১৯৬০ চনৰ পৰা নিৰৱচ্ছিন্নভাৱে দগীয়াপাৰা ভোগালী বিহু উৎসৱ উদযাপন কৰি আহিছে। ২০১০ চনত সোণালী জয়ন্তী গৰকা গাঁওবাসীৰ প্ৰাণৰ অনুষ্ঠানটিয়ে ক্ৰীড়া, সাহিত্য, সাংস্কৃতিক দিশত নৱপ্ৰজন্মৰ উত্তৰণ ঘটোৱাত এক বিশেষ ভূমিকা পালন কৰি আহিছে। এইবেলি হলিৰাম চহৰীয়া ক্ষেত্ৰত ৬২ সংখ্যক দগীয়াপাৰা ভোগালী বিহু উৎসৱৰ লগতে হীৰক জয়ন্তী সমাৰোহৰ সামৰণি অনুষ্ঠান জাক জমকতাৰে ৩ দিনীয়া বৰ্ণাধ্য কাৰ্যসূচীৰে পালন কৰে। ১৪ জানুৱাৰী ২০২২ তাৰিখে ৰাতিপুৱা ৫ বজাত প্ৰভাত ফেৰীৰে লগতে মেজি দাহন আৰু নাম প্ৰসঙ্গৰ পিছতেই উদযাপন সমিতিৰ সভাপতি গজেন ডেকা ডাঙৰীয়াই বিহুপতাকা উত্তোলন কৰে আৰু কৰ্ণধাৰ সমিতিৰ সভাপতি অৱসৰী শিক্ষক কৰুণা কান্ত কলিতা ডাঙৰীয়াই হীৰক জয়ন্তী সমাৰোহৰ পতাকা উত্তোলন কৰে আৰু হীৰক জয়ন্তী সমাৰোহৰ লগত সংগতি ৰাখি ৬০ খন পতাকা উত্তোলন কৰা হয়। সমাজৰ পৰা স্বৰ্গগামী হোৱা লোক সকলক শ্ৰদ্ধাঞ্জলি জনোৱাৰ বাবে স্মৃতি তৰ্পণ কাৰ্যসূচী ৰূপায়ণ কৰে অবসৰী প্ৰধান শিক্ষক কনক চন্দ্ৰ কলিতা দেৱে, প্ৰতিবছৰে প্ৰকাশ কৰি অহা প্ৰাচিৰ প্ৰত্ৰিকা উন্মোচন কৰে দুনী নিবাসী শিক্ষক কৰুণা কান্ত শৰ্মাদেৱে। খেল বিভাগৰ সভাপতি হেমন্ত কলিতা আৰু সম্পাদক দ্বীপেন ডেকা আৰু অপুৰ্ব কলিতাৰ নেতৃত্বত পৰিচালনা কৰা বিভিন্ন খেল ধেমালি প্ৰতিযোগিতা অনুষ্ঠিত হোৱাৰ পুৰ্বে বুঢ়া আৰক্ষী চকীৰ ভাৰপ্ৰাপ্ত আৰক্ষী বিষয়া মহেন্দ্ৰ শৰ্মা দেৱে অলিম্পিক শিখা প্ৰজ্বলন কৰি দিয়া ভাষণত সমাজ সংগঠিত কৰাৰ বাবে আঞ্চলিক ৰাইজৰ সহায় সহযোগিতা কামনা কৰে। দগীয়াপাৰা ভোগালী বিহু উৎসৱ উদযাপন সমিতিয়ে আজি কেইবা বছৰ ধৰি পশ্চিম দৰংৰ এগৰাকী বিশিষ্ট ব্যক্তিৰ ঘৰলৈ গৈ সম্বৰ্ধনা জনোৱা কাৰ্যসূচী অব্যাহত ৰাখি এইবেলি শিক্ষা সাহিত্যৰ লগতে সাংস্কৃতিক দিশত জৰিত ব্যক্তি ঐতিয্যমণ্ডিত খটৰা সত্ৰৰ সভাপতি যাদৱ চন্দ্ৰ মহন্ত বাপজনাৰ ঘৰলৈ গৈ সম্বৰ্ধনা জ্ঞাপন কৰে।

