বিশ্বৰ সৰ্বোচ্ছ শৃংগ মাউণ্ট এভাৰেষ্ট জয় কৰি ঘৰলৈ ঘূৰি নাহিল দুই ভাৰতীয় পৰ্বতাৰোহীৰ৷ শৃংগ জয় কৰি তললৈ নামি অহাৰ সময়তে দুয়োগৰাকীৰে অতি দুখজনকভাৱে মৃত্যু ঘটে৷ শুকুৰবাৰে নেপালৰ এজন বিষয়াৰ উদ্ধৃতি দি দেশৰ এটা সংবাদ সংস্থাই এই বেদনাদায়ক খবৰ প্ৰকাশ কৰিছে৷ মৃত পৰ্বতাৰোহী দুজনৰ নাম হৈছে অৰুণ তিৱাৰী আৰু সন্দীপ আৰে৷ নেপালৰ এক্সপেডিচন অপাৰেটৰ্ছ এছ’চিয়েচনৰ ছেক্ৰেটেৰী জেনেৰেল ঋষি ভাণ্ডাৰীয়ে জনোৱা মতে, ওপৰৰ পৰা নামি অহাৰ সময়ত হঠাতে এজন পৰ্বতাৰোহী অত্যন্ত ভাগৰুৱা হৈ পৰিছিল৷ তেওঁক উদ্ধাৰ কৰিবলৈ শ্বেৰ্পাসকলে গোটেই নিশা প্ৰাণপণে চেষ্টা চলাইছিল৷ তেওঁক বেলকনি নামৰ অঞ্চলটোৰ পৰা ছাউথ কললৈ নমাই আনিবলৈ চেষ্টা কৰা হৈছিল যদিও শেষ পৰ্যন্ত তেওঁক বচাবলৈ সম্ভৱ নহ’ল৷

ঠিক একে সময়তে আন এগৰাকী ভাৰতীয় পৰ্বতাৰোহী অৰুণ তিৱাৰীও এভাৰেষ্ট শৃংগত উপনীত হৈছিল৷ বৃহস্পতিবাৰে বিয়লি প্ৰায় পাঁচ বজাত তেওঁ সৰ্বোচ্ছ চূড়াত ভৰি থৈছিল৷ তেওঁৰ সৈতে দুজন অভিজ্ঞ শ্বেৰ্পা গাইডো আছিল৷ কিন্তু ওপৰৰ পৰা নামি অহাৰ সময়ত হিলাৰী ষ্টেপ নামৰ এলেকাটোত তেওঁ হঠাতে অসুস্থ আৰু ক্লান্ত হৈ পৰে৷ শ্বেৰ্পাসকলে বহু চেষ্টা কৰিছিল যদিও তেওঁক সুস্থ শৰীৰে ঘূৰাই আনিব নোৱাৰিলে বুলি ভাণ্ডাৰীয়ে জানিবলৈ দিয়ে৷ তথ্য অনুসৰি, হিলাৰী ষ্টেপৰ ওচৰতেই অৰুণ তিৱাৰীৰ মৃত্যু হয়৷ আনহাতে, সন্দীপ আৰেক উদ্ধাৰ কৰি কেম্প টুলৈ নমাই অনা হৈছিল যদিও তাতেই তেওঁ শেষ নিশ্বাস ত্যাগ কৰে৷ এভাৰেষ্ট অভিযানত সংঘটিত এই দুই মৃত্যুৰ ঘটনাই পৰ্বতাৰোহীসকলৰ মাজত নতুনকৈ চিন্তা আৰু উদ্বেগ বৃদ্ধি কৰিছে৷ অৱশ্যে ইয়াৰ মাজতে এই বছৰ ভাৰতীয় পৰ্বতাৰোহীসকলৰ সফলতাৰ বহু ভাল খবৰো পোহৰলৈ আহিছে৷ অলপতে মাত্ৰ ২১ বছৰ বয়সতে এভাৰেষ্ট জয় কৰিবলৈ সক্ষম হৈছে ছানিকা শ্বাহ নামৰ এগৰাকী যুৱতীয়ে৷ ইয়াৰ উপৰি সীমান্ত সুৰক্ষা বাহিনী অৰ্থাৎ বিএছএফৰ সম্পূৰ্ণ মহিলাৰে গঠিত এটা পৰ্বতাৰোহী দলেও সফলতাৰে এভাৰেষ্ট শৃংগ স্পৰ্শ কৰিবলৈ সক্ষম হৈছে৷

