ধেমাজি : অসমকে ধৰি দেশৰ বিভিন্ন প্ৰান্তৰ মুঠ ১৬ গৰাকী ব্যক্তিলৈ কৰ্ম ক্ষেত্ৰত দেখুৱা পাৰদৰ্শিতা স্বীকৃতিস্বৰূপে দ্যা ক্ৰিয়েটিভ হবি জ’নে ইণ্ডিয়া ক্ৰিয়েটিভ এৱাৰ্ড-২০২০ এই বৰ্ষত আগবঢ়াইছে। সেই একেদৰে, অসম কন্যা চিত্ৰ শিল্পী, সমাজসেৱিকা হাঁহচৰা লংকাক গোহাঁই গাঁৱৰ মুনমী বুঢ়াগোহাঁইলৈ এই বৰ্ষত ইৰ্মাজিন য়ুৰ্থ আৰ্টিচ অব দ্যা ইয়েৰ ২০২০ৰ বিশেষ বঁটা আগবঢ়ায়। উল্লেখযোগ্য যে, ২০১৯ বৰ্ষত মুনমী বুঢ়াগোহাঁয়ে পেলনীয়া বস্তুৰে ছবি নিৰ্মাণ কৰাৰ বাবে ইণ্ডিয়া বুক অৱ ৰেকৰ্ডৰ লগতে ভাজৰা ৱল্ড ৰেকৰ্ডতো নিজৰ নাম অন্তৰ্ভুক্ত কৰি গাওঁখনৰ লগতে সমগ্ৰ অসমলৈ গৌৰৱ কঢ়িয়াই আনিবলৈ সক্ষম হৈছে। একেদৰে চিত্ৰ শিল্পী হিচাপে ভূয়সী প্ৰসংশা লাভ কৰিবলৈ সক্ষম হোৱা মুনমীয়ে গাঁৱতে কণ-কণ শিশুসকলক বিনামূলীয়াকৈ সাহিত্য-সংস্কৃতিৰ লগত জড়িত ৰাখি দিহানাম, কবিতা আবৃত্তি, আকস্মিক বক্তৃতা, কুইজ, নৃত্য, নাটক, ভাস্কৰ্য শিল্প, অভিনয় আদিৰ প্ৰশিক্ষণ দি অহাৰ লগতে কণমানিসকলৰ মনৰ কথাৰে মন এটি আশা নামৰ এখনি তিনিমহীয়া আলোচনী প্ৰকাশ কৰি কণমানিহতঁক সাহিত্য-সংস্কৃতিৰ প্ৰতি এখোজ আগুৱাই নিয়াত সহায় কৰি আহিছে।

নগাঁওঃ,২৮ ছেপ্তেম্বৰঃ পুষ্টিহীনতাত ভুগি থকা আৰু স্বাস্থ্য অনুসৰণ কৰা, বৃক্ষৰোপণ আৰু সজাগতাৰ উদ্দেশ্য চলি থকা পোষণ মাহ উপলক্ষে নগাঁও জিলাৰ সমাজ কল্যাণ বিভাগৰ পাখীমৰিয়া সংহত শিশু উন্নয়ন প্ৰকল্পৰ উদ্যোগত আজি ২৮ ছেপ্তেম্বৰত হাঁহিলা পৰ্যটন স্থলিত এক মনোৰম প্ৰাকৃতিক পৰিৱেশত বৃক্ষ ৰোপণ কাৰ্যসূচী অনুষ্ঠিত হয় ৷ পাখীমৰিয়া সংহত শিশু উন্নয়ন প্ৰকল্পৰ মূখ্য সেৱিকা উপমা বৰুৱাই আতঁধৰা বৃক্ষ ৰোপণ কাৰ্যসূচীত জিলা সমাজ কল্যাণ বিষয়া দিনেশ দাস,পাখীমৰিয়া সংহত শিশু উন্নয়ন বিষয়া ৰানু বৰাই বৃক্ষ ৰোপণ কাৰ্যসূচীৰ শোভাৰাম্ভ কৰি কয় যে- গছ থাকিলেহে মানুহ থাকিব ৷ গছে আমাক অক্সিজেন দিয়ে ৷ গতিকে বৃক্ষৰোপণৰ জৰিয়তে আমি আমাৰ পাৰিপাৰ্শ্বিকতা গঢ়ি তুলিব লাগিব ৷ হাঁহিলা পৰ্যতন স্থলিৰ প্ৰকৃতিক পৰিৱেশত হোবা অনুষ্ঠানটিত সাংবাদিক দেৱজিৎ হাজৰিকা,প্ৰসেনজিত মণ্ডল,যুৱ সমাজকৰ্মী দুল জ্যোতি নাথ,জুন বৰা,পোষণৰ জিলা সংযোগী বিষয়া ভৱেন বৰা,মূখ্য সেৱিকা সকল ক্ৰমে ৰুনজুন বৰা,জোনালী বৰা,কাঞ্চন শইকীয়া,মৌচুমী গায়ন আৰু অংগনবাড়ি কৰ্মী সকল উপস্থিত থাকে ৷

