অসমৰ প্ৰতিখন জিলা আয়ুক্তৰে বৈঠক মুখ্যমন্ত্ৰীৰ। নতুন দিল্লীৰ অসম হাউছত ভিডিঅ’ কনফাৰেন্সিঙৰ জৰিয়তে এই বৈঠক। বৈঠকত মুখ্যমন্ত্ৰীৰ আত্মনিৰ্ভৰশীল অসম অভিযান আঁচনি সন্দৰ্ভত আলোচনা।
আঁচনিৰ অধীনত ২ লাখ যুৱকক ২ লাখ টকাকৈ দিয়াৰ সিদ্ধান্ত। বৈঠকত চূড়ান্ত কৰা হয় আঁচনিৰ সিদ্ধান্ত।
২৩, ২৪ ছেপ্টেম্বৰৰ পৰা মুকলি কৰা হ’ব পঞ্জীয়ন প্ৰক্ৰিয়া। বৈঠকৰ অন্তত এই কথা জনালে মুখ্যমন্ত্ৰীয়ে।
নলবাৰীৰ জৱাহৰ নবোদয় বিদ্যালয়ত ৰেগিং। কনিষ্ঠ ছাত্ৰক ছাত্ৰক গুৰুলা-গুৰুলকৈ প্ৰহাৰ জ্যেষ্ঠ ছাত্ৰৰ।
দশম শ্ৰেণীৰ ৫ ছাত্ৰক নিৰ্মমভাৱে প্ৰহাৰ দ্বাদশ শ্ৰেণীৰ ছাত্ৰৰ। যোৱা ৯ ছেপ্টেম্বৰৰ নিশা ছাত্ৰাৱাসত সংঘটিত হৈছিল ৰেগিং। ৰেগিং কাণ্ডক বিদ্যালয় কৰ্তৃপক্ষই গাপ দিয়াৰ অভিযোগ অভিভাৱকৰ।
১৫ ছেপ্টেম্বৰতহে কৌশলেৰে অভিভাৱকক জনাইছিল বিদ্যালয় কৰ্তৃপক্ষই। ৯ ছেপ্টেম্বৰত অনুষ্ঠিত হৈছিল শিক্ষক দিৱসৰ বিশেষ কাৰ্যসূচী। শিক্ষক দিৱসৰ কাৰ্যসূচীত সহযোগ নকৰাৰ বাবেই প্ৰহাৰ কৰাৰ অভিযোগ। DGP জি পি সিঙৰ হস্তক্ষেপত নলবাৰী আৰক্ষীয়ে আৰম্ভ কৰিছে তদন্ত।
আজিৰে পৰা ৰাজ্যজুৰি ‘অমৃত কলহ যাত্ৰা’। ‘মোৰ মাটি মোৰ দেশ’ শীৰ্ষক কাৰ্যসূচীৰ অধীনত এই যাত্ৰা। প্ৰতিটো বাসগৃহৰ পৰা সংগ্ৰহ কৰা হ’ব এমুঠি মাটি।
মাটি দিব নোৱৰা মহানগৰীৰ ফ্লেটৰ পৰা লোৱা হ’ব এমুঠিকৈ চাউল। প্ৰতিখন গাঁও পঞ্চায়ত, পৌৰ নিগমৰ প্ৰতিটো ৱাৰ্ডত এই অনুষ্ঠান। ১ অক্টোবৰলৈ চলিব ‘অমৃত কলহ যাত্ৰা’।
২৮ অক্টোবৰত সকলো অমৃত কলহৰ মাটি নতুন দিল্লীলৈ প্ৰেৰণ কৰা হ’ব।
কাছাৰৰ কাটিগড়াত নিশা চাঞ্চল্যকৰ ঘটনা। চলন্ত অটোৰ পৰা দুৰ্বৃত্তই পেলাই দিলে নাবালিকাক। আহত নাবালিকাক উদ্ধাৰ কৰি কাটিগড়া মডেল হাস্পতালত ভৰ্তি।
