নগাঁও : কালি পুৱতি নিশা নগাঁৱৰ ধিং গেটত সংঘটিত হয় এক ভয়ংকৰ অগ্নিকাণ্ডৰ ঘটনা। ধিং গেটৰ এটা ব্যৱসায়িক গুদামত সংঘটিত হয় এই অগ্নিকাণ্ডৰ ঘটনা। পুৱতি নিশা বৈদ্যুতিক বিজুতিৰ ফলত সংঘটিত হোৱা অগ্নিকাণ্ডত কেইবালক্ষাধিক টকাৰ সামগ্ৰী ভস্মীভূত হৈছে বুলি জানিব পৰা গৈছে। জগত শইকীয়া নামৰ ব্যৱসায়ীগৰাকীৰ এ চি বৰ্ডৰ গুদামত সংঘটিত হয় এই অগ্নিকাণ্ডৰ ঘটনা৷ পিছত ঘটনাস্থলীত দুখনকৈ অগ্নিনিৰ্বাপক বাহিনীৰ গাড়ী উপস্থিত হৈ জুই নিৰ্বাপন কৰিবলৈ সক্ষম হয়৷ উল্লেখ্য, পথৰ অসুবিধাৰ বাবে দুখন গাড়ী প্ৰৱেশ কৰিব নোৱাৰাত এখন গাড়ীৰ সহায়তেই জুই নিৰ্বাপন কৰে অগ্নিনিৰ্বাপক বাহিনীয়ে। ফলত জুইত জাহ যোৱাৰ পৰা ৰক্ষা পৰে বৃহৎ ব্যৱসায়ীক এলেকাতো।

দৈনন্দিন বাৰ্তা ডেস্ক :

অভিযোজন বচাই ৰখাৰ মূল চাবিকাঠি আৰু উত্তৰ পূৱৰ তিনিখন ৰাজ্য ত্ৰিপুৰা, মেঘালয় আৰু অৰুণাচল প্ৰদেশৰ ছগৰাকী কৃষি বিজ্ঞানীয়ে কৃষি ক্ষেত্ৰ উদ্ভাৱনৰ বাবে এক ৰ’ডমেপ তৈয়াৰ কৰিছে আৰু কৃষি ক্ষেত্ৰক উন্নতি কৰিছে ৷ কৃষি আৰু কৃষি ক্ষেত্ৰলৈ অনবদ্য অৱদান যোগোৱাৰ বাবে ছগৰাকী বিজ্ঞানীৰ উপৰি অৰুণাচল প্ৰদেশৰ কৃষি বিজ্ঞান কেন্দ্ৰ আৰু মণিপুৰৰ দুজন বিজ্ঞানীৰ লগতে ত্ৰিপুৰা, অৰুণাচল প্ৰদেশ আৰু মেঘালয়ৰ তিনিজন কৃষকে আইচিএআৰ বঁটা লাভ কৰিছে ৷ এই কথা ভাৰতীয় কৃষি গৱেষণা পৰিষদ (আইচিএআৰ)ৰ এজন জ্যেষ্ঠ বিষয়াই জনাইছে ৷ এই চাৰিজন বিজ্ঞানী হ’ল লোপামুদ্ৰা ছাহু, গোলাব সিং যাদৱ, চন্দন দেৱনাথ আৰু বসন্ত কুমাৰ কন্দপাল ৷ এই বিজ্ঞানী কেইজন ত্ৰিপুৰাৰ আইচিএআৰ চৌহদৰ ৷ তেওঁলোকে ২০১৯-২০ চনৰ ফকৰুদ্দিন আলি আহমেদ বঁটা, স্বামী ছাহজান আৰু সৰস্বতী বঁটা লাভ কৰে ৷ আনহাতে শেহতীয়াকৈ মেঘালয়ৰ আইচিএআৰ চৌহদত জড়িত হোৱা বিজ্ঞানী অমৃত কুমাৰ আৰু অৰুণাচল প্ৰদেশৰ পাচিঘাটৰ কেন্দ্ৰীয় কৃষি বিশ্ববিদ্যালয়ৰ সহযোগী অধ্যাপক নাংগছ’ল দোলমা ভূটিয়াই কৃষি আৰু এলাইড বিজ্ঞানৰ অভিন্ন গৱেষণাৰ বাবে জৱাহৰলাল নেহৰু বঁটা লাভ কৰে৷ উল্লেখ্য যে আইচিএআৰে প্ৰতিষ্ঠা দিৱসত প্ৰতি বছৰে বিজ্ঞানী, শিক্ষক, কৃষক আৰু কৃষি সাংবাদিকক অনবদ্য অবদান যোগোৱাৰ বাবে স্বীকৃতি আৰু বঁটা প্ৰদান কৰি আহিছে ৷ 

