বিহালীৰ নাচবৰস্থিত বিমলা আদৰ্শ মধ্য ইংৰাজী বিদ্যালয়ত আজি বিহালী প্ৰেছ ক্লাবৰ ৩০ সংখ্যক প্ৰতিষ্ঠা দিৱসটি সোমবাৰে দিনযোৰাকৈ উদযাপন কৰা হয়। পুৱা প্ৰেছ ক্লাৱৰ পতাকা উত্তোলন কৰে সভাপতি দীপক শৰ্মাই ।
স্মৃতি তৰ্পণ কাৰ্যসূচী আৰম্ভ কৰে বিমলা আদৰ্শ প্ৰাথমিক বিদ্যালয়ৰ প্ৰধান শিক্ষয়িত্ৰী ঊষা ঘিমিৰেই।

তাৰ পাছতে ছাত্ৰ-ছাত্ৰীৰ মাজত আকস্মিক বক্তৃতা আৰু চিত্ৰাঙ্কণ প্ৰতিযোগিতা অনুষ্ঠিত হয় । আকস্মিক প্ৰতিযোগিতাত প্ৰথম, দ্বিতীয় আৰু তৃতীয় বিবেচিত হয় ক্ৰমে ঋতুস্মিতা হাজৰিকা, ডিম্পী মাহাতু আৰু যুটীয়াভাৱে অঞ্জুমণি ওৰাং আৰু বিস্মিতা দেৱী ।

চিত্ৰাংকন প্ৰতিযোগিতাত প্ৰথম, দ্বিতীয় আৰু তৃতীয় বিবেচিত হয় ক্ৰমে নিকিতা তেলেঙা, পিণ্টু তেলেঙা আৰু আকাশী ওৰাং। বিচাৰক হিচাপে উপস্থিত থাকে দীপক শৰ্মা, দিলীপ তেলেঙা আৰু দিগন্ত কুমাৰ দাস। পৰিচালনা কৰে অম্লান কাশ্যপ চাহা, কৰণ শইকীয়া, ত্ৰিদিৱ দাস আৰু খগেন মটকে।

দুপৰীয়াৰ পৰা অনুষ্ঠিত মুকলি সভাত সভাপতিত্ব কৰে বিহালী প্ৰেছ ক্লাৱৰ সভাপতি দীপক শৰ্মাই । সভাৰ আঁ‌ত ধৰে সম্পাদক শ্ৰীমন্ত দাস আৰু প্ৰাক্তন সম্পাদক দিগন্ত কুমাৰ দাসে ।

আমন্ত্ৰিত অতিথি হিচাপে অংশগ্ৰহণ কৰি বক্তব্য ৰাখে বিশ্বনাথ চাৰিআলিৰ সমাজকৰ্মী দিলীপ কাকতীয়ে। তেখেতে নিজৰ বক্তব্য প্ৰসঙ্গত ‘সাংবাদিক সকলে নীতি-আদৰ্শ বজাই ৰাখি, সত্য-নিষ্ঠ, যুক্তিসিদ্ধ, সমাজৰ উপকাৰী হোৱাকৈ বাতৰি পৰিৱেশন কৰিব লাগে বুলি কৈ, গণতন্ত্ৰৰ চতুৰ্থ স্তম্ভৰ মৰ্যাদা অটুত ৰাখিবলৈকো আহ্বান জনায়।

আন এগৰাকী অতিথি, প্ৰতিমা বৰুৱা পাণ্ডে বঁ‌টা প্ৰাপক বিনোদ খনালেও নিজৰ বক্তব্যত “বিহালীৰ সাংবাদিকে সদায় দহৰ উপকাৰী, সমাজৰ হিতসাধন কৰা, সত্যৰ ওপৰত প্ৰতিষ্ঠিত সংবাদ পৰিৱেশন কৰাটো আমি বিচাৰো আৰু তেতিয়াহে সাংবাদিকৰ দায়বদ্ধতা পৰিষ্কাৰ ৰূপত ফুটি উঠিব আৰু নতুন দিগন্তৰ সূচনা হ’ব” বুলি উল্লেখ কৰে ।
বিহালীৰ প্ৰাক্তন ছাত্ৰ নেতা, সমাজ সচেতন ব্যক্তি নিৰঞ্জন দাসেও বক্তব্য ৰাখি “সংবাদ সদায় নিৰপেক্ষ, নিঃস্বাৰ্থ ৰূপত পৰিৱেশন কৰিব লাগে, কিন্তু কাৰোবাক তোষামোদ কৰা, ভালৰি বোলোৱা, সমাজৰ বা অঞ্চলটোৰ অনিষ্টকৰ বাতৰি যুগুত কৰা বা প্ৰকাশ কৰাটো নিবিচাৰো।

