উজনি-মাজুলী : ক’ভিড-১৯ প্ৰট’কল অনুসৰণ কৰি মাজুলী জিলাতো দেশৰ ৭৪ সংখ্যক স্বাধীনতা দিৱস উদযাপনৰ বাবে মাজুলী জিলা প্ৰশাসনে প্ৰস্তুতি আৰম্ভ কৰিছে। এই সন্দৰ্ভত বুধবাৰে মাজুলীৰ উপায়ুক্ত কাৰ্যালয়ৰ সভাকক্ষত জিলাখনৰ নাগৰিক সমাজৰ প্ৰতিনিধিত্বকাৰী বিভিন্ন দল-সংগঠনৰ প্ৰতিনিধি আৰু চৰকাৰী বিভাগসমূহৰ মুৰব্বীসকলক লৈ জিলা প্ৰশাসনে এখন বৈঠক অনুষ্ঠিত কৰে। উপায়ুক্ত বিক্ৰম কৈৰীৰ অধ্যক্ষতাত আয়োজিত এই বৈঠকত মাজুলী জিলা পৰিষদৰ মুখ্য কাৰ্যবাহী বিষয়া নৰনাৰায়ণ নাথ, আৰক্ষী অধীক্ষক অপৰ্ণা নটৰাজন, অতিৰিক্ত উপায়ুক্ত নৰেণ দাস, ৰাজহ চক্ৰ বিষয়া অচ্যুৎ বৰুৱাৰ লগতে জিলা প্ৰশাসনৰ একাধিক কাৰ্যবাহী দণ্ডাধীশেও অংশগ্ৰহণ কৰে। ক’ভিড-১৯ অতিমাৰীৰ পৰিপ্ৰেক্ষিতত ৰাজ্য চৰকাৰে আগবঢ়োৱা স্বাধীনতা দিৱস উদযাপন সম্পৰ্কীয় বিশেষ নীতি-নিৰ্দেশনাৰ আধাৰত জিলা সদৰ গড়মূৰৰ কাছাৰী ময়দানত ১৫ আগষ্টত অনুষ্টুপীয়া কাৰ্যসূচীৰে এইবেলি স্বাধীনতা দিৱসৰ মাজুলী জিলাস্তৰীয় অনুষ্ঠান আয়োজনৰ ব্যৱস্থা কৰা হৈছে।

নলবাৰী : প্ৰাকৃতিক দুৰ্যোগ প্ৰসমন আইন উলংঘন কৰা অভিযোগৰ ভিত্তিতে আজি জনপ্ৰতিনিধিৰ লগতে প্ৰশাসনৰ বিৰুদ্ধে নলবাৰীত দাখিল কৰা হ’ল গোচৰ। প্ৰাকৃতিক দুৰ্যোগ প্ৰসমন আইন উলংঘন কৰা বাবে নলবাৰীৰ বিধায়ক অশোক শৰ্মা, পৰ্যটন নিগমৰ অধ্যক্ষ জয়ন্ত মল্ল বৰুৱাৰ বিৰুদ্ধে গোচৰ দাখিল কৰিলে। নলবাৰী সদৰ থানাত এই গোচৰ দাখিল কৰিলে নলবাৰী জিলা কংগ্ৰেছ কমিটীয়ে। উল্লেখযোগ্য যে কালি পুৱা নলবাৰীত অশোক শৰ্মাৰ উদ্যোগত খাৰজাৰা দুধনাথ আশ্ৰমত অনুষ্ঠিত হৈছিল ৰাজহুৱা বিষ্ণু যজ্ঞ আৰু সন্ধিয়া জয়ন্ত মল্ল বৰুৱাৰ নেতৃত্বত হৈছিল সামূহিক বন্তি প্ৰজ্বলন। দুয়োটা অনুষ্ঠানত বহু মানুহৰ সমাগম হৈছিল আৰু কভিড সংক্ৰমণ ৰোধ কৰাৰ নীতি-নিৰ্দেশনাবোৰ উলাই কৰিছিল। কভিড সংক্ৰমণ ৰোধৰ নীতি-নিয়ম পালন নকৰাৰ অভিযোগ উত্থাপন কৰিছে নলবাৰী জিলা কংগ্ৰেছে। নলবাৰী জিলা কংগ্ৰেছৰ সাধাৰণ সম্পাদক দিব্যজোতি হালৈয়ে এই অভিযোগ উত্থাপন কৰি আজি নলবাৰী সদৰ থানাত গোচৰ দাখিল কৰে। তদুপৰি কালিৰ এই অনুষ্ঠানত যদি নলবাৰী জিলা আৰু আৰক্ষী অধীক্ষকে যদি অনুমতি প্ৰদান কৰিছিল তেন্তে বিধায়ক অশোক শৰ্মা