সন্ধিয়া ৫ বজাত বন্তি প্ৰজ্বলন কাৰ্যসূচীৰ মুখ্য প্ৰজ্জ্বলাক হিচাপে কাৰ্যসূচী ৰূপায়ণ কৰে অৱসৰী প্ৰধান শিক্ষক ভাবিৰাম ডেকা ডাঙৰীয়াই। ১৫ জানুৱাৰীৰ ৰাতিপুৱা ৫ বজাত জৱাহৰ নৱোদয় বিদ্যালয়ৰ উপাধ্যক্ষ পুষ্পৰাম কলিতাই ফ্লেগ অফ কৰা আকৰ্ষণীয় মাৰাথন দৌৰ প্ৰতিযোগিতাত অসমৰ বিভিন্ন জিলাৰ পৰা অহা প্ৰতিযোগীয়ে অংশগ্ৰহণ কৰে। সেই দিনটোতে সাহিত্য বিভাগৰ সভাপতি বৰুণ চন্দ্ৰ কলিতাৰ নেতৃত্বত আৰু সম্পাদক অবিনাশ ডেকাৰ সুপৰিকল্পনাত বিভিন্ন সাহিত্য প্ৰতিযোগিতাৰ লগতে অন্যতম আকৰ্ষণীয় ভেশছন প্ৰতিযোগিতাৰ পিছতে বিভিন্ন গীত মাত প্ৰতিযোগিতা অনুষ্ঠিত হয় আৰু চৰকাৰে বান্ধি দিয়া কভিড এছ অ পি অনুসৰণ কৰি সন্ধিয়া ৭ বজাৰ পৰা স্বৰ্গীয় ফটিক চন্দ্ৰ কলিতা সোৱৰণী মঞ্চত সাংস্কৃতিক কাৰ্যসূচী ৰূপায়িত কৰা হয়। অন্তিম দিনত ৰাতিপুৱা ১১ বজাত সাংস্কৃতিক বিভাগৰ সভাপতি অৰূপ কলিতাৰ নেতৃত্বত আৰু যুটীয়া সম্পাদক মহেন্দ্ৰ কলিতা আৰু ধ্ৰুৱজ্যোতি মহন্তৰ একান্ত প্ৰচেষ্টাত বাৰে ৰহণীয়া সাংস্কৃতিক গোষ্ঠীৰ উপস্থিতিত যুৱ সমাজকৰ্মী ৰাণা বশিষ্ঠ ডাঙৰীয়াই উদ্বোধন কৰা সাংস্কৃতিক শোভাযাত্ৰা ৰূপায়ণ কৰা হয়। আপ্যায়ন সমিতিৰ অশেষ প্ৰচেষ্টাৰ ফলত শোভাযাত্ৰা সামৰণিৰ পিছত আঞ্চলিক ৰাইজে সমূহীয়া ভোজনৰ গ্ৰহণ কৰে।

দুপৰীয়া ২ বজাত স্বৰ্গীয় অসাৰ চন্দ্ৰ ডেকা আৰু স্বৰ্গীয়া খন্তিবালা ডেকা সোৱৰণী মঞ্চত কৰ্ণধাৰ সমিতিৰ সভাপতি কৰুণা কান্ত কলিতাৰ সভাপতিত্বত মুকলি ও বটা বিটৰণী সভা অনুষ্ঠিত হয়। মুকলি সভা উদ্বোধন কৰে লোকভাষা প্ৰচাৰ সমিতিৰ মহা সচিব কুশল কলিতাই, জয়ন্ত কলিতাৰ সভাপতিত্ব আৰু মনোজ কুমাৰ চহৰীয়া আৰু দিলীপ ডেকাৰ সম্পাদনাত প্ৰকাশ কৰি উলিওৱা স্মৃতিগ্ৰন্থ “মেজি” উন্মোচন কৰে ছিপাঝাৰ সমষ্টিৰ প্ৰাক্তন বিধায়ক বিনন্দ কুমাৰ শইকীয়া দেৱে, মংগলদৈ লোকসভা সমষ্টিৰ সাংসদ সন্মানীয় দিলীপ শইকীয়া দেৱে মুখ্য অতিথিৰ হিচাপে সভা শুৱনি কৰি আঞ্চলিক ৰাইজক কৃতাৰ্থ কৰে আৰু শুভেচ্ছামূলক ভাষণ প্ৰদান কৰে, স্থানীয় বিধায়ক তথা অসম সাহিত্য সভাৰ প্ৰাক্তন সভাপতি পৰমানন্দ ৰাজবংশী দেৱে বিশিষ্ট অতিথি হিচাপে সভাত ভাষণ প্ৰদান কৰে। সভাত নিৰ্দিষ্ট বক্তা হিচাবে ভাষণ ৰাখে যুৱ সমালোচক ড০ জয়ন্ত ডেকা দেৱে, সভাত দৰং জিলা পৰিষদৰ মুখ্য কাৰ্যাবাহী বিষয়া ৰমেণ মালাকাৰ দেৱ উপস্থিত থাকি সভাৰ শোভা বৰ্ধন কৰে। মীন উন্নয়ন নিগম অসমৰ অধ্যক্ষ গুৰুজ্যোতি দাস ডাঙৰীয়া সভাৰ পুৰ্বে উপস্থিত হৈ আঞ্চলিক ৰাইজক উদ্দেশ্যি বক্তব্য ৰাখে।

