এজাক শিশুৰ কলকলনিত মুখৰিত হ’ল ধনশিৰি নৈৰ বলুকা নুমলীগড়ৰ ধোদাং গাওঁ । ৰশ্মি ৰেখা শিল্পী সমাজৰ উদ্যোগত, সন্মিলিত যুৱক সংঘ তথা ধোদাং বাসী ৰাইজৰ সহযোগত ৬ জানুৱাৰী ২০২২ খ্ৰীষ্টাব্দৰ পৰা ৬ ফেব্ৰুৱাৰী ২০২২ খ্ৰীষ্টাব্দলৈ এমহীয়া শিশু নাট কৰ্মশালাৰ অন্তত ৬ ফেব্ৰুৱাৰী ২০২২ খৃষ্টাব্দ দেওবাৰে সন্ধ্যা ৭-০০ বজাত তিনিকুৰি শিশুৱে মঞ্চস্থ কৰিলে নাট্যকাৰ পবিত্র ৰাজখোৱাৰ শিশুনাট “মাৰফৎ বকুলতল” । তৰুণ তীৰ্থ শইকীয়াৰ মূখ্য পৰিচালনাত ধোদাং বিষ্ণু জ্যোতি কলা নিকেতনৰ প্ৰেক্ষাগৃহত মঞ্চস্থ হোৱা শিশু নাটকৰ অভিনয় শিল্পী সকলে দৰ্শক ৰাইজৰ মন আকৰ্ষিত কৰিবলৈ সক্ষম হ’ল ।

সাবলিল কন্ঠস্বৰ, মনোগ্রাহী অভিনয়েৰে মঞ্চত আত্মনিয়ন্ত্রণৰ মাজেৰে শিশু সকলে একো একোজন চিৰিয়াচ নাট্য কৰ্মীৰ পৰিচয় দিলে । তৰুন তীৰ্থ শইকীয়াৰ লগতে শিশুনাট কৰ্মশালাৰ প্ৰশিক্ষক সকল আছিল ক্ৰমে প্ৰনব শইকীয়া, প্ৰিয়াংশু প্ৰাঞ্জল আৰু নিলীম ফুকন । সংগীতত আছিল তন্ময় শইকীয়া আৰু জিতুমনী কটকী ৷ শব্দ আৰু পোহৰত আছিল মুনৰ । নাট্য সন্ধ্যাটি উদ্বোধন কৰে তিনি নং মহুৰা জিলা পৰিষদৰ সদস্য তথা গোলাঘাট জিলা পৰিষদৰ উপ সভানেত্রী শ্ৰীযুতা ৰশ্মি কাকতিয়ে । নাট্য সন্ধ্যাৰ প্ৰাক মুহুৰ্তত কুকীল কন্ঠী গায়িকা লতা মাংগেশকাৰৰ বিয়োগত গভীৰ শ্ৰদ্ধাঞ্জলী জ্ঞাপন কৰি শিল্পী গৰাকীৰ আলোকচিত্ৰৰ কাষত বন্তী প্ৰজ্বলন কৰে নাট্যকাৰ পবিত্র ৰাজখোৱা আৰু শিল্পী অৰুন গগৈয়ে ।

উল্লেখ্য যে  কৰ্মশালাটোত শিশু সকলক নাটক আৰু ব্যৱহাৰিক জীৱনত কামত অহাকৈ কথন শৈলী, আবৃত্তি, মুখা শিল্প, মঞ্চ সজ্জা, ৰূপসজ্জা আদি বিষয়ৰ ওপৰতো প্ৰশিক্ষণ দিয়া হয় । প্ৰশিক্ষাৰ্থী সকলে নাটক খনত  প্ৰয়োজন হোৱা মঞ্চ সজ্জাৰ সামগ্রী সমূহ সেয়েহে নিজেই তৈয়াৰ কৰি উলিওৱাৰ লগতে ৬২ টা শিশুৱে ৰূপসজ্জাৰ কামো ইজনে সিজনক কৰি দি এমহীয়া নাট কৰ্মশালাৰ সফলতা বুটলিবলৈ সক্ষম হ’ল । গ্ৰাম্য পটভুমিৰ এখন ব্যতিক্ৰমী নাটক আৰু শিশুৰ লগতে প্ৰতিজন মানুহৰে মন মগজুত চুই যাব পৰাকৈ নাট্যকাৰে উপহাৰ দিয়া নাটকখন তৰুন তীৰ্থ শইকীয়াই উপযুক্ত উপস্থাপন শৈলীৰে সজাই দৰ্শকৰ আদৰ বুটলিবলৈ সক্ষম হ’ল ।

