মঙলবাৰে মুম্বাই আৰক্ষীয়ে আৰক্ষীৰ কণ্ট্ৰল ৰুমলৈ ফোন কৰি ছলমান খানক হত্যাৰ ভাবুকি দিয়াৰ অভিযোগত থানেৰ এজন ১৬ বছৰীয়া ল’ৰাক আটক কৰিছে।
আৰক্ষীয়ে জনোৱা মতে, ল’ৰাজন ৰাজস্থানৰ আৰু ভাবুকি জাৰি কৰাৰ আঁৰৰ তেওঁৰ উদ্দেশ্য জানিবলৈ তদন্ত চলি আছে।
যোৱা মাহত ছলমান খানৰ ভাবুকিপূৰ্ণ ই-মেইল পোৱাৰ পিছতে তেওঁৰ নিৰাপত্তা বৃদ্ধি কৰা হৈছিল।
শিৱসাগৰৰ আমগুৰি খনামুখ গাঁও পঞ্চায়তৰ প্ৰগতিশীল নামৰ এটি আত্মসহায়ক গোটৰ প্ৰশংসনীয় পদক্ষেপ। প্ৰায় ১০ গৰাকী মান সদস্যাই দৃষ্টি নামৰ স্বেচ্ছাসেৱী অনুষ্ঠানটিৰ পৰা এটি প্ৰশিক্ষণ লৈ পেলনীয়া সামগ্রী ছাই, হালধীৰ পৰা চাবোন প্ৰস্তুত কৰি উলিৱাৰ লগতে কাঠফুলাৰ খেতি, মুগা পলু পুহি ঘৰুৱা বিভিন্ন খাদ্য সামগ্রী পিঠা পনা আদিকে বনাই গোটৰ সদস্যাসকল আৰু গাঁৱৰ বিভিন্ন প্ৰান্তত বিক্ৰী কৰি তেওঁলোকৰ পৰিয়াল যথেষ্ট উপকৃত হৈছে।
পিছপৰা বানপিড়ীত অঞ্চলৰ মহিলাসকলক আৰ্থিক স্বাৱলম্বী দিশত আগুৱাই নিয়াৰ ক্ষেত্ৰত আৰু অধিক স্বাভালম্বী হ’বৰ বাবে স্থানীয় বিধায়ক গৰাকীকো সহায় সহযোগিতা আগবঢ়াবলৈ সংবাদ-মাধ্যমৰ যোগেদি মহিলাসকলে আহ্বান জনাইছে ।
ৰাহুল গান্ধীক তীব্ৰ সমালোচনা কৰি কেন্দ্ৰীয় গৃহমন্ত্ৰী অমিত শ্বাহে কয় যে কংগ্ৰেছ নেতাই বহিঃৰাজ্যত ভাৰতক অপমান কৰে।
ডিব্ৰুগড়ত এখন সভাত ভাষণ দি অমিত শ্বাহে কয়, “বিধানসভা নিৰ্বাচনত কংগ্ৰেছ মচি পেলোৱা হৈছে…কিন্তু ৰাহুল বাবাই বুজি নাপাব, তেওঁ বিদেশলৈ গৈ ভাৰতৰ বিৰুদ্ধে কথা কয়৷”
ডিব্ৰুগড়বাসীক প্ৰশ্ন কৰি অমিত শ্বাহে কয় যে আজিলৈকে কোনো ভাৰতীয় দেশপ্ৰেমিক বিদেশত নিজৰ মাতৃভূমিৰ বিৰুদ্ধে একো কোৱা নাই যদিও ৰাহুল গান্ধীয়ে কৰিলে।
অমিত শ্বাহে দৃঢ়তাৰে কয় যে যদি কংগ্ৰেছ এই গতিৰে আগবাঢ়ি যায়, তেন্তে আজি উত্তৰ-পূব- কাইলৈ হ’ব সমগ্ৰ ভাৰত, য’ত কংগ্ৰেছ নিঃশেষ হ’ব।
কেন্দ্ৰীয় গৃহমন্ত্ৰী অমিত শ্বাহে কয়, “শেহতীয়াকৈ উত্তৰ-পূবত তিনিটা বিধানসভা নিৰ্বাচন অনুষ্ঠিত হৈছিল আৰু বিজেপি নিজ নিজ ৰাজ্য চৰকাৰৰ অংশ।”