নামখলা : স্বাস্থ্য বিভাগে শনিবাৰে জিলা তথ্য আৰু জনসংযোগ কাৰ্যালয়লৈ প্ৰেৰণ কৰা এক প্ৰেছ বিজ্ঞপ্তিৰ মতে শনিবাৰৰ দিনটোত জিলাখনত পুণৰ ২৬ জন লোকৰ দেহত ধৰা পৰিছে ক’ভিডৰ উপস্থিতি । ইয়াৰে ভিতৰত দৰং জিলা পৰিষদৰ সভাপতি ধীৰেন্দ্ৰ ডেকা, দুজন স্বাস্থ্যকৰ্মী স্বাস্থ্যকৰ্মী আৰু দুজন আৰক্ষীৰ লোক  হোৱাৰ বিপৰীতে বাকীসকল কন্টেইনমেন্ট জ’ন বা ক’ভিড আক্ৰান্তৰ সংস্পৰ্শলৈ অহা ব্যক্তি । এই লোককেইজনক ধৰি জিলা খনৰ ক’ভিড আক্ৰান্তৰ সংখ্যা হ’ল ৫৭০ জন । শুকুৰবাৰ পৰ্যন্ত সুস্থ হৈ উঠাৰ পৰিপ্ৰেক্ষিতত ৩৬৭ জন লোকক ঘৰলৈ যাবলৈ দিয়া হৈছে । আনহাতে চিকিৎসাধীন হৈ আছে ১৭৬ জন লোক ।

ওৰাং :  কেইৱাটাওঁ চুৰিকাণ্ডৰ সৈতে জড়িত দুই দুধৰ্ষ চোৰ আজি ওৰাং আৰক্ষীৰ জালত পৰে। আৰক্ষী থানাখনৰ ভাৰপ্ৰাপ্ত আৰক্ষী বিষয়া দীপক দাসৰ নেতৃত্বত যোৱা আৰক্ষীৰ দল এটাই প্ৰায় ৩ ঘণ্টা জুৰি চলা এক স্বাস ৰুদ্ধকৰ অভিযানত আটক কৰিবলৈ সক্ষম হয় দুই দুধৰ্ষ চোৰক। অভিযানকাৰী দলটোৰ হাতৰ পৰা পলাবলৈ ল‌ওঁতে আৰক্ষীয়ে কেইৱা কিল’মিটাৰ দূৰ বোকা-পানীৰ মাজেৰে দৌৰী মৈমনসিং গাঁৱত আটক কৰিবলৈ সক্ষম হয়। আৰক্ষীৰ জালত পৰা চোৰ দুগৰাকী ২ নম্বৰ ওদালগুৰি জংগলগাঁৱৰ কাজিমুদ্দিন শেইখ (২৫) আৰু হাৰিজুদ্দিন(২৭) বুলি আৰক্ষীয়ে জানিবলৈ দিছে। উল্লেখ্য যে ধৃত চোৰ দুজনৰ বিৰুদ্ধে পূৰ্ৱেও কেইৱাখনো থানাত গোচৰ ৰুজু হৈ আছে। জানিব পৰা মতে এবাৰ শিলবড়ী আৰক্ষী থানাত আটক হৈছিল যদিও আৰক্ষীৰ চকুত ধূলি দি পলায়ন কৰিছিল কাজীমুদ্দিন শেইখ নামৰ ধৃত চোৰজনে। ওৰাং আৰক্ষী থানাৰ ৫৯/২০, ৬০/২০, ৬১/২০ নম্বৰত ৰুজু হোৱা গোচৰৰ ভিত্তিত চোৰ দুজনক গ্ৰেপ্তাৰ কৰি আৰক্ষীয়ে সোধা পোছা অব্যাহত ৰাখিছে। 

নলবাৰী : কোৰোনা মহামাৰীৰ মাজতে নলবাৰীৰ বাবে এটা ভাল খবৰ। কৃষি কৰ্মৰ জড়িয়তে নলবাৰীৰ দুই কৃৃষকে লাভ কৰিলে পুৰস্কাৰ। নতুন দিল্লীৰ ভাৰতীয় কৃষি অনুসন্ধান পৰিষদৰ পুৰস্কাৰ লাভ কৰিবলৈ সক্ষম হৈছে নলবাৰীৰ কৃষকদুজনে। দুই আদৰ্শ কৃষক বালিতাৰা গাঁৱৰ বিপুল হালৈ আৰু বিজু ডেকা। পুৰস্কাৰপ্ৰাপ্ত দুয়ো জন আদৰ্শ কৃষককে শুকুৰবাৰে নলবাৰী কৃষি বিজ্ঞান কেন্দ্ৰত সম্বৰ্ধনা জনোৱা হয়। কৃষক বিপুল হালৈ জগজীৱন ৰাম অভিনৱ কিষান বঁটাৰ বাবে আৰু বিজু ডেকা পণ্ডিত দীনদয়াল উপাধ্যায় অন্ত্যোদয়া কৃষি বঁটাৰ বাবে নিৰ্বাচিত হৈছে। কৃষি বিজ্ঞান কেন্দ্ৰৰ মুখ্য কৃষি বিজ্ঞানী ড° মৃদুল ডেকাৰ সভাপতিত্বত অনুষ্ঠিত কৃষক সম্বৰ্ধনা অনুষ্ঠানত স্থানীয় বিধায়ক অশোক শৰ্মা, নলবাৰী জিলাৰ উপায়ুক্ত পূৰৱী কোঁৱৰ, মীন বিভাগৰ বিষয়া প্ৰতুল বেজবৰুৱা, নাবাৰ্ডৰ জিলা প্ৰবন্ধক দিব্যজ্যোতি বিশ্বাস,জিলা বিজেপিৰ কোষাধ্যক্ষ ৰুবু দত্তৰ লগতে কেইবাজনো আদৰ্শ কৃষক উপস্থিত থাকে।

