ৰাজ্যিক নিৰ্বাচনী আয়োগ অসমৰ ০৫ জানুৱাৰী ২০২২ তাৰিখৰ  অধিসূচনা নং SEC.145/2019/410 অনুসৰি নিৰ্বাচন আয়োগৰ ভোটাৰ তালিকাৰ ওপৰত নিৰ্ভৰ কৰি, ০১/০১/২০২২  ভিত্তি তাৰিখ হিচাপে লৈ প্ৰস্তুত কৰা নাজিৰা আৰু শিমলুগুৰি পৌৰসভাৰ ফটো সম্বলিত  ভোটাৰ তালিকা চূড়ান্ত সংযোজন আজি ২৮ জানুৱাৰী, ২০২২  তাৰিখে সমগ্ৰ অসমৰ লগতে নাজিৰা পৌৰসভাৰ মূঠ ১০ টা ৱাৰ্ড সামৰি স্থাপন কৰা ১৩ টা ভোট কেন্দ্ৰত আৰু শিমলুগুৰি পৌৰসভাৰ মূঠ ১০ টা ৱাৰ্ড সামৰি স্থাপন কৰা ১০ টা ভোট কেন্দ্ৰত প্ৰকাশ কৰাৰ লগতে মহকুমাধিপতিৰ কাৰ্য্যালয়ত, পৌৰসভা দুখনৰ কাৰ্য্যালয়ত আৰু নাজিৰা ৰাজহ চক্ৰৰ চক্ৰ বিষয়াৰ কাৰ্য্যালয়ত ভোটাৰৰ পৰ্য্যবেক্ষনৰ বাবে প্ৰকাশৰ ব্যৱস্থা কৰা হৈছে।

যোৱা ১২/ ০১/ ২০২২ তাৰিখে প্ৰকাশ হোৱা সংযোজন তালিকাৰ সৈতে নাজিৰা পৌৰসভাৰ মূঠ পুৰুষ ভোটাৰ আছিল ৫০৩১ জন আৰু মহিলা ভোটাৰ ৫৩২৯ গৰাকীৰে সৈতে মূঠ ভোটাৰ আছিল ১০, ৩৬০ জন। বৰ্তমান দাবী আপত্তি নিষ্পত্তিৰ পাছত মূঠ পুৰুষ ভোটাৰ সংযোজন হৈছে ৫৫ জন আৰু মহিলা ভোটাৰ ৭৭ গৰাকীৰ সংযোজনৰ সৈতে মূঠ ভোটাৰ সংযোজন হৈছে ১৩২ গৰাকী । এইদৰে ভোটাৰ তালিকাত মূঠ পুৰুষ ভোটাৰৰ সংখ্যা ৫০৮৬ জন আৰু মহিলা ৫৪০৬ গৰাকীৰে সৈতে মূঠ ভোটাৰ ১০,৪৯২ জন।

সেইদৰে  শিমলুগুৰি পৌৰসভাৰ কোনো ভোটাৰৰ পৰা দাবী তথা আপত্তিৰ আবেদন নোপোৱাত  মূঠ ভোটাৰৰ সংখ্যা শিমলুগুৰি পৌৰসভাৰ মূঠ ৩,৬৬০ গৰাকী মহিলা আৰু ৩,২৪৩ জন পুৰুষৰ সৈতে মূঠ ৬৯০৩ জন। নাজিৰা নগৰৰ সৰ্বোচ্চ ১৫১২ ভোটাৰ থকা ভোটকেন্দ্ৰটো হৈছে বৰতলা উচ্চতৰ মাধ্যমিক বিদ্যালয় আৰু সৰ্বনিম্ন ২৪৭ জন ভোটাৰ থকা ভোটকেন্দ্ৰটো হৈছে কেন্দ্ৰীয় বিদ্যালয় নাজিৰা। সেইদৰে শিমলুগুৰি পৌৰসভাৰ সৰ্বোচ্চ ৮১০ জন ভোটাৰ থকা ভোটকেন্দ্ৰটো হৈছে ৰেলৱে এম ই স্কুল আৰু সৰ্বনিম্ন ৫০২ জন ভোটাৰ থকা ভোটকেন্দ্ৰটো হৈছে শিমলুগুৰি নগৰ প্ৰাথমিক বিদ্যালয়। 

