গুৰু শংকৰৰ অৱদান সূৰ্যৰ দৰে জ্যোতিষ্মানঃ অসমীয়া মহাজাতিক জগত সভালৈ আগুৱাই নিছিল গুৰু শংকৰে—- বটদ্ৰৱা থানৰ কাৰ্যালয় গৃহ সভাগৃহ সত্ৰাধিকাৰৰ বহা আৰু দামোদৰআতা যাত্ৰী নিবাসৰ নৱনিৰ্মিত ভৱনৰ শুভ উদ্বোধনঃ বটদ্ৰৱা প্ৰকল্পৰ নিৰ্মাণ সম্পূৰ্ণ হৈ উঠা অংশ শুভ উদ্বোধন কৰিব ফেব্ৰুৱাৰীত ঃ গৃহমন্ত্ৰী অমিত শ্বাহ আহিব উদ্বোধনী অনুষ্ঠানলৈঃ বটদ্ৰৱাক ৱল্ড হেৰিটেজ চাইট হিচাপে ঘোষণাৰ বাবে ৮ কি :মি: এলেকাত থলুৱাৰ বাবে সুৰক্ষিত হ’ব ভূমিৰ অধিকাৰঃ জগন্নাথ কলিতা বটদ্ৰৱা ২৪ ছেপ্তেম্বৰ ঃ গুৰুশংকৰৰ অৱদান সূৰ্যৰ দৰে জ্যোতিষ্মান। অসমীয়া মহাজাতিক জগত সভালৈ আগুৱাই নিছিল গুৰু শংকৰে। অসমীয়া জাতিক বিজ্ঞান সন্মত সাংস্কৃতিক মাৰ্গ দৰ্শনৰ পথ প্ৰদৰ্শন কৰাইছিল গুৰু শংকৰদেৱে। নাট ভাওনা নাম প্ৰসঙ্গকে প্ৰমুখ্য কৰি বনাঢ্য কলাৰ মাজেৰে গুৰুজনে অসমীয়া জাতিক সমৃদ্ধিশালী কৰিছে। অসমৰ বৈষ্ণৱ ক্ষেত্ৰখনত গুৰুজনাৰ পদৰেণুৰে ৰঞ্জিত পূণ্যভূমি বটদ্ৰৱাৰ সুকীয়া স্থান আছে। বটদ্ৰৱা হ’ল বৈষ্ণৱ সংস্কৃতিৰ বৰ ঘৰ। গুৰু শংকৰৰ শ্ৰীচৰণত সেৱা ল’লে আমি বিমল প্ৰশান্তি অনুভৱ কৰো। মই গুৰুজনাৰ আদৰ্শৰ অনুৰাগী এজন সাধাৰণ বৈষ্ণৱ। এই মন্তব্য অসমৰ সন্মানীয় মুখ্যমন্ত্ৰী ড° হিমন্ত বিশ্ব শৰ্মাৰ ।

আজি গুৰুজনাৰ জন্মস্থান বটদ্ৰৱাত বটদ্ৰৱা থানৰ কাৰ্যালয় সত্ৰাধিকাৰৰ বহা সভাগৃহ দামোদৰআতা যাত্ৰী নিবাস ইত্যাদি নৱনিৰ্মিত গৃহবোৰৰ শুভাৰম্ভ আৰু শ্ৰী শ্ৰী বটদ্ৰৱা থান পৰিচালনা সমিতিয়ে বছৰজোৰা কাৰ্যসূচীৰে শুভাৰম্ভ কৰা ৫৭৫ তম গুৰু জন্ম জয়ন্তী উৎসৱৰ শুভ উদ্বোধন কৰি এই মন্তব্য কৰে মুখ্যমন্ত্ৰী ড° হিমন্ত বিশ্ব শৰ্মাই। মুখ্যমন্ত্ৰী ড° শৰ্মাই নিজহাতে ফিটা কাটি উল্লিখিত ভৱন সমূহ
উদ্বোধন কৰি বটদ্ৰৱাবাসী ৰাইজলৈ মুকলি কৰে।
