সম্প্ৰতি প্ৰতিকুল বতৰৰ মাজতে ৰাজ্যৰ শিক্ষা বিভাগে নিৰ্দেশনা জাৰি কৰা গ্ৰীষ্মকালীন শিবিৰ ৰাজ্যৰ বিভিন্ন শিক্ষানুষ্ঠানৰ দৰে বিশ্বনাথৰ ইটাখোলা অঞ্চলৰ শিক্ষানুষ্ঠান সমূহত সফল ভাবে সম্পন্ন হৈ যায় গ্ৰীষ্মকালীন শিবিৰ। সমগ্ৰ শিক্ষাৰ অন্তৰ্গত বিশেষকৈ প্ৰাথমিক পৰ্যায়ৰ শিক্ষানুষ্ঠানসমুহত ছাত্ৰ-ছাত্ৰীসকলৰ মাজত বিভিন্ন ক্ৰীয়াকলাপৰ দ্বাৰা সম্পন্ন হৈ যায় কাৰ্যসূচীভাগ। যোৱা ৫ জুনৰ পৰা অৰ্থাৎ বিশ্ব পৰিৱেশ দিৱসৰ লগত সংহতি ৰাখি আৰম্ভ হোৱা গ্ৰীষ্মকালীন শিবিৰৰ প্ৰথম দিনা বৃক্ষৰূপণ আৰু পৰিৱেশ প্ৰদূষণ আৰু ইয়াৰ প্ৰতিকাৰ ৰূপে সমাজখনৰ ভূমিকা কেনে হোৱা প্ৰয়োজন এই সম্পৰ্কে ছাত্ৰ-ছাত্ৰী আৰু অবিভাৱকসকলৰ মাজত সজাগতামূলক কাৰ্যসূচী অনুষ্ঠিত কৰে।

ইটাখোলা অঞ্চলৰ দিকৰাই চাহ বাগিচা,২নং ইটাখোলা, আহুবাৰী, গেলাহাটিঙা, মনাই, খেৰবাৰী, বালিজুৰি আৰু জয়সিদ্ধিৰ শিক্ষানুষ্ঠানসমুহত ৭ দিনীয়াকৈ অনুষ্ঠিত গ্ৰীষ্মকালীন শিবিৰৰ জৰিয়তে ছাত্ৰ-ছাত্ৰী আৰু অভিভাৱকসকলৰ মাজত স্বাস্থ্যসন্মত জীৱন ধাৰন গ্ৰহণ কৰা, স্থায়ী খাদ্য প্ৰণালী গ্ৰহণ কৰা, ই-আৱৰ্জনা হ্ৰাস কৰা, আৱৰ্জনা হ্ৰাস, শক্তি সংৰক্ষণ কৰা, পানী সংৰক্ষণ কৰা আৰু একক ব্যৱহাৰ্য প্লাষ্টিকৰ ব্যৱহাৰ বন্ধ কৰা লক্ষ্য কৰি লোৱা পৰিলক্ষিত হয়। বিশেষকৈ প্ৰতিখন প্ৰাথমিক শিক্ষানুষ্ঠান সমূহত থকা ইক-ক্লাৱৰ জৰিয়তে সজাগতামূলক শোভাযাত্ৰা, পাচলি বাগিচা কৰা, চিত্ৰাংকণ আৰু একক ব্যৱহাৰ্য্য প্লাষ্টিক সামগ্ৰীৰ বিভিন্ন বয়-বস্তু গঢ়াৰ ক্ষেত্ৰত হাতে কামে কৰি আনন্দময় পৰিৱেশ বিৰাজ কৰা দেখা যায়।