এই বছৰৰ পৰ্বতাৰোহণৰ বতৰত এভাৰেষ্টত পৰ্বতাৰোহীৰ ভিৰে এক নতুন ৰেকৰ্ড গঢ়ি তুলিছে৷ কেৱল বুধবাৰৰ দিনটোতে নেপালৰ দিশৰ পৰা ২৭৪গৰাকী পৰ্বতাৰোহীয়ে এভাৰেষ্টৰ চূড়াত ভৰি থৈছে৷ খুম্বু আইচফলত কিছু পলম হোৱাৰ বাবে এইবাৰৰ অভিযান অলপ দেৰিকৈ আৰম্ভ হৈছিল৷ যোৱা ১৩ মে’ত ৰোপ ফিক্সিং অৰ্থাৎ জৰী বান্ধি পথ তৈয়াৰ কৰাৰ কাম শেষ হোৱাৰ পিছত আনুষ্ঠানিকভাৱে এই বৰ্ষৰ ক্লাইম্বিং ছিজন আৰম্ভ হৈছিল৷ উল্লেখ্য যে, নেপাল চৰকাৰে এইবাৰ এভাৰেষ্ট অভিযানৰ বাবে ৪৯৩টা পাৰ্মিট বা অনুমতি-পত্ৰ দিছে, যিটো এতিয়ালৈকে সৰ্বাধিক৷ ১৯৫৩ চনত তেনজিং নৰ্গে আৰু ছাৰ এডমণ্ড হিলাৰীয়ে প্ৰথমবাৰৰ বাবে সফলভাৱে এভাৰেষ্ট জয় কৰাৰ পিছত ইমান বৃহৎসংখ্যক পাৰ্মিট কেতিয়াও দিয়া হোৱা নাছিল৷

পৰকীয়া প্ৰেম আৰু বীমা ধন লাভৰ লালসাৰ চৰম পৰিণতি৷ বিনা দোষতে এজন লোকে হেৰুৱালে প্ৰাণ৷ পত্নীয়ে প্ৰেমিকৰ সৈতে মিলি স্বামীক হত্যা কৰিবলৈ নিয়োগ কৰিছিল আন দুজন লোক ৷ পিছে লোভেই পাপ, পাপেই মৃত্যু ৷ অতিপাত লোভেই কাল হ’ল ৷ স্বামীহন্তা পত্নী তথা হত্যাকাণ্ডটোৰ এজনক বাদ দি বাকী অভিযুক্তকেইজন সম্প্ৰতি আৰক্ষীৰ জালত৷ ইয়াৰে এজনে পলায়ন কৰা বুলি মঙলবাৰে আৰক্ষীয়ে সদৰী কৰে৷ এই ঘটনাই সমগ্ৰ অঞ্চলতে চাঞ্চল্যৰ সৃষ্টি কৰিছে ৷ আৰক্ষী সূত্ৰই সদৰী কৰা অনুসৰি, দীৰ্ঘদিনৰে পৰা মহিলাগৰাকীয়ে স্বামীৰ অজ্ঞাতে এজন লোকৰ সৈতে বিবাহ বহিৰ্ভূত সম্পৰ্ক ৰক্ষা কৰি আহিছিল৷ পৰৱৰ্তী সময়ত বাটৰ কাঁইট হিচাপে থকা স্বামীক আঁতৰাবলৈ প্ৰেমিকৰ সৈতে মিলি মহিলাগৰাকীয়ে পৰিকল্পনা ৰচে আৰু ইয়াৰ বাবে আন দুজন লোকক নিয়োগ কৰে৷ মহিলাগৰাকীৰ নাম ভাৰতী আৰু তেওঁ তেলেংগানাৰ বাসিন্দা৷ ইতিমধ্যে তেলেংগানা আৰক্ষীয়ে ভাৰতীৰ সৈতে প্ৰেমিক সুৰেন্দৰ আৰু ভাৰাতীয়া হত্যাকাৰী দুজনৰ এজনক গ্ৰেপ্তাৰ কৰিছে৷ গ্ৰেপ্তাৰ কৰা ভাৰাতীয়া হত্যাকাৰীটোক শ্ৰীৰাম বুলি চিনাক্ত কৰা হৈছে ৷ ৰাম মল্লেশ নামৰ আনটো অভিযুক্ত পলাতক অৱস্থাত আছে ৷