নাটকৰ শেষত কণ কণ শিশু শিল্পী সকলৰ লগত নাট্য প্ৰশিক্ষক, নাট্যকাৰ আৰু দৰ্শক ৰাইজৰ মাজত এঘন্টীয়া এটি অন্তৰংগ আলাপ অনুষ্ঠান সম্পাদিত কৰে প্ৰদীপ কুমাৰ বৰাই । প্ৰতি গৰাকী প্ৰশিক্ষাৰ্থীক একোখনকৈ মানপত্ৰ প্ৰদান কৰাৰ লগতে প্ৰশিক্ষাৰ্থী সকলে গুৰু প্ৰনাম অনুষ্ঠানো সম্পাদন কৰে । শিশু সকলক উৎসাহ যোগোৱা প্ৰতিগৰাকী শুভাকাঙ্ক্ষী তথা দৰ্শক ৰাইজক আয়োজক সমিতিৰ সভাপতি সম্পাদক ক্ৰমে প্ৰভাত হাজৰিকা আৰু ৰিতুল হাজৰিকাই ধন্যবাদ আৰু কৃতজ্ঞতা জ্ঞাপন কৰিছে ।

ধোদাং ৰশ্মিৰেখা শিল্পী সমাজ তথা সন্মিলিত যুৱক সংঘৰ শিল্পী সকলে অহা ১২ ফেব্ৰুৱাৰী তাৰিখে শংকৰ জ্যোতি নাট্য মন্দিৰত পুনৰ আগবঢ়াব আন এক নাট্য নিবেদন “অজলা ককাইৰ পগলা মৰম” ৷ সেয়েহে সাদাশয় সকলো নাট্যপ্রেমী ৰাইজকে আয়োজক সমিতিয়ে পুনৰ অহা ১২ ফেব্ৰুৱাৰী তাৰিখে সন্ধ্যা ৭-০০ বজাত আৰম্ভ হবলগীয়া নাট্য নিবেদনলৈ সাদৰ নিমন্ত্রণ জনাইছে ।

আজি মাজুলী আউনীআটী উচ্চ মাধ্যমিক বিদ্যালয়ত এক ব্যতিক্ৰমী কাৰ্যসূচীৰে বিদ্যালয়ৰ পছপন্ন গৰাকী শিক্ষাৰ্থী আৰু দুগৰাকী শিক্ষকক সম্বৰ্ধনা জনাই। ২০২২ বৰ্ষত শিক্ষান্ত পৰীক্ষাত অৱতীৰ্ণ হ’ব লগা বিদ্যালয়ৰ দশম শ্ৰেণীৰ এই ছাত্ৰ ছাত্ৰীসকলক নৱম শ্ৰেণীৰ ছাত্ৰ ছাত্ৰীসকলৰ পৰা একোজনে একোজনক একোখনকৈ শুভেচ্ছা পত্ৰ আৰু একোটাকৈ কলম দি পৰীক্ষাৰ সফলতা কামনা কৰি ওলগ জনাই। অন্যহাতে ২০১০ চনৰ পৰা বিদ্যালয়ত শিক্ষকতা কৰি ২০২১ চনত স্থায়ী পদত নিযুক্তি পাই অন্য বিদ্যালয়লৈ বদলি হৈ যোৱা দুগৰাকী শিক্ষয়িত্ৰী ৰীতা দুৱৰীয়া আৰু বৰাকো আজি আনুষ্ঠানিকভাৱে বিদ্যালয়খনিৰ পৰা বিদায় সম্বৰ্ধনা জনাই। বিদ্যালয়ৰ প্ৰধান শিক্ষক প্ৰশান্ত দোলাকাষৰীয়াৰ সভাপতিত্বত হোৱা আৰু বিদ্যালয়ৰ ছাত্ৰ একতা সভাৰ উদ্যোগত অনুষ্ঠিত হোৱা এই বিশেষ সম্বৰ্ধনা সভাখনৰ আঁত ধৰে একতা সভাৰ সভাপতি কমল দত্তই। বিদ্যালয়ৰ ছাত্ৰ-ছাত্ৰী সকলৰ সমবেত সংগীতেৰে আৰম্ভ হোৱা সভাৰ উদ্দেশ্য ব্যাখ্যা কৰে নৱম শ্ৰেণীৰ ছাত্ৰ অনিৰ্বাণ বৰাই। দশম শ্ৰেণীৰ ছাত্ৰী ছাত্ৰীসকলে শিক্ষক সকলক একোখন গামোচা আৰু একোটা কলমেৰে আদৰণি জনোৱা কাৰ্যসূচী আঁতধৰে ছাত্ৰ অভিলাষ বৰাই। সভাত অতিথি ৰূপে অংশ লোৱা মাজুলী আউনীআটী হেমচন্দ্ৰ উচ্চতৰ মাধ্যমিকৰ শিক্ষক ডিম্বেশ্বৰ ভুঞা আৰু সাংবাদিক দীপু বৰাই বিদ্যালয়ৰ এই ব্যতিক্ৰমী কাৰ্যসূচীক প্ৰশংসা কৰে আৰু বিদায়ী ছাত্ৰ ছাত্ৰীসকলক আশীৰ্বাদ দিয়ে। বিদায়ী দুয়োগৰাকী শিক্ষয়িত্ৰী আৰু নৱম শ্ৰেণীৰ এগৰাকী ছাত্ৰ প্ৰণৱ জ্যোতি বৰাৰ আবেগভৰা বক্তব্যত সভাৰ সকলো আবেগবিহ্বল হৈ পৰে। তাৰবাবে সভাৰ স্বাভাৱিক অৱস্থা ঘুৰাই আনিবলৈ সভাপতিয়ে সেই কাৰ্যসূচী প্ৰত্যাহাৰ কৰি দুগৰাকী ছাত্ৰ জয়ন্ত জিৎ ভুঞা আৰু ৰাজশ্ৰী দাসৰ দ্বাৰা যৌথ এটি সংগীত পৰিৱেশন কৰিবলৈ দিয়ে।