কাইলৈ নতুন দিল্লীত প্ৰতিৰক্ষা মন্ত্ৰী ৰাজনাথ সিঙে প্ৰতিৰক্ষা বিত্ত আৰু অৰ্থনীতি সম্পৰ্কীয় তিনিদিনীয়া আন্তঃৰাষ্ট্ৰীয় সন্মিলনৰ উদ্বোধন কৰিব। এই সন্মিলনে নীতি নিৰ্ধাৰক, শিক্ষাবিদ আৰু চৰকাৰী বিষয়াসকলক বৰ্তমানৰ বিকশিত নিৰাপত্তা প্ৰত্যাহ্বান সমূহৰ প্ৰতিৰক্ষা বিত্ত আৰু অৰ্থনীতিৰ ওপৰত তেওঁলোকৰ অন্তৰ্দৃষ্টি আৰু অভিজ্ঞতা ভাগ-বতৰা কৰাৰ এক অনন্য মঞ্চ প্ৰদান কৰিব। এই সন্মিলনত আমেৰিকা, ব্ৰিটেইন, জাপান, অষ্ট্ৰেলিয়া, শ্ৰীলংকা, বাংলাদেশ আৰু কেনিয়াৰ প্ৰতিনিধিয়ে অংশগ্ৰহণ কৰিব।
প্ৰতিৰক্ষা মন্ত্ৰালয়ে কয় যে, এই সন্মিলনৰ উদ্দেশ্য হৈছে বিভিন্ন দেশৰ উত্তম পদ্ধতি, অভিজ্ঞতা প্ৰচাৰ কৰা। ইয়াৰ উপৰিও প্ৰতিৰক্ষা খণ্ডত চৰকাৰৰ আত্মনিৰ্ভৰ দৃষ্টিভংগীক প্ৰসাৰিত কৰাৰ ক্ষেত্ৰত বিদেশী চৰকাৰ, আন্তঃৰাষ্ট্ৰীয় প্ৰতিষ্ঠান আৰু বিশ্বৰ নেতাসকলৰ সৈতে সহযোগিতাৰ সুবিধা প্ৰদান কৰিব।
২০২৪ চনৰ লোকসভা নিৰ্বাচনৰ দিশত বিজেপিয়ে সৰ্বশক্তি প্ৰয়োগ কৰিছে। মঙলবাৰে ডিব্ৰুগড়ত গৃহমন্ত্ৰী অমিত শ্বাহে এক সভাত ভাষণ প্ৰদান কৰে।
অমিত শ্বাহে এইবাৰ অসমৰ ১৪ খন আসনৰ ভিতৰত ১২খন আসন বিজেপিয়ে দখল কৰিব বুলি মন্তব্য কৰে।
এইবাৰ ৩০০ৰো অধিক লোকসভাৰ আসনত পদুম ফুলাই নৰেন্দ্ৰ মোদী তৃতীয়বাৰৰ বাবে প্ৰধানমন্ত্ৰী হ’ব বুলি দাবী কৰে গৃহমন্ত্ৰীগৰাকীয়ে।
উত্তৰ-পূৰ্বাঞ্চলত বিজেপিৰ দখল অধিক শক্তিশালী হৈ আহিছে বুলি মন্তব্য কৰে অমিত শ্বাহে। ইয়াৰ দ্বাৰা দলৰ অগ্ৰগতিও দেখা যায় বুলি কৈ অভিনন্দন জনাই এনেদৰে – “অসমৰ ৰাইজক অভিনন্দন জনাব বিচাৰিছো। আপোনালোকৰ ভোটেৰে উত্তৰ-পূৰ্বাঞ্চলৰ বিকাশ ঘটিছে।”
ডিব্রুগড়ত বিজেপিৰ কার্যালয় উদ্বোধনী অনুষ্ঠানত এখন ৰাজহুৱা সভাত ভাষণ দি গৃহমন্ত্রী গৰাকীয়ে কয় যে বিজেপি সংগঠন ভিত্তিক দল আৰু এই কার্যালয় বিজেপিৰ সকলো কাম-কাজৰ কেন্দ্র৷
উত্তৰ-পূৰ্বাঞ্চলৰ বিধানসভাৰ কথা উল্লেখ কৰি তেওঁ কয় যে উত্তৰ-পূৰ্বাঞ্চলৰ তিনিখন ৰাজ্যত বিধানসভা নিৰ্বাচন অনুষ্ঠিত হৈছিল। তিনিওখন ৰাজ্যতে বিজেপি চৰকাৰৰ অংশ।
