অংকুৰ বৰুৱা

দেশৰ অৰ্দ্ধ সামৰিক বাহিনীৰ কেণ্টিনত থলুৱাভাৱে উৎপাদিত সামগ্ৰী উপলব্ধ কৰাৰ লগতে বিক্ৰীৰ ব্যৱস্থা কৰিছে কেন্দ্ৰীয় চৰকাৰে৷ ইতিমধ্যে কেন্দ্ৰীয় গৃহমন্ত্ৰালয়ে এই বিষয়ে নিৰ্দেশনা জাৰি কৰিছে৷ আনহাতে দেশৰ গৃহমন্ত্ৰীয়েও এই দিশত বক্তব্য প্ৰদান কৰিছে৷ উল্লেখ্য যে বিশাল দেশ ভাৰতবৰ্ষত বিভিন্ন ধৰণৰ সামগ্ৰী থলুৱাভাৱে উৎপাদন হয়৷ সম্পূৰ্ণ থলুৱাভাৱে উৎপাদন হোৱা সামগ্ৰীৰ তালিকাখন একেষাৰে কৈ শেষ কৰিব নোৱাৰি৷ খাদ্য সামগ্ৰীৰ পৰা আৰম্ভ কৰি বহু সামগ্ৰী দেশৰ মানুহে উৎপাদন কৰি আহিছে৷ ইয়াৰে বহু সামগ্ৰীয়ে দেশৰ মানুহৰ মন জয় কৰিব পাৰিছে৷ উল্লেখ্য যে অসমতো তেনে সামগ্ৰী উৎপাদন হয়৷ চিৰা, সান্দহগুৰি আদিৰ পৰা আৰম্ভ কৰি বহু খাদ্য সামগ্ৰী অসমৰ উদ্যোগীয়ে উৎপাদন কৰি আছে৷ 
মন কৰিব লগা যে প্ৰধানমন্ত্ৰী নৰেন্দ্ৰ মোডীয়ে অলপতে ‘লকেল আৰু ভকেল’ শব্দ প্ৰয়োগ কৰি দেশৰ থলুৱা উদ্যোগীক উৎসাহিত কৰিছিল৷ প্ৰধানমন্ত্ৰীৰ সেই কথাই বিভিন্নজনে সঁহাৰি জনাইছিল৷ প্ৰকৃতাৰ্থত প্ৰধানমন্ত্ৰীৰ এনে উৎসাহজনক বক্তব্য ক’ৰোনাই ধ্বংস কৰা অৰ্থনীতিৰ সময়ত গুৰুত্বপূৰ্ণ৷ উল্লেখ্য যে দেশত থলুৱাভাৱে উৎপাদন হোৱা সামগ্ৰী অৰ্দ্ধ সামৰিক বাহিনীৰ কেণ্টিনত অহা ১ জুনৰ পৰা বিক্ৰী কৰাৰ বিষয়ে লোৱা সিদ্ধান্তৰ কথা সদৰি কৰিছিল৷ ইয়াৰ দ্বাৰা ক্ষুদ্ৰ উদ্যোগ আৰু খাদী উদ্যোগ লাভান্বিত হ’ব৷ সমগ্ৰ দেশত ১৭০০ কেন্দ্ৰীয় আৰক্ষী কেণ্টিন আছে৷ ইয়াত নিত্যব্যৱহাৰ্য্য সামগ্ৰীৰ লগতে কাপোৰৰ পৰা আৰম্ভ কৰি উপহাৰৰ সামগ্ৰী বিক্ৰী হয়৷ এই কেণ্টিনত বছৰী ২৮০০ কোটি টকাৰ সামগ্ৰী বিক্ৰী হয়৷ ইতিমধ্যে প্ৰধানমন্ত্ৰীৰ বক্তব্যৰ পাছত এই তথ্য পোহৰলৈ আহিছে৷
আনহাতে প্ৰধানমন্ত্ৰীৰ এই আহ্বানক সম্পূৰ্ণ সঁহাৰি জনাই কেন্দ্ৰীয় গৃহমন্ত্ৰী অমিত শ্বাহে৷ ইয়াৰ লগতে এই কথা পৰিষ্কাৰ হয় যে দেশত থলুৱাভাৱে উৎপাদন হোৱা সামগ্ৰীৰ এখন ভাল বজাৰ আছে৷
মন কৰিব লগা যে অসমত নিতৌ বহু সামগ্ৰী থলুৱাভাৱে উৎপাদন হৈ আছে৷ শেহতীয়াকৈ মাস্ক উৎপাদন কৰি অসমৰ উদ্যোগীয়ে নিজৰ দক্ষতা প্ৰতিপন্ন কৰিছে৷ ৰাজ্যখনত উৎপাদিত সামগ্ৰীৰ এক সুকীয়া মান প্ৰতিপন্ন হৈ আছে৷ যিহেতু ৰাজ্যবাসীয়ে শেহতীয়াকৈ গামোচাৰ মাস্ক সহজে গ্ৰহণ কৰি সকলোৰে দৃষ্টি আকৰ্ষণ কৰিছে৷ আনহাতে গুৱাহাটীৰ ‘ভোগালী’ নামৰ প্ৰতিষ্ঠানটোৰ লগতে অসমৰ বহু প্ৰতিষ্ঠানে থলুৱাভাৱে খাদ্য সামগ্ৰী উৎপাদন কৰি আছে৷ 
ইয়াৰ লগতে অসমৰ আত্মসহায়ক গোটবোৰে বিভিন্ন সময়ত খাদ্য সামগ্ৰী বজাৰত উলিয়াই ক্ৰেতাৰ মন জয় কৰিবলৈ সক্ষম হৈছে৷ তদুপৰি অসমৰ কেইটামান থলুৱা উদ্যোগে ৰাজ্যখনৰ লগতে চুবুৰীয়া ৰাজ্যৰো বজাৰ দখল কৰিবলৈ সক্ষম হৈছে৷ 
এনে সময়ত কেন্দ্ৰীয় চৰকাৰে এই থলুৱা উদ্যোগবোৰলৈ গুৰুত্ব আৰোপ কৰিবনে বুলি বিভিন্ন মহলত প্ৰশ্ন উত্থাপন হৈছে৷ ক’ৰোনা ভাইৰাছৰ সংক্ৰমণৰ সময়ত দেশত ভাগি পৰা অৰ্থনীতি পুনৰ উজ্জিৱীত কৰিবৰ বাবে কেন্দ্ৰীয় চৰকাৰে এনে পদক্ষেপৰ জৰিয়তে অসমৰ থলুৱা উদ্যোগীলৈ আশাৰ সঞ্চাৰ কৰিব বুলি বিভিন্ন মহলে আশা প্ৰকাশ কৰিছে৷ এনেসময়তে বিভিন্নজনে প্ৰশ্ন কৰিছে নৰেন্দ্ৰ মোডীৰ লকেল, কেতিয়া হ’ব ভকেল?

