বিশ্ব বৰেণ্য শিল্পী ড০ ভূপেন হাজৰিকাৰ দশমতম মৃত্যুবাৰ্ষিকী উপলক্ষে সমগ্ৰ ৰাজ্যৰ লগতে বৰপেটাৰ বৃহত্তৰ ভেল্লা প্ৰেছ ক্লাৱৰ অস্থায়ী কাৰ্যালয়ত শ্ৰদ্ধাঞ্জলি জনোৱা হয়। ভেল্লাত বৃহত্তৰ ভেল্লা প্ৰেছ ক্লাৱৰ উদ্যোগত  সুধাকণ্ঠ ভূপেন হাজৰিকালৈ শ্ৰদ্ধাঞ্জলি জনোৱা হয়। শ্ৰদ্ধাঞ্জলি অনুষ্ঠান উপলক্ষে ভূপেন হাজৰিকালৈ শ্ৰদ্ধাঞ্জলি জনাই তেওঁৰ প্ৰতিছবিত মাল্যৰ্পন কৰে ভেল্লা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ আনচাৰী আলী আহমেদে। প্ৰতিচ্ছবিত মাল্যৰ্পন কৰি তেওঁ মানুহৰ হৃদয় স্পৰ্শ কৰিব পৰা কথা ভূপেনৰ গীতত আবদ্ধ আছে বুলি কৈ ভূপেনৰ মৃত্যুৰ পিছতহে সেই গীত আৰু কথাৰ মাধুৰ্যতা উপলব্ধি কৰিছো আমি বুলি কয় তেওঁ। সকলোকে মৰমেৰে উপচাই পেলাবলৈ বিদেশতো গান গাই  ভূপেন হাজৰিকাই যাযাবৰী জীৱন কটাইছে বুলি কৈ অসমক প্ৰাণেৰে ভালপোৱা লোক ভূপেন হাজৰিকা আছিল বুলি কয় তেওঁ । ভাৰতীয় লোকক একত্ৰিত কৰিবলৈ ভূপেন হাজৰিকাই ৰচনা কৰিছে বহু কালজয়ী গীত আৰু সেই গীত, মাতে একতা আৰু ভাতৃত্ববোধেৰে সকলোকে আগবাঢ়ি যাবলৈ অনুপ্ৰাণিত কৰে বুলিও কয় আনচাৰী আলী আহমেদে। শ্ৰদ্ধাঞ্জলি অনুষ্ঠানত বন্তি প্ৰজ্বলন কৰে বৃহত্তৰ ভেল্লা প্ৰেছ ক্লাৱৰ উপ সভাপতি সেখ ৰহমত উল্লাহে আৰু পূস্পাঞ্জলি জ্ঞাপন কৰে বৃহত্তৰ ভেল্লা প্ৰেছ ক্লাৱৰ কাৰ্যকৰ্তা ছফিকুৰ ৰহমানে। অনুষ্ঠানত বৃহত্তৰ ভেল্লা প্ৰেছ ক্লাৱৰ সভাপতি আজিজুল হক, কাৰ্যালয় সম্পাদক মুকুট আলীৰ লগতে কেইবাগৰাকীও স্থানীয় ব্যক্তি উপস্থিত থাকে।

 বঙাইগাঁও জিলাৰ উপায়ুক্ত ডাঃ এম এচ লক্ষ্মী প্ৰিয়াই শুকুৰবাৰে তেওঁৰ কাৰ্যালয় কক্ষত কেবাটাও বিভাগৰ বিষয়াৰ সৈতে বিভাগীয় উন্নয়নমূলক কাম-কাজৰ পৰ্যালোচনা কৰে। জিলা উন্নয়ন আয়ুক্ত ভাস্কৰ দাস আৰু সহকাৰী আয়ুক্ত শিল্পীৰেখা পণ্ডিতৰ উপস্থিতিত