দৈনন্দিন বাৰ্তা ডেস্ক : ধুবুৰী জিলাৰ গৌৰীপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া সত্যজিৎ বৰঠাকুৰে দীৰ্ঘদিন ধৰি চলাই আহিছে বৃহৎ উৎকোচৰ ৰমৰমীয়া বেহা। যাৰ ফলত গোচৰীয়া আৰু অপৰাধীয়ে দুয়ো পক্ষই দিব লাগিছিল লাখ লাখ টকাৰ উৎকোচ। এশ গৰু মাৰিলে বাঘৰো মৰণ। ঠিক তেনেদৰে গৌৰীপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া সত্যজিৎ বৰঠাকুৰৰ বাবে নামি আহিল এক প্ৰলয়ংকাৰী বিপদ। হয়। এটা গোচৰ মীমাংসাৰ বাবে ভাৰপ্ৰাপ্ত আৰক্ষী বিষয়া সত্যজিৎ বৰঠাকুৰে দাবী কৰিছিল এক লাখ টকা। উক্ত উৎকোচৰ ধন লোৱাৰ সময়তে দুৰ্নীতি নিবাৰণ শাখাৰ হাতত হাতে লোটে ধৰা পৰে অ’চি সত্যজিৎ বৰঠাকুৰ। উল্লেখ্য যে, অ’চি সত্যজিৎ বৰঠাকুৰে নিজ গা ঢাকিবলৈ বলিৰ পঠা সজালে উপ পৰিদৰ্শক আবুল কালাম আজাদক। বৰঠাকুৰে উৎকোচ লৈ দুৰ্নীতি নিবাৰণ শাখাৰ উমান পাই লগে লগে গৌৰীপুৰ টাউন উপ-পৰিদৰ্শক আবুল কালাম আজাদৰ ওচৰত উৎকোচ লোৱা ধন জমা দিয়াৰ লগে লগেই দুৰ্নীতি নিবাৰণ শাখাৰ লোকৰ লগতে ধুবুৰী জিলাৰ এছপি আনন্দ মিশ্ৰৰ সজাতি দলে অতৰ্কিতে গ্ৰেপ্তাৰ কৰে। উক্ত দুৰ্নীতি পৰায়ণ আৰক্ষী বিষয়া সত্যজিৎ বৰঠাকুৰক গ্ৰেপ্তাৰ কৰাত উৎফুল্লিত হৈ পৰিছে সমগ্ৰ গৌৰীপুৰবাসী ৰাইজে।

উজনি-মাজুলী : ৰাজ্যৰ আন জিলাৰ লগতে মাজুলী জিলাতো বুধবাৰে ক’ভিড-১৯ অতিমাৰী প্ৰতিৰোধৰ বাবে জনসাধাৰণৰ মাজত সজাগতা বৃদ্ধিৰ উদ্দেশ্যে জিলা স্বাস্থ্য বিভাগে ক’ভিড-১৯ সজাগতা সমদল উলিয়ায়। কমলাবাৰী খণ্ড প্ৰাথমিক স্বাস্থ্য কেন্দ্ৰৰ পৰা কমলাবাৰী চহৰৰ মাজেৰে উলিওৱা এই ক’ভিড-১৯ সজাগতা সমদল অংশগ্ৰহণে উদ্বোধন কৰে মাজুলীৰ অতিৰিক্ত উপায়ুক্ত (স্বাস্থ্য) অৰিন্দম বৰুৱাই। মাজুলী জিলা স্বাস্থ্য বিভাগৰ যুটীয়া সঞ্চালক ডাঃ নীলকান্ত দলেই নেতৃত্ব দিয়া এই সজাগতা সমদলত স্বাস্থ্য বিভাগৰ বিষয়া-চিকিৎসক, নাৰ্চ-স্বাস্থ্যকৰ্মী, আশাকৰ্মীসকলে ভাগ লয়।

নগাঁও : নগাঁও বন বিভাগ আৰু জুৰীয়া আৰক্ষীৰ এক যুটীয়া অভিযানত বৃহৎ পৰিমাণৰ চেগুন কাঠৰ কুণ্ডাসহ এটা অবৈধ কাঠ ফলা মিল জব্দ কৰিবলৈ সক্ষম হয়। কালি জুৰীয়াৰ কালিয়াডিঙা পাম গাৱঁত এক গোপন তথ্য পম খেদি নগাঁও জিলা বন সংমণ্ডল বিষয়া ৰাজেন চৌধুৰীৰ এক নিৰ্দেশ মৰ্মে বন সুৰক্ষা শাখাৰ বনাঞ্চলিক বিষয়া চেমিম আখতাৰ আৰু জুৰীয়া আৰক্ষী থানাৰ ভাৰপ্ৰাপ্ত বিষয়া মৃগেন শইকীয়াৰ নেতৃত্বত যোৱা এটি অভিযানকাৰী দলে উক্ত অঞ্চলত অভিযান চলাই অবৈধ ভাৱে দীৰ্ঘদিন চলাই অহা কাঠফলা মিলটোৰ লগতে প্ৰায় ১৯ পিচ মূল্যবান চেগুন গছৰ কুণ্ডা জব্দ কৰিবলৈ সক্ষম হয় ৷ অৱশ্যে, অভিযানৰ সময়ত কোনো এজন লোককে আটক কৰিব সক্ষম নহল অভিযানকাৰী দলে ৷ কালিৰ এই অভিযানত বন পালক ৰঞ্জন বৰা, নৃপেন বৰা, বনকৰ্মী মুক্তাৰ হুছেইন, দিনেশ ৰাজবংশী উপস্থিত আছিল ৷

