দৈনন্দিন বাৰ্তা ডেস্ক : গালৱান উপত্যকাত সেনাৰ সংঘৰ্ষৰ পাচত কাৰ্যত ভাৰত-চীনৰ ছাইবাৰ যুদ্ধ আৰম্ভ হয় ৷ প্ৰথম পৰ্যায়ত ৫৯টা এপ নিষিদ্ধ কৰাৰ পাচত কেন্দ্ৰই জনাইছিল, কেন্দ্ৰৰ ২৫০টা এপ পৰ্যৱেক্ষণৰ ভিতৰত ৰাখিছে ৷ পূৱ লাডাখত পুনৰ চীনে অনুপ্ৰৱেশৰ চেষ্টা চনাই থকাৰ সময়তে এইবাৰ ১১৮টা এপ নিষিদ্ধ কৰিলে মোডী চৰকাৰে ৷ এইবোৰৰ ভিতৰত সবাতোকৈ গুৰুত্বপূৰ্ণ এপটো হ’ল ‘পাবজী’। ভাৰতে এই এপবোৰ পুনৰ ডাউনলড কৰিবলৈ নিদিয়ে ৷ এই সকলোবোৰ মিলি ২২৪টা চীনা এপ নিষিদ্ধ কৰিলে ভাৰতে ৷ কেন্দ্ৰীয় তথ্য প্ৰযুক্তি মন্ত্ৰালয়ে জনোৱা মতে তথ্য প্ৰযুক্তি আইনৰ ৬৯এ ধাৰাত এই এপবোৰ নিষিদ্ধ কৰা হৈছে ৷ কাৰণ হিচাপে কোৱা হৈছে, এই সকলো এপ ইমান কামত লিপ্ত, যিটো ভাৰতৰ সার্বভৌমত্ব আৰু অখণ্ডতা, প্ৰতিৰক্ষা, নিৰাপত্তা আৰু জনস্বাৰ্থৰ পৰিপন্থী ৷ কোটি কোটি ভাৰতীয় ম’বাইল আৰু ইণ্টাৰনেট ব্যৱহাৰকাৰীৰ নিৰাপত্তাৰ স্বাৰ্থত এই সিদ্ধান্ত লোৱা হয় বুলি জনাইছে তথ্য প্ৰযুক্তি মন্ত্ৰালয়ে ৷ স্মৰ্তৱ্য যে যোৱা ১৫ জুনত গালৱান উপত্যকাত প্ৰকৃত নিয়ন্ত্ৰণ ৰেখাত সেনাৰে সংঘৰ্ষত কমাণ্ডাৰ পৰ্যায়ৰ এজন বিষয়া আৰু ১৯জন জোৱানৰ মৃত্যু হৈছিল ৷ তাৰ পাচতে নতুন দিল্লী-বেইজিঙৰ মাজত সংঘাত চৰম পৰ্যায়ত উপনীত হয় ৷ তাৰ ফলতেই যোৱা ২৯ জুনত টিকটক, ইউচি ব্ৰাউজাৰ, শ্বেয়াৰইট, উইচাট, ভিগ’ লাইভসহ ৫৯টা এপ নিষিদ্ধ কৰিছিল তথ্য প্ৰযুক্তি মন্ত্ৰালয়ে ৷ তাৰ কিছু দিনৰ পাচত এই সকলো এপৰ সহযোগী আন ৪৯টা এপ বাতিল কৰা হৈছিল ৷ ইয়াৰ লগতে কেন্দ্ৰই জনাই যে সকলো মিলি ২৫০ টা চীনা এপ কেন্দ্ৰই তীক্ষ্ণ দৃষ্টি ৰাখিছে ৷ সেই তালিকাৰ পৰাই ১১৮টা এপ নিষিদ্ধ কৰা হ’ল ৷ তথ্য প্ৰযুক্তি