উত্তৰ পূৰ্বাঞ্চলৰ ৮ খন ৰাজ্যত প্ৰধানমন্ত্ৰী মোডীৰ নেতৃত্বত এন ডি এ চৰকাৰ চলি আছে আৰু ইয়াৰ বাবে উত্তৰ পূৰ্বাঞ্চলৰ উন্নয়ন হৈছে।
কংগ্ৰেছৰ ওপৰত তীব্ৰ আক্ৰমণ আৰম্ভ কৰি শ্বাহে কয় যে উত্তৰ-পূবক এসময়ত কংগ্ৰেছৰ দুৰ্গ বুলি গণ্য কৰা হৈছিল যদিও ৰাহুল গান্ধীৰ যাত্ৰা (ভাৰত জোডো যাত্ৰা) সত্ত্বেও শেহতীয়াকৈ অঞ্চলটোৰ তিনিখন ৰাজ্যত বিধানসভা নিৰ্বাচনত দলটোৱে ভাল প্ৰদৰ্শন কৰিব নোৱাৰিলে।
বিশিষ্ট সাহিত্যিক, সাংবাদিক তথা অধিবক্তা ৰাধিকা মোহন গোস্বামীক সোমবাৰে মৰণোত্তৰভাৱে প্ৰদান কৰা হয় ‘সাহিত্য জ্যোতি’ উপাধি। বিশিষ্ট সাহিত্যিক-সাংবাদিক গৰাকীৰ নগাঁৱৰ ফৌজদাৰীপট্টিস্থিত বাসগৃহত এই উপলক্ষে অনুষ্ঠিত এখনি সভাত গুৱাহাটীৰ অগ্ৰণী সামাজিক অনুষ্ঠান ‘অনুপ্ৰেৰণা’ই আনুষ্ঠানিক ভাৱে প্ৰদান কৰে এই সন্মান। ‘অনুপ্ৰেৰণা’ৰ সম্পাদক তথা ‘দেওবৰীয়া বার্তা’ কাকতৰ সম্পাদক দীপজ্যোতি শইকীয়াই পৰিয়ালবৰ্গৰ হাতত প্ৰদান কৰে এই সন্মান। ‘অপৰাধী’, ‘চাকনৈয়া’, ‘দুষ্টা ভাৰ্যা’, ‘দেৱতাৰ সমাধি’, ‘কথা আৰু কাহিনী’, ‘অনন্ত পথৰ যাত্ৰী’, ‘বা-মাৰলী’, ‘A peep to Assam’ কে ধৰি কেইবাখনো গ্ৰন্থৰ স্ৰষ্টা ৰাধিকা মোহন গোস্বামীয়ে গুৱাহাটীৰ পৰা প্রকাশিত সাপ্তাহিক ‘আলোক’ নামৰ কাকতখনিৰ সম্পাদক হিচাপে দায়িত্বভাৰ গ্ৰহণ কৰিছিল।
এগৰাকী প্ৰখ্যাত অধিবক্তা হিচাপেও জনসমাদৃত ৰাধিকা মোহন গোস্বামীয়ে সৰ্বভাৰতীয় উকীল সন্থাৰ উপ-সভাপতি হিচাপেও দায়িত্বভাৰ বহন কৰিছিল। ১৯৯১ চনৰ ২০ মে’ত দেহাবসান ঘটা এইগৰাকী বৰেণ্য ব্যক্তিয়ে জীৱন কালত আনুষ্ঠানিকভাৱে বিশেষ সন্মান লাভ নকৰিলে যদিও মৰণোত্তৰ ভাবে হ’লেও এনে এক সন্মান প্ৰদান কৰাত অত্যন্ত সুখী পৰিয়ালবৰ্গ। অনুষ্ঠানৰ আৰম্ভণিতে প্ৰয়াত সাহিত্যিকগৰাকীৰ প্ৰতিচ্ছবিৰ সন্মুখত বন্তি প্ৰজ্বলন কৰে জ্যেষ্ঠ জীয়াৰী তথা লেখিকা, সমাজসেৱী ৰেখা শৰ্মাই। সাহিত্যিকগৰাকীৰ বোৱাৰী তথা প্ৰাক্তন অধ্যাপিকা ডঃ অঞ্জনা গোস্বামীয়ে আঁত ধৰা এই অনুষ্ঠানত অৱসৰপ্ৰাপ্ত প্ৰশাসনিক বিষয়া পুত্ৰ সৌৰেন্দ্ৰ মোহন গোস্বামীকে ধৰি কেইবাগৰাকী গণ্য-মান্য ব্যক্তি উপস্থিত থাকে।