কাটিগড়াৰ গোবিন্দপুৰ অঞ্চলত সংঘটিত হৈছে এই ঘটনা। নাবালিকাক পেলাই তাৰিণীপুৰ অভিমুখে গুচি যায় অটোখন। স্থানীয় ৰাইজে প্ৰত্যক্ষ কৰি খবৰ দিয়ে আৰক্ষীক।
জনৈক ৰাজদীপ নামৰ এজন যুৱকৰ বিৰুদ্ধে অভিযোগ নাবালিকাগৰাকীৰ। ৰাজদীপৰ সৈতে আন এজন যুৱকো আছিল অটোখনত। ২ দুৰ্বৃত্তৰ সন্ধানত আৰক্ষীয়ে অব্যাহত ৰাখিছে অভিযান।
বহিঃৰাজ্যত অসমীয়া ছাত্ৰৰ কৃতিত্ব
কেন্দ্ৰীয় শাসিত পণ্ডিচ্চেৰী ৰাজ্যৰ ভিতৰত তৃতীয় স্থান দখল অসমীয়া ছাত্ৰৰ।
অসম সন্তান প্ৰথম গগৈয়ে এইবাৰ মেডিকেল প্ৰৱেশ-পৰীক্ষাত (NEET) মুঠ ৬৮২ নম্বৰ পাই (৭২০ৰ পৰা) কেন্দ্ৰীয় শাসিত পণ্ডিচ্চেৰী ৰাজ্যৰ ভিতৰত তৃতীয় স্থান দখল কৰিবলৈ সক্ষম হৈছে।
প্ৰথম গগৈয়ে ১১.৪৬ লাখৰ ভিতৰত All India Rank ত ১৩৬৬ নম্বৰ স্থান লাভ কৰিছে।
আন্তৰিকতাৰে অভিনন্দন ।
অপৰাজিতা ফুল প্ৰায় সকলো মানুহৰ ঘৰতে আছে। অপৰাজিতা ফুল দেখিবলৈ বৰ শুৱনি। ই লতা জাতীয় ফুল। অপৰাজিতা ফুল দুইবিধ আছে। এবিধ বগা আৰু আনবিধ নীলা বৰণীয়া। দুয়োবিধ ফুলেই দেৱতাৰ পূজাত ব্যৱহাৰ কৰা হয়। অপৰাজিতাৰ মূল ঈষৎ নীলা, শ্বেত আৰু গোলাকাৰ। ইয়াৰ শিপাৰ ৰসৰ স্বাদ কেঁহা, জ্বলা আৰু তিতা। অপৰাজিতাৰ মূল আৰু পাত ভাল ঔষধ হিচাবে ব্যৱহাৰ কৰা হয়।
শিপাৰ ৰস এক তোলা, কহ এক তোলা আৰু শুকোৱা চূৰ্ণ চাৰি অনাৰ পৰা আধা তোলা পৰ্যন্ত।
অপৰাজিতাৰ মূল ব্যৱহাৰ কৰিলে প্ৰস্ৰাৱ সূচল হয়। স্নিগ্ধ জ্বৰ, হুপিংকাহ, পুৰণি কাহ, শোথ আৰু যকৃৎ প্লীহা বৃদ্ধি ৰোগনাশক। এই লতাৰ গুটিৰো বিশেষ গুণ নথকা নহয়। ইয়াক ব্যৱহাৰ কৰিলে তিনি ৰতি পৰিমাণ।
উভয়বিধ অপৰাজিতাৰেই কেহা, জ্বলা আৰু তিতা ৰস থাকে। পৰিপাকত জ্বলা হয়। ই শীতবীৰ্য, মেধজনক, ওঁঠৰ হিতকাৰক, স্বৰৰ্ধক, চকুৰ ৰোগ নাশক আৰু দৃষ্টিশক্তিবৰ্ধক। ৰক্তদোষ, কুষ্ঠ, বিষদোষ, শোথ, ব্ৰণ, ত্ৰিদোষ নাশক আৰু আমদোষ নাশক। স্মৃতি আৰু বুদ্ধিকাৰক। জ্বৰ, দাহ, ৰক্তা তিসাৰ, বমি, উন্মাদ, মদৰোগ, ভ্ৰম, শ্বাস, কাহ আৰু অম্লপিত্ত ৰোগ উপশম কাৰক।
