নগাঁও : বিগত কেইদিনমান ধৰি সংবাদ মাধ্যমত নগাঁও সদৰ সমষ্টি অথবা বঢ়মপুৰত দলীয় টিকট লাভ কৰিলে বিধানসভা নিৰ্বাচন খেলিবলৈ সাজু থকা বুলি উল্লেখ কৰি আহিছে প্ৰাক্তন ৰেলৰাজ্য মন্ত্ৰী ৰাজেন গোহাঁইয়ে।ইয়াৰ লগতে নগাঁৱৰ বিধায়ক ৰূপক শৰ্মাক সংবাদ মাধ্যমৰ আগত কটু সমালোচনা কৰি অহা ৰাজেন গোঁহাইক আজি নগাঁৱত নাম উল্লেখ নকৰাকৈ প্ৰত্যুত্তৰ দিলে বিধায়ক ৰূপক শৰ্মাই। চিগনেচাৰ প্ৰজেক্টৰ অধীনত ১০কোটি টকা ব্যয় সাপেক্ষে নগাঁৱৰ মাজৰআটিৰ পৰা বেবেজীয়া পৰ্যন্তনিৰ্মান হ’ব লগা এটি পথৰ আজি আধাৰশিলা স্থাপন কৰি বিধায়ক ৰূপক শৰ্মাই কয় যে নগাঁৱৰ উন্নয়ণৰ কৃতিত্ব কেৱল বিজেপি চৰকাৰৰহে। প্ৰধানমন্ত্ৰী নৰেন্দ্ৰ মোডী, মুখ্যমন্ত্ৰী সৰ্বানন্দ সোণোৱাল আৰু গড়কপ্তানি মন্ত্ৰী হিমন্ত বিশ্বৰ সদিচ্ছাৰ বাবেই বিগত ৪ বছৰত নগাঁও চহৰৰ বাট-পথৰ লগতে বিভিন্ন ক্ষেত্ৰত ক্ষিপ্ৰ উন্নয়ণ হৈছে। এই উন্নয়ণৰ কৃতিত্ব কোনো ব্যক্তি বিশেষৰ নহয়, বিজেপি চৰকাৰৰহে। আনহাতে নগাঁও সদৰ সমষ্টিত প্ৰাক্তন মন্ত্ৰী ৰাজেন গোঁহাইয়ে টিকট বিচৰা সন্দৰ্ভত সাংবাদিকে সোধা প্ৰশ্নৰ উত্তৰত বিধায়ক গৰাকীয়ে কয় যে নিৰ্বাচনলৈ এতিয়াও বহুদিন বাকী আছে। সেয়ে এতিয়া মোক টিকটৰ কথা নুসুধিব। এতিয়া দুৰ্যোগৰ সময়। সমগ্ৰ বিশ্বৰ লগতে নগাঁৱৰ ৰাইজো ক’ৰোণা সংক্ৰমণৰ বলি হৈছে। বানপানীয়েও ৰাইজক বিপৰ্যস্ত কৰিছে। সেয়ে এতিয়া ৰাইজক সহায় কৰাৰহে সময়। এইসময়ত ৰাইজে জনপ্ৰতিনিধিৰ পৰা ক্ষমতাৰ ৰাজনীতি নিবিচাৰে। আমি ৰাইজক সহায় কৰাৰ বাবেহে আগ্ৰহী, খোৱাকামোৰাৰ ৰাজনীতি আমি বেয়াপাঁও। উল্লেখযোগ্য যে প্ৰাক্তন মন্ত্ৰী ৰাজেন গোঁহায়ে ৰূপক শৰ্মাক সংবাদ মাধ্যমত প্ৰত্যক্ষ ভাৱে সমালোচনা কৰাৰ বিপৰীতে ৰূপক শৰ্মাই ৰাজেন গোঁহাইৰ নাম উল্লেখ নকৰাকৈয়ে সংবাদ মাধ্যমৰ সন্মুখত প্ৰত্যুত্তৰ দিলেও নগাঁৱত যে এতিয়া ৰাজেন গোঁহাই আৰু ৰূপক শৰ্মাৰ মাজত শীতল যুদ্ধৰ অৱতাৰণা ঘটিছে সেয়া স্পষ্ট হৈছে। আধাৰশিলা স্থাপন অনুষ্ঠানত নগাঁও গড়কপ্তানি বিভাগৰ অধীক্ষক অভিযন্তা পল্লৱ শৰ্মা,কাৰ্যবাহী অভিযন্তা হিতেন কলিতা, সহকাৰী অভিযন্তা অতনু শৰ্মা,প্ৰাক্তন পৌৰপতি দিগন্ত দাস, বিজেপি দলৰ নগাঁও সদৰ আৰু বঢ়মপুৰ মণ্ডলৰ সভাপতিদ্বয় ক্ৰমে দীপাংকৰ ৰয় আৰু বিজয় গুপ্তা উপস্থিত থাকে ।

