শিক্ষক-ছাত্ৰীৰ সম্পৰ্ক কলুষিত কৰা অধ্যাপক জয়নাল আবেদিনক বহিষ্কাৰৰ দাবীত ছাত্ৰ একতা সভাৰ স্মাৰকপত্ৰ দাখিল। গোসাঁইগাঁও মহকুমাৰ অন্তৰ্গত অন্যতম শিক্ষানুষ্ঠান গোসাঁইগাঁও মহাবিদ্যালয়ৰ ইংৰাজী বিভাগৰ মুৰব্বী অধ্যাপক জয়নাল আবেদিনৰ নিজ মহাবিদ্যালয়ৰ ছাত্ৰীৰ সৈতে অশ্লীল কল ৰেকৰ্ডিং ভাইৰেল হোৱাত বিগত তিনি দিনৰ পৰা গোসাঁইগাঁও অঞ্চলত চাঞ্চল্যৰ সৃষ্টি হৈছে। গোসাঁইগাঁও মহাবিদ্যালয়ৰ ইংৰাজী বিভাগৰ মুৰব্বী অধ্যাপক তথা  সহযোগী অধ্যাপক জয়নাল আবেদিনে নিজ বিভাগৰ ছাত্ৰীক ফোনযোগে অশ্লীল প্ৰস্তাৱ দিয়াক কেন্দ্ৰ কৰি বিগত তিনি দিনৰ পৰা গোসাঁইগাঁওৰ সদৰ চহৰত এক উত্তপ্ত পৰিস্থিতিৰ সৃষ্টি হয়। আজি দ্বিতীয় দিনাও সহযোগী অধ্যাপক জয়নাল আবেদিনক নিলম্বন কৰাৰ দাবীত গোসাঁইগাঁও মহাবিদ্যালয়ত ছাত্ৰ একতা সভাই মহাবিদ্যালয়ৰ অধ্যক্ষৰ কাৰ্যালয়ৰ সন্মুখত অৱস্থান ধৰ্মঘট কাৰ্যসূচী পালন কৰে। উক্ত কাৰ্যসূচীত মহাবিদ্যালয়খনৰ ছাত্ৰ একতা সভাই অধ্যাপক জয়নাল আবেদীনক নিলম্বন কৰক, অধ্যাপক জয়নাল আবেদীনক গ্ৰেফতাৰ কৰক, জয়নাল আবেদীন মুৰ্দাবাদ, ছাত্ৰ-ছাত্ৰীক মানসিক অত্যাচাৰ বন্ধ কৰক, শিক্ষকৰ ভাণ্ডামি বন্ধ কৰক আদিকে ধৰি শ্লোগানেৰে পৰিৱেশ উত্তাল কৰি  মহাবিদ্যালয়খনৰ পৰা গোসাঁইগাঁও অধ্যক্ষৰ কাৰ্যালয়ৰ সন্মুখত অৱস্থান ধৰ্মঘট কাৰ্যসূচী পালন কৰে। কাৰ্যসূচীৰ অন্তত গোসাঁইগাঁও মহাবিদ্যালয় ছাত্ৰ একতা সভাই চৰিত্ৰহীন শিক্ষকগৰাকীক নিলম্বন কৰাৰ বাবে গোসাঁইগাঁও মহাবিদ্যালয়ৰ ভাৰপ্ৰাপ্ত অধ্যক্ষ ড° কুমুদ ৰঞ্জন বসুমতাৰীক এক কেইবাদফীয়া স্মাৰকপত্ৰ পত্ৰ প্ৰদান কৰে। স্মাৰকপত্ৰ পত্ৰ গ্ৰহণ কৰাৰ পিছত ভাৰপ্ৰাপ্ত অধ্যক্ষ ড° কুমুদ ৰঞ্জন বসুমতাৰীয়ে সাংবাদিকৰ আগত কয় যে এই সন্দৰ্ভত অতিশীঘ্ৰে এক তদন্ত সমিতি গঠন কৰা হ’ব। তদন্ত সমিতিৰ প্ৰতিবেদনৰ পিছত service rule অনুসৰি বিহীত ব্যৱস্থা কৰা হ’ব। পৰৱৰ্তী সময়ত কি পদক্ষেপ গ্ৰহণ কৰে, সেইয়া হ’ব লক্ষণীয়। 

