গেলেকী : নাজিৰা মহকুমা অন্তৰ্গত শিমলুগুৰি সাঁত নং ৱাৰ্ডৰ নিবাসী সমাজসেৱক, বিশিষ্ট চিকিৎসক, বুৰঞ্জীবিদ তথা ভাৰতীয় জনতা পাৰ্টিৰ শিৱসাগৰ জিলাৰ জেষ্ঠ নেতা ও উপ সভাপতি ডাঃ প্ৰবীণ কোঁৱৰৰ অকাল মৃত্যু। ২৭ ছেপ্তেম্বৰৰ পুৱাই ডিব্ৰুগড় অসামৰিক চিকিৎসালয়ত তেওঁ শেষ নিশ্বাস ত্যাগ কৰে। জানিব পৰা মতে বিগত কিছু দিনৰ পৰা ভুক্তভোগী বৃক্ক আৰু হৃদৰোগত আক্ৰান্ত হৈ আছিল। কোঁৱৰ আছিল ২০২১ৰ নিৰ্বাচনৰ বিজেপি দলৰ নাজিৰা সমষ্টিৰ টিকটৰ দাবীদাৰ। সমষ্টি উন্নয়ণৰ স্বাৰ্থত বিজেপি দলৰ হৈ তেখেতে যথেষ্ট কাম কৰি গৈছে। উল্লেখ্য যে সমাজকৰ্মী, চিকিৎসকগৰাকীৰ মৃত্যুত ৰাইজ, কংগ্ৰেছ বিধায়িনী দলৰ সভাপতি দেৱব্ৰত শইকীয়া, দলীয় নেতা-কৰ্মী সকলৰ লগতে জাতীয় গণ সংগ্ৰাম পৰিষদ, অসম শিৱসাগৰ জিলা সমিতিৰ যুটীয়া সম্পাদক, নিউজ টাইম অসমৰ নাজিৰা মহকুমা সাংবাদিক ফাৰহান লস্কৰে গভীৰ শোক প্ৰকাশ কৰিছে। লস্কৰে আজি এক প্ৰেছ বিবৃতিৰ জড়িয়তে বিজেপি নেতা গৰাকীৰ অকাল মৃত্যুত দলৰ যথেষ্ট ক্ষতি হোৱা বুলি উল্লেখ কৰে। আনহাতে উক্ত লোক সকলে মৃতকৰ পৰিয়ালবৰ্গলৈ সমবেদনা জ্ঞাপন কৰাৰ বিপৰীতে তেখেতৰ বিদেহী আত্মাৰ চিৰশান্তি কামনা কৰিছে। যাক লৈ নাজিৰা সমষ্টিজুৰি এতিয়া শোকৰ ছাঁ পৰিছে।
লুডু খেলত গুটি কটাক লৈ পিতৃৰ বিৰুদ্ধে ভূপালৰ আদালতত গোচৰ কন্যাৰ
অনলাইন বাৰ্তা : পৰিয়ালৰ সদস্যৰ সৈতে অৱসৰৰ সময়ত বহুৱে লুডু খেল খেলিবলৈ পছন্দ কৰে ৷ এই খেলত হৰা জিকা লৈ বহু সময়ত বিবাদ হয় ৷ কিন্তু এই খেলাক কেন্দ্ৰ কৰি পিতৃ আৰু কন্যাৰ মাজত সম্পৰ্কত ফাট মেলে ৷ লুডু খেলত পিতৃয়ে অন্যায় কৰে ৷ এই অভিযোগ লৈ আদালতৰ দ্বাৰস্থ হয় মধ্য প্ৰদেশৰ এগৰাকী ২৬ বছৰীয়া যুৱতী ৷ জানিব পৰা মতে, কিছুদিনৰ আগতে পিতৃ আৰু সহোদৰৰ সৈতে লুডু খেলিছিল এই যুৱতীয়ে ৷ সেই সময়ত তেওঁৰ পিতৃয়ে কন্যাক এটা পকা গুটি কাটি দিয়ে ৷ সেইটো যুৱতীগৰাকীয়ে বিশ্বাসেই কৰিব নোৱাৰিলে ৷ পিতৃয়ে যে তেওঁৰ গুটিটো কাটিব পাৰে তাকে লৈ ‘বিশ্বাস ভংগ’ হৈ ভূপালৰ ফেমিলী কৰ্টৰ দ্বাৰস্থ হয় কন্যাগৰাকী ৷ আদালতৰ এগৰাকী মহিলা বিষয়াই জনায়, কন্যাগৰাকীৰ কাণ্ডত তেওঁ অবাক ৷ যুৱতীগৰাকীয়ে জনায়, তেওঁৰ পিতৃৰ প্ৰতি সকলো শ্ৰদ্ধা হেৰাইছে ৷ পিতৃক পৃথিৱীৰ সকলো সুখ দিয়াৰ কথা দিছিল ৷ তেওঁ কন্যাক হৰুৱাই দিয়াৰ বাবে কাম কৰিব পাৰিব সেয়া কন্যাগৰাকীয়ে ভাবিবই পৰা নাই ৷ যুৱতীগৰাকীয়ে পিতৃৰ সৈতে সকলো সম্পৰ্ক ছিন্ন কৰাৰ কথাও জনাইছে ৷ কন্যাগৰাকীয়ে কয়, পিতৃয়ে সকলো সময়তে কয়, মোক সুখী কৰি ৰখাত সকলো কৰিব ৷ সেই দিনা মোৰ আনন্দৰ বাবে পিতৃৰ উচিত আছিল গেমটো হাৰি দিয়াৰ ৷ কিন্তু পিতৃয়ে তাকে নকৰিলে ৷ মোৰ সকলো বিশ্বাস ভাঙিছে পিতৃয়ে ৷ যুৱতীগৰাকীৰ কাণ্ড দিখি অবাক আদালতৰ সকলো ৷ ঘটনা প্ৰসংগত আদালতৰ কাউন্সিলৰে জনায়, কন্যাগৰাকীৰ সৈতে চাৰি দফাৰ কাউন্সিলিং ছেছন কৰা হ’ব ৷ উল্লেখ্য যে এয়াই প্ৰথম নহয় ৷ ইয়াৰ আগতে এই লুডু খেলাত হাৰি প্রেমিক-প্রেমিকা সম্পর্ক ভাগিছিল, স্বামীয়ে স্ত্ৰীক প্ৰহাৰ কৰিছিল ৷ আনকি হত্যাৰ দৰে ঘটনাও ঘটিছে ৷
মন কি বাতত প্ৰধানমন্ত্ৰী নৰেন্দ্ৰ মোডী : আত্মনিৰ্ভৰ ভাৰতৰ মুখ্য ভূমিকাত কৃষক
অনলাইন বাৰ্তা : কৃষি সংস্কাৰমূলক তিনিখন বিধেয়ক গৃহীত হোৱাৰ বাবে দেশজুৰি তীব্ৰ সমালোচনাৰ সন্মুখীন মোডী চৰকাৰ ৷ সংসদত বিৰোধীৰ তুমুল বিক্ষোভ হৈছে ৷ আনহাতে পাঞ্জাৱ, হাৰিয়ানাসহ দেশৰ বিভিন্ন ঠাইত বিক্ষোভ কৰিছে কৃষকে ৷ আনহাতে জোঁট এৰিছে পুৰণা সংগী আকালি দলে ৷ ইয়াৰ মাজতে দেওবাৰে মাহেকীয়া ৰেডিয় অনুষ্ঠানত এই কৃষি বিধেয়কক লৈ মুখ খুলিলে প্ৰধানমন্ত্ৰী নৰেন্দ্ৰ মোডীয়ে ৷ দেশৰ কৃষকসকলৰ সমৰ্থন অনাৰ চেষ্টা কৰি প্ৰধানমন্ত্ৰীয়ে জনায়, নতুন এই কৃষি বিধেয়ক আইনত পৰিণত হ’লে কৃষকৰ কি দৰে সহায় কৰিব ৷ ৰেডিয় অনুষ্ঠান ‘মন কি বাত’ত প্ৰধানমন্ত্ৰী মোডীয়ে কয়, আত্মনিৰ্ভৰ ভাৰতৰ ভিত্তিয়েই হ’ল কৃষকৰ ৷ কৰ’না সংকটৰ মাজত দেশৰ কৃষি ব্যৱস্থা শক্তিশালী আৰু স্থিতিশীল হৈছে ৷ প্ৰকৃততে এই মাধ্যমত দেশৰ কৃষক ভাইসকলৰ আত্মবিশ্বাসই প্রকাশিত হৈছে ৷ এই কৃষক ভাইসকলেই আত্মনির্ভৰ ভাৰতৰ ভিত্তি ৷ আত্মনির্ভৰ ভাৰত গঢ়ি তোলাত কৃষক ভাইসকলৰ অত্যন্ত গুৰুত্বপূৰ্ণ ভূমিকা আছে ৷ তেওঁলোকৰ মনোবলৰ ওপৰত ভিত্তি কৰিয়েই দেশ শক্তিশালী হৈ উঠিব পাৰে ৷ নতুন বিধেয়ক আইনত পৰিণত হ’লে কৃষকে ন্যূনতম সহায়ক মূল্য নাপায় ৷ এই লৈ ক্ষোভৰ সৃষ্টি হৈছে ৷ প্রধানমন্ত্রীয়ে কয়, নতুন এই বিধেয়কে প্ৰকৃততে কৃষকৰ হাত শক্তিশালী কৰিব ৷ কেৱল মাত্ৰ চৰকাৰৰ ভৰসাত বহি থাকিলে নহ’ব কৃষকে৷ যাৰে ইচ্ছা, যি ইচ্ছা ফচল বিক্ৰী কৰিব পাৰিব তেওঁলোকৰ ৷ মোডীয়ে কয়, দেশৰ কৃষি ক্ষেত্ৰত অধিক উন্নয়ন ঘটিছে ৷ এতিয়া কোনো ফচল বিক্ৰী কৰিব পাৰিব কৃষকে ৷ কেৱল ফল, শাকপাচলিয়ে নহয়, চাউল, গম আদিও বিক্ৰী কৰিব পাৰিব ৷ যাৰ ওচৰত বেছি দাম পাব তেওঁকেই বিক্ৰী কৰিব পাৰিব ৷ তেওঁৰ আশা, উন্নত প্রযুক্তিৰ মাধ্যমত কৃষিক্ষেত্রত অধিক বিকাশ ঘটিব ৷
কৃষি বিধেয়কক বিৰোধিতা : বিজেপি নেতৃত্বাধীন এনডিএ ত্যাগ শিৰোমণি আকালি দলৰ
অনলাইন বাৰ্তা : বিহাৰ বিধানসভা নিৰ্বাচনৰ আগতে এনডিএত ভাঙোন হ’ল ৷ বিজেপি নেতৃত্বাধীন জোঁট এৰিলে শিৰোমণি আকালি দলে ৷ কৃষি বিধেয়কক লৈ মোডী চৰকাৰৰ মনোভাৱৰ বাবে এই সিদ্ধান্ত ল’লে দলটোৱে ৷ কৃষি বিধেয়কক লৈ আকালি আৰু বিজেপিৰ মাজত দূৰত্ব বাঢ়িছিল ৷ অলপতে কেন্দ্ৰীয় মন্ত্রিত্বৰ পৰা ইস্তফা দিছিল হৰচিমৰৎ ৰৌৰ বাদলে ৷ বিধেয়কখন লোকসভাৰ পাচত ৰাজ্যসভাতো গৃহীত হয় ৷ বিধেয়কখনৰ বিৰোধিতাত পাঞ্জাৱত আন্দোলন আৰম্ভ কৰে কৃষকে ৷ তেওঁলোকৰ কাষত থিয় হৈছে কংগ্ৰেছ ৷ কৃষকক সমস্যাত পেলোৱা বিধেয়কখনৰ বাবে চাপ পৰে আকালি দলত ৷ অৱশেষত এনডিএ ত্যাগৰ সিদ্ধান্ত লয় ৷ শনিবাৰে দলৰ নীতি নিৰ্দ্ধাৰণৰ উচ্চ পৰ্যায়ৰ বৈঠক অনুষ্ঠিত হয় ৷ এই বৈঠকৰ পাচত আকালি দলে জনালে, বিজেপি নেতৃত্বাধীন এনডিএ এৰাৰ সিদ্ধান্ত লয় ৷ কৃষকক ফচলৰ ন্যূনতম সহায়ক মূল্যৰ নিশ্চয়তা দিছিল ৷ উল্লেখ্য যে কৃষি সংক্রান্ত বিধেয়কৰ প্ৰতি প্ৰথমে সমর্থন কৰিছিল অকালি দলে। কিন্তু পাঞ্জাৱ আৰু হাৰিয়ানাত কৃষকে বিক্ষোভ আৰম্ভ কৰে ৷ ফলত আকালি দলে সিদ্ধান্ত কৰে বিধেয়কৰ সমৰ্থন কৰা নহ’ব ৷ এনডিএ ত্যাগৰ সিদ্ধান্তৰ পাচত দলৰ সভাপতি সুখবীৰ সিং বাদলে টুইট কৰি জনালে, সর্বসম্মতভাৱে দলৰ কোৰ কমিটীয়ে এনডিএ ত্যাগৰ সিদ্ধান্ত লৈছে ৷ বজাৰত ফচল বিক্ৰীত ন্যূনতম সহায়ক মূল্যৰ নিশ্চয়তা দিয়াত ক্ষোভিত কেন্দ্ৰীয় চৰকাৰ ৷ বিধেয়কক লৈ বিতৰ্কত সুখবীৰ সিং বাদলে সংসদত কয়, যোৱা ৫০ বছৰ ধৰি কৃষি ক্ষেত্ৰ উন্নয়ন কৰিছে পাঞ্জাৱ চৰকাৰে ৷ প্ৰস্তাৱিত এই বিধেয়কে সেই প্ৰয়াসক ধ্বংস কৰিব ৷