। প্ৰণিধানযোগ্য যে মুখ্যমন্ত্ৰী ড° শৰ্মাৰ বিশেষ উদ্যোগ আৰু তৎপৰতাত অসম চৰকাৰৰ পূঁজিৰে বটদ্ৰৱা থানৰ কাৰ্যালয় গৃহ সভাগৃহ সত্ৰাধিকাৰৰ বহা আৰু দামোদৰআতা যাত্ৰী নিবাস নতুন ৰূপত নিৰ্মান হৈ উঠিল। পুৱাৰ ভাগতে এখন হেলিকপ্তাৰেৰে বটদ্ৰৱাত উপস্থিত হয় মুখ্যমন্ত্ৰী গৰাকী। আয়তীৰ উৰুলি মংগল ধ্বনি গায়ন বায়নৰ জোৰা হাজাৰ হাজাৰ মানুহৰ দিহানামৰ ধ্বনিৰে ১ কি:মি:অধিক পথ খোজকাঢ়ি আহি মুখ্যমন্ত্ৰী ড° শৰ্মা বটদ্ৰৱা থানত উপস্থিত হৈ কীতন ঘৰ মণিকূটত সেৱা গ্ৰহণ কৰে । বটদ্ৰৱা থানত পুৱাৰ প্ৰসঙ্গত ভকত বৈষ্ণৱে ওৱা হৰি ওৱা ৰাম জয়ধ্বনিৰে দীৰ্ঘজীৱি হৈ অসম মাতৃৰ সেৱা কৰিবলৈ আশীৰ্বাদ প্ৰদান কৰে মুখ্যমন্ত্ৰী ড° শৰ্মাক।
মুখ্যমন্ত্ৰী ড° শৰ্মাই বটদ্ৰৱা থানত এটি অমৃত বৃক্ষৰ পুলি ৰোপন কৰে।বটদ্ৰৱা থানত গুৰুজয়ন্তীৰ বৰ্ষজোৰা কাৰ্যসূচীৰ শুভাৰম্ভ কৰি ভাষণ প্ৰসঙ্গত মুখ্যমন্ত্ৰী ড° শৰ্মাই কয় ৰে গুৰুজনাৰ জন্মস্থানৰ সৌন্দৰ্য বৰ্ধনৰ বাবে লেন্স কেম্পাছ তৈয়াৰ কৰিব। বটদ্ৰৱা থানৰ থানৰ বাহিৰত ২০১৬ চনত বেদখল মুকলি হোৱা স্থানত ১৫০ কোটিৰ টকা ব্যয়ৰে নিৰ্মাণ হৈ থকা বটদ্ৰৱা প্ৰকল্পৰ শুভ উদ্ধোধন কৰিব ভাৰতৰ গৃহমন্ত্ৰী মাননীয় অমিত শ্বাহে। বটদ্ৰৱা থানৰ আকাশীগংগা হাটিপুখুৰী আৰু টেম্বুৱানিজান ইত্যািদি থানৰ পুখুৰী পাৰত লেন্সকেপিং ৰ ব্যৱস্থা কৰিব বুলিও কয় মুখ্যমন্ত্ৰী গৰাকীয়ে।
বটদ্ৰৱা থানৰ ৮ কিলোমিটাৰ ব্যাৰ্সাদ্ধৰ ভিতৰত ভূমি কিনা বেছাৰ ক্ষেত্ৰত কিছু নিষেধাজ্ঞা ঘোষণা কৰি বটদ্ৰৱাক world heritage place হিচাপে ঘোষণা কৰাৰ কথা প্ৰকাশ কৰে মুখ্যমন্ত্ৰীয়ে। ৮ কি:মি: এলেকাত থলুৱা লোকৰ বাহিৰে অন্যলোকক ভূমি বিক্ৰীৰ ক্ষেত্ৰত নিষেধাজ্ঞা বলবৎৰ বাবে বিধানসভাত আইন ৰূপায়ন কৰা হ’ব বুলিও কয়। ভূমি কিনা বেচাৰ ক্ষেত্ৰত জিলা উপায়ুক্তক কাৰ্যকৰী পদক্ষেপ গ্ৰহণৰ অহ্বান জনায়।ভাষণ প্ৰসঙ্গত মুখ্যমন্ত্ৰীয়ে নগাঁও চহৰৰ যান যঁতৰ সমস্যা লাঘৱ কৰিবলৈ নগাঁও চহৰৰ চিভিলৰ সন্মুখত এখন উৰণীয়া সেঁতু নিৰ্মাণ ৰ চিন্তা কৰি থকা হৈছে বুলিও উল্লেখ কৰে। মহাপুৰুষ শ্ৰীমন্ত শংকৰদেৱৰ স্মৃতি বিজড়িত মধুপুৰ সত্ৰ, পাটবাউসীকে ধৰি ২১ টা স্থানত হ’ব ২১ টা আধ্যাত্মিক দৰ্শন প্ৰতিফলিত হোৱাকৈ নামঘৰ সদৃশ অভিলাষী প্ৰকল্প নিৰ্মাণ কৰাৰ চিন্তা চৰ্চা কৰি থকা বুলিও মুখ্যমন্ত্ৰীয়ে ভাষণত উল্লেখ কৰে। অসমত শংকৰদেৱৰ স্মৃতি বিজড়িত সকলো স্থান যাতে ভাৰতবাসীয়ে দৰ্শন কৰিব পাৰে তাৰবাবে এই অনন্য পদক্ষেপ বুলিও কয় মুখ্যমন্ত্ৰী ড° শৰ্মাই ।

