ক’ভিড পৰিস্থিতি ক্ৰমাৎ উন্নত হোৱাত ৰাজ্যবাসীয়ে পূজা-পাৰ্বন অনুষ্ঠিত কৰিব পৰাকৈ এক পৰিৱেশ ঘূৰি অহাৰ পিছত মৰাণৰ ৰাইজে  দূৰ্গা পূজা, কালি পূজা উদযাপনৰ পিছত এইবাৰ ধৰ্মীয় ৰীতি -নীতিয়ে মাজেদি ষট পূজা উদযাপন কৰিছে  । ষট পূজাক লৈ মৰাণৰ ভক্ত সকলৰ মাজত উৎসাহ দেখিবলৈ পোৱা গৈছে। কিছু লোকে ঘৰতে ষট পুজা উদযাপন কৰাৰ বিপৰীতে মৰাণ নগৰৰ ৰবি ষষ্ঠী সৰোৱৰ সমিতিৰ উদ্যোগত অনুষ্ঠিত কেন্দ্ৰীয় ষট পূজা স্থলীত ৰাইজে ধৰ্মীয় নীতি নিয়মৰ মাজেদি পূজা অনুষ্ঠিত কৰা পৰিলক্ষিত হয়।প্ৰশাসনে বান্ধি দিয়া ক’ভিড নীতি-নিৰ্দেশনা মানি ষট পূজা উদযাপন কৰা মৰাণ নগৰৰ ৰবি ষষ্ঠী সৰোৱৰ সমিতিৰ উদ্যোগত এইবাৰ ২৪ বছৰৰ বাবে অনুষ্ঠিত কৰিছে ষট পূজা।

তামুলপুৰ মহকুমাৰ অন্তৰ্গত মাজদিয়া অঞ্চলত সংঘটিত হৈছে  এক যৌন নিৰ্যাতনৰ ঘটনা ৷  অঞ্চলটোৰ নৱম শ্ৰেণীত অধ্যয়নৰত এগৰাকী কিশোৰীক টিউচন কৰাৰ চলেৰে দীৰ্ঘদিন ধৰি যৌন নিৰ্যাতন চলাই এগৰাকী অৱসৰ প্ৰাপ্ত শিক্ষক ৰঙা ঘৰৰ আলহী হোৱাৰ লগতে পাচমাহৰ অন্ত:সত্বা কিশোৰী গৰাকীক অবৈধ ভাৱে গৰ্ভপাত কৰোৱাৰ অপৰাধত তামুলপুৰ আৰক্ষীয়ে মনচুৰ আলী নামৰ এগৰাকী ভুৱা চিকিৎসক গ্ৰেপ্তাৰ কৰা ঘটনাই তীব্ৰ প্ৰতিক্ৰিয়াৰ সৃষ্টি কৰিছে তামুলপুৰ অঞ্চলত ৷ তামুলপুৰ মহকুমা আৰক্ষী বিষয়া ৰূপজ্যোতি কলিতাই সংবাদ মাধ্যমৰ আগত সদৰি কৰা মতে ,তামুলপুৰ আৰক্ষী থানাৰ অধীনৰ মাজদিয়া অঞ্চলৰ পৰশুৰাম দাস(৬৪) নামৰ এগৰাকী অৱসৰ প্ৰাপ্ত শিক্ষকে পাঁচমাহ মান আগতে অঞ্চলটোৰে দুখীয়া পৰিয়ালৰ  এগৰাকী ছাত্ৰীক টিউচন কৰাৰ চলেৰে ভয় ভাবুকি দেখুৱাই শাৰিৰীক সম্পৰ্ক স্থাপন কৰিছিল ৷ ফলত ছাত্ৰী গৰাকীক পাঁচ মাহৰ অন্ত:সত্বা হৈছিল।  শেহতীয়াকৈ ছাত্ৰী গৰাকীৰ কিছু শাৰিৰীক পৰিবৰ্তন হোৱাত পৰিয়ালৰ লোক চিন্তিত হৈ পৰিছিল ৷ আনহাতে লম্পট চৰিত্ৰৰ অৱসৰপ্ৰাপ্ত শিক্ষক পৰশুৰামে কথাটো জানিব পাৰি যোৱা সাত নৱেম্বৰৰ দিনা ছাত্ৰী গৰাকীক তামুলপুৰ মহকুমা সদৰস্থিত গোৰেশ্বৰ চ’কত এখন ফাৰ্মাচীত কিশোৰী গৰাকীক বলপূৰ্বক গৰ্ভপাত কৰোৱাই ৷গৰ্ভপাত কৰোৱাৰ পিছত ছাত্ৰী গৰাকীৰ স্বাস্থ্যৰ অৱনতি ঘটাত শিক্ষক গৰাকীৰ অপকৰ্মৰ কথা পোহৰলৈ আহে।   