বিদ্যুৎ গ্ৰাহকলৈ জৰুৰী খবৰ।(APDCL)
৩৬ ঘণ্টাৰ বাবে বন্ধ থাকিব APDCLৰ প’ৰ্টেল।
বন্ধ থাকিব MyBijulee, BijuleeBandhu, EasyPay, ARMS।
২৮ ফেব্ৰুৱাৰীৰ নিশা ৯ বজাৰ পৰা ২ মাৰ্চৰ পুৱা ৯ বজালৈকে থাকিব বন্ধ।
কাৰিকৰী কাৰণত ৩৬ ঘণ্টাৰ বাবে বন্ধ থাকিব পর্টেল।
প্রিপেইড গ্রাহকক BALANCE MAINTAIN কৰিবলৈ আহ্বান।
APDCLৰ গুৰুত্বপূৰ্ণ জাননী।
আজিয়েই মিটাৰ ৰিচাৰ্জ কৰি লওক।
গুৱাহাটী মহানগৰীৰ সামগ্ৰিক উন্নয়নৰ পৰিকল্পনাৰে আজি গৃহ আৰু নগৰ পৰিক্ৰমা বিভাগৰ মন্ত্ৰী জয়ন্তমল্ল বৰুৱাই কেইবাটাও উন্নয়নমূলক প্ৰকল্পৰ উদ্বোধনৰ লগতে আধাৰশিলা স্থাপন কৰে। গুৱাহাটীৰ কৃত্ৰিম বানৰ সমস্যা সমাধানৰ লক্ষ্যৰে মন্ত্ৰী জয়ন্ত মল্লবৰুৱাই ৰুক্মিণী গাঁৱৰ পিবকো পইণ্টৰ পৰা জনতা ভৱনলৈ বানপানী প্ৰতিৰোধ ৱালৰ নিৰ্মাণকাৰ্যৰ শুভাৰম্ভ কৰে। প্ৰকল্পটো উদ্বোধন কৰি মন্ত্ৰী জয়ন্ত মল্লবৰুৱাই বাহিনী নদী খনন কৰি নদীখনৰ পানী বহন ক্ষমতা বৃদ্ধি কৰা হ’ব বুলি সদৰী কৰে। শিলসাঁকোৰ ৮০০ বিঘা ভূমিত খনন সম্পন্ন হ’লে গুৱাহাটীবাসীয়ে সকাহ পাব বুলি আশা প্ৰকাশ কৰে মন্ত্ৰীগৰাকীয়ে। খনন কাৰ্য সম্পূৰ্ণ হোৱাৰ পিছতেই বানপানী সমস্যা অৱসান ঘটিব বুলিও আশা প্ৰকাশ কৰে মন্ত্ৰী জয়ন্ত মল্লবৰুৱাই। ২৫ কোটি ব্যয়েৰে বাহিনীৰ পানী প্ৰতিৰোধেৰে নিৰ্মাণ হ’ব এই ৱাল। উক্ত অনুষ্ঠানত উপস্থিত থাকে মেয়ৰ মৃগেন শৰণীয়া, সাংসদ বিজুলী কলিতা মেধি, বিধায়ক অতুল বৰা, GMDAৰ অধ্যক্ষ নাৰায়ণ ডেকা আৰু উপাধ্যক্ষ ধীৰা তালুকদাৰ। ইয়াৰ পাছতেই মন্ত্ৰী জয়ন্ত মল্লবৰুৱাই নৱনিৰ্মিত বেলতলা দৈনিক বজাৰৰ গৃহ উদ্বোধন কৰে।
১১ কোটি ৫০ লাখ টকা ব্যয়ৰে নিৰ্মাণ কৰা বেলতলাৰ অত্যাধুনিক বজাৰ গৃহত আছে মুঠ ৩৮০খন বিপণী। বজাৰ গৃহৰ ভিতৰত GMCৰ কাৰ্যালয়ৰ লগতে থাকিব এটি সমূহীয়া প্ৰেক্ষাগৃহ। অত্যাধুনিক বজাৰ গৃহটোত অনুসূচীত জাতি, অনুসূচীত জনজাতি আৰু অন্যান্য পিছপৰা শ্ৰেণীৰ লোকৰ বাবে দোকান সংৰক্ষণ হ’ব। বেলতলা বজাৰ গৃহৰ মুকলিৰ পাছতেই নিৰ্মীয়মাণ অৱস্থাত থকা গণেশগুৰি বজাৰখনো ৰাইজৰ বাবে শীঘ্ৰে মুকলি কৰা হ’ব বুলি মন্ত্ৰী জয়ন্ত মল্লবৰুৱাই উল্লেখ কৰে। একেটা দিনতে ঘোঁৰামৰাত মন্ত্ৰী জয়ন্ত মল্ল বৰুৱাই অসম ৰাজ্যিক গৃহ নিৰ্মাণ পৰিষদৰ মূখ্য কাৰ্যালয়ৰ আধাৰশিলা স্থাপন কৰে। অনুষ্ঠানত উপস্থিত থাকে অসম ৰাজ্যিক গৃহ নিৰ্মাণ পৰিষদৰ অধ্যক্ষ পুলক গোহাঁই, উপাধ্যক্ষ সুভাষ দত্তকে ধৰি কেইবাগৰাকী চৰকাৰী বিষয়া। ইয়াৰ পাছতেই মন্ত্ৰী জয়ন্ত মল্লবৰুৱাই গুৱাহাটীৰ পশ্চিম বৰাগাঁৱত নিৰ্মিত নগৰীয়া বন উদ্যানৰ আধাৰশিলা স্থাপন কৰে। দীপৰ বিলৰ পাৰত ডাম্পিং গ্ৰাউণ্ডৰ কাষতে শিলসাকো বিলৰ সাৰুৱা মাটিৰে প্ৰায় ৪০ হাজাৰ বৰ্গমিটাৰ ভূমিত নিৰ্মাণ কৰি উলিওৱা হ’ব নগৰীয়া বন উদ্যানখন।
