টীয়কৰ পৰা অঞ্জন প্ৰকাশ ।

সাম্প্ৰতিক পৰিস্থিতিৰ সন্মুখীন হৈ শিল্পজীৱী বৰেণ্য ব্যক্তি সকল আৰ্থিক সংগ্ৰামৰ সন্মুখীন হৈছে । এই সময়ত সাংস্কৃতিক কৰ্মী তথা শিল্পীসকলে সমাজলৈ আগবঢ়োৱা সেৱাৰ স্বীকৃতি স্বৰূপে তেওঁলোকৰ কাষত থিয় দিয়াটো সামাজিক দায়িত্ব বুলি অনুভৱ কৰি টীয়কৰ কেইগৰাকীমান ব্যক্তি এক সাহায্য পুঁজি হাতত লৈ আগবাঢ়িছে ।
কাকজান মহাবিদ্যালয়ৰ প্ৰাক্তন অধ্যক্ষ ডঃ অকণ চন্দ্ৰ শইকীয়া আৰু একে মহাবিদ্যালয়ৰে প্ৰাক্তন প্ৰবক্তা ৰবীন্দ্ৰনাথ দুৱৰাৰ পৃষ্ঠপোষকতাত তেওঁক মুখ্য আহ্বায়ক হিচাপে লৈ শিক্ষক তথা টীয়কৰ সক্ৰিয় সাংস্কৃতিক কৰ্মী ৰমেন শৰ্মা, অশোক বৰা আৰু তাপস তৰুণ শইকীয়াৰ নেতৃত্বত টীয়ক আৰু কাষৰীয়া অঞ্চলৰ ন্যূনতম ২৫ গৰাকী সাংস্কৃতিক কর্মীলৈ কৃতজ্ঞতা সূচক আৰ্থিক সহযোগিতাৰ কায্যসূচী আৰম্ভ কৰিছে । শিল্পী এজনৰ বিভিন্ন দিশ আৰু তেওঁৰ ওপৰত নিৰ্ভৰশীল পৰিয়ালৰ সদস্য সংখ্যাৰ ভিত্তিত কমেও দুহজাৰ টকাৰ পৰা তিনি হাজাৰ পাঁচশ টকাৰ ভিতৰত আৰ্থিক সহায় আগবঢ়াবলৈ লোৱা এই কাৰ্য্যসূচীত আজি প্ৰথম ১২ গৰাকী সাংস্কৃতিক কৰ্মীলৈ আৰ্থিক সাহায্য দিয়া হয়।
ঢোলৰ ওজা বলাই হাজৰিকা, দিহা নামৰ প্ৰচাৰক-শিল্পী বদন মলীয়া, প্ৰখ্যাত মহিলা ঢোলবাদক পূণ্যপ্ৰভা দত্ত তামুলী, বিশিষ্ট সংগীত শিল্পী বুধিন চাংমাই, ভাওনা সংস্কৃতিৰ সংগঠক, পৰিচালক কৃষ্ণপদ কলিতা, পেঁপা বাদক, জাঁজীমুখৰ প্ৰয়াত গুনাৰাম বৰাৰ পৰিয়ালবৰ্গ, ভাওনা সংস্কৃতিৰ অভিনেতা, পৰিচালক বিষ্ণু বৰা, বেণ্ড পাৰ্টীৰ শিল্পী, সংগঠক মাধৱ দাস, লোক বাদ্য শিল্পী দধি দাস, মহিলা চৰিত্ৰৰ বিশিষ্ট অভিনেতা ৰিঞ্জু শইকীয়া( চুচু), বিশিষ্ট সংগীত শিল্পী প্ৰণৱ জ্যোতি বৰুৱা ( কঙ্কণ) আৰু মহাপুৰুষীয়া অংকীয়া ভাওনা; সত্ৰীয়া নৃত্যৰ প্ৰশিক্ষক বলমা মাজকুৰিৰ প্ৰবীণ চুতীয়া আদি শিল্পী সকলক অৰ্থ সাহায্য প্ৰদান কৰে । আহ্বায়ক মণ্ডলীয়ে প্ৰকাশ কৰা মতে টীয়কৰ বহুকেইজন বৰেণ্য ব্যক্তিয়ে এই কাৰ্যসূচীৰ বাবে দান বৰঙণি আগবঢ়াইছে। তদুপৰি এই উদ্দেশ্য সফল কৰি তোলাৰ বাবে বিভিন্ন স্থানৰ ব্যক্তি, সাংস্কৃতিক কৰ্মী, অসম জাতীয়তাবাদী যুৱ ছাত্ৰ পৰিষদ,সদৌ অসম ছাত্ৰ সন্থা প্ৰমুখ্য আন আন দল সংগঠন সমূহৰো সহযোগিতা কামনা কৰিছে আহ্বায়ক মণ্ডলীয়ে ।

