জামুগুৰিহাট : চতিয়া সমষ্টিৰ কুসুমটোলাৰ নিকটৱৰ্ত্তি দীপাটোলাৰ দীপাটোলা খেলাপথাৰৰ চাৰিসীমাৰ দেৱাল নিৰ্মাণৰ আজি আধাৰশিলা স্থাপন কৰা হয়। ২০১৯-২০ বৰ্ষৰ আনটাইট পুঁজিৰ পৰা আৱণ্টন হোৱা দহ লাখ টকাৰ ব্যয়ৰে নিৰ্মাণ হ’ব লগা খেলাপথাৰখনৰ চাৰিসীমাৰ দেৱাল নিৰ্মাণৰ আধাৰশিলা স্থাপন কৰে স্থানীয় বিধায়ক পদ্ম হাজৰিকাই। বিধায়ক হাজৰিকাই আধাৰশিলা স্থাপন কৰি নিজৰ ভাষণ প্ৰসংগত দীপাটোলা অঞ্চলত পূৰ্বৰে পৰা থকা খেলা-ধূলাৰ পৰিবেশ অক্ষুণ্ণ ৰখাৰ ক্ষেত্ৰত খেলাপথাৰখনৰ চাৰিসীমাৰ দেৱাল নিৰ্মাণৰ কাম সম্পূৰ্ণ হৈ উঠিলে আৰু অধিক অনুকূল হৈ পৰিব বুলি উল্লেখ কৰে। ইয়াৰোপৰি চলিত বৰ্ষতেই খেলাপথাৰখনৰ উন্নয়নৰ বাবে আৰু বিশ লাখ টকা আগবঢ়োৱা হ’ব বুলিও উল্লেখ কৰে বিধায়ক হাজৰিকাই। আধাৰশিলা স্থাপন অনুষ্ঠানটিত নদুৱাৰ উন্নয়ন খণ্ডৰ কনিষ্ঠ অভিযন্তা দিব্যজ্যোতি হাজৰিকা, সাতগাঁও উন্নয়ন সমিতিৰ সভাপতি ডম্বৰু নাথ, সমাজকৰ্মী লালন ওৰাং, হোমনাথ ছেত্রীকে ধৰি বিশিষ্ট লোকসকলক উপস্থিত থাকে।

বোকাজান : প্ৰকৃতিৰ মনোৰম নৈসৰ্গিকতাৰে ভৰপূৰ পৰ্য্যটকৰ আকৰ্ষণৰ অন্যতম কেন্দ্ৰবিন্দু কাৰ্বিআংলং জিলাৰ বোকাজান মহকুমাৰ বালিপথাৰৰ টকৌলাংচ জলপ্ৰপাতস্থলিত অস্ত্ৰ-শস্ত্ৰৰে সু-সজ্জিত উগ্ৰপন্থী সদস্যৰ মুক্ত বিচৰণে সমগ্ৰ জিলাখনত তীব্ৰ চাঞ্চল্য সৃষ্টি কৰিছে। যোৱা দেওবাৰে টকৌলাংচ জলপ্ৰপাতথলিত জলকেলি বিনোদন কৰিবলৈ যোৱা এটা স্থানীয় পৰ্য্যটকৰ দল যাত্ৰা পথত হঠাৎ এটা নিষিদ্ধ ঘোষিত উগ্ৰপন্থী সদস্যৰ লগত মুখামুখি হয়। হাতে হাতে মাৰণাঅস্ত্ৰ লৈ কোনো গন্তব্য স্থানলৈ যাত্ৰা কৰি থকা উগ্ৰপন্থী সদস্যসকলে পৰ্য্যটকৰ দলটোৰ কোনো ক্ষতি নকৰি শাৰী শাৰী কৈ গৈ থাকে। এই সমগ্ৰ দৃশ্য পৰ্য্যটকৰ দলটোৰ এজনে নিজৰ মোবাইল কেমেৰাত গোপনে আবদ্ধ কৰি ৰাখে। পৰৱৰ্তী সময়ত এই ভিডিঅ’ ভাইৰেল হৈ পৰাত জিলাবাসীৰ লগতে কাৰ্বিআংলং জিলা আৰক্ষী প্ৰশাসনৰ মাজতো তীব্র চাঞ্চল্য সৃষ্টি হয়। পাহাৰীয়া জিলাখনত উগ্ৰপন্থীৰ বিৰুদ্ধে আৰক্ষীয়ে সততে কঠোৰ স্থিতি গ্ৰহণ কৰি অহা পাছতো দিন দুপৰতে উগ্ৰপন্থীৰ এনে মুক্ত বিচৰণে সকলোকে শংকিত কৰি তুলিছে। উগ্ৰপন্থী সংগঠনৰ মুক্ত বিচৰণৰ দৃশ্য ভাইৰেল হৈ পৰা ঘটনাৰ পাছতে সোমবাৰে ততাতৈয়াকৈ টকৌলাংচত আৰক্ষীৰ এটা উচ্চ স্তৰীয় দল উপস্থিত হৈ ঘটনাস্থলি পৰিদর্শন কৰে। দুৰ্গম অঞ্চলটোত উগ্ৰপন্থীৰ গতি বিধি সম্পৰ্কত আৰক্ষীয়ে গোপন তদন্ত আৰম্ভ কৰিছে। আৰক্ষীৰ এটা সূত্ৰই প্ৰকাশ কৰা মতে ভিডিঅ’টোত থকা উগ্ৰপন্থী সদস্যসকলক কুকি উগ্ৰপন্থী সংগঠনৰ সদস্য বুলি চিনাক্ত কৰা হৈছে। আৰু তেওঁলোকৰ হাতত এম কে ১৬, একে ছিৰিজৰ দৰে অত্যাধুনিক মাৰণাস্ত্ৰ দেখিবলৈ পোৱা গৈছে। উগ্ৰপন্থী সদস্যসকলৰ ভিতৰত ইউপিআৰএফৰ মুখ্য সেনাধ্যক্ষ মাইক গাউতো থকা বুলি আৰক্ষীয়ে প্ৰকাশ কৰে। উল্লেখযোগ্য যে বোকাজান আৰক্ষী থানাৰ অন্তৰ্গত বালিপথাৰ অঞ্চলৰ পৰা ১২ কিলোমিটাৰ সোমাই গলে পয্যটনস্থলি টকৌলাংচ পোৱা যায়। কিছু দুৰ্গম ঠাইত অৱস্থিত টকৌলাংচ লৈ গৰমৰ দিনকেইটাত জলকেলীৰ বাবে শ শ পৰ্য্যটকৰ আগমণ ঘটে। বৰ্তমান শনি-দেওবাৰে সম্পূৰ্ণ লকডাউন্ অব্যাহত থকাত সেই দিন দুটাত টকৌলাংচ জলপ্ৰপাতত শ শ লোকৰ আগমণ ঘটে। উগ্ৰপন্থীৰ এই মুক্ত বিচৰণৰ চাঞ্চল্যকৰ ভিডিঅ’ ভাইৰেল হৈ পৰাৰ পাছতে সম্ভাব্য বিপদ আৰু নিৰাপত্তাজনিত কাৰণত বোকাজান আৰক্ষী প্ৰশাসনে টকৌলাংচ পৰ্য্যটনস্থলি অনিৰ্দিষ্ট কাললৈ বন্ধ কৰি দিয়ে।