১৮৯৪চনৰ ২৮জানুৱাৰীত বৃটিছ চৰকাৰৰ বিৰুদ্ধে খাজানা বৃদ্ধিৰ প্ৰতিবাদ কৰিবলৈ গৈ বৃটিছৰ গুলীত বুকু পাতি শ্বহীদ হৈছিল সাতকুৰি কৃষক। যি সকল কৃষক শ্বহীদক কুকুৰ – মেকুৰৰ দৰে অমানৱীয় ভাবে টানি, চোঁচৰাই নি একেটা গাঁততে পুতি থোৱা হৈছিল।যাৰ পিছত  পথৰুঘাট ৰণৰ অমৰ স্বহীদ সকলক শ্ৰদ্ধাঞ্জলি জনোৱাৰ উদ্দেশ্যে প্ৰত্যেক ২৮জানুৱাৰী তাৰিখে কৃষক শ্বহীদ দিৱস উদযাপন কৰি অহা হয়। 

এইবেলি কৰ’ণা মহমাৰীৰ পৰিপ্ৰেক্ষিতত অনুষ্টুপীয়াকৈ উদযাপন কৰা হয় শ্বহীদ দিৱসটি। দৰং জিলাৰ  উপায়ুক্তই পতাকা উত্তোলন, আৰক্ষী অধীক্ষক সুশান্ত বিশ্ব শৰ্মাই শ্বহীদ তৰ্পণৰে অনুষ্ঠানৰ আৰম্ভণি কৰে  আৰু পৰৱৰ্তী সময়ত গছপুলি ৰোপণ,  সৰ্বধৰ্ম প্ৰাৰ্থনা সভা,  স্বহীদ পৰিয়ালৰ সদস্যক সম্বৰ্ধনা দিয়াৰ লগতে মুকলি সভা অনুষ্ঠিত হয়।  শ্বহীদ বাকৰিত অনুষ্ঠিত মুকলি সভাত উপস্থিত হৈ  মন্ত্ৰী অতুল বৰাই স্বহীদ বেদীত সেৱা জনায়।মন্ত্ৰী গৰাকীয়ে কৃষক শ্বহীদক সন্মান জনোৱা মানে কৃষকক সন্মান জনোৱা বুলি উল্লেখ কৰি  সভাত   পথৰুঘাটৰ প্ৰকল্পস্হলীলৈ ২কোটি ২০লাখ টকাৰ পেকেজো ঘোষণা কৰে।

এই ঐতিহাসিক স্হলীখন বিশ্বত প্ৰচাৰ প্ৰসাৰৰ ক্ষেত্ৰত গুৰুত্ব দিবলৈ চৰকাৰক শ্বহীদ পৰিয়াল তথা দল-সংগঠনে দাবী জনাই। ইফালে পথৰুঘাট অঞ্চলত আজিও কৃৃৃষক ৰাইজৰ খেতি পথাৰত জলসিঞ্চনৰ ব্যৱস্থা, শ্বহীদ ক্ষেত্ৰৰ পাঁচশ মিটাৰ দূৰত থকা দ্বিগজ নৈৰ বানত ছিগা মথাউৰিটো সুদীৰ্ঘ ৩৪ বছৰে মেৰামতি নোহোৱাকৈ পৰি থকাত কৃষক ৰাইজে আজিও জীয়াতু ভোগ কৰি থাকিব লগীয়া হোৱাটো বিশেষ ভাবে লক্ষণীয়। আনহাতে প্ৰস্তাৱিত পথৰুঘাটৰ  দিপীলাত নতুনকৈ হ’ব লগীয়া উন্নযন খণ্ডৰ কাৰ্যালয় আজিও স্থাপন নোহোৱাটো পৰিতাপৰ কথা।

দলগাঁৱত দৈনিক ভূমি কেন্দ্ৰিক সংঘাতৰ বাতৰিয়ে শিৰোনাম দখল কৰাৰ সময়তে এইবাৰ ভূমি বিবাদক লৈ সংঘটিত হ’ল এক ঘৃণণীয় কাণ্ড । ঘৰত কোনো পুৰুষ নথকাৰ সুযোগ লৈ দৰঙৰ দৈপাম আৰক্ষী চকীৰ অন্তৰ্গত ১/২ নং বৰুৱাঝাৰ (অফিছ বজাৰ) ৰ আলিমুদ্দিন নামৰ এগৰাকী ব্যক্তিৰ বাসগৃহত অগ্নি সংযোগ কৰি দুটাকৈ ঘৰ ভস্মীভূত কৰাৰ অভিযোগ উঠিছে । জানিব পৰা মতে, গাঁৱ খনৰ সহোদৰ ফকিৰ আলী আৰু হুৰমুজ আলীৰ মাজত পৈতৃক সম্পত্তিৰ ভাগ বটৰুৱাক লৈ দীৰ্ঘদিনৰ পৰা বাদ বিবাদ চলি আহিছে । উভয় পক্ষৰ মাজত আইনী যুঁজ চলি থকাৰ মাজতে বুধবাৰে আবেলি প্ৰায় চাৰি বজাত কোনো পুৰুষ লোক ঘৰত নথকাৰ সুযোগ লৈ হুৰমুজ আলী সহ দুই পুত্ৰ ক্ৰমে ইব্ৰাহিম আলী আৰু এবাদুল হকে ফকিৰ আলীৰ জোৱাই আলিমুদ্দিনৰ ঘৰত জুই লগাই দিয়ে ।