নাজিৰা : ইন্ধন জাতীয় সামগ্ৰীকে ধৰি অত্যাৱশ্যকীয় সামগ্ৰীৰ মূল্যবৃদ্ধি আৰু চৰকাৰৰ নতুন উদ্যোগ নীতিৰে যি অসম বিৰোধী তথা জাতিধ্বংসী অধ্যাদেশ জাৰি কৰিছে সেই অধ্যাদেশ প্ৰত্যাহাৰৰ দাবীত আজি নাজিৰা নগৰৰ মাজমজিয়াত অসমৰ মুখ্যমন্ত্ৰী সৰ্বানন্দ সোনোৱাল , খাদ্য আৰু অসামৰিক যোগান বিভাগৰ মন্ত্ৰী ফণীভূষণ চৌধুৰী আৰু বাণিজ্য — উদ্যোগ মন্ত্ৰী চন্দ্ৰ মোহন পাটোৱাৰীৰ প্ৰতিকৃতি দাহ কৰি তীব্ৰ প্ৰতিবাদ সাব্যস্ত কৰে ” সংগ্ৰামী যুৱ – ছাত্র পৰিষদ , অসম ” ৰ নাজিৰা আঞ্চলিক সমিতিয়ে । সংগঠনটোয়ে যোগান বিভাগক দাবী উত্থাপন কৰে যে , কৰ’না মহামাৰীৰ সময়ত চৰকাৰে লকডাউনৰ দৰে পৰিস্থিতি ঘোষণা কৰিবলৈ বাধ্য হোৱাৰ সময়তে অসমৰ সাধাৰণ জনতাই অত্যন্ত আৰ্থিক অভাৱ অনাটনৰ মাজত দিন কটাবলগীয়া হৈছে । তেনে সময়তে যোগান বিভাগে অত্যাৱশ্যকীয় সামগ্ৰীৰ মূল্য নিৰ্ধাৰণৰ ক্ষেত্ৰত উপযুক্ত পদক্ষেপ গ্ৰহণ নকৰি অত্যাৱশ্যকীয় সামগ্ৰীৰ আকাশলংঘী মূল্যবৃদ্ধিয়ে সাধাৰণ জনতাক একেবাৰে কোঙা কৰি পেলাইছে । প্ৰতিবাস্থলীত উপস্থিত থাকি সংগ্ৰামী যুৱ – ছাত্ৰ পৰিষদৰ শিৱসাগৰ জিলা সমিতিৰ উপ — সভাপতি পংকজ দত্তই দাবী উত্থাপন কৰি কয় যে , অতি সোনকালে যোগান বিভাগৰ দায়িত্বত থকা মন্ত্ৰী গৰাকীয়ে মূল্য নিৰ্ধাৰণৰ ক্ষেত্ৰত সঠিক পদক্ষেপ গ্ৰহণ কৰি যোগান বিভাগটো গতিশীল কৰক , অন্যথা মন্ত্ৰী পদৰ পৰা অব্যাহতি লওক । আনহাতে ৰাজ্যিক কেবিনেটত উত্থাপিত হোৱা অনুমতি বিহীন নতুন ভূমি নীতি অধ্যাদেশ খনক সংগঠনটোয়ে পোনচাতেই নস্যাৎ কৰি খিলঞ্জীয়াক ভূমিৰ অধিকাৰ দিব নোৱাৰা বি জে পি নেৰ্তৃত্বাধীন চৰকাৰখনক তীব্ৰ ভাষাৰে নিন্দা কৰি খিলঞ্জীয়াক ভূমিৰ অধিকাৰ প্ৰদান কৰাৰ দাবী জনায় । জাতি — মাটি — ভেটিৰ কথা কৈ শাসনলৈ অহা বি জে পি নেৰ্তৃত্বাধীন চৰকাৰে উদ্যোগ স্থাপনৰ নামত অসমৰ খিলঞ্জীয়া লোকসকলৰ ভূমিৰ অধিকাৰ খৰ্ব কৰি খিলঞ্জীয়াক ভাতে মৰাৰ পৰিকল্পনা কৰা বুলি অভিযোগ কৰি সংগঠনটোৰ প্ৰতিবাদ কাৰী সকলে চৰকাৰ বিৰোধী ধৰ্ণাৰে উত্তাল কৰি তোলে ।