জিলা স্বাস্থ্য বিভাগে ৰাষ্ট্ৰীয় পৰ্যায়ত পুনৰ এক বিশেষ সফলতা লাভ কৰিবলৈ সক্ষম হৈছে।দৰং জিলাৰ জলজলী খণ্ড প্ৰাথমিক স্বাস্থ্য কেন্দ্ৰৰ অধীনৰ ১নং অভয়পুখুৰী আয়ুষ্মান আৰোগ্য মন্দিৰে ৰাষ্ট্ৰীয় পৰ্য্যায়ৰ স্বীকৃতি লাভ কৰিবলৈ সক্ষম হৈছে। ইয়াৰ পূৰ্বে খান্দাজান আয়ুষ্মান আৰোগ্য মন্দিৰে ৰাষ্ট্ৰীয় গুণগত মান্যতা নিশ্চিতকৰণৰ অধীনত ৰাষ্ট্ৰীয় স্বীকৃতি লাভ কৰিছিল। উল্লেখ্য, চলিত বৰ্ষৰ মাৰ্চ মাহত এই স্বীকৃতি লাভৰ বাবে ১নং অভয়পুখুৰী আয়ুষ্মান আৰোগ্য মন্দিৰৰ প্ৰয়োজনীয় অন্তিম পৰ্য্যায়ৰ মূল্যায়ন সম্পন্ন হৈছিল। নেচনেল হেলথ চিষ্টেম ৰিছʼৰ্চ চেণ্টাৰৰ মূল্যায়নকাৰী দলে আহি চিকিৎসালয়খন পৰ্যবেক্ষণ কৰিছিল।

স্বাস্থ্য কেন্দ্ৰটোৱে আগবঢ়োৱা সেৱা আৰু গুণগত মানৰ বাবে অন্তিম পৰ্য্যায়ৰ মূল্যায়নত ৮৬.৪৮% নম্বৰ লাভ কৰি এই সন্মান লাভ কৰিবলৈ সক্ষম হৈছে।এই ৰাষ্ট্ৰীয় স্বীকৃতি লাভৰ বাবে স্বাস্থ্য কেন্দ্ৰটোৰ বিষয়া কৰ্মচাৰীৰ লগতে জলজলী খণ্ড প্ৰাথমিক স্বাস্থ্য কেন্দ্ৰ, জিলা পৰ্য্যায়ৰ বিষয়া কৰ্মচাৰী আৰু ৰাষ্ট্ৰীয় স্বাস্থ্য অভিযানৰ ৰাজ্যিক পৰ্যায়ৰ বিষয়া কৰ্মচাৰী সকলক বিশেষ ধন্যবাদ জ্ঞাপন কৰিছে দৰং জিলাৰ যুটীয়া স্বাস্থ্য সেৱা সঞ্চালক ডাঃ ৰমেশ চন্দ্ৰ ভট্টাচাৰ্যই। এই সন্মান লাভ কৰি দৰং জিলা স্বাস্থ্য বিভাগ তথা ৰাষ্ট্ৰীয় স্বাস্থ্য অভিযান দৰঙৰ প্ৰতিগৰাকী বিষয়া কৰ্মচাৰী আনন্দিত হৈছে।

কাকপথাৰ মাইঠঙৰ অন্বেষণ ফাউণ্ডেচনৰ বাঁহ শিল্পৰ উদ্যোগত উপস্থিত অসম ৰাজ্যিক বাঁহ অভিযানৰ পৰিচালক৷ মাইঠং গাঁৱৰ উদ্যোমী যুৱক দিগন্ত দহোতীয়াৰ নেতৃত্বত অন্বেষণ ফাউণ্ডেচনে কাকপথাৰ মাইঠং গাঁৱত অব্যাহত ৰাখিছে অৰ্থনৈতিক বিপ্লৱ৷ বাঁহ উৎপাদন আৰু বাঁহ শিল্পৰ জৰিয়তে বহু যুৱক যুৱতীক দিছে সংস্থাপন।

