আৰম্ভ হ’ল অন্তিমটি হাইস্কুল শিক্ষান্ত পৰীক্ষা। মৰিগাঁও জিলাৰ লাহৰীঘাট উচ্চতৰ মাধ্যমিক বিদ্যালয়ৰ হাই স্কুল শিক্ষান্ত পৰীক্ষা কেন্দ্ৰতো শান্তিপূৰ্ণ ভাৱে অনুষ্ঠিত হ’ল প্ৰথম দিনৰ ইংৰাজী বিষয়ৰ পৰীক্ষা।

উল্লেখ্য যে মৰিগাঁও জিলাৰ অন্তৰ্গত অন্যান্য পৰীক্ষা কেন্দ্ৰ সমূহৰ তুলনাত এই বছৰ লাহৰীঘাট উচ্চতৰ মাধ্যমিক বিদ্যালয়ৰ হাই স্কুল শিক্ষান্ত পৰীক্ষা কেন্দ্ৰত ৭ টা ফীডাৰ স্কুল ক্ৰমে কাঠনি, শিয়ালমাৰি, তিনিচুকীয়া, তিনিচুকীয়া কস্তুৰবা গান্ধী বালিকা বিদ্যালয়, ৰজাগাধোৱা, দেৱাগুৰি, দাতিয়ালবড়ী আৰু লাহৰীঘাট উচ্চতৰ মাধ্যমিক বিদ্যালয়ৰ মিলাই মুঠ ১০১৩ গৰাকী ছাত্ৰ-ছাত্ৰীয়ে পৰীক্ষাৰ বাবে ফ্ৰম ফিলাপ কৰিছিল যদিও শুকুৰবাৰে তাৰ ভিতৰত ৯৯৭ গৰাকী ছাত্ৰ-ছাত্ৰীয়ে পৰীক্ষাত অৱতীৰ্ণ হয়।

১৬ গৰাকী ছাত্ৰ-ছাত্ৰীয়ে পৰীক্ষাত অৱতীৰ্ণ নহ’ল, অনুপস্থিত থকা পৰীক্ষাৰ্থীসকলৰ মাজত ৪ গৰাকী ছাত্ৰ আৰু ১২ গৰাকী ছাত্ৰী। প্ৰায় ৩৫ গৰাকী নিৰীক্ষকে পৰীক্ষা কেন্দ্ৰত দায়িত্ব পালন কৰে বুলি কেন্দ্ৰ ব্যবস্থাপক তথা অধ্যক্ষ নুৰুল হুছেইনে জানিবলৈ দিয়ে। পুৱাৰ ভাগত আৰক্ষীয়ে বেৰীগেট নিদিয়াৰ বাবে মানুহৰ অগনণ ভীৰ পৰিলক্ষিত হৈছিল ।

প্ৰকৃতিৰ সুৰক্ষাৰ স্বাৰ্থত জন্ম লোৱা আৰু উজনি অসমত সেউজ বিপ্লৱ গঢ়ি তোলা উজনি অসমৰ অন্যতম বে-চৰকাৰী স্বেচ্ছাসেৱী সংগঠন গ্রাছ, বোকাখাতৰ (গ্ৰীণ ৰিভলিউশ্যনেৰী এডমায়াৰেবল চিৰিণ চচাইটি) উদ্যোগত আৰু বোকাখাতৰ প্ৰায় ২০ টা মহিলা সংগঠনৰ সহযোগত আয়োজন কৰিবলৈ লোৱা হৈছে আন্তৰ্জাতিক নাৰী দিৱস।

বিভিন্ন কাৰ্যসূচীৰ লগতে ৮ মাৰ্চৰ আন্তৰ্জাতিক নাৰী দিৱস উপলক্ষে আয়োজন কৰা হৈছে প্ৰৱন্ধ প্ৰতিযোগিতা। “মহিলা সৱলীকৰণত সমাজ আৰু চৰকাৰৰ কৰণীয়” শীৰ্ষক বিষয়ত অনুষ্ঠিত হ’ব লগা প্ৰতিযোগিতা কেৱল মহকুমা ভিত্তিত সীমাবদ্ধ থাকিব। বিশেষকৈ সহযোগী মহিলা অনুষ্ঠানৰ সদস্যাসকলেহে অংশগ্ৰহণ কৰিব পাৰিব। প্ৰতিযোগী সকলে ইংৰাজী আৰু অসমীয়া দুয়োটা ভাষাতে অংশ গ্ৰহণ কৰিব পাৰিব। প্ৰবন্ধ ১০০০ শব্দৰ ভিতৰত হ’ব লাগিব। ম’বাইল বা কম্পিউটাৰৰ ডিটিপি লেখাহে গ্ৰহণযোগ্য হ’ব। ২৫ ফেব্ৰুৱাৰীৰ ভিতৰত লেখা সমূহ জমা দিব লাগিব। লেখা পঠিওৱা ম’বাইল ৱাটচ এপ নম্বৰ 9707275042, কোনো লেখা গ্ৰুপত নপঠিয়াবলৈ উদ্যোক্তা সকলে আহ্বান জনাইছে।

