এ জে আকন্দ‌, নগাঁও

আজি ঘোষিত হাইস্কুল শিক্ষান্ত পৰীক্ষাৰ ফলাফলত নগাঁও জিলালৈ সুনাম কঢ়িয়াই আনিলে তিনি কৃতীমানে। তেওঁলোক হ’ল ঝলক জালান, শিল্পীশিখা ডেকা আৰু ঋত্বিক কুমাৰ সূত। ইয়াৰে নগাঁও চহৰৰ চেন্ট এন্টনিজ ইংলিছ স্কুলৰ  ছাত্ৰী ঝলক জালানে সপ্তম স্থান, পলাশতল কাছমাৰী হাইস্কুলৰ ছাত্ৰী শিল্পীশিখা ডেকাই নৱম স্থান আৰু ৰহাৰ প্ৰাঞ্জল মেমোৰিয়েল একাডেমীৰ ছাত্ৰ ঋত্বিক কুমাৰ সূতে দশম স্থান লাভ কৰিছে। উল্লেখ্য যে ৰাজ্যৰ ভিতৰতে সপ্তম স্থান লাভ  ছাত্ৰী ঝলক জালান নগাঁও চহৰৰ ধিং গেটৰ বাসিন্দা তথা বস্ত্ৰ ব্যৱসায়ী পৱন জালান আৰু হেমলতা জালানৰ কণ্যা। তেওঁ হিন্দীত ৯৬, ইংৰাজীত ৯৮, সাধাৰণ গণিতত ১০০, সাধাৰণ বিজ্ঞানত ৯৭, সমাজ বিজ্ঞানত ৯৬ আৰু উচ্চ গণিতত ১০০নম্বৰ সহ মুঠ ৫৮৭ নম্বৰ লাভ কৰিছে। তেওঁ  দৈনিক ছয়-সাত ঘন্টাকৈ নিয়মীয়াকৈ অধ্যয়ণ কৰিছিল। অৱশ্যে উচ্চ গণিত আৰু সাধাৰণ বিজ্ঞান বিষয়ত তেওঁৰ টিউচন আছিল। তেওঁৰ প্ৰিয় লেখক আবুল কালাম। সদ্যহতে উচ্চতৰ মাধ্যমিক বিজ্ঞান শাখাত নাম ভৰ্তি কৰাবলৈ সিদ্ধান্ত লৈছে। তেওঁ ভৱিষ্যতে এগৰাকী চিকিৎসক হোৱাৰ আশা পুহি ৰাখিছে। আনহাতে, নৱম স্থান দখল কৰি নগাঁও জিলালৈ সুনাম কঢ়িয়াই অনা নগাঁও জিলাৰ পলাশতল কাছমাৰী হাইস্কুলৰ ছাত্ৰী শিল্পীশিখা ডেকা বিদ্যালয়খনৰে প্ৰধান শিক্ষক ভূৱন চন্দ্ৰ ডেকা আৰু এখন ব্যাক্তিগত খণ্ডৰ বিদ্যালয়ৰ  শিক্ষয়িত্ৰী ডুলুমণি বৰা ডেকাৰ কণ্যা। তেওঁ অসমীয়াত ৯৮, ইংৰাজীত ৯৫, সাধাৰণ গণিতত ১০০,সাধাৰণ বিজ্ঞানত ৯২,সমাজ বিজ্ঞানত ১০০ আৰু উচ্চ গণিতত ১০০নম্বৰ সহ মুঠ ৫৮৫ নম্বৰ লাভ কৰিছে। ফলাফলত উৎফুল্লিত ছাত্ৰী গৰাকীয়ে কয় যে তেওঁ স্থান লাভ কৰিব বুলি নিশ্চিত আছিল।  তেওঁ দৈনিক ৯ -১০ ঘন্টাকৈ অধ্যয়ণ কৰিছিল। বৰগীত গাই ভাল পোৱা শিল্পীশিখাৰ কিতাপ পঢ়া, খেলাধূলাৰ প্ৰতিও বিশেষ ৰাপ থকাৰ কথাও সদৰী কৰে। সদ্যহতে বিজ্ঞান শাখাত নাম ভৰ্তি কৰি অধ্যয়ণ কৰি তেওঁৰ ভৱিষ্যতে এগৰাকী চিকিৎসক হোৱাৰ মন। দশম স্থান লাভ কৰি নগাঁও জিলালৈ গৌৰৱ কঢ়িয়াই অনা ঋত্বিক কুমাৰ সূত  জিলাখনৰ ৰহা গড়মাৰী নিৱাসী তথা বিষয় শিক্ষক দীপক কুমাৰ সূত আৰু ৰহা কলেজৰ সহযোগী অধ্যাপিকা ৰিণু বৰা সূতৰ পুত্ৰ। ঋত্বিকে অসমীয়াত ৯২, ইংৰাজীত ৯৭, সাধাৰণ গণিতত ১০০, সমাজ বিজ্ঞানত ৯৮ আৰু উচ্চ গণিতত ১০০ নম্বৰ সহ মুঠ ৫৮৪ নম্বৰ লাভ কৰিছে। তেওঁ দৈনিক ১১-১২ ঘন্টাকৈ অতি নিয়মিত ভাৱে অধ্যয়ণ কৰিছিল। নগাঁৱৰে শিক্ষানুষ্ঠানত উচ্চতৰ মাধ্যমিক বিজ্ঞান শাখাত নাম ভৰ্তি কৰি অধ্যয়ণ কৰিব তেওঁ। তেওঁৰ ভৱিষ্যতে এগৰাকী সুনাগৰিক হোৱাৰ সপোন পুহি ৰাখিছে যদিও চিকিৎসক হোৱাৰো আশা মনতে পুহি ৰাখিছে।

