তিনিচুকীয়া : বাঘজান বিজিআৰ নং ৫ ৱেল অইল ইণ্ডিয়া লিমিটেড দুলীয়াজানে প্ৰদূষণ নিয়ন্ত্ৰণ পৰিষদৰ অনুমতি অবিহনে উৎপাদন চলাই আছে- এই কথা আমি কোৱা নাই স্বয়ং প্ৰদূষণ নিয়ন্ত্ৰণ পৰিষদে যোৱা শুকুৰবাৰে এক বিবৃতি যোগে প্ৰকাশ কৰিছিল। কিন্তু অতি ৰহস্যজনকভাবে কালি পৰিষদৰ অধক্ষ্য আৰু অইল ইণ্ডিয়াৰ চিএমডিৰে হোৱা গোপন বৈঠকৰ অন্তত স্থানীয় ৰাইজ তথা ডিব্ৰু-ছৈখোৱাৰ অস্তিত্বক জলাঞ্জলি দি নিষেধাজ্ঞা উঠাই লোৱা কায্যই ইয়াৰ ৰাইজৰ মাজত ব্যাপক প্ৰতিক্ৰিয়াৰ সৃষ্টি হৈছে। আছু, মটকযুৱ ছাত্ৰ সন্মিলন, মটক সন্মিলন, প্ৰকৃতিপ্ৰেমী সংগঠনৰ প্ৰতিনিধিয়ে শীঘ্ৰে প্ৰদূষণ্‌ নিয়ন্ত্ৰণ পৰিষদৰ এনে ৰহস্যজনক সিদ্ধান্ত প্ৰত্যাহাৰ নকৰিলে তীব্ৰ আন্দোলনৰ ভাবুকি প্ৰদান কৰিছে।

নগাঁও : ভাৰত – চীন সীমান্তত দেশৰ হকে প্ৰাণ অাহুতি দিয়া বীৰ শ্বহীদ সকলৰ অাত্মাৰ শান্তিৰ অৰ্থে হয়বৰগাঁওৰ পুৰণি এ টি ৰোডৰ ব্যৱসায়ী সকলৰ উদ্যোগত আজি এক শ্ৰদ্ধাঞ্জলি অনুষ্ঠান অনুষ্ঠিত হয়। শ্ৰদ্ধাঞ্জলি অনুষ্ঠানত শ্বহীদ সকলৰ আত্মাৰ সদগতিৰ উদ্দেশ্যে বন্তি প্ৰজ্জ্বলন কৰা লগতে ফটোত পুস্পাজ্ঞলী অৰ্পন কৰি এক মিনিট মৌন প্ৰাৰ্থনা কৰে।অনুষ্ঠানত মাৰোৱাৰী সন্মিলনৰ সভাপতি অনিল শৰ্মা, হয়বৰগাঁও  ব্যৱসায়ী সন্হাৰ বিজয় মঙ্গোলনীয়া,জগদীশ লোহিয়া,ৰাজেন্দ্ৰ প্ৰসাদ মুনদ্ৰা,গোপাল পোদ্দাৰ,সুৰেশ কুমাৰ শৰ্মা, জগদীশ ধোদ,পৱন কিল্লা আদি উপস্থিত থাকে।

কৰিমগঞ্জ : কৰিমগঞ্জ সদৰ থানাত বাইকৰ উজান। এখনৰ পিছত এখন বাইক। যেন বাইকৰ  মেলাহে লাগিছে। ইজনৰ পিছত সিজন বাইকৰ মালিক আহিছে আৰু লৈ গৈছে একো একোখন বাইক। কৰিমগঞ্জ আৰক্ষীয়ে চুৰি হোৱা মটৰচাইকেল উদ্ধাৰ কৰি বাইকৰ উজান লগাইছে। ৯ খনকৈ বাইক। ইয়াৰ মাজত আছে বুলেট, এভেঞ্জাৰ, পালছাৰ স্কুটী, এখন মিনি ট্ৰাক, এখন বলেৰো গাড়ীৰ লগতে এটা গৰুৰ পোৱালি উদ্ধাৰ কৰে কৰিমগঞ্জ আৰক্ষীয়ে। বৰাকৰ বিভিন্ন জিলাত চুৰি হৈছিল এই বাইকসমুহ আৰু গাড়ী। সেই বাইক, গাড়ী উদ্ধাৰ হৈছে কৰিমগঞ্জৰ বাখৰশাল, পাথাৰকান্দিৰ সাতঘৰি, পাথাৰকান্দিৰ বাংলাদেশ সীমান্ত সোনাতলা এলেকাৰ পৰা। লগতে কৰিমগঞ্জ চহৰ এলেকাৰ পৰা আৰক্ষীয়ে গ্ৰেপ্তাৰ কৰিছে চুৰি কাণ্ডৰ সৈতে জড়িত তিনিজনক।