দৈনন্দিন বাৰ্তা ডেস্ক : ১৯৮৪ চন বেটচৰ গুজৰাট কেডাৰ আইপিএছ বিষয়া ৰাকেশ আস্তানাই বিএছএফৰ ২৭ তম সঞ্চালক প্ৰধান হিচাপে মঙলবাৰে দায়িত্ব গ্ৰহণ কৰে ৷ যোৱা সোমবাৰে তেওঁক কেন্দ্ৰই বিএছএফৰ নতুন সঞ্চালক প্ৰধান হিচাপে নিযুক্তি দিছিল৷ ইণ্ডো-তিবেট সীমান্ত আৰক্ষী (আইটিবিপি)ৰ প্ৰধান এছ এছ দাসৱালৰ ঠাইত আস্তানাক স্থলাভিষিক্ত কৰা হৈছে, যি ২০২০ চনৰ মাৰ্চৰ পৰা বিএছএফৰ অতিৰিক্ত দায়িত্বত আছিল ৷ তেওঁ বৰ্তমানে দিল্লীৰ চিভিল এভিয়েছন ছিকিউৰিটিৰ মহাপৰিচালক পদত কৰ্মৰত আছিল আৰু মাদকদ্ৰব্য নিয়ন্ত্ৰণ ব্যুৰৰ অতিৰিক্ত দায়িত্বত আছিল৷ আস্তানা চিবিআইৰ বিশেষ সঞ্চালক পদত আছিল ৷ এইজন বিষয়াই আৰজেডিৰ প্ৰধান লালু প্ৰসাদ যাদৱক ১৯৯৭ চনত গ্ৰেপ্তাৰ কৰিছিল ৷

দৈনন্দিন বাৰ্তা ডেস্ক : মধ্য প্ৰদেশৰ মুখ্যমন্ত্ৰী শিৱৰাজ সিং চৌহানে ঘোষণা কৰিছে যে তেওঁৰ ৰাজ্যত চৰকাৰী খণ্ডত নিয়োগৰ ক্ষেত্ৰত কেৱল ৰাজ্যখনৰ যুৱকৰ বাবে সংৰক্ষিত৷ সেয়া নিশ্চিত কৰিবৰ বাবে তেওঁ আইনী পদক্ষেপ ল’ব৷ উল্লেখ্য যে স্বাধীনতা দিৱসৰ ভাষণত ঘোষণা কৰা বিষয়বোৰ কাৰ্যব্যৱস্থা গ্ৰহণৰ বাবে চৌহানে তেওঁৰ মন্ত্ৰী আৰু জ্যেষ্ঠ বিষয়াসকলৰ সৈতে আলোচনা কৰে৷ ‘আমাৰ চৰকাৰে আজি এটা গুৰুত্বপূৰ্ণ সিদ্ধান্ত লৈছে৷ মধ্য প্ৰদেশৰ স্থানীয় যুৱকৰ চৰকাৰী চাকৰি দিবৰ বাবে চৰকাৰে প্ৰয়োজনীয় আইনী পদক্ষেপ গ্ৰহণ কৰিছে৷’ এইদৰে সংবাদ মাধ্যমৰ আগত মুখ্যমন্ত্ৰীজনে কয়৷ স্বাধীনতা দিৱসৰ ভাষণত ১৫ আগষ্টৰ দিনা চৌহানে কৈছিল যে ৰাজ্যখনত চৰকাৰী চাকৰিত স্থানীয় যুৱকক অগ্ৰাধিকাৰ দিব৷ তেওঁ লগতে কয় যে ৰাজ্যৰ লোকসকলে যাতে প্ৰতিটো আঁচনিত পৃথকে পঞ্জীয়ন নকৰে তাৰ বাবে এটা একক ডাটাবেচ প্ৰস্তুত কৰিছে ৷

