ৰজা নাগাক্ষৰ দিনতে স্থাপন হোৱা নলবাৰীৰ ইতিহাস প্ৰসিদ্ধ বিল্বেশ্বৰ দেৱালয়ত আজিৰে  পৰা দুৰ্গতিনাশিনী দুৰ্গাৰ পূজা-অৰ্চনা আৰম্ভ কৰা হৈছে। দুহেজাৰ বছৰ পুৰণি ইতিহাসপ্ৰসিদ্ধ এই বিল্বেশ্বৰ দেৱালয়ত শুক্ল প্ৰতিপদ তিথিৰ আজিৰ এই দিনটোত দেৱী দুৰ্গাক শৈলপুত্ৰী ৰূপে ৰাতিপুৱাৰে পৰা পূজা–অৰ্চনা কৰা হৈছে।

 আজি পুৱাৰে পৰা ভক্তৰ ভিৰ দেখিবলৈ পোৱা গৈছে ইতিহাসপ্ৰসিদ্ধ এই বিল্বেশ্বৰ দেৱালয়ত। পৰম্পৰাগতভাৱে প্ৰতিবছৰে বিল্বেশ্বৰ দেৱালয়ত (Billeswar Devalaya) দুৰ্গা পূজা দহ দিনীয়া কাৰ্যসূচীৰে অনুষ্ঠিত কৰা হৈছিল যদিও বিগত দুবছৰত ক’ভিড মহামাৰীৰ বাবে এদিনীয়া কাৰ্যসূচীৰে পূজা–অৰ্চনা কৰা হৈছিল আৰু সমিতিৰ ফালৰ পৰা এটা ম’হ বলিৰে দেৱীৰ পূজা–অৰ্চনা কৰা হৈছিল৷

কিন্তু এইবাৰ ক’ভিড পৰিস্থিতি উন্নত হোৱাত ২৬ ছেপ্টেম্বৰ পৰা ৫ অক্টোবৰলৈ দহ দিনীয়া কাৰ্যসূচীৰে দুৰ্গতিনাশিনী দুৰ্গাৰ পূজা–অৰ্চনা কৰা হ’ব (Durga Puja at Belsor)৷ আনহাতে এইবেলি ৪০টা  ম’হ বলি দিয়াৰ লগতে প্ৰায় ২০টা ম’হ উছৰ্গা কৰা হ’ব। প্ৰায় পঞ্চাশ লক্ষ টকাৰ বাজেটেৰে এইবাৰ বিল্বেশ্বৰ দেৱালয়ত দুৰ্গা পূজা উদযাপন কৰা হ’ব।

উল্লেখ্য, এই দেৱালয়ত মূৰ্তি পূজাৰ বিপৰীতে ৰাম কলগছক দেৱীৰ ৰূপত সজাই পূজা কৰা হয়। আনহাতে নিৰাপত্তাৰ দিশতো প্ৰশাসনে বান্ধি দিয়া নীতি–নিয়মৰ ওপৰত  ব্যৱস্থা কৰিছে। উল্লেখ্য যে নামনি অসমৰ অন্যতম শৈৱশক্তিপীঠ বিল্বেশ্বৰ দেৱালয়।

NEWS18 Assamৰ বোকাখাতৰ সাংবাদিক প্ৰদ্যুৎ মহন্তৰ আজি ৪৯ বছৰ বয়সত দেহাৱসান ঘটে। দীৰ্ঘদিন ধৰি দুৰাৰোগ্য ৰোগত আক্ৰান্ত হৈ আছিল মহন্ত। আজি স্বাস্থ্যৰ অৱস্থা অতি গুৰুতৰ হোৱাত চিকিৎসালয়লৈ নি থকা অৱস্থাতে শেষনিশ্বাস ত্যাগ কৰে মহন্তই।

বোকাখাতত টিভি সাংবাদিকতাৰ বাটকটীয়া মহন্ত এন ই টিভিৰ জন্মলগ্নৰ পৰা জড়িত আছিল। পৰৱৰ্তী সময়ত NEWS18 Assam আৰু NEৰ সৈতে জড়িত হৈ তেওঁ সংবাদ সেৱা কৰি গৈছিল। ইয়াৰ লগতে কাজিৰঙা নিউজ নেটৱৰ্কৰ প্ৰতিষ্ঠাপক অধ্যক্ষ, এগৰাকী আদৰ্শ কৃষক হিচাপেও জনাজাত আছিল মহন্ত।জনমভূমি গেজেট নামৰ এখন কাকতত প্ৰথম সাংবাদিকতা জীৱন আৰম্ভ কৰা প্ৰদ্যুৎ মহন্তৰ মৃত্যুৰ বাতৰিয়ে NEWS18ৰ সমূহ পৰিয়ালকে ম্ৰিয়মাণ কৰিছে।