দৈনন্দিন বাৰ্তাৰ ডিজিটেল ডেস্ক :

ক’ৰোনা ভাইৰাছ সংক্ৰমণৰ বাবে গুৱাহাটীত পৰিস্থিতি ক্ৰমাত্‍ জটিল হৈ পৰিছে। প্ৰতিদিনে বৃদ্ধি পাইছে ক’ৰোনাত আক্ৰান্ত লোকৰ সংখ্যা। উল্লেখ্য যে গুৱাহাটীত প্ৰতিদিনে শতাধিক ট্ৰেভেল হিষ্ট্ৰী নথকা লোক আক্ৰান্ত হৈছে কোৰোণাত৷ আক্ৰান্ত লোকৰ সংখ্যা নিতৌ বৃদ্ধি পোৱাৰ পৰিপ্ৰেক্ষিততে পুনৰ লকডাউন ঘোষণা কৰা হৈছে ৷ অহা সোমবাৰৰ পৰা গুৱাহাটীত সম্পূৰ্ণ লকডাউন ঘোষণা কৰা হৈছে। অহা ১৪ দিনৰ বাবে ঘোষণা কৰা হৈছে সম্পূৰ্ণ লকডাউন৷ এইবাৰৰ লকডাউনৰ সময়ত কোনো ধৰণৰ দোকান খোলা নাথাকিব। অহা ১২ জুলাই লৈকে বলৱত্‍ হ’ব লগা লকডাউন। বন্ধ থাকিব সকলো দোকান, ব্যৱসায়িক প্ৰতিষ্ঠান। কেৱল খোলা থাকিব ফাৰ্মাচী, চিকিত্‍সায়। আনহাতে আজি সন্ধিয়া সাত বজাৰ পৰা কাইলৈ পুৱা সাত বজালৈ গুৱাহাটীত সান্ধ্য আইন জাৰি কৰা হৈছে ৷ এইবাৰ লকডাউনৰ সমআত সকলো চৰকাৰী, বেচৰকাৰী কাৰ্যালয় বন্ধ থাকিব৷ ইয়াৰ লগতে ঔদ্যোগিক প্ৰতিষ্ঠান বন্ধ থাকিব। আনহাতে লকডাউনৰ সময়ত বানপানীত কাম কৰা লোকৰহে গাড়ী ব্যৱহাৰ কৰিব পাৰিব ৷ কোনো গাড়ীৰ পাছৰ ব্যৱস্থা নাথাকিব৷ লকডাউনৰ সময়ত মঠ-মন্দিৰ বন্ধ থাকিব৷ মৃতকৰ শেষকৃতৰ বাবে শ্মশানত কেৱল বিশজন লোকেহে থাকিব পাৰিব। ইয়াৰ লগতে সেনা, আৰক্ষী, অৰ্ধ-সামৰিক, দুৰ্যোগ প্ৰশমনত জড়িত লোক, সংবাদ মাধ্যম, জৰুৰীকালীন সেৱা খোলা থাকিব। তদুপৰি যুটীয়া সচিবৰ ওপৰৰ বিষয়াসকল কাৰ্যালয়লৈ যাব পাৰিব৷ লগতে সচিবালয় আৰু সঞ্চালকালয় খোলা থাকিব৷ গাখীৰ, শিশু খাদ্য যোগান থাকিব৷ উল্লেখ্য যে প্ৰথম সাতদিন কঠোৰভাৱে লকডাউন পালিত হ’ব। এই লকডাউনৰ সময়ত কোনো ধৰণৰ ব্যক্তিগত যানবাহন চলাচল বন্ধ থাকিব ৷ ইয়াৰ লগতে আন্তঃজিলা পৰিবহণ বন্ধ থাকিব ৷

