বৃহস্পতিবাৰে (17 November)মেটা(META)ই ঘোষণা কৰে যে তেওঁলোকে সন্ধ্যা দেৱনাথনক তেওঁলোকৰ ইণ্ডিয়া ইউনিটৰ উপাধ্যক্ষ হিচাপে নিযুক্তি দিছে, যিটো পদত থাকি তেওঁ দেশত কোম্পানীটোৰ ব্যৱসায়ৰ নেতৃত্ব দিব।
মেটাই এক বিবৃতিত কয় যে দেৱনাথনৰ মেটা ইণ্ডিয়াৰ উপাধ্যক্ষ হিচাপে কাৰ্যকাল অহা ১ জানুৱাৰীৰ পৰা আৰম্ভ হ’ব, আৰু তেওঁ সংস্থাটোৰ নেতৃত্ব দিবলৈ দেশখনলৈ স্থানান্তৰিত হ’ব (তেওঁৰ লিংকডইন প্ৰফাইলৰ মতে, তেওঁ বৰ্তমান ছিংগাপুৰত থাকে)। ৩ নৱেম্বৰত পদত্যাগ কৰা অজিত মোহনৰ পিছত দেৱনাথন; মেটা ইণ্ডিয়াৰ সঞ্চালক তথা অংশীদাৰিত্বৰ মুৰব্বী মনীষ চোপ্ৰাই অন্তৱৰ্তীকালীন ভিত্তিত মোহনৰ পদ গ্ৰহণ কৰিছে।

Enforcement Directorate (ED)ৰ সঞ্চালক সঞ্জয় কুমাৰ মিশ্ৰৰ কাৰ্যকাল কেন্দ্ৰীয় চৰকাৰে এবছৰলৈ বৃদ্ধি কৰিছে। কেন্দ্ৰীয় চৰকাৰৰ কৰ্মচাৰী মন্ত্ৰালয়ে জাৰি কৰা এক নিৰ্দেশত কোৱা হৈছে যে ১৯৮৪ বেটচৰ আইআৰএছ(IRS) বিষয়া সঞ্জয় কুমাৰ মিশ্ৰৰ চাকৰি কাল  ১৮ নৱেম্বৰ, ২০২৩ লৈকে সম্প্ৰসাৰণ কৰা হৈছে। 
২০১৮ চনৰ  ১৯ নৱেম্বৰত মিশ্ৰক দুবছৰৰ বাবে প্ৰৱৰ্তন সঞ্চালকালয়ৰ (ED) সঞ্চালক হিচাপে নিযুক্তি দিয়া  হৈছিল। পৰৱৰ্তী সময়ত ২০২০ চনৰ ১৩ নৱেম্বৰত কেন্দ্ৰই জাৰি কৰা এক নিৰ্দেশনাত মিশ্ৰৰ দুবছৰীয়া কাৰ্যকাল তিনি বছৰলৈ বৃদ্ধি কৰিছিল। 
যোৱা বছৰ কেন্দ্ৰীয় চৰকাৰে জাৰি কৰা এক অধ্যাদেশত ইডি আৰু কেন্দ্ৰীয় অনুসন্ধান ব্যুৰো (CBI)ৰ সঞ্চালকসকলৰ কাৰ্যকাল দুবছৰৰ বাধ্যতামূলক ম্যাদৰ পিছত তিনি বছৰলৈ বৃদ্ধি কৰাৰ নিয়ম প্ৰৱৰ্তন হৈছিল। ইয়াকেলৈ সঞ্জয় কুমাৰ মিশ্ৰৰ কাৰ্যকাল একেৰাহে তৃতীয়বাৰৰ বাবে বৃদ্ধি কৰা হৈছে।
 বৃহস্পতিবাৰে চৰকাৰে জাৰি কৰা এক নিৰ্দেশত কোৱা হৈছে, “কেবিনেটৰ নিযুক্তি সমিতিয়ে প্ৰৱৰ্তন সঞ্চালকালয়ৰ সঞ্চালক হিচাপে আইআৰএছ বিষয়া সঞ্জয় কুমাৰ মিশ্ৰৰ কাৰ্যকাল এক বছৰৰ বাবে বৃদ্ধি কৰিছে।” উল্লেখ্য ইডিয়ে কেন্দ্ৰীয় বিত্ত মন্ত্ৰালয়ৰ অধীনত কাম কৰি আহিছে। দেশৰ বিত্তীয় অনিয়ম সমপকীয় গোচৰ সমূহৰ তদন্ত ইডিয়ে কৰি আহিছে।

