অজয় ডেকা,মঙলদৈ

সন্তানক চহৰৰ যান্ত্ৰিকতাৰ পৰা আঁতৰত ৰাখি গাঁৱৰ পৰিবেশৰ মাজতে সংগোপনে শিক্ষাৰ ক্ষেত্ৰ খনত  আগবঢ়াই নিয়া দুটি সন্তানৰ পিতৃ মাতৃয়ে আজি আনন্দৰ বন্যা বোৱাবলৈ সক্ষম হ’ল৷অকল পিতৃ মাতৃয়ে নহয় সেই অঞ্চলটোতো আজি বিৰাজ কৰিছে এক আনন্দ উৎসৱ মুখৰ পৰিবেশ৷ আকৌ এবাৰ প্ৰমান কৰিলে সেই দুই সন্তানৰ পিতৃ মাতৃয়ে নিজৰ সন্তানক সু- শিক্ষিত কৰি গঢ়ি তুলিবলৈ চহৰৰ কোনো যান্ত্ৰিকতাৰ মাজলৈ যোৱাৰ প্ৰয়োজন নাই৷ আৰু তাক বাস্তৱত প্ৰতিপন্ন কৰি দেখুৱালে সেই কেইগৰাকী পিতৃ মাতৃৰ দুই সন্তান ধৃতিৰাজ আৰু ভৃগুমোহনে৷ সদ্যঘোষিত হাইস্কুল শিক্ষান্ত পৰীক্ষাত প্ৰথম স্থান আৰু নৱম স্থান লাভ কৰি সমগ্ৰ দৰঙৰ লগতে ঐতিহাসিক পথৰুঘাটলৈ গৌৰৱ কঢ়িয়াই আনিলে বৰমপুৰ জাতীয় বিদ্যালয়ৰ ছাত্ৰ ধৃতিৰাজ বাস্তৱ কলিতা আৰু শ্ৰীমন্ত শংকৰদেৱ বিদ্যালয়ৰ ছাত্ৰ ভৃগুমোহন কুমাৰে।সদ্য ঘোষিত হাইস্কুল শিক্ষান্ত পৰীক্ষাত ৰাজ্যৰ ভিতৰতে শীৰ্ষ স্থান লাভ কৰাৰ পাছত আনন্দমুখৰ হৈ পৰিছে ধৃতিৰাজৰ বাসগৃহৰ লগতে দৰং বাসী। প্ৰথম স্থান লাভ কৰি দৰঙলৈ গৌৰৱ কঢ়িয়াই অনা দৰং জিলাৰ বানেকুছি জাতীয় বিদ্যালয়ৰ ছাত্ৰ তথা পদুম পুখুৰী উচ্চ মাধ্যমিক বিদ্যালয়ৰ পৰা পৰীক্ষাত উত্তীৰ্ণ হোৱা  ধৃতিৰাজ বাস্তৱ কলিতাই  ৫৯৫ (৯৯.১৭)নম্বৰ লাভ কৰি  প্ৰথম স্থানেৰে  সমগ্ৰ দৰং জিলালৈ গৌৰৱ কঢ়িয়াই অনা দৰঙৰ প্ৰথম গৰাকী ছাত্ৰ৷ পঢ়াৰ কোনো ধৰনৰ সময়সুচী নোলোৱাকৈ একাগ্ৰতাৰে পঢ়াত মনোনিৱেশ কৰি শীৰ্ষস্থান লাভ কৰিবলৈ সক্ষম হোৱা ধৃতিৰাজ ভৱিষ্যতে এগৰাকী সু-চিকিৎসক হোৱাৰ সপোন পুহি ৰাখিছে৷ বৰমপুৰ উচ্চতৰ মাধ্যমিক বিদ্যালয়ৰ শাৰীৰিক ব্যাম বিভাগৰ প্ৰক্ষিশক নৱ কুমাৰ কলিতা আৰু টুলুমনি কলিতাৰ সন্তান ধৃতিৰাজ বাস্তৱ কলিতাই বৰমপুৰ জাতীয় বিদ্যালয়ত অংকুৰ শ্ৰেণীৰ পৰা প্ৰাথমিক শিক্ষা আৰম্ভ কৰি মেট্ৰিক পৰীক্ষাত অৱতীৰ্ণ হৈ ৰাজ্যৰ ভিতৰতে শীৰ্ষস্থান লাভ কৰি দৰং জিলালৈ গৌৰৱ কঢ়িয়াই অনাৰ লগতে জাতীয় বিদ্যালয় খনৰো নাম উজ্জ্বলাই তুলিলে৷ ধৃতিৰাজ বাস্তৱ কলিতাই অসমীয়াত ৯৮, ইংৰাজীত ৯৯, সাধাৰণ গনিতত ১০০ ,সমাজ বিজ্ঞানত ৯৮, আৰু উচ্চ গনিতত ১০০ নম্বৰসহ মুঠ ৫৯৫ নম্বৰ লাভ কৰিবলৈ সক্ষম হয়৷ ধৃতিজৰৰ পিতৃ মাতৃয়ে আমাৰ সংবাদিকক  জনোৱা অনুসৰি কোনো ধৰনৰ ঘৰুৱা টিউচন নোলোৱাকৈ বিদ্যালয়ৰ শিক্ষক সকলৰ পৰা পোৱা শিক্ষাৰে এনে কৃতিত্ব লাভ কাৰৰ লগতে টিভি চোৱা আৰু মোবাইলৰ প্ৰতি কোনো ধৰনৰ ৰাপ নাই বুলি জনোৱাৰ লগতে মোবাইলটো কেৱল পঢ়াৰ ক্ষেত্ৰতহে ব্যৱহাৰ কৰিছিল বুলি অৱগত কৰে৷ ইফালে নৱম স্থান লাভ কৰি দৰঙলৈ গৌৰৱ কঢ়িয়াই আনিলে দৰঙৰ শ্ৰীমন্ত শংকৰদেৱ বিদ্যালয়ৰ ছাত্ৰ ভৃগু মোহন কুমাৰে । ৫৮৫ নম্বৰ লাভ কৰি এই নৱম স্থান দখল কৰে দৰঙৰ ছাত্ৰ গৰাকীয়ে ।অসমীয়াত ৯৮ ইংৰাজীত ৮২ অংকত ৯০ বিজ্ঞানত ৯০ উচ্চ গনিতত ৯০ আৰ সমাজ বিজ্ঞানত ৮৮, (৯৭.৫) শতাংশ নম্বৰ লাভ কৰি ছাত্ৰজনে অসমৰ ভিতৰত নৱম স্থান লাভ কৰিবলৈ সক্ষম হয়৷ দৰঙৰ বৈৰাগীপাৰা নিবাসী তথা বেজভাগৱতী উচ্চ মাধ্যমিক বিদ্যালয়ৰ শিক্ষক চন্দ্ৰ কুমাৰ আৰু বিজয়া বৰুৱা কুমাৰৰ পুত্ৰ তথা শ্ৰীমন্ত শঙ্কৰদেৱ  বিদ্যালয়ৰ ছাত্ৰ গৰাকীৰ ফলাফলত উৎফুল্লিত বিদ্যালয় খনৰ শিক্ষক শিক্ষয়িত্ৰী,ছাত্ৰ ছাত্ৰী  তথা  দৰংবাসী ৷ভৃগুমোহনে জনোৱামতে প্ৰতিদিনে পঢ়িছিল ১৬/১৮ ঘন্টা পঢ়াৰ লগতে ভবিষ্যতে এগৰাকী প্ৰশাসনিক বিষয়া হোৱাৰ মন পুহি ৰাখিছে৷ তিনিটা বিষয়ত ঘৰুৱা শিক্ষকৰ সহায় লোৱা ভৃগু মোহন কুমাৰে যুৱ সমাজক আহ্বান জনায় চ’ছিয়েল মিডিয়া ব্যৱহাৰ কৰি নিজৰ জীৱন ধংস কৰাৰ বিপৰীতে জীৱনৰ মুল্যবান সময়খিনি উদ্ভাৱনত ব্যৱহাৰ কৰিবলৈ ৷ ছাত্ৰ গৰাকীৰ সাফল্যত উৎসাহিত হৈ দৰঙৰ বিভিন্ন প্ৰান্তৰ লোক তথা দল সংগঠনে ছাত্ৰ দুগৰাকীক আদৰনী জনাই৷ বিশেষকৈ মঙলদৈ বিধানসভা সমষ্টিৰ যুৱ বিধায়ক গুৰুজ্যোতি দাস, ছিপাঝাৰ বিধানসভা সমষ্টিৰ বিধায়ক