এই তিনিদিনীয়া বৰ্ণাধ্য কাৰ্যসূচীৰে অনুষ্ঠানভাগি সফল ৰূপায়ণ কৰাত আঞ্চলিক ৰাইজে যিধৰণে বিভিন্ন দিহা পৰামৰ্শৰ লগতে আৰ্থিক ভাবে সহায়ৰ হাত আগবঢ়ালে আৰু স্থানীয় প্ৰশাসনৰ একান্ত সহযোগৰ বাবে উদযাপন সমিতিৰ হৈ যুটীয়া সাধাৰণ সম্পাদক জগদীশ ডেকা আৰু জীৱন বৰুৱাই আন্তৰিক ধন্যবাদ আৰু কৃতজ্ঞতা জ্ঞাপন কৰে।

দিনক- দিনে নিবনুৱা সমস্যা বৃদ্ধি পোৱাৰ বিপৰীতে আশাৰ বতৰা কঢ়িয়াই লৈ আনি সংস্থাপনৰ বাট দেখুৱাইছে ওদালগুৰি জিলাৰ খৈৰাবাৰীৰ কুহিয়াঁৰকুছিৰ ’চান এনজিঅ’ই ৷ ২০১৬ বৰ্ষত সমাজ সেৱক বাপন বসুমতাৰী আৰু বকুল স্বৰ্গীয়াৰীৰ নেতৃত্বত গঠিত ’চান এনজিঅ’ই কুহিয়াৰকুছি মালদাংপাৰা গাঁৱৰ কেইগৰাকীমান নিবনুৱা যুৱক সকলক একগোট কৰি এইবেলি গাঁৱৰে কৃষক সকলৰ কৃষিভূমিত ৮০ বিঘা সৰিয়হ ,প্ৰায় ১৪ বিঘা আলু-মটৰৰ খেতি কৰি স্বাৱলম্বী হোৱাৰ সুন্দৰ নিদৰ্শন দাঙি ধৰিছে ৷ উক্ত কৃষিভূমিত দৈনিক চোৱাচিতা কৰি আপডাল কৰিছে এনজিঅ’ৰ প্ৰধান বাপন বসুমতাৰী লগতে সদস্য সকলে ৷ মালদাংপাৰাৰ কৃষিভূমি বৰ্তমান সোণোৱালী ৰঙৰ দলিচা এখনহে যেন আৰি থৈছে এনে লাগে ৷

চৰকাৰৰ কোনো সহায়-সহযোগিতা অবিহনে বাপন বসুমতাৰী আৰু গকুল স্বৰ্গীয়াৰীৰ ঐকান্তিক প্ৰচেষ্টাৰে গঢ় দিয়া এনজিঅ’টোৱে প্ৰাৰম্ভিকভাৱে গাঁৱৰ নিবনুৱা যুৱক সকলক মাটিতে সোণ বুটলিব পাৰি এই মন্ত্ৰৰে আপ্লুত কৰি স্বাৱলম্বী হোৱাৰ পথ দেখুৱাইছে ৷ গাঁৱৰ পৰা দূৰ-দূৰনিলৈ কৰ্মসংস্থাপন বিচাৰি যাতে গাঁৱৰ ল’ৰা গাঁৱতে সংস্থাপন লাভ কৰিব পাৰে তাৰে সুন্দৰ নিদৰ্শন দাঙি ধৰিছে ’চান এনজিঅ’ই ৷ উল্লেখ্য যে চৰকাৰে কৃষকৰ উন্নয়ণৰ নামত বিয়াগোম আঁচনি লৈছে যদিও কোনো সুবিধা লাভৰ পৰা বঞ্চিত ’চান এনজিঅ’ৰ কৃষক সকল ৷ যদিহে কৃষি বিভাগে উক্ত কুহিয়াৰকুছিৰ বৃহত্তৰ কৃষিভূমিত জলসিঞ্চনৰ ব্যৱস্থা কৰি দিলেহেতেন তেন্তে আৰু অধিক লাভাম্বিত হ’লহেতেন বুলি আক্ষেপেৰে উষ্মা প্ৰকাশ কৰিছে কৃষক সকলে ৷ অনাগত দিনত জিলাৰ কৃষি বিভাগে এই কুহিয়াঁৰকুছি মালদাংপাৰাৰ কৃষক সকলৰ উন্নয়ণৰ বাবে কি ব্যৱস্থা লয় এয়া হ’ব লক্ষণীয় বিষয়