সন্তানক ডাঙৰ-দীঘল কৰিবলৈ পিতৃ-মাতৃয়ে অশেষ কষ্ট কৰে। সকলোৱে বিচাৰে নিজৰ সন্তানে নিজৰ ভৰিৰ ওপৰত থিয় হওক, সফল হওক। জীৱনৰ এটা অধ্যায় পাৰ হোৱাৰ পিছত সন্তানক কেন্দ্ৰ কৰিয়েই গঢ় লৈ উঠে পিতৃ-মাতৃৰ জগতখন। নিজৰ সকলো চখ বাদ দি পিতৃ-মাতৃয়ে সন্তানৰ চখ পূৰণ কৰে। সেই সন্তানে যেতিয়া ডাঙৰ হৈ পিতৃ-মাতৃৰ চখ পূৰণ কৰে, তাতকৈ ভাল মুহূৰ্ত আৰু একো হ’ব নোৱাৰে।

এগৰাকী মাতৃয়ে ঘৰৰ মজিয়াত বহি সকলোৰে বাবে খাদ্য যোগাৰ কৰি আছিল। পুত্ৰই পিছফালৰ পৰা মনে মনে আহি মাকৰ ডিঙিত সোণৰ চেইন এডাল পিন্ধাই দিলে। সন্তানৰ পৰা এনে উপহাৰ পাই মাক আচৰিত হৈ পৰে। মাতৃগৰাকীৰ চকুৱে-মুখে বিয়পি পৰে সুখৰ হাঁহি। শেহতীয়াকৈ এনে এক ভিডিঅ’ ছ’চিয়েল মিডিয়াত ভাইৰেল হৈ পৰিছে।

ভিডিঅ’টোৰ কেপচনত লিখা আছিল, “সৰু উপহাৰ এটা মাৰ বাবে।” সৰুৰে পৰা মাতৃগৰাকীয়ে কষ্ট কৰি পুত্ৰক ডাঙৰ-দীঘল কৰিছিল। নিজৰ বাবে একো চিন্তা কৰা নাছিল। সেই ল’ৰাটোৱে যেতিয়া স্বাধীন হৈ নিজৰ উপাৰ্জনেৰে উপহাৰ আনিছিল তেতিয়া মাতৃগৰাকীৰ হৃদয়ত এক স্বৰ্গীয় অনুভূতিয়ে আৱৰি ধৰিছিল। পুত্ৰই দিয়া ছাৰপ্ৰাইজত মাতৃ বাকৰুদ্ধ হৈ পৰিছে। 

দেশত তুমুল জোকৰণিৰ সৃষ্টি কৰা শ্ৰদ্ধা হত্যাকাণ্ডক লৈ এতিয়া বহুতে বিভিন্ন ধৰণে মন্তব্য কৰা পৰিলক্ষিত হৈছে। এনে ক্ৰিয়া-প্ৰতিক্ৰিয়াৰ মাজতে এগৰাকী কেন্দ্ৰীয় মন্ত্ৰীয়ে এই প্ৰসংগতে কৰা মন্তব্যই এতিয়া প্ৰতিক্ৰিয়াৰ সৃষ্টি কৰা দেখা গৈছে। 