বিনন্দ কুমাৰ শইকীয়া, দৰং জিলাৰ উপায়ুক্ত দিলীপ কুমাৰ বৰা, জিলা শিক্ষা বিষয়া জৱাহিৰা টাবাচুম, অসম সাহিত্য সভাৰ প্ৰধান সম্পাদক যাদৱ শৰ্মা , মঙলদৈ লোকসভা সমষ্টিৰ প্ৰাক্তন সাংসদ মাধৱ ৰাজবংশী, দৰঙৰ জ্যেষ্ঠ সাংবাদিক ভাৰ্গৱ কুমাৰ দাস, দৰং জিলা সাহিত্য সভাৰ সভাপতি শৈলেন্দ্ৰ কুমাৰ ৰাজবংশী, প্ৰাক্তন সম্পাদক মুকুট হাজৰিকা,মঙলদৈ আঞ্চলিকৰ সম্পাদক দীপেন্দ্ৰ নাৰায়ন কোঁৱৰ,ৰানা আলম, দৰং জিলা ছাত্ৰ সন্থাৰ সভাপতি খনিন্দ ৰাজবংশী উপ সভাপতি নিৰঞ্জন শইকীয়া সাধাৰন সম্পাদক পৰাগ কুমাৰ চহৰীয়া, অসম জাতীয়তাবাদী যুৱ ছাত্ৰ পৰিষদৰ দৰং জিলা সমিতি, আছুৰ কেন্দ্ৰীয় কাৰ্য্যনিৰ্বাহক অৰুপ কলিতা,দৰং জিলা শ্ৰীমন্তশঙ্কৰদেৱ সংঘ, বিশিষ্ট সমাজকৰ্মী গৌতম চহৰীয়া,বিজেপি নেতা প্ৰনৱ বৰুৱাৰ লগতে বিশিষ্ট ব্যক্তি সকল তথা দৰং জিলাৰ বিভিন্ন দল সংগঠনৰ লোক উপস্থিত হৈ দুয়োকে উস্ম আদৰনি জনাই৷ দৰং জিলা প্ৰশাসন আৰু অসম চৰকাৰৰ হৈ দুয়োগৰাকী কৃৰ্তীমানকে জিলা উপায়ুক্তই গামোচা, গ্ৰন্থ, মাস্ক, চেনিটাইজাৰ প্ৰদান কৰি সম্বন্ধনা জ্ঞাপন কৰে৷ 

কলিয়াবৰ

অতি দৰিদ্ৰ পৰিৱেশতেই নিজ প্ৰতিভা আৰু একাগ্ৰতাৰ যোগেদি লাভ কৰা সফলতাই সুগন্ধি বিলাইছে কলিয়াবৰৰ জখলাবন্ধাৰ নাতি দুৰত্বৰ চিকণী-বৰহোলাত। দৰিদ্ৰতাত কক-বকাই থকা কলিয়াবৰৰ চিকণী-বৰহোলাৰ এইজন ছাত্ৰই আজি ঘোষিত হাইস্কুল শিক্ষান্ত পৰীক্ষাত উত্তীৰ্ণ হ’ল সুখ্যাতিৰে। নিজৰ মাটি-ভেটিহীন পিতৃ – মাতৃৰ সন্তান শ্বাকিল আহমেদ চৰকাৰী খণ্ডৰ চিকণী-বৰহোলা উচ্চ মাধ্যমিক বিদ্যায়লত অধ্যয়ন কৰি আটাইকেইটা বিষয়তে লেটাৰ মাৰ্কসহ ৮৬.৩ শতাংশ নম্বৰেৰে ডিষ্টিংচন লাভ কৰি উত্তীৰ্ণ হ’ল। ইংৰাজীত – ৮৪, অসমীয়াত – ৯২, সাধাৰণ গণিতত – ৮৮, সাধাৰণ বিজ্ঞানত ৮১, সমাজ বিজ্ঞানত – ৮০ আৰু ঐচিক হিন্দী বিষয়ত ৮৬ নম্বৰৰে মুঠ ৫১৮ নম্বৰ লাভ কৰিছে। বৰ্তমান শিক্ষা ব‍্যৱস্থা আৰু আন বহু ছাত্ৰ-ছাত্ৰীৰ বাবে ৮৬.