দৈনন্দিন বাৰ্তা ডেস্ক : চীনৰ বিৰুদ্ধে পুনৰ পদক্ষেপ ল’লে ভাৰতে৷ ইয়াৰ আগতে ভাৰতে চীনৰ এপ নিষিদ্ধ কৰিছিল৷ এইবাৰ চীনৰ ৰঙীন টেলিভিছন আমদানিৰ ওপৰত বিধিনিষেধ আৰোপ কৰিলে ভাৰতে৷ ইয়াৰ লগে লগে চীনৰ ব্যৱসায়ৰ ওপৰত প্ৰভাৱ পৰাটো নিশ্চিত হৈ পৰিছে৷ তদুপৰি বিদেশী পণ্য আমদানি কমাই ভাৰতীয় পণ্যৰ উৎপাদন আৰু চাহিদা বাঢ়িব৷ তাৰ লগতে প্ৰধানমন্ত্ৰী নৰেন্দ্ৰ মোডীৰ স্বপ্ন আত্মনির্ভৰ ভাৰত হোৱাত সফল হ’ব৷ ডিৰেক্টৰ জেনেৰেল অব ফৰেইন ট্ৰেড (ডিজিএফটি)ৰ এক বিজ্ঞপ্তিত কোৱা হৈছে যে ৰঙীন টিভি আমদানি নীতি সংশোধন কৰা হৈছে৷ আগতে টেলিভিছন আমদানিৰ বাবে কোনো লাইচেন্সৰ প্ৰয়োজন নাছিল৷ এইবাৰ ডিজিএফটিৰ পৰা এই বিষয়ত অনুমতি ল’ব লাগিব৷ অৱশ্যে কিহৰ ভিত্তিত অনুমতি দিয়া হ’ব সেয়া স্পষ্ট নহয়৷ ৩৬ ইঞ্চিৰ পৰা ১০৫ ইঞ্চি স্ক্ৰীণৰ ৰঙীন টিভিৰ ক্ষেত্ৰত এই নিষেধাজ্ঞা  জাৰি কৰা হৈছে৷ এই বিধিনিষেধৰ আওতাত আছে ৬৩ চেণ্টিমিটাৰৰ তলৰ এলচিডি টিভিও৷ উল্লেখ্য যে ভাৰতে সকলোতকৈ বেছি ৰঙীন টিভি চীনৰ পৰা আমদানি কৰে৷ ২০১৯-২০ বিত্তীয় বছৰত ৭৮১ মিলিয়ন ডলাৰৰ ৰঙীন টিভি ভাৰতে আমদানি কৰিছিল৷ চীনৰ পৰা ২৯৩ মিলিয়ন ডলাৰৰ ৰঙীন টিভি আমদানি কৰিছিল ৷

দৈনন্দিন বাৰ্তা ডেস্ক : কেন্দ্ৰীয় চৰকাৰৰ চূড়ান্ত সিদ্ধান্ত দিবলৈ বাকী যদিও আসন্ন আইপিএলৰ বাবে সকলো কথাই হৈ গৈছে৷ সংযুক্ত আৰৱ আমিৰশ্বাহিত অহা ১৯ ছেপ্টেম্বৰৰ পৰা আৰম্ভ হ’ব এই মেগা টুৰ্ণামেণ্ট৷ ফাইনেল খেলখন ৮ বা ১০ ছেপ্টেম্বৰত হ’ব৷ দেওবাৰে আইপিএলৰ গভৰ্ণিং কাউন্সিলৰ সভাত সূচীসহ বাকী বিষয় চূড়ান্ত হোৱাৰ কথা৷ আইপিএলৰ সভাপতি ব্ৰিজেছ পেটেলে জনোৱা মতে এই মেগা টুৰ্ণামেণ্ট ডুবাই, শ্বাৰজাহ আৰু আবুধাবিত অনুষ্ঠিত হ’ব৷ ৮টা ফ্ৰেঞ্চাইজিৰ লগত শনিবাৰে সভা হোৱাৰ পাছত কেতবোৰ কথা পৰিষ্কাৰ হ’ব৷ ইয়াত সবাতোকৈ ডাঙৰ বিষয় হ’ল ক্ৰিকেটাৰসকলৰ স্বাস্থ্য৷ যাৱতীয় স্বাস্থ্য বিধি মানিয়ে আইপিএল আয়োজন কৰা হ’ব৷ জানিব পৰা মতে আঠটা ফ্ৰেঞ্চাইজিয়ে আমিৰশ্বাহিত যাৱতীয় সুৰক্ষা খুঁটিনাটি মাৰি চাব৷ ক্ৰিকেটাৰসকলৰ নিৰাপত্তাৰ বাবে কেতবোৰ বিষয়ত গুৰুত্ব আৰোপ কৰা হৈছে৷ তাৰ ভিতৰত আছে কোৱাৰেণ্টাইন বিধি৷ ডুবাইৰ বৰ্তমান স্বাস্থ্যবিধি মতে ক’ভিড নিগেটিভ ৰিপৰ্ট দেখুৱাব পাৰিলে কোৱাৰেণ্টাইনত থকাৰ প্ৰয়োজন নাই৷ কিন্তু ৰিপৰ্ট নাথাকিলে পৰীক্ষা হ’ব৷ আনহাতে ক্ৰিকেটাৰসকলে দেশ এৰাৰ আগতে দুবাৰ ক’ৰোনা পৰীক্ষা হ’ব৷ ডুবাই পোৱাৰ পাছত আকৌ দুবাৰ পৰীক্ষা হ’ব৷ ক্ৰিকেটাৰৰ উপৰি ছাপৰ্ট ষ্টাফ আৰু আনসকলৰ ৰিপৰ্ট বাধ্যতামূলক৷ তদুপৰি প্ৰতিটো ফ্ৰেঞ্চাইজিয়ে তেওঁলোকৰ ক্ৰিকেটাৰৰ বাবে জৈৱ সুৰক্ষা বলয় তৈয়াৰ কৰিব লাগিব৷ সীমিত সংখ্যক ব্যক্তিৰ বাদে আন কাৰো লগত দেখা বা কথা পতা নিষিদ্ধ৷ ইয়াৰ উপৰি যিসকলে আইপিএল খেলিবলৈ আমিৰশ্বাহি যাব, তেওঁলোকে প্ৰত্যেকে ডিএক্সবি এপ ডাউনলড কৰি ল’ব লাগিব৷ ই এটা আৰোগ্য সেতু এপৰ দৰে৷ ইয়াত সামাজিক দূৰত্ব বিধিৰ উপৰি যাৱতীয় নিয়ম দেখুওৱা থাকিব৷ ফ্ৰেঞ্চাইজিবোৰে নিজেই হোটেলৰ ব্যৱস্থা কৰিব লাগিব৷ ভাৰতীয় ক্ৰিকেট ব’ৰ্ডে এই ক্ষেত্ৰত ফ্ৰেঞ্চাইজিবোৰক সহায় কৰিব৷ তদুপৰি ড্ৰেচিং ৰোমত একেলগে ১৫ জনৰ বেছি ক্ৰিকেটাৰ থাকিব নোৱাৰিব৷

✍ ভিকি শৰ্মা

সমগ্ৰ বিশ্বতে ক’ৰোনাৰ ভয়ংকৰ ত্ৰাসৰ ফলত ক্ষতিগ্ৰস্ত হৈছে ভিন্ন ক্ষেত্ৰত জড়িত ব্যক্তিৰ জীৱন জীৱিকা। সমান্তৰালকৈ অসমীয়া চলচ্চিত্ৰ উদ্যোগৰ দৰে বলিউড উদ্যোগটিয়েও চৰকাৰে বান্ধি দিয়া ল’কডাউন তিনি মাহ ধৰি ঘৰতেই আৱদ্ধ হৈ থকাৰ পৰিস্থিতিৰ উদ্ভৱ হ’ল। কিন্তু ক্ৰমান্বয়ে যেন বলিউড উদ্যোগটিৰ ক্ষেত্ৰত কিছু শিথিলতা আহি পৰিছে যাৰ বাবে বিভিন্ন ছবিৰ চিত্ৰগ্ৰহণৰ কাম আৰম্ভ কৰা এক পৰিকল্পনা হাতত লৈছে নিৰ্মাতা সকলে। যদিওবা তেওঁলোকে ছবিসমূহ চিত্ৰগ্ৰহণ কৰিব পাৰিব তথাপি মানি চলিব লাগিব ক’ৰোনা ভাইৰাছৰ প্ৰতিৰোধৰ নিয়মাৱলী, যি নিয়মাৱলী তৈয়াৰ কৰিছে উদ্যোগটিক পুনৰ সজীৱ কৰাৰ ক্ষেত্ৰত FCWI আৰু উদ্যোগটিৰ সৈতে জড়িত প্ৰতিনিধি সকলে। উদাহৰণ স্বৰূপে ৬৫ বছৰৰ ঊৰ্দ্ধৰ যি সকল অভিনয় শিল্পী তেওঁলোকক চিত্ৰগ্ৰহণ স্থলীলৈ অহা নিষেধাজ্ঞা আৰোপ কৰিছে। লগতে চুম্বন বা অতিৰঞ্জিত ৰোমাঞ্চিত দৃশ্য সমূহ আঁতৰাবলৈও নিৰ্দ্দেশ জাৰি কৰিছে সামাজিক ব্যৱধান মানি চলি। তাৰোপৰি সকলো অভিনয় শিল্পীয়ে স্বগৃহতে ৰূপ-সজ্জাৰ সকলো যাৱতীয় কাম-কাজ কৰি আহিব লাগিব দৃশ্যগ্ৰহণ স্থলীলৈ। সকলো