নগাঁও : অসমৰ পৰা গৈ মুম্বাইৰ গ্লেমাৰ জগতত প্ৰতিষ্ঠিত হোৱা, ব্যয়বহুল দেৱনীয়াৰ আলোচনীৰ ৫টাকৈ সংখ্যাৰ বেটুপাতত স্থান পোৱা ইশিকা বৰা আক্ৰান্ত হৈছে ক’ৰোণাত। নগাঁও জিলাৰ কামপুৰৰ পৰা গৈ মুম্বাইৰ গ্লেমাৰ জগতত প্ৰতিষ্ঠিত হোৱা ইশিকাই বিগত এটা দশক জুৰি গ্লেমাৰ জগতত ব্যাপক খ্যাতি অৰ্জন কৰিছে। বহু আন্তৰ্জাতিক কোম্পানীৰ আবেদনময়ী বিজ্ঞাপনৰ জৰিয়তে মডেলিং জগতত আত্মপ্ৰকাশ কৰা ইশিকা বৰাই এছিয়াৰ শ্ৰেষ্ঠ আবেদনময়ী মডেলৰ তালিকাৰ শীৰ্ষ স্থানো লাভ কৰিছিল। যোৱা ১৯ জুনত মুম্বাইৰ পৰা গুৱাহাটীত উপস্থিত হোৱা ইশিকাই স্বোৱাব টেষ্টৰ পিছতে নগাঁৱৰ কামপুৰৰ নিজ ঘৰত হোম কোৱাৰেণ্টাইন হৈ আছিল। ২৩ জুনৰ নিশা ক’ভিদ-১৯ পজিটিভ হোৱাৰ ৰিজাল্ট অহাৰ পিছতে কালি পুৱা ইশিকাক নগাঁৱৰ ভোগেশ্বৰী ফুকননী অসামৰিক চিকিৎসালয়ৰ ক’ভিদ হস্পিতালত ভৰ্তি কৰা হয়। ইপিনে নগাঁও ভোগেশ্বৰী ফুকননী অসামৰিক চিকিৎসালয়ৰ ক’ভিদ হস্পিতালত কোনো পৰ্য্যাপ্ত সুবিধা নোপোৱাৰ লগতে লেতেৰা পৰিৱেশত ক’ভিদ ৰোগীক ৰখাৰো অভিযোগ তুলিছে মডেল গৰাকীয়ে।

ডিৰাক সীমান্ত : ইটোৰ পিছত সিটো দুৰ্যোগে দেখা দিয়া ৰাজ্যখনত পুনৰ ৰুষ্ট হৈ পৰিছে প্ৰকৃতি। ক’ৰণা মহামৰীয়ে ৰাইজৰ অৰ্থনৈতিক অৱস্থা কোঙা কৰাৰ পাছতে এইবাৰ বৰুণ দেৱতাইও মানৱ জাতিৰ ওপৰত ৰুষ্ট হৈ পৰিছে। নেৰা নেপেৰাকৈ মুখলধাৰে দি থকা বৰষুণৰ ফলত জলমগ্ন হৈ পৰে তিনিচুকীয়া জিলাৰ ডুমডুমা ৰাজহ চক্ৰৰ অন্তৰ্গত অসংখ্য গাঁও। ৰাজহ চক্ৰৰ অন্তৰ্গত কঁপাহতলী, ৰংপুৰীয়া, কুৰুকানী, বৰডিৰাক, চোমণি, চোমনি মাজুলী, ২নং সৰুডিৰাক,  থাপাবাৰী,  মজবাৰী, বগৰিবাৰী, দ-পথাৰ, চেঙেলী, সৰুমেচাই, নলাকান, কলিতা চুক, গন্ধৈগুৰি হাঁহখাটী, আহোম পথাৰ, ধলা মিৰিপথাৰ, ছৈখোৱা আদিকে ধৰি বিভিন্ন গাঁও  পানী বুৰাই পেলাইছে। আনহাতে টঙনা, কৈলাশপুৰ, কাচিজান আদি গাঁওসমূহতো বৰষুণৰ পানীয়ে প্লাবিত কৰি কৃষি শস্যৰ অনিষ্ট কৰিছে। বহুলোকৰ ঘৰ-দুৱাৰ, কঠীয়াতলী, শাক-পাচলি পানীত বুৰ যোৱাৰ উপৰিও পুখুৰীত মেলি থোৱা মাছ-কাছ ওলাই গৈছে। কৃষিজীৱি, মৎস্যজীৱি গঞা ৰাইজৰ সকলো শেষ কৰি নিয়াত এতিয়া ৰাইজৰ মাজত হাহাকাৰ পৰিস্থিতিৰ সৃষ্টি হৈছে। নেৰা নেপেৰা বৰষুণে ইতিমধ্যে গ্ৰাম্য অঞ্চলৰ মুখ্য পথসমূহ পানী বুৰাই পেলোৱাৰ উপৰিও চৰকাৰৰ বিভিন্ন আঁচনিত নিৰ্মিয়মান পথৰ ব্যাপক ক্ষতি হৈছে। গ্ৰাম্য জনসাধাৰণৰ একমাত্ৰ উপাৰ্জনৰ থল কৃষি শস্য আৰু মৎস্য উৎপাদনত বাঢ়নী পানীয়ে বিধস্ত কৰাত সকলোৱে মুৰে কপালে হাত দিবলগীয়া হৈছে। এই ক্ষেত্ৰত জিলা প্ৰশাসন তথা চৰকাৰক সহায়ৰ হাত আগবঢ়াবলৈ ৰাইজৰ লগতে সামাজিক দল-সংগঠনে আহ্বান জনাইছে।