আৰক্ষীয়ে মল্লেশৰ সন্ধানত অনুসন্ধান অব্যাহত ৰাখিছে৷ প্ৰাপ্ত তথ্য অনুসৰি, বিগত ২২ মে’ত তেলেংগানাৰ গুড়িপেটত ছাইনী কুমাৰ নামৰ ৪৫বছৰীয়া এজন লোকক গুৰুতৰভাৱে আহত অৱস্থাত পথৰ দাঁতিত পৰি থকা পৰিলক্ষিত হৈছিল৷ লোকজনৰ অৱস্থাটো লক্ষ্য কৰিলে যিকোনো লোকেই ই এক দুৰ্ঘটনা বুলিয়েই ক’ব৷ আচলতে প্ৰকৃত সত্য সেয়া নহয়৷ ই এক পৰিকল্পিত হত্যাকাণ্ডৰ নাটকীয় ৰূপ৷ বিবাহ বহিৰ্ভূত প্ৰেম আৰু ছাইনী কুমাৰৰ নামত থকা বীমাৰ ধন সহজে লাভ কৰিবলৈয়ে ছাইনীৰ পত্নী ভাৰতীয়ে প্ৰেমিকৰ সৈতে মিলি এই ভয়ংকৰ পৰিকল্পনা ৰচনা কৰিছিল৷ আৰক্ষীৰ তদন্তত প্ৰকাশ পাইছে যে ভাৰতী আৰু সুৰেন্দৰে ছাইনী কুমাৰক হত্যা কৰাৰ পৰিকল্পনা কৰিছিল ৷ কাৰণ কুমাৰ তেওঁলোকৰ সম্পৰ্কত বাধা হৈ পৰিছিল আৰু তেওঁৰ নামত ২ কোটি টকাৰ বীমা আছিল৷

বিগত বৰ্ষৰ জানুৱাৰী মাহৰ পৰা স্বামীৰ জীৱন বীমা পলিচীৰ প্ৰিমিয়াম দি থকা ভাৰতীয়ে অনুমান কৰিছিল যে যদি কোনো পথ দুৰ্ঘটনাত কুমাৰৰ মৃত্যু ঘটে, তেন্তে তেওঁ প্ৰায় ২ কোটি টকা লাভ কৰিব৷ আৰক্ষীয়ে এই কথাও জানিব পাৰিছে যে কুমাৰে গুড়িপেটৰ ৰাম মল্লেশৰ পৰা ৬০ হাজাৰ টকা ঋণ হিচাপে লৈছিল যদিও সেই ধন পৰিশোধ কৰিব নোৱাৰিলে৷ এনে সময়তে মল্লেশৰ সৈতে ভাৰতীৰ সাক্ষাৎ ঘটে৷ যোৱা মাহত ভাৰতী আৰু সুৰেন্দৰে মল্লেশক দুই লাখ টকা দিছিল৷ কুমাৰক হত্যা কৰাৰ পিছত পুনৰ এক লাখ টকা দিয়াৰ প্ৰতিশ্ৰুতি দিছিল৷ মল্লেশে এই কামত তেওঁক সহায় কৰিবলৈ মনচেৰিয়েলৰ এলআইচি কলনীৰ শ্ৰীৰামক মাতি আনে৷ পৰিকল্পনা অনুসৰি ৰাম মল্লেশ আৰু শ্ৰীৰামে বিগত ২২ মে’ত কুমাৰক অত্যধিক সুৰাপান কৰোৱায়৷ সুৰাপান কৰাৰ পিছত অচেতন হৈ পৰা কুমাৰৰ মূৰত তেওঁলোকে হাতুৰীৰে আঘাত কৰিছিল ৷ পিছত সমগ্ৰ ঘটনাটোক পথ দুৰ্ঘটনাৰ ৰূপ দিবলৈ কুমাৰৰ দুচকীয়া বাহনখনৰ সৈতে লোক দুজনে তেওঁক পথৰ কাষত পেলাই থৈ যায়৷