বন উদ্যানখনত মিয়াৱাকি পদ্ধতিৰে ৰোপণ কৰা হ’ব থলুৱা গছ। ইয়াৰ লগতে বৰাগাঁৱত বৰষুণৰ পানী নিষ্কাষণৰ নলা নিৰ্মাণৰ আধাৰশিলা স্থাপন কৰে মন্ত্ৰী জয়ন্ত মল্ল বৰুৱাই। একেটা দিনতে মন্ত্ৰীগৰাকীয়ে আমিনগাঁওস্থিত বিশ্ব মহাবীৰ চিলাৰায় উদ্যানৰো পুন:নিৰ্মাণৰ আধাৰশিলা স্থাপন কৰে। মন্ত্ৰী বৰুৱাই আধাৰশিলা স্থাপন কৰি আমিনগাঁৱৰ বিশ্ব মহাবীৰ চিলাৰায় উদ্যান আগন্তুক দিনত কোচ বংশৰ ৰাজহাউলি সদৃশ নিৰ্মাণ কৰাৰ লগতে কমতাপুৰৰ আৰ্হিৰ সুন্দৰকৈ নিৰ্মাণ কৰাৰ কথা ঘোষণা কৰে। মুঠ ৪ কোটি ৮২ লাখ ৫১ হাজাৰ ১৯৬ টকা ব্যয় সাপেক্ষে নিৰ্মাণ কৰি উলিওৱা হব উদ্যানখন। ইয়াৰ লগতে, জালুকবাৰী বীৰ লাচিত উদ্যানৰ পুনৰ নিৰ্মাণৰ কামৰ শুভাৰম্ভ কৰে মন্ত্ৰী জয়ন্তমল্ল বৰুৱাই। একেদৰে, ভৰলুমুখৰ ব্লু গ্ৰীণ ইনফ্ৰাছট্ৰাক্সাৰ ডেভলপমেণ্টৰো আধাৰশিলা স্থাপন কৰাৰ লগতে জি এছ টি ভৱনৰ কাষতে বিষ্ণুৰাভা শিশু উদ্যানৰ শুভাৰম্ভ কৰে মন্ত্ৰী জয়ন্ত মল্লবৰুৱাই।
ইয়াৰ লগতে আজিৰ দিনটোতে মন্ত্ৰীগৰাকীয়ে শৰাইঘাট ৰণস্মৃতি সৌধ আৰু ব্ৰহ্মপুত্ৰ ৰিভাৰফ্ৰণ্টৰ তৃতীয় পৰ্যায়ৰ নিৰ্মাণকাৰ্যও পৰিদৰ্শন কৰে। ইয়াৰ লগতে নৱ-নিৰ্মিত উত্তৰ গুৱাহাটী-দক্ষিণ গুৱাহাটী দলঙৰ দক্ষিণফালৰ সংযোগস্থলত নীল সেউজ আন্তঃগাঁথনিৰ উন্নয়ন আৰু সৌন্দৰ্য্য আচনিৰ আধাৰশিলা স্থাপন কৰে মন্ত্ৰী জয়ন্ত মল্ল বৰুৱাই। মুঠ ৩৩ কোটি ব্যয় সাপেক্ষে নিৰ্মাণ হ’বলগীয়া এই প্ৰকল্প এবছৰ ভিতৰত নিৰ্মাণ সম্পূৰ্ণ কৰাৰ লক্ষ্য নিৰ্ধাৰণ কৰা হৈছে।
ডিব্ৰুগড়ৰ শ্মশানপাৰা অঞ্চলত সংঘটিত এক চুৰিৰ ঘটনাই চাঞ্চল্যৰ সৃষ্টি কৰিছে। স্থানীয় ৰাইজে অভিযোগ কৰা অনুসৰি, গৃহস্থৰ অনুপস্থিতিৰ সুযোগ লৈ চুৰি কৰিবলৈ চেষ্টা কৰাৰ সময়তে দুজন ৰাজ-মিস্ত্ৰী হাতে-লোটে ধৰা পৰে।
স্থানীয় সূত্রে প্ৰকাশ, ধুবুৰী আৰু গোৱালপাৰা জিলাৰ পৰা কেইজনমান শ্রমিক ৰাজ-মিস্ত্ৰীৰ কামৰ বাবে ডিব্ৰুগড়লৈ আহিছিল। অসীম পাল নামৰ এজন ঠিকাদাৰে কামৰ সুবিধাৰ্থে তেওঁলোকক শ্মশানপাৰা অঞ্চললৈ আনিছিল। অভিযোগ অনুসৰি, সেই শ্রমিকসকলৰ মাজৰে ৰমিজ আলী আৰু আশ্ৰাফুল আলী নামৰ দুজনে এখন ঘৰত গৃহস্থৰ অনুপস্থিতিৰ সুযোগ লৈ চোৰাংকৈ প্ৰৱেশ কৰে।
কিন্তু চুৰি কৰাৰ সময়তে স্থানীয় ৰাইজে সন্দেহ কৰি দুয়োকে হাতে-লোটে ধৰা পেলায়। পিছত ক্ষুব্ধ ৰাইজে অভিযুক্ত দুজনক আৰক্ষীৰ হাতত অৰ্পণ কৰে। খবৰ পাই আৰক্ষী ঘটনাস্থলীত উপস্থিত হৈ দুয়োকে আটক কৰি থানালৈ লৈ যায়।
বৰ্তমানে আৰক্ষীয়ে ঘটনাটোৰ সন্দৰ্ভত বিশদ অনুসন্ধান আৰম্ভ কৰিছে। আন কোনো ব্যক্তি এই ঘটনাৰ সৈতে জড়িত আছে নে নাই সেই বিষয়েও তদন্ত অব্যাহত আছে।
ইফালে স্থানীয় ৰাইজে অঞ্চলটোত বহিঃজিলাৰ পৰা অহা শ্রমিকৰ সংখ্যা বৃদ্ধি পোৱাক লৈ উদ্বেগ প্ৰকাশ কৰিছে। আৰক্ষী বিভাগে নাগৰিকসকলক সজাগ হৈ থাকিবলৈ আৰু সন্দেহজনক কোনো কাৰ্যকলাপ দেখা পালে তৎক্ষণাৎ খবৰ দিবলৈ আহ্বান জনাইছে।
পলাশ-শিমলুৱে ৰঙাইছে অসমৰ প্ৰকৃতি৷ ফাগুনৰ আঁচল ধৰি আকাশ ছানিছে ধূলিৰ আচ্ছাদনেও৷ সেয়ে গুৱাহাটী মহানগৰীকে ধৰি ৰাজ্যৰ বিভিন্ন স্থানত এতিয়া বায়ু প্ৰদূষণ লক্ষণীয় হাৰত বৃদ্ধি পাইছে৷ বিশেষকৈ কংক্ৰিটৰ অৰণ্যই ঘেৰি ৰখা ভয়াৱহ বায়ু প্ৰদূষণৰ কৱলত গুৱাহাটী মহানগৰী৷ নিৰ্মাণ কাৰ্যৰ ধূলি,যান-বাহনৰ ধোঁৱাই ভয়ংকৰভাৱে প্ৰদূষিত কৰি তুলিছে গুৱাহাটীৰ বায়ুমণ্ডল৷ চলিত মাহত বায়ুৰ মান সূচকাংক বেয়ালৈ গতি কৰিছে৷ এনে সময়তে সকলোৱে বিচাৰিছে এজাক বৰষুণ৷ আগন্তুক পাঁচ দিনত উত্তৰ-পূৰ্বাঞ্চল তথা অসমত বৰষুণ অহাৰ সম্ভাৱনা প্ৰকাশ কৰিছে আঞ্চলিক বতৰ বিজ্ঞান কেন্দ্ৰই৷ অসমৰ কোনো কোনো অঞ্চলত পাতলীয়া বৰষুণ অহাৰ সম্ভাৱনা আছে যদিও গুৱাহাটী আৰু গুৱাহাটীৰ পাশ্বৰ্ৱৰ্তী অঞ্চলবোৰ বতৰ ডাৱৰীয়াহে হৈ থকাৰ সম্ভাৱনা আছে৷
ইপিনে গুৱাহাটীত ফেব্ৰুৱাৰীত বায়ুৰ মান সূচকাংক ২৯৪লৈ বৃদ্ধি পাইছে৷ অসম প্ৰদূষণ নিয়ন্ত্ৰণ পৰিষদৰ তথ্য অনুসৰি গুৱাহাটী মহানগৰীত বায়ুৰ মান সূচকাংক ১৭ ফেব্ৰুৱাৰীৰ পৰা ২২ ফেব্ৰুৱাৰীলৈ ১০০-২০০ ভিতৰত [সন্তোষজনক] আছে যদিও পহিলা ফেব্ৰুৱাৰীৰ পৰা তিনি ফেব্ৰুৱাৰীলৈ আৰু ১২-১৬ ফেব্ৰুৱাৰীলৈ বায়ুৰ মান সূচকাংক ২০০-৩০০ ৰ [বেয়া] ভিতৰত আছে৷ মহানগৰীখনত ১৬ ফেব্ৰুৱাৰীত বায়ুৰ মান সূচকাংক সৰ্বাধিক ২৯৪লৈ বৃদ্ধি পাইছিল৷ গুৱাহাটীৰ প্ৰদূষণ সন্দৰ্ভত প্ৰদূষণ নিয়ন্ত্ৰণ পৰিষদৰ মুখ্য পৰিৱেশ বিজ্ঞানী ড॰ গৌতম কুমাৰ মিশ্ৰই কয়, ‘জানুৱাৰীৰ পৰা মাৰ্চলৈ শুকান বতৰৰ বাবে প্ৰতি বছৰে প্ৰদূষণৰ মাত্ৰা বৃদ্ধি হয়৷
এইবাৰো তাৰ ব্যতিক্ৰম নহয় যদিও পূৰ্বৰ দুই-তিনি বছৰৰ তুলনাত বায়ু মান সূচকাংক উন্নত হৈছে ৷ বায়ুৰ মান সূচকাংক [১০০-৩০০] সন্তোষজনক পৰা বেয়া এইখিনিৰ ভিতৰতে আছে৷ বৰষুণ হ’লে বায়ুৰ প্ৰদূষণ হ্ৰাস পাব৷ গুৱাহাটীৰ বিভিন্ন স্থানত হৈ থকা নিৰ্মাণ কাৰ্য, যান-বাহনৰ পৰা ওলোৱা ধোঁৱা আৰু ব্ৰহ্মপুত্ৰৰ পাৰৰ বালি উৰি আহিও গুৱাহাটীৰ পৰিৱেশ দূষিত হোৱাত ইন্ধন যোগাইছে৷’ পৰিৱেশ বিজ্ঞানীগৰাকীয়ে পুনৰ কয়, ‘দুই-এজাক বৰষুণ আহিলে প্ৰদূষণৰ মাত্ৰা হ্ৰাস পাব যদিও মাৰ্চলৈ বায়ুৰ মান সূচকাংক [১০০-৩০০] সন্তোষজনক পৰা বেয়া এইখিনিৰ ভিতৰতে থাকিব৷