টিংখাং

সমগ্ৰ বিশ্বৰ লগতে ভৰতবৰ্ষতো এতিয়া ক’ৰণা মহামাৰীয়ে ভয়ংকৰ ৰূপ ধাৰণ কৰিছে। অসমতো ক্ৰমাৎ বৃদ্ধি পাইছে কভিড-১৯ ৰ সংক্ৰমণ। তাৰমাজতে টিংখাং মহাবিদ্যালয়ৰ ৰাজনৈতিক বিজ্ঞান বিভাগৰ অধ্যাপক ভাস্কৰ নেওঁ‌গ আৰু নীলমনি আদৰ্শ জাতীয় বিদ্যালয়ৰ অধ্যক্ষ ৰিজুমণি নেওঁ‌গৰ আজি ১৭ সংখ্যক বিবাহ বাৰ্ষিকী দিনটোতে একমাত্ৰ সন্তান টিংখাঙৰ নীলমনিৰ নিবাসী মানস উত্তম নেওঁ‌গে হাইস্কুল শিক্ষান্ত পৰীক্ষাত ৰাজ্যখনৰ ভিতৰতেই পঞ্চম স্থান দখল কৰি বৃহত্তৰ টিংখাং অঞ্চলৰ লগতে নীলমনি আদৰ্শ জাতীয় বিদ্যলয়খনলৈ গৌৰৱ কঢ়িয়াই আনিছে। তেখেতে সাধাৰণ গণিতত ১০০,বিজ্ঞানত ১০০,সমাজ বিজ্ঞানত ১০০,ঐচ্ছিক গণিতত ৯৯,ইংৰাজীত ৯৬  আৰু অসমীয়াত ৯৪ নম্বৰেৰে সৰ্ব্বমুঠ ৫৮৯ নম্বৰ লাভ কৰি ৰাজ্যৰ ভিতৰতে পঞ্চম স্থান দখল কৰিবলৈ সক্ষম হৈছে। ক্ৰিকেট খেলি ভালপোৱা মানসে নিতৌ ১২ ঘন্টাকৈ অধ্যয়ন কৰিছিল বুলি সংবাদ মাধ্যমৰ আগত জানিবলৈ দিয়ে। উল্লেখ্য যে  পাঠ্যক্ৰমৰ বিষয়সমূহ অধ্যয়ন কৰাৰ উপৰিও লক্ষ্মীনাথ বেজবৰুৱা আৰু ভবেন্দ্ৰ নাথ শইকীয়াৰ সাহিত্য মানস উত্তমৰ প্ৰিয়। ভৱিষ্যতে এজন ভাল অভিযন্তা হোৱাৰ সপোন দেখা মানস উত্তমে বিজ্ঞান শাখাত নামভৰ্তি কৰিব ডিব্ৰুগড়ৰৰ ৰাধাকৃষ্ণ জুনিয়ৰ কলেজত। সৰুৰে পৰা অতি অমায়িক তথা শান্ত স্বভাৱৰ মানস উত্তম নেওঁ‌গৰ এক উজ্জ্বল ভৱিষ্যৎ কামনা কৰিছে সমগ্ৰ টিংখাঙ বাসী ৰাইজে লগতে ৰাজ্যৰ ভিতৰতে পঞ্চম স্থান দখল কৰি টিংখাঙলৈ গৌৰৱ কঢ়িয়াই অনাৰ বাবে বৃহত্তৰ টিংখাঙ অঞ্চলবাসী উল্লাসিত হোৱা পৰিলক্ষিত হৈছে।কৃতি ছাত্ৰগৰাকীক ফলাফল ঘোষণা হোৱাৰ পাছৰে পৰা ৰাজগড় উদয়ন পথত থকা ভাড়াত বিভিন্ন দল সংগঠন ব্যক্তিয়ে অভিনন্দন জ্ঞাপন কৰিছে।