বিভাগীয় বিষয়াসকলক লগত লৈ মহানগৰীৰ বিভিন্ন স্থানত বাহিনী নদীৰ কাষৰ বেদখলকৃত অঞ্চল পৰিদৰ্শন মন্ত্ৰী অশোক সিংহলৰ। বাহিনী নৈৰ বুকু সংকুচিত কৰি অবৈধ নিৰ্মাণকাৰ্যত অনুমতি প্ৰদান কৰা পৌৰ নিগমৰ দোষী বিষয়ববীয়াৰ বিৰুদ্ধে গ্ৰহণ কৰা হ’ব শাস্তিমূলক ব্যৱস্থা।
গৃহ নিৰ্মাণ আৰু নগৰ পৰিক্ৰমা তথা জলসিঞ্চন বিভাগৰ মন্ত্ৰী অশোক সিংহলে আজি পুৱা গুৱাহাটী পৌৰ নিগম আৰু গৃহ নিৰ্মাণ আৰু নগৰ পৰিক্ৰমা বিভাগৰ শীৰ্ষ বিষয়াসকলক লগত লৈ মহানগৰীৰ বাহিনী নদীৰ পাৰৰ কেইবাটাও অঞ্চল ভ্ৰমণ কৰি ‘মিশ্যন ফ্লাড ফ্ৰী গুৱাহাটী’ৰ অধীনত ৰূপায়িত বিভিন্ন কাম-কাজৰ বুজ লোৱাৰ লগতে বাহিনী নদীৰ কাষৰ বেদখলকৃত অঞ্চলসমূহো পৰিদৰ্শন কৰে৷ ৰাধাগোবিন্দ বৰুৱা পথৰ জোনালী পইণ্টৰ সমীপৰ বাহিনী নদীৰ দলঙৰ পৰা আৰম্ভ কৰা এই পৰিদৰ্শনৰ সময়ত মন্ত্ৰীগৰাকীয়ে চিৰিয়াখানা, সুন্দৰপুৰ, ৰাজধানী নাৰ্ছাৰী, লক্ষ্মীনগৰ, নয়নপুৰ, হেঙেৰাবাৰী, দিছপুৰ ৰ’টাৰী, ডাউন টাউন, ৰুক্মিনীগাঁও পিবকো পইণ্ট আদি বিভিন্ন এলেকাত বাহিনী নদীৰ দুয়োফালে হোৱা বেদখলৰ বুজ লয়৷ কেতবোৰ এলেকাত নদীখনৰ গতিপথ সংকুচিত কৰি একাংশ লোকে দেৱাল, বাসগৃহ আদি নিৰ্মাণ কৰা প্ৰত্যক্ষ কৰি এনে অবৈধ নিৰ্মাণৰ বাবে অনুমতি প্ৰদান কৰা গুৱাহাটী পৌৰ নিগমৰ দোষী বিষয়ববীয়াৰ বিৰুদ্ধে শাস্তিমূলক পদক্ষপ গ্ৰহণ কৰিবলৈ কতৃৰ্পক্ষক নিৰ্দেশ দিয়ে৷
মহানগৰীৰ একাংশ নাগৰিকৰ অবিবেচক কাৰ্যকলাপৰ বাবে বাহিনী নদীৰ বুকু সীমাহীন আৱৰ্জনা, প্লাষ্টিকৰ বটল, পলিথিন আদিৰে ভৰি পৰাৰ লগতে গতিপথ সংকুচিত হৈ নদীখন মৃতপ্ৰায় হৈ পৰাৰ প্ৰসংগত আক্ষেপ প্ৰকাশ কৰি তেওঁ কয় যে বাহিনী, ভৰলু আদি নদীৰ পানী সংবহন ক্ষমতা স্বাভাৱিক ৰূপলৈ ঘূৰাই আনিব নোৱাৰিলে গুৱাহাটীক কৃত্ৰিম বানমুক্ত কৰাটো সম্ভৱ নহ’ব৷ সেয়ে তেওঁ মহানগৰীৰ বাসিন্দাসকলক এইক্ষেত্ৰত সজাগ আৰু সংবেদনশীলতাৰ পৰিচয় দিবলৈ আহ্বান জনায়৷
