসংখ্য অনুৰাগী তথা সমৰ্থকক অৱগত কৰি পুত্ৰ তেজস্বী যাদৱে অহা ৫ ডিচেম্বৰত বৃক্ক সংৰোপণ কৰা হ’ব বুলি সদৰী কৰিছে।

বুধবাৰে বিহাৰৰ কুৰহানীত এখন দলীয় প্ৰচাৰ সভাত অংশগ্ৰহণ কৰিছিল তেজস্বী যাদৱে। উল্লেখ্য যে ৫ ডিচেম্বৰত কুৰহানীত উপ-নিৰ্বাচন অনুষ্ঠিত হ’ব। এই উপলক্ষে আয়োজিত সভাখনত সমবেত লোকসকলক উদ্দেশ্যি দিয়া ভাষণত তেজস্বী যাদৱে লালু প্ৰসাদ যাদৱৰ চিকিৎসাৰ বিষয়ে উল্লেখ কৰে।

নিজ ভাষণত যাদৱে কয়, ‘লালুজীয়ে কুৰহানীলৈ আহিব বিচাৰিছিল যদিও বৰ্তমান তেওঁ ছিংগাপুৰত থকাৰ বাবে সেয়া সম্ভৱ নহ’ল। ৫ ডিচেম্বৰত ছিংগাপুৰতে তেওঁৰ বৃক্ক সংৰোপণ কৰিব চিকিৎসকে। তেওঁ বিজেপিৰ পৰাজয় চাব বিচাৰে আৰু আপোনালোকৰ বাবে এই বাৰ্তাটো দিবলৈ মোক প্ৰেৰণ কৰিছে।”

উল্লেখ্য যে বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱ দীৰ্ঘদিন ধৰি বৃক্কৰ ৰোগত আক্ৰান্ত হৈ আছে। বিগত কিছুদিন পূৰ্বে তেওঁৰ শাৰীৰিক অৱস্থা অধিক উদ্বেগজনক হৈ পৰিছিল। পিতৃক এনে অসুস্থতাৰ পৰা আৰোগ্য কৰাৰ মানসেৰে তেওঁৰ কন্যা ৰোহিনীয়ে নিজৰ এটা কিডনী দান কৰাৰ সিদ্ধান্ত লৈছে।

যোৱা মাহত স্বাস্থ্য পৰীক্ষাৰ পিছত ছিংগাপুৰৰ পৰা উভতি আহিছিল লালু। বৃক্কৰ ৰোগত আক্ৰান্ত হোৱাৰ উপৰিও প্ৰবীণ নেতাগৰাকী একাধিক শাৰীৰিক সমস্যাত ভুগি আছিল। এই পৰিস্থিতিত ছিংগাপুৰৰ চিকিৎসকৰ পৰামৰ্শ অনুসৰি জৰুৰী বৃক্ক সংৰোপণৰ প্ৰয়োজন হয়।

ইয়াৰ পিছতে ৰোহিনীয়ে লালু প্ৰসাদ যাদৱক বৃক্ক দান কৰাৰ সিদ্ধান্ত লয়। প্ৰথম অৱস্থাত লালুৱে কন্যা ইচ্ছাৰ প্ৰতি সঁহাৰি জনোৱা নাছিল যদিও অৱশেষত সেই সিদ্ধান্ত মান্তি হ’ল। এতিয়া তেজস্বী যাদৱে সদৰী কৰা অনুসৰি বৃক্ক সংৰোপণ অস্ত্ৰোপচাৰ ৫ ডিচেম্বৰত সম্পন্ন হোৱাটো নিশ্চিত হৈ পৰিছে।