দৈনন্দিন বাৰ্তা ডেস্ক : সোমবাৰে মুকলি হ’ল গুৱাহাটী-উত্তৰ গুৱাহাটী সংযোগী ৰ’প ৱে ৷ গুৱাহাটীৰ কাছাৰীৰ পৰা ব্ৰহ্মপুত্ৰৰ উত্তৰ পাৰ সংযোগ কৰিছে এই ৰ’প ৱেই ৷ জিএমডিএৰ তত্ত্বাৱধানত এই ব্যৱস্থা কৰা হৈছে ৷ এই ৰ’প ৱেৰ ফলত গুৱাহাটীৰ পৰা উত্তৰ গুৱাহাটীৰ মাজত দূৰত্ব বহু হ্ৰাস পাব ৷ যিহেতু এই ৰ’প ৱে ১.৮ কিলোমিটাৰ দৈৰ্ঘৰ৷ মন কৰিব লগা যে গুৱাহাটীৰ পৰা উত্তৰ গুৱাহাটীলৈ পাৰাপাৰ হ’বলৈ প্ৰয়োজন হ’ব মাত্ৰ ৭ মিনিট ৷ উল্লেখ্য যে এই ৰ’প ৱে হ’ল ভাৰতৰ ভিতৰতে নহয় এছিয়াৰ ভিতৰতে আটাইতকৈ দীঘল নদী ৰ’প ৱে ৷ গুৱাহাটী মহানগৰী পৰ্যটকৰ আকৰ্ষণ হৈ পৰা এই ৰ’প ৱেৰ জৰিয়তে যাত্ৰীয়ে সুন্দৰ নৈসৰ্গিক আৰু মনোমোহা দৃশ্য উপভোগ কৰিব পাৰিব৷ তদুপৰি উমানন্দ মন্দিৰৰ দৃষ্টিনন্দন দৃশ্যও উপভোগ কৰিব পাৰিব ৷ দুটা কেবিন যুক্ত এই ৰ’প ৱেত এবাৰত ৩৫ জনকৈ যাত্ৰীয়ে যাত্ৰা কৰিব পাৰিব ৷ কিন্তু ক’ৰোনা ভাইৰাছ সংক্ৰমণৰ প্ৰতি লক্ষ্য কৰি এবাৰত ১৫ জন যাত্ৰীয়েহে যাত্ৰা কৰিব পাৰিব ৷ এই যাত্ৰাত যোৱা যাত্ৰীয়ে মাস্ক পিন্ধা বাধ্যতামূলক ৷ ইতিমধ্যে যাত্ৰীৰ নিৰাপত্তাৰ বাবে সকলো ব্যৱস্থা সম্পূৰ্ণ কৰিছে ৷ এই ৰ’প ৱেৰ নিৰ্মাণকাৰী হ’ল সমীৰ দামোদৰ ৰ’প ৱে প্ৰাইভেট লিমিটেড ৷ ব্ৰহ্মপুত্ৰৰ মাজত চাৰিটাকৈ টাৱাৰৰ জৰিয়তে উত্তৰ গুৱাহাটীলৈ এই ৰ’প ৱে সংযোগ কৰা হৈছে ৷ উল্লেখ্য যে মুঠ ৫৬ কোটি টকা ব্যয় হৈছে এই ব্যৱস্থাত ৷ ইয়াৰ চোৱাচিতা কৰিব নিৰ্মাণকাৰী প্ৰতিষ্ঠানটো ৷ সোমবাৰে এই ৰ’প ৱে উদ্বোধনী অনুষ্ঠান আয়োজন কৰা হয় ৷ তদুপলক্ষে আয়োজিত অনুষ্ঠানত ৰাজ্যৰ বিত্ত, গড়কাপ্তানী মন্ত্ৰী ড° হিমন্ত বিশ্ব শৰ্মা, গুৱাহাটী মহানগৰ উন্নয়ন, আইন মন্ত্ৰী সিদ্ধাৰ্থ ভট্টাচাৰ্য আৰু গুৱাহাটী পৌৰনিগম উন্নয়ন প্ৰাধিকৰণৰ অধ্যক্ষ অশোক সিংঘাল উপস্থিত থাকে ৷