আজিৰ এই পৰিদৰ্শনকালত গৃহ নিৰ্মাণ আৰু নগৰ পৰিক্ৰমা বিভাগৰ সচিব পৱিত্ৰ ৰাম খাউণ্ড আৰু গুৱাহাটী পৌৰ নিগমৰ আয়ুক্ত মেঘনিধি দাহালৰ লগতে পৌৰ নিগমৰ অন্যান্য বিষয়ববীয়াসকলো উপস্থিত থাকে৷
কিশোৰী লাল আগৰৱালাৰ লংকা অঞ্চলত বাৰাণসীৰ মুখ্য জলপান কচোৰী-চাবজি বিক্ৰী কৰা এখন সৰু দোকান আছে। তেওঁৰ এয়া পাৰিবাৰিক ব্যৱসায় আৰু তেওঁ চতুৰ্থ প্ৰজন্মৰ ধ্বজাবাহক। তেওঁৰ দোকানখনে কেইবা দশক ধৰি কেৱল একেবিধ সামগ্ৰীয়েই বিক্ৰী কৰি আহিছে – কচুৰী । দুমাহ আগতে, তেওঁ মেনুত ‘পোহা’ আৰু ব্ৰেড পকোৰা যোগ দিছিল । “হঠাতে সমগ্ৰ দেশৰ পৰা বাৰাণসীলৈ মানুহ আহিবলৈ লৈছে। আগতেও বাৰানসীলৈ দেশৰ বিভিন্ন প্ৰান্তৰ পৰা মানুহ গৈছিল, এতিয়া তালৈ যোৱা মানুহৰ সংখ্যা আগতকৈ বাঢ়িছে।
বিগত কেইবছৰমানত বাৰাণসী চহৰৰ বৃহৎ নৱীকৰণে ঐতিহ্যবাহী চহৰখনৰ ক্ষুদ্ৰ বিক্ৰেতা আৰু ব্যৱসায়ীসকলৰ বাবে আশাৰ বতৰা কঢ়িয়াই আনিছে।বিক্ৰেতাসকলে তেওঁলোকৰ ব্যৱসায় উন্নীত কৰি আছে, আতিথ্য উদ্যোগটো ক্ৰমাৎ বিকশিত হৈ আছে। ২০২১ চনৰ ডিচেম্বৰত কাশী বিশ্বনাথ কৰিডৰ মুকলি কৰাৰ পিছৰে পৰা পৰ্যটকৰ ভিৰ এতিয়া বাৰনসীত বাঢ়িছে।
বাৰাণসী এতিয়া পৰ্যটক/তীৰ্থযাত্ৰীৰ আকৰ্ষণৰ বিষয় হৈ পৰিছে। ইয়াত মন্দিৰৰ উপৰি অন্যান্য সুবিধা যোগ কৰা হৈছে আৰু ই এখন সম্পূৰ্ণ নতুন চহৰ যেন হৈ পৰিছে। স্থানীয় লোকসকল উৎসাহিত হৈছে । তেওঁলোকে ব্যৱসায় উন্নত কৰাৰ বাবে অধিক বিনিয়োগ কৰিছে। নাৱৰীয়াই হওঁক, হোটেলেই হওঁক, শাৰী বিক্ৰেতাই হওঁক সকলোৱে নতুন উৎসাহেৰে কামত লাগিছে। যিসকলে আগতে ৰিক্সা চলাইছিল তেওঁলোকে এতিয়া ই-ৰিক্সাৰে পৰ্যটকক অনা-নিয়া কৰিছে। মুঠৰ ওপৰত কাশী বিশ্বনাথ কৰিডৰ মুকলি হোৱাৰ পিছত চহৰ খনে যেন এক নৱ জীৱন লাভ কৰিছে।