মন্ত্ৰালয়ে জনাইছে যে সমাজৰ বিভিন্ন স্তৰৰ পৰা পাবজীৰ দৰে কিছু এপ লৈ অভিযোগ দিছিল বিভিন্ন মহলে ৷ গ্ৰাহকৰ তথ্য হাতত লৈ সেই তথ্যৰ অপব্যৱহাৰসহ নানা অভিযোগ উত্থাপন হৈছিল ৷ মন্ত্ৰালয়ে লক্ষ্য কৰিছে, এয়া অতি গুৰুতৰ উদ্বেগৰ বিষয় ৷ কেন্দ্ৰীয় গৃহ মন্ত্ৰালয়ে ছাইবাৰ ক্ৰাইম শাখাক এই এপবোৰ ব্লক কৰিবলৈ কৈছিল ৷

দৈনন্দিন বাৰ্তা ডেস্ক : ভাৰতত ক’ৰোনা ভাইৰাছত মহিলাতকৈ পুৰুষৰ মৃত্যুৰ পৰিমাণ দুগুণ ৷ ৬৯ শতাংশ পুৰুষৰ মৃত্যু হৈছে ৷ স্বাস্থ্য মন্ত্ৰালয়ৰ তথ্য মতে এই মহামাৰীত কিদৰে বয়স আৰু লিংগ ভেদে মানুহক প্ৰভাৱিত কৰিছে তাৰ তাৰিখত নিয়মীয়াকৈ চালে সৰ্বাধিক পুৰুষ দেখা যায় ৷ ৯০ শতাংশৰ অধিক লোকৰ মৃত্যু, পুৰুষ আৰু মহিলা উভয়ৰে ভিতৰত ৪০ বছৰৰ ওপৰৰ লোক আছে ৷ ২২ আগষ্টত ৫৬২৯২ জন ক’ভিড-১৯ত দেশত মৃত্যু হোৱা আধাৰো বেছি ৫০-৭০ বছৰৰ ভিতৰত ৷ উভয় লিংগৰ ভিতৰত ক’ভিড-১৯ত সকলোতকৈ বেছি ৬১-৭০ বছৰ বয়সৰ লোকৰ মৃত্যু হৈছে ৷ ক’ভিড-১৯ত মৃত্যু হোৱা তিনিজনৰ ভিতৰত এগৰাকীৰো কম মহিলা আছিল ৷ ২২ আগষ্টত মুঠ ৫৬২৯২ জন লোকৰ ভিতৰত ১৭৩১৫ গৰাকী মহিলাৰ মৃত্যু হয় ৷ তথ্য মতে আগষ্টৰ তৃতীয় সপ্তাহত এই মহামাৰীত ৩৮৯৭৩ জন পুৰুষৰ মৃত্যু হয় ৷ যিটো ‘আপডেট হোৱা’ আৰু ‘আনবোৰ’ হিচাপত চাৰিটা মৃত্যু শ্ৰেণীবদ্ধ কৰা হয় ৷ মৃত্যুৰ অপ্ৰত্যাশিত তথ্য প্ৰদৰ্শিত হৈছে যিটো ৰোগীৰ বিশ্বজুৰি মৃত্যুৰ প্ৰৱনতা সম্পৰ্কে বিজ্ঞানীয়ে যি পৰ্যৱেক্ষণ কৰিছে তাক পুনৰাই নিশ্চিত কৰে- পুৰুষৰ বাবে আৰু বয়স্কৰ ক্ষেত্ৰত অস্বাভাৱিকভাৱে মাৰাত্মক ৷ ক’ভিডত মৃত্যুৰ ভিতৰত মহিলাৰ পৰিমাণ তৃতীয় ৷ আনহাতে ২০ বছৰ আৰু তলৰ ছোৱালী আৰু ল’ৰাৰ মৃত্যুৰ হাৰ একেই ৷ ১১-২০ বছৰ বয়সীয়া ছোৱালীৰ ৫৯৯ ক’ভিড-১৯ত মৃত্যুৰ ভিতৰত ৪৯ শতাংশ আছিল ছোৱালী ৷ ১০ বছৰৰ তলৰ শিশু ক’ভিড-১৯ত মৃত্যু সকলোতকৈ কম সম্ভাৱনা ৷ ক’ভিড-১৯ত ৩০১জন ৯০ বছৰৰ ওপৰৰ ব্যক্তি মৃত্যু হৈছে ৷ ইয়াৰ পৰিমাণ হ’ল মুঠ মৃত্যুৰ ০.