নগাঁও

লকডাউনৰ বাবে বহি  ৰাজ্যত আৱদ্ধ হৈ থকা অসমৰ শ্ৰমিক, চিকিৎসাৰ বাবে যোৱা লোক, শিক্ষাৰ্থী সকলক ৰেল যোগে অসমলৈ ওভতাই আনিবৰ বাবে চৰকাৰে পদক্ষেপ গ্ৰহন কৰিছে। কাইলৈ পৰা ৰেল যোগে অসমলৈ এই লোক সকলে যাত্ৰা কৰিব। ৰাজ্যখনৰ আন জিলাৰ লগতে নগাঁও জিলাৰো বহি: ৰাজ্যত আবদ্ধ হৈ থকা কেবা হাজাৰ লোক জিলাখনলৈ অহাটো প্ৰকট হৈ পৰিছে। বহি: ৰাজ্যৰ পৰা নগাঁও জিলালৈ অহা  লোকসকলক চাপৰমূখ ৰেল জংচনত নমাৰ পিছত স্কিনিং কৰাৰ ব্যৱস্থা জিলা প্ৰশাসন, স্বাস্থ্য বিভাগে গ্ৰহন কৰিব । ইতিমধ্যে এই সন্দৰ্ভত প্ৰস্তুতি সম্পূৰ্ণ কৰি তোলা হৈছে । নগাঁও জিলা প্ৰশাসন আৰু স্বাস্থ্য বিভাগে জনোৱা মতে, বহি:ৰাজ্যৰ পৰা অহা লোক সকলক স্কিনিং কৰি জিলাখনৰ বিভিন্ন স্থানত কোৱাৰেনন্টাইন কৰা হ’ব। ইয়াৰ বাবে জিলা প্ৰশাসনে ১৭ টা স্থান নিৰ্নয় কৰিছে। আমনিৰ এছ আই আৰ ডি কমপ্লেক্স, পঞ্চায়ত সমূহীয়া ভৱন, আমলখী হাইস্কুল, নলতলীৰ কৃষি বিভাগৰ প্ৰশিক্ষণ কেন্দ্ৰ, নতুনকৈ নিৰ্মাণ কৰি থকা চিমনা বস্তি হস্পিতাল, লাইলুৰি ছাত্ৰী নিবাস, চামগুৰিৰ দুখন শিক্ষানুষ্ঠান, পুৰণিগুদামৰ বিবাহ ভৱন, ৰহা, ডিমৌ, কঠিয়াতলীকে ধৰি প্ৰায় ১৭ টা স্থানত এই লোকসকলক কোৱাৰেনন্টাইন কৰা হ’ব । জিলা প্ৰশাসনে প্ৰায় ১০০০ লোকক কোৱাৰেনন্টাইন কৰাৰ ব্যৱস্থা লৈছে। মনকৰিবলগীয়া যে নগাঁও চহৰক কোৱাৰেনন্টাইন শিবিৰ কেন্দ্ৰ স্থাপনৰ তালিকাৰ পৰা বাদ দিয়া হৈছে। উল্লেখ্য যে বহি:ৰাজ্যত নগাঁও জিলাৰ প্ৰায় ২০ সহস্ৰাধিক লোক আবদ্ধ হৈ আছে । এই লোক সকলে নিজৰ ঘৰলৈ আহিবৰ বাবে জিলা প্ৰশাসনৰ ওচৰত আবেদন কৰিছে বুলি জানিব পৰা গৈছে । এই লোক সকলক লৈ এতিয়া চিন্তিত হৈ পৰিছে নগাঁৱৰ জনসাধাৰণ । এই লোক সকলৰ আগমনৰ ফলত নগাঁও জিলাত এক অভাৱনীয় পৰিস্থিতিৰ সৃষ্টি হ’ব বুলি সচেতন মহলে আশংকা কৰিছে। আনহাতে, হোজাই জিলাৰ লামডিং ৰেল জংচনত হোজাই জিলা প্ৰশাসনে লোকসকলক স্কিনিঙৰ ব্যৱস্থা কৰিছে। ইপিনে, দিল্লীৰ পৰা সোমবাৰে আগৰতলালৈ আহিব লগা ৰেলৰ যাত্ৰী সকলক হোজাই ৰেল ষ্টেচনত স্কিনিঙৰ ব্যৱস্থা গ্ৰহন কৰিছে।

