দৈনন্দিন বাৰ্তা সেৱা, জামুগুৰিহাট

বহি:ৰাজ্যৰপৰা উভতি অহা যুৱকসকলক ৰখা জামুগুৰিহাটৰ কোৱাৰেন্টাইন চেন্টাৰৰ বাবে আজি কনকলতা অসামৰিক চিকিৎসালয়ৰ ষ্টাফ নাৰ্ছ অঞ্জলী প্ৰধানে মাস্কসহিতে যোগান ধৰিলে চেনিটাইজৰ,স্প্ৰে-মেচিন,চেনিটাইজৰ ষ্টেণ্ড ৷ ৰক্তদাতা(এইচবিএছ) স্বেচ্ছাসেৱী সংগঠণৰ জৰিয়তে যোগান ধৰা এই সামগ্ৰীসমুহ আজি চতিয়া সমষ্টিৰ বিধায়ক পদ্ম হাজৰিকাক অৰ্পন কৰে স্বেচ্ছাসেৱী সংগঠণটোৰ বিষয়ববীয়া সকলে ৷ জামুগুৰি উচ্চতৰ মাধ্যমিক বিদ্যালয় আৰু কাষতেই থকা বাৰেচহৰীয়া সামুহিক ভৱণত স্থাপন কৰা কোৱাৰেন্টাইন চেন্টাৰত থাকি ১৪ দিনীয়া কোৱাৰেন্টাইনৰ সময় সম্পূৰ্ণ হোৱা ১৮ গৰাকী যুৱকক আজি স্বাস্থ্যবিভাগে আনুষ্ঠানিকভাৱে নিজ গৃহলৈ যাবলৈ অনুমতি দিয়া এক অনুষ্ঠানত ৫শ মাস্ক,৬ লিটাৰ চেনিটাইজৰ,স্প্ৰে-মেচিন ১টা,ছ’ডিয়াম হাইপ’ক্লৰাইড ১০ লিটাৰ আৰু ১টা চেনিটাইজৰ ষ্টেণ্ড সহিতে সামগ্ৰীসমুহ আজি চতিয়াৰ বিধায়ক পদ্ম হাজৰিকাৰ হাতত অৰ্পন কৰে ৷ মহামাৰীসদৃশ কৰ’নাৰ বাবেই দেখা দিয়া জটিল সময়ত ষ্টাফ নাৰ্ছ অঞ্জলী প্ৰধানৰ এনে কৰ্ম প্ৰশংসিত হিচাপে বিবেচিত হৈছে ৷

জোন বৰা, জামুগুৰিহাট।

মঙলদৈ,

দৰঙতো ক্ৰমাৎ বৃদ্ধি পাইছে ক’ভিড আক্ৰান্তৰ সংখ্যা। মঙলদৈ অসামৰিক চিকিৎসালয়ত শনিবাৰে পুৱতি নিশা ভৰ্তি কৰোৱা হ’ল আন দুজন ক’ভিড আক্ৰান্ত ব‍্যক্তিক। এই দুজনকে ধৰি মঙলদৈ অসামৰিক চিকিৎসালয়ত থকা ক’ভিড আক্ৰান্তৰ সংখ্যা ৪ জনলৈ বৃদ্ধি পালে। উল্লেখ‍্যযোগ্য যে পূৰ্বৰে পৰা চিকিৎসালয়খনত আমিৰুল ইছলাম আৰু নিজামুদ্দিন আলি নামৰ দুজন ক’ভিড আক্ৰান্ত চিকিৎসাধীন হৈ আছিল।শনিবাৰে পুৱতি নিশা ভৰ্তি কৰোৱা লোক দুজন হ’ল নন্দ বৰ্মন (৪৪) আৰু জালাল আলি (২৩) । নন্দ বৰ্মনৰ ঘৰ নামখলাৰ আঠিয়াবাৰীত হোৱাৰ বিপৰীতে জালাল আলিৰ ঘৰ ১/২ নং বৰুৱাঝাৰত । নন্দ বৰ্মন চেন্নাইৰ এখন ৰেষ্টুৰেন্টত কৰ্মৰত হৈ আছিল আৰু যোৱা ২৬ মে’ ত ৰেলযোগে আহি দৰঙত উপস্থিত হৈছিল । আনহাতে জালাল আলি মধ্যপ্ৰদেশত শ্ৰমিক হিচাপে কৰ্মৰত হৈ আছিল আৰু ২৫ মে’ ত আহি দৰঙত উপস্থিত হৈছিল । দৰঙত উপস্থিত হোৱাৰ পিছৰে পৰা দুয়োজন কেন্দ্ৰীয় বিদ্যালয়, মঙলদৈৰ কোৱাৰান্টাইন চেন্টাৰত আছিল । ইফালে, আমিৰুল ইছলামৰ লগত প্ৰত্যক্ষভাৱে সম্পৰ্ক থকা ৮ জন ব্যক্তিও মঙলদৈ অসামৰিক চিকিৎসালয়ৰ “ছাচপেকটেড ৱাৰ্ড” ত ভৰ্তি হৈ আছে ।

