খাৰুপেটীয়া

 ইছলাম ধৰ্মাৱলম্বী লোকে ত্যাগ আৰু সংযমৰ মাহ ৰমজানৰ এমাহ। ৰোজাৰ অন্তত আনন্দৰ উৎসৱ ঈদ উল ফিতৰ উৎযাপন কৰে। সদৌ অসম সংখ্যালঘু ছাত্ৰ ইউনিয়ন চমুকৈ আমছুৰ ধূলা আঞ্চলিক সমিতিৰ সাধাৰণ সম্পাদক কবিৰ আলিয়ে ইছলাম ধৰ্মাৱলম্বী লোকৰ লগতে সমগ্ৰ অসমবাসী জনসাধাৰণক  ঈদ উল ফিতৰৰ আন্তৰিক শুভেচ্ছা জ্ঞাপন কৰিছে। ক’ৰোণা ভাইৰাছৰ ভয়াবহতা তথা চৰকাৰে ঘোষণা কৰা লকডাউনে মানুহক আৰ্থিক আৰু মানসিকভাৱে জুৰুলা আৰু দুৰ্বল কৰা সময়ত  উদযাপিত হব লগা ঈদ উল ফিতৰৰ দৰে আনন্দ উৎসৱে সমাজৰ লোকৰ মনত সাহস, প্ৰেৰণা, মনোবল তথা ভ্ৰাতৃত্ববোধ বৃদ্ধি কৰিব বুলি আমছুৰ নেতৃত্ব আশাবাদী। ঈদ উল ফিতৰৰ আনন্দোৎসৱে সমাজ তথা দেশৰ পৰা অসূয়া অমঙ্গল দূৰ কৰাৰ কামনা কৰা লগতে সকলো ইছলামধৰ্মী লোকক লকডাউনৰ প্ৰতিটো নিৰ্দেশনা আখৰে আখৰে পালন কৰি ঈদ উৎসৱত অংশগ্ৰহণ কৰিবলৈ আমছুৰ নেতাজনে আহ্বান জনায়। কোনো লোকে যাতে লকডাউনৰ নীতি নিৰ্দেশনাক অমান্য নকৰে তাৰ প্ৰতি সমাজৰ সচেতন নাগৰিকসকলে তীক্ষ্ণ নজৰ ৰাখিব লাগিব। মছজিদ অথবা ঈদগাহ ময়দানত চৰকাৰী নিয়মানুসৰি ৫-৬ জন লোকেহে সমবেত হৈ ঈদৰ নামাজ পঢ়িবলৈ আহ্বান জনায়। বাকী সকলোৱে নিজৰ নিজৰ ঘৰত ঈদৰ নামাজ আদায় কৰিব। আনহাতে ঈদৰ দিনা মছজিদ অথবা ঈদগাহ ময়দানৰ সন্মূখত পৰম্পৰাগতভাৱে যি বজাৰ বা দোকান পোহাৰৰ ভিৰ হয় সেয়া এইবাৰৰ ঈদৰ সময়ত হব দিব নালাগে। মছজিদ অথবা ঈদগাহ পৰিচালনা কমিটিয়ে কঠোৰ হৈ এনে বজাৰ সমুহ যাতে নবহে তাৰ বাবে আগতীয়াকৈ ব্যৱস্থা লওক। সকলোৱে সামাজিক দূৰত্ব বৰ্তাই ৰাখি সীমিত ভাবে অনুষ্টুপীয়াকৈ নিজৰ ঘৰতে ঈদ উদযাপন কৰক। সামাজিক দূৰত্ব বৰ্তাই ৰাখি নিজে সুৰক্ষিত থাকক, আনকো সুৰক্ষিত ৰাখক।

বোকাজান

 লকডাউনৰ মাজতে আজি পুৱতি নিশা বোকাজান মহকুমাৰ খটখতি আৰক্ষীয়ে এ এছ ১৭ বি -১০৯৭ নম্বৰৰ ট্ৰাক এখনত তালাচী চলাই  আঠ লাখ টকাৰ ২২০ কাৰ্টুন অবৈধ অৰুণাচলী সুৰা জব্দ কৰে৷ লগতে ট্ৰাকখনৰ হেণ্ডিমেন আলি ইছলামক আটক কৰে৷ অৱশ্যে ট্ৰাকখনৰ চালকজন পলাই যাবলৈ সক্ষম হয়। জানিব পৰামতে অৰুণাচলৰ সুৰা বণ্ডৰ পৰা ট্ৰাকখনে অবৈধভাৱে সুৰাখিনি ডিমাপুৰ লৈ আনি আছিল। সুৰাখিনি ট্ৰাকখনৰ চালকৰ কেবিনৰ ওপৰত গোপনভাৱে সাজি লোৱা বৃহৎ চেম্বাৰত কঢ়িয়াই আনি আৰক্ষীৰ চকুত ধূলি দি খটখতি নাকা পাৰ হ’বলৈ চেষ্টা কৰি থকা অৱস্থাত খটখতি আৰক্ষীয়ে জব্দ কৰে। আৰক্ষীয়ে প্ৰকাশ কৰা মতে অবৈধ সুৰাখিনি ডিমাপুৰ ঘোঁৰাপত্তিৰ ধমেন্দ্ৰ নামৰ অবৈধ সুৰা ব্যৱসায়ীটোৰ নেতৃত্বত অনা হৈছিল। আৰক্ষীয়ে অধিক তথ্যৰ বাবে তদন্ত অব্যাহত ৰাখিছে।