গুৱাহাটী

কোৱাৰেণ্টাইনৰ নিয়ম উলংঘাকাৰীৰ বিৰুদ্ধে অধিক কঠোৰ হ’বলৈ চৰকাৰৰ ওচৰত দাবী জনাইছে হিন্দু যুৱ ছাত্ৰ পৰিষদ, অসমে। আজি বাতৰি কাকতলৈ প্ৰেৰণ কৰা এক প্ৰেছ বিবৃতিৰ জৰিয়তে এই দাবী উত্থাপন কৰি পৰিষদৰ কেন্দ্ৰীয় সভাপতি বলেন বৈশ্যই কয় যে চৰকাৰৰ সোপাধিলা অৱস্থাৰ বাবে একাংশ মতলবী লোকে কোৱাৰেণ্টাইন নাইবা বিভিন্ন জ’ন’ৰ নিয়ম নীতি ভৰিৰে মোহাৰিবলৈও অকণমানো কুণ্ঠাবোধ নকৰে বুলি বৈশ্যই আক্ষেপ প্ৰকাশ কৰে। বিবৃতিটোত বৈশ্যই মহাৰাষ্ট্ৰৰ পৰা ডিব্ৰুগড় অভিমুখে যাত্ৰা কৰা লোকমান্য তিলক শ্ৰমিক এক্সপ্ৰেছ ৰেলগাড়ীখনৰ চেইন টানি শতাধিক যাত্ৰী নামি যোৱা ঘটনাটোৰ উদাহৰণ দাঙি ধৰি কয় যে চৰকাৰী ব্যৱস্থাৰ প্ৰতি আৰু আইনৰ প্ৰতি অকণমানো ভয় নথকা বাবে এইসকল লোলে এনে ভয়ানক ঘটনা সংঘটিত কৰিব পাৰিছে। এই ঘটনাৰ তীব্ৰ গৰিহণা দিয়াৰ লগতে দোষীক কৰায়ত্ব কৰি দৃষ্টান্তমূলক শাস্তি বিহিবলৈ পৰিষদে দাবী জনায়। বিবৃতিটোত বৈশ্যই ৰেলগাড়ীখনত বিনা টিকতত যাত্ৰী কেনেকৈ আহিবলৈ পালে বুলিও প্ৰশ্ন উত্থাপন কৰে। পূৰ্বৰ নিজামুদ্দিন জামাতি সকলক বিচাৰি উলিয়াব নোৱাৰা গৃহ বিভাগৰ শ্ৰমিক এক্সপ্ৰেছৰ পৰা পলায়ন কৰাসকলক বিচাৰি উলিওৱাটোও আন এক প্ৰত্যাহবান বুলি বৈশ্যই নিজৰ প্ৰতিক্ৰিয়া ব্যক্ত কৰে। একেটা বিবৃতিতে বৈশ্যই আৰু কয় যে অসমৰ লোকসকলে অতিশয় ধৈৰ্য্য আৰু অপৰিসীম কষ্টৰে লকডাউন, কোৱাৰেণ্টাইন আৰু বিভিন্ন জ’ন’ৰ নিয়ম সমূহ মানি আহিছে। বাহিৰৰ পৰা আহি কোনোবাই নীতি নিয়ম অমান্য কৰি এইসকল লোকক বিপদৰ মুখলৈ ঠেলি দিয়াতো ভয়ানক কথা হ’ব বুলি কয়। সেয়েহে চৰকাৰে প্ৰশাসনক এই ক্ষেত্ৰত অতি কঠোৰ হ’বলৈ পৰিষদৰ সভাপতিগৰাকীয়ে আহবান জনায়।