উপায়ুক্তগৰাকীয়ে অসম ৰাজ্যিক গ্ৰামীণ জীৱিকা মিছনৰ বঙাইগাঁৱৰ জিলা প্ৰকল্প প্ৰবন্ধক, ৰাষ্ট্ৰীয়  নগৰীয়া জীৱিকা মিছনৰ বঙাইগাঁৱৰ জিলা প্ৰকল্প প্ৰবন্ধক, জিলা মীন উন্নয়ন বিষয়া, হস্ততাঁত-বস্ত্ৰশিল্প বিভাগৰ বঙাইগাঁৱৰ অধীক্ষক, ভূমি সংৰক্ষণ তথা জিলা পশুপালন বিষয়াৰ পৰা তেওঁলোকৰ বিভাগীয় উন্নয়নমূলক কাম-কাজৰ বিষয়ে বুজ লয়। অসম ৰাজ্যিক গ্ৰামীণ জীৱিকা মিছনৰ প্ৰকল্প প্ৰবন্ধকে জনোৱা মতে বঙাইগাঁৱত চেনিটাৰী নেপকীন বনোৱা প্ৰশিক্ষণ এটি অচিৰেই অনুষ্ঠিত কৰা হ’ব। ইয়াৰ বাবে নাবাৰ্ডে এটি মেচিন আৰু যাৱতীয় খৰচ প্ৰদান কৰিব। আনহাতে গ্ৰামীণ জীৱিকা মিছনৰ অধীনত ৯০ গৰাকী আত্ম-সহায়ক গোটৰ সদস্যক গাহৰি পালনৰ সন্দৰ্ভত প্ৰশিক্ষণ দিয়া হ’ব। গাঁও এলেকাৰ ৬০ গৰাকী আৰু চহৰ এলেকাৰ ৩০গৰাকী আত্ম-সহায়ক গোটৰ সদস্যক তিনিটা গ্ৰুপত ভাগ কৰি ১৫ দিনীয়াকৈ মুঠ ৪৫ দিন এই প্ৰশিক্ষণ দিয়া হ’ব।জিলাখনৰ ডাংতল, সৃজনগ্ৰাম আৰু মাণিকপুৰ উন্নয়ন খণ্ডত এই প্ৰশিক্ষণ অনুষ্ঠিত কৰা হ’ব আৰু পশুপালন বিভাগৰ বিশেষজ্ঞই  প্ৰশিক্ষণ দিব। আনহাতে নগৰীয়া জীৱিকা মিছনৰ জিলা প্ৰকল্প প্ৰবন্ধকে জনোৱা মতে PM-SVANidhi আঁচনিৰ অধীনত জিলাখনৰ চহৰাঞ্চলৰ ৭৫৮ গৰাকী পদপথৰ ব্যৱসায়ীক এতিয়ালৈকে ১০,০০০ (দহ হেজাৰ) টকাকৈ প্ৰদান কৰা হৈছে। এইক্ষেত্ৰত জিলাখনে অসমৰ ভিতৰতে এটা উল্লেখযোগ্য স্থানত আছে। তদুপৰি বঙাইগাঁও চহৰৰ হোটেল  জাহ্নৱীত শুকুৰবাৰৰ পৰা ৩দিনীয়াকৈ চহৰখনৰ ৩০ গৰাকী আত্ম-সহায়ক গোটৰ সদস্যক অতিথি আপ্যায়ণ সন্দৰ্ভত (Catering) প্ৰশিক্ষণৰ ব্যৱস্থা কৰা হৈছে। সভাত উপায়ুক্ত ডা:এম এচ লক্ষ্মী প্ৰিয়াই মীন বিভাগৰ অধীনত বঙাইগাঁও ইকো-পাৰ্কত বনাই থকা পাব্লিক একুৱাৰিয়ামৰ কামৰ বুজ লয় আৰু জিলা মীন উন্নয়ন বিষয়াক সংশ্লিষ্ট সকলো কাম ভালদৰে তদাৰক কৰিবলৈ কয়। ইয়াৰ উপৰিও উপায়ুক্তগৰাকীয়ে বিভাগীয় বিষয়াৰ সৈতে হস্ততাঁত-বস্ত্ৰশিল্প,ভূমি সংৰক্ষণ,পশুপালন আদি বিভাগৰ কামৰো পৰ্যালোচনা কৰে।