দৈনন্দিন বাৰ্তা ডেস্ক :

ভূৱা এনকাউণ্টাৰত মৃত্যু হোৱা নাই দুৰ্ধৰ্ষ অপৰাধী বিকাশ ডুবে৷ উচ্চতম ন্যায়ালয়ৰ নিৰ্দেশ আৰু আইন মানি প্ৰশাসনে কাম কৰিছে ৷ শুকুৰবাৰে উচ্চতম ন্যায়ালয়ত শপতনামা দাখিল কৰি এই কথা জনালে উত্তৰ প্ৰদেশৰ আৰক্ষী সঞ্চালক প্ৰধানে ৷ যোগী আদিত্যনাথ ৰাজ্যৰ আৰক্ষীৰ দাবী, বিকাশ ডুবে এনকাউণ্টাৰত মৃত্যু হোৱাটোৰ লগত তেলেংগানাৰ চাৰিটা ধৰ্ষণকাৰীৰ হত্যাক একে কৰি যোৱাটো সঠিক নহয় ৷ আৰক্ষী সঞ্চালক প্ৰধানৰ যুক্তি, তেলেংগানা প্ৰশাসনে এনকাউণ্টাৰ তদন্ত কৰাত আয়োগ গঠন কৰা নাই ৷ কিন্তু উত্তৰ প্ৰদেশ চৰকাৰে বিশেষ সমিতি গঠন কৰিছে ৷ ৬৪ টা গোচৰত অভিযুক্তক কৰায়ত্ত কৰিবলৈ গৈ গুলীত নিহত হৈছিল যোগী ৰাজ্যৰ আঠ আৰক্ষী৷ তাৰ পাছত অপৰাধীক কৰায়ত্ত কৰিবলৈ আৰক্ষীয়ে অভিযান চলাইছিল ৷ শেষত মধ্য প্ৰদেশৰ উজ্জয়িনীৰ মহাকাল মন্দিৰৰ পৰা ডন বিকাশ ডুবেৰ গ্ৰেপ্তাৰ কৰা হয় ৷ কিন্তু কানপুৰ পোৱাৰ আগতে আৰক্ষীৰ গাড়ী দুৰ্ঘটনা হয় ৷ সেই সুযোগত বিকাশে পলায়ন কৰিবলৈ চেষ্টা কৰে৷ অপৰাধীটোৱে আৰক্ষীলৈ লক্ষ্য কৰি গুলী চলায় ৷ তাৰ বিপৰীতে আৰক্ষীয়ে গুলী চলাবলৈ বাধ্য হয় ৷ আৰক্ষীৰ গুলীত বিকাশ ডুবেৰ মৃত্যু হয় ৷ কিন্তু বিৰোধীয়ে ইয়াক এনকাউণ্টাৰ বুলি যোগী চৰকাৰক সমালোচনা কৰে৷ চিবিআই বা এনআইএক এই এনকাউণ্টাৰৰ তদন্ত ভাৰ দিবলৈ দাবী কৰি উচ্চতম ন্যায়ালয়ত গোচৰ তৰে ৷ সেই গোচৰৰ শুনানি আছিল শুকুৰবাৰে৷ উচ্চতম ন্যায়ালয়ে আৰক্ষীৰ শপতনামা গ্ৰহণ কৰে ৷