বটদ্ৰৱা প্ৰকল্পৰ ইতিমধ্যে নিৰ্মাণ কাৰ্যৰ আশী শতাংশ কামকাজ সম্পূৰ্ণ হৈ উঠিছে। বটদ্ৰৱা সত্ৰীয়া সম্পদ ৰাজি সংৰক্ষণ আৰু উত্তৰপুৰুষৰ গৱেষণাৰ সুবিধা হোৱাকৈ এটি মিউজিয়াম বা যাদুঘৰ প্ৰতিষ্ঠা কৰা বটদ্ৰৱা থানৰ চৌপাশে পকী দেৱাল আৰু আকাশী গংগাৰ মথাউৰি নিৰ্মান কৰা টেম্বুৱানীজানৰ সোন্দৰ্য বৰ্দ্ধন কৰা হ’ব বুলিও মুখ্যমন্ত্ৰী মহোদয়ে জনায় ।গুৰুজনাৰ পূণ্যভূমি বটদ্ৰৱা থানত মুখ্যমন্ত্ৰীৰ আগমনক লৈ উখল মাখল পৰিৱেশ বিৰাজ কৰে। মুখ্যমন্ত্ৰীয়ে বটদ্ৰৱা থানত সেৱা গ্ৰহন কৰি সত্ৰাধিকাৰ প্ৰমুখ্যে পৰিচালনা সমিতিৰ লগতো বাৰ্তালাপত মিলিত হয়। উন্নয়নৰ বাবে ২২ কোটি টকাৰ পেকেজ ঘোষণা কৰে মুখ্যমন্ত্ৰীয়ে । বটদ্ৰৱা থানৰ আইখেৰসুঁতি সাংস্কৃতিক মঞ্চত মুখ্যমন্ত্ৰী ড° হিমন্ত বিশ্ব শৰ্মাক থান পৰিচালনা সমিতিৰ তৰফৰ পৰা বিপুল ভাৱে আদৰণি জনায়। সাধাৰণ সম্পাদক অৰূপ কুমাৰ শইকীয়াই আদৰণি ভাষণ আগবঢ়োৱা সভাখনিৰ আঁতধৰে কাৰ্যনিৰ্বাহক সদস্য মানিক বৰাই। এই অনুষ্ঠানত থান পৰিচালনা সমিতিৰ সভাপতি যোগেন্দ্ৰ নাৰায়ণ দেৱ মহন্ত উপসভাপতি দেৱানন্দ দেৱ গোস্বামী প্ৰাক্তন সম্পাদক ব্ৰজেন কাকতি ইন্দ্ৰমোহন বৰুৱা কোষাধ্যক্ষ তপন দাস কাৰ্যকৰী সভাপতি প্ৰভাত কলিতা সুশীল খাউণ্ড হিৰণ্য কলিতা হিৰণ নাথ কল্যাণ কলিতা ভূপেন নাথ নিপুল বৰুৱা হৰিনাৰায়ণ কোঁৱৰ দীপুল শইকীয়া নগাঁও বটদ্ৰৱাৰ বিধায়ক ৰূপক শৰ্মা ৰহাৰ বিধায়ক শশীকান্ত দাস বিধায়ক জিতু গোস্বামী যুৱনেতা ৰুহিনী বৰা যুৱ মৰ্চাৰ দেৱশ্ৰী বৰা ডা° মুকুট দেৱনাথ প্ৰমুখ্যে বিষয়ববীয়া সকল উপস্থিত থাকে।