সভাত সৰস্বতী পূজাৰ আয় ব্যয় দাখিল কৰাৰ লগতে ৰাহি টকাৰে বিদ্যালয়ৰ সৌন্দৰ্যৱদ্ধৰ্ণৰ বাবে চৌহদৰ দেৱালত ৰং দিয়া আৰু চিত্ৰ অংকণ কৰাৰ একতা সভাৰ সিদ্ধান্ত ৰ বিষয়ত একতা সভাৰ সভাপতিয়ে ঘোষণা কৰে। সভাত শিক্ষকসকলৰ হৈ অমিয়া দেৱী বৰঠাকুৰে বক্তব্য দিয়ে। সভাই বিদ্যালয়লৈ দুখনি তিৰ্পাল আগবঢ়োৱা বাবে প্ৰাক্তন ছাত্ৰ বেদান্ত বৰাক ধন্যবাদ জনাই আৰু পুৰণা দশম শ্ৰেণীৰ ২০২০-২১ আৰু ২০২১-২০২২ বৰ্ষৰ ছাত্ৰ-ছাত্ৰী সকলে ক্ৰমে দুজোৰা গামলা আৰু দ্ৰাম ছেট অৰ্পণ কৰাৰ বাবে ধন্যবাদ জনায়। বিদ্যালয়ৰ দেৱাল অংকনৰ বাবে  কমল দত্তই নিজে পাঁচশ আগবঢ়োৱা বুলি ঘোষণা কৰা লগতে ৰাইজৰ সহযোগ আহ্বান কৰে। বদলি হৈ যোৱা শিক্ষয়িত্ৰী নৱনিতা বৰাই এহেজাৰ টকা আগবঢ়োৱাৰ লগতে মাজুলী চিত্ৰকলা বিদ্যালয় “ৰূপবৰণ” ৰ পৰা নিম্নতম ব্যয়ৰে এই প্ৰকল্প অসম ভাওনা সমাৰোহৰ পূৰ্বে গঢ়ি তুলিব বুলি অধ্যক্ষ দীপু বৰাই সভাত প্ৰকাশ কৰে। সভাপতিৰ ভাষণত বিদ্যালয়ৰ প্ৰধান শিক্ষক গৰাকীয়ে বদলি হৈ যোৱা শিক্ষয়িত্ৰী দুগৰাকীক ভূয়সী প্ৰশংসা কৰে আৰু বিদায়ী ছাত্ৰ ছাত্ৰীসকলৰ পৰা এটা গুণগত ফলাফল পোৱাৰ আশা ব্যক্ত কৰে।

বৰ্ষীয়ান সাংবাদিক, অসম তথা উত্তৰ-পূৰ্বাঞ্চলৰ ৰাষ্ট্ৰীয় পৰ্যায়ৰ বহুভাষিক সংবাদ সংস্থা ‘হিন্দুস্থান সমাচাৰ’ৰ গুৱাহাটী কেন্দ্ৰৰ প্ৰতিষ্ঠাপক ব্যুৰোচীফ ৰমাশংকৰ ৰায়ৰ দেহাৱসান ঘটিছে। সোমবাৰে সন্ধিয়া উত্তৰ প্ৰদেশৰ মৌ জিলাৰ অন্তৰ্গত হাথিনি অঞ্চলৰ চোৰপাখুৰ্দ গাঁৱত থকা তেওঁৰ পৈতৃক ঘৰত বয়োজ্যেষ্ঠ সাংবাদিকগৰাকীয়ে শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৮৬ বছৰ। মৃত্যুৰ সময়ত স্বৰ্গীয় ৰমাশংকৰ ৰায়ে দুজন পুত্ৰ, দুই বোৱাৰী, ছগৰাকী নাতি-নাতিনীসহ অসংখ্য গুণমুগ্ধক এৰি গৈছে। তেওঁৰ পৰিয়ালৰ সূত্ৰ অনুসৰি, ৰমাশংকৰ ৰায়ৰ হৃদৰোগত আক্ৰান্ত হৈ মৃত্যু হয়।