ৰাজ্যত পুনৰ “কা” বিৰোধী আন্দোলনৰ উকমুকনি। এইবাৰ আমগুৰিত “নাগৰিকত্ব সংশোধনী আইন” বাতিল কৰাৰ দাবীত উত্তাল প্ৰতিবাদ।শিৱসাগৰ জিলাৰ আমগুৰি নগৰৰ চাৰিআলিত কৃষক মুক্তি  সংগ্ৰাম সমিতি আৰু ছাত্ৰ মুক্তি সংগ্ৰাম সমিতিয়ে প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় সংখ্যালঘু উন্নয়ন মন্ত্ৰী মুখতাৰ আব্বাছ নকভিৰ প্ৰতিমূৰ্তি দাহ কৰি উত্তাল প্ৰতিবাদ সাব্যস্ত কৰে।প্ৰতিবাদকাৰী সকলে নৰেন্দ্ৰ মোদী গ’ বেক, নৰেন্দ্ৰ মোদীৰ কাম নাই, আব্বাছ নকভিৰ কাম নাই, বিজেপিৰ কাম নাই, বিজেপি হুচিয়াৰ, মুখ্যমন্ত্ৰী হিমন্ত বিশ্ব হুচিয়াৰ, হিমন্ত বিশ্ব গ বেক, নাগৰিকত্ব সংশোধনী আইন বাতিল কৰক, অসমত বিদেশী সংস্হাপন কৰিবলৈ দিয়া নহব আদি শ্লোগানেৰে পৰিবেশ উত্তাল কৰি তোলে।প্ৰতিবাদস্থলীৰ পৰাই ছাত্ৰ মুক্তি সংগ্ৰাম সমিতিৰ কেন্দ্ৰীয় সাংগঠনিক সম্পাদক ঋতুমণি হাজৰিকাই বিজেপি চৰকাৰ আৰু মুখ্যমন্ত্ৰী হিমন্ত বিশ্ব শৰ্মাক সকীয়াই দি কয় বিজেপি চৰকাৰ খনে অসমত জোৰদবস্থ নাগৰিকত্ব সংশোধনী আইনৰ জৰিয়তে বিদেশী জাপি দিব বিচাৰিছে। অসমীয়াই স্বতঃস্ফূৰ্ত ভাবে ৰাজপথলৈ ওলাই প্ৰতিবাদ সাব্যস্ত কৰি জাতি বিৰোধী ‘কা’ বাতিল কৰিব লাগিব বুলি বাৰে বাৰে জনাই দিয়াৰ পিছটো নৰেন্দ্ৰ মোদী নেতৃত্বাধীন বিজেপি চৰকাৰ খনে অসমীয়াৰ আন্দোলনক ভেঙুচালি কৰিছে। বিজেপি চৰকাৰ খনে অসমৰ পাঁচজনকৈ তেজাল যুৱকক হত্যা কৰি কেৱল অসমীয়াৰ আন্দোলনটোক বিপথে পৰিচালিত কৰিলে। পুনৰ জাতিবিৰোধী নাগৰিকত্ব সংশোধনী আইন বাতিলৰ দাবীত কৃষক মুক্তি সংগ্ৰাম সমিতিয়ে অসমৰ জনতাক একত্ৰিত কৰি পুনৰ ৰাজপথত উত্তাল প্ৰৰিবাদ সাব্যস্ত কৰিব বুলি হিমন্ত বিশ্ব শৰ্মাৰ নেতৃত্বাধীন বিজেপি  চৰকাৰক সকীয়াই দিয়ে। এইবাৰ চৰকাৰৰ দ্বাৰা পৰিচালিত কোনো অপশক্তিয়ে ‘কা’ বিৰোধী আন্দোলনটোক ৰাজপথৰ পৰা খেলপথাৰলৈ নিবলৈ চেষ্টা কৰিব নোৱাৰিব বুলিও কয়। লগতে নাচগানৰ জৰিয়তেও আন্দোলনটোক বিপথে পৰিচালিত কৰিবলৈ নিদিবলৈ অসমৰ জনতাক আহ্বান জনায়। কেন্দ্ৰীয় সংখ্যালঘু উন্নয়ন মন্ত্ৰী আব্বাছ নকভিৰকো সকীয়াই দিয়ে অসমত অসমীয়াৰ গাত শেষ টোপাল তেজ থকা লৈকে নাগৰিকত্ব সংশোধনী আইন প্ৰযোজ্য হবলৈ নিদিয়ে বুলি আমগুৰি নগৰ চাৰিআলিৰ পৰা জনাই দিয়ে।  