শিৰা ৰোগ, অৰ্ধ কপালৰ বিষ, সূৰুয কপালি বিষ মূৰৰ বিষত অপৰাজিতা বৰ উপকাৰী। নীলা অপৰাজিতা মূলৰ গুড়ি কৰি নস্য ল’ব লাগে। সৰ্প দৰ্শনৰ বিষত নীলা অপৰাজিতাৰ মূল বটি দংশন স্থাপন প্ৰলেপ দিলে আৰু আভ্যন্তৰিক প্ৰয়োগ কৰিব পাৰিলে বৰ উপকাৰ হয়। উন্মাদ, ভূতোন্মাদ ৰোগতো অপৰাজিতাৰ মূলৰ ৰস এক তোলা আৰু চাউল ধোৱা পানী এক তোলা পৰিমাণে ব্যৱহাৰ কৰিলে ভাল ফল পোৱা যায়।
বগা অপৰাজিতাৰ মূল আধা তোলা, গৰুৰ ঘিউ তোলা নিয়মিতভাৱে ব্যৱহাৰ কৰিলে গলগণ্ড ৰোগ আৰোগ্য হয়।
পৰিণাম শূল নামৰ বেমাৰত নীলা অপৰাজিতা মূল আধা তোলা, চেনি, মৌ আৰু গৰুৰ ঘিউ মিহলাই সেৱন কৰিলে ৰোগৰ উপশম ঘটে।
অপৰাজিতাৰ মূলৰ ছালৰ ৰস শূল ৰোগত উপকাৰী। এক তোলা ওজনৰ ৰস সেৱন কৰিলে ভাল ফল পোৱা যায়।
লেখিকা: সুমিত্ৰা গোস্বামী।
উদ্বেগজনক! বিশ্বকৰ্মাৰ সৈতে সুৰাৰ কোনো সম্পৰ্ক নাই যদিও আমোদজনকভাৱে এই পূজাতে পূৰ্বৰ ৰেকৰ্ড ভংগ হ’ল অসমত।
এইবাৰৰ বিশ্বকৰ্মা পূজাত বিক্ৰী হ’ল অভিলেখ সংখ্যক সুৰাৰ বটল। ৰাজধানী চহৰ গুৱাহাটীতেই বিক্ৰী হ’ল ৮ কোটি ৩৪ লাখ টকাৰ বিলাতী সুৰা। গুৱাহাটীত যোৱা বৰ্ষত বিক্ৰী হৈছিল ৬.২০ কোটিৰ সুৰা। ২০২১ বৰ্ষৰ বিশ্বকৰ্মা পূজাত বিক্ৰী হৈছিল ৩ কোটি ৭০ লাখৰ সুৰা।
এইবছৰ ১৮ ছেপ্টেম্বৰত ৰাজ্যত বিক্ৰী হ’ল আনুমানিক ১৫.৫০ কোটিৰ সুৰা। ইয়াৰ পৰাই ধাৰণা কৰিব পাৰি যে ৰাজ্যত সুৰাৰ চাহিদা প্ৰতিদিনে বৃদ্ধি হৈ গৈ আছে।
অসম চৰকাৰৰ সাস্কৃতিক সঞ্চালকয়ৰ প্ৰাক্তন উপ সঞ্চালক অসম সাহিত্য সভাৰ সীতানাথ ব্ৰহ্মচৌধুৰী বটাঁ বিজয়ী বিশিষ্ট সাহিত্যিক, লোকসংস্কৃতিৰ গৱেষক ধৰ্মেশ্বৰ দুৱৰাৰ ১০০ বছৰৰ শ্ৰেষ্ঠ নিগ্ৰো কবিতা শীৰ্ষক এখন কাব্যগ্ৰন্থ উন্মোচন কৰা হয়।
