মাজুলী জিলা কংগ্রেছৰ সভাপতি তথা প্রাক্তন জলসম্পদ মন্ত্রী ৰাজীৱলোচন পেগুৱে মঙলবাৰে হঠাৎ জিলা কংগ্রেছৰ সভাপতি পদৰ পৰা পদত্যাগ কৰে৷ বিগত নির্বাচনত মাজুলী সমষ্টিৰ পৰা প্রতিদ্বন্দ্বিতা কৰি পৰাজিত হোৱা বাবেই পেগুৱে জিলা কংগ্রেছৰ সভাপতিৰ দায়িত্বৰ পৰা নৈতিক দায়িত্ব স্বীকাৰ কৰি পদত্যাগ কৰা বুলি তেওঁ উল্লেখ কৰি কয় যে তেওঁ সভাপতিৰ দায়িত্বহে এৰিছে৷ কিন্তু এতিয়াও দলৰ প্রাথমিক সদস্য হৈ আছে৷

অনাগত দিনত তেওঁ দলৰ এজন সদস্য হিচাপে কাম কৰি যাব৷ দলক শক্তিশালী কৰাৰ স্বার্থতে তেওঁ সভাপতি পদ ত্যাগ কৰা বুলি সাংবাদিকক জানিবলৈ দিয়ে৷ পিছে পেগুৱে যিয়েই নকওক কিয় ৰাজনৈতিক মহলত অচিৰেই তেওঁ গেৰুৱা বসন পৰিধান কৰিব বুলি ব্যাপক চর্চা অব্যাহত আছে৷ বিশেষকৈ কেন্দ্রীয় মন্ত্রীসভাত স্থান লাভ কৰাটো একপ্রকাৰ নিশ্চিত হৈ থকা মাজুলীৰ বিধায়ক তথা প্রাক্তন মুখ্যমন্ত্রী সর্বানন্দ সোণোৱাল মঙলবাৰে দিল্লীলৈ যোৱাৰ দিনটোতেই পেগুৱে জিলা কংগ্রেছৰ সভাপতিৰ দায়িত্ব এৰাক লৈ ব্যাপক চর্চা চলিছে৷

কিয়নো সর্বানন্দ সোণোৱালে কেন্দ্রীয় মন্ত্রীসভাত স্থান লাভ কৰিলেই স্বাভাৱিকতে মাজুলী বিধানসভা সমষ্টিত উপ–নির্বাচন অনুষ্ঠিত হ’ব৷ ৰাজনৈতিক মহলত চলা চর্চা অনুসৰি আসন্ন উপ–নির্বাচনত বিজেপিৰ টিকটত মাজুলীৰ পৰা অৱতীর্ণ হোৱাৰ বাসনাৰেই পেগুৱে কংগ্রেছৰ দায়িত্বৰ পৰা পদত্যাগ কৰিছে৷ এই প্রসংগতে উল্লেখনীয় এয়ে যে মুখ্যমন্ত্রী ড০ হিমন্ত বিশ্ব শর্মাই মুখ্যমন্ত্রীৰ দায়িত্ব লৈ মাজুলী ভ্রমণলৈ অহাৰ সময়তেই ৰাজীৱলোচন পেগুৱে মাজুলীৰ আৱর্ত ভৱনত মুখ্যমন্ত্রীক সাক্ষাৎ কৰিছিল৷ তেতিয়াৰে পৰাই পেগুৱে কংগ্রেছ এৰি বিজেপিলৈ যোৱাৰ সম্ভাৱনীয়তাৰ বিষয়ে প্রকাশ পাইছিল৷

এক সূত্রই জানিবলৈ দিয়া মতে, পেগুৱে শীঘ্রেই কংগ্রেছৰ সাধাৰণ সদস্যপদো ত্যাগ কৰি বিজেপিত যোগদান কৰিব আৰু আসন্ন উপ–নির্বাচনত বিজেপিৰ পৰা প্রার্থিত্ব বিচাৰিব৷ অৱশ্যে মাজুলীৰ বিজেপি নেতৃত্বই পেগুৰ সম্ভাব্য বিজেপি গমন সন্দর্ভত তীব্র বিৰোধিতা কৰি ৰাজ্যিক নেতৃত্বলৈ পত্র প্রেৰণ কৰিছে৷ মাজুলীৰ সম্ভাব্য উপ–নির্বাচনক লৈ ইতিমধ্যে বিজেপিৰ ভুবন গাম, বিতোপন দলে, নৃপেন কামান, লোকনাথ কুটুম, মাধৱ দেউৰী, হেমচন্দ্র দলে আদিয়ে বিশেষ তৎপৰতা অব্যাহত ৰাখিছে৷

