নলবাৰী : ভাৰতীয় জনতা পাৰ্টি নলবাৰী জিলা সমিতিৰ উদ্যোগত কালি যোগদান কাৰ্যসূচী শীৰ্ষক অনুষ্ঠান আয়োজন কৰা হয়। এই অনুষ্ঠানত উপ সভাপতি বাঁহজানী ছাত্ৰ সন্থাৰ বিকাশ কৈৱৰ্ত, সাংবাদিক কমল ডেকা, হিন্দু সুৰক্ষা মঞ্চৰ প্ৰচাৰ সম্পাদক কংকন তালুকদাৰসহ নলবাৰী জিলাৰ বহুকেইজন পুৰুষ-মহিলাই ভাৰতীয় জনতা পাৰ্টিত যোগদান কৰে। উল্লেখ্য যে ভাৰতীয় জনতা পাৰ্টি নলবাৰী সমিতিৰ দ্বাৰা আয়োজিত এই যোগদান কাৰ্যসূচীত নলবাৰী জিলাৰ অগপ, কংগ্ৰেছ দলকে বিভিন্ন দল সংগঠনৰ ব্যক্তি সকলে কালি যোগদান কৰে। এই কাৰ্যসূচীত অসম পৰ্যটক বিভাগৰ অধ্যক্ষ তথা ৰাজ্যিক বিজেপিৰ উপ সভাপতি জয়ন্ত মল্ল বৰুৱা, স্থানীয় বিধায়ক অশোক শৰ্মা, ৰাজ্যিক বিজেপিৰ সাধাৰণ সম্পাদক ফনিন্দ্ৰ কুমাৰ শৰ্মাসহ প্ৰমুখ্যে বহুকেইজন বিশিষ্ট ব্যক্তি উপস্থিত থাকে।

নগাঁও : ক’ৰোনা ভাইৰাছ সংক্ৰমণ প্ৰতিৰোধৰ উদ্দেশ্যে দেশজুৰি হোৱা লকডাউনৰ ফলত আৰ্থিকভাবে দুৰ্বল শ্ৰেণীৰ লোকসকলে যথেষ্ট কষ্টৰ মাজত চলিব লগা হৈছে। অন্যান্য ক্ষেত্ৰৰ লগতে নগাঁও জিলাৰ ঐতিহ্যমণ্ডিত ৰণথলীৰ কেঁচা সোণৰ অসমীয়া গহণাৰ থলুৱা শিল্প উদ্যোগবিধ চৰম সংকটৰ সন্মুখীন হৈছে। কেঁচা সোণেৰে অসমীয়া গহণা প্ৰস্তুত কৰি সমগ্ৰ ৰাজ্যতে বিপুল সমাদৰ লাভ কৰা নগাঁও চহৰৰ নিকটবৰ্তি ৰণথলী অঞ্চলৰ স্বৰ্ণশিল্পী সকল লকডাউনৰ ফলত কৰ্ম বিমুখ হৈ পৰে। বিশেষকৈ ক’ৰোনা ভাইৰাছ সংক্ৰমণৰ আশংকা আৰু লকডাউনৰ বাবে এইবাৰ ব’হাগ মাহত বিয়া সবাহ কিম্বা ৰঙালী বিহু উৎসৱ আদি অনুষ্ঠিত কৰিব পৰা নগ’ল। ফলত ৰণথলীৰ কেঁচা সোণৰ উদ্যোগত প্ৰস্তুত কৰা অসমীয়া গহণাৰ বিক্ৰী প্ৰায় বন্ধ হৈ পৰে। থলুৱা কুটিৰ উদ্যোগ সমূহৰ কিছু সকাহ দিয়াৰ উদ্দেশ্যে চৰকাৰে এক বিশেষ আচঁনি হাতত লৈছে। উক্ত আচঁনিৰ অংশ স্বৰূপে কালি নগাঁও সদৰ সমষ্টিৰ বিধায়ক ৰূপক শৰ্মাৰ উদ্যোগত নগাঁও সদৰ সমষ্টিৰ অন্তৰ্গত পাখিমৰীয়া মণ্ডলৰ দেওধৰ পঞ্চায়তত মুখ‍্যমন্ত্ৰী থলুৱা উদ্যোগ বিকাশ আঁচনিৰ অধীনত আৰু নগাঁও জিলা উদ্যোগ, বাণিজ্য কেন্দ্ৰৰ লগতে ৰণথলি স্বৰ্ণ শিল্প উদ্যোগ সমবায় সমিতি লিমিটেডৰৰ সৌজন্যত অঞ্চলটোৰ দুই শতাধিক স্বৰ্ণ শিল্পীক অসমীয়া গহণা নিৰ্মাণত ব্যৱহৃত সোণ-ৰূপৰ কেঁচা সামগ্ৰী বিতৰণ কৰা হয়। স্বৰ্ণ শিল্পী সকলক কেচাঁ সামগ্ৰী বিতৰণ কৰি বিধায়ক ৰূপক শৰ্মাই শৰ্মাই কয় যে অসমীয়া গহণা