 “ড° ভূপেন হাজৰিকাৰ মৃত্যু হোৱা নাই, তেওঁ আমাৰ মাজত জীয়াই আছে । তেওঁ জীয়াই আছে তেওঁৰ গীতসমূহৰ মাজত, প্ৰতিগৰাকী অসমীয়াৰ মাজত, তেওঁৰ লক্ষ লক্ষ গুণমুগ্ধৰ মাজত।”—আজি নগাঁৱৰ অগ্ৰণী শিক্ষানুষ্ঠান কলংপাৰ বিদ্যাপীঠত আয়োজিত ভূপেন হাজৰিকাৰ স্মৃতি দিৱসৰ অনুষ্ঠানত এই মন্তব্য বিশিষ্ট শিল্পী সমৰ হাজৰিকাৰ । ছাত্ৰ-ছাত্ৰীসকলৰ মাজত বিশ্ববৰেণ্য শিল্পী ভূপেন হাজৰিকাৰ চৰ্চা হওক, সেই উদ্দেশ্যে আয়োজন কৰা অনুষ্ঠানত যান্ত্ৰিক কৌশলেৰে গুৱাহাটীৰ পৰা সংযোগ হোৱা শিল্পী সমৰ হাজৰিকাই লগতে কয় যে “ভূপেন হাজৰিকাৰ গীত মানেই এটা সমাজবাৰ্তা । তেওঁৰ প্ৰতিটো গীত সমাজৰ একোখন ছবি । সেই গীতবোৰ আছে মানেই ভূপেন হাজৰিকা আছে ।” সুধাকণ্ঠৰ ব্যক্তিগত জীৱনৰ কিছু দিশ ৰোমন্থন কৰি শিল্পীগৰাকীৰ কনিষ্ঠ ভাতৃগৰাকীয়ে ভূপেন হাজৰিকাৰ এটি যুগজয়ী গীত পৰিৱেশন কৰে । কোভিড আক্ৰান্ত হৈ চিকিৎসাধীন হৈ থকা শিল্পীগৰাকীয়ে কলংপাৰ বিদ্যাপীঠে ছাত্ৰ-ছাত্ৰীক লৈ ভূপেন হাজৰিকাৰ চৰ্চা কৰাৰ বাবে ভূয়সী প্ৰশংসা কৰে আৰু এই অনুষ্ঠানটিৰ জৰিয়তেই মৃত্যু তিথিত শিল্পী ভাতৃক শ্ৰদ্ধা জনাবলৈ পাই পৰম আনন্দ প্ৰকাশ কৰে । অসম সাহিত্য সভাৰ প্ৰাক্তন প্ৰধান সম্পাদক তথা কলংপাৰ বিদ্যাপীঠৰ অধ্যক্ষ পদুম ৰাজখোৱাৰ সঞ্চালনত অনুষ্ঠিত শ্ৰদ্ধাঞ্জলি অনুষ্ঠানৰ আৰম্ভণিতে বিশ্ববৰেণ্য শিল্পী- সাহিত্যিক ভূপেন হাজৰিকাৰ প্ৰতিচ্ছবিত বন্তি প্ৰজ্বলন কৰে বিশিষ্ট একৰ্ডিয়ান শিল্পী চিত্ৰদেৱ মহন্ত আৰু পৰিচিত মেণ্ডোলিন বাদক অঞ্জলি মহন্তই । পুষ্পাঞ্জলি তৰ্পণ কৰে জামুগুৰি শাখা সাহিত্য সভাৰ সভাপতি, সুলেখিকা কৰবী দেৱী লিগিৰা, শিল্পী দীপিকা মহন্ত আৰু কলংপাৰ বিদ্যাপীঠ শাখা