৩ % নম্বৰ গুৰুত্বহীন হ’লেও দৰিদ্ৰ পৰিয়ালটিৰ লগতে চুবুৰীয়াক আনন্দিত কৰিছে শ্বাকিলৰ এই সফলতাই। দৰিদ্ৰ ছাত্ৰজনে ভৱিষ‍্যতে ইয়াতকৈও অধিক সফল হৈ পিতৃ-মাতৃৰ লগতে গাঁওখনলৈ গৌৰৱ কঢ়িয়াই আনক। পুণৰবাৰ প্ৰমাণিত হ’ল – সুগন্ধি ফুল য’তেই নাথাকক কিয়, তাৰ সুগন্ধি বিয়পিবই।জখলাবন্ধা বাণিজ‍্যিক কেন্দ্ৰৰ প্ৰায় লগতে লাগি থকা আগতীয়া বাৰিষাৰ পানীয়ে যাতায়তৰ সমস‍্যাৰ সৃষ্টি কৰা এখন গাঁৱৰ বাসিন্দা শ্বাকিলৰ পিতৃয়ে কবিৰাজী কৰি পোহপাল দিয়ে পৰিয়ালটো, আনহাতে মাতৃ মানসিকভাৱে অসুস্থ। তাৰ মাজতেই অতি সীমিত সা-সুবিধাৰ মাজতেই শ্বাকিলে দেখুৱাইছে একাগ্ৰতাৰ অনন‍্য উদাহৰণ। আনহাতে, আজি ঘোষণা কৰা হাইস্কুল শিক্ষান্ত পৰীক্ষাৰ ফলাফলত পুণৰ ব‍্যক্তিগত খণ্ডৰ বিদ‍্যালয়ে আধিপত‍্য বিস্তাৰ কৰে। কলিয়াবৰৰ অসমীয়া মাধ‍্যমৰ ব‍্যক্তিগত খণ্ডৰ বিদ‍্যালয় ক্ৰমে শিশু বিদ‍্যাপীঠ উচ্চ মাধ‍্যমিক বিদ‍্যালয়, কুঁৱৰীটোল আৰু শঙ্কৰদেৱ শিশু নিকেতন, কলিয়াবৰ তিনিআলিয়ে ১০০% সফলতা লাভ কৰে। ইংৰাজী মাধ‍্যমৰ ব‍্যক্তিগত খণ্ডৰ বিদ‍্যালয় চেণ্ট ৰৱাৰ্টচ হাইস্কুল, জখলাবন্ধা আৰু আয়ুস পাব্লিক স্কুল, জখলাবন্ধাৰে উত্তীৰ্ণৰ হাৰ ১০০%। তাৰ বিপৰীতে চৰকাৰী মাধ‍্যমৰ বিদ‍্যালয় মধ‍্য কলিয়াবৰ উচ্চ মাধ‍্যমিক বালিকা বিদ‍্যালয়ে ১০০% ফলাফলৰে সকলোৰে দৃষ্টি আকৰ্ষণ কৰিবলৈ সক্ষম হৈছে। 

এ জে আকন্দ‌, নগাঁও

আজি ঘোষিত হাইস্কুল শিক্ষান্ত পৰীক্ষাৰ ফলাফলত নগাঁও জিলালৈ সুনাম কঢ়িয়াই আনিলে তিনি কৃতীমানে। তেওঁলোক হ’ল ঝলক জালান, শিল্পীশিখা ডেকা আৰু ঋত্বিক কুমাৰ সূত। ইয়াৰে নগাঁও চহৰৰ চেন্ট এন্টনিজ ইংলিছ স্কুলৰ  ছাত্ৰী ঝলক জালানে সপ্তম স্থান, পলাশতল কাছমাৰী হাইস্কুলৰ ছাত্ৰী শিল্পীশিখা ডেকাই নৱম স্থান আৰু ৰহাৰ প্ৰাঞ্জল মেমোৰিয়েল একাডেমীৰ ছাত্ৰ ঋত্বিক কুমাৰ সূতে দশম স্থান লাভ কৰিছে। উল্লেখ্য যে ৰাজ্যৰ ভিতৰতে সপ্তম