বিশেষকৈ নাৱৰীয়াসকলে কাশীৰ পৰিৱৰ্তনত আনন্দিত হৈছে। নাৱৰীয়া পাৰবীন নিশাদে কয় “যোৱা এবছৰত আমাৰ ব্যৱসায় বহুগুণে বৃদ্ধি পাইছে। পৰ্যটকৰ সংখ্যা – বিশেষকৈ বিদেশী দৰ্শনাৰ্থীৰ সংখ্যা বৃদ্ধি পাইছে আৰু আমি অধিক উপাৰ্জন কৰিব পাৰিছো। মানুহে পথৰ পৰিৱৰ্তে বিশ্বনাথ ধামলৈ যাবলৈ নাও এখন ল’বলৈ বেছি পছন্দ কৰে”।
হোটেলৰ ব্যৱসায়তো এক উচ্ছ্বাস দেখা গৈছে। এটা ৰিজৰ্টৰ মেনেজাৰ ৰাজেশ মেহৰোত্ৰাই কয়, “মন্দিৰৰ নৱীকৰণৰ আগতে অতিথিসকল মুখ্যতঃ তীৰ্থযাত্ৰী আছিল আৰু তেওঁলোকৰ বেছিভাগেই ধৰ্মশালা আৰু কম খৰচী হোটেল আৰু লজত থাকিবলৈ পছন্দ কৰিছিল। কিন্তু এতিয়া আমাৰ ওচৰত সকলো শ্ৰেণীৰ অতিথি আহে। এতিয়া বিলাসী হোটেলবোৰেও সদায় গ্ৰাহক লাভ কৰিছে৷”
‘পুষ্পা ২’ৰ পোষ্টাৰত কিয় নাৰীৰ ৰূপত দেখা গৈছে আল্লু অৰ্জুনে, কাৰণ জানিলে আচৰিত হ’ব…!অতি সোনকালে আল্লু অৰ্জুনক দেখা যাব ‘পুষ্পা ২’ ছবিত। ছবিখনৰ পোষ্টত আল্লু অৰ্জুনে এগৰাকী মহিলাৰ ৰূপ লৈছে, ইয়াৰ আঁৰৰ কাৰণ কি হ’ব পাৰে জানেনে? শেহতীয়াকৈ দক্ষিণৰ ছুপাৰষ্টাৰ আল্লু অৰ্জুনে ‘পুষ্পা’ ছবিখনত গুৰুত্বপূৰ্ণ ভূমিকা পালন কৰিছিল। তেওঁৰ অভিনয় সকলোৱে ভাল পাইছিল। পুষ্পাৰ চৰিত্ৰৰ বাবে খ্যাতি লাভ কৰা আলু অৰ্জুনৰ আহি আছে এই ছবিখনৰ দ্বিতীয় খণ্ড পুষ্পা ২, ইতিমধ্যে ছবিখনৰ পোষ্টাৰ মুক্তি পাইছে।
পুষ্পা ২ৰ পোষ্টাৰত আল্লু অৰ্জুনক এক নতুন ৰুপত দেখা গৈছে। ইয়াৰ কাৰণ দুটা, প্ৰথম কাৰণটো হৈছে তিৰুপতিত অনুষ্ঠিত এক পৰম্পৰা হিচাপে পৰিগণিত হোৱা চিনেমাখনত গংগাম্মা তল্লী জাথাৰাত অংশগ্ৰহণ কৰিব পাৰে। ইয়াত পুৰুষে মহিলাৰ দৰে কাপোৰ পিন্ধে। দ্বিতীয় কাৰণটো হ’ল পুষ্পাৰ বেশত পুলিচৰ পৰা পলায়নৰ চেষ্টা কৰিছে কাৰণ তেওঁ এই ছবিখনৰ প্ৰচাৰ অভিযানো ‘ক’ত আছে পুষ্পা’ হেচটেগেৰে চলাইছিল। আল্লু অৰ্জুন বা নিৰ্মাতাসকলে এই বিষয়ে কোনো তথ্য প্ৰকাশ কৰা নাই; হয়তো অনুৰাগীয়ে ট্ৰেইলাৰ আৰু ছবিখনৰ বাবে অপেক্ষা কৰিব লাগিব।
এই কাৰণ দুটাৰ বাবেই হয়তো আল্লু অৰ্জুনক পুষ্পা২ ত মহিলাৰ বেশত দেখা গৈছে।