সাহিত্য সভাৰ সম্পাদক অতুলচন্দ্ৰ বৰুৱাই । স্মৃতি দিৱসৰ শ্ৰদ্ধাঞ্জলি অনুষ্ঠানটি উদ্বোধন কৰে শিল্পী চিত্ৰদেৱ মহন্তই । নিজৰ ভাষণত মহন্তই মাজে মাজে সঙ্গীতসূৰ্যৰ গীতৰ কলি গাই গাই ভূপেন হাজৰিকাৰ সৈতে হোৱা সান্নিধ্য আৰু শিল্পীজনৰ সঙ্গীত জীৱনৰ বিভিন্ন সৰু সৰু স্মৰণীয় মুহূৰ্তৰ কথাবোৰ শ্ৰদ্ধাৰে ৰোমন্থন কৰে । অসমত ভূপেন হাজৰিকাৰ দৰে বৰেণ্য শিল্পীৰ জন্ম অসমবাসীৰ পৰম সৌভাগ্যৰ ফল বুলিও তেওঁ মন্তব্য দিয়ে । সুৰজিৎ দেৱনাথ, জ্যোতিমণি ডেকা, ইন্দ্ৰমোহন বৰা, মৃগাশ্ৰী বৰা লক্ষ্যজ্যোতি দেৱী, জিমি  বৰকাকতী, টিনা বৰঠাকুৰ, শুভাশিস বৰগোহাঁই আদি শিক্ষক তথা শতাধিক ছাত্ৰ-ছাত্ৰী উপস্থিত থকা অনুষ্ঠানত  শিল্পী অঞ্জলি মহন্তই মেণ্ডোলিত ভূপেন হাজৰিকাৰ গীত পৰিৱেশন কৰে । বিশেষ অতিথি কবি কৰবী দেৱী লিগিৰাই নিজৰ ভাষণত সংক্ষেপে ড° ভূপেন হাজৰিকাৰ বিশাল প্ৰতিভা আলোকপাত কৰে । লেখিকাগৰাকীয়ে ভূপেন হাজৰিকাক বিৰল ক্ষণজন্মা পুৰুষ বুলি উল্লেখ কৰি ভূপেন হাজৰিকাক অধ্যয়ন কৰিলে ছাত্ৰ-ছাত্ৰীসকলে সদায় সুবাটে অগ্ৰসৰ হ’ব পাৰিব বুলি মন্তব্য দিয়ে । ছাত্ৰী ৰাজটিকা ডেকাৰজাই ভূপেন হাজৰিকাৰ গীতত নৃত্য পৰিৱেশন কৰা অনুষ্ঠানত ছাত্ৰ কুনালদীপ বৰদলৈ, দীপজ্যোতি নাথ আৰু ভণিতা দেৱীয়ে সুধাকণ্ঠৰ গীত পৰিৱেশন কৰে । ভাষা বিষয়ক বৰেণ্য স্মৰণ শিতানত আয়োজন কৰা অনুষ্ঠানত শিক্ষক অতুলচন্দ্ৰ বৰুৱাই গীতকথাৰে ভূপেন হাজৰিকাক স্মৰণ কৰে । অনুষ্ঠানত অসমৰ সংগীত ক্ষেত্ৰৰ এটি জনপ্ৰিয় ভাতৃজুটি শিল্পী মনমিৎ মহন্ত আৰু মনদীপ মহন্তই ভূপেন হাজৰিকাৰ গীত পৰিৱেশন কৰে । শেষত সমস্বৰে গোৱা “মানুহে মানুহৰ বাবে” গীতেৰে স্মৃতি দিৱসৰ অনুষ্ঠানৰ সামৰণি পৰে