গেলেকী, ২৮ছেপ্তেম্বৰঃ নাজিৰাস্থিত অ’ এন জি চি (অসম সম্পদ)ত ভুৱা নিযুক্তিৰ বেহা । নিৱনুৱাক প্ৰৱঞ্চনাৰে ধন আত্মসাৎ কৰি অৱশেষত প্ৰৱঞ্চিত যুৱকক অপহৰণৰ গোচৰত আটক বকতাৰ তিনি যুৱক ক্ৰমে দীপজ্যোতি দিহিঙীয়া, দীনেশ চেতিয়া আৰু বিজয় চেতিয়া । অপহৰণৰ গোচৰ জাপি দি ৰঙাঘৰৰ আলহী কৰা আশ্ৰাফুৰ হক নামৰ যুৱকজনৰ বিপক্ষেও ভুক্তভোগীৰ পৰিয়ালে এজাহাৰ দাখিল কৰাত উক্ত যুৱকজনো গ্ৰেপ্তাৰ হয় । জানিব পৰা মতে ধুবুৰী চহৰৰ নিবাসী ব্যৱসায়ী জহিদুল হকৰ পুত্ৰ আশ্ৰাফুৰে পূৰ্বে অ’ এন জি চিৰ মৰাণ অইল শাখাত ঠিকাভিত্তিক কাম কৰাৰ সূত্ৰে অ’ এন জি চিত এনে নিযুক্তি সম্পৰ্কীয় দালালিত জড়িত হৈ পৰে । বকতাৰ উক্ত তিনিজন যুৱককো আশ্ৰাফুৰে যোগসূত্ৰকাৰীৰ জৰিয়তে প্ৰথম কিস্তিত ৬০ হাজাৰ টকাকৈ লৈ একোখনকৈ ভুৱা নিযুক্তিপত্ৰ প্ৰদান কৰিছিল । অ’ এন জি চিৰ প্ৰৱন্ধক এম মুৰুলিধৰনৰ ভুৱা স্বাক্ষ্যৰ থকা এই নিযুক্তিপত্ৰ লৈ যুৱকত্ৰয়ে নাজিৰাস্থিত কাৰ্যালয়ত যোগদান কৰিবলৈ যোৱাতহে আচল কথাটো ধৰা পৰে । বকতা নেমুগুৰি থানাত আশ্ৰাফুৰ উপস্থিত হোৱাৰ পিছতে প্ৰৱঞ্চনা আৰু আৰক্ষীক প্ৰৰোচিত কৰা অভিযোগত কেছ নং ৬৪/২০২০ ধাৰা ৪২০, ৪০৬, ৩৬৮মৰ্মে অভিযুক্তক আৰক্ষীয়ে গ্ৰেপ্তাৰ কৰে । আৰক্ষীৰ জেৰাত আশ্ৰাফুৰে ধন লোৱাৰ স্বীকাৰোক্তি দিয়া বুলি আৰক্ষী সূত্ৰই সদৰী কৰিছে । আনহাতে গাঁৱৰ দৰিদ্ৰ পৰিয়ালৰ সাধাৰণ নিৱনুৱা যুৱক তিনিজনক চাকৰি দিয়াৰ বিপৰীতে অপহৰণৰ গোচৰত জে’ললৈ পঠোৱা আদি শাস্তিৰ দাবী জনাই ২৫ছেপ্তেম্বৰৰ বিয়লি থানাখনৰ সন্মুখত বহুলোক সমবেত হয় । আৰক্ষীয়ে পিছত অভিযুক্তক আদালতত হাজিৰ কৰাই অধিক তদন্তৰ বাবে নিজৰ জিন্মাত লোৱাৰ কথা জানিব পৰা গৈছেে ৷