প্ৰস্তুত কৰি ৰাজ্যবাসীৰ দৃষ্টি আকর্ষণ কৰিবলৈ সক্ষম হোৱা ৰণথলিৰ অসমীয়া গহণাৰ থলুৱা উদ্যোগবিধক আমি ধ্বংস হ’বলৈ এৰি দিৱ নোৱাৰো। ক’ৰোনাভাইৰাছ সংক্ৰমণৰ আশংকাত দেশজুৰি বলবৎ কৰা লকডাউনৰ সময়চোৱাত অসমীয়া গহণা প্ৰস্তুত কৰা এই শিল্প উদ্যোগ বিধ বাৰুকৈয়ে ক্ষতিৰ সন্মুখীন হ’বলগাত পৰে। সেয়ে এনেধৰণৰ শিল্পৰ লগত জড়িত লোকসকলৰ সংকট মোচনৰ বাবে চৰকাৰে এক আচঁনি হাতত লৈছে। “মুখ‍্যমন্ত্ৰী থলুৱা উদ্যোগ বিকাশ” আঁচনিৰ জৰিয়তে এই কুটিৰ শিল্প উদ্যোগ বিধৰ লগত জড়িত সকলক কেঁচা সামগ্ৰী যোগানৰ জৰিয়তে সহায়ৰ হাত আগবঢ়োৱা হৈছে। আমি আশা কৰিছোঁ যে ৰণথলিৰ স্বৰ্ণ শিল্পৰ লগত জড়িতসকলে স্বাবলম্বী হোৱাৰ লগতে স্বৰ্ণ শিল্প উদ্যোগ বাণিজ্যৰে নগাঁৱৰ লগতে সমগ্র ভাৰতবৰ্ষলৈ গৌৰৱ কঢ়িয়াই আনিব। কেঁচা সামগ্ৰী বিতৰণ অনুষ্ঠানত বিধায়ক শৰ্মাৰ লগতে নগাঁও জিলা উপায়ুক্ত যাদৱ শ‌ইকীয়া, নগাঁও জিলা উদ্যোগ-বাণিজ্য কেন্দ্ৰৰ প্ৰবন্ধক অৰূপ ভঁড়ালী আৰু বিষয়া জামাদুল চৌধুৰীও উপস্থিত থাকে।

টিংখাং : নাগৰিকত্ব সংশোধনী আইন বাতিল আৰু কৃষক নেতা অখিল গগৈ, হেমন্ত কোঁৱৰ, শশী শেনছোৱা, দেৱাংগনা কলিতাসহ সকলো কা বিৰোধী কাৰাবন্দীৰ অতিশীঘ্ৰে বিনাচৰ্তে মুক্তিৰ দাবীত টিংখাং সমষ্টিৰ প্ৰাণকেন্দ্ৰ ৰাজগড় শ্বহীদ বেদীৰ সমীপত কালি কৃষক মুক্তি, চাহ শ্ৰমিক মুক্তি, নাৰী মুক্তি সংগ্ৰাম সমিতিৰ উদ্যোগত আৰু টিখাঙৰ কা বিৰোধী মঞ্চৰ সহযোগত মানৱ শৃংখল কাৰ্যসূচী ৰূপায়ণ কৰে। অখিল গগৈ, হেমন্ত কোৱঁৰ, শশী শেনছোৱাকে প্ৰমুখ্যে কৰি কা বিৰোধী সকলো কাৰাবন্দীক মুক্তি দিয়ক, বিজেপি চৰকাৰ হুচিয়াৰ, বিমল বৰা মূৰ্দাবাদ, টিংখাং পুলিচ প্ৰশাসন হুচিয়াৰ, কা আমি নামানো আদি বিভিন্ন শ্লগানেৰে ৰাজগড়ৰ আকাশ বতাহ কপাই তোলে। কালিৰ কাৰ্যসূচীত উপস্থিত থাকে কৃষক মুক্তিৰ নিতুল বৰুৱা, প্ৰমোদ দিহিংগীয়া, পদমেশ্বৰ কোচঁ, ছাত্ৰ মুক্তিৰ মনোজ কোচঁ, নবুল ভৰালী, ৰঞ্জিত ৰানা, শৈলেন গগৈ, চাহ শ্ৰমিক মুক্তিৰ দীপক মাঝি, নাৰী মুক্তিৰ বাসন্তী গগৈ, শ্ৰমিক নেতা বলদেৱ তেলী, কা বিৰোধী মঞ্চৰ সভাপতি যাদৱ গগৈ, চি পি এম এলৰ বিতোপন বকলীয়াল, বলীন্দ্ৰ শইকীয়া, লেঙেৰী আঞ্চলিকৰ ছাত্র মুক্তিৰ বিশ্বজিৎ লাহন, প্ৰাক্তন বিধায়ক অনুপ ফুকন, সমাজ কৰ্মী দূৰ্গাৱতী সোনাৰকে প্ৰমুখ্যে কৰি বহু বিষয়ববীয়া তথা ৰাইজে অংশ গ্ৰহণ কৰে।