বৃহস্পতিবাৰে একেৰাহে তৃতীয়বাৰৰ বাবে বৃহস্পতিবাৰে অৰুণাচল প্ৰদেশৰ মুখ্যমন্ত্ৰী হিচাপে শপত গ্ৰহণ কৰে পেমা খাণ্ডুৱে। ৰাজ্যপাল অৱসৰপ্ৰাপ্ত লেফটেনেন্ট জেনেৰেল কে টি পাৰ্ণাইকে দৰ্জী খাণ্ডু কনভেনশ্যন হলত খাণ্ডুক মু্খ্যমন্ত্ৰী হিচাবে শপতগ্ৰহণ কৰোৱায়৷ কেন্দ্ৰীয় গৃহমন্ত্ৰী অমিত শ্বাহ, বিজেপিৰ সভাপতি জে পি নাড্ডা, অসমৰ মুখ্যমন্ত্ৰী হিমন্ত বিশ্ব শৰ্মা আৰু ছিকিমৰ মুখ্যমন্ত্ৰী প্ৰেম সিং তামাঙকে ধৰি বহু গণ্য-মান্য ব্যক্তি শপতগ্ৰহণত উপস্থিত থাকে। এই অনুষ্ঠানত আন এঘাৰজন বিধায়কেও মন্ত্ৰী হিচাপে শপত গ্ৰহণ কৰে। ইয়াৰ ভিতৰত আছিল উপ মুখ্যমন্ত্ৰী চৌনা মেইন, প্ৰাক্তন বিধানসভাৰ অধ্যক্ষ পি ডি সোনা, বিজেপিৰ ৰাজ্যিক সভাপতি বিয়ুৰাম ৱাহগে, আৰু প্ৰাক্তন মুখ্যমন্ত্ৰী কালিখো পুলৰ বিধৱা দাসংলু পুল আদি অন্যতম। পেমা খাণ্ডুৰ জন্ম ১৯৭৯ চনৰ ২১ আগষ্টত পশ্চিম অৰুণাচল প্ৰদেশৰ টাৱাং জিলাত হৈছিল। তেওঁ এগৰাকী মনপা জনজাতীয় সম্প্ৰদায়ৰ বৌদ্ধ ধৰ্মাৱলম্বী লোক। প্ৰাক্তন মুখ্যমন্ত্ৰী দৰ্জী খাণ্ডুৰ জ্যেষ্ঠ পুত্ৰ পেমা খাণ্ডু। খাণ্ডুৱে ২০০০ চনত কংগ্ৰেছত যোগদান কৰিছিল। তেওঁক ২০০৫ চনত অৰুণাচল প্ৰদেশ কংগ্ৰেছৰ সাধাৰণ সম্পাদক আৰু ২০১০ চনত টাৱাং জিলা কংগ্ৰেছ সমিতিৰ সভাপতি হৈছিল৷

২০১১ চনত এক হেলিকপ্টাৰ দুৰ্ঘটনাত পিতৃ তথা অৰুণাচল প্ৰদেশৰ তৎকালীন মুখ্যমন্ত্ৰী দৰ্জী খাণ্ডুৰ কৰুণ মৃত্যুৰ পিছত পেমা খাণ্ডু ৰাজনীতিত যথেষ্ট সক্ৰিয় হৈ পৰে। তাৰ পিছত তেওঁ মুকতো আসনৰ পৰা বিনা প্ৰতিদ্বন্দিতাৰে নিৰ্বাচনত জয়ী হৈ জাৰব’ম গামলিন চৰকাৰৰ কেবিনেট মন্ত্ৰী হয়। পিছত ২০১৪ চনত, তেওঁক নাবাম টুকি চৰকাৰত কেবিনেট মন্ত্ৰী হিচাপে অন্তৰ্ভুক্ত কৰা হয়। ২০১৬ চনৰ জুলাই মাহত নাবাম টুকীৰ ঠাইত তেওঁ অৰুণাচল প্ৰদেশৰ মুখ্যমন্ত্ৰী হিচাপে শপত গ্ৰহণ কৰে। কিন্তু শাসনলৈ অহাৰ কেইমাহ পিচতেই পেমা খাণ্ডু নেতৃত্বাধীন কংগ্ৰেছ চৰকাৰ তীব্ৰ অন্তঃকন্দলৰ সন্মুখীন হয় তাৰ পিচত ২০১৬ চনৰ ১৬ ছেপ্টেম্বৰত পেমা খাণ্ডুৰ অধীনত শাসকীয় দলৰ ৪৩ জন বিধায়কৰ কংগ্ৰেছ দল ত্যাগ কৰি পিপ’লছ পাৰ্টী অৱ অৰুণাচল দলত যোগদান কৰিছিল৷ অৱশ্যে পিপ’লছ পাৰ্টী অৱ অৰুণাচল আৰু পেমা খাণ্ডুৰ মধুচন্দ্ৰিমা বৰ বেছি দিন নচলিল৷ মাত্ৰ দুমাহৰ ভিতৰতে ২০১৬ চনৰ ২১ ডিচেম্বৰত দলীয় অনুশংসান ভংগ কৰাৰ বাবে খাণ্ডুক পিপ’লছ পাৰ্টীৰ সভাপতিয়ে দলৰ পৰা নিলম্বন কৰে আৰু তাৰ পিচতে খাণ্ডুৰ ঠাইত তাকাম পাৰিঅ’ক অৰুণাচল প্ৰদেশৰ পৰৱৰ্তী মুখ্যমন্ত্ৰী হিচাপে নিযুক্তি দিবলৈ যো-জা চলায়।