আৰু পৰ্যটক বিভাগৰ অধ্যক্ষ জয়ন্ত মল্ল বৰুৱাই মুখ্য সচিবে জাৰি কৰা নিয়ম উলংঘা কৰাৰ সময়ত কিয় চকু দিয়া নাছিল আৰু যদি জিলা উপাযুক্ত আৰু আৰক্ষী অধীক্ষকে অনুমতি দিয়া নাছিল তেন্তে জিলা প্ৰশাসনৰ নাকৰ তলত কেনেকৈ এই অনুষ্ঠান আয়োজন কৰিলে বুলি কংগ্ৰেছ কমিটিৰ সাধাৰণ সম্পাদক গৰাকীয়ে প্ৰশ্ন উত্থাপন কৰে।

হোজাই : হোজাই জিলাৰ ডবকা সমবায় সমিতিৰ কাৰ্য্যালয়, লংকা দগাঁও আৰু হোজাই জন কল্যাণ সমবায় সমিতিত মঙলবাৰে অতৰ্কিতে অসম আৰক্ষীৰ অৰ্থনৈতিক অপৰাধ শাখাৰ পাচজনীয়া এটি দলে অভিযান চলায় বিভিন্ন নথিপত্ৰ জব্দ কৰা ঘটনাই জিলাখনত চাঞ্চল্যৰ সৃষ্টি কৰিছে৷ গুৱাহাটীৰ পৰা অৰ্থনৈতিক অপৰাধ শাখাৰ এগৰাকী উপ আৰক্ষী অধীক্ষকৰ নেতৃত্বত চলা এই দলটিত কেইবাজনো যোগান বিভাগৰ বিষয়াও আছিল৷ দলটিয়ে সমবায় সমিতিৰ গুদাম ঘৰৰ উপৰিওঁ কাৰ্য্যালয়ৰ বিভিন্ন নথি পত্ৰওঁ পৰীক্ষা কৰে৷ বহু কেইজন সমবায় এজেন্টক, সুলভ মূল্যৰ দোকানীক দলটিয়ে সোধপোচো কৰে৷ অৱশ্যে দলটিৰ এই অভিযান কালত কাকো আটক কৰা নাই যদিওঁ তদন্তৰ বাবে বহু নথি পত্ৰ জব্দ কৰি গুৱাহাটী লৈ যায়৷ সংবাদ মাধ্যমৰ আগত অৰ্থনৈতিক অপৰাধ অনুসন্ধান শাখাৰ দলটিয়ে মুখ খোলা নাই যদিও আমাৰ ফালৰ পৰা চলোৱা অনুসন্ধানত লক ডাউনৰ সময়ত চৰকাৰে দুখীয়া লোকৰ বাবে আবন্টন দিয়া প্ৰধান মন্ত্ৰী গৰীব যোজনাৰ চাউল তথা অন্যান্য চৰকাৰী আঁচনিৰ চাউল বিতৰণত বহু সুলভ মূল্যৰ দোকানী, এজেন্ট সকলে ব্যাপক খেলিমেলি কৰাৰ অভিযোগ উত্থাপিত হৈ আহিছে৷ তাৰোপৰি বহু এজেন্ট, সুলভ মূল্যৰ দোকানীয়ে নিৰ্ধাৰিত পৰিমাণতকৈ কম পৰিমাণে চাউল দুখীয়া লোকক দিয়াৰ অভিযোগ উত্থাপিত হৈছিল৷ এই সমস্ত অভিযোগৰ ভিত্তিত দলটিয়ে অভিযান চলোৱা বুলি জানিব পৰা গৈছে৷ এই অভিযান কালত দলটিক হোজাই জিলাৰ যোগীন বিভাগৰ পৰিদৰ্শক নেগীব খনেও সহযোগ আগবঢ়ায়৷

উজনি-মাজুলী : অসমৰ জনপ্ৰিয় তথা ব্যতিক্ৰমী ফেচবুক পেজ ৰুমাল লাইভে মাজুলীৰ বানপীড়িত ৰাইজৰ মাজত কিছু পৰিমাণে সাহাৰ্য দিয়াৰ বাবে প্ৰস্তুতি চলাইছে। কালি মাজুলী “সোনাৰিআটী চাৰিআলিৰ পৰা আৰম্ভ কৰি গড়মূৰ, কমলাবাৰীকে আদি কৰি বিভিন্ন ঠাইৰ পৰা ৰুমাল লাইভৰ মাজুলী জিলাৰ কৰ্মীসকলে বান সাহায্যৰ বাবে