দৈনন্দিন বাৰ্তাৰ সেৱা, সোণতলী

কৰ’না ভাইৰাছৰ ভয়াবহ ৰূপ আৰু লক ডাউনৰ  মাজতে তথা শেহতীয়াভাৱে অহা নেৰানেপেৰা বৰষুণ আৰু সেই বৰষুণে সৃষ্টি কৰা আবতৰীয়া বানপানীয়ে সম্প্ৰতি ৰাজ্যৰ আন আন কৃষি প্ৰধান অঞ্চলৰ লগতে  কামৰূপ জিলাৰ বকো সমষ্টিৰো কৃষি প্ৰধান অঞ্চলত সৃষ্টি কৰিছে এক ভয়াংকৰ দূৰ্যোগময় পৰিস্থিতিৰ ৷ বৰ্ষটোৰ এই  আগতীয়া বানে ডুবাই পেলাইছে  সমষ্টিটোৰ হাজাৰ হাজাৰ হেক্টৰ ইৰিধানৰ খেতি পথাৰ ৷ গোটেই বছৰটো পৰিয়াল পোহপাল দিয়াৰ বাবে বকো দ’ কৃষিপ্ৰধান অঞ্চলসমূহত কৰা ইৰিধানৰ পথাৰসমূহ ৬/৭ ফুট পৰ্যন্ত পানীৰ যোৱাত ইয়াৰ কৃষকৰ মাজত সৃষ্টি হৈছে এক হাহাকাৰ পৰিস্থিতি  ৷ এনে এক ভয়াংকৰ দূৰ্ভিক্ষৰ  সম্ভাৱনা সৃষ্টি কৰি তোলা পৰিস্থিতিৰ মাজতে বকো সমষ্টিৰ কংগ্ৰেছী বিধায়িকা নন্দিতা দাসে আজি বকোৰ বানপীড়িত অঞ্চলসমূহ পৰিদৰ্শন কৰি এই বানে কৃষক  ৰাইজৰ কৰা ক্ষয় ক্ষতিৰ বুজ লয় ৷ যন্ত্ৰচালিত ভূটভুটী নাৱেৰে চৰকাৰী বিভাগৰ বিষয়া- কৰ্মচাৰীক লগত লৈ ছমৰীয়া ৰাজহ চক্ৰৰ এলেকাধীন প্ৰায় কুৰিখন বানাক্ৰান্ত ৰাজহ গাঁৱ পৰিদৰ্শন কৰি সংহাৰী বানে ইয়াৰ কৃষক ৰাইজৰ কৰা ক্ষতিৰ পৰিস্থিতি চাই বাৰুকৈয়ে মৰ্মাহত হৈ পৰে ৷ দিনজোৰা কাৰ্যসূচীৰে বিধায়িকা গৰাকীয়ে  ছমৰীয়া, বগুৰিগুৰী, পিজুপাৰা, টুপামাৰী,  ৰাঙাপানী আৰু কিচমত কাঠমী গাওঁপঞ্চায়তৰ এলেকাধীন ছমৰীয়া, পুঠিমাৰী, শালমাৰা, মন্দিৰা এন চি, মালিবাৰী, বঠিয়ামাৰী, বদলা, টিয়াপাৰা, সুঁতিৰপাৰ ,বেলতলা, জয়বাংলা, জাওঁকাটাদিয়া, জাওঁকাটা,  দুৰামাৰী , দক্ষিণ ৰাঙাপানী, আদি অঞ্চল পৰিদৰ্শন কৰি কৃষকৰ ক্ষয় ক্ষতিৰ বুজ লয় ৷ বিধায়িকা গৰাকীয়ে এই বানপীড়িত অঞ্চল পৰিদৰ্শন কালত শালমাৰা পাৰঘাট, মালিবাৰী বজাৰ, জয়বাংলা বজাৰ, জাওঁকাটাদিয়া আৰু দক্ষিণ  ৰাঙাপানীত সামাজিক দূৰত্ব বজাই ৰাখি কৃষক ৰাইজৰ পৰিস্থিতিৰ বুজ লোৱাৰ লগতে সাম্প্ৰতিক বান সমস্যা আৰু কৃষকৰ দুখ – দুৰ্গতিৰ ওপৰত মত বিনিময় কৰে ৷ মত বিনিময় কালত বিধায়িকা গৰাকীয়ে বকোৰ বানবিধ্বস্থ কৃষকসকলক সহায়ৰ হাত আগবঢ়াবলৈ আশ্বাস প্ৰদান কৰাৰ লগতে চৰকাৰীভাৱে পৰ্যাপ্ত সাহায্য ও ক্ষতিপূৰণ আদায় দিবলৈ চৰকাৰৰ ওচৰত দাবী তোলে ৷ এই বানপীড়িত অঞ্চলসমূহ পৰিভ্ৰমন কালত বিধায়িকা গৰাকীক সংগ দিয়ে সোণতলী আঞ্চলিক কলেজৰ সহকাৰী অধ্যাপক ভ° আজমল হক, ছমৰীয়া কৃষি চক্ৰৰ কৃষি উন্নয়ন বিষয়া  দীপক ডেকা, এ ই এ যঞ্জিত ঠাকুৰীয়া, ছমৰীয়া ৰাজহ চক্ৰৰ লাট মণ্ডল ক্ৰমে পদৰ দৈমাৰী, ৰাধাচৰণ ৰাভা, দীপক কুমাৰ, এচ  কে প্ৰদীপ ৰাভা, ছমৰীয়া ব্লক কংগ্ৰেছৰ সভাতি ধনেশেব বায়ন, সাধাৰণ সম্পাদক হাচেন আলী,  ব্লক মিডিয়া চেলৰ সমন্বয়ক দিলবৰ হুছেইন যুৱ নেতা পিংকু কলিতা প্ৰমূখ্যে কেবাগৰাকী দলীয় কৰ্মীয়ে ৷