এপ্ৰিলৰ পৰা এই বায়ু প্ৰদূষণৰ পৰা সকাহ পোৱাৰ সম্ভাৱনা আছে৷’ তেওঁ লগতে কয়, ‘মহানগৰীৰ বামুণীমৈদামত বায়ু প্ৰদূষণৰ মাত্ৰা বেছি পোৱা গৈছে৷ নিৰ্মাণ কাৰ্যৰ কাম ঢাকি লৈ কৰা, সময়ে সময়ে দিনটোত পানী ছটিওৱা আদি কামবোৰ বিভাগীয় কতৃৰ্পক্ষই কৰিব লাগে৷ কিন্তু এইবোৰ নকৰাৰ বাবেও প্ৰদূষণৰ মাত্ৰা বৃদ্ধি পাইছে ৷ অসমত বায়ু প্ৰদূষণত পিএম ১০ আৰু ২.প্ত ধূলিকণাৰ মাত্ৰা অধিক৷ এই ধূলিকণাবোৰ অতি ক্ষতিকাৰক৷ সেইবোৰ নাকেৰে সোমাই যোৱাৰ সম্ভাৱনা অধিক৷ সেয়ে ৰাইজে এই সময়ছোৱাত মাক্স পৰিধান কৰিব লাগে৷ অযথা ঘৰৰ পৰা বাহিৰত ওলাই আহিব নালাগে৷’
ৰাষ্ট্ৰীয় (Yashraj Singh)পৰীক্ষণ সংস্থা [এন টি এ]ৰ জে ই ই মেইনছ ২০২৬ পৰীক্ষাত উত্তৰ-পূবৰ ভিতৰতে শীৰ্ষ স্থান দখল কৰি যশৰাজ সিঙে অপৰিসীম গৌৰৱ কঢ়িয়াই আনিছে৷
তেওঁ পদাৰ্থ বিজ্ঞানত ১০০ শতাংশকে ধৰি সামগ্ৰিকভাৱে ৯৯.৯৮ শতাংশ লাভ কৰে৷ যশৰাজ সিং বৰ্তমান উত্তৰ-পূব সীমান্ত ৰে’লৱেৰ গুৱাহাটীত চিটিটিআই হিচাপে কৰ্মৰত এন এফ ৰে’লৱেৰ কৰ্মচাৰী অভিনৱ ঋতুৰাজৰ পুত্ৰ৷
সৰুৰে পৰা মেধাৱী ছাত্ৰ যশৰাজে মালিগাঁৱৰ ছেইণ্ট বিবেকানন্দ ইংৰাজী একাডেমীত স্কুলীয়া শিক্ষা আৰম্ভ কৰিছিল৷ মালিগাঁৱৰ কেন্দ্ৰীয় বিদ্যালয়ৰ পৰা এইচ এছ এল চি সম্পূৰ্ণ কৰি গুৱাহাটীৰ ছাউথ পইণ্ট স্কুলত উচ্ছতৰ মাধ্যমিক শিক্ষা গ্ৰহণ কৰে৷
তেওঁৰ এই উল্লেখযোগ্য কৃতিত্বই তেওঁৰ কঠোৰ পৰিশ্ৰম, নিষ্ঠা আৰু শৈক্ষিক উৎকৰ্ষৰ কথাই প্ৰতিফলন ঘটাইছে৷
প্ৰধানমন্ত্ৰী নৰেন্দ্ৰ (Kerala to Keralam) মোদীৰ অধ্যক্ষতাত কেন্দ্ৰীয় কেবিনেটে আজি ‘কেৰালা’ৰ নাম ‘কেৰালাম’লৈ সলনি কৰাৰ প্ৰস্তাৱত অনুমোদন জনাইছে৷ কেন্দ্ৰীয় কেবিনেটৰ অনুমোদনৰ পিছত ভাৰতৰ ৰাষ্ট্ৰপতিয়ে ভাৰতৰ সংবিধানৰ ৩ নং অনুচ্ছেদৰ অধীনত নিজৰ মত প্ৰকাশৰ বাবে কেৰালা [নাম পৰিৱৰ্তন] বিধেয়ক, ২০২৬ নামৰ এখন বিধেয়ক কেৰালাৰ ৰাজ্যিক বিধানসভালৈ প্ৰেৰণ কৰিব৷ কেৰালাৰ ৰাজ্যিক বিধানসভাৰ মত লাভ কৰাৰ পিছত ভাৰত চৰকাৰে পৰৱৰ্তী পদক্ষেপ গ্ৰহণ কৰিব আৰু সংসদত ‘কেৰালা’ৰ নাম ‘কেৰালাম’ হিচাপে সলনি কৰাৰ বাবে কেৰালা [নাম পৰিৱৰ্তন] বিধেয়ক, ২০২৬ বলৱতৰ বাবে ৰাষ্ট্ৰপতিৰ পৰামৰ্শ লাভ কৰিব৷ কেৰালাৰ বিধানসভাই ‘কেৰালা’ৰ নাম সলনি কৰি ‘কেৰালাম’ কৰাৰ বাবে ২৪ জুন ২০২৪ত গৃহীত কৰা প্ৰস্তাৱটো তলত দিয়া ধৰণৰ –
‘মালয়ালম ভাষাত আমাৰ ৰাজ্যখনৰ নাম ‘কেৰালাম’৷ ১৯৫৬ চনৰ নৱেম্বৰৰ প্ৰথম দিনটোত ভাষাৰ ভিত্তিত ৰাজ্যসমূহ গঠন কৰা হৈছিল৷ কেৰালা পিৰাভি দিৱসো নৱেম্বৰৰ পহিলা দিনটোত পালন কৰা হয়৷ দেশৰ স্বাধীনতা সংগ্ৰামৰ সময়ৰ পৰাই মালয়ালম ভাষা কোৱা লোকসকলৰ বাবে সংযুক্ত কেৰালা গঠনৰ তীব্ৰ দাবী উত্থাপিত হৈ আহিছে৷ কিন্তু সংবিধানৰ প্ৰথম অনুসূচীত আমাৰ ৰাজ্যখনৰ নামটো ‘কেৰালা’ হিচাপে লিপিবদ্ধ কৰা হৈছে৷ এই বিধানসভাই সৰ্বসন্মতভাৱে কেন্দ্ৰীয় চৰকাৰক সংবিধানৰ ৩নং অনুচ্ছেদ অনুসৰি আমাৰ ৰাজ্যখনৰ নাম ‘কেৰালাম’ হিচাপে পৰিৱৰ্তনৰ বাবে জৰুৰী পদক্ষেপ গ্ৰহণ কৰিবলৈ আহ৩ান জনাইছে৷’