নাজিৰা

আজি ঘোষণা কৰা হাইস্কুল শিক্ষান্ত পৰীক্ষাৰ ফলাফলত নাজিৰা মহকুমাৰ চৰকাৰী আৰু বে- চৰকাৰী বিদ্যালয় সমূহৰ ভিতৰত দহখন বিদ্যালয়ৰ ফলাফল এশ শতাংশ উত্তীৰ্ণ হয় । চৰকাৰী বিদ্যালয় সমূহৰ তুলনাত বে – চৰকাৰী বিদ্যালয়ৰ ফলাফল অধিক সন্তুষজনক । নাজিৰা মহকুমাৰ বে– চৰকাৰী শিক্ষানুষ্ঠান মাৰ্কজ একাডেমীৰ পৰা অৱৰ্তীণ হোৱা ম: আমিনুৰ ৰহমানে মুঠ ৫৬৫ নম্বৰ লাভ কৰি ডিষ্টীংচন সহ উতীৰ্ণহৈ মহকুমাটোৰ ভিতৰত শীৰ্ষ স্থান লাভ কৰিবলৈ সক্ষম হয় । ফলাফল অনুসৰি এই বিদ্যালয়ৰ ৪ জনে ডিষ্টীংচন , ১০ গৰাকীয়ে ষ্টাৰ মাৰ্ক সহ ১৭ জন প্ৰথম ১১জনে দ্বিতীয় আৰু এজন তৃতীয় স্থানত উতীৰ্ণহৈ এশ শতাংশ উতীৰ্ণৰ গৌৰৱ কঢ়িয়া। চৰকাৰী বিদ্যালয়ৰ ভিতৰত নাজিৰা ন– মাটি উচ্চ মাধ্যমিক বিদ্যালয় , মেছাগড় জোকতলি উচ্চতৰ মাধ্যমিক বিদ্যালয় , বৰতলা উচ্চতৰ মাধ্যমিক বিদ্যালয় , মঠিয়াছিগা ৰাজমাও উচ্চ মাধ্যমিক বিদ্যালয় , শিমলুগুৰি আদৰ্শ উচ্চ মাধ্যমিক বিদ্যালয়ৰ ফলাফল এশ শতাংশ হোৱাৰ লগতে ব — চৰকাৰী বিদ্যালয়ৰ ভিতৰত আদৰ্শ বিদ্যা ভৱন উচ্চতৰ মাধ্যমিক বিদ্যালয় ( অ’ এন জি চি ) গুৰুকুল বিদ্যালয় চেইণ্ট পিৰ্টাছ বিদ্যালয় , গেলেকী জাতীয় বিদ্যালয় আৰু ডিমুৱাল বিদ্যা ভৱন বিদ্যালয়ৰ উতীৰ্ণৰ হাৰ এশ শতাংশ । চৰকাৰী খণ্ডৰ নাজিৰা ছোৱালী উচ্চতৰ মাধ্যমিক বিদ্যালয়ৰ ২ গৰাকীয়ে ডিষ্টীংচন , দুগৰাকীয়ে ষ্টাৰ মাৰ্ক সহ ৯ গৰকীয়ে প্ৰথম , ১৪ গৰাকীয়ে দ্বিতীয় আৰু ১৪ গৰাকীয়ে তৃতীয় স্থানত উতীৰ্ণহৈ ৮৪ শতাংশ , মেছাগড় জোকতলি উচ্চতৰ মাধ্যমিক বিদ্যালয়ৰ ৩ গৰাকীয়ে ষ্টাৰ সহ ১৪ গৰাকীয়ে প্ৰথম , ২০ গৰাকীয়ে দ্বিতীয় আৰু এজনে তৃতীয় স্থানত উতীৰ্ণ হৈ এশ শতাংশ , বৰতলা উচ্চতৰ মাধ্যমিক বিদ্যালয়ৰ দুগৰাকীয়ে ষ্টাৰ সহ ১২ গৰাকীয়ে প্ৰথম ২১ গৰাকীয়ে দ্বিতীয় স্থানত উতীৰ্ণহৈ এশ শতাংশ , হাতীপট্টী উচ্চ মাধ্যমিক বিদ্যালয়ৰ ৯ গৰাকীয়ে প্ৰথম , ১৫ গৰাকীয়ে দ্বিতীয় ৭ গৰাকীয়ে তৃতীয় স্থানত উতীৰ্ণহৈ ৯৪ শতাংশ , লিগিৰী পুখুৰী উচ্চ মাধ্যমিক বিদ্যালয়ৰ ৫ গৰাকীয়ে প্ৰথম , ২৬ গৰাকীয়ে দ্বিতীয় আৰু ১৯ গৰাকীয়ে তৃতীয় স্থানত উতীৰ্ণহৈ ৯৯ শতাংশ , মঠিয়াছিগা ৰাজমাও উচ্চ মাধ্যমিক বিদ্যালয়ৰ ১ গৰাকীয়ে ডিষ্টীংচন সহ ১৭ গৰাকীয়ে প্ৰথম দুগৰাকীকৈ দ্বিতীয় আৰু তৃতীয় স্থানত উতীৰ্ণহৈ এশ শতাংশ , ৰহদৈ পুখুৰী উচ্চ মাধ্যমিক বিদ্যালয়ৰ ৬ গৰাকীয়ে প্ৰথম , ১৬ গৰাকীয়ে দ্বিতীয় আৰু২৫ গৰাকীয়ে তৃতীয় স্থানত উতীৰ্ণহৈ ৬৭ শতাংশ , ধিতাই পুখুৰী উচ্চ মাধ্যমিক বিদ্যালয়ৰ ২ গৰাকীয়ে ডিষ্টীংচন  , ৩ গৰাকীয়ে ষ্টাৰ সহ ১২ গৰাকীয়ে প্ৰথম , ১৭ গৰাকীয়ে দ্বিতীয় আৰু ১২ গৰাকীয়ে তৃতীয় স্থানত উতীৰ্ণহৈ ৯১ শতাংশ উতীৰ্ণ হাৰ কঢ়িয়াই আনে । বে – চৰকাৰী বিদ্যালয়ৰ সমূহৰ ভিতৰত মাৰ্কাজ একাডেমীৰ ৪ গৰাকীয়ে ডিষ্টীংচন , ১০ গৰাকীয়ে ষ্টাৰ সহ ১৭ গৰাকীয়ে প্ৰথম ১১ গৰাকীয়ে দ্বিতীয় আৰু ১ গৰাকী তৃতীয় স্থানত উতীৰ্ণহৈ এশ শতাংশ উতীৰ্ণ হাৰেৰে মহকুমাটোৰ ভিতৰতে শীৰ্ষ স্থান অধিকাৰ কৰে । শিমলুগুৰি শংকৰদেৱ শিশু নিকেটনৰ ১০ গৰাকীয়ে ডিষ্টীংচন , ১৩ গৰাকীয়ে ষ্টাৰ সহ ৫৫ গৰাকীয়ে প্ৰথম , ৩৯ গৰাকীয়ে দ্বিতীয় আৰু ৮ গৰাকীয়ে তৃতীয় স্থানত উতীৰ্ণহৈ ৯৯ শতাংশ , এম জি এম গড়গাঁৱৰ ৩ গৰাকীয়ে ষ্টাৰ সহ ৮ গৰাকীয়ে প্ৰথম , ৫ গৰাকীয়ে দ্বিতীয় ৪ গৰাকীয়ে তৃতীয় স্থানত উতীৰ্ণহৈ ৯৯ শতাংশ , গেলেকী জাতীয় বিদ্যালয়ৰ ৫ গৰাকীয়ে ডিষ্টীংচন , ৩ গৰাকীয়ে ষ্টাৰ সহ ২৭ গৰাকীয়ে প্ৰথম ৪ গৰাকীয়ে দ্বিতীয় স্থানত উতীৰ্ণহৈ ১০০ শতাংশ , নাজিৰা জুবিয়েল ভেলী বিদ্যালয়ৰ ৪ গৰাকীয়ে প্ৰথম , ৩ গৰাকীয়ে দ্বিতীয় আৰু ১ গৰাকী তৃতীয় স্থানত উতীৰ্ণহৈ ৯৯ শতাংশ উতীৰ্ণ হাৰ কঢ়িয়াই আনে । মুঠতে নাজিৰা মহকুমাৰ চৰকাৰী আৰু বে – চৰকাৰী বিদ্যালয়ৰ ফলাফল সন্তোষজনক । 