ধুবুৰী

অসমত ক’ৰোণা ভাইৰাছত আক্ৰান্তৰ সংখ্যা এতিয়ালেকে ৩৯১ জনলৈ বৃদ্ধি পাইছে। আজি ধুবুৰী নতুনকৈ এগৰাকী কিশোৰী (১৭)ৰ দেহত ধৰা পৰিছে ক’ৰোনা পজিটিভ। কিশোৰীগৰাকীক উন্নত চিকিৎসাৰ বাবে বৰপেটা চিকিৎসা মহাবিদ্যালয়লৈ প্ৰেৰণ কৰা হয়। তেওঁ বিহাৰৰ ঠাকুগঞ্জ জিলাত ইটাভাটাত শ্ৰমিক হিচাপে কাম কৰি আছিল। যোৱা ১২ মে’ তাৰেখে বিহাৰৰ পৰা অহাৰ পিছত অসম-পশ্চিম বংগ সীমান্তৰ ছাগলীয়া কোৱাৰেণ্টাইন কেন্দ্ৰত ৰখা হৈছিল। যোৱা ১৩ মে’ তাৰিখে নমুনা সংগ্ৰহ কৰা হৈছিল। যোৱা ১৮ মে’ তেওঁক ঘৰলৈ যাবলৈ দিয়া হৈছিল। আজি তেওঁৰ তেজত ক’ৰোনা ভাইৰাছৰ উপস্থিতিৰ বিষয়ে ধুবুৰীৰ যুটীয়া স্বাস্থ্য সেৱা সঞ্চালক ডাঃ চৈয়দ ইমদাদুল্লাহ জানিবলৈ দিয়ে। আজিলৈকে জিলাখনৰ মুঠ দহ জন ক’ৰোনাত আক্ৰান্ত হয় যদিও ইয়াৰে পাঁচজন লোক সম্পূৰ্ণভাৱে সূস্থ হৈ ঘৰলৈ উভতি যায় আৰু বাকী পাঁচজন লোক এতিয়াও চিকিৎসাধীন হৈ আছে।

জামুগুৰিহাট

কোৱাৰেণ্টাইন জ’ন হিচাপে ঘোষণা হোৱা বিশ্বনাথ জিলাৰ তথা জামুগুৰিহাটৰ নিকটৱৰ্তী অসম অৰুণাচল সীমান্তৰ তিনিখন গাঁৱৰ জনসাধাৰণৰ বাবে বিশ্বনাথ জিলা প্ৰশাসনে অত্যাৱশ্যকীয় খাদ্য সামগ্ৰী যোগান ধৰিছে। অঞ্চলটোৰ টক’ গয়াৰী নামৰ ৬০ বছৰীয়া ব্যক্তিগৰাকী  মাৰাত্মক ক’ৰোনা ভাইৰাছৰ দ্বাৰা আক্ৰান্ত হোৱাটো নিশ্চিত হোৱাৰ পিছতেই ১৭ মে’ৰ দিনা বিশ্বনাথ জিলা প্ৰশাসনে কৰ’না আক্ৰান্ত টক’ গয়াৰীৰ গৃহ গাঁও ২নং পাখেৰিগুৰিৰ লগতে ১নং পাখেৰিগুৰি আৰু ছেৰফাংগুৰি অঞ্চলটোক কোৱাৰেণ্টাইন জ’ন হিচাপে ঘোষণা কৰে৷ কোৱাৰেণ্টাইন জ’নৰ এই তিনিখন গাঁৱত থকা মুঠ ১০৫ টা পৰিয়ালক আজি বিশ্বনাথ জিলা প্ৰশাসনে অত্যাৱশ্যকীয় খাদ্যসামগ্ৰী যোগান ধৰে৷ জানিব পৰা মতে ৪ জন সদস্যৰে এটা পৰিয়াল বুলি ধৰি কোৱাৰেণ্টাইন জ’নটোত থকা এই ১০৫ টা পৰিয়ালক ১৫ কেজিকৈ চাউল, ৫ কেজিকৈ আলু,২ কেজিকৈ দাইল আৰু পিয়াজ, ২ লিটাৰ মিঠাতেল, ১ কেজি নিমখৰ লগতে চাবোন, ছাৰ্ফ, টুথপেষ্ট আদি সামগ্ৰীসমূহ যোগান ধৰে৷ উল্লেখনীয় যে কোৱাৰেণ্টাইন জ’ন হিচাপে ঘোষণা কৰাৰ পিছত ১৪ দিনৰ বাবে এই অঞ্চলটোত সকলো লোকৰে প্ৰৱেশ আৰু প্ৰস্থান নিষিদ্ধ হোৱাৰ পৰিপ্ৰেক্ষিতত কোৱাৰেণ্টাইন জ’নটোত থকা গাঁও তিনিখনৰ এই ১০৫টা পৰিয়ালৰ অসুবিধাৰ প্ৰতি লক্ষ্য ৰাখি এইদৰে জিলা প্ৰশাসনে পৰিয়ালসমুহক অত্যাৱশ্যকীয় খাদ্যসামগ্ৰী সমূহ যোগান ধৰিছে৷ উল্লেখ্য যে অঞ্চলটোৰ ক’ভিড-১৯ পজিটিভ ট’ক গয়াৰীৰ প্ৰাথমিক সংস্পৰ্শলৈ অহা ১৬ জন ব্যক্তিৰ প্ৰথমটো ক’ভিড পৰীক্ষাৰ ফলাফল নিগেটিভ বুলি জানিব পৰা গৈছে৷ প্ৰণিধানযোগ্য যে টক’ গয়াৰীৰ সংস্পৰ্শলৈ অহা ইটাখোলা নতুন প্ৰাথমিক স্বাস্থ্যকেন্দ্ৰৰ চিকিৎসককে ধৰি ১১ গৰাকী স্বাস্থ্য কৰ্মীৰো কভিদ পৰীক্ষাৰ ফলাফল নিগেটিভ অহা বুলি জানিব পৰা গৈছে৷