বটদ্ৰৱাৰ উন্নয়ন সন্দৰ্ভত পৰিচালনা সমিতিয়ে মুখ্যমন্ত্ৰীৰ হাতত এখনি স্মাৰক পত্ৰ প্ৰদান কৰে । ইয়াৰ পিছতে নিৰ্মান হৈ থকা বটদ্ৰৱা প্ৰকল্পস্থলী পৰিদৰ্শন কৰি নিৰ্মান কাৰ্যৰ বুজ লয় মুখ্যমন্ত্ৰী গৰাকীয়ে । বটদ্ৰৱা থানত আইসকল যুৱক যুৱতী সকলে মামা বুলি সম্বোধন কৰে মুখ্যমন্ত্ৰী ড° শৰ্মাক। মুখ্যমন্ত্ৰীৰ লগত চেল্ফি উঠি উৎফুল্লিত হয় যুৱক যুৱতী আৰু মহিলা সকল। জনপ্ৰিয় মুখ্যমন্ত্ৰী গৰাকীক কাষত পাই বহুতে নিজৰ বিভিন্ন সমস্যাৰ বিষয়ে আবেদন পত্ৰও দাখিল কৰে। আনহাতে আজি মুখ্যমন্ত্ৰীৰ ভ্ৰমনক কেন্দ্ৰ কৰি একাংশ নিৰাপত্তাৰ দায়িত্বত থকা লোকে সাধাৰণ ৰাইজ আৰু পৰিচালনা সমিতিৰ লোকক দু ব্যৱহাৰ কৰে। তদুপৰি নিৰ্মাণৰ দায়িত্বত থকা ঠিকাদাৰ জনৈক মহেশ্বৰীৰ নিজৰ মানুহ বুলি দম্ভালি মৰা জনৈক সঞ্জয়ে বটদ্ৰৱা থানৰ লগত জড়িত স্থানীয় ৰাইজ আৰু বটদ্ৰৱা প্ৰেছক্লাৱৰ সদস্য সকলক অশ্লীল বাক্যৰে দু ব্যৱহাৰ কৰাৰ অভিযোগ উঠিছে ।

নামখলাত পথ নিৰ্মাণক কেন্দ্ৰকৰি বৃহৎ ৰাজহুৱা সভাঃ

সাংসদ আৰু বিধায়কৰ বিৰূদ্ধে ক্ষোভ ৰাইজৰ

দৰঙৰ পশ্চিম দিশত অৱস্থিত নামখলা এখন অতি ব্যৱসায়ীকভাৱে অতি ব্যস্ততাপূৰ্ণ ঠাই ৷ জিলাখনৰ উত্তৰ আৰু পশ্চিম দিশৰ কেইবাখনো গাওৰ লোক ব্যৱসায়ীক ভাৱে নামখলাৰ সৈতে সম্পূৰ্ণ জড়িত ৷ এই অঞ্চলবাসীয়ে এটাই দুখ প্ৰকাশ কৰে যে ইয়াৰ ওচৰ পাজৰে থকা গাওঁৰ ৰাষ্টা সমুহ সমপূৰ্ণৰূপে অনুন্নত ৷ নামখলা বাসী ৰাইজৰ বহুত কাকূতিমিনতিৰ পিচত মুখ্যমন্ত্ৰীৰ পকি পথ নিৰ্মান আচনিত অন্তৰ্ভুক্ত হ’ল নামখলাৰ পৰা আঠিয়াবাৰী বৰলাখাটলৈ যোৱা পথটি ৷ উল্লেখযোগ্য যে মঙলদৈ মাজিকুচি পথৰ ঐতিহাসিক নামখলা শিৱমন্দিৰ চকৰ পৰা বৰলাখাট, আঠিয়াবাৰী হৈ কেইবাখনো গাওঁৰ মাজেৰে বি টি এডিৰ খৈৰাবাৰীত সংযোগ হৈছে ৷

আনহাতে নামখলা শিৱমন্দিৰ চ’কৰ পৰা পথটি নিৰ্মাণৰ বাবে মুখ্যমন্ত্ৰী পকীপথ নিৰ্মাণ আচনীৰ অধীনত অসম চৰকাৰে ১কোটি ৪১ লাখ ৪৫ হাজাৰ৯০০ টকাৰে ২ কিলোমিটাৰ পথ নিৰ্মাণৰ বাবে ধনৰ আৱণ্টন দিছিল আৰু লগে লগে নামখলা অঞ্চলত এক উৎসৱমুখৰ পৰিবেশে বিৰাজ কৰিছিল কিয়নো নামখলা শিৱমন্দিৰৰ পৰা আঠিয়াবাৰী গাওঁলৈ যোৱা পথটি নিৰ্মাণৰ বাবে টকা অনুমোদন কৰিলে অসম চৰকাৰে ৷ পিচে বৃহত্তৰ নামখলা অঞ্চলৰ ৰাইজৰ মূৰত চেচা পানী ধালিলে সাংসদ আৰু বিধায়কে ৷ সেয়ে ৰাইজ ক্ষোভত জাঙুৰ খাই উঠিল ৷ কিয়নো এই পথটি কলাইগাওঁৰ বিধায়ক দুৰ্গাদাস বড়ো আৰু সাংসদ দিলীপ শইকীয়াই নিৰ্মাণৰ শুভাৰম্ভ কৰিছিল বিটি এডিৰ চাবমহিলা পাৰাত ।

