অসম চৰকাৰৰ পঞ্চায়ত আৰু গ্ৰামোন্নয়ন বিভাগত চলিছে ব্যাপক দুৰ্নীতি । উন্নয়ন খণ্ডৰ  একাংশ চৰকাৰী বিষয়া/কৰ্মচাৰীৰ সহযোগত জনপ্ৰতীনিধিয়ে লিপ্ত হৈছে  ব্যাপক দুৰ্নীতি অনিয়মত । এটাৰ পিছত আন এটা দুৰ্নীতি অনিয়মৰ তথ্য পোহৰলৈ আহিছে  দৰঙৰ দলগাওঁ শিয়ালমাৰী উন্নয়ন খণ্ডৰ কাৰ্যালয়ৰ আৰিমাৰী গাওঁ পঞ্চায়তত । গাওঁ পঞ্চায়তৰ দায়িত্বত থকা এক্ৰিকেটেড ইঞ্জিনীয়াৰৰ উপস্থিতিত চলিছে এই লুণ্ঠন । অভিযোগ অনুযায়ী দলগাও শিয়ালমাৰী খণ্ড উন্নয়ন বিষয়াৰ কাৰ্যালয়ৰ অন্তৰ্গত আৰিমাৰী গাওঁ পঞ্চায়তৰ 2020-21 বৰ্ষৰ Earthen Bundh From Badli Bairali Pub Chuba LP School to Iman Ali House লৈ যোৱা পথটোত বিভাগীয় কৰ্তৃপক্ষই ৮,৭৩,১৬৬/ টকা আবন্টন দিয়ে যদিও উক্ত আচনি চৰকাৰী প্ৰাক:কলনক বুঢ়া আঙুলি দেখুৱাই চলাই আছে পথ নিৰ্মাণ কাৰ্য। উক্ত আচনিত সংঘটিত হোৱা ব্যাপক অনিয়ম সন্দৰ্ভত দলগাও শিয়ালমাৰী খণ্ড উন্নয়ন বিষয়াৰ কাৰ্যালয়ত আৰিমাৰী গাওঁৰ এজন সচেতন ব্যক্তিয়ে অভিযোগ দিয়াৰ পাচতো গুৰুত্ব নাই বিভাগীয় কৰ্তৃপক্ষৰ।আনহাতে উক্ত আচনিৰ কামত জব কাৰ্ড শ্ৰমিকৰ পৰিবৰ্তে জেচিবিৰ জড়িয়তে কাম সম্পূৰ্ণ কৰাৰ অভিযোগ উত্থাপিত হৈছে।আনহাতে ৰূপায়ন হোৱা উক্ত পথৰ দুয়ো কাষে  দৰিদ্ৰ কৃষকৰ জলকীয়া আৰু মৰাপাটৰ খেতি নষ্ট কৰি ভুমিখিনিত  জেচিবিৰ জড়িয়তে প্ৰকাণ্ড প্ৰকাণ্ড গাত খান্দি চলাই আছে পথৰ নিৰ্মাণ কাৰ্য্য। উক্ত কামত বাধা দিয়া সত্বেও এক্ৰিকেটেড ইঞ্জিনীয়াৰৰ উপস্থিতিত বলপূৰ্বক ভাৱে চলাই আছে নিৰ্মাণ কাৰ্য্য। আনহাতে গাওঁ পঞ্চায়তখনত এমজিএনৰেগাৰ পৰা আদি কৰি চতুৰ্দশ,পঞ্চদশ আদি আচনিত ১/২ নং বৰোৱাঝাৰ গাওঁ পঞ্চায়ত,শিলবৰী গাওঁ পঞ্চায়ত, কৌপাটি গাওঁ পঞ্চায়ত, ফকীৰপাৰা গাওঁ পঞ্চায়ত, গলন্দি গাওঁ পঞ্চায়ত,বাহাবাৰী