আজিৰে পৰা ৩ দিনৰ বাবে সম্পূৰ্ণৰূপে বন্ধ থাকিব শিলচৰ-জোৱাই ৰোড। শিলচৰ গুৱাহাটী ৬নং ৰাষ্ট্ৰীয় ঘাইপথৰ মেঘালয়ৰ সোণাপুৰ দলং মেৰামতিৰ বাবে ১৫ মার্চলৈকে এই দলংখনেদি সকলো ধৰণৰ বাহন চলাচলত নিষেধাজ্ঞা জাৰি কৰিছে ইষ্ট জয়ন্তীয়া হিল্চ জিলা প্রশাসনে। ইয়াৰ পূৰ্বে দুবাৰকৈ এনে নিষেধাজ্ঞা আছিল যদিও সৰু সৰু যান-বাহন চলাচলৰ অনুমতি দিছিল।

কিন্তু এইবাৰ সম্পূর্ণৰূপে ৩ দিনৰ বাবে বন্ধ কৰি দিয়া হ’ল শিলচৰ-জোৱাই ৰোড৷ ইয়াৰ বাবে ৰাজধানী গুৱাহাটীসহ দেশৰ আন আন ঠাইৰ সৈতে ৰাজপথেৰে যোগাযোগ বিচ্ছিন্ন হৈ পৰিল বৰাকৰ৷ এতিয়া গুৱাহাটীৰ পৰা শিলচৰলৈ কেৱল হাফলং হৈহে যাব পাৰিব।

জিলা প্ৰশাসনৰ কঠোৰ পদক্ষেপ। আগন্তুক হাইস্কুল শিক্ষান্ত, হাইমাদ্ৰাছা আৰু উচ্চতৰ মাধ্যমিক পৰীক্ষাৰ প্ৰতি লক্ষ্য ৰাখি ওদালগুৰি জিলা উপযুক্তই ১৪ মাৰ্চৰ পৰা ১২ এপ্ৰিললৈ সমগ্ৰ জিলাখনতে কাৰ্যকৰী হোৱাকৈ সন্ধিয়া ৭ বজাৰ পাছত ৪০ ডেচিবেলতকৈ অধিক প্ৰাবল্যৰ লাউড স্পীকাৰ বজোৱাত নিষেধাজ্ঞা জাৰি কৰিছে।

সংবিধানৰ ১৪৪ নম্বৰ ধাৰাৰ অধীনত জাৰি কৰা এই নিষেধাজ্ঞা ভংগ কৰিলে আইনমতে ব্যৱস্থা গ্ৰহণ কৰিব ওদালগুৰি জিলা প্ৰশাসনে।

বিশ্ববিদ্যালয় আৰু চিকিতসা মহাবিদ্যালয়ৰ অধ্যাপক বয়সৰ উৰ্ধসীমা বৃদ্ধি কৰাৰ বিপৰীতে এইবাৰ চৰকাৰে ৰাজ্যৰ গাওঁসমূহৰ পূৰ্বৰে পৰা গাওঁবুঢ়াৰূপে পৰিচিত গাওঁপ্ৰধান সকলৰ বয়সৰ উৰ্ধসীমা নিৰ্ধাৰণ কৰিছে। সেই মৰ্মে ৰাজপত্ৰৰ দ্বাৰা ঘোষণা কৰা বিধি অনুসৰি ৰাজ্যৰ ২৬৩৪৯খন ৰাজহ গাওঁত বৰ্তমানলৈকে গাওঁবুঢ়া হিচাপে কাৰ্যনিৰ্বাহ কৰি থকা এই গাওঁপ্ৰধানসকলৰ বয়সৰ সৰ্বোচ্ছ সীমা হ’ব ৬৫বছৰ। অৰ্থাত ৬৫বছৰ বয়সৰ ওপৰৰ কোনো লোকে গাৱঁত গাওঁবুঢ়া হিচাপে কাৰ্যনিৰ্বাহ কৰিব নোৱাৰিব। ইয়াৰ আগলৈকে প্ৰচলিত পৰম্পৰা অনুসৰি, একোখন গাঁৱৰ ৰাইজে নিৰ্বাচন কৰা গাওঁবুঢ়াজনৰ কাৰ্যকাল বয়সৰ দ্বাৰা ধাৰ্য কৰা হোৱা নাছিল। আনকি বহু ক্ষেত্ৰত এয়া বাপেকৰ পিছত পুতেক হোৱাৰ পৰম্পাৰে পৰিচালিত আছিল।