খাণ্ডুৱে ৩৩ জন বিধায়কক লগত লৈ ভাৰতীয় জনতা পাৰ্টিত যোগদান কৰে ৷ ইয়াৰ ফলত ইতিমধ্যে সদনত ১১ জন বিধায়ক থকা বিজেপিৰ সংখ্যা ৪৪ লৈ বৃদ্ধি পায় আৰু দুজন নিৰ্দলীয় বিধায়কৰ সমৰ্থন লৈ ২০১৬ চনৰ ডিচেম্বৰ মাহত খাণ্ডুৱে সদনৰ মজিয়াত সংখ্যাগৰিষ্ঠতা প্ৰমাণ কৰিবলৈ সক্ষম হৈছিল। ২০১৯ চনৰ অৰুণাচল প্ৰদেশ বিধানসভাৰ নিৰ্বাচনত ৬০ খন আসনৰ ভিতৰত ৪১ খন আসন লাভ কৰি ভাৰতীয় জনতা পাৰ্টীয়ে সংখ্যাগৰিষ্ঠতা লাভ কৰে ৷ ইয়াৰ লগতে মিত্ৰ দল জনতা দল (ইউনাইটেড) ৭ খন আসন আৰু নেশ্যনেল পীপলছ পাৰ্টীয়ে ৪ খনকৈ আসন লাভ কৰে । ইয়াৰ পিচতেই খাণ্ডুৱে পুনৰ ২০১৯ চনৰ ২৯ মে’ত দ্বিতীয়বাৰৰ বাবে অৰুণাচল প্ৰদেশৰ মুখ্যমন্ত্ৰী হিচাপে শপত গ্ৰহণ কৰে। ২০২৪ৰ বিধানসভা নিৰ্বাচনত বিনা প্ৰতিদ্বন্দিতাৰে নিৰ্বাচিত হোৱা পেমা খাণ্ডুৱে বৃহস্পতিবাৰে তৃতীয়বাৰৰ বাবে অৰুণাচল প্ৰদেশৰ মুখ্যমন্ত্ৰী হিচাপে শপত গ্ৰহণ কৰে। পেমা খাণ্ডু এই বিধানসভা নিৰ্বাচনত টাৱাং জিলাৰ মুকতো আসনৰ পৰা বিনা প্ৰতিদ্বন্দিতাৰে নিৰ্বাচিত হৈছে। বিধায়ক হিচাপে খাণ্ডুৰ এইটো চতুৰ্থ কাৰ্যকাল যাৰ ভিতৰত তেওঁ তিনিবাৰ বিনা প্ৰতিদ্বন্দ্বিতাৰে জয়ী হৈছে।পেমা খাণ্ডুৱে টাৱাঙৰ বোম্বাৰ চৰকাৰী মাধ্যমিক বিদ্যালয়ত অধ্যয়ন কৰিছিল, তেওঁ ১৯৯৫ চনত স্কুলীয়া শিক্ষা সম্পূৰ্ণ কৰিছিল।পৰৱৰ্তী সময়ত, তেওঁ ইটানগৰৰ ডনি-পোলো বিদ্যা ভৱনত উচ্চতৰ মাধ্যমিক শিক্ষা লাভ কৰে আৰু ১৯৯৭ চনত শিক্ষা সম্পূৰ্ণ কৰে৷

তেওঁ দিল্লী বিশ্ববিদ্যালয়ৰ অধীনৰ হিন্দু মহাবিদ্যালয়ত কলা শাখাত ইতিহাসত বিভাগত অধ্যয়ন কৰিছিল । ২০০১ চনত তেওঁ স্নাতক ডিগ্ৰী লাভ কৰিছিল ৷