সুস্থ গণতন্ত্ৰৰ প্ৰতিষ্ঠাত এগৰাকী সাংবাদিকৰ যথেষ্ট ভূমিকা থাকে, যিটো আদৰণীয় ” বুলি কয় ।
সভাত বিহালীৰ সমাজ জীৱনলৈ যথেষ্ট বৰঙনি আগবঢ়োৱা, নিঃস্বাৰ্থ সমাজ সেৱী জয় কুমাৰ সুতাৰক আনুষ্ঠানিক সম্বৰ্দ্ধনা জ্ঞাপন কৰা হয় । সম্বৰ্ধনা গ্ৰহণ কৰি জয় কুমাৰ সুতাৰে বিহালী প্ৰেছ ক্লাৱৰ বিভিন্ন সমাজমুখী পদক্ষেপক ভূয়সী প্ৰশংসা কৰি “মোৰ দৰে এজন সাধাৰণ ব্যক্তিক এনেধৰণে সম্বৰ্দ্ধনা জ্ঞাপন কৰাটোত মই অতি আচৰিত হৈছোঁ” বুলি উল্লেখ কৰি “সাংবাদিকে সমাজ গঠনত বহু গুৰুত্বপূৰ্ণ ভূমিকা গ্ৰহণ কৰিব পাৰে” বুলিও কয় । ৰাজহুৱা একাষাৰত অৱসৰপ্ৰাপ্ত শিক্ষক কীৰ্তি গোস্বামীয়ে বক্তব্য ৰাখি ‘সমাজ পৰিৱৰ্তনত সাংবাদিকে বহুখিনি বৰঙণি আগবঢ়াব পাৰে আৰু প্ৰকৃত সাংবাদিক সদায় সমাজৰ প্ৰতি দায়িত্বশীল, নীতিবোধ সম্পন্ন আৰু নিঃস্বাৰ্থ হৈ সেৱা আগবঢ়োৱা ব্যক্তি হ’ব লাগে’ বুলি কয় ।

পূৱ বিহালী শাখা সাহিত্য সভাৰ প্ৰাক্তন সম্পাদক প্ৰতাপ ৰয়ে নিজৰ বক্তব্যত ‘সাংবাদিক এজন সমাজৰ অতন্দ্ৰ প্ৰহৰী হ’ব লাগে, যাতে সমাজৰ কিবা উপকাৰ হয়’ বুলিও কয় ।

কাৰ্যসূচীৰ মাজত বিজয়ী প্ৰতিযোগী সকলক পুৰস্কাৰ বিতৰণ কৰা হয় । এই কাৰ্যসূচী পৰিচালনা কৰাৰ লগতে শলাগৰ শৰাই আগবঢ়ায় বিহালী প্ৰেছ ক্লাৱৰ সম্পাদক শ্ৰীমন্ত দাসে । বিমলা মধ্য ইংৰাজী বিদ্যালয়ৰ প্ৰধান শিক্ষক কুলপ্ৰসাদ ভট্টৰায়ে সভাখন সামগ্ৰিক পৰিচালনাত সহযোগিতা আগবঢ়ায়।

সভাত বিহালী প্ৰেছ ক্লাৱৰ প্ৰাক্তন উপসভাপতি ঘনশ্যাম বৰাল, বিশ্বনাথ জিলা প্ৰশাসনে ৰাষ্ট্ৰী প্ৰেছ দিৱসত সম্বৰ্দ্ধনা জনোৱা বিহালী প্ৰেছ ক্লাৱৰ পত্ৰিকা সম্পাদক তথা প্ৰাক্তন সহকাৰী সম্পাদক ৰোহিণী কৌড়িণ্যক সম্বৰ্ধনা জনোৱা হয়।