পিতৃৰ মৃত্যু হোৱাৰ পিছত পুত্ৰৰ সেই দায়িত্ব লাভ কৰিছিল। অতীজতে গাওঁখনৰ শান্তি শৃংখলা বৰ্তাই ৰখাৰ বাবে প্ৰভাৱশালী বয়োজ্যেষ্ঠ জনক গাওঁবুঢ়াৰূপে নিৰ্বাচন কৰা হৈছিল আৰু তেওঁৰ বাবে সেয়া আছিল গাওঁ সেৱা। তৰুণ গগৈ চৰকাৰৰ আমোলত গাওঁবুঢ়াসকলৰ নিয়মীয়া মাননিৰ লগতে চাইকেল, মোবাইল , টৰ্চ লাইট আদি সা-সুবিধা দিয়াৰ লগতে আৰক্ষী থানাৰ সৈতে তেওঁৰ সংযোগ পোনপতীয়া কৰি তোলা হয়। সেয়েহে হলেও বয়জ্যেষ্ঠ আৰু গাঁওখনৰ প্ৰভাৱশালী পূৰ্বৰ গাওঁবুঢ়াৰ অৰ্হতাসম্পন্ন পুত্ৰক সেই দায়িত্ব অৰ্পন কৰাই পৰম্পৰা বৰ্তি আছিল। কিন্তু বিজেপিয়ে কাৰ্যভাৰ গ্ৰহণ কৰাৰ পাছত গাওঁখনৰ উন্নয়নৰ পৰা আইন শৃংখলালৈ সকলো দিশত প্ৰত্যক্ষভাৱে গাওঁবুঢ়াক জড়িত কৰিব পৰা হয় আৰু শেহতীয়াকৈ চৰকাৰী বৃত্তিৰ দৰেই গাওঁবুঢ়া হিচাপে কাৰ্যনিৰ্বাহ কৰাৰ ক্ষেত্ৰত বয়সৰ সৰ্বোচ্ছ সীমা ৬৫বছৰ নিৰ্ধাৰণ কৰি মুখ্যমন্ত্ৰী ড০ হিমন্ত বিশ্ব শৰ্মা চৰকাৰে নিৰ্দেশনা জাৰি কৰিছে।

এই নিৰ্দেশনাত চৰকাৰে গাওঁবুঢ়াৰ ঠাইত গাওঁপ্ৰধান শব্দটো ব্যৱহাৰ কৰিছে। অৰ্থাত ৬৫বছৰ পৰ্যন্তহে একোজন লোক গাওঁবুঢ়া হিচাপে কাম কৰাৰ বাবে কৰ্মক্ষম হৈ থাকিব বুলি চৰকাৰে গণ্য কৰিছে। এনে সিদ্ধান্তৰ ফলত ৰাজ্যখনত অধিকাংশ গাঁৱৰে গাওঁবুঢ়া সলনি হোৱাটো প্ৰায় নিশ্চিত হৈ পৰিছে। লক্ষ্যণীয়ভাৱে চৰকাৰৰ অধিসূচনাত গাওঁবুঢ়াৰ নূন্যতম বয়স ধাৰ্য কৰা হোৱা নাই। এতিয়ালৈকে ষষ্ঠ অনুসূচীভূক্ত এলেকাতহে গাওঁবুঢ়াক গাওঁপ্ৰধান বুলি কোৱা হৈছিল আৰু তেওঁৰ নাম বা উপাধিৰেই গাওঁখনৰ নামো নামাংকৃত কৰা হৈছিল। চৰকাৰৰ এনে সিদ্ধান্তই যে, তাৎক্ষণিকভাৱে ষষ্ঠবৰ্হিভূত এলেকাত তীব্ৰ প্ৰতিক্ৰিয়াৰ সৃষ্টি কৰিব সেয়া নিশ্চিত।