কেন্দ্ৰীয় মন্ত্ৰীগৰাকীৰ মতে, ছোৱালীবোৰে আফতাব-শ্ৰদ্ধাৰ  ঘটনাৰ পৰা শিকিব লাগে। তেওঁৰ মতে ছোৱালীবোৰে  কিয় লিভ-ইন সম্পৰ্কত লিপ্ত হ’ব লাগে? ইয়াৰ পৰিৱৰ্তে পিতৃ-মাতৃৰ ইচ্ছাক সন্মান জনাই ছোৱালীবোৰে সংসাৰ পাতিব লাগে বুলি মন্ত্ৰীগৰাকীয়ে মন্তব্য কৰিছে।যি সময়ত শ্ৰদ্ধা ৱালকাৰৰ হত্যাক লৈ সমগ্ৰ দেশতে হুলস্থূলৰ সৃষ্টি হৈছে তেনে  সময়তে কেন্দ্ৰীয় মন্ত্ৰী কৌশল কিশোৰে লিভ-ইন সম্পৰ্কৰ বিষয়ত কৰা মন্তব্যই বিতৰ্কৰ সৃষ্টি কৰিছে। তেওঁ শ্ৰদ্ধা আৰু আফতাবৰ লিভ-ইন সম্পৰ্কক এক উদাহৰণ হিচাপে দাঙি ধৰি এনে সম্পৰ্কৰ পৰা শিক্ষা ল’বলৈও ছোৱালীবোৰক আহ্বান জনায়। সেই সন্দৰ্ভত তেওঁ কয় “শিক্ষিত ছোৱালীবোৰে লিভ-ইন সম্পৰ্কলৈ যাব নালাগে। “
সংবাদ মাধ্যমক দিয়া এক সাক্ষাৎকাৰত কেন্দ্ৰীয় মন্ত্ৰীগৰাকীয়ে প্ৰশ্ন কৰে, “শিক্ষিত ছোৱালীবোৰে কিয় লিভ-ইন সম্পৰ্কৰ বাবে যায়? যদি  সম্পৰ্ক স্থাপন কৰিব লাগে, তেনেহ’লে চাইচিতি দিয়া জনৰ সৈতে যোৱা ভাল। যদি পিতৃ-মাতৃয়ে ছোৱালী এজনীৰ সম্পৰ্কক ৰাজহুৱাভাৱে সমৰ্থন কৰিব নিবিচাৰে, তেন্তে আইনীভাৱে বিবাহ কৰক আৰু একেলগে থাকক!”
উল্লেখ্য আফতাব আৰু  শ্ৰদ্ধাৰ লিভ-ইন সম্পৰ্ক  আছিল।প্ৰায় আঢ়ৈ বছৰ ধৰি শ্ৰদ্ধাই আফতাবৰ সৈতে বাস কৰিছিল। তেওঁলোকৰ মাজত বিয়া হোৱা নাছিল।পৰিয়ালৰ বাধা স্বত্বেও শ্ৰদ্ধাই আফতবৰ সৈতে থাকিবলৈ ঘৰৰ পৰা ওলাই আহিছিল। কেন্দ্ৰীয় মন্ত্ৰী কৌশল কিশোৰ।
ইপিনে কেন্দ্ৰীয় মন্ত্ৰীগৰাকীৰ মন্তব্যৰ তীব্ৰ বিৰোধিতা কৰিছে শিৱসেনাৰ নেত্ৰী প্ৰিয়ংকা চতুৰ্বেদীয়ে । প্ৰিয়ংকাই  প্ৰশ্ন কৰিছে যে কেনেকৈ এজন কেন্দ্ৰীয় মন্ত্ৰীয়ে মহিলাৰ বিষয়ে এনে মন্তব্য কৰিব পাৰে। টুইটাৰৰ জৰিয়তে শিৱসেনাৰ নেত্ৰীগৰাকীয়ে  কয়, “ভাগ্য ভাল তেওঁ যে কোৱা এই দেশত এগৰাকী মহিলাৰ জন্ম হোৱাটো অন্যায়! মহিলাসকলেই সকলো বোৰৰ বাবে দায়ী, এনে ধৰণৰ মানসিকতা দিনক দিনে বাঢ়ি আহিছে। “যদিও প্ৰধানমন্ত্ৰীয়ে নাৰী শক্তিৰ কথা কয়, তেওঁৰ নিজৰ মন্ত্ৰীৰ মুখত মহিলাৰ বিষয়ে এনে মন্তব্য নিন্দনীয় বুলিও নেত্ৰীগৰাকীয়ে কয়।  তেওঁ প্ৰধানমন্ত্ৰী নৰেন্দ্ৰ মোদীক কেন্দ্ৰীয় মন্ত্ৰীগৰাকীক তৎক্ষণাৎ বৰ্খাস্ত কৰাৰো দাবী জনায়।