সৰুপথাৰ শাখা সাহিত্য সভাৰ মাংগীলাল বগৰীয়া সোঁৱৰণী সভা কক্ষত সৰুপথাৰ শাখা সাহিত্য সভাৰ সভাপতি ৰঞ্জন মহন্তৰ সভাপতিত্বত অনুষ্ঠিত হোৱা গ্ৰন্থউন্মোচনী সভাত কাব্য গ্ৰন্থখনি উন্মোচন কৰে ছহিদ পিয়লী ফুকন মহাবিদ্যালয়ৰ অৰ্থনীতি বিভাগৰ অৱসৰপ্ৰাপ্ত অধ্যাপক ড০ ৰঞ্জন কুমাৰ ফুকনে। গ্ৰন্থখনি উন্মোচন কৰি উন্মোচক
ফুকনে উন্মোচিত গ্ৰন্থ খনৰ লগতে নিগ্ৰো কবিতাৰ সম্পৰ্কত বিশদভাৱে আলোকপাত কৰে।
সৰুপথাৰ শাখা সাহিত্য সভাৰ সম্পাদক নৱমী চুতীয়াই আঁত ধৰা অনুষ্ঠানত বিশিষ্ট অতিথি হিচাপে অংশ গ্ৰহণ কৰে গোলাঘাট দেৱৰাজ ৰয় মহাবিদ্যালয়ৰ অৱসৰপ্ৰাপ্ত অধ্যাপক হেম ফুকনে। সৰুপথাৰ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষক নৰেন চুতীয়াই কৰা বন্তি প্ৰজ্বলনেৰে শুভাৰম্ভ হোৱা গ্ৰন্থ উন্মোচনী সভা উদ্বোধন কৰে বিশিষ্ট শিক্ষাবিদ ক্ষীৰেণ চন্দ্ৰ কাকতীয়ে।
লোক সংস্কৃতিৰ গৱেষক বিশিষ্ট সাহিত্যিক গৰাকীৰ ৭০ সংখ্যক জন্ম দিনৰ লগত সংগতি ৰাখি সৰুপথাৰ শাখা সাহিত্য সভাই অনুষ্ঠিত কৰা অনুষ্ঠানত বিশিষ্ট শিক্ষাবিদ সিদ্ধেশ্বৰ শইকীয়া,অসম সাহিত্য সভাৰ কাৰ্যনিৰ্বাহক সদস্য সূৰ্য গগৈ, গোলাঘাট জিলা সাহিত্য সভাৰ সাংগঠনিক সম্পাদক ভুৱন কোঁৱৰকে আদি কৰি ভালে সংখ্যক বিশিষ্ট ব্যক্তিয়ে অংশ গ্ৰহণ কৰে।
উক্ত সভাত উন্মোচিত গ্ৰন্থ প্ৰণেতা ধৰ্মেশ্বৰ দুৱৰাৰ জীৱন আৰু কৰ্মৰ সম্পৰ্কে সৰুপথাৰ মহাবিদ্যালয়ৰ প্ৰাক্তন অধ্যক্ষ সমৰেন্দ্ৰ সিনহা, হেম সন্দিকৈ, গোপীনাথ বাইলুঙকে আদি কৰি ভালেকেইজন বক্তাই বিশদ ভাৱে কয়। গ্ৰন্থ উন্মোচন সভাত ধৰ্মেশ্বৰ দুৱৰাই সাহিত্য জগতলৈ মহাবিদ্যালয়ত অধ্যয়নৰ সময়ৰছোৱাৰ পৰা আৰম্ভ কৰিছিল যদিও চাকৰি জীৱন আৰু অৱসৰৰ পিছৰ সময়ছোৱাত ওতপোতভাৱে সাহিত্যচৰ্চাত জড়িত হৈছে বুলি কয় ৷