কৰিমগঞ্জ চহৰতো চুৰি হৈছিলে কেইবাখনো বাইক। এটা চুৰৰ সূত্ৰ ধৰি কৰিমগঞ্জ সদৰ আৰক্ষীয়ে আৰম্ভ কৰে অভিযান। প্ৰথমতে বাখৰশালৰ পৰা গ্ৰেপ্তাৰ কৰে কমৰুল ইছলামক। তেওঁৰ ঘৰৰ পৰা উদ্ধাৰ হয় তিনিখনকৈ বাইক। ইয়াৰে পম খেদি পাথাৰকান্দিৰ সাতঘৰি গাঁৱৰ তাজ উদ্দিন আৰু আনোৱাৰ হুছেইনক আটক কৰিবলৈ সক্ষম হয়। আৰু সেই ঠাইৰ পৰা উদ্ধৰ হয় এখন স্কুটী আৰু দুখন বাইক। দেওবাৰে নিশা উদ্ধাৰ হয় শিলচৰৰ পৰা চুৰি হোৱা এখন বুলেট আৰু এখন পালছাৰ বাইক। লগতে আৰু এখন বুলেটৰ খুলি ৰখা অংশ বিশেষ। ধাৰনা কৰা হৈছে যে চুৰি কৰি অনা সকলো বাইক বাংলাদেশত চোৰাংকৈ পঠোৱা হয়।  শিলচৰৰ ৰামনগৰৰ পৰা এনিশা চুৰি হয় দুখনকৈ বাইক আৰু এখন স্কুটী। বুলেটৰ মালিকগৰাকীয়ে এনেদৰে কয় যে কেৱল বাইকে নহয়, বলেৰো গাড়ীতে কৰি চুৰ কৰি লৈ অহা গৰুৰ পোৱালিও উদ্ধাৰ হয়। বলেৰো গাড়ীৰে গৰু চোৰাংকৈ লৈ যোৱাৰ সময়ত লংগাই আৰক্ষী চকীত আটক কৰে আৰক্ষীয়ে। ধাৰনা কৰা হৈছে বলেৰো গাড়ীখন চুৰ কৰি অনা হৈছে। লগতে উদ্ধাৰ কৰা হয়  আন এখন মিনি ট্ৰাক।  কৰিমগঞ্জ আৰক্ষীৰ  গাড়ী, বাইক, গৰুৰ পোৱালি উদ্ধাৰ সন্দৰ্ভত আৰক্ষী অধীক্ষক কুমাৰ সঞ্জিৎ কৃষ্ণই কয়- বৰাকৰ বিভিন্ন জিলাৰ পৰা চুৰি হোৱা সকলো বাইক উদ্ধাৰ হৈছে কৰিমগঞ্জৰ বিভিন্ন ঠাইৰ পৰা।

নগাঁও : এজন যুৱকে পলুৱাই নিয়া ভ্ৰমণ বৃত্তান্ত নথকা এগৰাকী কিশোৰীৰ দেহত কোভিড-১৯ পজিটিভ ধৰা পৰাৰ পাচত নগাঁৱত কৰ’না ভাইৰাছক লৈ জনসাধাৰণ অধিক শংকিত হৈ পৰিছে ।কিশোৰীগৰাকীক উদ্ধাৰকাৰী ১১ জন আৰক্ষীৰ লোকক কোৱাৰেন্টাইন থাকিবলগীয়া হোৱা ঘটনাই নগাঁৱত চাঞ্চল্যৰ সৃষ্টি কৰে। জানিব পৰা মতে, এসপ্তাহ পূৰ্বে নগাঁৱৰ হুজ ৰঙাগড়াৰ নৱম শ্ৰেণীত অধ্যয়নৰত এগৰাকী কিশোৰীক জিলাখনৰ ৰাইদঙীয়া অঞ্চলৰ এজন যুৱকে পলুৱাই নিয়ে।