পঞ্চমটো বানে পুৱতি নিশা উটুৱাই নিলে চকুৱা ঘাটৰ বাঁহৰ দলং ; যাতায়ত বিচিন্ন শালমৰা-বনগাঁও সংযোগী পথ
উজনি-মাজুলীঃ মুখ্যমন্ত্ৰী সমষ্টি মাজুলীৰ শালমৰাৰ চকুৱা ঘাটত গাঁৱৰে যুৱক কেইজনমানে প্ৰতি বছৰে একোখন বাঁহৰ দলং নিৰ্মাণ কৰি যাতায়তৰ সুচল ব্যৱস্থা কৰি ৰাইজৰ সেৱা কৰি আহিছে। গাঁঠিৰ ধন ভাঙি এনেধৰনেই এই সকল যুৱকে প্ৰতি বছৰে দলং নিৰ্মাণ কৰি আহিছে যদিও আজি পৰ্যন্ত কোনো ধৰণৰ খা-খৰচ চৰকাৰ তথা বিভাগীয় কৰ্তৃপক্ষই বহন কৰা নাই এইসকল যুৱকক । আজি পৰা দুবছৰ আগতে যি খন পকী দলং নিৰ্মান কৰিছিল বৰ্তমানেও কাৰ্যক্ষম হৈ নুঠিল দলংখন | যাৰ কাৰণে জীয়াটো ভুগিব লগীয়া হৈছে অঞ্চলটোৰ ৰাইজে। বিশেষকৈ স্কুল ,কলেজৰ ছাত্ৰ-ছাত্ৰী সকল | সাধাৰণ ৰাইজকে আদি কৰি অঞ্চলটোলৈ আহ্-যাহ কৰা সকলো লোকৰেই বিপদ হৈছে যাতায়তৰ ক্ষেত্ৰত । শালমৰা- বনগাঁও একমাত্ৰ সংযোগী এই পাৰ ঘাটটোৱে ৰাইজক অধিক বিপদত পেলাইছে এই বৰ্ষত হোৱা ৪ টাকৈ বানে | বানে ইতিমধ্যে গাঁওখনৰো বহু ক্ষতি সাধন কৰিছে। শেহতীয়াকৈ শণিবাৰে পুনৰ ফেনে ফুটুকাৰে বাঢ়ি অহা ব্ৰহ্মপুত্ৰৰ বাঢ়নী পানীয়ে বিপদ সীমা অতিক্ৰম কৰি বছৰৰ পঞ্চমটো বানে আজি পুৱতি নিশা চকুৱা ঘাটৰ বনগাঁও – শালমৰা সংযোগী এই বাঁহৰ দলংখন ভাঙি নিয়ে আৰু যাতায়ৰ সংযোগ বিচ্ছিন্ন হৈ পৰে। ইয়াৰ ফলত সাধাৰণ জনতা, ছাত্ৰ-ছাত্ৰী, অঞ্চলৰ ৰাইজৰ মাজত সমস্যাৰ সৃষ্টি হৈছে ।
প্ৰাক্তন কেন্দ্ৰীয় মন্ত্ৰী যশৱন্ত সিঙৰ মৃত্যু
অনলাইন বাৰ্তা : প্ৰাক্তন কেন্দ্ৰীয় মন্ত্ৰী যশৱন্ত সিঙৰ দেওবাৰে পুৱা ৬.