পিচত কিশোৰী গৰাকীৰ মাতৃয়ে তামুলপুৰ আৰক্ষী থানাত দিয়া এজাহাৰৰ ভিত্তিত  তামুলপুৰ আৰক্ষীয়ে যোৱা ৮ নৱেম্বৰত পৰশুৰামক  গ্ৰেপ্তাৰ কৰি  জেইল হাজোতলৈ প্ৰেৰণ কৰে। আনহাতে নিৰ্যাতিত কিশোৰী গৰাকীয়ে আৰক্ষীক দিয়া  ভাষ্যৰ ভিত্তিত ভুৱা চিকিৎসক মনচুৰ আলীক কালি তামুলপুৰ আৰক্ষীয়ে গ্ৰেপ্তাৰ কৰি ঘটনা সন্দৰ্ভত জেৰা কৰে ৷ আৰক্ষীৰ জেৰাত মনচুৰ আলীয়ে কিশোৰী গৰাকীক গৰ্ভপাত কৰোৱা কথা স্বীকাৰ কৰে যদিও তেওঁৰ চিকিৎসকৰ কোনো ধৰণৰ প্ৰমাণ পত্ৰ আৰক্ষীৰ আগত দেখুৱাব নোৱাৰিলে ৷  তামুলপুৰ মহকুমা আৰক্ষী বিষয়া গৰাকীয়ে সদৰি কৰা মতে, তামুলপুৰ মহকুমাৰ অন্তৰ্গত গেৰুৱা গাওঁ নিবাসী মনচুৰ আলিয়ে গোৰেশ্বৰ চ’কত এখন ফাৰ্মাচী খুলি বহু দিন ৰ পৰা চিকিৎসা চলোৱাৰ লগতে অবৈধ গৰ্ভপাতো কৰিছিল ৷আজি তামুলপুৰ আৰক্ষীয়ে মনচুৰ আলীক বাক্সা জিলা সদৰ মুছলপুৰত ন্যায়িক দণ্ডাধীশৰ আদালতত হাজিৰ কৰোৱাই জেললৈ প্ৰেৰণ কৰে।

নগাঁও, ১০ নবেম্বৰ:নগাঁৱৰ হয়বৰগাঁও চকীৰ আৰক্ষীয়ে আজি বিয়লি এটি শিশুক উদ্ধাৰ কৰে ৷ উদ্ধাৰ কৰা শিশুটিৰ নাম হৈছে চৰিফুল ইছলাম ৷ ১১ বছৰীয়া চৰিফুলক নগাঁও চহৰৰ হেৰাপট্টিত ঘূৰি ফুৰা প্ৰত্যক্ষ কৰি স্হানীয় লোকে হয়বৰগাঁও আৰক্ষীক খবৰ দিয়ে ৷ হয়বৰগাৱৰ আৰক্ষী বিষয়া তৰঙ্গ পাটোৱাৰীয়ে হেৰাপট্টিৰ পৰা শিশুটোক উদ্ধাৰ কৰি আৰক্ষী চকীলৈ লৈ আহে ৷ পিছত চাইল্ড লাইনৰ হাতত শিশুটিক গতাই দিয়ে ৷ আৰক্ষীৰ অনুসন্ধানৰ অন্তত শিশুটি শোনিতপুৰৰ ভোজখোৱা চাপৰিৰ মইনুল হকৰ সন্তান বুলি জানিব পাৰা গৈছে ৷

শ্বহীদ দ্বিজেন ভূঞা উচ্চ ইংৰাজী বিদ্যালয়ৰ প্ৰতিষ্ঠা কালৰে পৰা শিক্ষাদান কৰি অহা সহকাৰী শিক্ষক শ্ৰী যুত শৰত চন্দ্ৰ কাকতিদেবক যোৱা  ৯নবেম্বৰত  বিদ্যালয়ৰ তৰফৰ পৰা আনুষ্ঠানিক ভাবে বিদায়ী সম্ভাষণ জনোৱা হয়। কাকতিদেবে নিজ কৰ্তব্য সুকলমে পালন কৰি শিক্ষকতাৰ দৰে মহান সেৱা আগবঢ়াই বিদ্যালয়খনক এক নতুন ৰূপত গঢি তুলিছিল।  তেখেতে ১৯৮৯ চনৰ ২২ মাৰ্চত কৰ্মত যোগদান কৰি সুদীৰ্ঘকাল ভেন্চাৰ শিক্ষক হিচাপে নিজকে নিয়োজিত কৰি পিছলৈ প্ৰদেশিকৰনৰ আওতাত আহিছিল। বিদায়ী সম্ভাষণ জনোৱা সভাখনত সভাপতিত্ব কৰিছিল উক্ত বিদ্যালয়ৰ প্ৰধান শিক্ষক গোলোক চন্দ্ৰ বৰাদেবে। গোলোক চন্দ্ৰ বৰাদেবে বিদ্যালয়ত কাকতিদেবে আগবঢ়াই অহা শিক্ষাসেবাৰ শলাগ লয় আৰু তেখেতৰ অনুপস্থিতিত নিজৰ সোঁহাত কটা যোৱা বুলি উল্লেখ কৰি আবেগিক হৈ পৰে। উল্লেখযোগ্য যে ইয়াৰ আগতেও আৰু দুগৰাকী শিক্ষক চন্দ্ৰ কান্ত বৰা আৰু  শুকদেব শৰ্মাই যোৱা তিনিটা বছৰত বিদ্যালয়ৰ পৰা অৱসৰ লৈছিল। সভাত বিদ্যালয়ৰ ফালৰ পৰা এখন মানপত্ৰ, শৰাই, কিতাপ, কলম, আৰু ফুলাম গামোছাৰে সম্বৰ্ধনা জনোৱা হয়। বিদ্যালয়ৰ ছাত্ৰ ছাত্ৰীসকলৰ লগতে স্থানীয় গাওঁবুঢা, অৱসৰপ্ৰাপ্ত শিক্ষক, প্ৰাক্তন ছাত্ৰ, আৰু স্থানীয় বয়োজেষ্ঠ লোকসকলেও বঁটা, কিতাপ, কলম, ফুলাম গামোছা আৰু ফুলৰ পুলিৰে আদৰৰ শিক্ষকজনক সম্বৰ্ধনা জনায়। সভাত উপস্থিত সকলোৱেই শিক্ষক জনৰ শিক্ষাদানৰ লগতে বিদ্যালয়খনক পৰিষ্কাৰ পৰিচ্ছন্নতা কৰি ৰখাত,বিদ্যালয়ৰ খেল ধেমালীৰ পৰ্যবেক্ষণ কৰাৰ ক্ষেত্ৰত, বিদ্যালয়ক সুন্দৰ কৰি ৰাখিবলৈ ফুলনি বাগিছা গঢাৰ ক্ষেত্ৰত তেখেতৰ ভূমিকাক শ্ৰদ্ধাৰে সোঁৱৰে । শেষত অৱসৰী শিক্ষকজনে নিজ বক্তব্যত বিদ্যালয়ৰ প্ৰধান শিক্ষকৰ লগতে সহকৰ্মী শিক্ষক, অৱসৰপ্ৰাপ্ত শিক্ষক, সভাত উপস্থিত বয়োজেষ্ঠ লোকসকলৰ লগতে প্ৰাক্তন ছাত্ৰ আৰু সমূহ ছাত্ৰ ছাত্ৰীসকলক ধন্যবাদ জ্ঞাপন কৰে। শিক্ষক জনক চৰকাৰী ভাবে  ৩১ মাৰ্চ ২০২১ তাৰিখে অৱসৰ দিয়া হৈছিল কিন্ত ক’ভিড পৰিস্থিতিৰবাবে বুধবাৰে বিদ্যালয়ত বিদায়ী সম্ভাষণ জনোৱা হয় বুলি প্ৰধান শিক্ষক গোলোক চন্দ্ৰ বৰাদেবে জনায়।