নগাঁও : “আগষ্ট মাহৰ শেষৰ ফালে নগাঁৱত কৰ’না ৰোগীৰ সংখ্যাই ২৫০০ অতিক্ৰম কৰিব। গুৱাহাটীৰ পিছতে যি কেইখন চহৰত কৰ’নাৰ গণসংক্ৰমণ বৃদ্ধি হোৱাৰ আশংকা আছে তাৰ ভিতৰত নগাঁও অন্যতম। সেয়ে নগাঁৱতো আৰম্ভ কৰা হ’ব ৰেপিড টেষ্ট। নগাঁৱত এতিয়া ৩০০ ৰোগীক চিকিৎসা কৰিব পৰাকৈ স্বাস্থ্য বিভাগ সাঁজু। যিহেতু ৰোগীৰ সংখ্যা অধিক বৃদ্ধি পাব পাৰে সেয়ে বিকল্প ব্যৱস্থাৰ বাবে জিলা প্ৰশাসনৰ সৈতে আলোচনা কৰা হৈছে।” নগাঁও আৱৰ্ত ভৱনত আয়োজিত এক সংবাদমেলত এই মন্তব্য কৰে ৰাজ্যৰ স্বাস্থ্যমন্ত্ৰী ড° হিমন্ত বিশ্ব শৰ্মাই। আজি দিনৰ ১২ বজাত নগাঁও ভোগেশ্বৰী ফুকননী অসামৰিক চিকিৎসালয়ত থকা কোভিড – ১৯ চিকিৎসালয় পৰিদৰ্শন কৰি স্বাস্থ্য মন্ত্ৰী গৰাকীয়ে চিকিৎসালয়খনৰ অধীক্ষক আৰু চিকিৎসকৰ পৰা চিকিৎসা সন্দৰ্ভত যাবতীয় সা-সুবিধা সমূহৰ বুজ লয় ।ইয়াৰ পিছতে স্বাস্থ্য মন্ত্ৰী গৰাকীয়ে নগাঁও আৱৰ্ত ভৱনত জিলা উপায়ুক্ত আৰু যুটীয়া স্বাস্থ্য সঞ্চালকৰ সৈতে এক বৈঠকত মিলিত হয়। আৱৰ্ত ভৱনত আয়োজিত উক্ত বৈঠকত জলসম্পদ মন্ত্ৰী কেশৱ মহন্ত, নগাঁও সদৰ সমষ্টিৰ বিধায়ক ৰূপক শৰ্মা, ৰহাৰ বিধায়ক ডিম্বেশ্বৰ দাস, জিলা উপায়ুক্ত যাদৱ শইকীয়াৰ উপৰি জিলা প্ৰশাসনৰ উচ্চপদস্থ বিষয়াসকল উপস্থিত থাকে। ইপিনে প্লাজমা থেৰাপি সন্দৰ্ভত সাংবাদিকে সোধা এক প্ৰশ্নৰ উত্তৰত মন্ত্ৰী গৰাকীয়ে কয় যে অসমত প্লাজমা দান কৰা লোকৰ সংখ্যা তেনেই তাকৰ। এতিয়ালৈকে মাত্ৰ ৭-৮জন লোকেহে প্লাজমা দান কৰিছে। ইপিনে নগাঁৱত লক ডাউন দিয়া সন্দৰ্ভত মন্ত্ৰী গৰাকীয়ে কয় : “এতিয়ালৈকে নগাঁৱত লক ডাউনৰ প্ৰয়োজনীয়তা আমি অনুভৱ কৰা নাই। ঘৰৰ পৰা বাহিৰলৈ ওলাই অহাৰ সময়ত প্ৰতিজন লোকে মাস্ক পৰিধান কৰাৰ লগতে সামাজিক দূৰত্ব বৰ্তাই চলিব লাগিব । যদিহে পৰিস্থিতি বেয়াৰ ফাললৈ গতি কৰে তেন্তে জিলা উপায়ুক্তক এই সন্দৰ্ভত সম্পূৰ্ণ কৰ্তৃত্ব দিয়া আছে।” উল্লেখ্য যে নগাঁও চহৰৰ চাৰিখন বিদ্যালয়ত স্বাস্থ্যবিভাগে ৰেপিড টেষ্টৰ কাম আৰম্ভ কৰাৰ লগতে এতিয়াৰে পৰা নগাঁৱতো শ্বাব টেষ্টৰ ফলাফল মাত্ৰ ৩০ মিনিটতে লাভ কৰিবলৈ সক্ষম হব বুলি স্বাস্থ্য মন্ত্ৰী গৰাকীয়ে সংবাদ মাধ্যমক অৱগত কৰে । আনহাতে নগাঁৱৰ ম’হখুলিত নিৰ্মাণ কাৰ্য চলি থকা চিকিৎসা মহাবিদ্যালয়খন ২০২১ বৰ্ষত মুকলি কৰিব পৰা যাব বুলিও স্বাস্থ্য মন্ত্ৰী ড: শৰ্মাই সংবাদমেলত অৱগত কৰে ।নগাঁৱৰ পৰিস্থিতি পৰ্য্যবেক্ষণ কৰাৰ পিছতে স্বাস্থ্য মন্ত্ৰী গৰাকী গোলাঘাটলৈ বুলি ৰাওনা হয় ।