মুখ্যমন্ত্ৰী হিমন্ত বিশ্ব শৰ্মাই অসমৰ বিজেপি নেতৃত্বাধীন সকলো বিধায়কক দিল্লীলৈ নি কেৱল মাত্ৰ ভোজভাতৰ মেল পাতি অসমত ‘কা’ প্ৰযোজ্য কৰাৰ সিদ্ধান্ত যে লৈ আহিছে সেইয়া অসমৰ জনতাই বুজি পাইছে বুলি কোৱাৰ লগতে হিমন্ত বিশ্ব শৰ্মাৰ কেন্দ্ৰক তেল মৰা এই সপোন সফল নহব বুলি জনাই দিয়ে। লগতে অসমৰ ৰাইজক নাগৰিকত্ব সংশোধনী আইন বাতিলৰ দাবীত আপোচবিহীন সংগ্ৰামৰ বাবে ৰাজপথলৈ ওলাই আহিবলৈ আহ্বান জনোৱাৰ লগতে এইয়া কেৱল মাত্ৰ আৰম্ভণি, পাঁচজন শ্বহীদৰ তেজক অসমীয়াই অথলে যাবলৈ নিদিয়ে বুলি চৰকাৰ খনক জনাই দিয়ে। প্ৰতিবাদস্থলীত কৃষক মুক্তিৰ শিৱসাগৰ জিলাৰ কাৰ্যকৰী সভাপতি দুলু হাজৰিকা, যোৰহাট জিলাৰ অম্লান গগৈ, ৰুবুল বৰুৱা, ছাত্ৰ মুক্তিৰ শিৱসাগৰ জিলাৰ কাৰ্যকৰী সভাপতি পল্লব শইকীয়া, সম্পাদক সীমান্ত গগৈ, আমগুৰি আঞ্চলিক ৰবীন হাজৰিকা, ৰণটো শইকীয়া, বৰাহী বাৰী আঞ্চলিকৰ দেৱৰাজ তামুলী, আদিত্য গগৈ,কল্যান গগৈ, দ্বীপজ্যোতি গগৈ উপস্থিত থাকে।

চৰাইদেউ জিলাৰ  সাপেখাতীৰ বাসিন্দা অৱসৰ প্ৰাপ্ত শিক্ষক তথা  ক্ৰীড়া সংগঠক পোৱাল চন্দ্ৰ চাংমাইৰ নিশা বাৰ্ধক্য জনীত কাৰণত   পৰলোকগামী হোৱাত সমগ্র অঞ্চলতে শোকৰ ছাঁ পৰিছে । ১৯৬২ চনৰে পৰা সাপেখাতী উচ্চতৰ মাধ্যমিক বিদ্যালয়ত সহকাৰী শিক্ষক হিচাবে কৰ্মৰত হৈ ১৯৯৬ চনত অৱসৰ গ্ৰহণ কৰা ক্ৰীড়া সংগঠক তথা সমাজকৰ্মী পোৱাল চন্দ্ৰ চাংমাইয়ে  ১৯৬৩ চনৰ পৰাই অবিভক্ত শিৱসাগৰ জিলা আৰু বৰ্তমান চৰাইদেউ জিলাখনৰ ক্ৰীড়া ক্ষেত্ৰখনত যথেষ্ট অৱদান আগবঢ়াই আহিছিল ।১৯৬৩ চনতে সাপেখাতী ক্ৰীড়া সন্থা প্ৰতিষ্ঠা কৰি বৰহাট,বগাদাত ,টিংখং আদি অঞ্চলত ফুটবল, কাবাডী ,খো-খো , এথেলেটিকচ্ আদিত বহু ৰাষ্ট্ৰীয় আৰু আন্তৰাষ্ট্ৰীয় খেলুৱৈ সৃষ্টি কৰিছিল । চৰাইদেউ জিলা ক্ৰীড়া সন্থাৰ লগত প্ৰতিষ্ঠা কালৰ পৰা জড়িত হোৱাৰ লগতে প্ৰায় ৬২ বছৰ ক্ৰীড়া জগতৰ লগত জড়িত হৈ  আছিল । অসম চৰকাৰৰ ২০২০ -২১বৰ্ষৰ ৰাজ্যিক ক্ৰীড়া পেঞ্চনৰ স্বকৃতি লাভ কৰিবলৈ সক্ষম হৈছিল । তেখেতৰ মৃত্যুত সাপেখাতী অঞ্চলৰ বিভিন্ন  দল সংগঠন আৰু অনুষ্ঠান প্ৰতিষ্ঠানে গভীৰ শোক প্ৰকাশ কৰিছে ৷