নলবাৰী : নলবাৰী আৰক্ষীয়ে ইতিপূৰ্বে তিনি গৰাকীকৈ যুৱকক সোধ পোচৰ বাবে আটক কৰাৰ পিছত কালি পুৱতি নিশা আকৌ দুগৰাকীকৈ যুৱকক নলবাৰী আৰক্ষীয়ে সোধ পোচৰ বাবে আটক কৰে। যুৱক কেইজন ক্ৰমে হৰকত আলী, সঞ্জীৱ বৰ্মন, মৃদুল বৰ্মন, পাৰ্থপ্ৰতিম পাঠক আৰু ধ্ৰুৱজ্যোতি বৰুৱা। জানিব পৰা মতে এই পাঁচ গৰাকী যুৱক আৰক্ষীৰ উপ পৰিদৰ্শক পদৰ পৰীক্ষাৰ আবেদনকাৰী আছিল। এই পাঁচ গৰাকী যুৱকে এছ আই পৰীক্ষাৰ আগদিনা গুৱাহাটীৰ হোটেলত অনুশীলনত বহিছিল। আনহাতে ধাৰাবাহিক এছ আই কাণ্ডৰ লগত জৰিত বিভিন্ন তথ্য পোহৰলৈ আহিছে। কুলদ্বীপ ৰাজবংশী আৰু কুমুদ গোস্বামীৰ পিছত এইবাৰ নাম ওলাইছে নিতুল বৰ্মনৰ। পাঁচজনকৈ পৰীক্ষাৰ্থীক নলবাৰী আৰক্ষীয়ে আটক কৰাৰ পিছত পৰীক্ষাৰ্থী এজনে নাম লৈছে নিতুল বৰ্মনৰ। কোন এই নিতুল বৰ্মন, এছ আই নিযুক্তি কেলেংকাৰী কাণ্ডত তেওঁৰ ভূমিকা কি বুলিও ৰাইজৰ মাজত প্ৰশ্নৰ সৃষ্টি হৈছে।

গেলেকী : নাজিৰা মহকুমা সমীপৰ চৰাইদেউ জিলা কৃষি বিভাগৰ উদ্যোগত আৰু জিলা সমাজ কল্যাণ বিভাগৰ সহযোগত তথা অসম চৰকাৰৰ উদ্যান শস্য আৰু খাদ্য সংসাধন বিভাগৰ সৌজন্যত ৰাষ্ট্ৰীয় পোষণ মাহ- ২০২০ উপলক্ষে ২৭ ছেপ্তেম্বৰৰ দিনা সোণাৰি ৰাজহুৱা প্ৰেক্ষাগৃহত এখনি দুদিনীয়া কৰ্মশালা অনুষ্ঠিত হয়। কৰ্মশালাখনি অনুষ্ঠানিক ভাৱে উদ্বোধন কৰি চৰাইদেউ জিলাৰ উপায়ুক্ত পলাশ ৰঞ্জন ঘৰফলীয়াই কয় যে সমাজ এখন আগবাঢ়ি যাবলৈ শিশু, গৰ্ভৱতী মাতৃ আৰু প্ৰসূতি মাতৃসকল স্বাস্থ্যৱান হ’বই লাগিব। তাৰ বাবে চৰকাৰে গ্ৰহণ কৰা পোষণ অভিযান এক উল্লেখযোগ্য আঁচনি। কৰ্মশালাখনিত মুখ্য অতিথি ৰূপে উপস্থিত থাকে অসম চৰকাৰৰ ৰাজহ আৰু দুৰ্যোগ ব্যৱস্থাপনা মন্ত্ৰী যোগেন মহন আৰু সোণাৰি সমষ্টিৰ বিধায়িকা নৱনীতা সন্দিকৈ। ভাষণ প্ৰসংগত মন্ত্ৰী যোগেন মহনে কয় যে স্বাস্থ্য ৰক্ষাৰ বাবে আমি সদায় জৈৱিক খাদ্য গ্ৰহণ কৰিব লাগে। ৰাসায়নিক সাৰ প্ৰয়োগ কৰা বজাৰৰ শাক পাচলিতকৈ ঘৰুৱা শাক পাচলি অধিক গ্ৰহণযোগ্য। বিধায়িকা নৱনীতা সন্দিকৈয়ে তেওঁৰ বক্তব্যত পৰিপুষ্টিৰ ব্যাখ্যা দাঙি ধৰে। ইয়াৰ পূৰ্বে চৰাইদেউ জিলাৰ কৃষি বিষয়া ড° অৰুণ চাংকাকতিয়ে আদৰণি ভাষণ প্ৰদান কৰাৰ লগতে ভাৰপ্ৰাপ্ত জিলা সমাজ কল্যাণ বিষয়া জাহ্নৱী গোস্বামীয়ে