নাজিৰা

লকডাউন উলংঘা কৰি শিৱসাগৰ জিলা তথা নাজিৰা মহকুমাত অব্যাহত আছে নাগালেণ্ডৰ পাণৰ ছিণ্ডিকেট। দেশত ক’ৰোনা ভাইৰাছ সংক্ৰমণ প্ৰতিৰোধৰ বাবে কেন্দ্ৰীয় চৰকাৰ তথা ৰাজ্য চৰকাৰে ৰাজ্যত লকডাউন ঘোষণা কৰাৰ উপৰি আন্তঃৰাজ্যিক সীমান্তও ছীল কৰি থৈছে।তেনেস্হলত একাংশ কয়লা মাফিয়া আৰু পাণ ব্যৱসায়ীয়ে সীমান্ত অঞ্চলসমূহৰ যোগেদি চলাই গৈছে কয়লা আৰু নাগালেণ্ডৰ পাণৰ ছিণ্ডিকেট।দেওবাৰে সন্ধ্যা গেলেকী আৰক্ষীয়ে গোপন সূত্ৰম পম খেদি নাগালেণ্ডৰ পৰা অনা কেইবা লক্ষাধিক টকাৰ পাণসহ দুখন বলেৰ’ পিক আপ ভান জব্দ কৰাৰ লগতে ৬ জন ব্যক্তিক গ্ৰেপ্তাৰ কৰি পৰৱৰ্তী সময়ত ব্যক্তিগত জামিনত মুক্তি দিয়ে। ঘটনা সন্দৰ্ভত জানিব পৰা মতে দেওবাৰে বিয়লি লকাডাউন তথা সীমান্ত ছীল  আৰু সান্ধ্য আইন কৰি উলংঘা কৰি নাগালেণ্ডৰ পাণ ছিণ্ডিকেট চক্ৰ এটাই গোপনে নাগালেণ্ডৰ পৰা দুখন বলেৰ’ পিক আপ ভেনেৰে গেলেকীলৈ পাণ কঢ়িয়াই অনাৰ খবৰ লাভ কৰে গেলেকী আৰক্ষীয়ে৷ আৰক্ষীয়ে এই খবৰ লাভ কৰাৰ পাছতে গেলেকী থানাৰ ভাৰপ্ৰাপ্ত বিষয়া দ্বীপেন্দ্ৰ ছেত্ৰীৰ নেতৃত্বত যোৱা এটা আৰক্ষীৰ দলে সীমান্তৰ শিঙিবিল অঞ্চলৰ পৰা কেইবালক্ষাধিক টকাৰ পাণসহ দুখন গাড়ী জব্দ কৰি গেলেকী থানালৈ আনে। আৰক্ষীয়ে এ এচ-৪বি চি-২৮৪১ আৰু এন এল-০৪ডি-৫৯০৭ নম্বৰৰ দুখন পাণ ভৰ্তি বলেৰ’ পিক আপ ভান জব্দ কৰাৰ লগতে ৰমজান আলি, মুজিবুৰ হুছেইন, মহম্মদ হুছেইন, ইদুল আলি, ৱাজিদ আলি আৰু মহম্মদ কুতুবুদ্দিন নামৰ নামৰ ৬ জন ব্যক্তিক গ্ৰেপ্তাৰ কৰে। পৰবৰ্তী পৰ্যায়ত আৰক্ষীয়ে এক গোচৰ পঞ্জীয়ন কৰি গ্ৰেপ্তাৰ কৰালোক কেইজনক ব্যক্তিগত জামিনত মুক্তি দিয়ে।