মঙলদৈ : দৰং জিলাত দ্ৰুত হাৰত বৃদ্ধি পাইছে ক’ভিড আক্ৰান্তৰ সংখ্যা । আজিৰ দিনটোতেই ৬৭ জন লোক ক’ভিড আক্ৰান্তৰ ৰিপোৰ্ট আহিছে। জিলা তথ্য আৰু জনসংযোগ বিভাগে সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিৰ মতে ইয়াৰ অধিকাংশলোক বহি:ৰাজ্যৰ পৰা আহি কোৱাৰান্টাইন হৈ আছিল বুলি জানিব দিয়ে । আনহাতে অসম লক্ষ্য প্ৰণোদিত নিৰীক্ষণ কাৰ্যসূচীৰ অধীনত শ্লেষ্মাৰ নমুনা প্ৰদান কৰা দৰং বন্যপ্ৰাণী সংমণ্ডলৰ কৰ্মচাৰী পূৰ্ণকান্ত পেগু, ধৰ্ম কান্ত বড়োৰ লগতে মঙলদৈ সদৰ থানাৰ নগৰীয়া শাখাৰ গৃহৰক্ষী বাহিনীৰ জোৱান ৰচীম আলীৰ শৰীৰত ধৰা পৰিছে ক’ভিড-১৯ ৰ উপস্থিতি। পেগু আৰু বড়ো দুয়োজনেই জিলা বন বিষয়া কাৰ্যালয়ৰ কৰ্মচাৰী হোৱা হেতুকে কাৰ্যালয়টোৰ একাংশ কন্টেনমেন্ট জুন ঘোষণা কৰিছে। আনহাতে ৰচিম আলী আৰক্ষী বিভাগৰ লোক হোৱা বাবে তেওৰ সংস্পৰ্শলৈ অহা আৰক্ষী লোক সকলক হোম কোৱাইন্টাম কৰা হৈছে । ইফালে আজিৰ দিনটোতেই ৬৭ জন লোকৰ দেহত কভিড পজিটিভ ধৰা পৰাৰ লগে লগে হাহাকাৰ লাগিছে দৰং জিলা স্বাস্থ্য বিভাগত কিয়নো ইয়াৰে ৩৮ জন লোকক ৰাখিবলৈ মঙ্গলদৈৰ কভিড হস্পিতাল সমূহত ঠাই নোহোৱা হৈছে। মঙ্গলদৈ অসামৰিক চিকিৎসালয়, জনৰাম চৌকা মডেল হস্পিতালত ইতিমধ্যে ৰোগীৰে পৰিপূৰ্ণ হৈ আছে আনহাতে দৰং জিলা উপায়ুক্ত দিলীপ কুমাৰ বৰাই এই ৩৮ জন কভিড পজিটিভ ৰোগীক চিকিৎসাৰ বাবে শোণিতপুৰ জিলা প্ৰশাসনৰ সৈতে যোগাযোগ কৰিছে। আজিৰ দিনটোত দৰং জিলাত কভিড হস্পিতাল সমূহ সম্পূৰ্ণ হৈ পৰাত জিলাবাসীৰ বাবে সমস্যাৰ সৃষ্টি হৈ পৰিব, কিয়নো ইতিমধ্যে বহুকেইজন লোকৰ স্বাৱৰ নমুনা প্ৰেৰণ কৰা হৈছে তেওঁলোকৰ মাজৰ পৰা যদিহে কভিড পজিটিভ ব্যক্তি ওলায় তেওঁলোকে চিকিৎসাৰ বাবে সমস্যাৰ সৃষ্টি হব এফালে অসম লক্ষ্য প্ৰণোদিত কাৰ্যসূচীৰ অধীনত ৰাজহুৱা ভাৱে স্বাৱৰ নমুনা সংগ্ৰহ অব্যাহত আছে