ছবিৰে নিৰ্মাতাসকলে দৃশ্যগ্ৰহণৰ সময়ত কৰ্মৰত সদস্য সমূহক ১২ ঘন্টাৰ ভিতৰত চাৰিখনকৈ মাস্ক প্ৰদান কৰাটো বাধ্যতামূলক কৰি দিয়া হৈছে। প্ৰতিটো দৃশ্যগ্ৰহণ স্থানত উপলদ্ধ থাকিব লাগিব এম্বুলেন্স, চিকিৎসক আৰু নাৰ্ছ। ইতিমধ্যে এই সকলো ১৬ পৃষ্ঠা যোৰা নিয়মাৱলী কেন্দ্ৰীয় চৰকাৰলৈ প্ৰেৰণ কৰিছে FCWI য়ে আৰু সেই অনুপাতে এই মাহৰ শেষৰ পিনে এই সকলোবোৰ নিয়ম পালন কৰি শিল্পীসকলে চিত্ৰগ্ৰহণ কৰাৰ এক সম্ভৱনা প্ৰকট হোৱা দেখা গৈছে। ইতিমধ্যে অভিনেতা অনিল কাপুৰে তেওঁৰ আহিবলগীয়া ছবিৰ বাবে ফটোশ্বুট কৰাৰ কথাও পোহৰলৈ আহিছে। এইপিনে সদা ব্যস্ত অভিনেতা খিলাড়ী কুমাৰ অৰ্থ্যাৎ অক্ষয় কুমাৰে তেওঁৰ আহিবলগীয়া ছবি বেল বুট’মৰ দৃশ্যগ্ৰহণৰ কামত চলিত মাহৰ শেষ ভাগত ব্যস্ত হ’ব বুলি সদৰী কৰিছে। জানিবলৈ পোৱা মতে অক্ষয় কুমাৰ আৰু তেওঁৰ দলটিয়ে অহা সপ্তাহত স্কটলেণ্ডলৈ ৰাওনা হ’ব তেওঁৰ ব্যক্তিগত জেটেৰে যিহেতু আন্ত:ৰাষ্ট্ৰীয় বিমান সেৱা বন্ধ হৈ আছে। যেনেকৈ নহওঁক কিয় অক্ষয় কুমাৰে নিজৰ অনুৰাগীসকলক মনোৰঞ্জন প্ৰদানৰ হেতু চেষ্টা অব্যাহত ৰাখিছে সংকটময় পৰিস্থিতিৰ মাজতো। ছবিখনৰ পৰিচালক ৰঞ্জিত এম তিৱাৰীয়ে সংবাদ মাধ্যমত প্ৰকাশ কৰিছে যে সকলো ধৰণৰ সাৱধনতা অৱলম্বন কৰিয়ে ছবিৰ চিত্ৰগ্ৰহণৰ কাম কৰা হ’ব। বেল বুট’মৰ উপৰিও অক্ষয় কুমাৰ অভিনীত তথা ৰোহিত চেট্টী পৰিচালিত সৌৰবংশী দেশৰ সাম্প্ৰতিক পৰিস্থিতিৰ বাবে মুক্তিৰ দিন পিছুৱাই এই বৰ্ষৰ দীপাৱলীত চিত্ৰগৃহলৈ অহাৰ এক সিদ্ধান্ত হাতত লৈছে। লগতে প্ৰতিখন ৰাজ্যৰ ছবিগৃহ সমূহ ৪-৫ মাহ ধৰি বন্ধ হৈ থকাৰ ফলশ্ৰুতিতে বাৰুকৈয়ে ক্ষতিগ্ৰস্ত হৈছে চলচ্চিত্ৰ উদ্যোগটি। যাৰ বাবে উদ্যোগটিৰ লগতে ছবিগৃহত কৰ্মৰত কৰ্মীসকলৰ জীৱনলৈ দুৰ্বিহ নামি পৰিছে। কাৰণ এইদৰে থাকিলে ছবি উদ্যোগটি বহুখিনি পিছুৱাই যাব। এই কথাৰ ওপৰত লক্ষ্য ৰাখি বিভিন্ন নিয়মাৱলীৰ মাজেৰে অহা আগষ্ট মাহত পুনৰ ছবিগৃহ সমূহ খোলাৰ এক পৰিকল্পনা হাতত লৈছে। আই.বিৰ সম্পাদক অমিত খাৰে জনাইছে যে গৃহ মন্ত্ৰালয়ৰ সম্পাদক অজয় ভাল্লাই ইয়াৰ ওপৰত চূড়ান্ত সিদ্ধান্ত প্ৰকাশ কৰিব অচিৰেই। সামাজিক ব্যৱধান মানি চলি চিনেমা হ’ল সমূহ আগষ্ট মাহৰ ভিতৰত খোলাৰ সম্ভাৱনা অধিক।