৫৫ বজাত ৮২ বছৰ বয়সত দিল্লীৰ সেনা চিকিৎসালয়ত মৃত্যু হয় ৷ চিকিৎসালয়ৰ সূত্ৰই জনোৱা মতে যোৱা ২৫ জুনৰ পৰা তেওঁৰ চিকিৎসা চলিছিল ৷ চেপচিছ আৰু মাল্টিঅৰ্গেন ডিছফাংচন চিণ্ড্ৰোমত তেওঁ আক্ৰান্ত হৈছিল ৷ দেওবাৰে পুৱাই তেওঁৰ কাৰ্ডিয়াক এৰেষ্ট হয় ৷ তেওঁৰ মৃত্যুত প্ৰধানমন্ত্ৰী নৰেন্দ্ৰ মোডীয়ে টুইট কৰি শোক প্ৰকাশ কৰে ৷ টুইটত প্ৰধানমন্ত্ৰীয়ে লিখে, “প্ৰথমে এজন সেনা আৰু তাৰ পাচত অভিজ্ঞ ৰাজনীতিবিদ হিচাপে তেওঁ দেশ সেৱা কৰিছিল ৷ অটল বিহাৰী বাজপেয়ী চৰকাৰত তেওঁ বিত্ত মন্ত্ৰী, বিদেশ আৰু প্ৰতিৰক্ষা মন্ত্ৰী হিচাপে গুৰুত্বপূৰ্ণ দায়িত্ব পালন কৰিছিল ৷ তেওঁৰ মৃত্যুত মই শোকাহত ৷” আনহাতে দলৰ সাংগঠনিক দিশত তেওঁ অৱদান স্মৰণ কৰে মোডীয়ে ৷ তেওঁৰ পৰিয়ালৰ প্ৰতি প্ৰধানমন্ত্ৰীয়ে সমবেদনা জনায় ৷ ৰাজস্থানৰ বাড়মেৰ জিলাৰ জচোল গাঁৱত যশৱন্ত সিঙৰ ১৯৩৮ চনৰ ৩ জানুৱাৰীত জন্ম হৈছিল ৷ মেয়ো কলেজ আৰু নেচনেল ডিফেন্স একাডেমি আৰু ইণ্ডিয়ান মিলিটেৰী একাডেমিৰ পৰা শিক্ষা গ্ৰহণ কৰা যশৱন্ত সিঙে পঞ্চাশ দশকৰ শেষত ভাৰতীয় সেনা বাহিনীত যোগ দিয়ে ৷ তেওঁ ‘মেজৰ’ পদত কৰ্মৰত আছিল ৷ ষাঠি দশকৰ শেষৰ ফালে তেওঁ ৰাজনীতিত প্ৰৱেশ কৰে ৷ ভাৰতীয় জনতা পাৰ্টিৰ প্ৰতিষ্ঠাতাসকলৰ মাজত তেওঁ অন্যতম আছিল ৷ ৰাজ্যসভাত প্ৰথম প্ৰৱেশ কৰে আশি দহকত ৷ ১৯৯৬ চনৰ ১৬ মে’ৰ পৰা সেই বছৰৰ ১ জুনতৈকে বাজপায়ীৰ সংক্ষিপ্ত মন্ত্ৰীসভাত তেওঁ আছিল বিত্ত মন্ত্ৰীৰ দায়িত্বত ৷ কেন্দ্ৰীয় বিত্ত মন্ত্ৰী হিচাপে তেওঁক পুনৰ ২০০২ চনত পুনৰ দেখিবলৈ পোৱা যায় ৷ বাজপায়ী মন্ত্ৰীসভাত তেওঁ ২০০২ চনৰ ১ জুলাইৰ পৰা ২০০৪ চনৰ ২১ মে’লৈকে বিত্ত মন্ত্ৰী আছিল ৷ ১৯৯৮ চনৰ পৰা ২০০২ চনলৈকে চাৰি বছৰ বিদেশ মন্ত্ৰীৰ দায়িত্ব আছিল ৷ প্ৰতিৰক্ষা মন্ত্ৰীৰ কাৰ্যভাৰ পালন কৰিছিল ২০০০ চনৰ জানুৱাৰীৰ পৰা ২০০১ চনৰ অক্টোবৰ পৰ্যন্ত ৷ ১৯৯৮-’৯৯ বাজপেয়ীৰ ১৩ মাহৰ চৰকাৰত যশৱন্ত সিং আছিল যোজনা কমিচনৰ উপ অধ্যক্ষ৷ সকলো মিলি তেওঁ মুঠ পাঁচবাৰ ৰাজ্যসভা আৰু চাৰিবাৰ লোকসভাৰ সাংসদ আছিল ৷ ১৯৮৯ চনৰ লোকসভা নিৰ্বাচনত ৰাজস্থানৰ যোধপুৰ আৰু ১৯৯৬ আৰু ১৯৯১ চনত তেওঁ ৰাজ্যখনৰ চিতৌৰগড় সমষ্টিৰ পৰা সাংসদ হৈছিল ৷ ২০০৯ চনত লোকসভা নিৰ্বাচনত তেওঁ দাৰ্জিলিং সমষ্টিৰ পৰা লোকসভা নিৰ্বাচনত জয়ী হৈছিল ৷ উল্লেখ্য যে ১৯৯৯ চনত ইণ্ডিয়ান এয়াৰ লাইনছৰ বিমান ঘটনাৰ সময়ত তৎকালীন বিদেশ মন্ত্ৰী যশৱন্ত সিঙে আফগানিস্থানৰ কন্দহৰলৈ গৈ অপহৰণকাৰীৰ লগত আলোচনাত বহিছিল ৷ তেওঁৰ এই ‘সক্রিয়তা’ৰ বাবে সেই সময়ত তুমুল ৰাজনৈতিক বিতৰ্ক হৈছিল ৷ ২০০৪ চনৰ লোকসভা নিৰ্বাচনত বাজপায়ী চৰকাৰৰ পতনৰ পাচত যশৱন্ত সিং ৰাজ্যসভাৰ বিৰোধী দলনেতা আছিল ৷ কিন্তু ২০০৯ চনৰ লোকসভা নিৰ্বাচনত দাৰ্জিলিং সমষ্টিৰ পৰা জয়ী হোৱাৰ কেইমাহমানৰ ভিতৰত পাকিস্তানৰ প্রতিষ্ঠাতা মহম্মদ আলি জিন্নাক স্তুতি কৰাৰ অভিযোগত বিজেপিৰ পৰা বহিষ্কৃত হৈছিল ৷ যশৱন্ত সিঙে তেওঁৰ গ্ৰন্থত লিখিছিল, ভাৰতৰ ভাগ্যৰ বাবে জিন্না দায়ী নহয় ৷ বহিষ্কাৰৰ ১০ মাহৰ পাচত তেওঁক দললৈ ঘুৰাই আনে ৷ কিন্তু দলৰ ভিতৰ মহলত তেওঁ হৃত মৰ্যাদা পুনৰুদ্ধাৰ কৰিব পৰা নাছিল ৷ ২০১৪ চনৰ লোকসভা নিৰ্বাচনত বাড়মেৰ সমষ্টিৰ পৰা বিজেপিৰ টিকট নাপায় তেওঁ নিৰ্দলীয় প্ৰাৰ্থী হয় ৷ তেতিয়া তেওঁক পুনৰ বহিষ্কাৰ কৰে ৷ আনহাতে যশৱন্ত সিঙৰ পুত্ৰ তথা বাড়মেৰৰ প্ৰাক্তন বিজেপি সাংসদ মানবেন্দ্ৰ কংগ্ৰেছত যোগ দিয়ে ৷ সেই সমষ্টিৰ পৰা যোৱা লোকসভা নিৰ্বাচনত মানবেন্দ্র কংগ্ৰেছৰ প্ৰাৰ্থী হয় ৷ অৱশ্যে যশৱন্ত সিং সক্ৰিয় ৰাজনীতিৰ পৰা আঁতৰি অহা নাছিল ৷ যশৱন্ত সিঙৰ মৃত্যুত গভীৰ শোক প্ৰকাশ কৰিছে প্ৰতিৰক্ষা মন্ত্ৰী ৰাজনাথ সিঙে ৷ উল্লেখ্য যে দীৰ্ঘ দিন সাংসদৰ দায়িত্ব পালন কৰা ৰাজনীতিবিদজনে ২০১৪ চনৰ আগষ্ট মাহত নিজৰ ঘৰত পৰি মুৰত গুৰুতৰভাৱে আঘাত পাইছিল ৷ দিল্লীৰ সেনা চিকিৎসালয়ত তেওঁ দীৰ্ঘদিন ধৰি চিকিৎসাধীন হৈ আছিল ৷
মানৱীয়তাৰ নিদৰ্শন : হিন্দু যুৱকক মুখাগ্নি কৰিলে এগৰাকী মুছলমান বোৱাৰীয়ে
দৈনন্দিন বাৰ্তা ডেস্ক : মানৱীয়তাৰ এক উত্কৃষ্ট নিদৰ্শন দাঙি ধৰিলে এগৰাকী মুছমান বোৱাৰীয়ে । সম্পূৰ্ণ হিন্দু-ৰীতি নীতিৰ মাজেৰে ধ্ৰুৱজ্যোতি মজুমদাৰ নামৰ এজন হিন্দু যুৱকৰ মুখাগ্নি কৰিলে শিৱসাগৰৰ মুছকান বেগম নামৰ এগৰাকী মহিলাই । বিবাহ সূত্ৰে তিনিচুকীয়াৰ বোৱাৰী মুছকান বেগম । বিবাহ পাশত আবদ্ধ হোৱাৰ পূৰ্বৰে পৰা ধ্ৰুৱজ্যোতি মজুমদাৰৰ সৈতে ভাতৃ-ভগ্নিৰ সম্পৰ্ক আছিল মুছকানৰ । কিছুদিন পূৰ্বে ঘৰুৱা অসুবিধাৰ বাবে পিতৃ-মাতৃহাৰা ধ্ৰুৱজ্যোতি তিনিচুকীয়াৰ পৰা আহি শিৱসাগৰত