ওদালগুৰিৰ চিজৌগুৰিত সদৌ বাথৌ মহাসভাৰ যুৱ সমাজৰ ২০ স‍ংখ্যক বাথৌ ধৰ্মীয় আলোচনা চক্ৰ ওদালগুৰি আঞ্চলিক যুৱ সমিতিৰ উদ্যোগত আৰু অভ্যৰ্থনা সমিতিৰ সহযোগত অনুষ্ঠিত হৈ যায়।ওদালগুৰি আঞ্চলিক যুৱ সমিতিৰ সভাপতি সমৰসিং দৈমাৰীৰ সভাপতিত্বত অনুষ্ঠিত মুকলি ধৰ্মালোচনী সভাখনি উদ্বোধন কৰে ওদালগুৰি জিলা বাথৌ ধৰ্ম মহাসভাৰ প্ৰাক্তন সভাপতি তৰুণ চন্দ্ৰ বড়োই।ওদালগুৰি আঞ্চলিক যুৱ সমিতিৰ সম্পাদক শুকুৰাম বড়োই আঁতধৰা সভাত প্ৰাৰ্থনাৰে  সজয় দৈমাৰীয়ে দান কৰে আৰু আনসকলে বৰঙনি সংগ্ৰহত সহযোগিতা আগবঢ়ায়।  সভাত আদৰণি বক্তব্য ৰাখে অভ্যৰ্থনা সমিতিৰ সভাপতি কুলেন দৈমাৰীয়ে।মুকলি সভাত উপস্থিত থাকি সমাজকৰ্মী ৰিঞ্জয় বড়োই বাথৌ ধৰ্মত আধ্যাত্মিকৰ ক্ষেত্ৰত যুৱক যুৱতী সকলৰ দায়িত্ব আৰু কৰ্তব্যত কিদৰে ভূমিকা গ্ৰহণ কৰিব লাগে সেই সন্দৰ্ভত বক্তব্য ৰাখে।নিজৰ ধৰ্মৰ পবিত্ৰতা ৰক্ষাৰ ক্ষেত্ৰত শিক্ষিত নৱ প্ৰজন্মক আগবাঢ়ি আহিবলৈ আহ্বান জনায়।কিয়নো বাথৌ ধৰ্ম এক বিজ্ঞান সন্মত ধৰ্ম।ধৰ্মীয় অনুভূতিৰে সঠিক পথৰ সন্ধান বিচাৰিব লাগিব। আধ্যাত্মিক ভাবধাৰা বজাই ৰাখিব পৰাটোহে আচল জীৱনৰ মাহাত্ম বুলি তেওঁ লগতে উল্লেখ কৰে।পুৱা ৭.৩০বজাত ধৰ্মধ্বজা উত্তোলন কৰে ওদালগুৰি আঞ্চলিক বাথৌ ধৰ্ম মহাসভাৰ সভাপতি সমৰসিং দৈমাৰীয়ে।পুৱা ৮ বজাত যেপ্ৰাৰ্থনা সভা উদ্বোধন কৰে আঞ্চলিকৰ উপদেষ্টা নিতুল বড়োই।

বিভিন্ন প্ৰান্তৰ লগতে ৫নবেম্বৰত  ওদালগুৰি শতদল সাহিত্য সভাৰ উদ্যোগত আৰু ভূপেন হাজৰিকা প্ৰতিমুৰ্তি অৱৰক্ষণ সমিতিৰ সহযোগত  সুধাকণ্ঠ ড° ভূপেন হাজৰিকাৰ দশম মৃত্যু দিৱসটি পালন কৰা হয়।
ভূপেন হাজৰিকাৰ দশম মৃত্যু দিনৰ কাৰ্যসূচী অনুসৰি পুৱা ১০বজাত বন্তি প্ৰজ্বলন কৰে শতদল সাহিত্য সভাৰ সভাপতি কমলাকান্ত শৰ্মাই সুধাকণ্ঠ ড° ভূপেন হাজৰিকাৰ প্ৰতিমূৰ্ত্তিত ডাঙৰ বন্তি প্ৰজ্বলন কৰে আৰু ১০.১৫বজাত  সুধাকণ্ঠ ড° ভূপেন হাজৰিকা প্ৰতিমূৰ্ত্তি অৱৰক্ষন সমিতিৰ সভাপতি গৌতম জ্যোতি  তালুকদাৰে মাল্যাৰ্পণ কৰে।