৫ শতাংশ ৷ বিশ্ব স্বাস্থ্য সংস্থা জুন মাহৰ তথ্য মতে বিশ্বজুৰি গড় তুলনাত বহু কম যিটো ৮৫ বছৰ বয়সীয়া বা তাৰ বেছি বয়সীয়া লোকৰ মৃত্যুৰ পৰিমাণ ৩.৪ শতাংশ ৷ বহুমূত্ৰ ৰোগ, হাইপাৰটেনচন আৰু বৃক্ক ৰোগত ভোগা লোকৰ বাবে ক’ৰোনাত আক্ৰান্তৰ বিপদ বেছি ৷

দৈনন্দিন বাৰ্তা ডেস্ক : সম্পূৰ্ণ ৰাষ্ট্ৰীয় মৰ্যাদাৰে দিল্লীত শেষকৃত্য সম্পন্ন হ’ল দেশৰ প্ৰাক্তন ৰাষ্ট্ৰীয় প্ৰণৱ মুখাৰ্জীৰ ৷ দিল্লীৰ লোদী ৰ’ডত গান চেলুটৰ মাজেৰে শেষ বিদায় জনোৱা হ’ল দেশৰ ১৩তম ৰাষ্ট্ৰপতিক ৷ ইয়াৰ লগে লগে অৱসান হ’ল পাঁচ দহক দিল্লীত বৰ্ণময় ৰাজনীতি কৰা প্ৰণৱ মুখাৰ্জী যুগৰ ৷ চিকিৎসা চলি থকা সময়তে প্ৰণৱ মুখাৰ্জীৰ ক’ৰোনা ৰিপৰ্ট পজিটিভ আহে ৷ তেওঁক দিল্লীৰ ৰাজাজী ৰ’ডৰ ঘৰৰ পৰা আৰম্ভ কৰি লোদী ৰোডৰ মহাশ্মশানত সকলোৱে ক’ভিড নিয়ম মানি শেষকৃত্য কৰে ৷ পিপিই কিট পৰিধান কৰি অন্ত্যেষ্টিক্ৰিয়া সম্পন্ন কৰে পুত্ৰ অভিজিৎ মুখাৰ্জীয়ে ৷ পৰিয়ালৰ আন সদস্যইও পিপিই কিট পৰিধান কৰি শ্মশানত উপস্থিত হয় ৷ সকলোৱে ক’ভিড নিয়ম মানি শেষকৃত্যত উপস্থিত থাকে ৷ অৱশ্যে ইয়াত লোকৰ সংখ্যা সীমিত ৰখা হৈছিল ৷ ইয়াৰ আগতে দিল্লীৰ সেনা হাস্পতালৰ পৰা প্ৰণৱ মুখাৰ্জীৰ মৃতদেহ লোদী ৰ’ডৰ বাসভৱনলৈ অনা হয় ৷ তাতে ৰাষ্ট্ৰপতি, প্ৰধানমন্ত্ৰীসহ শাসক-বিৰোধীসহ সকলো দলৰ ৰাজনীতিবিদে তেওঁক শেষ শ্ৰদ্ধা জনায় ৷ ইপিনে ক’ভিডৰ বাবে মৃতদেহ ঘৰৰ এটা কোঠাত ৰখা হয় ৷ কিন্তু তাত কাকো