ড্ৰাগছৰ বিৰুদ্ধে ৰাজ্য চৰকাৰে কঠোৰ স্থিতি গ্ৰহণ কৰিছে যদিও পুলিচ প্ৰশাসনক বুঢ়া আঙুলি দেখুৱাই বৰ্তমানেও যে ৰাজ্যৰ বিভিন্ন ঠাইত ড্ৰাগছৰ ৰমৰমীয়া ব্যৱসায় চলি আছে , সেইকথা পুনৰবাৰ প্ৰমাণ হ’ল। মঙলবাৰে দুপৰীয়া ১ মান বজাত গোলাঘাটৰ মৰঙী অঞ্চলৰ লুৰুকীহাট আৰু ঢুলীয়া গাঁৱত ৰাইজে খেদি খেদি কৰায়ত্ব কৰিলে ড্ৰাগছসহ এজন যুৱকক।
মৰঙীবাসী আৰু ঢুলীয়া গাঁৱৰ গাওঁৰক্ষী বাহিনীৰ সহযোগত এই ড্ৰাগছ ব্যৱসায়ীটোক আটক কৰে ৰাইজে । ড্ৰাগছসহ হাতে-লোটে ধৰা ধৃত যুৱকজনৰ নাম ৰিতু বুঢ়াগোহাঁই। ঘটনাস্থলীত গোলাঘাট আৰক্ষী উপস্থিত হৈ যদিও ৰাইজে ড্ৰাগছ ব্যৱসায়ীটোক উত্তম মধ্যম সোধাই ৰাজপথেদি এক সমদল বাহিৰ কৰে।
ইফালে ৰাইজৰ মাৰ-কিল খোৱা ধৃত যুৱকটোৱে ৰাইজৰ ওচৰত কাণত ধৰি আঠু লৈ ড্ৰাগছ খিনি ঢুলীয়া গাঁওৰে এগৰাকী মহিলাৰ ঘৰৰ পৰা অনা বুলি স্বীকাৰ কৰে। পিছত যুৱকজনক সমদল কৰি ৰাইজে মহিলাগৰাকীৰ ঘৰলৈ যায় যদিও মহিলাগৰাকীক ঘৰত নথকাত সমগ্র ঘটনা তদন্তৰ বাবে আৰক্ষীক আহ্বান জনায়।
উল্লেখ্য যে বহু দিনৰে পৰা সমগ্র অঞ্চলটোত ড্ৰাগছৰ ব্যৱসায় হৈ থকাৰ কথা সচেতন ৰাইজে গম পাই আহিছিল । এনেদৰে দিন দুপৰতে ড্ৰাগছসহ যুৱক আটক হোৱাত সেই সন্দেহ অধিক স্পষ্ট হৈ পৰা ৰাইজে মত প্ৰকাশ কৰি অনতিপলমে সমগ্র অঞ্চলটোত চলি থকা ড্ৰাগছৰ ঘাটিসমূহ নি:শেষ কৰাৰ দাবী কৰে । অন্যথা ৰাইজে নিজেই ইয়াৰ উচিত ব্যৱস্থা গ্ৰহণ কৰিব বুলি হুংকাৰ দিয়ে ।
চাহ বাগিছা অধ্যুষিত অঞ্চলৰ বিদ্যালয়ৰ ছাত্ৰ-ছাত্ৰীয়ে এতিয়াৰে পৰা মধ্যাহ্ন ভোজনত প্ৰতি সপ্তাহৰ সোমবাৰ , বুধবাৰ আৰু শুক্ৰবাৰে খাবলৈ পাব কণী