সভাত প্ৰাক্তন ছাত্ৰ নেতা অমৰজ্যোতি ফুকন, অধীৰ সৰকাৰ, সমাজকৰ্মী দিলীপ তেলেঙা, মঃ আলি হুছেইন, গণেশ বৰা, সাহিত্যিক পেন্সনাৰ, অৱসৰপ্ৰাপ্ত শিক্ষক লক্ষ্মীকান্ত শৰ্মাকে ধৰি কে’বাগৰাকীও গণ্যমান্য লোকে অংশগ্ৰহণ কৰে।

ইংৰাজী নৱবৰ্ষৰ প্ৰথম দিনটোতে শোণিতপুৰ জিলা কৃষি বিভাগে জিলাখনৰ সাতগৰাকী প্ৰগতিশীল কৃষকক সম্বৰ্ধনা জনাই৷ বিগত সময়চোৱাত জিলাখনৰ কৃষি খণ্ডৰ বাবে আগবঢ়োৱা উল্লেখনীয় পদক্ষেপ আৰু সামাজিক ক্ষেত্ৰত বিশেষ অৱদানৰে বিভিন্ন স্থানত প্ৰশংসা বুটলিবলৈ সক্ষম হোৱা শোণিতপুৰৰ সাত গৰাকীকৈ প্ৰগতিশীল কৃষক ঘনশ্যাম নাথ, শৰৎ বৰুৱা, জিতুমনী কলিতা, জিতেন কুজুৰ, আব্দুল খালেক, সুভাষ সিং আৰু কমল কুমাৰী বড়োক সম্বর্ধনা জ্ঞাপন কৰা হয়।

জিলা কৃষি বিষয়া পংকজ কুমাৰ শইকীয়া, অৱসৰপ্ৰাপ্ত যুটীয়া কৃষি সঞ্চালক হৰেশ্বৰ দাস, সহকাৰী কৃষি সঞ্চালক মিজানুৰ ৰহমান, মহকুমা কৃষি বিষয়া প্ৰণৱ বৰা, অঞ্জুমণি ভাগৱতী, ধীৰেন শৰ্মা, কৃষি উন্নয়ন বিষয়াসকল আৰু জিলা কৃষি বিভাগ, এপাৰ্ট- আত্মাৰ অন্যান্য বিষয়া কৰ্মচাৰীসকলৰ উপস্থিতত অনুষ্ঠিত এই অনুষ্ঠানৰ আঁত ধৰে জিলা মিডিয়া বিশেষজ্ঞ বিতোপন শইকীয়াই৷

অনুষ্ঠানটোত আদৰণী ভাষণ প্রদান কৰে জিলা কৃষি বিষয়া শইকীয়াই। উল্লেখযোগ্য যে,এই অনুষ্ঠানতে যোৱা ১৬-১৮ ডিচেম্বৰলৈ তিনিদিনীয়া কাৰ্যসূচীৰে গুৱাহাটীৰ খানাপাৰাস্থিত পশু চিকিৎসা বিজ্ঞান মহাবিদ্যালয়ৰ খেলপথাৰত অনুষ্ঠিত হোৱা ‘অসম আন্তর্জাতিক কৃষি-উদ্যান শস্য মেলা- ২০২৩’ ত পশুপালন ক্ষেত্ৰত আগবঢ়োৱা অৱদানৰ বাবে ৰাজ্যৰ ‘শ্রেষ্ঠ কৃষক’ৰ সন্মানেৰে সন্মানিত হোৱা ডিপোটা কৃষি চক্ৰৰ অন্তৰ্গত দ-বেছেৰীয়াৰ ঘনশ্যাম নাথক সম্বর্ধনা জ্ঞাপন কৰা হয় । জিলা কৃষি বিভাগ আৰু আত্মাৰ সহযোগত গাহৰি, হাঁহ, ছাগলী ইত্যাদি ফাৰ্মৰ জড়িয়তে বছৰি কেইবা লক্ষাধিক টকা উপাৰ্জন কৰিবলৈ সক্ষম হোৱা নাথক আন্তৰ্জাতিক কৃষি উদ্যান শস্য মেলা ২০২৩ তে শ্ৰেষ্ঠ কৃষকৰ বঁটাসহ ৫০ হেজাৰ টকাৰ চেক প্রদান কৰিছিল মুখ্যমন্ত্ৰী ড০ হিমন্ত বিশ্ব শর্মাই।