দৈনন্দিন বাতা নিজা প্ৰতিবেদন:

ভিছা বিষয়াৰ আলম লৈ চোৰাংচোৱাগিৰি কৰি আহিছে পাকিস্তানী লোকে৷ পূৰ্বতে পোৱা খবৰ মতেই তীক্ষ্ণ দৃষ্টি দি আছিল দিল্লী আৰক্ষীৰ বিশেষ কোষৰ বিষয়া৷ অৱশেষত মিলিল সফলতা৷ ধৰা পৰিল দিল্লীত অৱস্থিত পাকিস্তানী দূতাবাসৰ দুজন বিষয়া৷ এই বিষয়া দুজনৰ নাম হ’ল আবিদ হুছেইন আৰু তাহিৰ খান৷ এই কামত জড়িত থকাৰ অভিযোগ আন এক পাকিস্তানী নাগৰিক৷ জাভেদ হুছেইন নামৰ এই লোকজনকো গ্ৰেপ্তাৰ কৰা হৈছে৷ ধৃতসকলক জেৰা কৰি এই চক্ৰত আন কোন জড়িত আছে সেয়া জানিবলৈ চেষ্টা কৰা হৈছে৷ আনহাতে ২৪ ঘণ্টাৰ ভিতৰত পাকিস্তানৰ দুই ভিছা বিষয়াক ভাৰত এৰিবলৈ কোৱা হৈছে৷ ভাৰতীয় বৈদেশিক মন্ত্ৰালয়ৰ তৰফৰ পৰা গক বিবৃতিত জনোৱা হৈছে যে এক কূটনৈতিক মিছনৰ সদস্য হিচাপে নিযুক্ত থকাৰ পাছত নিজৰ দায়িত্বৰ সৈতে অসামঞ্জস্যপূর্ণ কর্মকাণ্ডত লিপ্ত আছিল এই দুই বিষয়া৷ তেওঁলোকৰ চৰকাৰৰ তৰফৰ পৰা তেওঁলোক অনাস্থাভাজন দূত ঘোষণা কৰি ২৪ ঘণ্টাৰ ভিতৰত দেশ এৰি যাবলৈ কোৱা হৈছে৷ ভাৰতৰ ৰাষ্ট্ৰীয় নিৰাপত্তাৰ বিৰুদ্ধে ষড়যন্ত্ৰ কৰাৰ তীব্ৰ প্ৰতিবাদ পাকিস্তান দূতাবাসৰ দায়িত্বত থকা বিষয়াক এই অভিযোগত অভিযুক্ত কৰা হৈছে৷ স্পষ্ট ভাষাত জানিবলৈ দিয়া হৈছে যে আগন্তুক দিনত পাকিস্তান দূতাবাসৰ বিষয়া বা কৰ্মীয়ে যেন নিজৰ কূটনৈতিক কামৰ পৰিৱৰ্তে ভাৰতৰ বিৰুদ্ধে ষড়যন্ত্রমূলক কামত জড়িত নাথাকে৷ এই কথা নিশ্চিত কৰা হ’ব৷ প্ৰাপ্ত খবৰ মতে আবিদ হুছেইন আৰু তাহিৰ খান নামৰ পাকিস্তান দূতাবাসৰ এই দুই বিষয়াৰ নাম ভিছা দিয়া কামত জড়িত আছিল৷ ইয়াৰ আলমতে তেওঁলোকে আইএছআইৰ হৈ কাম কৰি আছে৷ জাল কাগজপত্ৰ দেখুৱাই বিভিন্ন ঠাইত ঘুৰে৷ দেওবাৰে পুৱা দিল্লীৰ কৰোল বাগ এলেকাৰ এজন ব্যক্তিক দেখা কৰিবলৈ গৈছিল৷ তাত যিজন ব্যক্তিক লগ কৰিছিল তেওঁ ভাৰতীয় সেনা সংক্ৰান্তত কেতবোৰ নথিপত্ৰ দিওতে দিল্লী আৰক্ষীৰ বিশেষ কোষে তেওঁলোকক গ্ৰেপ্তাৰ কৰে৷ তাতে ধৰা পৰে সেই ঠাইত থকা পাকিস্তানী নাগৰিক জাভেদ৷ ধৰা পৰাৰ সময়ত জাল আধাৰ কাৰ্ড দেখুৱাই নিজকে তেওঁ ভাৰতীয় বুলি দাবী কৰিছিল৷ কিন্তু শেষ ৰক্ষা নহ’ল৷ দীৰ্ঘ সময় জেৰাৰ পাছত নিজৰ পৰিচয় স্বীকাৰ কৰে৷