অসম চৰকাৰৰ লোক নিৰ্মাণ বিভাগে উল্লেখ কৰা ফলক অনুযায়ী পথটি নিৰ্মাণ হব লাগিছিল মাজিকুচি পথত সংযোগ কৰি নামখলা শিৱমন্দিৰৰ পৰা আঠিয়াবাৰীলৈ ২ কি মি পথ কিন্তু এতিয়া যি ঠাইৰ পৰা পথটি নিৰ্মাণনৰ শুভাৰম্ভ কৰিলে তাৰ পৰা ২ কি মি হলে মাজিকুচি পথত সংযোগ হোৱাটো বাদ দিয়ক আঠিয়াবাৰী গাৱেই আহি নাপাব ৷ সেয়ে নামখলা বাসী ৰাইজে চৰকাৰক দাবী উথাপন কৰিছে যে সাংসদ দিলিপ শইকীয়া আৰু বিধায়ক দুৰ্গাদাস বড়োৱে য’ত যিমান লাগে ৰাষ্টা বনাওক কবলগীয়া নাই কিন্ত এই ৰাষ্টাটিৰ ফলক অনুযায়ী তৎকালীনভাৱে বিভাগীয় নিয়মেৰে পথ নিৰ্মাণৰ ব্যৱস্থা হব লাগে ৷

অন্যথা মঙলদৈ মাজিকুছি গড়কাপ্তানি পথত সংযোগ কৰি নামখলা শিৱমন্দিৰ চকৰ পৰা পথচোৱা নিৰ্মাণ নোহোৱালৈকে কলাইগাও সমষ্টিৰ বিধায়ক আৰু সাংসদ দিলীপ শইকীয়াই যিকোনো ৰাজহুৱা সভাত উপস্থিত নথকাই ভাল বুলি হুংকাৰ দিয়ে ৷ মুখ্যমন্ত্ৰী পকিপথ আচনিৰ আৱণ্টিত ধন কেনেকৈ বি টি আৰত যাৱলৈ পালে তাকলৈ ৰাইজৰ মাজত চৰ্চা ৷ এতিয়া লোক নিৰ্মাণ বিভাগলৈ ৰাইজৰ প্ৰশ্ন বিটিআৰৰ পৰা পথটি কিয় আৰম্ভণি কৰা হ’ল ?
সেয়ে বৃহত্তৰ নামখলা অঞ্চলৰ ৰাইজ ক্ষোভিত হৈ নামখলাৰ লগতে ওচৰ চুবুৰীয়া গাওঁৰ পুৰুষ,মহিলাৰ উপস্থিতিত নামখলা কলাকৃষ্টি পৰিষদৰ প্ৰেক্ষাগৃহত প্ৰানেশ্বৰ কলিতাৰ সভাপতিত্বত এখনি ৰাজহুৱা সভা অনুষ্ঠিত হয়। ৰাজহুৱা সভাত আগন্তুক দিনত এইপথচোৱা নিৰ্মাণৰ ক্ষেত্ৰত বিধায়ক আৰু সাংসদ গৰাকীয়ে মাহীআইৰ দৃষ্টি দূৰীকৰণ কৰি নামখলা শিৱমন্দিৰ চ’কৰ পৰা পথটি পুনৰ নিৰ্মাণ কৰিবলৈ লোকনিৰ্মান বিভাগৰ দায়িত্বশীল ব্যক্তি আৰু আৰু অসমৰ মুখ্যমন্ত্ৰী গৰাকীক অনুৰোধ জনাই ৷

অসম সাহিত্য সভাৰ উদ্যোগত ধুবুৰীৰ হাতীধুৰা মহাবিদ্যালয়ত দুদিনীয়া কাৰ্যসূচীৰে ৰাষ্ট্ৰীয় পৰ্যায়ৰ আলোচনা সত্ৰ