থকা মুছকানৰ ঘৰতে থাকিবলৈ লৈছিল । কিন্তু ২২ছেপ্তেম্বৰৰ দিনা মুছকানৰ ঘৰত কোনো নথকাৰ সুযোগ লৈ স্ব-ইচ্ছাই জীৱন ত্যাগ কৰে ধ্ৰুৱজ্যোতি মজুমদাৰে । পিছত ধ্ৰুৱজ্যোতিৰ পত্নী চিমি মণ্ডলে মৃতদেহ চমজি লয় । তথাপিও শিৱসাগৰৰ থানামুখ শ্মশানত ধ্ৰুৱজ্যোতিৰ মুখাগ্নি কৰে; মুছকান বেগমে ।
সাংসদ দিলীপ শইকীয়াক ৰাষ্ট্ৰীয় সাধাৰণ সম্পাদক : বিহাৰ নিৰ্বাচনৰ আগ মূহূৰ্তত বিজেপিত নতুন মুখক দায়িত্ব
দৈনন্দিন বাৰ্তা ডেস্ক : বিজেপিৰ ৰাষ্ট্ৰীয় সভাপতি জগত প্ৰকাশ নাড্ডাই প্ৰায় আঠ মাহৰ পাচত শনিবাৰে দলীয় কাৰ্যালয়ৰ নতুন বিষয়ববীয়াৰ নাম ঘোষণা কৰে ৷ নাড্ডাই মুঠ ২৩ জন নতুন বিষয়ববীয়াক নিযুক্তি দিয়ে ৷ বিজেপিৰ প্ৰধানজনে নতুনকৈ গঠন কৰা কমিটীত ৰাম মাধৱ, পি মুৰুলীধৰ ৰাও, অনিল জৈন, সৰুজ পাণ্ডেৰ ঠাইত নতুন মুখৰ সাধাৰণ সম্পাদকৰ দায়িত্ব দিয়ে ৷ নাড্ডাই বেংগালুৰুৰ যুৱ সাংসদ তেজস্বী সূৰ্যক দলৰ যুৱ মৰ্চাৰ সভাপতি হিচাপে নিযুক্তি দিয়ে ৷ তেওঁক পুনম মহাজনৰ ঠাইত নিযুক্তি দিয়া হৈছে ৷ দলৰ নতুন ৰাষ্ট্ৰীয় উপসভাপতিৰ দায়িত্ব দিয়া হৈছে ৰমেন সিং, মুকুল ৰয়, বৈজন্ত জয় পাণ্ডাক ৷ উল্লেখ্য যে অসমৰ সাংসদ দিলীপ শইকীয়াক ৰাষ্ট্ৰীয় সাধাৰণ সম্পাদকৰ দায়িত্ব দিয়া হৈছে ৷ আগন্তুক বিহাৰ বিধানসভা নিৰ্বাচনৰ আগতে এই সিদ্ধান্ত লোৱা হয় ৷ ২০১৪ চনৰ লোকসভা নিৰ্বাচনত সৱল প্ৰদৰ্শনৰ পাচত ২০১৫ চনত আশা কৰাতকৈ সুন্দৰ ফল প্ৰদৰ্শন কৰিছিল ৷ সেই সময়ত জেডি (ইউ) আৰজেডি আৰু কংগ্ৰেছৰ সৈতে মহাজোঁটৰ এটা অংশ আছিল ৷ দলত নতুন সকলৰ ভিতৰত মহিলা আৰু যুৱকক কাম কৰাৰ সুযোগ দিয়া হৈছে ৷ উল্লেখ্য যে দলৰ সভাপতি হিচাপে নাড্ডাই চলিত বছৰৰ জানুৱাৰীত দায়িত্ব লাভ কৰিছিল ৷
ভিক্ষাবৃত্তিত লিপ্ত হোৱা চাৰি শিশুক উদ্ধাৰ হোজাই জিলা আইনসেৱা প্ৰাধিকৰণৰ ৷ পলাতক শিশুক ভিক্ষাবৃত্তিত লিপ্ত কৰা দুই কুখ্যাত ব্যক্তি