আৰু আনফালে জিলাখনত ভয়াবহ গণ সংক্ৰমণ বৃদ্ধি পোৱাই আৰু অধিক কভিড পজিটিভ হোৱাৰ সম্ভৱনা নুই কৰিব নোৱাৰি। উল্লেখযোগ্য যে, এতিয়ালৈকে জিলাখনৰ ৩৬০ জন লোক ক’ভিডত আক্ৰান্ত হৈছে আৰু ১০৩ জন লোক বৰ্তমান চিকিৎসাধীন হৈ আছে। আনহাতে সুখৰ বতৰা যে ২৫৭ জনক সুষ্ট হৈ ঘৰলৈ উভটিছে। মঙলবাৰে আক্ৰান্ত হোৱা লোককেইজনক চিকিৎসাৰ বাবে বিভিন্ন চিকিৎসালয় আৰু মেডিকেল কলেজ হাস্পতাললৈ স্থানান্তৰ কৰাৰ বাবে জিলা প্ৰশাসনৰ সহযোগত ব্যৱস্থা গ্ৰহণ কৰিছে স্বাস্থ্য বিভাগে।

ডিৰাক সীমান্ত : বিগত কেইদিনমান পূৰ্বে নেৰানেপেৰাকৈ দিয়া বৰষুণৰ বাঢ়নী পানীত অসম অৰুণাচল সীমান্তৱৰ্তী তিনিচুকীয়া জিলাৰ ১২৬ নং শদিয়া বিধানসভা সমষ্টিৰ কাকপথাৰ উন্নয়ন খণ্ডৰ অৰ্থাৎ ডিৰাক গাঁও পঞ্চায়তৰ অন্তৰ্গত বৰডিৰাক আৰু ন চোমণি গাঁও সংযোগী পথৰ ডিৰাক নদীৰ ওপৰত থকা দলংখন উটুৱাই লৈ যায়। কেইবাদিনো যোগাযোগ বিচ্ছিন্ন হৈ থকাত গাঁওবাসীয়ে উপায়ন্তৰ হৈ শ্ৰমদানেৰে দলংখন পুনৰ নিৰ্মাণ কৰাৰ সিদ্ধান্ত লৈ যোৱা ৩ জুলাইত দলংখন নিৰ্মাণ কৰি থাকোতে নদীত পৰি কৰুণ মৃত্যুক সাৱটি ল’ব লগা হৈছিল জগত কোঁৱৰ (৪৫) নামৰ ব্যক্তিজন । মৃত্যু সময়ত তেখেতে পত্নীসহ পাঁচগৰাকী কন্যা সন্তানক এৰি থৈ যায় । যোৱা ৫ জুলাইত ব্যক্তিজনৰ ঘৰত ১২৬ নং শদিয়া বিধান সভা সমষ্টিৰ বিধায়ক বলীন চেতিয়াই উপস্থিত হৈ ৰাজ্য চৰকাৰৰ তৰফৰ পৰা চাৰি লাখ টকাৰ আৰ্থিক সাহায্য প্ৰদান আৰু কেন্দ্ৰীয় চৰকাৰলৈ সাহায্যৰ বাবে প্ৰস্তাৱ প্ৰেৰণ কৰাৰ কথা ঘোষণা কৰা মৰ্মে আজি ডুমডুমা ৰাজহ চক্ৰ বিষয়াৰ কাৰ্যালয়ত তিনিচুকীয়া জিলা অতিৰিক্ত উপায়ুক্ত পলাশ আহোম আৰু নীলুৰাম শৰ্মা দেৱৰ লগতে বিধায়ক প্ৰতিনিধি সীমান্ত মৰাণ, যুৱ মৰ্চা ৰাজ্যিক কাৰ্য্যনিৰ্বাহক সদস্য সুৰজিত মৰাণ, ডিৰাক গাওঁ পঞ্চায়তৰ সভাপতি ৰাণা হাজৰিকাৰ উপস্থিতিত বিধায়ক বলিন চেতিয়াই জগত কোঁৱৰৰ পত্নী মন্দিৰা কোৱঁৰক ৪,০০০০০ টকা চেক প্ৰদান কৰে৷ বিধায়ক গৰাকীৰ অতি ক্ষীপ্ৰতাৰে গ্ৰহণ কৰা এনে কাৰ্য্যক পৰিয়ালৰ লগতে গাঁওবাসীয়ে শলাগ লৈছে।