উক্ত দুষ্কাৰ্য সম্পাদনত মহিলা সকলে বাধা প্ৰদানৰ চেষ্টা কৰে যদিও তেওঁলোকৰ লগতো হতাহতি কৰাৰ অভিযোগ উঠিছে । উক্ত অগ্নিকাণ্ডত  লক্ষাধিক টকাৰ সা-সম্পত্তি ক্ষতি সাধন হোৱাৰ লগতে যাবতীয় নথিপত্ৰ জুইত জাহ যায়। ঘটনা সন্দৰ্ভত দৈপাম আৰক্ষী চকীত  এজাহাৰ দাখিল কৰে যদিও আৰক্ষীয়ে বিশেষ তৎপৰতা গ্ৰহণ নকৰাৰ উভিযোগ তুলিছে আলিমুদ্দিনৰ পৰিয়ালে । সঠিক তদন্তৰ জৰিয়তে দোষীক উপযুক্ত শাস্তি প্ৰদান কৰাৰ লগতে বিষয়টি নিষ্পত্তি কৰি দিবলৈ আৰক্ষী প্ৰশাসনৰ ওচৰত কাতৰ আহ্বান জনায় ভুক্তভোগী পৰিয়ালটোৱে ।

উত্তৰ-পূৰ্বাঞ্চলৰ ভাষা-সাহিত্য-সংস্কৃতিৰ ক্ষেত্রখনৰ অধিক বিকাশৰ অৰ্থে গঠিত অন্যতম আগশাৰীৰ অনুষ্ঠান “নৰ্থ-ইষ্ট বিগ কালচাৰেল চ’ছাইটি”য়ে আগবঢ়োৱা “সাহিত্য সাধক” খিতাপ লাভ কৰি বাক্সা জিলাৰ মুছলপুৰ মহকুমালৈ গৌৱৰ কঢ়িয়াই আনিছে মহকুমাটোৰ ৰামপুৰ নিবাসী তথা কবি গৌতম ৰাভাই৷ “নৰ্থ-ইষ্ট বিগ কালচাৰেল চ’ছাইটি”ৰ সভাপতি গগণাষ্টম গগৈৰ পৌৰহিত্যত অলপতে মহানগৰীৰ দিশপুৰস্থিত পি ডব্লিউ ডি প্ৰেক্ষাগৃহত অনুষ্ঠিত এক বঁটা প্ৰদান অনুষ্ঠানত গৌতম ৰাভাক উক্ত খিতাপ প্ৰদান কৰাৰ লগতে সংস্থাটোৱে আগবঢ়োৱা তৃতীয় বাৰ্ষিক নেতাজী সুভাষ চন্দ্ৰ বসু ৰাষ্ট্ৰীয় বঁটা প্ৰদান কৰা হয়৷ 

উল্লেখযোগ্য যে বাক্সাৰ যুগসম্ভৱা কবি গৌতম ৰাভা একেধাৰে কবি,সাহিত্যিক,আবৃত্তিকাৰ আৰু এগৰাকী সুদক্ষ অভিনেতা। বৰ্তমানলৈকে গৌতম ৰাভাৰ প্ৰকাশিত গ্ৰন্থ সমূহ হৈছে “সৰি পৰা ফুল”, “যৌৱনে আমনি কৰে”, “নদী হৈ সাগৰ বিচাৰি”, “শুকুলা মেঘৰ আঁৰে আঁৰে” ইত্যাদি। আনহাতে প্ৰকাশৰ পথত সাজু হৈ উঠিছে কাব্য গ্ৰন্থ “এপাহি ফুলৰ মৰম” ৷ ৰাভাই নৰ্থ-ইষ্ট বিগ কালচাৰেল চ’ছাইটিৰ এই বঁটা ঘোষণা কৰাৰ পিছত মুছলপুৰ মহকুমাৰ সাহিত্যানুৰাগী সকলৰ মাজত আনন্দৰ বন্যা নামি আহে। অবিভক্ত নলবাৰী তথা বৰ্তমানৰ বাক্সা জিলাৰ মুছলপুৰ মহকুমাৰ ৰামপুৰ গাঁওত ১৯৫৮ চনৰ ১ মে’ত জন্ম গ্ৰহণ কৰা প্ৰয়াত গৌৰীকান্ত ৰাভা আৰু প্ৰয়াত পদুবালা ৰাভাৰ জ্যেষ্ঠ পুত্ৰ গৌতৰ ৰাভা অসম চৰকাৰৰ ৰাজহ বিভাগৰ এগৰাকী অৱসৰপ্ৰাপ্ত কৰ্মচাৰীৰ লগতে অসম সাহিত্য সভাৰো আজীৱন সভ্য ৷