স্থান লাভ  ছাত্ৰী ঝলক জালান নগাঁও চহৰৰ ধিং গেটৰ বাসিন্দা তথা বস্ত্ৰ ব্যৱসায়ী পৱন জালান আৰু হেমলতা জালানৰ কণ্যা। তেওঁ হিন্দীত ৯৬, ইংৰাজীত ৯৮, সাধাৰণ গণিতত ১০০, সাধাৰণ বিজ্ঞানত ৯৭, সমাজ বিজ্ঞানত ৯৬ আৰু উচ্চ গণিতত ১০০নম্বৰ সহ মুঠ ৫৮৭ নম্বৰ লাভ কৰিছে। তেওঁ  দৈনিক ছয়-সাত ঘন্টাকৈ নিয়মীয়াকৈ অধ্যয়ণ কৰিছিল। অৱশ্যে উচ্চ গণিত আৰু সাধাৰণ বিজ্ঞান বিষয়ত তেওঁৰ টিউচন আছিল। তেওঁৰ প্ৰিয় লেখক আবুল কালাম। সদ্যহতে উচ্চতৰ মাধ্যমিক বিজ্ঞান শাখাত নাম ভৰ্তি কৰাবলৈ সিদ্ধান্ত লৈছে। তেওঁ ভৱিষ্যতে এগৰাকী চিকিৎসক হোৱাৰ আশা পুহি ৰাখিছে। আনহাতে, নৱম স্থান দখল কৰি নগাঁও জিলালৈ সুনাম কঢ়িয়াই অনা নগাঁও জিলাৰ পলাশতল কাছমাৰী হাইস্কুলৰ ছাত্ৰী শিল্পীশিখা ডেকা বিদ্যালয়খনৰে প্ৰধান শিক্ষক ভূৱন চন্দ্ৰ ডেকা আৰু এখন ব্যাক্তিগত খণ্ডৰ বিদ্যালয়ৰ  শিক্ষয়িত্ৰী ডুলুমণি বৰা ডেকাৰ কণ্যা। তেওঁ অসমীয়াত ৯৮, ইংৰাজীত ৯৫, সাধাৰণ গণিতত ১০০,সাধাৰণ বিজ্ঞানত ৯২,সমাজ বিজ্ঞানত ১০০ আৰু উচ্চ গণিতত ১০০নম্বৰ সহ মুঠ ৫৮৫ নম্বৰ লাভ কৰিছে। ফলাফলত উৎফুল্লিত ছাত্ৰী গৰাকীয়ে কয় যে তেওঁ স্থান লাভ কৰিব বুলি নিশ্চিত আছিল।  তেওঁ দৈনিক ৯ -১০ ঘন্টাকৈ অধ্যয়ণ কৰিছিল। বৰগীত গাই ভাল পোৱা শিল্পীশিখাৰ কিতাপ পঢ়া, খেলাধূলাৰ প্ৰতিও বিশেষ ৰাপ থকাৰ কথাও সদৰী কৰে। সদ্যহতে বিজ্ঞান শাখাত নাম ভৰ্তি কৰি অধ্যয়ণ কৰি তেওঁৰ ভৱিষ্যতে এগৰাকী চিকিৎসক হোৱাৰ মন। দশম স্থান লাভ কৰি নগাঁও জিলালৈ গৌৰৱ কঢ়িয়াই অনা ঋত্বিক কুমাৰ সূত  জিলাখনৰ ৰহা গড়মাৰী নিৱাসী তথা বিষয় শিক্ষক দীপক কুমাৰ সূত আৰু ৰহা কলেজৰ সহযোগী অধ্যাপিকা ৰিণু বৰা সূতৰ পুত্ৰ। ঋত্বিকে অসমীয়াত ৯২, ইংৰাজীত ৯৭, সাধাৰণ গণিতত ১০০, সমাজ বিজ্ঞানত ৯৮ আৰু উচ্চ গণিতত ১০০ নম্বৰ সহ মুঠ ৫৮৪ নম্বৰ লাভ কৰিছে। তেওঁ দৈনিক ১১-১২ ঘন্টাকৈ অতি নিয়মিত ভাৱে অধ্যয়ণ কৰিছিল। নগাঁৱৰে শিক্ষানুষ্ঠানত উচ্চতৰ মাধ্যমিক বিজ্ঞান শাখাত নাম ভৰ্তি কৰি অধ্যয়ণ কৰিব তেওঁ। তেওঁৰ ভৱিষ্যতে এগৰাকী সুনাগৰিক হোৱাৰ সপোন পুহি ৰাখিছে যদিও চিকিৎসক হোৱাৰো আশা মনতে পুহি ৰাখিছে।