প্ৰধান মন্ত্ৰী পোষণ অভিযান আঁচনিৰ অধীনত ইতিমধ্যে অসমৰ বিদ্যালয় সমূহত চলি থকা মধ্যাহ্ন ভোজনৰ আহাৰত নতুনকৈ সংযোজন হ’ল এক বিশেষ ব্যৱস্থা । অসমৰ চাহ বাগিচা অধ্যুষিত অঞ্চলৰ বিদ্যালয়ত প্ৰথম শ্ৰেণীৰ পৰা অষ্টম শ্ৰেণীলৈ অধ্যয়নৰত ছাত্ৰ-ছাত্ৰীসকলে মধ্যাহ্ন ভোজনৰ আহাৰত প্ৰতি সপ্তাহৰ সোমবাৰ , বুধবাৰ আৰু শুক্ৰবাৰে খাবলৈ পাব কণী ।
১৮ চেপ্টেম্বৰত কামৰূপ মহানগৰ জিলাৰ অন্তৰ্গত ডিগাৰুৰ বামুনখাটস্থিত আমচং চাহ বাগিছা আদৰ্শ উচ্চ মাধ্যমিক বিদ্যালয়ত উপস্থিত হৈ অসমৰ মাননীয় শিক্ষামন্ত্ৰী ডা : ৰণোজ পেগুৱে এই বিশেষ পদক্ষেপৰ শুভাৰম্ভণি কৰে । মন্ত্ৰী গৰাকীয়ে ছাত্ৰ-ছাত্ৰীসকলৰ মাজত মধ্যাহ্ন ভোজনৰ আহাৰ বিতৰণৰ কাৰ্যসূচী শুভাৰম্ভণি কৰাৰ লগতে একেলগে বহি আহাৰ গ্ৰহণো কৰে । তেখেতৰ উপস্থিত বিদ্যালয়ৰ শিক্ষক-শিক্ষয়িত্ৰী সমন্বিতে বিদ্যালয়ৰ ছাত্ৰ-ছাত্ৰী আৰু অভিভাৱক সকল উৎফুল্লিত হৈ পৰে ।
অমৃত বৃক্ষ আন্দোলনৰ লগত সংগতি ৰাখি মন্ত্ৰীগৰাকীৰ লগতে অনুষ্ঠানত উপস্থিত থকা মাধ্যমিক শিক্ষা সঞ্চালক মমতা হোজাই আৰু কামৰূপ মহানগৰ জিলাৰ বিদ্যালয় সমূহৰ পৰিদৰ্শক দীপিকা চৌধুৰী সমন্বিতে আটায়ে বিদ্যালয় চৌহদত কেইবাটাও মূল্যবান গছপুলি ৰোপণ কৰে । শিক্ষা মন্ত্ৰী গৰাকীয়ে বিদ্যালয়ত নিৰ্মিয়মান হৈ থকা অতিৰিক্ত শ্ৰেণীকোঠা , গৱেষণাগাৰ আৰু মধ্যাহ্ন ভোজন ৰন্ধণ কক্ষ আদি পৰিদৰ্শন কৰাৰ লগতে বিদ্যালয়ৰ শিক্ষক-শিক্ষয়িত্ৰী, ছাত্ৰ-ছাত্ৰী -অভিভাৱক আৰু বিদ্যালয় পৰিচালনা সমিতিৰ সদস্যসকলৰ সৈতে বিদ্যালয়ৰ সুবিধা-অসুবিধা সন্দৰ্ভত মত বিনিময় কৰে । অনুষ্ঠানত ডিমৰীয়া শিক্ষাখণ্ডৰ শিক্ষা বিষয়াৰ সৈতে খণ্ড সমল ব্যক্তি আৰু কেইবা গৰাকীও সমল কেন্দ্ৰ সমন্বয়ক উপস্থিত থাকে ।