সোমাবলৈ দিয়া নাছিল ৷ তাৰ পৰিবৰ্তে এটা বেদি তৈয়াৰ কৰি প্ৰণৱ মুখাৰ্জীৰ ছবি ৰখা হয় ৷ সেই ছবিতে সকলোৱে ফুল, মালা দি শ্ৰদ্ধা জনায় ৷ ৰাষ্ট্ৰপতি আৰু প্ৰধানমন্ত্ৰীৰ উপৰি প্ৰয়াত প্ৰাক্তন ৰাষ্ট্ৰপতিক শ্ৰদ্ধা জনায় উপৰাষ্ট্ৰপতি বেংকয়া নাইডু, প্ৰতিৰক্ষা মন্ত্ৰী ৰাজনাথ সিং, লোকসভাৰ অধ্যক্ষ ওম বিৰলা, চিফ অব ডিফেন্স ষ্টাফ বিপিন ৰাৱাত, সস্ত্ৰীক প্ৰাক্তন প্ৰধানমন্ত্ৰী মনমোহন সিং, কংগ্ৰেছৰ লোকসভাৰ দল নেতা অধীৰ চৌধুৰী, কংগ্ৰেছ সাংসদ ৰাহুল গান্ধী, দিল্লীৰ মুখ্যমন্ত্ৰী অৰবিন্দ কেজৰিৱালসহ বহু নেতা-মন্ত্ৰী আৰু সাধাৰণ লোক ৷ তেওঁৰ মৃত্যুত সাত দিন ৰাষ্ট্ৰীয় শোক ঘোষণা কৰিছে কেন্দ্ৰই৷ এই সাত দিন ৰাষ্ট্ৰীয় পতাকি অৰ্ধনমিত কৰা হ’ব ৷

দৈনন্দিন বাৰ্তা ডেস্ক : দেশত ইতিমধ্যে ২৩০ বিশেষ ৰে’ল চলিছে ৷ ইয়াৰ পাচত আন ১২০ বিশেষ ৰে’ল চলোৱাৰ পৰিকল্পনা কৰা হৈছে ৷ আনলক ৪ আৰম্ভ হোৱাৰ পাচত আৰম্ভ হৈছে মেট্ৰ’ ৰে’ল সেৱা ৷ ৰে’ল ব’ৰ্ডৰ সূত্ৰই জনোৱা মতে ৰে’ল চলাবৰ বাবে ৰাজ্যবোৰৰ লগত আলোচনা কৰিছে ৰে’ল কৰ্তৃপক্ষই ৷ কেন্দ্ৰীয় গৃহ মন্ত্ৰালয়ৰ সেউজ সংকেত পালে প্ৰায় ১০০ খন ৰে’ল চলোৱা হ’ব ৷ পাচত বঢ়োৱা হ’ব ৰে’লৰ সংখ্যা ৷ ৰে’লবোৰ চলিব বিভিন্ন ৰাজ্য আৰু ৰাজ্যৰ ভিতৰত ৷ উল্লেখ্য যে ক’ৰোনা সংক্ৰমণৰ মাজতে পৰ্যটক, শিক্ষাৰ্থী, বিভিন্ন ৰাজ্যত বন্দী হৈ থকা মানুহ আৰু শ্ৰমিকৰ বাবে ১ মে’ৰ পৰা এক্সপ্ৰেছ আৰম্ভ কৰিছিল ৷ ৰাজ্যবোৰৰ সৈতে পৰামৰ্শ লৈ ক’ৰোনা স্বাস্থ্য বিধি মানি আৰম্ভ হৈছিল এই ৰে’ল চলাচল ৷ ইপিনে ৰে’ল মন্ত্ৰী পীয়ূষ গোৱেলে জনায় যে দেশৰ ৯৬০টা ষ্টেচন সৌৰ বিদ্যুতৰ ব্যৱস্থা কৰিছে ৷ ২০৩০ চনৰ ভিতৰত দেশৰ সকলো ষ্টেচনত সৌৰ বিদ্যুতৰ ব্যৱস্থা কৰা হ’ব ৷ সেই ষ্টেচনৰ ভিতৰত আছে নতুন দিল্লী, পুৰণা দিল্লী, ছেকেন্দ্ৰাবাদ, কলকাতা, গুৱাহাটী, হাইদৰাবাদ ৷