টিংখাং

সমগ্ৰ বিশ্বৰ লগতে ভৰতবৰ্ষতো এতিয়া ক’ৰণা মহামাৰীয়ে ভয়ংকৰ ৰূপ ধাৰণ কৰিছে। অসমতো ক্ৰমাৎ বৃদ্ধি পাইছে কভিড-১৯ ৰ সংক্ৰমণ। তাৰমাজতে টিংখাং মহাবিদ্যালয়ৰ ৰাজনৈতিক বিজ্ঞান বিভাগৰ অধ্যাপক ভাস্কৰ নেওঁ‌গ আৰু নীলমনি আদৰ্শ জাতীয় বিদ্যালয়ৰ অধ্যক্ষ ৰিজুমণি নেওঁ‌গৰ আজি ১৭ সংখ্যক বিবাহ বাৰ্ষিকী দিনটোতে একমাত্ৰ সন্তান টিংখাঙৰ নীলমনিৰ নিবাসী মানস উত্তম নেওঁ‌গে হাইস্কুল শিক্ষান্ত পৰীক্ষাত ৰাজ্যখনৰ ভিতৰতেই পঞ্চম স্থান দখল কৰি বৃহত্তৰ টিংখাং অঞ্চলৰ লগতে নীলমনি আদৰ্শ জাতীয় বিদ্যলয়খনলৈ গৌৰৱ কঢ়িয়াই আনিছে। তেখেতে সাধাৰণ গণিতত ১০০,বিজ্ঞানত ১০০,সমাজ বিজ্ঞানত ১০০,ঐচ্ছিক গণিতত ৯৯,ইংৰাজীত ৯৬  আৰু অসমীয়াত ৯৪ নম্বৰেৰে সৰ্ব্বমুঠ ৫৮৯ নম্বৰ লাভ কৰি ৰাজ্যৰ ভিতৰতে পঞ্চম স্থান দখল কৰিবলৈ সক্ষম হৈছে। ক্ৰিকেট খেলি ভালপোৱা মানসে নিতৌ ১২ ঘন্টাকৈ অধ্যয়ন কৰিছিল বুলি সংবাদ মাধ্যমৰ আগত জানিবলৈ দিয়ে। উল্লেখ্য যে  পাঠ্যক্ৰমৰ বিষয়সমূহ অধ্যয়ন কৰাৰ উপৰিও লক্ষ্মীনাথ বেজবৰুৱা আৰু ভবেন্দ্ৰ নাথ শইকীয়াৰ সাহিত্য মানস উত্তমৰ প্ৰিয়। ভৱিষ্যতে এজন ভাল অভিযন্তা হোৱাৰ সপোন দেখা মানস উত্তমে বিজ্ঞান শাখাত নামভৰ্তি কৰিব ডিব্ৰুগড়ৰৰ ৰাধাকৃষ্ণ জুনিয়ৰ কলেজত। সৰুৰে পৰা অতি অমায়িক তথা শান্ত স্বভাৱৰ মানস উত্তম নেওঁ‌গৰ এক উজ্জ্বল ভৱিষ্যৎ কামনা কৰিছে সমগ্ৰ টিংখাঙ বাসী ৰাইজে লগতে ৰাজ্যৰ ভিতৰতে পঞ্চম স্থান দখল কৰি টিংখাঙলৈ গৌৰৱ কঢ়িয়াই অনাৰ বাবে বৃহত্তৰ টিংখাঙ অঞ্চলবাসী উল্লাসিত হোৱা পৰিলক্ষিত হৈছে।কৃতি ছাত্ৰগৰাকীক ফলাফল ঘোষণা হোৱাৰ পাছৰে পৰা ৰাজগড় উদয়ন পথত থকা ভাড়াত বিভিন্ন দল সংগঠন ব্যক্তিয়ে অভিনন্দন জ্ঞাপন কৰিছে।