নাৰীসকলৰ মাজত থলীতে চিঠি লিখা প্ৰতিযোগিতা, আমন্ত্ৰিত সমল ব্যক্তিৰ দ্বাৰা নাৰী দিৱসৰ বক্তৃতা আৰু গ্ৰাছৰ দ্বাৰা প্ৰকাশিত সাহিত্যিক পেঞ্চনাৰ নিজৰা বৰঠাকুৰৰ প্ৰৱন্ধ সংকলন উন্মোচন কৰা হ’ব। আনহাতে বিগত বৰ্ষসমূহত গ্ৰাছে প্ৰদান কৰি অহা বঁটা সমূহৰ মাজৰ নুমলী হাজৰিকা সোঁৱৰণী ‘”গ্ৰাছ ৱমেন এৱাৰ্ড’২০২৪” এই দিৱসৰ লগত সংগতি ৰাখি প্ৰদান কৰা হ’ব। এইবাৰৰ নুমলী হাজৰিকা সোঁৱৰণি ‘গ্ৰাছ ৱমেন এৱাৰ্ড’২০২৪ ৰ বাবে গোলাঘাট জিলাৰ বনগাঁৱৰ গিৰিমল্লিকা শইকীয়াক নিৰ্বাচন সমিতিয়ে নিৰ্বাচন কৰিছে। শইকীয়া এগৰাকী নাৰী সৱলীকৰণৰ অগ্ৰণী মহিলা, শিক্ষয়িত্ৰী, লেখিকা, পৰিৱেশ কৰ্মী, কাকতৰ নিয়মীয়া স্তম্ভলেখক, প্ৰৱন্ধকাৰ হোৱাৰ লগতে প্ৰকৃতি বিষয়ক গ্ৰন্থৰ প্ৰণেতা। শুকুৰবাৰে বোকাখাতত এক প্ৰেছ বিবৃতি যোগে গ্ৰাছৰ সভাপতি অংকুৰ বৰঠাকুৰ, সম্পাদক ইন্দ্ৰেশ্বৰ বৰাই এই কথা ঘোষণা কৰে।

আনহাতে বিশ্ব পৰিৱেশ দিৱস তথা গ্ৰাছৰ প্ৰতিষ্ঠা দিৱসৰ লগত সংগতি ৰাখি ধনিল বৰঠাকুৰ সোঁৱৰণি ‘গ্ৰাছ গ্ৰীণ এৱাৰ্ড”, কমলেশ্বৰ বৰা সোঁৱৰণী ‘গ্ৰাছ ফাৰ্মাৰ এৱাৰ্ড’ আৰু স্বচ্ছ আৰু পৰিৱেশৰ বাবে থানেশ্বৰ ভূঞাৰ সোঁৱৰণি ‘গ্ৰাছ নিৰ্মল সেউজ বঁটা” বঁটা সমূহ অহা ৫ জুনত প্ৰদান কৰা হ’ব বুলিও লগতে প্ৰকাশ কৰে। উদ্যোক্তাসকলে বোকাখাতৰ পুৱতি সাহিত্য সভা ভৱনত অনুষ্ঠিত হ’ব লগীয়া নাৰী দিৱসলৈ সকলো ৰাইজক আমন্ত্ৰণ জনাইছে।

দৰং জিলাৰ শিলবৰীত ছিৰাজুল হক হাইস্কুল খেল পথাৰত শুক্ৰবাৰে আবেলি দুই বজাত শুভ উদ্বোধন হ’ল স্বৰ্গীয় ছোলেমান আলী প্ৰাইজ মানি ক্ৰিকেট টুৰ্ণমেন্টৰ। শিলবৰী গাঁও পঞ্চায়তৰ সচিব আশ্বাদুদ জামান আশ্বাদে নিজৰ পিতৃ সোঁৱৰণীত আগবঢ়ায় এই পুৰস্কাৰ। আৰম্ভনীতে আশ্বাদুদ জামান আশ্বাদ আৰু শিক্ষক মুছাব্বিৰুল হকে ৰঙা ফিটা কাটি খেল পথাৰৰ মাজত প্ৰৱেশ কৰে। খেল পথাৰত প্ৰথমে উপস্থিত থকা স্থানীয় বিশিষ্ট ব্যক্তিসকলক এটি ফুলাম গামোচাৰে সম্বৰ্ধনা জনোৱা হয়।