প্ৰেৰক, ৰেজাউল কবিৰ, সোণতলী ৷

লংকা

 লংকাৰ নখুটীত লংকা আঞ্চলিক বন বিভাগ আৰু নখুটী বন বিভাগৰ যুটীয়া অভিযান । নিশাৰ অভিযানত নখুটীৰ চাৰ্থেগাও অঞ্চলৰ পৰা বন বিভাগে জব্দ কৰে এখন চোৰাং কাঠ ভৰ্টি টাটা মেজিক গাড়ী । জব্দকৃত কাঠখিনিৰ বজাৰ মূল্য প্ৰায় চল্লিছ হাজাৰ টকা । জব্দকৃত মেজিক খনৰ নম্বৰ AS-07-C-3089 । আনহাতে, নিশাৰ আন্ধাৰৰ সুযোগ লৈ মেজিক গাড়ী খনৰ চালক আৰু চোৰাং কাঠ সৰবৰাহকাৰী গাড়ী এৰি পলায়ন কৰাত কাকো আটক কৰিব নোৱাৰিলে  বন কৰ্মীয়ে ।পিছত আজি জব্দকৃত গাড়ী সহ কাঠখিনি লৈ অহা হয়  লংকা আঞ্চলিক বন বিষয়াৰ কাৰ্য্যলয়লৈ ।