অসম সাহিত্য সভাৰ পশ্চিম অসমৰ ভাষা-সাহিত্য-সংস্কৃতি গৱেষণা কেন্দ্ৰ আৰু হাতীধুৰা মহাবিদ্যালয়ৰ অসমীয়া বিভাগ আৰু সংস্কৃত বিভাগৰ উদ্যোগত,গোলকগঞ্জ চিলাৰায় মহাবিদ্যালয় আৰু স্বাধীনতা সংগ্ৰামী যতীন্দ্ৰ নাৰায়ণ দাস গ্ৰাম্য পুথিভঁৰালৰ সহযোগত ২৩আৰু২৪ছেপ্তেম্বৰ ইং তাৰিখে দুদিনীয়া কাৰ্যসূচীৰে “পশ্চিম অসমৰ সাহিত্য:অধ্যয়ন আৰু সমালোচনা”শীৰ্ষক এখনি ৰাষ্ট্ৰীয় পৰ্যায়ৰ আলোচনা সত্ৰ অনুষ্ঠিত কৰা হয়।

প্ৰথম দিনটোৰ কাৰ্যসূচীত অসম সাহিত্য সভাৰ পতাকা উত্তোলন কৰে পাগলাহাট শাখা সাহিত্য সভাৰ প্ৰাক্তন সভাপতি শ্ৰী ৰমেশ ৰায়ে, স্মৃতি তৰ্পণ কৰে হাতীধুৰা মহাবিদ্যালয়ৰ অধ্যক্ষ ড০ ফৰিদ উদ্দিন আহমেদে আৰু বৃক্ষৰোপণ কৰে শ্ৰী কোকন চন্দ্ৰ ৰায়ে। ৰাতিপুৱা ১১ বজাত ধুবুৰী জিলা সাহিত্য সভাৰ ৰামধেনু উপসমিতিৰ কাৰ্যকৰী সভাপতি শ্ৰী মন্তেশ্বৰ ৰায়ৰ সঞ্চালনাত অনুষ্ঠিত ৰামধেনু অনুষ্ঠানটো উদ্বোধন কৰে ড০ ফৰিদ উদ্দিন আহমেদে। অসম সাহিত্য সভাৰ কবিতা অনুষ্ঠানৰ সহযোগী আহ্বায়ক শ্ৰী অজয় বৰুৱাই এই অনুষ্ঠানৰ সহ সঞ্চালক হিচাপে সহযোগিতা কৰে। এই অনুষ্ঠানত মহাবিদ্যালয়ৰ ছাত্ৰ -ছাত্ৰীবৃন্দৰ লগতে অঞ্চলটোৰ নৱ প্ৰজন্মৰ মাজত সাহিত্য-সংস্কৃতিৰ চেতনা জাগৰিত কৰাৰ উদ্দেশ্যে পশ্চিম অসমৰ সাহিত্য বিষয়ক বিশেষ বক্তৃতা, ছাত্ৰ -ছাত্ৰীবৃন্দৰ স্বৰচিত সাহিত্য পাঠ আৰু নৃত্য-গীত আদি অনুষ্ঠিত কৰা হয়।

দ্বিতীয় দিনৰ কাৰ্যসূচীত ৰাতিপুৱা দহ বজাৰ পৰা মহাবিদ্যালয়ৰ অধ্যক্ষ তথা আলোচনা সত্ৰখনৰ সভাপতি ড.ফৰিদ উদ্দিন আহমেদৰ সঞ্চালনাত আলোচনা সত্ৰখনৰ উদ্বোধনী অনুষ্ঠান অনুষ্ঠিত হয়। আৰম্ভণিতে বন্তি প্ৰজ্বলন কৰে মহাবিদ্যালয়খনৰ পৰিচালনা সমিতিৰ সভাপতি ড.ৰামাধৰ সিঙে। অসম সাহিত্য সভাৰ সভা আৰম্ভণি গীত “চিৰ চেনেহী মোৰ ভাষা জননী”পৰিবেশন কৰে মহাবিদ্যালয়ৰ ছাত্ৰ -ছাত্ৰীবৃন্দই । উদ্বোধনী ভাষণ প্ৰদান কৰে ধুবুৰী জিলা সাহিত্য সভাৰ প্ৰাক্তন সভাপতি তথা ৰত্নপীঠ মহাবিদ্যালয়ৰ অৱসৰী অধ্যক্ষ, শিক্ষাবিদ , সাহিত্যিক তৰণী কান্ত ৰায়ে। ৰাষ্ট্ৰীয় পৰ্যায়ৰ আলোচনা সত্ৰখনৰ সংক্ষিপ্ত সাৰ সংকলনখন উন্মোচন কৰে ধুবুৰী জিলা সাহিত্য সভাৰ সভাপতি তথা সাহিত্যিক গীতালী বৰুৱাই। আলোচনা সত্ৰখনৰ বীজ ভাষণ প্ৰদান কৰে অসম সাহিত্য সভাৰ প্ৰধান সম্পাদক তথা ধুবুৰী ভোলানাথ মহাবিদ্যালয়ৰ অসমীয়া বিভাগৰ মুৰব্বী অধ্যাপক ড.