জম্মু-কাশ্মীৰ বিধানসভাত কাশ্মীৰী পণ্ডিত,পাক অধিকৃত কাশ্মীৰৰ শৰণাৰ্থীৰ বাবে কেন্দ্ৰই আসন সংৰক্ষণ কৰিছেঃ অমিত শ্বাহ

কেন্দ্ৰীয় গৃহমন্ত্ৰী অমিত শ্বাহে আজি লোকসভাত কাশ্মীৰ সম্পৰ্কীয় জম্মু-কাশ্মীৰ সংৰক্ষণ (সংশোধনী) বিধেয়ক ২০২৩ আৰু জম্মু-কাশ্মীৰ পুনৰ্গঠন (সংশোধনী) বিধেয়ক ২০২৩ নামৰ দুখন বিধেয়ক উত্থাপন কৰি কয় যে এখন বিধেয়কে এগৰাকী মহিলাসহ দুজন কাশ্মীৰী প্ৰব্ৰজনকাৰী সম্প্ৰদায়ৰ সদস্যক বিধানসভাত মনোনীত কৰিব বিচাৰিছে আৰু জম্মু-কাশ্মীৰ বিধানসভাত পাকিস্তান অধিকৃত কাশ্মীৰৰ পৰা স্থানান্তৰিত হোৱা লোকসকলৰ বাবে এখন আসন সংৰক্ষণ কৰিব বিচাৰিছে। কাশ্মীৰৰ ৰাজনৈতিক দলসমূহে কেন্দ্ৰীয় শাসিত অঞ্চলত আগতীয়া নিৰ্বাচন অনুষ্ঠিত কৰাৰ দাবী কৰি থকাৰ সময়তে শ্বাহে এনে ঘোষণা কৰে। । দুয়োখন বিধেয়ক লোকসভাই বিতৰ্কৰ পিছত গৃহীত কৰে।
জম্মু আৰু কাশ্মীৰ সংৰক্ষণ (সংশোধনী) বিধেয়ক ২০২৩ ত ২০০৪ চনৰ জম্মু আৰু কাশ্মীৰ সংৰক্ষণ আইনৰ সংশোধন কৰা হৈছে আনহাতে জম্মু আৰু কাশ্মীৰ পুনৰ্গঠন (সংশোধনী) বিধেয়ক ২০২৩ ত জম্মু আৰু কাশ্মীৰ পুনৰ্গঠন আইন ২০১৯ৰ সংশোধন কৰা হৈছে।

লোকসভাত শ্বাহে কয়”এই বিধেয়কে সন্ত্ৰাসবাদৰ বাবে কাশ্মীৰ এৰিব লগা লোকসকলক বিধানসভাত প্ৰতিনিধিত্ব দিব বিচাৰিছে… জম্মু আৰু কাশ্মীৰ বিষয়ক দুখন বিধেয়কৰ এখনে এগৰাকী মহিলাসহ দুজন কাশ্মীৰী প্ৰব্ৰজনকাৰী সম্প্ৰদায়ৰ সদস্যক বিধানসভালৈ মনোনীত কৰিব বিচাৰিছে। জম্মু-কাশ্মীৰ বিধানসভাৰ এখন আসন পাকিস্তান অধিকৃত কাশ্মীৰৰ পৰা স্থানান্তৰিত হোৱা লোকসকলৰ বাবে সংৰক্ষিত কৰা হ’ব,”।
কেন্দ্ৰীয় গৃহমন্ত্ৰীগৰাকীয়ে লগতে কয় যে জম্মু-কাশ্মীৰ সম্পৰ্কীয় দুখন বিধেয়কে যোৱা ৭০ বছৰ ধৰি কাশ্মীৰত অধিকাৰৰ পৰা বঞ্চিত লোকসকলক ন্যায় প্ৰদান কৰিব। বিৰোধী দলসমূহক আক্ৰমণ কৰি শ্বাহে কয় যে যদি ভোট বেংকৰ ৰাজনীতিৰ কথা বিবেচনা নকৰাকৈ আৰম্ভণিতে সন্ত্ৰাসবাদৰ মোকাবিলা কৰা হ’লহেঁতেন, কাশ্মীৰী পণ্ডিতসকলে আজি উপত্যকা এৰিবলগীয়া নহ’লহেঁতেন।

কংগ্ৰেছক সমালোচনা কৰি শ্বাহে কয় যে পুৰণি দলটোৱে অন্যান্য পিছপৰা শ্ৰেণীৰ আটাইতকৈ বেছি ক্ষতি কৰিছে , আনহাতে প্ৰধানমন্ত্ৰী নৰেন্দ্ৰ মোদীয়ে পিছপৰা শ্ৰেণীৰ কল্যাণৰ বাবে নিৰন্তৰ ভাৱে কাম কৰি আহিছে।

শ্বাহে কয় “মই ইয়ালৈ অনা বিধেয়কখন যিসকলৰ বিৰুদ্ধে অন্যায় কৰা হৈছিল তেওঁলোকক ন্যায় প্ৰদান কৰা, যাক অপমান কৰা হৈছিল আৰু যিসকলক উপেক্ষা কৰা হৈছিল তেওঁলোকক অধিকাৰ প্ৰদান কৰাৰ বাবে অনা হৈছে। যিকোনো সমাজত, যিসকল বঞ্চিত তেওঁলোকক আগুৱাই নিয়া উচিত। সেয়া হৈছে ভাৰতৰ সংবিধানৰ মৌলিক ধাৰণা। কিন্তু তেওঁলোকক এনেদৰে আগুৱাই আনিব লাগিব যাতে তেওঁলোকৰ সন্মান লাঘৱ নহয়। অধিকাৰ প্ৰদান আৰু সন্মান সহকাৰে অধিকাৰ দিয়াৰ মাজত যথেষ্ট পাৰ্থক্য আছে। সেয়েহে, দুৰ্বল আৰু বঞ্চিত শ্ৰেণীৰ পৰিৱৰ্তে ইয়াক আন পিছপৰা শ্ৰেণীৰ বাবে বুলি পুনৰ নামকৰণ কৰাটো গুৰুত্বপূৰ্ণ,” ।

শ্বাহে কয় যে প্ৰাক্তন প্ৰধানমন্ত্ৰী জৱাহৰলাল নেহৰুৰ দ্বাৰা কৰা ২ টা ভুলৰ বাবে জম্মু আৰু কাশ্মীৰ ক্ষতিগ্ৰস্ত হৈছে – প্ৰথমে যুদ্ধবিৰতি ঘোষণা কৰা আৰু তাৰ পিছত কাশ্মীৰ সমস্যা ৰাষ্ট্ৰসংঘলৈ লৈ যোৱা। তেওঁ কয় যে মোদী চৰকাৰে কেন্দ্ৰীয় শাসিত অঞ্চলৰ পৰা সন্ত্ৰাসবাদীক শেষ কৰাৰ লক্ষ্য স্থিৰ কৰিছে। “মই বিশ্বাস কৰোঁ যে মোদী চৰকাৰ ২০২৪ চনত ক্ষমতালৈ ঘূৰি আহিব আৰু ২০২৬ চনৰ ভিতৰত কাশ্মীৰত কোনো সন্ত্ৰাসবাদীৰ আক্ৰমণৰ ঘটনা সংঘটিত নহ’ব,”।