এক কাৰ্যসূচী গ্ৰহণ কৰে। ৰুমাল লাইভৰ কাৰ্য্যসূচীলৈ অসম তথা ভাৰতৰ বিভিন্ন প্ৰান্তৰ পৰা বিভিন্নজন লোকে সহায়-সহযোগিতা আগবঢ়াইছে লগতে তেখেত সকলৰ তৰফৰ পৰা সকলো ৰাইজলৈ আহ্বান জনাইছে সকলো অনুষ্ঠান-প্ৰতিষ্ঠানে যাতে এই বান সাহাৰ্য অভিযানত সহায় সহযোগিতা আগবঢ়ায়। উল্লেখযোগ্য যে জুবিন গাৰ্গৰ আদৰ্শেৰে পৰিচালিত এই ফেচবুক পেজটোৱে বিগত সময়ত বিভিন্ন সামাজিক কামৰ লগত জড়িত হৈ আহিছে।

দৈনন্দিন বাৰ্তা সেৱা, জামুগুৰিহাট : মহামাৰী ক’ভিড-১৯ৰ বাবেই দেশৰ অন্যান্য প্ৰান্তৰ লগতে অসমৰ বজাৰ সমাৰকে আদি কৰি সকলো চৰকাৰী বেচৰকাৰী অনুষ্ঠান প্ৰতিষ্ঠান বন্ধ হােৱাৰ সময়তে বি পি চি এলৰ এল পি জি প্লান্ট,এল পি জি বিতৰক আৰু ডেলিভাৰী বয় আদিয়ে অসমৰ ৰাইজৰ কাৰনে ক’ৰনা মহামাৰিক প্ৰত্যাহ্বান স্বৰূপে লৈ নিৰলস ভাবে কাম কৰি আহিছে। শোণিতপুৰ জিলাৰ জামুগুৰিহাটস্থিত বসুন্ধৰা গেছ এজেঞ্চীয়েও গ্ৰাহকৰ সুবিধাৰ্থে প্ৰায় সকলোবোৰ ব্যৱস্থা গ্ৰহণ কৰিছে। এজেঞ্চীটোৰ স্বত্বাধিকাৰী সত্যব্ৰত বৰুৱাই জানিবলৈ দিয়ামতে বত্তৰ্মান সময়ত ক’ভিড ১৯ৰ কাৰনে কোনো গ্ৰাহকে চিলিণ্ডাৰ লোৱাৰ সময়ত নগদ ধনৰ পৰিবৰ্ত্তে নগদ বিহীন ভাবে মূল্য পৰিশোধ কৰি চিলিণ্ডাৰ সংগ্ৰহ কৰিবলৈ এটা হোৱাটচ ৱাপ নম্বৰ ব্যৱহাৰ কৰা হৈছে বুলি জানিবলৈ দিছে লগতে তেওঁ তিনি ছাৰিটাকৈ হোৱাট ৱাপ গ্ৰুপ খুলি গ্ৰাহক সকলক এই বিষয়ে অৱগত কৰি অাহিছে। এটা বুটাম টিপিয়েই গ্ৰাহক সকলে অতি সহজতে এল পি জি বুক কৰাৰ লগতে অনলাইনযোগে মূল্য পৰিশোধ কৰিব পৰাকৈ হোৱাটচ্ আপত অতি উপযোগীকৈ এটা নম্বৰৰ ব্যৱস্থা কৰা হৈছে বুলি জানিবলৈ দিয়ে।এই নম্বৰৰ পৰা চিলিণ্ডাৰ ডেলিভাৰি বৰ্ত্তমান কোন পৰ্য্যায়ত অাছে, চিলিণ্ডাৰৰ মুল্য ,সুৰক্ষা সৰ্ম্পকীয় ভি ডিঅ পৰিবেশন, গ্ৰাহকৰ প্ৰতিক্ৰিয়া জনোৱা তথ্য পৰামৰ্শ অাগবঢ়োৱা ইত্যাদি কিছুমান অতিৰিক্ত সুবিধা হোৱাটচ অাপত উপলব্ধ কৰা বুলিও উল্লেখ কৰে। ক’ভিড-১৯ আতংকই বিৰাজ কৰি থকাৰ সময়তে জামুগুৰিহাটৰ বসুন্ধৰা গেছ এজেঞ্চীৰ চিলিণ্ডাৰ সংগ্ৰহ কৰিবলৈ হলে ১৮০০২২৪৩৪৪ নম্বৰত hello লিখি হোৱাটচ ৱাপত মেচেজ পঠাই দিয়াৰ পাছতে উল্লেখিত সেৱা সমুহ লাভ কৰিব পাৰিব বুলি স্বত্বাধিকাৰী গৰাকীয়ে