দৈনন্দিন বাৰ্তা ডেস্ক : ক’ভিড-১৯ৰ বিৰুদ্ধে যুঁজ দিবৰ বাবে জাপানৰ দাতা এজেন্সী জাইকাই ভাৰতক ৩৫০০ কোটি টকাৰ ঋণ দিয়া উদ্দেশ্যে কেন্দ্ৰীয় চৰকাৰৰ লগত এক চুক্তিত স্বাক্ষৰ কৰিছে ৷ স্বাস্থ্য খণ্ডত আত্মনিৰ্ভৰ ভাৰত পেকেজ হিচাপে স্বাস্থ্য আৰু পৰিয়াল কল্যাণ মন্ত্ৰালয়ৰ দ্বাৰা পৰিচালিত প্ৰধানমন্ত্ৰী আত্মনিৰ্ভৰ স্বাস্থ্য ভাৰত যোজনা (প্ৰধানমন্ত্ৰী-এএছবিৱাই) বাস্তৱায়িতৰ বাবে প্ৰত্যাশিত ধন ব্যয়ৰ বাবে ভাৰত চৰকাৰক এই ঋণৰ ধন বিতৰণ কৰা হ’ব ৷ জাপানৰ আন্তৰ্জাতিক সহযোগিতা সংস্থা (জাইকা)ই এক বিবৃতিত কয়, প্ৰকল্পৰ উদ্দেশ্য ক’ভিড-১৯ৰ বিৰুদ্ধে প্ৰতিৰোধ হিচাপে স্বাস্থ্যত জৰুৰী প্ৰতিক্ৰিয়া কৰ্মসূচী বাস্তৱায়িত কৰাত ভাৰত চৰকাৰক বাজেটৰ সহায়ক ৰূপে জনস্বাস্থ্য সেৱা ব্যৱস্থা তীব্ৰ কৰা ৷ এয়া ভাৰতৰ সামাজিক আৰু অৰ্থনৈতিক স্থিতিশীলতা আৰু উন্নয়নৰ প্ৰচেষ্টা প্ৰচাৰত অবদান ৰাখিব বুলি কোৱা হৈছে ৷ জাইকাই ভাৰত চৰকাৰৰ সৈতে ক’ভিড-১৯ সংকটৰ প্ৰতিক্ৰিয়া জৰুৰী সমৰ্থন ঋণ হিচাপে ৫০ বিলিয়ন জাপানী য়েন (অনুমানিক ৩৫০০ কোটি টকা) চৰকাৰী উন্নয়ন সহায়ক (অ’ডিএ) প্ৰদানৰ বাবে ভাৰত চৰকাৰৰ সৈতে স্বাক্ষৰ কৰিছে৷ এই অ’ডিএ ঋণ চুক্তিত বিত্ত মন্ত্ৰালয়ৰ অৰ্থনৈতিক বিভাগৰ অতিৰিক্ত সচিব চি এছ মহাপাত্ৰ আৰু জাইকা ইণ্ডিয়াৰ মুখ্য প্ৰতিনিধি কাটছু মাটছুমোটোৱে স্বাক্ষৰ কৰে ৷ উল্লেখ্য যে এই ঋণ হ’ল ভাৰত চৰকাৰলৈ ক’ভিড-১৯ৰ বিৰুদ্ধে যুঁজ কৰিবলৈ আৰু সম্ভৱপৰ সকলোতে সমৰ্থনৰ বাবে জাপানীজ অ’ডিএৰ প্ৰথম বৃহৎ সমৰ্থন ৷