উপেন্দ্ৰজিৎ শৰ্মাই। বক্তব্য প্ৰদান কৰি ড.শৰ্মাই কয় যে সাম্প্ৰতিক সময়ত অসম সাহিত্য সভাই সভাখনক বিদ্যায়তনিক দিশেৰে আগবঢ়াই লৈ যোৱাৰ প্ৰয়াস কৰিছে। সেয়েহে শাখা সভা, জিলা সভাৰ কাৰ্যক্ৰমসমূহ বিদ্যালয় মহাবিদ্যালয় কেন্দ্ৰিক কৰি পালন কৰাৰ বাবে আহ্বান জনাই আহিছে।আমি আমাৰ নৱপ্ৰজন্মক আমাৰ ভাষা, সাহিত্য, সংস্কৃতিৰ প্ৰতি আকৰ্ষিত কৰিবই লাগিব। সেয়েহে আমাৰ ভাষা, সাহিত্য, সংস্কৃতিৰ নতুন চিন্তা, চৰ্চাক উজ্জীৱিত কৰাৰ মানসেৰে ৰাষ্ট্ৰীয় পৰ্যায়ৰ আলোচনা সত্ৰ আয়োজনৰ পদক্ষেপ অসম সাহিত্য সভাই গ্ৰহণ কৰিছে। অনুষ্ঠানত মুখ্য অতিথি হিচাপে অংশগ্ৰহণ কৰে পশ্চিমবংগৰ আলিপুৰদুৱাৰ কামাখ্যাগুৰিৰ ক্ষুদিৰাম মহাবিদ্যালয়ৰ অধ্যক্ষ স্মৃতি কান্ত বৰ্মনে। তেখেতে ভাষণ প্ৰসংগত অসম সাহিত্য সভাৰ এনেধৰণৰ বিদ্যায়তনিক কাৰ্য সূচীৰ শলাগ লয় আৰু ভৱিষ্যতে অসম সাহিত্য সভাৰ কামত সহযোগ কৰাৰ কথা ঘোষণা কৰে। উদ্বোধনী অনুষ্ঠানত গোলকগঞ্জ চিলাৰায় মহাবিদ্যালয়ৰ মুৰব্বী অধ্যাপক নিতাই চন্দ্ৰ ৰায়,গোসাঁইগাঁও মহাবিদ্যালয়ৰ অধ্যাপক প্ৰদীপ কুমাৰ দাস,ড.ডিম্বেশ্বৰ দাস, অসম সাহিত্য সভাৰ সাংগঠনিক সম্পাদক আজাদ আলী আহমেদ , ধুবুৰী জিলা সাহিত্য সভাৰ উপ সভাপতি সাহিত্যিক পেঞ্চনাৰ আনোৱাৰ হুছেইন, জিলাৰ সম্পাদক বিনয় কুমাৰ নাথ,হাতীধুৰা মহাবিদ্যালয়ৰ পৰিচালনা সমিতিৰ সদস্য ছামছুছ জামান সৰদাৰ, ছেৰফাংগুৰি জনতা মহাবিদ্যালয়ৰ উপাধ্যক্ষা ড.লীনা শৰ্মা, ধুবুৰী ভোলানাথ মহাবিদ্যালয়ৰ অসমীয়া বিভাগৰ সহযোগী অধ্যাপিকা ড .অলকা শৰ্মা, প্ৰমথেশ বৰুৱা মহাবিদ্যালয়ৰ অসমীয়া বিভাগৰ সহযোগী অধ্যাপক ড.