দৈনন্দিন বাৰ্তা ডেস্ক : চাৰি দিনৰ আগতে কেন্দ্ৰীয় গৃহমন্ত্ৰী অমিত শ্বাহে নিজেই টুইট কৰি জনাইছিল যে তেওঁ ক’ৰোনা নিগেটিভ আৰু সম্পূৰ্ণ সুস্থ ৷ গুৰুগ্ৰামৰ চিকিৎসালয়ৰ পৰা তেওঁ ঘৰলৈ ওভতি গৈছিল ৷ কিন্তু কেন্দ্ৰীয় গৃহমন্ত্ৰী অমিত শ্বাহক সোমবাৰে নিশা দিল্লীৰ অল ইণ্ডিয়া ইনষ্টিটিউট অব মেডিকেল ছায়েন্স (এইমছ)ত ভৰ্ত্তি কৰোৱা হয় ৷ প্ৰাপ্ত সূত্ৰই জনোৱা মতে, যোৱা সন্ধিয়া এখন বেচৰকাৰী চিকিৎসালয়ত পৰীক্ষা কৰোতে অমিত শ্বাহৰ বুকুৰ অসুস্থতা ভোগ কৰে ৷ ইয়াৰ পাচতে তেওঁক এইমছত ভৰ্ত্তি কৰা হয় ৷ প্ৰাথমিক পৰীক্ষাৰ পাচত চিকিৎসকে তেওঁক ২৪ ঘণ্টা পৰ্যৱেক্ষণত ৰখাৰ সিদ্ধান্ত লয় ৷ এইমছৰ তৰফৰ পৰা এক বিবৃতিত কোৱা হৈছে যে যোৱা ৩-৪ দিন ধৰি কেন্দ্ৰীয় গৃহমন্ত্ৰী বিষ আৰু ক্লান্তিজনিত সমস্যাত পৰিছে ৷ ক’ৰোনাৰ পৰৰ্ৱতী চিকিৎসাৰ বাবে তেওঁক ভৰ্ত্তি কৰা হৈছে ৷ যোৱা ২ আগষ্টত অমিত শ্বাহ ক’ৰোনা পৰীক্ষাৰ ৰিপৰ্ট পজিটিভ ধৰা পৰিছিল ৷ তাৰ পাচত তেওঁক দিল্লীৰ গুৰুগ্ৰামৰ মেদান্ত ছুপাৰ স্পেছিয়েলিটি হাস্পতালত ভৰ্ত্তি কৰিছিল ৷

দৈনন্দিন বাৰ্তা ডেস্ক : মালয়েছিয়াত নতুন প্ৰজাতিৰ ভাইৰাছৰ আবিষ্কাৰ হৈছে ৷ মালয়েছিয়াৰ স্বাস্থ্য মন্ত্ৰালয়ৰ মতে ক’ৰোনা ভাইৰাছৰ এই নতুন প্ৰজাতি আক্ষৰিক অৰ্থত ‘ছুপাৰ স্প্ৰেডাৰ’৷ স্বয়ং মালয়েছিয়াৰ স্বাস্থ্য মন্ত্ৰালয়ৰ ডিৰেক্টৰ জেনেৰেল নুৰ হিছাম আব্দুল্লাই যোৱা শনিবাৰে তেওঁৰ ফেচবুকত প’ষ্ট কৰিছে, সদ্য সন্ধান পোৱা ‘ডি৬১৪জি’ নামৰ নতুন প্ৰজাতিৰ ভাইৰাছটো ১০ গুণ বেছি সংক্ৰমণ হয় ৷ কেৱল মালয়েছিয়াতে নহয়, ইউৰোপ, আমেৰিকাতো নতুন এই প্ৰজাতিৰ অস্তিত্ব পোৱা গৈছে বুলি বিজ্ঞানীসকলৰ একাংশই দাবী কৰে৷ অৱশ্যে এই ভাইৰাছক লৈ আতংকিত হোৱাৰ প্ৰয়োজন নাই বুলি বিশ্ব স্বাস্থ্য সংস্থাই কয় ৷ বিশ্ব স্বাস্থ্য সংস্থাৰ মতে এই ভাইৰাছ বহু বেছি সংক্ৰামক ৷ মালয়েছিয়াৰ স্বাস্থ্য মন্ত্ৰালয়ে দাবী কৰে যে অন্তত দুটা ক্লাষ্টাৰত ‘ডি৬১৪জি’ সংক্ৰমণ পোৱা গৈছে ৷ তাৰ মাজত সম্প্ৰতি ভাৰতৰ পৰা ঘূৰি অহা মালয়েছিয়াৰ ৰেস্তোৰাৰ মালিক আছে ৷ ফিলিপাইন ভ্ৰমণ কৰা দুজন লোক এই নতুন প্ৰজাতিত সংক্ৰমিত হৈছে বুলি তেওঁ দাবী কৰে ৷ বিশ্ব স্বাস্থ্য সংস্থাই নতুন বিপদৰ গোন্ধ পাইছে ভাৰতসহ কেইখনমান দেশত ৷ মালয়েছিয়া প্ৰশাসনে দেশবাসীক উদ্দেশ্য কৰি কয়, এই ভাইৰাছৰ পৰিৱৰ্তিত প্ৰজাতিৰ সংক্ৰমণৰ পৰা বাচিবলৈ অধিক সচেতন হ’ব লাগিব ৷