ইয়াৰ পিছতে কেৰালা চৰকাৰে ভাৰত চৰকাৰক সংবিধানৰ ৩নং অনুচ্ছেদ অনুসৰি ‘কেৰালা’ৰ নাম ‘কেৰালাম’ হিচাপে সলনি কৰি সংবিধানৰ প্ৰথম অনুসূচী সংশোধনৰ বাবে প্ৰয়োজনীয় পদক্ষেপ গ্ৰহণ কৰিবলৈ অনুৰোধ জনাইছে৷ সংবিধানৰ ৩নং অনুচ্ছেদত বৰ্তমানৰ ৰাজ্যসমূহৰ নাম সলনি কৰাৰ ব্যৱস্থা আছে৷ ৩নং অনুচ্ছেদ অনুসৰি সংসদে আইনৰ দ্বাৰা যিকোনো ৰাজ্যৰ নাম সলনি কৰিব পাৰে৷ ৩নং অনুচ্ছেদৰ পৰৱৰ্তী চৰ্তত কোৱা হৈছে যে ৰাষ্ট্ৰপতিৰ পৰামৰ্শৰ বাহিৰে এই উদ্দেশ্যৰ বাবে সংসদৰ কোনো সদনত কোনো বিধেয়ক উত্থাপন কৰা নহ’ব আৰু যদিহে বিধেয়কখনত অন্তৰ্ভুক্ত প্ৰস্তাৱে কোনো ৰাজ্যৰ এলেকা, সীমা বা নাম প্ৰভাৱিত নকৰে, তেন্তে ৰাষ্ট্ৰপতিয়ে পৰামৰ্শত নিৰ্দিষ্ট কৰিব পৰা সময়ৰ ভিতৰত বা ৰাষ্ট্ৰপতিয়ে অনুমতি দিব পৰা অধিক সময়ৰ ভিতৰত এই সন্দৰ্ভত নিজৰ মতামত প্ৰকাশ কৰিবলৈ সেই ৰাজ্যৰ বিধান মণ্ডললৈ বিধেয়কখন প্ৰেৰণ কৰে আৰু এনেদৰে নিৰ্দিষ্ট বা অনুমোদিত সময়ৰ ম্যাদ শেষ হয়৷ ‘কেৰালা’ৰ নাম ‘কেৰালাম’ হিচাপে সলনি কৰাৰ বিষয়টো ভাৰত চৰকাৰৰ গৃহ মন্ত্ৰণালয়ত বিবেচনা কৰা হৈছে আৰু কেন্দ্ৰীয় গৃহ তথা সমবায় মন্ত্ৰী অমিত শ্বাহৰ অনুমোদনত ‘কেৰালা’ৰ নাম ‘কেৰালাম’ হিচাপে সলনি কৰাৰ উদ্দেশ্যে কেবিনেটৰ বাবে প্ৰস্তুত কৰা খচৰা তেওঁলোকৰ মন্তব্যৰ বাবে আইন আৰু ন্যায় মন্ত্ৰণালয়ৰ আইনী পৰিক্ৰমা বিভাগ তথা বিধান বিভাগলৈ প্ৰেৰণ কৰা হৈছে৷ আইন আৰু ন্যায় মন্ত্ৰণালয়ৰ আইনী পৰিক্ৰমা আৰু বিধান বিভাগে ‘কেৰালা’ৰ নাম ‘কেৰালাম’ হিচাপে সলনি কৰাৰ প্ৰস্তাৱত সন্মতি প্ৰকাশ কৰিছে৷
২০২৬ৰ অসম বিধানসভাৰ নিৰ্বাচনৰ পূৰ্বে শাসকীয় বিজেপি মিত্ৰজোঁটক প্ৰতিহত কৰিবলৈ বিৰোধীৰ যি মিত্ৰতাৰ কথা চলি আছে সেয়া এতিয়াও যেন পাগত উঠা নাই৷ মিত্ৰতাৰ প্ৰসংগত এতিয়া অখিল গগৈয়ে কংগ্ৰেছৰ পৰা আলেঙে আলেঙে থকা বুলিও বহুতে চৰ্চা কৰিছে৷ এনে সময়তে মিত্ৰতাৰ প্ৰসংগত অখিল গগৈয়ে কয়- ‘যদি কংগ্ৰেছে আমাৰ সৈতে বিশ্বাসঘাতকতা কৰে তেন্তে কেৱল আমাৰ প্ৰতি নহয়, অসমীয়া জাতিৰ প্ৰতি বিশ্বাসঘাতকতা কৰা হ’ব৷ সংবাদ মাধ্যমত ‘কংগ্ৰেছে আমাক এৰি লুৰীণজ্যোতি আৰু জন ইংতি কাথাৰক লৈ নিৰ্বাচন খেলিব, ৰাইজৰ দলক এৰি দিব’ এইবুলি ওলাইছে যদিও মই বিশ্বাস কৰা নাই৷’ বিৰোধী ঐক্যৰে কংগ্ৰেছৰ মিত্ৰতা সন্দৰ্ভত প্ৰতিক্ৰিয়া প্ৰকাশ কৰি এইদৰে মন্তব্য কৰে ৰাইজৰ দলৰ সভাপতি তথা বিধায়ক অখিল গগৈয়ে৷ ৰাইজৰ দলক বাদ দি আন বিৰোধী দলক আসন এৰি দিয়া বুলি সংবাদ মাধ্যþমত বাতৰি প্ৰকাশ পোৱাৰ পিছতেই প্ৰতিক্ৰিয়া প্ৰকাশ কৰিছে ৰাইজৰ দলৰ সভাপতি তথা বিধায়ক গগৈয়ে৷