ধীৰেন চন্দ্ৰ বৰ্মন , চিলাৰায় মহাবিদ্যালয়ৰ সহকাৰী অধ্যাপক অলকেশ ৰায়,হাতীধুৰা মহাবিদ্যালয়ৰ অধ্যাপক -অধ্যাপিকাবৃন্দকে প্ৰমুখ্যে কৰি ডেৰ শতাধিক গৱেষক, গৱেষিকা আৰু ছাত্ৰ -ছাত্ৰীসকলে অংশগ্ৰহণ কৰে। পশ্চিম অসমৰ ভাষা সাহিত্য সংস্কৃতি গৱেষণা কেন্দ্ৰৰ গৱেষণা বিষয়া তথা চিলাৰায় মহাবিদ্যালয়ৰ অসমীয়া বিভাগৰ সহকাৰী অধ্যাপক ড.উমেশ দাসে আঁত ধৰা উদ্বোধনী অনুষ্ঠানটোৰ শলাগ জ্ঞাপন কৰে হাতীধুৰা মহাবিদ্যালয়ৰ ৰাজনীতি বিজ্ঞান বিভাগৰ সহকাৰী অধ্যাপক জয়ন্ত কুমাৰ ৰায়ে ।
গৱেষণা পত্ৰ পাঠ অনুষ্ঠানটোত তিনিটা ক্ৰমত অনুষ্ঠিত আলোচনা সত্ৰখনত স্মৃতি কান্ত বৰ্মন,ড.অলকা শৰ্মা,ড.লীনা শৰ্মা, নিতাই চন্দ্ৰ ৰায়,ড০ ধীৰেন চন্দ্ৰ বৰ্মন, প্ৰদীপ কুমাৰ দাস,ড.ডিম্বেশ্বৰ দাসে সমল ব্যক্তি হিচাপে অংশগ্ৰহণ কৰা অনুষ্ঠানটোত ৩৩খন গৱেষণা পত্ৰ পাঠ কৰা হয়।

গৱেষণা পত্ৰ পাঠ অনুষ্ঠানটোত গোৱালপৰীয়া নাথ-যোগীসকলৰ লোক-অনুষ্ঠান সোণাই, শিৱানন্দ শৰ্মা বিৰচিত মহামায়া পাঁচালী আৰু মহামায়া মাহাত্ম্য -এক বিশ্লেষণাত্মক অধ্যয়ন, পশ্চিম অসমৰ লোকগীত:এক অধ্যয়ন,শীলভদ্ৰৰ গল্পত পশ্চিম অসমৰ সমাজ জীৱনৰ চিত্ৰ, গোৱালপৰীয়া প্ৰবাদ -পটন্তৰ, ৰাজবংশী সমাজত প্ৰচলিত তন্ত্ৰ -মন্ত্ৰ, গোৱালপৰীয়া লোকজীৱনত নাৰী চৰিত্ৰ আদি বিভিন্ন বিষয়ত গৱেষণা পত্ৰসমূহ পাঠ হয়। আবেলি চাৰি বজাৰ পৰা ৰাষ্ট্ৰীয় পৰ্যায়ৰ আলোচনা সত্ৰখনৰ সামৰণি অনুষ্ঠান অনুষ্ঠিত হয়। মহাবিদ্যালয়ৰ অধ্যক্ষ ড.ফৰিদ উদ্দিন আহমেদৰ সঞ্চালনাত অনুষ্ঠিত সামৰণি অনুষ্ঠানত গোলকগঞ্জ চিলাৰায় মহাবিদ্যালয়ৰ অৱসৰী মুৰব্বী অধ্যাপক তথা কোচ-ৰাজবংশী সাহিত্য সভাৰ সভাপতি ড.দ্বিজেন্দ্ৰ নাথ ভকত, অসম সাহিত্য সভাৰ প্ৰধান সম্পাদক ড.উপেন্দ্ৰজিৎ শৰ্মা প্ৰমুখ্যে বিশিষ্ট অতিথিবৃন্দই অংশ গ্ৰহণ কৰে। গৱেষণা বিষয়া ড.উমেশ দাসে আঁত ধৰা অনুষ্ঠানটোত প্ৰমাণ পত্ৰ বিতৰণ কৰে হাতীধুৰা মহাবিদ্যালয়ৰ অসমীয়া বিভাগৰ সহকাৰী অধ্যাপিকা নিভাৰাণী দাস আৰু সংস্কৃত বিভাগৰ সহকাৰী অধ্যাপিকা ড.অনামিকা দাসে। প্ৰতিবেদন প্ৰস্তুত কৰে অসম সাহিত্য সভাৰ সাংগঠনিক সম্পাদক আজাদ আলী আহমেদে।