আনহাতে মাজুলী জিলা গণশক্তিৰ সভাপতি ৰঞ্জিত দলেও প্রার্থিত্বৰ বাবে তৎপৰতা অব্যাহত ৰাখিছে৷ এনে অৱস্থাত মাজুলীত বিজেপিৰ টিকট অন্তিম মুহূর্তত কোনে লাভ কৰে, সেয়া সময়তহে ক’ব পৰা যাব৷

চাবুৱা আৰু চানমাৰি থানাত ৰুজু হৈ থকা গোচৰত শিৱসাগৰৰ বিধায়ক তথা ৰাইজৰ দলৰ সভাপতি অখিল গগৈ আৰু তেওঁৰ সতীর্থসকলক নিম্ন আদালতে দোষমুক্ত কৰি প্রদান কৰা ৰায়ৰ বিৰুদ্ধে উচ্চ ন্যায়ালয়ৰ দ্বাৰস্থ হৈছে তদন্তকাৰী সংস্থা নেচনেল ইনভেষ্টিগেচন এজেঞ্চী (নিয়া)৷

‘নিয়া’ৰ বিশেষ আদালতে শেহতীয়াকৈ প্রদান কৰা দুয়োটা গোচৰৰ ৰায়ক প্রত্যাহ্বান জনাইছে তদন্তকাৰী সংস্থাটোৱে৷ অৱশ্যে গোচৰটো এতিয়াও তালিকাভুক্ত হোৱা নাই উচ্চ ন্যায়ালয়ত শুনানিৰ বাবে৷

প্রাপ্ত তথ্য অনুসৰি অখিল গগৈসহ আন আটাইকেইজন অভিযুক্তক দোষমুক্ত কৰি দিয়াৰ বিৰুদ্ধে ‘নিয়া’ই এই গোচৰ তৰিছে৷ উল্লেখ্য যে নাগৰিকত্ব সংশোধনী আইনবিৰোধী আন্দোলনৰ সময়ত চাবুৱা আৰু চানমাৰি থানাৰ গোচৰৰ ভিত্তিত অখিল গগৈ আৰু তেওঁৰ সতীর্থসকলক গ্রেপ্তাৰ কৰা হৈছিল৷ পৰৱর্তী সময়ত এই দুয়োখন থানাৰ গোচৰ দুটা ‘নিয়া’লৈ হস্তান্তৰ কৰা হয়৷ ‘নিয়া’ই দুয়োটা গোচৰতে অখিল গগৈ আৰু আন অভিযুক্তসকলৰ বিৰুদ্ধে চার্জশ্বীট দাখিল কৰিছিল৷

শেহতীয়াকৈ এই গোচৰ দুটাৰ ধাৰা আৰোপৰ শুনানিৰ সময়ত ‘নিয়া’ৰ বিশেষ আদালতে অখিল গগৈ আৰু আন সতীর্থসকলক দোষমুক্ত ঘোষণা কৰে৷ চাবুৱা থানাৰ গোচৰত অভিযুক্ত হৈ আছিল অখিল গগৈ, জগজিৎ গোহাঁই, ভাস্কৰজ্যোতি ফুকন আৰু ভূপেন গগৈ৷ এই গোচৰটোত কেৱল ভাস্কৰজ্যোতি ফুকনৰ বিৰুদ্ধে ভাৰতীয় দণ্ডবিধিৰ দুটা ধাৰা আৰোপ কৰাৰ বিপৰীতে আন অভিযুক্তসকলক দোষমুক্ত কৰি দিছিল৷ তদুপৰি ভাস্কৰজ্যোতি ফুকনৰ বিৰুদ্ধে গোচৰ ডিব্রুগড়ৰ মুখ্য ন্যায়িক দণ্ডাধীশৰ আদালতত চলাবলৈও নির্দেশ দিছিল ‘নিয়া’ৰ বিশেষ আদালতে৷ ইয়াৰ উপৰি চানমাৰি থানাৰ গোচৰটোত অখিল গগৈৰ উপৰি কৃষক মুক্তি সংগ্রাম সমিতিৰ নেতা ধৈর্য কোঁৱৰ আৰু ছাত্র মুক্তি সংগ্রাম সমিতিৰ মানস কোঁৱৰ আৰু বিতু সোণোৱাল অভিযুক্ত হৈ আছিল৷

শেহতীকৈ ‘নিয়া’ৰ বিশেষ আদালতে চাৰিওজনকে এই গোচৰটোত দোষমুক্ত কৰি দিয়ে৷ ইয়াৰ পিছতে শাৰীৰিক অসুস্থতাৰ বাবে গুৱাহাটী চিকিৎসা মহাবিদ্যালয় হাস্পতালত চিকিৎসাধীন হৈ থকা অখিল গগৈ মুকলি আকাশৰ তললৈ অহাৰ পথ প্রশস্ত হৈ পৰিছিল৷ সম্প্রতি নিজৰ সমষ্টিত ব্যস্ত হৈ আছে অখিল গগৈ৷