দৈনন্দিন বাতা নিজা প্ৰতিবেদন :

প্রধানমন্ত্রী নৰেন্দ্ৰ মোডীৰ সভাপতিত্বত আয়োজিত সভাত কেন্দ্ৰীয় মন্ত্ৰীসভাই ১৪ বিধ খাৰিফ শস্যৰ নূন্যতম সহায়তা মূল্য (এমএছপি) বৃদ্ধিৰ অনুমোদন কৰিছে৷ আজি তথ্য আৰু সম্প্রচাৰ মন্ত্ৰী প্ৰকাশ জাভেদকাৰে কয়, বৰ্দ্ধিত এমএছপি দাম নিশ্চিত কৰিব যিটো উৎপাদন ব্যয়ৰ ৫০ শতাংশৰ পৰা ৮৩ শতাংশ বেছি হ’ব৷ মন্ত্ৰী পৰিষদৰ সিদ্ধান্ত সম্পর্কে সাংবাদিকৰ আগত জাভেদকাৰে কয়, চৰকাৰ এমএছএমইবোৰ উন্নয়নত গুৰুত্বপূৰ্ণ পদক্ষেপ লৈছে আৰু এই বহীত ২০,০০০ কোটি টকা ব্যয় কৰা হৈছে৷ মন্ত্ৰী পৰিষদে আজি এমএছএমইৰ ওপৰত চাপযুক্ত ২০,০০০ কোটি টকা অনুমোদন দিছে৷ ইয়াত ২ লাখ এমএছএমই উপকৃত হ’ব৷ মন্ত্ৰীসভাই আজি এমএছএমই (মাইক্ৰ, স্মল আৰু মিডিয়াম এণ্টাৰপ্ৰাইজ) ছেক্টৰৰ সংজ্ঞা পৰিৱৰ্তন কৰাৰ সিদ্ধান্ত লয়৷ মজলীয়া উদ্যোগৰ টাৰ্ণঅ’ভাৰৰ সীমা আগেয়ে ঘোষিত ১০০ কোটিৰ পৰা ২৫০ কোটিলৈ উন্নিত কৰা হৈছে৷ কেন্দ্ৰীয় মন্ত্ৰী নৰেন্দ্ৰ টোমাৰে মন্ত্ৰীসভাৰ সিদ্ধান্ত সম্পৰ্কে চমু বক্তব্যত কয়, কৃষকৰ স্বস্তি প্ৰদানৰ বাবে ১৪ বিধ খাৰিফ শসৎ নূন্যতম সমৰ্থন মূল্য (এমএছপি) ৫০ শতাংশৰ পৰা ৮৩ শতাংশ বৃদ্ধি কৰা হৈছে৷ আজিৰ বৈঠকৰ তাৎপৰ্যপূৰ্ণ বুলি ধৰা হৈছে৷ কাৰণ গৃহ মন্ত্ৰালয়ক ১ জুনৰ পৰা পর্যায়ক্রমে কনটেণ্ট জ’নবোৰৰ বাহিৰত থকা সকলো কাৰ্যক্ৰম পুনঃনির্মাণৰ বাবে নতুন নির্দেশিকা জাৰি কৰিছে৷