সোমবাৰে কাজিৰঙাত সংবাদ মাধ্যমৰ আগত ৰাইজৰ দলৰ সভাপতিগৰাকীয়ে কয়, ‘মই নাভাবো যে কংগ্ৰেছে এই বিশ্বাসঘাতকতা কৰিব৷ মই নাভাবো যে অসমৰ ৰাইজে কংগ্ৰেছক এই কাম কৰিবলৈ দিব৷ কংগ্ৰেছক অসম জাতীয় পৰিষদ, চিপিআই, চিপিএম, চিপিইএমএল আৰু এপিএইচএলচিয়ে এই কাম কৰিবলৈ দিব বুলি নাভাবো৷’ ৰাইজৰ দলৰ সভাপতিগৰাকীয়ে কয়, ‘মই নাভাবো যে কংগ্ৰেছৰ ভিতৰৰ যিসকল কৰ্মী, যিসকলে প্ৰকৃত পৰিৱৰ্তনৰ কাৰণে ৰৈ আছে সকলোৱে জানে যে আমাক এৰি থৈ গ’লে উজনিত এখনো আসন জিকাৰ সম্ভাৱনা নহ’ব৷ আমাক যদি এৰি থৈ যায়, বিশ্বাসঘাতকতা কৰে তেতিয়া আমিও নিৰ্বাচন খেলিব লাগিব৷’ তেতিয়া কংগ্ৰেছ জিকাৰ সম্ভাৱনা থাকিব জানো বুলিও গগৈয়ে প্ৰশ্ন উত্থাপন কৰে৷ গগৈয়ে কয়, ‘কংগ্ৰেছে এনেকুৱা খৰতকীয়া আৰু হঠকাৰী সিদ্ধান্ত ল’ব বুলি মই নাভাবো৷’ সংবাদ মাধ্যমৰ আগত গগৈয়ে পুনৰ কয়– ‘এই সময়ত অসমৰ সকলো সচেতন মানুহ, বুদ্ধিজীৱী সমাজ, অসমীয়া মানুহ যিসকলৰ অলপ হ’লেও চেতনা আছে, প্ৰত্যেকজন নাগৰিকে বিচাৰে যে সকলো বিৰোধী দল এক লগ হৈ খেলক৷ সেই সময়ত আমাৰ মাজত আলোচনা চলি থকা অৱস্থাত কংগ্ৰেছে কেতিয়াও আনকেইটা দলৰ লগত বুজাবুজি কৰি ৰাইজৰ দলক এৰি দিব এনেকুৱা কথা মই বিশ্বাস নকৰো৷’
অৱশ্যে গগৈয়ে কয়– ‘এইটো কিন্তু হয় যে কংগ্ৰেছে কালি কোনোবা কোনোবা দলক কৈছিল যে ২৪ তাৰিখে আমি ৰাইজৰ দলক বাদ দিয়ে আনুষ্ঠানিক বিৰোধী ঐক্য মঞ্চৰ তালিকা ঘোষণা কৰিম, কিন্তু বাকী দলবিলাকে মই জনা মতে আটাইবিলাক দলে বামপন্থী দল, সোঁপন্থী দল, আঞ্চলিকতাবাদী দল সকলো দলে মই জনা মতে ‘অপ’জ’ কৰিছে যে নহয় আমি সকলোৱে একেলগে খেলিম৷ আনহাতে, আমাৰ লগত বেছি সমস্যাও নাই৷’ মাত্ৰ তিনিটামান সমষ্টিৰ সমস্যা বুলি উল্লেখ কৰি গগৈয়ে কয়, ‘এবাৰ কথা পাতি দিলেই শেষ হৈ যাব, কিন্তু তাৰ পিছতো যদি কংগ্ৰেছে এনে সিদ্ধান্ত লয়, তেন্তে এয়া ‘ছুইছাইডিয়েল’ বুলি ক’ব লাগিব৷ নিজৰ ভৰিত নিজে কুঠাৰ মৰাৰ সিদ্ধান্ত বুলি ক’ব লাগিব৷ প্ৰদেশ কংগ্ৰেছৰ সভাপতি গৌৰৱ গগৈয়ে এতিয়ালৈকে ফোন কৰা নাই৷’ কংগ্ৰেছৰ বেলেগ বেলেগ লোকে ফোন কৰি আছে বুলি উল্লেখ কৰি গগৈয়ে সংবাদ মেলত কয়– ‘এতিয়ালৈকে ইতিবাচক কথা কৈ আছে৷ সেই কাৰণে ময়ো ইতিবাচক কথাই কৈ আছো৷’
কংগ্ৰেছৰ সুদীৰ্ঘ শাসন কালত লুঙী, ধূতি, সূতা, কম্বল, আঁঠুৱা বিতৰণ কৰি শাসন কৰিলে। কংগ্ৰেছ চৰকাৰে এই আঁচনিক পঞ্চ অমৃত হিচাপে বিবেচনা কৰিছিল। যোৰহাট জিলাৰ মৰিয়নী সমষ্টিৰ বৈছাহাবি বাগিচা খেলপথাৰত মহিলা উদ্যমীতা আঁচনিৰ চেক বিতৰণ অনুষ্ঠানত ভাষণ প্ৰদান কৰি এনেদৰে কংগ্ৰেছক ক্ষুৰধাৰ সমালোচনা কৰে অসমৰ মুখ্যমন্ত্ৰী ড° হিমন্ত বিশ্ব শৰ্মাই। উন্নয়নৰ বাৰ্তা লৈ আজি যোৰহাট জিলাৰ মৰিয়নি সমষ্টিৰ বৈছাহাবি চাহ বাগিছাত উপস্থিত হোৱা মুখ্যমন্ত্ৰী ড° হিমন্ত বিশ্ব শৰ্মাই মহিলা উদ্যমিতা আঁচনিৰ অধীনত ১২৬ টা গ্ৰাম্য আত্মসহায়ক গোটৰ ২৯ হাজাৰ মহিলাৰ মাজত আনুষ্ঠানিক ১০ হাজাৰ টকাৰ চেক বিতৰণ কাৰ্যসূচীৰ শুভাৰম্ভ কৰে। বিধায়ক ৰূপজ্যোতি কুৰ্মীয়ে আদৰনি ভাষণ প্ৰদান কৰা পাছতে মুখ্যমন্ত্ৰীয়ে মৰিয়নিৰ ১৮ খন চাহ বাগিচাত নৱনিৰ্মিত জগন্নাথ প্ৰেক্ষাগৃহ আৰু দক্ষতা বিকাশ কেন্দ্ৰ, মৰিয়নি আৰক্ষী থানা, বাপুজী মিনি ষ্টেডিয়াম, ললিত চন্দ্ৰ ৰাজখোৱা ইনড’ৰ ষ্টেডিয়াম, সামগ্ৰী পুনৰুদ্ধাৰ প্ৰকল্পকে ধৰি বহুকেইটা আঁচনি ভাৰ্চূৱেলী শুভ উদ্বোধন কৰে। আঁচনিৰ চেক লাভ কৰা মহিলা সকলক উদ্দেশ্যি মুখ্যমন্ত্ৰীয়ে ১০ হাজাৰ টকা উৎপাদমমুখী কামত বিনিয়োগ কৰিলে পুনৰ ২৫ হাজাৰকৈ লাভ কৰিব বুলি উল্লেখ কৰে।
মহিলাসকলক মুখ্যমন্ত্ৰীয়ে ১০ হাজাৰ টকা কেনেদৰে ব্যৱহাৰ কৰিব তাৰো পৰামৰ্শ প্ৰদান কৰে।মুখ্যমন্ত্ৰীয়ে বাগিছাৰ শ্ৰমিকৰ মজুৰি দুই এদিনতে বৃদ্ধি হ’ব বুলি উল্লেখ কৰে।মৰিয়নিত ৪৫ কোটি টকাৰে জাঁজী নদীৰ বাওফালৰ মঠাউৰি পকীকৰণৰ কাম চলি থকা লগতে শীঘ্ৰে সোঁফালৰ মঠাউৰিৰ পকীকৰণৰ কাম আৰম্ভ হ’ব বুলি কয়।মৰিয়নি উন্নয়নৰ দিশত গতি কৰা লগতে গৌৰৱৰ বিষয় বুলি উল্লেখ কৰি বিধায়ক ৰূপজ্যোতি কুৰ্মীয়ে বিজেপিত যোগদান কৰা কাৰনেহে মৰিয়নি সমষ্টিত উন্নতি হৈছে বুলি মন্তব্য কৰে।লক্ষনীয়ভাৱে মুখ্য মন্ত্ৰীয়ে ৰাইজক উদ্যেশি ৰূপজ্যোতিক পুনৰ জয়ী কৰাবনে নাই বুলি প্ৰশ্ন কৰে।”ৰূপজ্যোতি জয়ী হ’লে অহা পাঁচ বছৰত ইয়াতকৈও বেছি কাম হ’ব আৰু কাম হোৱাৰ গেৰান্টি মই লৈছো” বুলি মুখ্যমন্ত্ৰীয়ে তাৎপৰ্যপূৰ্ণ মন্তব্য কৰে। মৰিয়নিৰ আৰু দুহেজাৰ মহিলা নতুনকৈ অৰুনোদয়ত অন্তভূৰ্ক্ত হ’ব বুলি ঘোষণা কৰে মুখ্যমন্ত্ৰীয়ে। ইপিনে সাংবাদিকৰে হোৱা বাৰ্তালাপত মুখ্যমন্ত্ৰী ডঃ হিমন্ত বিশ্ব শৰ্মাই জুবিন গাৰ্গ মৃত্যুৰ তদন্ত ফাৰ্ষ্ট ট্ৰেক আদালতত হ’ব লাগে বুলি উত্থাপন হৈ থকা সন্দৰ্ভতো মন্তব্য কৰে। তেওঁ কয় – বৰ্তমান যিহেতু বিচাৰ প্ৰক্ৰিয়া সুচাৰুৰূপে আগবাঢ়িছে, কিন্তু ফাৰ্ষ্ট ট্ৰেক আদালতত বিচাৰ প্ৰক্ৰিয়া আৰম্ভ হলে অভিযুক্তই যদি জামিন লাভ কৰে তেতিয়া চৰকাৰ দায়ী নহ’ব ।
এইক্ষেত্ৰত ৰাইজৰ দলৰ সভাপতি অখিল গগৈৰ স্থিতিক সমালোচনা কৰে মুখ্যমন্ত্ৰীয়ে।লক্ষণীয়ভাৱে মুখ্যমন্ত্ৰীয়ে বিৰোধী দলৰ দলপতি সাংসদ গৌৰৱ গগৈক ভাৰত -ফিলিপাইনছ মৈত্ৰী গোটৰ অধ্যক্ষ ৰূপে নিযুক্তিক লৈও প্ৰতিক্ৰিয়া প্ৰকাশ কৰে। “তেঁওক দিব লাগিছিল ভাৰত-পাকিস্তানৰ।ভুলতে দি দিলে ভাৰত-ফিলিপাইনছৰ।ভাৰত পাকিস্থানৰ দিয়া হ’লে ভালকৈ চলিল হেতেন” বুলি মন্তব্য কৰে।আজিৰ অনুষ্ঠানত সাংসদ কামাখ্যা প্ৰসাদ তাছা, জিলা আয়ুক্ত জয় শিৱানী, সমজিলা আয়ুক্ত অভিজীৎ গগৈ, বিজেপি জিলা সভাপতি শান্তনু পুজাৰী, উপ সভাপতি ৰাণা গোস্বামীকে ধৰি বিজেপি দলৰ কেইবাগৰাকীও নেতা উপস্থিত থাকে।