ৰাছিয়া-ইউক্ৰেইনৰ মাজত ৰক্তক্ষয়ী যুদ্ধ চলি থকাৰ মাজতে ভাৰতলৈ চৰকাৰী ভ্ৰমণসূচীলৈ লৈ আহিছে ইউক্ৰেইনৰ উপ বৈদেশিক মন্ত্ৰী এমিন ধজেপ্পাৰ। ধজেপ্পাৰ সোমবাৰে ভাৰতীয় নেতৃত্বৰ ওপৰত গভীৰ আস্থা ব্যক্ত কৰি ভাৰতক ‘বিশ্ব গুৰু’ বুলি অভিহিত কৰে।
চাৰিদিনীয়া ভাৰত ভ্ৰমণলৈ অহা মন্ত্ৰীগৰাকীয়ে কয় যে বিশ্বব্যাপী নতুন দিল্লীয়ে যি বিশ্বব্যাপী শান্তি আৰু ন্যায়ৰ হকে প্ৰচাৰ চলাইছে সেয়া কেৱল বিশ্বগুৰুৰ বাবেহে সম্ভৱ। তেওঁ লগতে কয় যে ভাৰতে বিশ্বব্যাপী সমস্যা আৰু প্ৰত্যাহ্বানৰ মোকাবিলা কৰাত সক্ৰিয় ভূমিকা পালন কৰিব, বিশেষকৈ অৰ্থনীতি, শক্তি আৰু পাৰমাণৱিক নীতিৰ ক্ষেত্ৰত। তেওঁ লগতে কয় যে ৰাছিয়া-ইউক্ৰেইন সংঘৰ্ষ নাটো বা আমেৰিকা যুক্তৰাষ্ট্ৰৰ বিষয় নহয়, এয়া ন্যায়ৰ বিষয়ে। তেওঁ কয় “ৰাছিয়াই মোৰ দেশৰ অস্তিত্বৰ ওপৰত প্ৰশ্ন উত্থাপন কৰি আহিছে” তেওঁ লগতে কয় যে ইউক্ৰেইনে ১,৫০০ বছৰৰ ইতিহাসত কেতিয়াও আন কোনো দেশক আক্ৰমণ কৰা নাই।
যোৱা বছৰ ফেব্ৰুৱাৰীত ইউক্ৰেইন সংঘৰ্ষ আৰম্ভ হোৱাৰ পৰা প্ৰধানমন্ত্ৰী নৰেন্দ্ৰ মোদীয়ে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ লগতে ইউক্ৰেইনৰ নেতা ভলোডিমিৰ জেলেনস্কিৰ সৈতে কেইবাবাৰো কথা পাতিছে। বিশেষকৈ, ভাৰতে এতিয়ালৈকে ইউক্ৰেইনত ৰাছিয়াৰ আক্ৰমণক গৰিহণা দিয়া নাই আৰু কূটনীতি আৰু আলোচনাৰ জৰিয়তে সংকটটো সমাধান কৰিব লাগিব বুলি কৈ আহিছে। ভাৰত-ৰাছিয়াৰ শক্তি সম্পৰ্কৰ বিষয়ে সোধাত, তেওঁ কয় যে এইক্ষেত্ৰত ভাৰতৰ সঁহাৰি ইতিবাচক। তেওঁ ইউক্ৰেইন, নতুন দিল্লীক শক্তি আৰু সামৰিক চুক্তিকে ধৰি ইয়াৰ সম্পদত বৈচিত্ৰতা আনিবলৈ আহ্বান জনায়।
তেওঁ কয় ” আমি ভাৰতক আন দেশৰ সৈতে তেওঁলোকৰ অৰ্থনৈতিক সম্পৰ্কত নিৰ্দেশ দিয়াৰ স্থিতিত নাই”। তেওঁ লগতে কয় যে ভাৰতে ইয়াৰ শক্তি সম্পদ, সামৰিক চুক্তি আৰু ৰাজনৈতিক বাৰ্তালাপৰ বৈচিত্ৰতা আনিবলৈ ব্যৱহাৰিক দৃষ্টভংগী গ্ৰহণ কৰা উচিত। ইউক্ৰেইন সংঘৰ্ষ আৰম্ভ হোৱাৰ পিছত ইউক্ৰেইনৰ এজন মন্ত্ৰীয়ে এয়াই প্ৰথমবাৰৰ বাবে ভাৰত ভ্ৰমণ কৰিছে।