সভাৰ উদ্দেশ্য ব্যাখ্যা আগবঢ়ায়। সভাখনি আঁতধৰে চৰাইদেউ জিলাৰ পোষণ অভিযানৰ জিলা সমন্বয়ক দ্বীপেন বৰুৱাই। কৰ্মশালাখনিত প্ৰথম দিনা সমল ব্যক্তি হিচাপে উপস্থিত থাকি বক্তব্য আগবঢ়ায় জিলা কৃষি বিষয়া ড° অৰুণ চাং কাকতি আৰু শিৱসাগৰস্থিত কৃষি বিজ্ঞান কেন্দ্ৰৰ কৃষি বিজ্ঞানী প্ৰিয়ংকা দত্তই। এই কৰ্মশালাখনিত জিলা কৃষি বিভাগৰ বিষয়া-কৰ্মচাৰীৰ লগতে চৰাইদেউ জিলাৰ চাৰিওটা সংহত শিশু উন্নয়ন প্ৰকল্পৰ মুখ্য সেৱিকাৰ লগতে নিৰ্বাচিত অংগনবাড়ী কৰ্মী, পোষণ অভিযানৰ কৰ্মচাৰীবৃন্দ আৰু অসম ৰাজ্যিক গ্ৰামীণ জীৱিকা অভিযানৰ কৃষি সখীসকল উপস্থিত থাকে। আজি অন্তিম দিন। অংগনবাড়ী কৰ্মীসকলক জিলা কৃষি বিভাগৰ তৰফৰ পৰা লাই, মূলা, পালেং, ধনীয়া, বেঙেনা, জাতিলাও, টিয়হ আদি শস্যৰ গুটি প্ৰদান কৰা হয়।

গেলেকী : নাজিৰা মহকুমা অন্তৰ্গত শিমলুগুৰি সাঁত নং ৱাৰ্ডৰ নিবাসী সমাজসেৱক, বিশিষ্ট চিকিৎসক, বুৰঞ্জীবিদ তথা ভাৰতীয় জনতা পাৰ্টিৰ শিৱসাগৰ জিলাৰ জেষ্ঠ নেতা ও উপ সভাপতি ডাঃ প্ৰবীণ কোঁৱৰৰ অকাল মৃত্যু। ২৭ ছেপ্তেম্বৰৰ পুৱাই ডিব্ৰুগড় অসামৰিক চিকিৎসালয়ত তেওঁ শেষ নিশ্বাস ত্যাগ কৰে। জানিব পৰা মতে বিগত কিছু দিনৰ পৰা ভুক্তভোগী বৃক্ক আৰু হৃদৰোগত আক্ৰান্ত হৈ আছিল। কোঁৱৰ আছিল ২০২১ৰ নিৰ্বাচনৰ বিজেপি দলৰ নাজিৰা সমষ্টিৰ টিকটৰ দাবীদাৰ। সমষ্টি উন্নয়ণৰ স্বাৰ্থত বিজেপি দলৰ হৈ তেখেতে যথেষ্ট কাম কৰি গৈছে। উল্লেখ্য যে সমাজকৰ্মী, চিকিৎসকগৰাকীৰ মৃত্যুত ৰাইজ, কংগ্ৰেছ বিধায়িনী দলৰ সভাপতি দেৱব্ৰত শইকীয়া, দলীয় নেতা-কৰ্মী সকলৰ লগতে জাতীয় গণ সংগ্ৰাম পৰিষদ, অসম শিৱসাগৰ জিলা সমিতিৰ যুটীয়া সম্পাদক, নিউজ টাইম অসমৰ নাজিৰা মহকুমা সাংবাদিক ফাৰহান লস্কৰে গভীৰ শোক প্ৰকাশ কৰিছে। লস্কৰে আজি এক প্ৰেছ বিবৃতিৰ জড়িয়তে বিজেপি নেতা গৰাকীৰ অকাল মৃত্যুত দলৰ যথেষ্ট ক্ষতি হোৱা বুলি উল্লেখ কৰে। আনহাতে উক্ত লোক সকলে মৃতকৰ পৰিয়ালবৰ্গলৈ সমবেদনা জ্ঞাপন কৰাৰ বিপৰীতে তেখেতৰ বিদেহী আত্মাৰ চিৰশান্তি কামনা কৰিছে। যাক লৈ নাজিৰা সমষ্টিজুৰি এতিয়া শোকৰ ছাঁ পৰিছে।