কণ কণ ল’ৰা ছোৱালীৰ বিহুনৃত্য আৰু শিলবৰী স্কাই লাইন পাব্লিক স্কুলৰ ছাত্ৰ-ছাত্ৰীৰ দ্বাৰা পৰিৱেশিত এটা নৃত্যই উপস্থিত থকা সকলোকে এক মনোৰঞ্জন দিয়ে। সকলোৱে থিয় হৈ পৰিৱেশন কৰে ৰাষ্ট্ৰীয় সঙ্গীত।

স্থানীয় বিশিষ্ট প্ৰাক্তন খেলুৱৈ দ্বাৰা আৰম্ভ হ’ল প্ৰথম দিনাৰ উদ্বোধনী খেল। উদ্বোধনী খেলত অংশগ্ৰহণ কৰে শিলবৰী ৰাইনো ক্ৰিকেট দল আৰু বেছিমাৰী ক্ৰিকেট দল। স্বৰ্গীয় ছোলেমান আলী প্ৰাইজ মানি ক্ৰিকেট টুৰ্ণমেন্ট অনুষ্ঠিত কৰা শিলবৰী যুৱ সমাজৰ হৈ ৰাহুল ইছলামে কয় যে এতিয়ালৈ দৰং,ওদালগুৰি আৰু শোণিতপুৰ জিলাৰ প্ৰায় চৈধ্য খন ক্ৰিকেট দলে অংশগ্ৰহণ কৰিছে।

খেলখনত বিজয়ী দলে পাৱ ৩০,০০০ টকা আৰু ট্ৰফি আৰু দ্বিতীয় বিজয়ী দলে পাৱ ১৬,০০০ টকা আৰু ট্ৰফি। লগতে আছে বিভিন্ন পুৰস্কাৰ। খেলখনত অংশগ্ৰহণ বাবে ক্ৰিকেট দলে পৰিচালনা সমিতিক যোগদান মাচুল হিচাপে দিব লাগিব ২৯৯৯ টকা। ১৬-০২-২৪ তাৰিখে শুভ উদ্বোধন হোৱা খেলখন প্ৰায় একমাহ চলিব বুলি জনায়।

বৃহত্তৰ শিলবৰী অঞ্চলৰ ৰাইজ ক্ৰীড়া প্ৰেমী সেই বাবে ৰাইজে অনুষ্ঠিত যি কোনো খেলতে সহায় সহযোগিতা আগবঢ়ায় আৰু প্ৰতিদিনেই খেল পথাৰৰ চাৰিও পিনে সহস্ৰাধিক দৰ্শক ভৰি পৰে। শুক্ৰবাৰে অনুষ্ঠিত উদ্বোধনী খেল খনত উপস্থিত থাকে শিক্ষক তথা যুৱ লেখক মুছাব্বিৰুল হক, আনন্দ ৰাম বৰুৱা একাডেমীৰ প্ৰধান শিক্ষক মাজাহাৰুল ইছলাম, ৰামানুজন একাডেমীৰ প্ৰধান শিক্ষক ছাক্লিন মোস্তাক,শিলবৰী গাওঁ পঞ্চায়তৰ প্ৰাক্তন সদস্য মাইনুল হক, ৰাজীৱ আহমেদ, হুমায়ুন ৰছিদ, শিক্ষক আবুল বাদশাৰ, স্থানীয় যুৱ সমাজ কৰ্মী জিয়াউদ্দিন ইউছোফ, বিশিষ্ট ক্ৰীড়া প্ৰেমী আব্দুল ছাত্তাৰ, আব্দুৰ ৰছিদ,আজাহাৰুল ইছলাম,স্বপন কুমাৰ দাস,বিজয় চন্দ্ৰ ঘোষ, প্ৰবীন কুমাৰ ঠাকুৰ,জাবেৰ আহমেদ আদি কৰি বহু মান্য গন্য ব্যক্তি, লগতে উপস্থিত থাকে শিলবৰী স্কাই লাইন পাব্লিক স্কুলৰ ছাত্ৰ-ছাত্ৰী শিক্ষক শিক্ষয়িত্ৰী, দুই সহস্ৰাধিক ৰাইজ।