মাতৃহাৰা হ’ল লোক নিৰ্মাণ বিভাগৰ জ্যেষ্ঠ অভিযন্তা চম্পক কুমাৰ শৰ্মা, অসম বাৰ্তাজীৱী সংঘৰ ৰাষ্ট্ৰীয় পৰিষদৰ সদস্য সাংবাদিক কিশোৰ জ্যোতি শৰ্মা আৰু নলবাৰী জিলা বাৰ্তাজীৱী সংঘৰ সম্পাদক প্ৰতিদিন টাইমৰ সাংবাদিক ৰূপ কুমাৰ শৰ্মা। টিহুৰ সমীপৱৰ্তী মাখিবাহাস্থিত নিজ বাসভৱনত ৭৯ বছৰ বয়সত শেষ নিশ্বাস ত্যাগ কৰে সৰবৰহী মহিলা বিমলা দেৱীয়ে। উল্লেখযোগ্য যে এঘাৰ মাহ পূৰ্বে পিতৃহাৰা হৈছিল তেওঁলোক। পিতৃ প্ৰবীন সাংবাদিক তথা অৱসৰী কৃতি শিক্ষক মহেন্দ্ৰ নাথ শৰ্মাৰ ২০২৫ চনৰ ১৯ মাৰ্চত মৃত্যু হৈছিল।
পিতৃহাৰা হোৱাৰ এবছৰ নহওঁতেই মাতৃহাৰা হ’ল তেওঁলোক। সকলোৰে সুখ দুখৰ সমভাগি হোৱা ধৰ্মপ্ৰাণা মহিলা বিমলা দেৱীৰ মৃত্যুৰ বাতৰি বিয়পি পৰাৰ লগে লগে আজি তেওঁৰ মাখিবাহাস্থিত বাসভৱনত উপস্থিত হৈ নলবাৰী জিলা সাহিত্য সভাৰ প্ৰাক্তন সম্পাদক পংকজ বেজবৰুৱা, অসম জাতীয়তাবাদী যুৱ ছাত্ৰ পৰিষদৰ নলবাৰী জিলা সমিতিৰ উপদেষ্টা নগেন শালৈ, সাংবাদিক লিখন ঠাকুৰীয়া, চৌধুৰীপাৰা নৱোদয় সংঘৰ সভাপতি ডিম্বেশ্বৰ চৌধুৰী, সম্পাদক দ্বীজেন ৰাজবংশী, চৌধুৰীপাৰা ব্ৰাহ্মণ সমাজ, আদি বিভিন্ন দল সংগঠনৰ নেতা কৰ্মীৰ লগতে ব্যক্তি বিশেষে নশ্বৰ দেহত শ্ৰদ্ধা নিবেদন কৰে। পিছত এক শোক সমদল কৰি অন্তোষ্টিক্ৰিয়া সম্পন্ন কৰা হয় ।
ৰীল বনাই ভালপোৱা সকলৰ বাবে ভাল খবৰ।
সামাজিক মাধ্যমত ৰীলৰ প্ৰতিযোগিতা পাতিব বিজেপিয়ে।
ৰীল বনাই আপুনি লাভ কৰিব পাৰে ৫০ হাজাৰৰ পৰা ২ লাখ টকা।
ৰীল প্ৰতিযোগিতাৰ লগতে বিজেপিয়ে পাতিব ৰচনা প্ৰতিযোগিতা।
ৰীলৰ দৈর্ঘ্য ন্যূনতম ২০ চেকেণ্ডৰ পৰা ৯০ চেকেণ্ড হ’ব লাগিব।
ভিডিঅ’ৰ বিষয় যোৱা পাঁচ বছৰত হোৱা অসমৰ ক্ষিপ্র উন্নয়ন।
সকলো বয়সৰ লোকে এই প্রতিযোগিতাত অংশগ্রহণ কৰিব পাৰিব।
সাংস্কৃতিক ক্ষেত্ৰৰ অভিজ্ঞ বিচাৰকৰ দ্বাৰা শ্ৰেষ্ঠ প্রতিযোগীসকলক নির্বাচন কৰা হ’ব।
এই প্রতিযোগিতা অসমভিত্তিত অনুষ্ঠিত হ’ব।
এগৰাকী ব্যক্তিয়ে সর্বাধিক ১০ টা ৰীল আপলোড কৰিব পাৰিব।
যিকোনো লোকে এই বিষয়বস্তুক লৈ নিৰ্মাণ কৰা ৰীল অহা ২৬ ফেব্ৰুৱাৰীৰ পৰা ১৫ মাৰ্চৰ ভিতৰত প্ৰস্তুত কৰি নিজৰ ফেচবুক/ইনস্টাগ্রাম একাউন্ট বা পেজত আপলোড কৰি সেই লিংক 9395078898 নম্বৰত লিংকৰ লগতে ‘ৰীল’টোৰ DOCUMENT FORMATত প্ৰেৰণ কৰিব লাগিব।
ভাৰতীয় জনতা পাৰ্টি,অসম প্ৰদেশৰ সামাজিক মাধ্যম বিভাগৰ উদ্যোগত অসম ভিত্তিত আয়োজন কৰা হৈছে ৰচনা প্ৰতিযোগিতা আৰু অভিনৱ ৰীল প্ৰতিযোগিতা।