জানিবলৈ দিয়ে। তেওঁ প্ৰকাশ কৰা মতে হোৱাটচ্ আপৰ উপৰিও অান বহুতো নতুন ডিজিটেল সেৱা অসমৰ ভাৰত গেছৰ গ্ৰাহক সকলৰ বাবে উপলব্ধ কৰিছে, এইক্ষেত্ৰত আমেজন পেই(Amazonpay), জিপেই (Gpay), পেই টি এম (paytm), ফোনেপেই (Phonepe), ইউ পি আই (Upi) ইত্যাদি। উল্লেখ্য যে বৰ্ত্তমানে চলি থকা অাঁচনিৰ অন্তৰ্গত বি পি চি এলে ৬.২৭ লাখ মানুহক বিনামূলীয়া চিলিণ্ডাৰৰ যোগান ধৰিছে। এই সংখ্যাৰ মুঠ হিতাধিকাৰী প্ৰায় ৯৩% (শতাংশ)। অতি দূৰৈৰ পিছপৰা গাওঁৰ গ্ৰাহক সকলে যাতে ঘৰতে চিলিণ্ডাৰ পায় তাৰ কাৰনে গাও পৰ্য্যায়ৰ প্ৰতিষ্ঠানৰ সহযোগত নিয়মীয়াকৈ চিলিণ্ডাৰ বিতৰণৰ ব্যৱস্থা কৰিছে। অত্যাৱশ্যকীয় সামগ্ৰী যোগানধাৰী হিচাপে ভাৰত পেট্ৰলিয়ামৰ অকল বসুন্ধৰা গেছ এজেঞ্চীয়েই নহয় অসমৰ প্ৰতিটো এজেঞ্চীৰ লগতে এন আৰ এলৰ প্লান্টৰ উপৰিও এই ব্যৱস্থাৰ লগত জড়িত প্ৰতি জন কৰ্ম কৰ্তাৰ সজাগতাৰ ক্ষেত্ৰত বি পি চি এলে গুৰুত্ব দিয়াৰ লগতে কিবা কাৰনত যদি এই ব্যৱস্থাত জড়িত কাৰোবৰ ক’ভিড ১৯ত আক্ৰান্ত হয় তেতিয়া সেই ব্যক্তিৰ কাৰনে বি পি চি এল কোম্পানীয়ে ভাৰত অাৰোগ্য যোজনাৰ লগতে এক্সগ্ৰেছিয়া অাঁচনিৰ ব্যৱস্থা কৰিছে বুলি এটা প্ৰেছ বিজ্ঞপ্তিৰ জড়িয়তে জানিবলৈ দিছে। উল্লেখ্য যে লকডাউনৰ সময় ছোৱাত পৰিবহন অাৰু বিতৰণৰ ক্ষেত্ৰত সমস্যা আহিছে যদিও বি পি চি এল কোম্পানীৰ প্ৰতিজন গ্ৰাহকে যাতে নিয়মিত ভাৱে চিলিণ্ডাৰ পাই তাৰ ওপৰত অধিক গুৰুত্ব দি অাহিছে চেলচ অফিচাৰ দেৱাশিস ডেই। অকল ক’ৰণা মহামাৰিয়েই নহয় অসমৰ প্ৰধান সমস্যা বিধ্বংসী বানত জুৰুলা হোৱা ৰাইজকো বিপিচিএলৰ ডেলিভাৰি বয় সকলে নাৱৰে হলেও চিলিণ্ডাৰৰ সেৱা অাগবঢ়াই অাহিছে।নতুন প্ৰযুক্তিৰ প্ৰয়োগৰে নতুন নতুন উদ্ভাবনাৰে গ্ৰাহক সকলক উত্তম সেৱা অাগবঢ়োৱাৰ ক্ষেত্ৰত বি পি চি এলেই পথ প্ৰদৰ্শক বুলি উল্লেখ কৰিব পাৰি।এই দুৰ্যোগৰ সময়ত বি পি চি এলৰ এজেঞ্চী সমুহে স্বাভাৱিক ভাবেই সেৱা অাগবঢ়াইছে।লগতে কোম্পানীটোৱে গেছ চিলিণ্ডাৰ বুকিং,সময়মতে গেছ যোগান ধৰা,নগদ বিহীন ভাবে মূল্য পৰিশোধ কৰা,গ্ৰাহকৰ প্ৰতিক্ৰিয়াৰ খবৰ লোৱা আৰু যোগাযোগ ৰখা ইয়াৰ উপৰিও সুৰক্ষা সম্পৰ্কে অৱগত কৰা ইত্যাদি কাৰ্য্য সমুহো কৰি অহিছে।