নাজিৰা

আজি ঘোষণা কৰা হাইস্কুল শিক্ষান্ত পৰীক্ষাৰ ফলাফলত নাজিৰা মহকুমাৰ চৰকাৰী আৰু বে- চৰকাৰী বিদ্যালয় সমূহৰ ভিতৰত দহখন বিদ্যালয়ৰ ফলাফল এশ শতাংশ উত্তীৰ্ণ হয় । চৰকাৰী বিদ্যালয় সমূহৰ তুলনাত বে – চৰকাৰী বিদ্যালয়ৰ ফলাফল অধিক সন্তুষজনক । নাজিৰা মহকুমাৰ বে– চৰকাৰী শিক্ষানুষ্ঠান মাৰ্কজ একাডেমীৰ পৰা অৱৰ্তীণ হোৱা ম: আমিনুৰ ৰহমানে মুঠ ৫৬৫ নম্বৰ লাভ কৰি ডিষ্টীংচন সহ উতীৰ্ণহৈ মহকুমাটোৰ ভিতৰত শীৰ্ষ স্থান লাভ কৰিবলৈ সক্ষম হয় । ফলাফল অনুসৰি এই বিদ্যালয়ৰ ৪ জনে ডিষ্টীংচন , ১০ গৰাকীয়ে ষ্টাৰ মাৰ্ক সহ ১৭ জন প্ৰথম ১১জনে দ্বিতীয় আৰু এজন তৃতীয় স্থানত উতীৰ্ণহৈ এশ শতাংশ উতীৰ্ণৰ গৌৰৱ কঢ়িয়া। চৰকাৰী বিদ্যালয়ৰ ভিতৰত নাজিৰা ন– মাটি উচ্চ মাধ্যমিক বিদ্যালয় , মেছাগড় জোকতলি উচ্চতৰ মাধ্যমিক বিদ্যালয় , বৰতলা উচ্চতৰ মাধ্যমিক বিদ্যালয় , মঠিয়াছিগা ৰাজমাও উচ্চ মাধ্যমিক বিদ্যালয় , শিমলুগুৰি আদৰ্শ উচ্চ মাধ্যমিক বিদ্যালয়ৰ ফলাফল এশ শতাংশ হোৱাৰ লগতে ব — চৰকাৰী বিদ্যালয়ৰ ভিতৰত আদৰ্শ বিদ্যা ভৱন উচ্চতৰ মাধ্যমিক বিদ্যালয় ( অ’ এন জি চি ) গুৰুকুল বিদ্যালয় চেইণ্ট পিৰ্টাছ বিদ্যালয় , গেলেকী জাতীয় বিদ্যালয় আৰু ডিমুৱাল বিদ্যা ভৱন বিদ্যালয়ৰ উতীৰ্ণৰ হাৰ এশ শতাংশ । চৰকাৰী খণ্ডৰ নাজিৰা ছোৱালী উচ্চতৰ মাধ্যমিক বিদ্যালয়ৰ ২ গৰাকীয়ে ডিষ্টীংচন , দুগৰাকীয়ে ষ্টাৰ মাৰ্ক সহ ৯ গৰকীয়ে প্ৰথম , ১৪ গৰাকীয়ে দ্বিতীয় আৰু ১৪ গৰাকীয়ে তৃতীয় স্থানত উতীৰ্ণহৈ ৮৪ শতাংশ , মেছাগড় জোকতলি উচ্চতৰ মাধ্যমিক বিদ্যালয়ৰ ৩ গৰাকীয়ে ষ্টাৰ সহ ১৪ গৰাকীয়ে প্ৰথম , ২০ গৰাকীয়ে দ্বিতীয় আৰু এজনে তৃতীয় স্থানত উতীৰ্ণ হৈ এশ শতাংশ , বৰতলা উচ্চতৰ মাধ্যমিক বিদ্যালয়ৰ দুগৰাকীয়ে ষ্টাৰ সহ ১২ গৰাকীয়ে প্ৰথম ২১ গৰাকীয়ে দ্বিতীয় স্থানত উতীৰ্ণহৈ এশ শতাংশ , হাতীপট্টী উচ্চ মাধ্যমিক