অসম জাতীয়তাবাদী যুৱ ছাত্ৰ পৰিষদ, দক্ষিণপাট আঞ্চলিক সমিতিৰ অধীনৰ কুমাৰ গাওঁ শাখা সমিতিখন ২৬ জানুৱাৰীত গঠন কৰা হয়। কুমাৰগাওঁ বৰা-কলিতা প্ৰাথমিক বিদ্যালয় প্ৰাংগণত যোগেন কলিতাৰ সভাপতিত্বত অনুষ্ঠিত হোৱা প্ৰতিনিধি সভাই লক্ষীৰাম কলিতাক সভাপতি আৰু মিলন কলিতাক সাধাৰণ সম্পাদক হিচাপে লৈ ২৬ জনীয়া এখন সমিতি গঠন কৰা হয় ৷ সভাত জিলা সভাপতি মুনীন্দ্ৰ ভূঞা, সাধাৰণ সম্পাদক পবিত্ৰ বৰা, উপদেষ্টা জগত হাজৰিকা,গুণেশ্বৰ গায়নে  সংগঠনৰ লক্ষ্য,উদেশ্য আৰু নীতি-আদৰ্শৰ ওপৰত মন্তব্য আগবঢ়াই নতুন সমিতিলৈ শুভেচ্ছা জ্ঞাপন কৰে।

দক্ষিণ আঞ্চলিকৰ সাধাৰণ সম্পাদক ৰিতুৰাজ কলিতাই আঁত ধৰা সভাখনত কুমাৰ গাওঁখনৰ বিভিন্ন সমস্যা যেনে গড়া-খহনীয়া প্ৰতিৰোধৰ ব্যৱস্থাৰ বাবে চৰকাৰক দাবী জনোৱা, কুমাৰগাওঁ মথাউৰি অংশ সৱলীকৰণ(ৰ’ড কাম বান্ধ) আৰু বৰ্তমান পকীকৰণত থকা যিকোনো অনিয়ম বা বিসংগতি দুৰ কৰা,বৰ্তমান অত্যাধুনিক যুগতো লোক নিৰ্মাণ(পথ) বিভাগৰ আঁচনিৰ  অধীনত এটাও পকীপথ নথকা গাওঁখনৰ গুৰত্বপুৰ্ণ পথসমূহ পকীকৰণ কৰা, একমাত্ৰ কৃষিজীৱি গাওঁখনৰ কৃষকসকলৰ বিভিন্ন সমস্যা দুৰ কৰা,পশুধনৰ সংৰক্ষণ আৰু পশুপালকৰ সমস্যাসমূহ দুৰ কৰা, বঞ্চিত দৰিদ্ৰ সীমাৰেখাৰ লোকসকলক পি.এম.আৰ.ওৱাই গৃহ, অৰুণোদয় আদি প্ৰদান কৰা,পখীনিধন ৰোধ কৰাকে ধৰি কেইবাটাও গুৰুত্বপুৰ্ণ প্ৰস্তাৱ গ্ৰহণ কৰা হয়। প্ৰায় অৰ্ধশতাধিক  লোকৰ উপস্থিতিত গঠন হোৱা শাখা সমিতিখনে আগন্তক দিনত ৰাইজৰ স্বাৰ্থত সৱলভাৱে কাম কৰি যাব বুলি ৰাইজে আশা প্ৰকাশ কৰিছে ৷

নুন্যতম সমৰ্থন মূল্যত কৃষকৰ পৰা ধান ক্ৰয় কৰাৰ বাবে মুখ্যমন্ত্ৰী ড হিমন্ত বিশ্ব শৰ্মাই গ্ৰহণ কৰা পদক্ষেপৰ ফলত বৰপেটা জিলাৰ কৃষক সকলো যথেষ্ট উপকৃত হৈছে। আজি বৰপেটা জিলাৰ কাহিবাৰীত অসম কৃষি বিপণন পৰিষদৰ এটা ধান আহৰণ কেন্দ্ৰ আনুষ্ঠানিকভাৱে উদ্ধোধন কৰি দিয়া ভাষণত উপায়ুক্ত গৰাকীয়ে এইদৰে কয়। তেওঁ কয় যে, মুকলি বজাৰত পোৱা দৰতকৈ ইয়াত প্ৰায় দুগুণ মূল্য কৃষকে লাভ কৰিবলৈ সক্ষম হৈছে। তেওঁ কেন্দ্ৰীয় চৰকাৰে আগবঢ়োৱা এই সুবিধা কৃষক সকলক গ্ৰহণ কৰি লাভান্বিত হ’বলৈ আহ্বান জনায়। ইয়াৰ দ্বাৰা খেতিয়ক সকলে নিজৰ উৎপাদিত শস্যৰ উচিত মূল্য পোৱাটো নিশ্চিত কৰা হৈছে বুলিও তেওঁ উল্লেখ কৰে। 

খাদ্য আৰু অসামৰিক যোগান বিভাগৰ ভাৰপ্ৰাপ্ত উপ সঞ্চালক জগত জীৱন ডেকাই আঁতধৰা সভাখনত অসম কৃষি বিপণন পৰিষদৰ অন্তৰ্গত নিজ বহৰি বজাৰ সমিতিৰ সচিব ডিম্বেশ্বৰ দাসে এই ধান আহৰণ প্ৰক্ৰিয়াত পালন কৰিবলগীয়া নিয়ম সমূহৰ বিষয়ে কৃষক সকলক বুজাই কয়।  জিলা তথ্য আৰু জনসংযোগ বিষয়া বিকাশ শৰ্মাও চমু ভাষণ দিয়া সভাখনত সহকাৰী আয়ুক্ত নিমাশ্ৰী ডাউকাও উপস্থিত থাকে। উদ্ধোধনী সভাৰ অন্তত উপায়ুক্ত গৰাকীয়ে ওচৰৰ ধান মিলৰ কাম-কাজো পৰিদৰ্শন কৰে। তদুপৰি অসম দৰ্শন আচনিৰ অধীনত নিৰ্মাণ কৰা কাহিবাৰী নামঘৰটোও পৰিদৰ্শন কৰি কাম বুজ লোৱাৰ লগতে ইয়াত সেৱাও লয়। ইয়াৰ পিছতে উপায়ুক্ত গৰাকীয়ে সৰ্থেবাৰীৰ বেলবাৰী আৰু বাজেশিলাত থকা ধান আহৰণ কেন্দ্ৰ দুটিও পৰিদৰ্শন কৰি ধান আহৰণৰ স্থিতিৰ পৰ্যালোচনা কৰে। জিলা তথ্য আৰু জনসংযোগ বিষয়া বিকাশ শৰ্মাই জনোৱা মতে এই পৰ্যন্ত জিলাখনৰ কৃষকৰ পৰা ৩৫০ কুইন্টল ধান বিভিন্ন কেন্দ্ৰত সংগ্ৰহ কৰা হৈছে।