 হোজাই

 দিন ৰাতি একাকাৰ কৰি বানৰ মাজত আবদ্ধ হৈ থকা শ শ পৰিয়ালক উদ্ধাৰ কৰি মানৱতাৰ নিদৰ্শন ডাঙি ধৰিলে কান্ধুলিমাৰী গাৱৰ সমাজ সেৱক জাইদুৰ ৰহমানে।তিনিদিনীয়া নেৰানেপেৰা বৰষুণৰ ফলত কপিলীৰ বাঢ়নি পানীত আবদ্ধ হৈ থকা হোজাই সমষ্টিৰ কান্ধুলিমাৰী, আমলীপুখুৰী,ডবকা নলা,,ৰাজবাৰী, আদি বিভিন্ন এলেকাত পানীৰ মাজত আবদ্ধ হৈ থকা শ শ পৰিয়ালক তিনিখন নাৱৰে উদ্ধাৰ কৰি ৰাজবাৰী , ৰেল লাইন আৰু আমলীপুখুৰী প্ৰাথমিক বিদ্যালয় আদি ঠাইত আশ্ৰয় প্ৰদান কৰিলে সমাজ সেৱক জাইদুৰ ৰহমানে।কপিলী পানীয়ে নমাই অনা এই মহা দুৰ্যোগৰ সময়ত মানৱতাৰ নিদৰ্শন ডাঙি ধৰা কান্ধুলিমাৰী গাৱৰ সমাজ সেৱক জাইদুৰ ৰহমানক ধন্যবাদ জনালে সকলোৱে । কপিলীৰ পানী ফেনেফুটুকাৰে বাঢ়ি অহাত হোজাই জিলাৰ বিভিন্ন স্থানৰ লগতে কান্ধুলিমাৰী অঞ্চলতো পানীৰ মাজত আবদ্ধ হৈ পৰিছিল এইসকল পৰিয়াল। ইফালে শুক্রবাৰে হোজাই জিলা প্ৰশাসনেও SDRF বাহিনীৰ সহযোগত উদ্ধাৰ কাৰ্য চলাই শ শ পৰিয়ালক উদ্ধাৰ কৰিলে হোজাই জিলা বিভিন্ন এলেকাৰ পৰা । SDRF বাহিনীৰ উদ্ধাৰ কাৰ্যত সহযোগ কৰিছিল হোজাই BDO, ৰাজহ চক্ৰ বিষয়া আৰু সমাজ সেৱক জাইদুৰ ৰহমানে। বানাক্রান্ত লোকসকলক উদ্ধাৰ কৰি ওখ স্থানত আশ্ৰয় প্ৰদান কৰি যোগান ধৰিছে খাদ্য সামগ্ৰী।

দৰঙৰ পৰা জয়দেৱ ডেকা

 দৰঙত বানপানী আৰু লকডাউনৰ সুবিধা গ্ৰহন কৰি গৰকাপ্তানি বিভাগে কোটি টকা খৰছ কৰি নিৰ্মাণ কৰা এখন বি ইউ জি দলং ৰাতি খুলি নিয়াৰ চেষ্টা দুৰ্বৃত্তৰ ৷ জিলাখনৰ আন্ধেৰীঘাট– জয়ন্তীপুৰ সংযোগী পথৰ পৰা হুছেইনচুবুৰীলৈ যোৱা পথৰ কাহিতলীত গৰকাপ্তানি বিভাগৰ ছিপাঝাৰ ক্ষেত্ৰীয় উপ – সংমণ্ডলে কোটি টকা ব্যয়ৰে নিৰ্মাণ কৰা বি ইউ জি দলংখন খুলি নিবলৈ চেষ্টা কৰিছিল বৃহৎ দুৰ্বৃত্তৰ দলে ৷ উন্নত প্ৰযুক্তি বিদ্যাৰে দলংখনত স্থাপন কৰা ন’ট বল্টুৰ ৭২ টা খুলি নিয়াত যথেষ্ট ক্ষতি সাধন হয় দলংখন ৷ ইতিমধ্যে গৰকাপ্তানি বিভাগৰ ছিপাঝাৰ ক্ষেত্ৰীয় উপ- সংমণ্ডল বিষয়া , অভিযন্ত্ৰা ঘটনা স্থলিত উপস্থিত হৈ ক্ষয়ক্ষতিৰ বুজ লোৱাৰ উপৰিও এজাহাৰ দাখিল কৰে বুঢ়া আৰক্ষী চকীত ৷ দলংখন মেৰামতি নকৰা পৰ্যন্ত পথটিৰে গধুৰ যানবাহন যাতায়ত বন্ধ কৰি দিয়ে গৰকাপ্তানি বিভাগে ৷ স্থানীয় লোকে সন্দেহ কৰিছে দলংখনৰ সামগ্ৰী সমুহ চুৰি কৰি নিবলৈ চেষ্টা কৰা দলটিৰ আছে বিশেষ কাৰিকৰী শিক্ষা ৷  বিশেষ কাৰিকৰী শিক্ষা নাথাকিলে উন্নত মানৰ যন্ত্ৰপাতিৰে নিৰ্মাণ কৰা দলংখনৰ ন’ট বল্টু সমুহ এইদৰে সাধাৰণ লোকে কেতিয়াও খুলিব নোৱাৰে ৷