বিগত চাৰিটা দশক জুৰি সাহিত্য চৰ্চা কৰি অহা গৌতম ৰাভাই লিখা কবিতা সমূহ অসমৰ আগশাৰীৰ প্ৰায়বোৰ কাকত-আলোচনীতে প্ৰকাশ হৈ আহিছে। নিৰৱচ্ছিন্নভাৱে সাহিত্য চৰ্চা অব্যাহত ৰখা গৌতম ৰাভাক নেতাজী সুভাষ চন্দ্ৰ বসু ৰাষ্ট্ৰীয় বঁটা লাভ কৰাৰ বাবে অসম সাহিত্য সভাৰ সম্পাদক দামোদৰ তালুকদাৰ, বাক্সা জিলা সাহিত্য সভা, বাক্সা জিলা সাংবাদিক সন্থা, জাৰ্ণেলিষ্ট ইউনিয়ন অৱ আছামৰ বাক্সা জিলা সমিতি, বাস্কা আঞ্চলিক ছাত্ৰ সন্থা, মুছলপুৰ প্ৰেছ ক্লাবকে আদি কৰি বিভিন্ন দল-সংগঠন তথা ব্যক্তিয়ে অভিনন্দন জ্ঞাপন কৰিছে।

কামৰূপৰ বকো সমষ্টিৰ অন্তৰ্গত নগৰবেৰাৰ ৰাঙ্গাপানীত গাওঁত পৰকীয়া প্ৰেমৰ বাবেই বাহেজ আলীৰ পৰিয়াললৈ নামিপৰিছে ঘোৰ অমানিশা। জানিব পৰা মতে ৯ বছৰ পূৰ্বে ২ নং দক্ষিণ ৰাঙ্গাপানী গাওঁৰ বাসিন্দা বাহেজ আলীয়ে সামাজিক ৰীতি নীতি মতে ৩ নং দক্ষিণ ৰাঙ্গাপানী গাওঁৰ বাসিন্দা নবাব আলীৰ কন্যা নছিৰণ নেছাক বিয়া কৰে। উল্লেখ্য যে প্ৰায় দুই বছৰ ধৰি বাহেজ আলীৰ পত্নী নছিৰণ নেছাই অবৈধ প্ৰেমত মচগুল হয় গাওঁখনৰে মস্তক আলী নামৰ যুৱক এজন সৈতে, বাহেজ আলী বাহিৰলৈ গলেই ঘৰত সোমায় প্ৰেমিক মস্তক আলী আনকি মহিলা গৰাকীকো লৈ যায় নিজ গৃহলৈ।

বিয়াৰ প্ৰলোভন চলি থাকে নাছিৰণ-মস্তকৰ অবৈধ প্ৰেমলীলা। পিছে বিয়াৰ প্ৰলোভন দি প্ৰেমিক মস্তক আলীয়ে নছিৰণ নেছাক নিজ গৃহলৈ ল’ই যায় যদিও বিয়া নপতাৰ বাবে গোচৰ তৰে প্ৰেমিক মস্তক আলীৰ বিৰুদ্ধে। পিছে গাঁৱৰ একাংশ মুখিয়াল মাজত সোমাই বৃহৎ ধনৰ লেন-দেনত বিষয়াটো মীমাংসা কৰি দিয়ে যদিও নছিৰণ নেছাই পূৰ্বৰ স্বামীৰ ঘৰত নোযোৱাৰ সিদ্ধান্ত লয়। বিমোৰত পাৰে দুখীয়া বাহেজ আলীয়ে, শেহতীয়াকৈ বাহেজ আলীৰ সতে ডাইভৰ্চ দিয়াৰ কথা ক’ই নছিৰণ নেছা আৰু পৰিয়ালে এক লাখ টকা দাবী কৰে বাহেজ আলীৰ পৰা। প্ৰায় চাৰিমাহ ধৰি দুখীয়া বাহেজ আলীয়ে দিকভ্ৰান্ত হৈ ঘুৰি ফুৰিছে ন্যায় আৰু এই জটিলতাৰ পৰিত্ৰাণ বিচাৰি।