অনুষ্ঠানতে সম্পূর্ণ প্ৰাকৃতিকভাৱে কৃষিকাৰ্য কৰি বহুজনৰ দৃষ্টি আকর্ষণ কৰিবলৈ সক্ষম হোৱাৰ লগতে আন্তৰ্জাতিক কৃষি উদ্যান শস্য মেলা ২০২৩ ত প্ৰগতিশীল কৃষকৰ সন্মান লাভ কৰা চিলাবন্ধা কৃষি চক্ৰৰ অন্তৰ্গত আদৰ্শ কৃষক শৰৎ বৰুৱা, পশুপালনৰ জড়িয়তে নিজকে স্বাৱলম্বী কৰি তোলাৰ লগতে বহুজনক কৰ্ম সংস্থাপনৰ বাট মুকলি কৰিবলৈ সক্ষম হোৱা ঢেকিয়াজুলি কৃষি চক্ৰৰ জিতুমনী কলিতা আৰু ৰঙাপাৰাৰ আদৰ্শ কৃষক জিতেন কুজুৰকো সম্বর্ধনা জ্ঞাপন কৰা হয়।

আনহাতে তেজপুৰ লিচুৰ জৰিয়তে বিশ্বৰ বজাৰ দখল কৰিবলৈ সক্ষম হোৱা একমাত্র কৃষক উৎপাদক কোম্পানী ‘অগ্নিগড়’ এফ পি চিৰ, বি অ ডি আব্দুল খালেককো সম্বর্ধনা জ্ঞাপন কৰা হয় । শেহতীয়াকৈ অসম কৃষি বিশ্ববিদ্যালয়ৰ অধীনত উত্তৰ লখিমপুৰস্থিত মাণ্ডলিক গৱেষণা কেন্দ্ৰৰ উদ্যোগত আৰু লক্ষীমপুৰ কৃষি বিজ্ঞান কেন্দ্ৰৰ সহযোগত অনুষ্ঠিত ‘মাণ্ডলিক কৃষক সমাৰোহ ২০২৩’ ত অসমৰ উদ্যান শস্যৰ বাবে আগবঢ়োৱা অনবদ্য অৱদানৰ বাবে খালেকক সম্বর্ধনা জ্ঞাপন কৰিছিল ৰাজ্যৰ কৃষি মন্ত্ৰী অতুল বৰাই।

এই সমাৰোহতে সন্মান লাভ কৰা তেজপুৰ পৰোৱাৰ আন এজন কৃষক সুভাষ সিংকো সম্বর্ধনা জ্ঞাপন কৰা হয় । কুহিয়াঁৰ খেতিৰ জৰিয়তে গুৰ উৎপাদন কৰি লক্ষাধিক টকা উপাৰ্জন কৰিবলৈ সক্ষম হৈছে সুভাষে । ইয়াৰ উপৰিও নাৰী শক্তিৰ প্ৰতীক জয়মতী কৃষক উৎপাদক কোম্পানীটোক নেতৃত্ব দি কৃষি বিপ্লৱৰ সূচনা কৰা কমল কুমাৰী বড়োক সম্বর্ধনা জ্ঞাপন কৰিলে জিলা কৃষি বিষয়া পংকজ কুমাৰ শইকীয়াই।

উল্লেখযোগ্য যে দেশৰ ভূতপূর্ব প্রধানমন্ত্রী, ভাৰত ৰত্ন অটল বিহাৰী বাজপেয়ীৰ সোঁৱৰণত গঠিত অটল ফাউণ্ডেশ্যন’ৰ অন্তৰ্গত দেশৰ ৰাজধানী নতুন দিল্লীৰ ‘প্ৰধানমন্ত্ৰী সংগ্ৰহালয়’ৰ প্ৰেক্ষাগৃহত অনুষ্ঠিত এক অনুষ্ঠানত সামাজিক উন্নয়ন আৰু দেশৰ বিকাশত আগবঢ়োৱা উল্লেখযোগ্য অৱদানৰ বাবে প্ৰেৰণাদায়ক ‘অটল গৌৰৱ’ সন্মানেৰে সন্মানিত হৈ কমল কুমাৰী বড়োৱে জিলাখনলৈ গৌৰৱ কঢ়িয়াই আনিবলৈ সক্ষম হৈছে।