ডবকা, ২৬ চেপ্টেম্বৰ : হোজাইৰ ডবকাত ভিক্ষাবৃত্তিত লিপ্ত চাৰিগৰাকী শিশুক আজি উদ্ধাৰ কৰে হোজাই জিলা আইনসেৱা প্ৰাধিকৰণে ৷ এই চাৰি শিশুক ভিক্ষাবৃত্তিত নিয়োগ কৰিছিল এটা অসাধু চক্ৰই ৷ ডবকা চহৰৰ এটা ভাড়াঘৰত ৰাখি এওঁলোকক ভিক্ষাবৃত্তিত নিয়োগ কৰিছিল নগাঁও ধিঙৰ মাইনুল আৰু ৰুহুল আমিনে ৷ নগাঁও ধিঙৰ পৰা দুয়ো নিয়ন্ত্ৰণ কৰিছিল ভিক্ষাবৃত্তিৰ এই ব্যৱসায় ৷ সাংবাদিক, হোজাই জিলা আইনসেৱা প্ৰাধিকৰণ আৰু চাইল্ড লাইনে উদ্ধাৰ কৰে ভিক্ষা বৃত্তিত লিপ্ত চাৰিগৰাকী শিশু ৷ আজি ডবকা চহৰত ভিক্ষাবৃত্তিত লিপ্ত হোৱা চাৰিগৰাকী শিশুক প্ৰথমে প্ৰত্যক্ষ কৰে ডবকাৰ সাংবাদিক আব্দুল হান্নান তালুকদাৰে ৷ অনাহাৰে থাকি মাদ্ৰাছাৰ নামত ভিক্ষা কৰি থকা অৱস্থাতে ডবকাৰ সাংবাদিকজনে শিশুকেইটিক উদ্ধাৰ কৰি খৱৰ দিয়ে হোজাই জিলা আইনসেৱা প্ৰাধিকৰণক ৷ সেইমৰ্মে হোজাই জিলা আইনসেৱা প্ৰাধিকৰণৰ সম্পাদিকা প্ৰনিতা মৰাং, পেনেল অধিবক্তা ৰোহিনা ৱাৰিছ, চাইল্ড লাইন আৰু ডবকা আৰক্ষীয়ে শিশুকেইটিক উদ্ধাৰ কৰি স্বাস্থ্য পৰীক্ষাৰ অন্তত শিশু সুৰক্ষা গৃহলৈ প্ৰেৰণ কৰে ৷ ইফালে শিশুক ভিক্ষাবৃত্তিত নিয়োগ কৰা দুয়ো প্ৰৱঞ্চকৰ বিৰুদ্ধে চাইল্ড লাইনে ডবকা থানাত এটি গোচৰ তৰিছে ৷ ডবকা আৰক্ষীয়ে মাইনুল আৰু ৰুহুল আমিনক বিচাৰি চলাইছে অভিযান ৷ শিশুক ভিক্ষাবৃত্তিত নিয়োগ কৰাৰ এই ঘটনাই চাঞ্চল্যৰ সৃষ্টি কৰিছে ৷
দৰঙৰ শলগুৰি সত্ৰত জগতগুৰু শ্ৰীমন্ত শঙ্কৰদেৱৰ ৫৭২ সংখ্যক জন্ম জয়ন্তী উৎসৱ অনুষ্টুপীয়াকৈ পালন
শ্ৰীমন্ত শংকৰ, হৰি ভকতৰ,
যানা যেন কল্পতৰু,
তাহান্ত বিনাই, নাই নাই নাই,
আমাৰ পৰম গুৰু ৷৷
নামখলা : সমগ্ৰ বিশ্বৰ লগতে ৰাজ্যতো ক’ৰােনা মহামাৰীয়ে ত্ৰাসৰ সৃষ্টিৰ কৰাৰ পৰিপ্ৰেক্ষিতত এইবেলি মহাপুৰুষ জনাৰ জন্ম জয়ন্তী মহােৎসৱ ভাগ অনুষ্টুপীয়াকৈ পালন কৰা হয় ৷ অসমীয়া সংস্কৃতিৰ ধ্বজাবাহক অসমীয়া জাতি সত্বাৰজনক অসমীয়া সাহিত্য সংস্কৃতিৰ যুগনায়ক মহাপুৰুষ শ্ৰীমন্তশঙ্কৰদেৱ গুৰুজনাৰ জন্মজয়ন্তীৰ সহস্ৰাধিক ভকতৰ তুলনাত এইবাৰ অতি সীমিত সংখ্যক ভকতৰ উপস্থিতিৰে পালন কৰে ৷ এই অনুষ্ঠানত অনুষ্ঠিত হোৱা বিভিন্ন কাৰ্যসূচীৰ লগতে নাম প্ৰসংগ হৰি নাম ধ্বনিৰে মুখৰিত কৰি তোলে শলগুৰি সত্ৰ ৷ সন্ধিয়া বন্তি প্ৰজ্বলনৰে জন্মজয়ন্তী অনুষ্ঠান সামৰনি পৰিব বুলি সত্ৰৰ একনিষ্ঠ সেৱক বৰুন কলিতাই জানিব দিয়ে ৷