বিদ্যুৎ সংযোক্ত হৈ খৈৰাবাৰী বটাবাৰী দেউৰীয়াপাৰা গাঁ‌ৱত  বিস্তৰ ক্ষতি সাধন।উল্লেখ্য যে ওদালগুৰি জিলা খৈৰাবাৰী থানা অন্তৰ্গত খৈৰাবাৰী ১নং বটাবাৰী দেউৰীয়াপাৰা গাঁ‌ৱৰ নিবাসী বিনোদ স্বৰ্গিয়াৰীৰ বাস গৃহত বৃহস্পতিবাৰ দিনা আবেলি দুৰ্ভাগ্য বসত বিদ্যুৎ বিজুতিৰ ফলত ভয়ংকৰ অগ্নিকাণ্ডৰ অবিৰ্ভাৱ হয়। ফলত কম সময়ৰ ভিতৰতে জুইয়ে আৱৰি লোৱাত গৰাকী বিনোদ স্বৰ্গিয়াৰীয়ে জুই নুমুৱাবলৈ অপ্ৰাণ প্ৰচেষ্টা চলাই যদিও ব্যৰ্থ হয়। তাৰ পৰিপেক্ষিতত নিমিশতে দাউ দাউ কৈ জ্বলি ঘৰখনৰ নথিপত্ৰ সহ সম্পূৰ্ণ  সা সম্পত্তি ভস্মীভূত কৰি পেলোৱাত বিনোদ স্বৰ্গিয়াৰীৰ বিস্তৰ ক্ষতি সাধন হয়।

কামৰূপৰ নগৰবেৰা আৰক্ষী থানাত অন্তৰ্গত কল্যাণপুৰত মৃতদেহ সন্মুখত লৈ ৰাইজে সাৱস্ত্য কৰিলে উত্তাল প্ৰতিবাদ। দোষীক ফাঁচীৰ দাবী আৰু প্ৰশাসনৰ নিস্কৃয়তাৰ বিৰুদ্ধে কল্যাণপুৰ গাওঁৰ শ শ লোকে মৃতদেহ সন্মুখত লৈ সাৱ্যস্ত কৰিলে এই প্ৰতিবাদ। স্মৰ্তৱ্য যে বুধবাৰে নিশা কল্যাণপুৰ গাওঁত নিশা এডোখৰ ভূমিক কেন্দ্ৰ কৰি সহোদৰ ভাই ককাইৰ মাজত সংঘটিত হৈছিল প্ৰচণ্ড মাৰপিট, মাৰপিটৰ ফলত উভয় পক্ষৰে দহজনকৈ লোক আহত হৈছিল আৰু আহত সকলক নগৰবেৰা চিকিৎসালয়ত ভৰ্তি কৰোৱা হৈছিল যদিও মিজানুৰ ৰহমান আৰু ছানোৱাৰ হুছেইনৰ অৱস্থা সংকটজনক দেখি চিকিৎসকে উন্নত চিকিৎসাৰ বাবে জি এম ছি লৈ প্ৰেৰণ কৰে। গুৰুতৰভাৱে আহত মিজানুৰ ৰহমান (৪৫) নামৰ লোকজনক জি এম ছি লৈ নিয়া অৱস্থাত আদবাটতে মৃত্যু ঘটিছিল। মৃতদেহ ঘৰলৈ ওভটাই নি এই হত্যাকাণ্ডত জড়িত সকলৰ উপযুক্ত শাস্তি প্ৰদানৰ দাবীত মৃতদেহ সন্মুখত ৰাখি ৰাইজ প্ৰতিবাদ মুখৰ হৈ পৰে। আনহাতে প্ৰশাসনৰ লোক উপস্থিত নোহোৱা পৰ্যন্ত মৃতদেহ সৎকাৰৰ দিহা কৰা নহয় বুলিও আকোঁৰগোজ হৈ পৰে প্ৰতিবাদী ৰাইজ। ভূমি কেন্দ্ৰিক সংঘৰ্ষত এজনৰ মৃত্যু আৰু প্ৰতিবাদী কাৰ্যসূচীয়ে উত্তপ্ত হৈ পৰে নগৰবেৰাৰ কল্যাণপুৰ অঞ্চলটো।