গাওঁ পঞ্চায়ত,আৰিমাৰী গাওঁ পঞ্চায়ত আৰু শ্যামপুৰ গাওঁ পঞ্চায়তত সংঘটিত হৈছে ব্যাপক দুৰ্নীতি । বিভাগীয় কৰ্তৃপক্ষই উক্ত গাওঁ পঞ্চায়ত কেইখনত পথ নিৰ্মাণৰ নামত লাখ লাখ টকা আবন্টন দিছে যদিও উক্ত কাম সমুহ চৰকাৰী প্ৰাক:কলনক জলাঞ্জলি দি ৰূপায়ণ কৰাৰ অভিযোগ । তাৎপৰ্যপূৰ্ণ কথা হল গাওঁ পঞ্চায়ত কেইখনত ৰূপায়িত হোৱা আচনি সমুহ খণ্ড উন্নয়ন বিষয়া কাৰ্যালয়ৰ কোনো এজন বিষয়াই পৰ্যবেক্ষণ নকৰাকৈয়ে আচনিৰ ধন মুকলাই দিয়াৰ অভিযোগ উত্থাপিত হৈছে। গাওঁ পঞ্চায়ত কেইখনত চলি থকা ব্যাপক দুৰ্নীতিৰ বিৰুদ্ধে উচ্চ পৰ্যায়ৰ তদন্তৰ দাবী কৰিছে স্থানীয় ৰাইজে।

পৰিচালনা সমিতিৰ সভানেত্ৰী-প্ৰধান শিক্ষকৰ বিৰূদ্ধে এজাহাৰ 

দৰঙৰ দলগাওঁ শিয়ালমাৰী প্ৰাথমিক শিক্ষা খণ্ডৰ একাংশ  শিক্ষানুষ্ঠানত  চলিছে কেৱল দুৰ্নীতি আৰু কেলেংকাৰী । এনে দুৰ্নীতি কেলেংকাৰীৰ  অভিযোগ উত্থাপিত হৈছে দুলিয়াপাৰা প্ৰাথমিক বিদ্যালয়ৰ বিৰুদ্ধে ।  অভিযোগ অনুসৰি , দৰঙৰ দলগাওঁ শিয়ালমাৰী প্ৰাথমিক শিক্ষা খণ্ডৰ অন্তৰ্গত ৭৮৮ নং দুলিয়াপাৰা প্ৰাথমিক বিদ্যালয়ত মধ্যাহ্ন ভোজনৰ চাউল আত্মসাৎ কৰাৰ অভিযোগ তুলিছে ৰাইজে  । অসম চৰকাৰৰ শিক্ষা বিভাগে কণ কণ শিক্ষাৰ্থীৰ বাবে যোগান ধৰা মধ্যাহ্ন ভোজনৰ চাউল  বিদ্যালয় গৃহৰ  পৰিবৰ্তে   সভানেত্ৰীৰ ঘৰত উদ্বাৰ হোৱাক লৈ  মঙ্গলবাৰে এক উত্তপ্ত পৰিস্থিতিৰ সৃষ্টি হয় বিদ্যালয় প্ৰাঙণত । উক্ত চাউল ক’লা বজাৰত বিক্ৰীৰ  বাবে প্ৰধান শিক্ষক গৰাকীয়ে সভানেত্ৰীৰ ঘৰত ৰাখি বিক্ৰীৰ বাবে  যো জা চলোৱাৰ সময়তে পোহৰলৈ আহে  দুৰ্নীতি – কেলেংকাৰীৰ তথ্য । যাক লৈ ক্ষুব্ধ হৈ পৰে ৰাইজ । ঘটনা সন্দৰ্ভত ছাত্ৰ ছাত্ৰীৰ ক্ষুব্ধ  অভিভাৱকে দৈপাম আৰক্ষী চকীত বিদ্যালয় খনৰ প্ৰধান শিক্ষক আমবৰ আলী , পৰিচালনা সমিতিৰ সভানেত্ৰী ছুফিয়া খাতুন আৰু সদস্য আবু শামাৰ বিৰুদ্ধে দাখিল কৰে এজেহাৰ । উক্ত এজাহাৰৰ ভিত্তিত  দৈপাম আৰক্ষী চকীৰ ভাৰপ্ৰাপ্ত বিষয়া অকণ শৰ্মাৰ নেতৃত্বত আৰক্ষীৰ এটা দল সভানেত্ৰী ছুফিয়া খাতুনৰ ঘৰত উপস্থিত হৈ ৬ বস্তা চাউল জব্দ কৰে । স্মৰ্তব্য যে প্ৰধান শিক্ষক আমবৰ আলী আৰু সভানেত্ৰীৰ স্বামী সুৰুজ আলীয়ে বিদ্যালয় খনত এটাৰ পিছত আন  এটা  কেলেংকাৰী সংঘটিত কৰাৰ অভিযোগ তুলিছে ছাত্ৰ – ছাত্ৰীৰ অভিভাৱক অভিভাৱিকা সকলে । উল্লেখ্যযোগ্য যে বিদ্যালয় খনৰ ছাত্ৰ ছাত্ৰীৰ বাবে শিক্ষা বিভাগে যোগান ধৰা ইউনিফৰ্মৰ নামতো ব্যাপক দুৰ্নীতি সংঘটিত কৰিছে প্ৰধান শিক্ষক আমবৰ আলীয়ে । দলগাওঁ শিয়ালমাৰী উন্নয়ন খণ্ডৰ অন্তৰ্গত আন আন বিদ্যালয়ৰ ছাত্ৰ ছাত্ৰী সকলে স্কুলাৰ শ্বিপৰ ধন লাভ কৰিছে যদিও ৭৮৮ নং দুলিয়াপাৰা প্ৰাথমিক বিদ্যালয়ৰ প্ৰধান শিক্ষকৰ গাফিলতিৰ বাবে ছাত্ৰ ছাত্ৰী সকলে সেই ধনৰ পৰা বঞ্চিত হ’বলগীয়া হৈছে । আনকি স্কুলাৰ শ্বিপৰ ব্যৱস্থা কৰি দিয়াৰ নামত ছাত্ৰ ছাত্ৰী সকলৰ পৰা ১০০/১৫০ টকাকৈ ধন সংগ্ৰহ কৰাৰ গুৰুতৰ অভিযোগ প্ৰধান শিক্ষক আমবৰ আলীৰ বিৰুদ্ধে । বিদ্যালয় উন্নয়নৰ বাবে অসম চৰকাৰৰ শিক্ষা বিভাগে যোগান ধৰা আন্ত গাঁথনিৰ ধনেৰে কেই খন মান দৰ্জা খিৰিকীৰ ৰিপিয়াৰিঙৰ কাম কৰি সিংহভাগ ধন আত্মসাৎ কৰাৰো অভিযোগ উত্থাপিত হৈছে । জিলা উপায়ুক্তৰ লগতে মুখ্যমন্ত্ৰী আৰু শিক্ষামন্ত্ৰীৰ হস্তক্ষেপ দাবী কৰিছে পৰিচালনা সমিতিৰ সদস্য সকলে ।  প্ৰশ্ন হয় , কাৰ আশীৰ্বাদত প্ৰধান শিক্ষক গৰাকীয়ে এটাৰ পিছত এটাকৈ দুৰ্নীতি কেলেংকাৰী সংঘটিত কৰি আহিছে ? দুৰ্নীতিগ্ৰস্থ প্ৰধান শিক্ষক আমবৰ আলীৰ বিৰুদ্ধে মুখ্যমন্ত্ৰী তথা শিক্ষামন্ত্রীয়ে কিবা ব্যৱস্থা গ্ৰহণ  কৰিব নে ? সেয়া পৰৱৰ্তী সময়ত লক্ষণীয় হব ।