বিদ্যালয়ৰ ৯ গৰাকীয়ে প্ৰথম , ১৫ গৰাকীয়ে দ্বিতীয় ৭ গৰাকীয়ে তৃতীয় স্থানত উতীৰ্ণহৈ ৯৪ শতাংশ , লিগিৰী পুখুৰী উচ্চ মাধ্যমিক বিদ্যালয়ৰ ৫ গৰাকীয়ে প্ৰথম , ২৬ গৰাকীয়ে দ্বিতীয় আৰু ১৯ গৰাকীয়ে তৃতীয় স্থানত উতীৰ্ণহৈ ৯৯ শতাংশ , মঠিয়াছিগা ৰাজমাও উচ্চ মাধ্যমিক বিদ্যালয়ৰ ১ গৰাকীয়ে ডিষ্টীংচন সহ ১৭ গৰাকীয়ে প্ৰথম দুগৰাকীকৈ দ্বিতীয় আৰু তৃতীয় স্থানত উতীৰ্ণহৈ এশ শতাংশ , ৰহদৈ পুখুৰী উচ্চ মাধ্যমিক বিদ্যালয়ৰ ৬ গৰাকীয়ে প্ৰথম , ১৬ গৰাকীয়ে দ্বিতীয় আৰু২৫ গৰাকীয়ে তৃতীয় স্থানত উতীৰ্ণহৈ ৬৭ শতাংশ , ধিতাই পুখুৰী উচ্চ মাধ্যমিক বিদ্যালয়ৰ ২ গৰাকীয়ে ডিষ্টীংচন  , ৩ গৰাকীয়ে ষ্টাৰ সহ ১২ গৰাকীয়ে প্ৰথম , ১৭ গৰাকীয়ে দ্বিতীয় আৰু ১২ গৰাকীয়ে তৃতীয় স্থানত উতীৰ্ণহৈ ৯১ শতাংশ উতীৰ্ণ হাৰ কঢ়িয়াই আনে । বে – চৰকাৰী বিদ্যালয়ৰ সমূহৰ ভিতৰত মাৰ্কাজ একাডেমীৰ ৪ গৰাকীয়ে ডিষ্টীংচন , ১০ গৰাকীয়ে ষ্টাৰ সহ ১৭ গৰাকীয়ে প্ৰথম ১১ গৰাকীয়ে দ্বিতীয় আৰু ১ গৰাকী তৃতীয় স্থানত উতীৰ্ণহৈ এশ শতাংশ উতীৰ্ণ হাৰেৰে মহকুমাটোৰ ভিতৰতে শীৰ্ষ স্থান অধিকাৰ কৰে । শিমলুগুৰি শংকৰদেৱ শিশু নিকেটনৰ ১০ গৰাকীয়ে ডিষ্টীংচন , ১৩ গৰাকীয়ে ষ্টাৰ সহ ৫৫ গৰাকীয়ে প্ৰথম , ৩৯ গৰাকীয়ে দ্বিতীয় আৰু ৮ গৰাকীয়ে তৃতীয় স্থানত উতীৰ্ণহৈ ৯৯ শতাংশ , এম জি এম গড়গাঁৱৰ ৩ গৰাকীয়ে ষ্টাৰ সহ ৮ গৰাকীয়ে প্ৰথম , ৫ গৰাকীয়ে দ্বিতীয় ৪ গৰাকীয়ে তৃতীয় স্থানত উতীৰ্ণহৈ ৯৯ শতাংশ , গেলেকী জাতীয় বিদ্যালয়ৰ ৫ গৰাকীয়ে ডিষ্টীংচন , ৩ গৰাকীয়ে ষ্টাৰ সহ ২৭ গৰাকীয়ে প্ৰথম ৪ গৰাকীয়ে দ্বিতীয় স্থানত উতীৰ্ণহৈ ১০০ শতাংশ , নাজিৰা জুবিয়েল ভেলী বিদ্যালয়ৰ ৪ গৰাকীয়ে প্ৰথম , ৩ গৰাকীয়ে দ্বিতীয় আৰু ১ গৰাকী তৃতীয় স্থানত উতীৰ্ণহৈ ৯৯ শতাংশ উতীৰ্ণ হাৰ কঢ়িয়াই আনে । মুঠতে নাজিৰা মহকুমাৰ চৰকাৰী আৰু বে – চৰকাৰী বিদ্যালয়ৰ ফলাফল সন্তোষজনক ।