উজনি-মাজুলী : উজনি মাজুলীত বিদ্যুৎ যোগানত ব্যৰ্থ হোৱা বিদ্যুৎ বিভাগৰ বিৰুদ্ধে কালি জেংৰাই আঞ্চলিক ছাত্ৰ সন্থাৰ উদ্যোগত ছাত্ৰ সন্থাৰ কৰ্মী সকলে কাৰ্যালয় ঘেৰাও কাৰ্যসূচী গ্ৰহণ কৰে। উজনি মাজুলীস্থিত বিদ্যুৎ বিভাগৰ কাৰ্যালয়টিত বিগত বহু দিনৰ পৰা এক অৰাজক পৰিস্থিতি উদ্ভৱ হৈ আছে, যাৰ বাবে চৰম হাৰাশাস্তি ভুগিবলগীয়া হৈছে সাধাৰণ জনতাই। ঘণ্টা ঘণ্টা ধৰি কৰা লোডশ্বেডিঙৰ ফলত চৰম হাৰাশাস্তি ভোগ কৰিছে সাধাৰণ জনতাই৷ বিভাগটোৰ গাফিলটিৰ বাবে বৰ্তমান সময়ত শিক্ষাৰ্থীসকলকে ধৰি সাধাৰণ জনসাধাৰণে বিদ্যুতৰ বাবে হাঁহাকাৰ কৰি থাকিবলগীয়া হৈছে। এই সমগ্ৰ বিষয়ৰ ওপৰত ছাত্ৰ সন্থাই বহুবাৰ কাৰ্যসূচী গ্ৰহণ কৰিছে যদিও বিভগটোৱে কোনো গুৰুত্ত্বপূৰ্ণ ভূমিকা গ্ৰহণ নকৰাত ক্ষোভিত হৈ পৰে ছাত্ৰ সন্থাৰ কৰ্মীসকল। কালিৰ কাৰ্যসূচীত উপস্থিত থাকি মাজুলী মহকুমা ছাত্ৰ সন্থাৰ সাধাৰণ সম্পাদক বিতুপন শৰ্মাই কয় যে, অতিশীঘ্ৰে উজনি মাজুলীৰ বিদ্যুৎ বিভাগৰ যি উপ সংমণ্ডলৰ কাৰ্যালয় আছে তাত যিসকল বিষয়া আছে সকলোকে অনাগত ২৪ ঘণ্টাৰ ভিতৰত সালসলনি কৰিব লাগিব বুলি দাবী জনায়। লগতে আঞ্চলিক ছাত্ৰ সন্থাৰ সভাপতি দিগন্ত বৰুৱাই কয় যে, যদি অনাগত ২৪ ঘণ্টাৰ ভিতৰত বিভাগটোৰ যি সমূহ যান্ত্ৰিক বিজুটি আছে সমগ্ৰ বিষয়টি বিচাৰৰ আওতালৈ আনি দোষী বিষয়া সকলৰ ওপৰত বিহিত ব্যৱস্থা কৰিব লাগে আৰু ৰাইজৰ সুবিধাৰ বাবে ২৪ ঘণ্টাই বিদ্যুৎ যোগান ধৰিব লাগিব বুলি দাবী জনোৱাৰ লগতে যদি এইসমূহ দাবী কাৰ্যকৰী নহয় তেতিয়া ছাত্ৰ সন্থাই অনাগত সময়ত কঠোৰ কাৰ্যসূচী গ্ৰহণ কৰিব বুলি ঘোষণা কৰে। আজিৰ প্ৰতিবাদী কার্যসূচীত উপস্থিত থাকে ভকতিদুৱাৰ আঞ্চলিক ছাত্ৰ সন্থাৰ সভাপতি দীপক টায়ে লগতে ৫০ জনীয়া ছাত্ৰ সন্থাৰ এটা সজাতি দলে। কাৰ্যসূচী সফল কৰি তোলাৰ বাবে জেংৰাই আঞ্চলিক ছাত্ৰ সন্থাৰ সাধাৰণ সম্পাদক মন্টু গায়নে সকলোকে ধন্যবাদ জ্ঞাপন কৰে।

নগাঁও : নগাঁৱৰ আৰক্ষীয়ে যোৱা নিশা অভিযান চলাই বৰবজাৰ অঞ্চলৰ পৰা হবিবুৰ ৰহমান ওৰফে মজিবুৰ নামৰ এজন কুখ্যাত ড্ৰাগছ্ ব্যৱসায়ীক গ্ৰেপ্তাৰ কৰে। নগাঁও চহৰৰ পাৰ্শ্বৱৰ্তী বৰভেটিৰ নিৱাসী হবিবুৰৰ বিৰুদ্ধে নগাঁও সদৰ থানাত অবৈধ ড্ৰাগছ্ সৰবৰাহৰ দুটা গোচৰ পঞ্জীয়ণ হৈ থকাৰ উপৰি নগাঁও আৰু মৰিগাঁও জিলাৰ বিভিন্ন থানাত কেইবাটাও গোচৰ আছে। আৰক্ষীয়ে প্ৰকাশ কৰা মতে বিগত সময়ত আৰক্ষীয়ে হবিবুৰৰ ঘৰত দুবাৰ অভিযান চলাই বহু পৰিমানৰ নিষিদ্ধ ড্ৰাগছ্ জব্দ কৰিছিল। আৰক্ষীয়ে দীৰ্ঘদিন ধৰি বিচাৰি আছিল হবিবুৰক। আৰক্ষীয়ে হবিবুৰক লৈ নিশা কেইবাটাও স্হানত অভিযান চলায়। অভিযানত অৱশ্যে একো উদ্ধাৰ হোৱা নাই আৰু কাকো গ্ৰেপ্তাৰ কৰিব পৰা নাই। ড্ৰাগছ্ ব্যৱসায়ীজনক জেৰা চলাই আছে আৰক্ষীয়ে।