এফালে চলি আছে কৃষি আইনৰ বিৰোধিতাৰে কৃষকৰ প্ৰতিবাদ । আনহাতে নৰেন্দ্ৰ মোডী নেত্বৃতাধীন কেন্দ্ৰীয় চৰকাৰে কৃষকৰ সুবিধাৰ্থে ঘোষণা কৰিলে এক নতুন আঁচনি । ন কোটি কৃষকৰ সুবিধাৰ্থে ১৮ হাজাৰ কোটি টকাৰ কৃষক সন্মান নিধি ঘোষণা কেন্দ্ৰীয় চৰকাৰৰ ।  এই আঁচনিৰ জৰিয়তে প্ৰতি বছৰে চাৰি মাহৰ ব্যৱধানত ২০০০টকাকৈ মুঠ ৬০০০ টকা লাভ কৰিব কৃষকসকলে। এই ধনৰাশি পোনপটীয়াকৈ উপলব্ধ হ’ব কৃষকৰ বেংক একাউন্টত ।

প্ৰাক্তন প্ৰধান মন্ত্ৰী প্ৰয়াত অটল বিহাৰী বাজপেয়ীৰ জন্ম জয়ন্তীৰ প্ৰতি লক্ষ্য ৰাখি সু-শাসন দিৱসৰ অংশ হিচাপে ন-কোটি কৃষকক মাত্ৰ দুঘন্টাৰ ভিতৰতে ১৮ হাজাৰ কোটি আগবঢ়াব কেন্দ্ৰীয় চৰকাৰে। প্ৰধানমন্ত্ৰী মোডীয়ে দেশৰ ভিন্ন প্ৰান্তৰ কৃষকসকলক সম্বোধন কৰিব এই বিশেষ দিনটোত।

২৫ ডিচেম্বৰত ডিজিটেল মাধ্যমেৰে আয়োজন কৰা হ’ব এক বিশেষ অনুষ্ঠান। য’ত অংশগ্ৰহণ কৰিব দেশৰ ভিন্ন প্ৰান্তৰ কৃষকে । এই অনুষ্ঠানৰ জৰিয়তে অনলাইনযোগে ছখন ৰাজ্যৰ ছজন কৃষকৰ সৈতে পোনপটীয়াকৈ কথা পাতিব প্ৰধানমন্ত্ৰী মোডীয়ে। এই অনুষ্ঠানৰ বাবে প্ৰায় দুই কোটি কৃষকে নাম পঞ্জীয়নৰ কথাও উল্লেখ কৰে প্ৰধানমন্ত্ৰী নৰেন্দ্ৰ মোডীয়ে।

সকলো উৎকন্ঠাৰ অন্তত ২২ পাৰিষদৰ আস্থা ভোটেৰে BTCৰ চীফ নিৰ্বাচিত হ’ল প্ৰমোদ বড়ো । সকলো চেষ্টা অথলে গল হাগ্ৰামাৰ । বিটিচিৰ আস্থা ভোটত প্ৰমোদ বড়োৰ জয় । আস্থা ভোটত UPPL-BJP-GSPৰ সন্মিলিত শক্তিৰ মুঠ ২২জন পাৰিষদৰ ভোট লাভ কৰিলে প্ৰমোদ বড়োৱে ।

প্ৰটেম অধ্যক্ষই প্ৰতিজন সদস্যক শপত দিয়াৰ পিছত অনুষ্ঠিত হয় আস্থা ভোট পৰ্ব। বিটিচিৰ চীফ প্ৰমোদ বড়ো, ডেপুটী চীফ গোবিন্দ বসুমতাৰীয়ে শপত গ্ৰহণৰ পাছত সকলো সদস্যৰ শপত গ্ৰহণেৰে বিটিচিত আৰম্ভ হৈছিল ভোটগ্ৰহণ ।