সম্পাদক অজয় কলিতাই আঁতধৰা সুধাকণ্ঠ ভূপেন হাজৰিকাৰ স্মৃতিত স্মৃতিচাৰণ সভাত গীত-মাত কবিতা আবৃত্তিৰ অনুষ্ঠানত হিতৈষী সদস্য নৃপেন্দ শৰ্মা, অৱৰক্ষণ সমিতিৰ সম্পাদক অখিল কলিতা, আজীৱন সদস্য গগন লহকৰ আৰু দ্বিজেন বায়নে হাজৰিকাৰ ওপৰত বক্তব্য ৰাখে ।ইয়াৰ উপৰিও হাজৰিকাদেৱৰ গীত আৰু কবিতা পাঠ কৰে ক্ৰমে-মধু পাটৌৱাৰী,তুলিকা তালুকদাৰ,মেঘমালা সূত্ৰধাৰ,অঞ্জু গোস্বামী কলিতা,আৰতি দেৱী,হিমাৰাণী বৰ্মন আদিয়ে। সন্ধিয়া ৫বজাত  সুধাকণ্ঠ ভূপেন হাজৰিকাৰ প্ৰতিমূৰ্ত্তিৰ বেদীৰ সমুহীয়াকৈ বন্তি প্ৰজ্বলন কৰে ওদালগুৰি সাহিত্য সভাৰ প্ৰাক্তন সভাপতি নৰেশ্বৰ ডেকা,উপ সভাপতি বিষ্ণু শৰ্মা নেওপান, বিশিষ্ট সাহিত্যিক বিদ্যাপতি দাহাল,আৰক্ষী থানাৰ ভাৰপ্ৰাপ্ত বিষয়া নিতুমণি হাজৰিকাকে ধৰি শিল্পী, সাহিত্যিক, সাংবাদিক সকলে ।

 দেৰগাঁৱৰ অগ্ৰনী সাংস্কৃতিক অনুষ্ঠান বহ্নিমান সাংস্কৃতিক মঞ্চৰ উদ্যোগত দেৰগাঁৱৰ লোক নিৰ্মাণ কাৰ্যালয়ৰ প্ৰাংগণত অনুষ্ঠিত কৰা হয় বিশ্ববৰেণ্য শিল্পী ড০ ভূপেন হাজৰিকাৰ দশম মৃত্যু বাৰ্ষিকী।বহ্নিমান সাংস্কৃতিক মঞ্চৰ সম্পাদিকা গায়ত্ৰী দেৱীয়ে উদ্দেশ্যে ব্যাখ্যা দাঙি ধৰা অনুষ্ঠানটিত প্ৰান গোপাল বৰঠাকুৰে সুধাকণ্ঠ ড০ভূপেন হাজৰিকাৰ প্ৰতিচ্ছবিৰ সন্মুখত বন্তি প্ৰজ্বলনেৰে কাৰ্যসূচী শুভাৰম্ভণী কৰে।ইয়াৰ পাছতেই প্ৰীয়ংকা বৰাই আঁত ধৰা সাংস্কৃতিক অনুষ্ঠানটিৰ মঞ্চ উদ্বোধন কৰে সাংস্কৃতিক কৰ্মী তথা বহ্নিমান সাংস্কৃতিক মঞ্চৰ সভাপতি ৰাজু গগৈয়ে। বাসৱ বৰবৰা, ভৱেন বৰপূজাৰী, গোপাল কৃষ্ণ খাউণ্ড, প্ৰদীপ বৰা,নিৰ্মালী হাজৰিকা, অনিমা দেৱী প্ৰমুখ্যে কেইবাগৰাকীও বিশিষ্ট ব্যক্তি উপস্থিত থকা অনুষ্ঠানটিত দেৰগাঁৱৰ বিভিন্ন অঞ্চলৰ শিশু সকলে ভূপেন হাজৰিকাৰ অমৰ সৃষ্টি ৰাজিৰ গীত নৃত্য পৰিৱেশন কৰি অনুষ্ঠানটি জীপাল কৰি তোলে ।