গেলেকী

নাজিৰালৈ গৌৰৱ কঢ়িয়াই আনিলে নামতিৰ অন্তৰীশ হাজৰিকাই । মেট্ৰিক পৰীক্ষাৰ ফলাফলৰ শীৰ্ষ দহটা স্থানৰ ভিতৰত ৫৮৬ নম্বৰ সহ অষ্টম স্থান লাভ । আজি ঘোষণা কৰা মেট্ৰিক পৰীক্ষা ফলাফলত ৰাজ্যৰ শীৰ্ষ দহটা স্থানৰ ভিতৰত শিৱসাগৰ জিলা নাজিৰা মহকুমা অন্তৰ্গত নামতি চাৰিআলি অন্তৰীশ হাজৰিকাৰ স্থান লাভ । নামতিৰ অন্তৰীশ হাজৰিকাই সৰ্বমুঠ ৫৮৬ নম্বৰ সহ অষ্টম স্থান লাভ কৰি নাজিৰালৈ গৌৰৱ কঢ়িয়াই আনে । মেধাবী ছাত্ৰজন নামতি চাৰিআলি জাতীয় বিদ্যা নিকেতনৰ অন্তৰীশ হাজৰিকা । নামতি বৰবৰুৱা পুখুৰী গাওঁ পঞ্চায়ত অন্তৰ্গত গৰখীয়া নগৰৰ নিৱাসী পিতৃ বসন্ত হাজৰিকা আৰু মাতৃ মঞ্জুমণি হাজৰিকাৰ কনিষ্ঠতম পুত্ৰ অন্তৰীশ । সম্প্ৰতি পুৱাই উক্ত খবৰ বিয়পি পৰাৰ লগে লগে ছাত্ৰজনক বাসগৃহত বিভিন্নজন শুভাকাংশী উপস্থিত হৈ তেওঁক উষ্ম আদৰণি জনাই ।

 লংকা

 আজি ঘোষণা কৰা হ’ল হাইস্কুল শিক্ষান্ত পৰীক্ষাৰ ফলাফল ।  হাইস্কুল শিক্ষান্ত পৰীক্ষা ত অসমৰ ভিতৰত দশম স্থান লাভ কৰিবলৈ সক্ষম হল লংকাৰ গুড চামাৰিটন ইংলিশ স্কুলৰ ছাত্ৰী অংকিতা দে। হাইস্কুল শিক্ষান্ত পৰীক্ষাৰ ফলাফলত অসমৰ এঘাৰ জন শিক্ষাৰ্থীয়ে দখল কৰিবলৈ সক্ষম হল দশম  স্হান । তাৰ ভিতৰত হোজাই জিলাৰ লংকাৰ গুড চামাৰিটেন ইংলিছ স্কুলত অধ্যানগত ছাত্ৰী অংকিতা দে ও দখল কৰিবলৈ সক্ষম হয় দশম স্হানৰ ভিতৰত নিজৰ স্হান । পিতৃ নিৰ্মল দে আৰু মাতৃ ছুদিপ্তা দাসৰ কনিষ্ঠ কন্যা অংকিতা দে সফলতাত বৰ্তমান সীমা হীন আনন্দৰে ভৰি পৰিছে লংকাৰ ৫নং বাৰ্ডৰ সুভাষ নগৰৰ অংকিতা দে ৰ ঘৰ খন । ইংৰাজী, হিন্দী(MIL),অংক, বিজ্ঞান,সমাজ বিজ্ঞান,উচ্চ গণিত বিষয় লৈ সৰ্বমুঠ ৫৮৪ নম্বৰে উৰ্ত্তীণ হয় অংকিতা । অংকিতাৰ সফলতাত গৌৰাম্বিত লংকা বাসী ৰাইজ ।