আনফালে বিপিএফ পাৰিষদ সকলে প্ৰথমৰে পৰা সদনত সৃষ্টি কৰে এক হুলস্থুলীয়া পৰিৱেশৰ। যাৰ বাবে বিটিচিত আস্থা ভোটৰ পূৰ্বেই ১০ মিনিটৰ বাবে স্থগিত ৰখা হয় সদন । 

উল্লেখ্য যে প্ৰমোদ বড়ো নেতৃত্বাধীন পৰিষদৰ বিৰুদ্ধে ন্যায়ালয়ৰ দ্বাৰস্থ হৈছিল BPF দল । ন্যায়ালয়ৰ নিৰ্দেশৰ পাছতেই আজি আস্থা ভোটৰ সন্মুখীন হয় প্ৰমোদ বড়ো । কিন্ত সকলো চেষ্টা অথলে গল হাগ্ৰামাৰ ।

এতিয়া কংগ্ৰেছ দল ত্যাগ কৰি ইজনৰ পিছত সিজন জ্যেষ্ঠ নেতাই যোগদান কৰিছে অন্য দলত । প্ৰাক্তন মন্ত্ৰী অজন্তা নেওগ, জ্যেষ্ঠ কংগ্ৰেছ নেতা অপূৰ্ব ভট্টাচাৰ্য আৰু কমল মেধিৰ পিছত এইবাৰ প্ৰদেশ কংগ্ৰেছৰ সম্পাদকৰ পদ ত্যাগ কৰিলে যুৱনেতা পলাশ তামূলীয়ে । AICC অৰ্থাৎ নিখিল ভাৰত কংগ্ৰেছ কমিটীৰ পৰাও পদত্যাগ কৰিলে পলাশ তামূলীয়ে ।

তামূলীয়ে এসময়ত কংগ্ৰেছৰ ছাত্ৰ সংগঠন NSUIৰ ৰাষ্ট্ৰীয় কমিটীত স্থান লাভ কৰিছিল । দিল্লী বিশ্ববিদ্যালয়ৰ সাংস্কৃতিক সম্পাদকৰ পদবীতো নিৰ্বাচিত হৈছিল তামূলী । গোলাঘাটৰ বিধায়িকা তথা প্ৰাক্তন মন্ত্ৰী অজন্তা নেওগৰ ঘনিষ্ঠ হিচাপে পৰিচিত পলাশ তামূলী । অজন্তা নেওগৰ পদত্যাগৰ পিছতে কংগ্ৰেছ নেতৃত্বই তামূলীক গোলাঘাটৰ প্ৰাৰ্থী ৰূপে প্ৰক্ষেপ কৰাৰো চিন্তা-চৰ্চা কৰা বুলি জানিব পৰা গৈছিল । অজন্তা নেওগৰ প্ৰস্থানৰ পিছতে পলাশ তামূলীক গোলাঘাট কংগ্ৰেছৰ নেতৃত্ব ল’বলৈকো প্ৰদেশ কংগ্ৰেছৰ নেতৃবৰ্গই নিৰ্দেশ দিছিল। পিছে পলাশ তামূলীয়েও দলত্যাগ কৰাত এতিয়া চৰম অস্বস্তিত পৰিছে কংগ্ৰেছ নেতৃত্ব ।পলাশ তামূলীয়ে  ইতিমধ্যে ই–মেইল যোগে তেওঁৰ পদত্যাগ পত্ৰ প্ৰেৰণ কৰিছে ।

জানিব পৰা মতে, অহা ২৬ ডিচেম্বৰত গৃহমন্ত্ৰী অমিত শ্বাহৰ উপস্থিতিত তামূলীয়ে অজন্তা নেওগৰ সৈতে বিজেপিত যোগদানৰ সম্ভাৱনা আছে । অৱশ্যে পলাশ তামূলীয়ে অনাগত সময়ত কি সিদ্ধান্ত ল’ব সেই বিষয়ে সংবাদ মাধ্যমৰ সন্মুখত কোনো মন্তব্য প্ৰকাশ কৰা নাই ।