✍ জিতু দাস

চলিত বিত্তীয় বৰ্ষত ভাৰতৰ এনিডএ নেতৃত্বাধীন চৰকাৰৰ বৃত্তমন্ত্ৰী নিৰ্মলা সীতাৰমণৰ মুখত আখৈ ফুটাদি ফুটিল ২০ লাখ কোটি টকাৰ এটি বৃহৎ পেকেজ। পেকেজ মানে সাহাৰ্য্য নহয়, এয়া সৰু সুৰা লঘু উদ্যোগ সমূহক পুনৰুজ্জীৱিত কৰাৰ বাবে ঋণ প্ৰদান প্ৰক্ৰিয়াহে। লকডাউনে মূৰত কোব মৰা সাধাৰণ ব্যৱসায়ীসকলৰ এই ঋণ কিমান গণতান্ত্ৰিক হ’ব সময়ত গম পোৱা যাব। যিটো সময়ত সকলোবোৰ ব্যৱসায়ী প্ৰতিষ্ঠান ধ্বংসৰ গৰাহত, দোকান পোহাৰ বন্ধৰ ফলতো মালিক পক্ষক ভাড়া দিবলগীয়া হৈছে, বেংকৰ পূৰ্বৰ ৠণ পৰিশোধ কৰিব পৰা টান হৈছে তাতেই আকৌ ইমান ডাঙৰ পেকেজেৰে সাধাৰণ লোকক সাহাৰ্য্য পৰিৱৰ্তে ঋণৰ বোজা ল’বলৈ আগ্ৰহী হ’ব জানোঁ? নিঃসন্দেহে এইবোৰ ঋণ সাধাৰণ লোকৰ বাবে গ্ৰহণযোগ্য নহয়। গাঁৱৰ হোজা মানুহ খিনিৰ পৰা পূৰ্বতে ক্ৰয় কৰা বনিক সকলক শক্তিশালী কৰি সেউজীয়া পৰিৱেশ ম্লান কৰি বহিৰাগত কোম্পানীক বৰপীৰা পাৰি দিয়াৰ ষড়যন্ত্ৰ সৰ্বজনবিদিত। অলপতে অসমৰ উদ্যোগমন্ত্ৰী চন্দ্ৰ মোহন পাটোৱাৰী মুখত নতুন উদ্যোগ নীতিত এই কথা স্পষ্ট। কিয়নো গাঁৱৰ কৃষি ভূমি সমূহত কোনো অনুমতিৰ অবিহনে যিকোনো কোম্পানী বা উদ্যোগ তিনিমাহৰ ভিতৰত প্ৰতিষ্ঠা কৰিব পাৰিব। গতিকে আত্ম নিৰ্ভৰশীল ভাৰতৰ কোটি টকাৰ আঁচনিৰ ঋণ এই বৃহৎ গোষ্ঠীৰ বাবেহে সংৰক্ষিত। এইবাৰ আহিছোঁ বিশেষ কেইটামান কথা লৈ আমি সকলোৱে জানোঁ আত্মনিৰ্ভৰশীল মানে নিজেৰ নিজৰ ভৰিত থিয় হৈ আগুৱাই যোৱা আৰু সংগ্ৰামিত জীৱন সাৰ্থকিত কৰা। চৰকাৰে নিজেই আত্মনিৰ্ভৰশীল হয় জানোঁ? নৰেন্দ্ৰ মোডী আসনৰ গাদীত বহাৰে পৰা এটাৰ পিছত এটাকৈ সকলোবোৰ ৰাজহুৱা সম্পত্তি ব্যক্তিগতকৰণ কৰিলে। এল আই চি, বিদ্যুত বিভাগ, বিমান সেৱা, ৰে’ল, বিএছএনএল, কাগজ কল, কয়লা খনি, বেংক ইত্যাদি ভাৰতৰ সকলোবোৰ আগশাৰীৰ উদ্যোগ ব্যক্তিগত খণ্ডক গোটাই দি কেনে ধৰণৰ আত্মনিৰ্ভৰশীল ভাৰতৰ জয় গান গাব ওলাইছে সাধাৰণ জনতা সহজেই অনুমান কৰিব পাৰিছে নিশ্চয়। যিখন দেশৰ চৰকাৰে নিজৰ ৰাজহুৱা সম্পত্তিবোৰ পুনৰ উদ্ধাৰ কৰাৰ বিপৰীতে কেইটিমান টকাৰ বাবে সকলো শেষ কৰিব খুজিছে তেন্তে দেশৰ সুস্থ অৰ্থনৈতিক কৰ পৰা জন্মিব?