ইপিনে কিশোৰীগৰাকী সন্ধানহীন হোৱা বুলি তেওঁৰ পৰিয়ালে হয়বৰগাঁও আৰক্ষী চকীত দাখিল কৰা অভিযোগৰ ভিত্তিত আৰক্ষীয়ে ১৩৭২/২০২০ নম্বৰত এক গোচৰ ৰুজু কৰি তদন্ত আৰম্ভ কৰে ।পাচত হয়বৰগাঁও আৰক্ষীয়ে ১৬ জুনত কিশোৰীগৰাকীক উদ্ধাৰ কৰিবলৈ সক্ষম হয় যদিও কিশোৰীগৰাকীক লৈ যোৱা যুৱকজনক আৰক্ষীয়ে কৰায়ত্ত কৰিব পৰা নাছিল। আনহাতে  আৰক্ষীয়ে উদ্ধাৰ কৰা ছাত্ৰীগৰাকীক নগাঁও ভোগেশ্বৰী ফুকননী অসামৰিক চিকিৎসালয়ত যাৱতীয় স্বাস্থ্য পৰীক্ষা কৰাৰ লগতে তেওঁৰ ‘স্বোৱাব’ৰ নমুনা সংগ্ৰহ কৰি পৰীক্ষাৰ বাবে প্ৰেৰণ কৰা হয়। সেইদিনা ছাত্ৰী গৰাকীক নগাঁও সদৰ থানাৰ মহিলা আৰক্ষী চেলত নিশাটো ৰখোৱাৰ পিছত পিছদিনা আদালতত হাজিৰ কৰাই আৰু পিছত ছাত্ৰী গৰাকীক পিতৃ-মাতৃক  চমজাই দিয়ে। ইপিনে কোনো ধৰণৰ ভ্ৰমণ বৃত্তান্ত নথকা ছাত্ৰী গৰাকী কোভিড পজিটিভিত আক্রান্ত হোৱাটো কালি  স্বাস্থ্য বিভাগে নিশ্চিত কৰাৰ লগে লগে নগাঁও জিলা স্বাস্থ্য বিভাগ আৰু আৰক্ষী প্ৰশাসনৰ মাজত হুৱা-দুৱাৰ সৃষ্টি হয়। ইতিমধ্যেই নগাঁও আৰক্ষী প্ৰশাসনে নগাঁও সদৰ থানা আৰু হয়বৰগাওঁ আৰক্ষী চকীৰ মহিলা আৰক্ষী সহ ১১জন আৰক্ষীৰ লোকক কোৱাৰেণ্টাইনৰ ব্যৱস্থা কৰে। সম্প্ৰতি এই আৰক্ষীৰ লোকসকলক নগাঁও চহৰৰ কেইবাখনো হোটেলত কোৱাৰেণ্টীন কৰি ‘স্বোৱাব’ৰ নমুনা সংগ্ৰহ কৰা হয় । ইয়াৰ ভিতৰত হয়বৰগাঁও আৰক্ষী চকীৰ ভাৰপ্ৰাপ্ত বিষয়া গৰাকীও আছে। ইতিমধ্যে নগাঁও জিলা স্বাস্থ্য বিভাগে কিশোৰী গৰাকীৰ সংস্পৰ্শলৈ অহা তেওঁৰ পিতৃ-মাতৃ সহ পৰিয়ালৰ আন লোকসকলৰো ‘স্বোৱাব’ৰ নমুনা সংগ্ৰহ কৰি পৰীক্ষাৰ বাবে প্ৰেৰণ কৰাৰ লগতে তেওঁ লোকক স্বাস্থ্য বিভাগৰ নীতি অনুসৰি হোম কোৱাৰেণ্টীনৰ ব্যৱস্থা কৰা হয় । আনহাতে কিশোৰীগৰাকীক  পলুৱাই নিয়া যুৱকজনৰ পৰিয়ালৰ লোকক আৰক্ষী আৰু স্বাস্থ্য বিভাগে  নগাঁও ভোগেশ্বৰী ফুকননী অসামৰিক চিকিৎসালয়লৈ আনি ‘স্বোৱাব’ৰ নমুনা সংগ্ৰহ কৰি  পৰীক্ষাৰ বাবে প্ৰেৰণ কৰে বুলি জানিব পৰা গৈছে ।