দিগন্ত দহোতীয়াৰ একক প্ৰচেষ্টাত গঢ় লৈ উঠা অন্বেষণ ফাউণ্ডেচনে দেখুৱাইছে স্বাৱলম্বনৰ পথ৷ বিভিন্ন সময়ত ভাৰত চৰকাৰৰ নৰ্থ ইষ্ট কেন এণ্ড বেম্বো ডেভেলপমেণ্ট কাউন্সিলে সহযোগ কৰি আহিছে দিগন্ত দহতীয়াক৷দহোতীয়াৰ এই উদ্যোগতো পৰিদৰ্শন কৰিবলৈ আহিল নৰ্থ ইষ্ট কেন এণ্ড বেম্বো ডেভেলপমেণ্ট কাউন্সিলৰ বিষয়ববীয়া আৰু অসম ৰাজ্যিক বাঁহ অভিযানৰ  পৰিচালক চাজিদ আলম।পৰিচালকগৰাকীয়ে সংবাদ মাধ্যমৰ আগত এনে ধৰনৰ উদ্যোগে গ্ৰাম্য অৰ্থনীতিত ইতিবাচক প্ৰভাৱ পেলাই বুলি মন্তব্য কৰে৷ লগতে দিগন্ত দহোতীয়াৰ প্ৰচেষ্টাত অন্বেষণ ফাউণ্ডেচনে অব্যাহত ৰখা বাঁহ শিল্পৰ উদ্যোগৰ প্ৰশংসা কৰে পৰিচালক গৰাকীয়ে৷

দান বৰঙণিৰে ১৯৮২ চনত চপাই শালৈপাৰাত স্থাপিত আৰু পৰৱৰ্তীকালত প্ৰাদেশিকীকৰণ হোৱা উত্তৰ মঙলদৈ উচ্চ মাধ্যমিক বিদ্যালয়ৰ কৰ্তৃপক্ষ শেহতীয়াকৈ ব্যাপক দুৰ্নীতিত লিপ্ত হোৱাৰ অভিযোগ উত্থাপিত হৈছে। এনে দুৰ্নীতিত অতিষ্ঠ হৈ অৱশেষত বিদ্যালয় পৰিচালনা আৰু উন্নয়ন সমিতিৰ সভাপতি শ্ৰীকান্ত নাথ, আন কেইজনমান সদস্য আৰু একাংশ অভিভাৱকে দৰং জিলা সংমণ্ডলৰ বিদ্যালয় সমূহৰ পৰিদৰ্শকৰ কাৰ্যালয়ত লিখিত অভিযোগ দাখিল কৰাত ১২ জুনত তিনিজনীয়া এটা বিষয়াৰ দলে তদন্ত কৰিবলৈ আহি স্তম্ভিত হৈ পৰে।

কিয়নো তদন্ত কৰিব অহাৰ দিনাই মধ্যাহ্ন ভোজনৰ নামত হৈ থকা কেলেংকাৰী স্বচক্ষে প্ৰত্যক্ষ কৰে তদন্তকাৰী দলটোৱে। জানিব পৰা মতে, প্ৰতি বুধবাৰে ছাত্ৰ ছাত্ৰীক মধ্যাহ্ন ভোজনত এটাকৈ কণী দিব লাগে যদিও ২৫০ জন ছাত্ৰ ছাত্ৰীৰ বিপৰীতে ১২ জুনত কণী কিনা হৈছিল মাত্ৰ ২০ টা। তদন্তকাৰী বিষয়াৰ দলে এই সম্পৰ্কত সোধাত প্ৰধান শিক্ষয়িত্ৰী দিপালী শৰ্মাই কয়, ‘আমাৰ বিদ্যালয়ৰ বহু ছাত্ৰ-ছাত্ৰীয়ে কণী খাই ভাল নাপায়’। আনহাতে প্ৰতি শনিবাৰেও ছাত্ৰ ছাত্ৰীক মধ্যাহ্ন ভোজন দিব লাগে যদিও এই বিদ্যালয় কৰ্তৃপক্ষই শনিবাৰে মধ্যাহ্ন ভোজন নিদিয়াৰ অভিযোগ উঠিছে। তদুপৰি বিদ্যালয় উন্নয়নৰ নামত আৱণ্টিত ধনৰ ব্যাপক খেলিমেলিৰ তথ্য লাভ কৰিছে তদন্তকাৰী দলে। যাৰফলত তদন্তকাৰী দলে বহু নথিপত্ৰ জব্দ কৰি লৈ গৈছে। এই তদন্ত সঠিকভাৱে হোৱাটো কামনা কৰিছে বিদ্যালয় পৰিচালনা আৰু উন্নয়ন সমিতিৰ সভাপতি আৰু চপাইৰ সচেতন ৰাইজে।