গুৱাহাটী

হাইস্কুল শিক্ষান্ত পৰীক্ষাৰ ফলাফল শনিবাৰে ঘোষণা কৰে৷ এইবাৰ উত্তীৰ্ণৰ হ’ল ৬৪.৮০ শতাংশ। ইয়াৰে ভিতৰত ছাত্ৰৰ উত্তীৰ্ণৰ হাৰ হ’ল ৬৬.৯৩ শতাংশ আৰু ছাত্ৰীৰ উত্তীৰ্ণৰ হাৰ ৬২.৯১ শতাংশ৷ এইবাৰ পৰীক্ষাত অৱৰ্তীন হৈছিল ৩ লাখ ৪২ হাজাৰ ২২৪ গৰাকী ছাত্ৰ-ছাত্ৰী৷ তাৰ ভিতৰত ২ লাখ ২১ হাজাৰ ৭৫৬ গৰাকী উত্তীৰ্ণ হয়৷ এই উত্তীৰ্ণসকলৰ ভিতৰত প্ৰথম বিভাগত ৪৮,২৭৮ গৰাকী ছাত্ৰ-ছাত্ৰী উৰ্ত্তীণ হয়। উল্লেখ যে ২০১৯ বর্ষত উৰ্ত্তীণৰ হাৰ আছিল ৬০.২৩ শতাংশ। তেতিয়া ৬২.৬৯ শতাংশ ছাত্ৰ আৰু ৫৭.৯৯ শতাংশ ছাত্ৰী উত্তীৰ্ণ হৈছিল৷ মন কৰিব লগা বিষয় যে এইবাৰৰ হাইস্কুল শিক্ষান্ত পৰীক্ষাত উৰ্ত্তীণৰ হাৰৰ শীৰ্ষত থাকে শিৱসাগৰ জিলা। সৰ্বমুঠ ৮৩.৯২ শতাংশ ছাত্ৰ-ছাত্ৰীৰ উৰ্ত্তীণ হয় জিলাখনত৷ শিৱসাগৰ জিলাৰ পৰা মুঠ অৱৰ্তীন হৈছিল ১১,০২৩ গৰাকী ছাত্র-ছাত্ৰী৷ তাৰ ভিতৰত উৰ্ত্তীণ হয় ৯২৫১ গৰাকী ছাত্ৰ-ছাত্ৰী। জিলাখনত প্ৰথম বিভাগত ২৮৬০, দ্বিতীয় বিভাগত ৩৩৭৭ আৰু তৃতীয় বিভাগত ৩০১৪ গৰাকী ছাত্র-ছাত্ৰী উৰ্ত্তীণ হয়৷ ইয়াৰ বিপৰীতে ৪৪.২০ শতাংশ উৰ্ত্তীণ হাৰেৰে সৰ্বনিম্ন স্থানত অৱস্থান কৰে ধুবুৰী জিলাই। এইখন জিলাৰ পৰা অৱত্তীৰ্ণ হৈছিল মুঠ ১৮৮২৩ গৰাকী ছাত্র-ছাত্ৰী৷ ইয়াৰে ভিতৰত ৮৩১৯ গৰাকী ছাত্ৰ-ছাত্ৰী উৰ্ত্তীণ হয়৷ জিলাখনত প্ৰথম বিভাগত ১৭৭১, দ্বিতীয় বিভাগত ৩০২৫ আৰু তৃতীয় বিভাগ ৩৫২৩ গৰাকী ছাত্ৰ-ছাত্ৰী উৰ্ত্তীণ হয়৷ এয়া হ’ল এইবাৰৰ হাইস্কুল শিক্ষান্ত পৰীক্ষাৰ ফলাফলৰ এক পৰিসংখ্যা৷ এতিয়া আলোচ্য বিষয়টো হ’ল এইবাৰ হাইস্কুল শিক্ষান্ত পৰীক্ষাৰ ফলাফল ঘোষণাৰ পাছত নাই পূৰ্বৰ দৰে উল্লাস৷ যিহেতু পূৰ্বে ফলাফল ঘোষণা কৰাৰ পাছত সুখ্যাতিৰে উৰ্ত্তীণ হোৱা ছাত্ৰ-ছাত্ৰীসকলক লৈ এক উৎসৱমুখৰ পৰিৱেশ সৃষ্টি হয়৷ এইবাৰ সেই পৰিৱেশ সৃষ্টি হোৱা নাই৷ একমাত্ৰ ক’ৰোনা ভাইৰাছ সংক্ৰমণৰ বাবেই পূৰ্বৰ পৰিৱেশ সৃষ্টি হোৱা নাই৷  আনহাতে এইবাৰ পৰীক্ষাৰ ফলাফল ঘোষণাৰ লগে লগে বহু মেধাবী ছাত্ৰ-ছাত্ৰীৰ মাজত আন এক কাৰণত উৎসাহ দেখিবলৈ পোৱা নাই৷ যিহেতু বহু ছাত্ৰ-ছাত্ৰীৰ মনত থাকে এটা সপোন৷ সেই সপোনটো হ’ল উচ্চ শিক্ষাৰ বাবে অসমৰ বাহিৰৰ ৰাজ্যৰ শিক্ষানুষ্ঠানত নামভৰ্তি কৰাৰ৷ কিন্তু এইবাৰ ছাত্ৰ-ছাত্ৰীসকলে সেই আশা বাদ দিব লগা পৰিৱেশ সৃষ্টি হৈছে৷ কেৱল ক’ৰোনা ভাইৰাছ সংক্ৰমণৰ বাবেই তেওঁলোকে পুহি ৰখা সপোন বাস্তৱায়িত কৰিব নোৱাৰেগৈ৷ আনহাতে পিতৃ-মাতৃ আৰু অভিভাৱকে সন্তানক ৰাজ্যৰ বাহিৰলৈ শিক্ষা গ্ৰহণৰ বাবে পঠাবলৈ ইচ্ছা প্ৰকাশ নকৰে৷ উল্লেখ্য যে অসমতকৈ দেশৰ আন কেইবাখনো ৰাজ্যত ক’ৰোনাই ভয়াৱহ ৰূপ ধাৰণ কৰি আছে৷ এনে অৱস্থাত ৰাজ্যৰ বাহিৰৰ শিক্ষানুষ্ঠানত শিক্ষা গ্ৰহণ কৰাৰ সপোন একমাত্ৰ মহামাৰীৰ বাবেই বাস্তৱায়িত কৰিব নোৱাৰে ছাত্ৰ-ছাত্ৰীয়ে৷ ইপিনে, দেশত ক’ৰোনা সংক্ৰমণ হ্ৰাস পালেও নিজৰ সন্তানক কি ‘ৰিস্ক’লৈ আন ৰাজ্যলৈ শিক্ষা গ্ৰহণৰ বাবে প্ৰেৰণ কৰিব? এনে চিন্তাই আগুৰি ধৰিছে পিতৃ-মাতৃ আৰু অভিভাৱকৰ মাজত৷  এনে কাৰণত এইবাৰ ৰাজ্যৰ আগশাৰীৰ শিক্ষানুষ্ঠানত নামভৰ্তিৰ সময়ত ভীষণ প্ৰতিযোগিতা হোৱাটো স্বাভাৱিক হৈ পৰিব৷ ফলত তুলনামূলকভাৱে কম নম্বৰ লাভ কৰা ছাত্ৰ-ছাত্ৰীৰ বাবে শিক্ষানুষ্ঠানৰ অভাৱ আহি পৰাটো অস্বাভাৱিক নহয়৷ এই দিশতো ছাত্ৰ-ছাত্ৰী আৰু অভিভাৱকৰ মাজত চিন্তা আহি পৰিছে৷ মূলতঃ ক’ৰোনা ভাইৰাছ সংক্ৰমণৰ বাবেই সকলো দিশৰ লগতে ছাত্ৰ-ছাত্ৰীৰ মাজত কেতবোৰ কাৰকে প্ৰৱল ক্ৰিয়া কৰাতো স্বাভাৱিক হৈ পৰা স্বাভাৱিক হৈ পৰিব৷

ফোন : ৮৪০৪০১০৯২২

মেইল আইডি : utpal.bhuyan10@gmail.com